Yosefi ndi Mariya, ajanga ku Nazareti limoza ndi Yesu kweniso ŵana ŵawu anthulumi ndi anthukazi. Yosefi wagwiranga ntchitu ya ukalipentala kuti wawovyengi banja laki ndipu walisambizanga kuti liziŵi Yehova ndipuso Marangu ngaki. Banja laku Yosefi nyengu zosi lalutanga ku sinagogi kuchisopa kweniso ku Yerusalemu kuchichita Pasika chaka chechosi.

Pa nyengu yo Yesu wenga ndi vyaka 12, banja lawu lingwenda mtunda utali kuluta ku Yerusalemu nge mo lachitiyanga nyengu zosi. Mutawuni iyi mwenga ŵanthu anandi wo anguza ku phwandu la Pasika. Pavuli paki Yosefi ndi Mariya angwamba kuwere kwawu. Yiwu aŵanaŵananga kuti Yesu wenga limoza ndi gulu la ŵanthu. Kweni ŵati amupenja mwa abali ŵawu, angumusaniya cha.

Yiwu anguwere ku Yerusalemu ndipu angumupenja kwa mazuŵa ngatatu. Pakumaliya, anguluta kunyumba yakusopiyamu. Angusaniya Yesu waja pakati pa asambizi, watiŵavwisiya mwakuphwere kweniso watiŵafumba mafumbu. Asambizi wo angukondwa nayu ukongwa ndipu angwamba kumufumba. Yiwu anguzizwa ndi mo wamukiyanga. Asambizi wo anguwona kuti Yesu waziŵanga Marangu ngaku Yehova.

Yosefi ndi Mariya angufipa mtima ukongwa. Mariya wanguti: ‘Wamwana, tayamba kali kukupenja! Wenga pani?’ Yesu wangumuka kuti: ‘Kumbi muziŵa cha kuti nditenere kuja munyumba ya Ada?’

Yesu wanguwere ku Nazareti limoza ndi apapi ŵaki. Yosefi wangusambiza Yesu ntchitu ya ukalipentala. Kumbi uŵanaŵana kuti Yesu wenga ndi mijalidu wuli weche munamana? Yesu wakuwanga ndi zeru ndipu Chiuta kweniso ŵanthu amuyanjanga.

Yohane wenga mwana waku Zekariya ndi Elizabeti ndipu wati wakuwa, wanguja mchimi. Yehova Wangumugwiriskiya ntchitu kuti wasambizi ŵanthu za kuza kwaku Mesiya. Mumalu mwakuchisambiza mumasinagogi pamwenga mumatawuni, Yohane wapharazganga muchipululu. Ŵanthu atuwanga ku Yerusalemu kweniso mucharu chosi cha Yuda kuti akasambiri kwaku Yohane. Iyu waŵasambizanga kuti akhumbika kuleka kuchita vinthu viheni kuti akondwesi Chiuta. Ŵanthu anandi ŵati ŵavwa vo Yohane wasambizanga, angulapa maubudi ngawu ndipu wanguŵabatiza mumsinji wa Yorodani.

Yohane wenga ndi vinthu vinandi cha pa umoyu waki. Chakuvwala chaki chingupangika ndi weya wa ngamila ndipu waryanga azombi ndi uchi. Ŵanthu akhumbisisanga kumuziŵa. Afalisi kweniso asaduki wo ŵenga akujikuzga, nawu anguza kuzimuwona. Yohane wanguŵakambiya kuti: ‘Mutenere kusintha nthowa zinu ndi kulapa. Lekani kuŵanaŵana kuti mwe apade chifukwa chakuti mukamba kuti mwe ŵana aku Abrahamu. Venivi ving’anamuwa kuti ndimwi ŵana aku Chiuta cha.’

Ayuda anandi azanga kwaku Yohane ndipu amufumbanga kuti: ‘Kumbi titenere kuchitanji kuti tikondwesi Chiuta?’ Yohane wanguŵamuka kuti: ‘Asani mwe ndi malaya ngaŵi mugaŵiyeku yo walivi.’ Kumbi wachiziŵa chifukwa cho wangukambiya viyo? Yohane wakhumbanga kuti yiwu aziŵi kuti akhumbika kwanja ŵanthu kuti akondwesi Chiuta.

Yohane wangukambiya ŵanthu wo alondanga ndalama za msonkhu kuti: ‘Muchitengi vinthu mwauneneska ndipu mungabiyanga weyosi cha.’ Wangukambiya asilikali kuti: ‘Mungalondiyanga vinyeda cha pamwenga kukamba boza.’

Asembi ndi Alevi nawu anguza kwaku Yohane ndi kumufumba kuti: ‘Kumbi ndiwi yani? Weyosi wakhumba kukuziŵa.’ Yohane wanguŵamuka kuti: ‘Ndini mazu ngo ngavwika muchipululu, ngo ngalongozge ŵanthu kwaku Yehova nge mo Yesaya wangukambiya.’

Ŵanthu ayanjanga vo Yohane waŵasambizanga. Anandi akhumbanga kuziŵa asani Yohane wenga Mesiya. Kweni iyu waŵakambiyanga kuti: ‘Kutuza munyaki wakuluska ini. Nde wakwenere cha kufwatuwa nthambu za sapatu zaki. Ini ndibatiza ndi maji kweni iyu wazamubatiza ndi mzimu utuŵa.’