Solomoni wati waja fumu ya Ayisirayeli, Yehova wangumufumba kuti: ‘Ukhumba kuti ndikupaskenji?’ Solomoni wanguti: ‘Ndeche munamana ndipu ndiziŵa cha vo ndichita. Chondi mundipaski zeru kuti ndilongozgi umampha ŵanthu ŵinu.’ Yehova wangukamba kuti: ‘Chifukwa chakuti wapempha zeru, ujengi munthu wazeru ukongwa kuluska weyosi pacharu chapasi. Ndikuchitisengi so kuti uje wakukhupuka ukongwa. Asani undivwiyengi, ujengi ndi umoyu utali.’

Solomoni wangwamba kuzenga nyumba yakusopiyamu. Iyu wangugwirisiya ntchitu golidi wamampha ukongwa, siliva, vimiti kweniso mya. Anthulumi ndi anthukazi masawuzandi nganandi alusu angugwira ntchitu yakuzenga nyumba yakusopiyamu. Pati pajumpha vyaka 7, nyumba yakusopiyamu anguyipereka kwaku Yehova. Nyumba iyi yenga ndi guŵa la sembi ndipu pa guŵa lo anguŵikapu sembi. Solomoni wangugwada panthazi pa guŵa lo ndipu wangupemphera kuti: ‘Yehova, nyumba yakusopiyamu iyi njimana ndipuso njambula kutowa ukongwa kwaku yimwi kweni londiyani kusopa kwidu ndipu vwisiyani mapempheru ngidu.’ Kumbi nyumba yakusopiyamu ndipuso pempheru laku Solomoni, wanguviwona wuli Yehova? Solomoni wati wamaliza ŵaka kupemphera, motu ungutuwa kuchanya ndi kotcha sembi zo zenga paguŵa. Yehova wanguyilonde nyumba yakusopiyamu. Ayisirayeli ŵati awona ivi, angukondwa.

Fumu Solomoni yaziŵikanga ukongwa mu Isirayeli kweniso muvigaŵa vinyaki vakutali chifukwa cha zeru zaki. Ŵanthu azanga kwaku Solomoni kuzipempha chovyu pa masuzgu ngawu. Fumukazi ya ku Sheba yinguza kwaku Solomoni kuti yimuyesi ndi mafumbu ngakusuzga. Yati yavwa vo wangumuka, yinguti: ‘Ndinguvwana cha vo ŵanthu andikambiyanga vakukwaskana ndi yiwi kweni sonu ndajiwone ndija kuti we ndi zeru ukongwa kuluska mo ŵanthu akambiyanga. Yehova Chiuta waku, wakutumbika.’ Pa nyengu iyi, vinthu vaŵayendiyanga umampha Ayisirayeli ndipu akondwanga kweni venga pafupi kusintha.

Pa nyengu yo Solomoni wasopanga Yehova, Ayisirayeli ajanga mwachimangu. Solomoni wanguto anthukazi anandi akutuliya muvyaru vinyaki wo asopanga achiuta aboza. Kamana ndi kamana, Solomoni wangusintha ndipu nayu wangwamba kusopa achiuta aboza. Yehova wangukwiya ndipu wangukambiya Solomoni kuti: ‘Isirayeli watuzgikengeku ku banja laku ndipu wagaŵikengi paŵi. Chigaŵa chikulu ndichiperekengi ku yumoza wa ateŵeti ŵaku ndipu banja laku lilamuliyengi chigaŵa chimana.’

Yehova wangugwiriskiya so ntchitu mchimi Ahiya kuti walongo vo wakhumbanga kuchita. Yerobowamu, yumoza wa ateŵeti aku Solomoni wayendanga mumsewu ndipu wangukumana ndi mchimi Ahiya. Iyu wangukeruwa chakuvwala chaki vigaŵa 12 ndipu wangukambiya Yerobowamu kuti: ‘Yehova watuzgengeku ufumu wa Isirayeli ku banja laku Solomoni ndipu wawugaŵengi paŵi. Uto vigaŵa 10 ivi chifukwa ujengi fumu ya mafuku 10.’ Fumu Solomoni yinguvwa vo vinguchitika ndipu yakhumbanga kubaya Yerobowamu! Mwaviyo, Yerobowamu wanguthaŵiya ku Ijipiti. Pati pajumpha nyengu Solomoni wangufwa ndipu mwana waki Rehobowamu wangwamba kulamuliya. Mwaviyo, Yerobowamu wanguwona kuti wawere ku Isirayeli chifukwa watingi wakabayikengi cha.

Ŵara ŵa Isirayeli angukambiya Rehobowamu kuti: ‘Asani ŵanthu yaŵa uchitengi nawu vinthu umampha, ajengi akugomezgeka kwaku yiwi.’ Kweni anyaki aku Rehobowamu angukamba kuti: ‘Ukhumbika kuŵasuzga ŵanthu yaŵa! Uŵagwiriskengi ntchitu zinandi!’ Rehobowamu wangulondo ulongozgi wa anyamata wo wachezanga nawu. Iyu waŵachitiyanga nkhaza ŵanthu ndipu mafuku 10 nga Ayisirayeli ngangumugalukiya. Yiwu angusankha Yerobowamu kuja fumu ya mafuku 10 ngo ngaziŵikanga kuti, ufumu wa Isirayeli. Mafuku nganyaki ngaŵi ngaziŵikanga kuti, ufumu wa Yuda ndipu ngangulutirizga kuja ngakugomezgeka kwaku Rehobowamu. Umu ndimu mafuku 12 nga Isirayeli ngangugaŵikiya.

Yerobowamu wakhumbanga cha kuti ŵanthu ŵaki alutengi ku Yerusalemu kuchisopa Yehova chifukwa ndiku Rehobowamu walamuliyanga. Utichiziŵa chifukwa chaki? Yerobowamu wawopanga kuti ŵanthu ŵaki amuthaŵengi ndipu alondongi Rehobowamu. Mwaviyo, wangupanga vikozgu viŵi va ŵana a ng’ombi a golidi ndipu wangukambiya ŵanthu kuti: ‘Ku Yerusalemu nkhutali. Mungasope kwenikunu.’ Ŵanthu wo anguleka so kusopa Yehova ndipu angwamba kusopa ŵana a ng’ombi agolidi.