Mafumu nganandi ngo ngangulamuliya Ufumu wa Isirayeli wa mafuku 10 ngenga ngaheni kweni Ahabu yenga fumu yiheni ukongwa. Iyu wanguto munthukazi muheni yo wasopanga Bala. Zina laki wenga Yezebeli. Ahabu ndi Yezebeli anguchitisa kuti ŵanthu anandi asopengi Bala ndipu angubaya achimi aku Yehova. Kumbi Yehova wanguchitanjipu? Iyu wangutuma mchimi Eliya kuti wakakambi uthenga kwaku Ahabu.

Eliya wangukambiya Fumu Ahabu kuti chifukwa cha vinthu viheni vo wachitanga, charu cha Isirayeli muwengi vuwa cha. Vuwa yinguwa cha kwa vyaka vakujumpha vitatu, mbewu zingume cha ndipu ŵanthu ŵengavi chakurya. Pati pajumpha nyengu, Yehova wangutuma Eliya kuti waluti so kwaku Ahabu. Fumu yo yinguti: ‘Ndiwi wakusuzga ukongwa! Iwi ndiwi wachitisa kuti kuŵi nja.’ Eliya wangumuka kuti: ‘Ndini cha ndachitisa kuti kuje nja. Yimwi ndimwi mwachitiska chifukwa chakusopa Bala. Tiyeni tiwoni yo ndi Chiuta wauneneska. Wunganisani Ayisirayeli ndipuso achimi aku Bala pachanya Paphiri la Karimeli.’

Ŵanthu anguwungana paphiri. Eliya wanguti: ‘Sankhani. Asani Yehova ndi Chiuta wauneneska mulondoni. Asani ndi Bala londoni iyu. Tiyeni tiwoni yo ndi Chiuta wauneneska. Achimi 450 aku Bala anozgi sembi ndipu apempheri kwaku chiuta wawu ndipu nani ndinozgengi sembi yangu, ndipempherengi kwaku Yehova. Chiuta yo wamukengi mwakutumiza motu ndiyu Chiuta wauneneska.’ Ŵanthu wosi anguzomereza.

Achimi aku Bala angunozga sembi yawu. Yiwu angupemphera zuŵa losi kwaku chiuta wawu kuti: ‘Bala, timuki!’ Bala wati watondeka kumuka, Eliya wangwamba kuseka Bala. Iyu wanguti: ‘Danirizani ukongwa. Panyaki wagona, pakhumbika munthu kuti wamuyuski.’ Kwati kwafipa, achimi aku Bala angulutirizga kupemphera. Kweni Bala wanguŵamuka mbwenu cha.

Eliya wanguŵika sembi yaki paguŵa ndipu wangudilapu maji. Pavuli paki wangupemphera kuti: ‘Yehova, chondi aziŵiseni ŵanthu kuti imwi ndimwi Chiuta wauneneska.’ Wati wamaliza ŵaka kupemphera, Yehova wangutuma motu kutuwa kuchanya ndipu ungupiliza sembi yo. Ŵanthu angudaniriza kuti: ‘Yehova ndiyu Chiuta wauneneska!’ Eliya wanguti: ‘Mungazomerezanga cha kuti achimi aku Bala athaŵi!’ Pa zuŵa lenili, achimi 450 aku Bala angubayika.

Kusirya linyaki la nyanja kwati kwawoneka kamutambu, Eliya wangukambiya Ahabu kuti: ‘Kutuza chimphepu. Kwera galeta laku, kanga kunyumba.’ Kuchanya kunguchita mudima chifukwa cha mitambu, kunguputa chimphepu ndipu kungwamba kuwa chivuwa chikulu. Pakumaliya, nja yingumala. Ahabu wanguyesesa kutchimbiza gareta laki. Yehova wanguchitisa kuti Eliya watchimbiyi kuluska gareta! Kumbi masuzgu ngosi ngaku Eliya ngangumaliya penapa? Tiyi tiwoni.

Yezebeli wati wavwa vo vinguchitikiya achimi aku Bala, wangukwiya ukongwa. Iyu wangutuma uthenga kwaku Eliya kuti: ‘Mawa ufwengi nge mo akufwiya achimi aku Bala.’ Eliya wanguchita mantha ukongwa ndipu wanguthaŵiya kuchipululu. Iyu wangupemphera kuti: ‘Yehova, ndifiskengi cha. Ndipempha kuti ndifwi ŵaka. Eliya wangugona pasi pa chimiti chifukwa chakuti wanguvuka.

Mungelu wangumuyuska ndipu wangumukambiya mwakusisa mazu kuti: ‘Yuka, uryi.’ Eliya wanguwona chiŵandi cho chenga pa mya yo yenga yakufunda ndipuso kachiŵiya ka maji. Iyu wangurya ndi kumwa ndipu wangugona so. Mungelu wangumuyuska so ndi kumukambiya kuti: ‘Yirya. Ukhumbika kuti uje ndi nthazi kuti uyendi umampha.’ Mwaviyo, Eliya wangurya so. Pavuli paki, wangwenda mazuŵa 40 musana ndi usiku mpaka wanguchifika ku Phiri la Horebu. Wati wafika, wangusere kuchimphaku kuchigona ndipu Yehova wangumufumba kuti: ‘Uchitanji kunu Eliya?’ Iyu wangumuka kuti: ‘Ayisirayeli aleka kuchita vo angukulayizgani. Yiwu aphwanya maguŵa nginu nga sembi ndi kubaya achimi ŵinu. Sonu akhumba kubaya ini.’

Yehova wangumukambiya kuti: ‘Luta ukami pachanya pa phiri.’ Chakwamba, chimphepu chikulu chingudumuwa pamphaku. Chachiŵi, kwenga chidilirisi ndipu pavuli paki motu. Pakumaliya, Eliya wanguvwa mazu ngo ngangukambika mwakusiska. Iyu wangubisa chisu chaki ndi chakuvwala chaki ndipu wanguma kubwalu kwa mphaku. Yehova wangumufumba chifukwa cho wanguthaŵiya. Eliya wangumuka kuti: ‘Ndajaku ndija.’ Yehova wangumukambiya kuti: ‘Wajaku wija cha. Pe so ŵanthu anyaki 7 sawuzandi mu Isirayeli wo ŵeche kundisopa. Luta kasankhi Elisha kuti wakaje mchimi m’malu mwaku.’ Eliya wanguluta liŵiliŵi kuchichita vo Yehova wangumukambiya. Kumbi uŵanaŵana kuti nawi Yehova wakuwovyengi asani uchita vo iyu wakhumba? Hinya wakuwovyengi. Tiyi tiwoni vo vinguchitika pa nyengu yo kwenga nja.