Kayisara Ogasito yo wenga fumu ya Aroma wangulamula kuti Ayuda wosi awere kwawu kuti akalembesi. Mwaviyo, Yosefi ndi Mariya angwenda kuluta ku Betelehemu, ko kwenga kwawu kwaku Yosefi. Pa nyengu iyi ndipu Mariya we pafupi kubala mwana.

Ŵati afika ku Betelehemu, angusaniya kuti malu ngamala ndipu angugona mukhola la viŵetu. Mariya wangubaliya mwana waki mwenumu. Iyu wangumuvunga musalu ndipu wangumugoneka muchakuryiyamu viŵetu.

Kufupi ndi Betelehemu kwenga aliska anyaki wo angugona kwenuku chifukwa alereziyanga mbereri zawu. Mwamabuchibuchi, kunguza mungelu yo wanguma kunthazi kwawu ndipu ukweru waku Yehova unguŵazunguliya. Aliska yaŵa ŵenga ndi mantha ndipu mungelu yo wanguti: ‘Kuwopa cha. Ndaza ndi uthenga wakukondwesa. Msanawale ku Betelehemu kwawa Mesiya.’ Po mungelu yo waŵereŵetanga, kuchanya kunguwoneka angelu anandi ndipu akambanga kuti: ‘“Unkhankhu kuchanya kwaku Chiuta ndipuso chimangu pacharu chapasi.’ Pavuli paki, angelu wo anguwoneka cha. Kumbi aliska wo anguchitanji?

Aliska wo anguti: ‘Sonu viyo tiyeni tiluti ku Betelehemu.’ Yiwu anguluta mwaliŵi ndipu angusaniya Yosefi ndi Mariya ŵe mukhola ndi mwana wawu.

Wosi wo anguvwa vo mungelu wangukambiya aliska, wanguzizwa. Mariya wanguviŵanaŵaniya ukongwa vo mungelu wangumukambiya ndipu wanguviluwa cha. Aliska anguwere ko kwenga mbereri zawu ndipu awonganga Yehova chifukwa cha vo anguwona kweniso kuvwa.

Kuvuma kwa Isirayeli kwajanga ŵanthu wo agomezanga kuti nyenyezi zingaŵalongozga kuziŵa vinthu vinyaki. Zuŵa linyaki ndi usiku anthulumi anyaki akwenuku anguwona nyenyezi yo yaŵalanga ukongwa. Iyu yayendanga kuchanya ndipu anguyilondo. “Nyenyezi” yo yinguŵalongozge ku Yerusalemu. Yiwu angwamba kufumba ŵanthu kuti: ‘Wepani mwana yo wazamuja fumu ya Ayuda? Taza kuti tiziyijikamiyi.’

Herodi yo wenga fumu ku Yerusalemu wati wavwa za fumu yifya yeniyi, wangufipa mtima ukongwa. Iyu wangufumba ŵara a asembi kuti: ‘Kumbi fumu yeniyi yiwiyengi pani?’ Yiwu angumuka kuti: ‘Achimi akukamba kuti yazamuwiya ku Betelehemu.’ Mwaviyo, Herodi wangudana anthulumi wo angutuwa Kuvuma kwa Isirayeli ndi kuŵakambiya kuti: ‘Lutani ku Betelehemu, mukamupenji mwana yo. Asani mwachimusaniya mukazi so kuti muzindikambiyi ko wali. Nani ndikhumba kuti tiziyijikamiyi.’ Kweni Herodi wapusikanga.

“Nyenyezi” yeniyi yingwamba so kwenda. Anthulumi wo anguyilondo mpaka ku Betelehemu. “Nyenyezi” iyi yinguma pachanya pa nyumba ndipu yiwu angusere munyumba. Yiwu angusaniya Yesu ndi anyina a Mariya. Anthulumi ŵenaŵa angumujikamiya mwana yo ndipu angumupaska mphasu za golidi, libani ndi mure. Kumbi Yehova ndiyu nadi wangutuma ŵanthu yaŵa kuti akasaniyi Yesu? Awa.

Usiku wa zuŵa ili, Yehova wangukambiya Yosefi kumalotu kuti: ‘Herodi wakhumba kubaya Yesu. Uto muwolu waku ndi mwana, thaŵiyani ku Ijipiti. Mukaje kweniko mpaka po ndazakukukambiyani kuti weniku kwe umampha.’ Mwaliŵi, Yosefi ndi banja laki angusoka kuluta ku Ijipiti.

Yehova wangukambiya anthulumi wo angutuwa Kuvuma kwa Isirayeli kuti, angaweriyangaku cha kwaku Herodi. Iyu wati wawona kuti atuza cha wangukwiya ukongwa. Chifukwa chakuti wangutondeka kusaniya Yesu, Herodi wangulamula kuti ŵana wosi anthulumi wo ŵenga ndi vyaka vakuyanana ndi Yesu abayiki ku Betelehemu. Pa nyengu iyi Yesu wanguvikilirika chifukwa wenga kutali ku Ijipiti.

Pavuli paki, Herodi wangufwa. Yehova wangukambiya Yosefi kuti: ‘Sonu uweku kwe umampha.’ Yosefi, Mariya ndi Yesu anguwere ku Isirayeli ndipu anguchija mutawuni ya Nazareti.