Muphwa Waku Paulo Wenga ndi Chiganga

Tiyi tisambiri vakukwaskana ndi mnyamata munyaki yo wangutaska asibweni ŵaki. Mnyamata uyu wenga muphwa waku Paulo. Zina laki liziŵika cha kweni wanguchita chinthu chinyaki mwachiganga. Kumbi ukhumba kuziŵa vo wanguchita?—

Paulo wenga mu jeri ku Yerusalemu. Iyu wangumangika chifukwa chakuti wapharazganga vakukwaskana ndi Yesu. Ŵanthu anyaki ankhaza amutinkhanga Paulo ndipu angumunozge chiŵembu. Yiwu angukamba kuti: ‘Tiyeni tipemphi mura wa asilikali kuti watumi asilikali ŵaki kuti azi ndi Paulo kukhoti. Isi tikamukhazgi panthowa, ndipu tikamubayi achijumpha nayu!’

Muphwa waku Paulo wanguvwa vakukwaskana ndi chiŵembu chenichi. Kumbi iyu watingi wachitengi wuli? Iyu wanguluta kujeri ko Paulo wenga ndipu wangumukambiya nkhani iyi. Paulo wati wavwa nkhani iyi, wangukambiya muphwa waki kuti wakakambiyi mura wa asilikali. Kumbi uŵanaŵana kuti chenga chipusu kuti muphwa waku Paulo wakambiyi mura wa asilikali?— Awa, chifukwa mura wa asilikali wenga munthu wakuzirwa ukongwa. Kweni muphwa waku Paulo wenga ndi chiganga ndipu wanguchikambiya mura wa asilikali.

Mura wa asilikali wanguziŵa chakwenere kuchita. Iyu wangusankha asilikali 500 kuti avikiliyi Paulo! Iyu wanguŵakambiya kuti aluti ndi Paulo ku Kaisarea usiku weniwo. Kumbi Paulo wanguchifika umampha?— Hinya, ŵanthu ankhaza angutondeka kumubaya! Chiŵembu chawu chingutondeka.

Kumbi ungasambiranji pa nkhani iyi?— Nawi ukhoza kuja nge muphwa waku Paulo. Tikhumbika kuja ndi chiganga asani tikambiskana ndi ŵanthu vakukwaskana ndi Yehova. Kumbi ujengi ndi chiganga ndipuso ulutirizgengi kukambiskana ndi ŵanthu vakukwaskana ndi Yehova?— Asani uchitengi viyo, utaskengi umoyu wa ŵanthu anyaki.