Kupharazga Ufumu​—Kupharazga Uthenga Wamampha Pacharu Chosi

YERUZGIYANI kuti zuŵa linyaki mulenji mwaluta cha kunchitu ndipu munozgeke kuluta mu uteŵeti wakumunda. Mugongowa chifukwa cha kuvuka ndipu mukhumba kupumuwa. Muromba ndipu pavuli paki musankha kuti muluti. Mupharazga ndi mzichi wakukota, ndipu mukwaskika chifukwa cha kukunthiyapu kwaki kweniso lisungu laki. Muchipharazga nyumba ndi nyumba, mukumbuka kuti abali ndi azichi ŵinu pacharu chosi nawu apharazga uthenga wenuwu mwakugwiriskiya nchitu mabuku ngo imwi mugwiriskiya nchitu, kweniso nawu asambira vo imwi musambira. Muchifika kunyumba mutijivwa kuti mwasaniya nthazi ndipu mwakondwa chifukwa munguluta mbwenu mu uteŵeti!

Nchitu yakupharazga yo Akhristu achita ndiyu nchitu yikulu ya Ufumu waku Chiuta mazuŵa nganu. Yesu wangukambiya limu kuti nchitu yakupharazga yazamuluta panthazi ukongwa m’mazuŵa ngakumaliya. (Mat. 24:14) Kumbi uchimi wenuwu wafiskika wuli? M’chigaŵa ichi tiwonengi ŵanthu wo achita uteŵeti wachikhristu, nthowa kweniso vidya vo agwiriskiya nchitu kuti ŵanthu anandi pacharu chosi aziŵi kuti Ufumu waku Chiuta uliku nadi.