Pa nyengu yo kwenga nja, Yehova wangukambiya Eliya kuti: ‘Luta ku Zarefati. Munthukazi yo ndi choko wakukupaska chakurya.’ Eliya wati wafika pa geti la tawuni yo, wanguwona munthukazi wachitondo nkhuni. Munthukazi mwenuyu wenga mukavu. Eliya wangumupempha maji ngakumwa. Munthukazi yo wati wasoka kuti wakato maji, Eliya wangudaniriza kuti: ‘Chondi undipaseku kachiŵandi.’ Munthukazi yo wanguti: ‘Ndilivi chiŵandi chakuti ndikupaski. Nde ndi timawufwa ndipuso timafuta timanavi vakuti ndinozge chakurya chaku ini ndi mwana wangu.’ Eliya wangumukambiya kuti: ‘Yehova walayizga kuti asani undipangiyengi chiŵandi, ufwa ndi mafuta ngaku vimalengi cha mpaka po vuwa yiziyengi.’

Mwaviyo, munthukazi yo wanguluta kunyumba ndi kuchimupangiya chiŵandi mchimi waku Yehova. Nge mo Yehova wangulayizgiya, munthukazi yo ndi mwana waki ŵenga ndi chakurya pa nyengu yosi yo kwenga nja. Ufwa ndi mafuta vamalanga cha muviŵiya vo wasungangamu.

Venivi vati vachitika panguchitika chinthu chinyaki chakofya. Mwana wa munthukazi yo wenga choko wangutama ndipu pavuli paki wangufwa. Iyu wangupempha Eliya kuti wamuwovyi. Eliya wangulonda mwana yo mumanja mwa munthukazi yo ndipu wangumunyamuwa ndi kuluta nayu muchipinda chamuchanya cha nyumba yaki. Iyu wangumugoneka pa bedi ndipu wangupemphera kuti: ‘Yehova, chondi yuskani mwana uyu.’ Kumbi uziŵa chifukwa cho chatingi chiŵiyengi chakuziziswa kuti Yehova wayuski mwana yo? Nge mo tiziŵiya, kwamba kali pengavi yo wanguyuskikapu ndipu munthukazi yo limoza ndi mwana waki ŵenga Ayisirayeli cha.

Mwana yo wanguyuka ndipu wangwamba kututa. Eliya wanguti ku munthukazi yo: ‘Awona! Mwana waku ngwamoyu.’ Iyu wangukondwa ukongwa ndipu wanguti kwaku Eliya: ‘Yiwi ndiwi nadi munthu waku Chiuta. Ndiziŵa venivi chifukwa ukamba vo Yehova wakutuma.’

Pafupi ndi nyumba yachifumu yaku Ahabu ku Yezereli, penga munda wa mphereska. Iyu wawonanga munda uwu kuziya pawindu. Mweneku wa munda wo wenga Naboti. Ahabu wawukhumbanga munda wo ndipu wanguyesesa kuti Naboti wamugulisi. Naboti wangukana kumugulisa chifukwa kuchita viyo, kwenga kuleka kuvwiya Marangu ngaku Yehova ngo ngakanizanga munthu kugulisa malu ngo wahara. Kumbi Ahabu wangumuvwiya Naboti chifukwa chakuti wanguchita chinthu chamampha? Awa. Ahabu wangukwiya ukongwa. Iyu wanguguŵa ndipu wangukana kutuwa muchipinda cho wagonanga ndipuso kurya chakurya.

Fumukazi yiheni Yezebeli yo yenga muwolu waku Ahabu, yingukambiya mulumu waki kuti: ‘Ndiwi fumu ya Ayisirayeli. Ungaja ndi vosi vo ukhumba. Ndilondengi munda wuwa kuti uje waku.’ Yezebeli wangulembe makalata ŵara wo ajanga mutawuni yo kuti akambi boza kuti Naboti wanyoza Chiuta ndipu amuponyi mya kuti wafwi. Arara anguchita vo Yezebeli wanguŵakambiya ndipu pavuli paki Yezebeli wangukambiya Ahabu kuti: ‘Naboti wafwa. Sonu munda wuwa ngwaku.’

Yezebeli wangubaya Naboti pe cha. Iyu wangubaya so ŵanthu anandi ambula kunanga wo ayanjanga Yehova. Yezebeli wasopanga achiuta aboza ndipu wanguchita so vinthu vinyaki viheni. Yehova wanguwona vinthu viheni vosi vo wanguchita. Kumbi Yehova watingi wachitengenji nayu Yezebeli?

Pati pajumpha nyengu kutuliya po Ahabu wangufwiya, mwana waki Yehoramu wanguja fumu. Yehova wangutuma munthu munyaki zina laki Yehu kuti wakalangi Yezebeli ndi banja laki.

Yehu wangukwera galeta laki kuluta ku Yezereli ko Yezebeli wajanga. Yehoramu wanguza ndi galeta laki kuchikumana ndi Yehu ndipu wangumufumba kuti: ‘Kumbi pe chimangu pakati pidu?’ Yehu wangumuka kuti: ‘Palivi chimangu chifukwa cha vinthu viheni vo anyoku a Yezebeli achita.’ Yehoramu wakhumbanga kung’anamuka ndi galeta laki kuti wathaŵi. Yehu wanguto mkondu waki ndipu wangubaya Yehoramu.

Pavuli paki, Yehu wangwamba ulendu kuluta kunyumba yaku Yezebeli. Iyu wati wavwa kuti Yehu watuza, wangupaka vakujitowese, wangunoza sisi laki ndipu wamulindizanga pa windu la chipinda chamuchanya. Yehu wati wafika, Yezebeli wangumutawuzga mwamtafu. Yehu wangukambiya ateŵeti ŵaki wo ŵenga nayu pafupi kuti: “Muponyeni pasi!” Mwaviyo, Yezebeli angumuponya pasi kuziya pa windu ndipu wangufwiya penipo.

Pavuli paki, Yehu wangulamula kuti ŵana anthulumi 70 aku Ahabu abayiki ndipu wangumalisa kusopa Bala mucharu cho. Kumbi wawona kuti Yehova waziŵa vosi ndipu pa nyengu yakwenere walanga ŵanthu wo achita vinthu viheni?