Pangujumpha vyaka pafupifupi 70, kutuliya po Ayisirayeli anandi anguwere ku Yerusalemu kweni anyaki ajanga mbwenu muvigaŵa vakupambanapambana va Ufumu wa Peresi. Yumoza mwaku yiwu, wenga wasembi Ezara yo Wasambizanga Marangu ngaku Yehova. Ezara wanguvwa kuti Ayisirayeli ku Yerusalemu, alondonga cha Marangu ngaku Chiuta ndipu wakhumbanga kuluta kuchiŵawovya. Fumu Aritazekisisi ya ku Peresi yingukamba kuti: ‘Chiuta wakukupaska zeru kuti usambizi ŵanthu Marangu ngaki. Luta, uto weyosi yo wakhumba kuti waluti nawi.’ Ezara wanguwunganisa ŵanthu wosi wo akhumbanga kuwere ku Yerusalemu. Yiwu angupemphera kwaku Yehova kuti waŵavikiliyi pa ulendu wawu utali ndipu pavuli paki angwamba ulendu wo.

Yiwu angufika ku Yerusalemu pati pajumpha myezi yinayi. Alongozgi wo ŵenga kwenuku angukambiya Ezara kuti: ‘Ayisirayeli amunangiya Yehova ndipu ato anthukazi wo asopa achiuta aboza.’ Kumbi Ezara wanguchitanji? Iyu wangugwada pamasu pa ŵanthu ndi kupemphera kuti: ‘Yehova mwatichitiya vinthu vinandi ukongwa kweni takunangiyani.’ Ŵanthu angulapa kweni penga anyaki so wo akhumbikanga kuwovyeka kuti achitengi vinthu vamampha. Ezara wangusankha ŵara ndipuso akweruzga kuti aphwere nkhani zenizi. Pati pajumpha myezi yitatu, ŵanthu wosi wo akhumbanga cha kusopa Yehova anguŵadikisa.

Vyaka 12, vingujumphapu. Panyengu iyi ndipu Ayisirayeli amaliza kali kuzenga mpanda wa Yerusalemu. Ezara wanguwunganisa ŵanthu pabwalu kuti waŵaŵerenge Marangu ngaku Chiuta. Ezara wati wajula buku la marangu, ŵanthu wosi angusoka. Iyu wathamika Yehova ndipu yiwu angusoska manja kulongo kuti anguzomereza vo wangukamba. Pavuli paki, wanguŵerenga Marangu ndi kungakonkhoska ndipu ŵanthu avwisiyanga. Yiwu anguzomera kuti angumunangiya so Yehova ndipu anguliya. Mulenji waki, Ezara wanguŵerenga so Marangu nganyaki. Yiwu anguziŵa kuti kunguja ŵaka mazuŵa ngamanavi kuti achiti Phwandu la Misasa. Mwaviyo, angwambapu nyengu yeniyo kunozgeke phwandu.

Mazuŵa 7 nga phwandu ili, ŵanthu angukondwa ndi kuwonga Yehova chifukwa chakuti angukolola vakurya vinandi. Pengavi Phwandu la Misasa lakuyanana ndi lenili kwambiya mu nyengu yaku Yoswa. Phwandu lati lamala, ŵanthu anguwungana ndipu angupemphera kuti: ‘Yehova, mukutiwombo ku ukapolu, mungutiryiska muchipululu ndipu mukutipaska charu chakutowa. Kweni kanandi takuvwiyaningi cha. Mungutuma achimi kuti atitcheŵeski kweni tinguŵavwiya cha. Chinanga kuti venga viyo, munguzizipizga. Mungusunga mbwenu vo mungulayizga Abrahamu. Sonu titikulayizgani kuti tikuvwiyeningi.’ Yiwu angulemba vo angulayizga ndipu alongozgi, Alevi ndi asembi angusayiniya vo ŵanthu wo angulemba.

Tiyeni tikambiskani vo vinguchitika pa nyengu yo ŵenga ŵechendazengi so mpanda wa Yerusalemu. Nehemiya yo wateŵetiyanga Fumu Aritazekisisi wenga Myisirayeli ndipu wajanga mutawuni ya Shushani ku Peresi. Mku waki waku Nehemiya yo wangutuwa ku Yuda, wanguza ndi uthenga wambula kukondwesa wakuti: ‘Ŵanthu wo akuwere ku Yerusalemu mbakuvikilirika cha. Mpanda ndi mageti ngo Ababiloni anguwisa ngakuzengeka cha.’ Nehemiya wanguguŵa. Iyu wakhumbanga kuwere ku Yerusalemu kuti wakaŵawovyi. Mwaviyo, wangupempha fumu kuti yimuzomerezi.

Zuŵa linyaki, fumu yinguwona kuti Nehemiya wakondwa cha. Iyu yingufumba kuti: ‘Ndechendakuwonepu we ndi chisku chambula kukondwa. Ntchinthu wuli chachitika?’ Nehemiya wangumuka kuti: ‘Ndikondwengi wuli po tawuni yangu ya Yerusalemu njambula kuzengeka?’ Fumu yingufumba so kuti: ‘Ukhumba kuti ndikuchitiyenji?’ Mwaliŵi, Nehemiya wangupemphera cha mumtima. Iyu wangumuka kuti: ‘Chondi, mundizomerezi kuti ndiluti ku Yerusalemu kuchizenga so mpanda.’ Fumu Aritazekisisi yingukambiya Nehemiya kuti wangaluta ndipu yingumuwovya kuti wayendi umampha ulendu waki utali. Iyu yinguŵika so Nehemiya kuja nduna ya Yuda ndipu yingumupasa vimiti vaki kuti wakazenge mageti nga mpanda.

Nehemiya wati wafika ku Yerusalemu, wanguyendere mpanda. Pavuli paki wanguwunganisa asembi ndi alongozgi ndi kuŵakambiya kuti: ‘Vinthu ve umampha cha. Tikhumbika kwambapu kugwira ntchitu.’ Ŵanthu anguzomera ndipu angwamba kuzenga so mpanda.

Ŵanthu anyaki wo atinkhanga Ayisirayeli, aŵanyozanga ndipu akambanga kuti: ‘Mpanda wo muzenga chinanga ndi kambwi wangawiska.’ Ayisirayeli anguleka cha kuzenga mpanda chinanga kuti anyozekanga. Mpanda wo wenga utali ndipuso wakukho.

Arwani wo anguŵanaŵana kuti atuliyi muvigaŵa vakupambanapambana kuti aziyukiyi Yerusalemu mwakubuchiza. Ayuda ŵati ŵavwa za pulani yo arwani ŵenaŵa angupanga, anguchita mantha. Kweni Nehemiya wangukamba kuti: ‘Kuchita mantha cha. Yehova we nasi.’ Iyu wanguŵika alonda kuti avikiliyengi ŵanthu wo agwiranga ntchitu ndipu penga pakusuzga kuti arwani aŵayukiyi.

Angumaliza kuzenga mpanda ndi mageti kwa mazuŵa 52. Nehemiya wangudana Alevi kuti ŵazi ku Yerusalemu kuzichita phwandu lakukondwere kuti amaliza kuzenga. Iyu wanguŵika ŵanthu akumba sumu mumagulu ngaŵi. Linyaki linguselere kunyaki ndipu linyaki linguselere so kunyaki mwakuzunguliya tawuni achimba. Yiwu ambiyanga Yehova mwakugwiriskiya ntchitu vitoliru, mbata ndi vakumbiya vinyaki. Ezara wanguluta ndi gulu limoza, Nehemiya nayu so wanguluta ndi gulu linyaki ndipu anguchikumana pa nyumba yakusopiyamu. Ŵanthu wosi, anthulumi, anthukazi ndi ŵana angupereka sembi kwaku Yehova ndipu anguchita phwandu. Mazu ngawu ngavwikanga kutali chifukwa chakukondwa.