Fundu yikulu mu Bayibolu losi njakukwaskana ndi Ufumu waku Chiuta. Yehova wagwiriskiyengi ntchitu Ufumu wenuwu kuti wasinthi charu chosi kuti chije paradayisu nge mo wakhumbiyanga pakwamba. Kumbi Ufumu wenuwu ntchinthu wuli? Kumbi tiziŵa wuli kuti ukwamba kulamuliya? Kumbi ndi vinthu wuli vo wachitapu kali? Nanga ndi vinthu wuli vo wazamuchita kunthazi? Sambiru ili kweniso nganyaki ngaŵi nga panthazi, ngamukengi mafumbu ngenanga.

1. Kumbi Ufumu waku Chiuta ntchinthu wuli, nanga Fumu yaki ndiyani?

Ufumu uwu ndi boma lo Yehova Chiuta wakujalikiska. Fumu ya Ufumu wenuwu ndi Yesu Khristu, ndipu walamuliya kutuliya kuchanya. (Mateyu 4:17; Yohane 18:36) Bayibolu likamba kuti Yesu “wazamulamuliya nge Fumu kwamuyaya.” (Luka 1:32, 33) Nge Fumu ya Ufumu waku Chiuta, Yesu wazamulamuliya weyosi pacharu chapasi.

2. Mbayani wo alamuliya ndi Yesu?

Yesu walamuliya yija cha. Ŵanthu anyaki “akutuliya mu fuku lelosi, lilimi lelosi, [ndipuso] mtundu wewosi . . . azamulamuliya charu chapasi nge mafumu.” (Chivumbuzi 5:9, 10) Kumbi mbalinga wo amulamuliya ndi Khristu? Kutuliya po Yesu wanguziya pacharu chapasi, pe Akhristu mamiliyoni nganandi wo atimulondo. Kweni mbakhristu 144,000 pe wo amulamuliya limoza ndi Yesu kuchanya. (Ŵerengani Chivumbuzi 14:1-4.) Akhristu anyaki wosi azamuja zika za Ufumu wenuwu pacharu chapasi.—Salimo 37:29.

3. Kumbi Ufumu waku Chiuta upambana wuli ndi maboma nga ŵanthu?

Chinanga kuti ŵanthu anyaki wo alamuliya ayesesa kuchita vinthu vamampha, kweni atondeka kufiska vosi vo akhumba. Asani yiwu alamuliyapu, patuza munyawu yo watiŵatoliyaku kanthu cha ŵanthu. Kweni palivi munthu yo wazamusere mumalu mwaku Yesu yo ndi Fumu ya Ufumu waku Chiuta. Chiuta wakujalikiska “ufumu wo wazamubwangandulika cha.” (Daniyeli 2:44) Yesu wazamulamuliya charu chosi kwambula kwanjiya. Iyu ngwachanju, ngwalisungu kweniso watanja urunji, ndipu wazamusambiza ŵanthu kuti nawu achitiyengi anyawu vinthu mwachanju, mwalisungu kweniso mwaurunji.—Ŵerengani Yesaya 11:9.

4. Boma lanthazi ukongwa ndilu lazamulamuliya charu chosi

Yesu Khristu we ndi mazaza ngosi ngakulamuliya kuluska munthu weyosi yo wakulamuliyapu. Ŵerengani Mateyu 28:18, pavuli paki kambiskanani fumbu ili:

• Kumbi mazaza ngaku Yesu ngapambana wuli ndi nga munthu weyosi yo wakulamuliyapu pacharu?

Maboma nga ŵanthu ngasinthasintha, ndipu munthu weyosi yo walamuliya, waja ndi mazaza pa kachigaŵa kamanavi waka kacharu. Kumbi ndimu viliri ndi Ufumu waku Chiuta? Ŵerengani Daniyeli 7:14, pavuli paki kambiskanani mafumbu yanga:

• Ntchifukwa wuli fundu yakuti Ufumu waku Chiuta “wazamubwangandulika cha” njakukondwesa ukongwa?

• Ntchifukwa wuli tikondwa kuziŵa kuti Ufumu wenuwu wazamulamuliya charu chosi?

5. Maboma nga ŵanthu ngakhumbika kutuzgikapu

Ntchifukwa wuli Ufumu waku Chiuta wazamutuzgapu maboma nga ŵanthu? Woneriyani VIDIYO, pavuli paki kambiskanani fumbu lo le mumphata.

VIDIYO: Kachigaŵa ka Vidiyo Yakuti Kumbi Ufumu Waku Chiuta Ntchinthu Wuli? (1:41)

• Kumbi ndi vinthu wuli vo vachitika pacharu chifukwa cha maulamuliru nga ŵanthu?

Ŵerengani Wakutawula 8:9, pavuli paki kambiskanani mafumbu yanga:

• Kumbi muwona kuti mphakwenere kuti Ufumu waku Chiuta utuzgepu nadi maboma nga ŵanthu? Ntchifukwa wuli muwona viyo?

6. Wo alamuliya mu Ufumu waku Chiuta atitivwisa

Yesu yo ndi Fumu yidu ‘watitivwiya lisungu pa vinthu vo tinangisa’ chifukwa chakuti wakujapu nge munthu pacharu. (Aheberi 4:15) Yehova wakusankha anthulumi ndi anthukazi akugomezgeka akukwana 144,000 kutuliya “mu fuku lelosi, lilimi lelosi, mtundu wewosi ndipuso charu chechosi,” kuti akalamuliyi limoza ndi Yesu.—Chivumbuzi 5:9.

• Kumbi muchiskika cha kuziŵa kuti Yesu kweniso wo alamuliya nayu aziŵa umampha mo tivwiya ndipuso masuzgu ngo tikumana nangu? Ntchifukwa wuli mwamuka viyo?

7. Ufumu waku Chiuta we ndi marangu ngamampha ukongwa

Maboma nga ŵanthu ngapanga marangu ngo aŵanaŵana kuti ngawovyengi kweniso ngavikiliyengi ŵanthu ŵawu. Ufumu waku Chiuta nawu we ndi marangu ngo ŵanthu ŵaki akhumbika kulondo. Ŵerengani 1 Akorinto 6:9-11, pavuli paki kambiskanani mafumbu yanga:

• Kumbi muwona kuti pacharu vinthu vazamukuŵa wuli asani ŵanthu wosi aziyamba kulondo marangu ngaku Chiuta?a

• Kumbi muwona kuti mphakuvwika kuti Yehova wakhumba kuti ŵanthu wo alamulika ndi Ufumu waki alondongi marangu ngenanga? Ntchifukwa wuli muwona viyo?

• Nanga ndi vinthu wuli vo vilongo kuti ŵanthu wo aleka kuvwiya marangu ngenanga angasintha?—Wonani vesi 11.

KUMBI MWASAMBIRANJI?

Ufumu waku Chiuta ndi boma chayilu lakuchanya lo lazamulamuliya charu chosi chapasi.

Kuweriyamu

• Kumbi Fumu ya Ufumu waku Chiuta ndiyani, nanga walamuliya limoza ndi ayani?

• Kumbi Ufumu waku Chiuta upambana wuli ndi maboma nga ŵanthu?

• Kumbi ndi marangu nanga ngo Yehova wakhumba kuti ŵanthu wo alamulika ndi Ufumu waki alondongi?

FUFUZANI

Wonani malu ngo Yesu wangukamba kuti kusanirika Ufumu.

“Kumbi Ufumu Waku Chiuta we Mumtima Winu?” (Nkhani ya pa webusayiti)

Ntchifukwa wuli Akaboni aku Yehova asankha kuja akugomezgeka ku Ufumu waku Chiuta mumalu mwakuja akugomezgeka ku maboma nga ŵanthu?

Te Akujipereka ku Ufumu waku Chiuta (1:43)

Wonani vo Bayibolu likamba vakukwaskana ndi ŵanthu 144,000 wo Yehova wakusankha kuti akalamuliyi ndi Yesu.

“Kumbi Mbayani wo Aluta Kuchanya?” (Nkhani ya pa webusayiti)

Kumbi ntchinthu wuli chinguchitiska munthukazi munyaki yo wenga mujeri kuti wayambi kugomezga kuti ndi Chiuta pe yo wanganozga vinthu kuti pacharu chosi paje urunji?

“Mo Ndinguziŵiya Yo Wazamumalisa Vinthu Vambula Urunji” (Jani Masu!, November 2011)

Ufumu waku Chiuta ukwamba kulamuliya kuchanya mu 1914. Mu chaka chenichi ndimu mazuŵa ngakumaliya nga ulamuliru wa ŵanthu ngangwambiya. Kumbi tiziŵa wuli venivi? Tiwonengi uchimi wa mu Bayibolu kweniso vo vichitika pacharu ndipuso mo mijalidu ya ŵanthu yasinthiya kutuliya mu 1914.

1. Kumbi uchimi wa mu Bayibolu ulongonji?

Buku la mu Bayibolu la Daniyeli, lingukambiya limu kuti Ufumu waku Chiuta wazamukwamba kulamuliya kukumaliya kwa nyengu yo yidanika kuti “nyengu 7.” (Daniyeli 4:16, 17) Pati pajumpha vyaka vinandi, Yesu wangudana nyengu 7 zenizi kuti “nyengu yakuŵikika ya ŵanthu amitundu yinyaki.” Iyu wangukamba so kuti nyengu yeniyi yechendamali. (Luka 21:24) Kweni nge mo tiwoniyengi, nyengu 7 zenizi zikumala mu chaka cha 1914.

2. Kumbi ndi vinthu wuli vo vichitika pacharu chapasi, kweniso ndi mijalidu niyi yo ŵanthu alongo kwambiya mu 1914?

Akusambira aku Yesu angumufumba kuti: “Kumbi . . . chisimikizu cha kuŵapu kwinu kweniso cha kumala kwa nyengu yinu, ntchinthu wuli?” (Mateyu 24:3) Yesu wanguŵakonkhoske vinthu vinandi vo vatingi vizichitikengi asani iyu wayamba kulamuliya mu Ufumu waku Chiuta kuchanya. Vinyaki mwa vinthu venivi ndi nkhondu, nja ndipuso vidilirisi. (Ŵerengani Mateyu 24:7.) Bayibolu lingukambiya so limu kuti vakuchita va ŵanthu “mu mazuŵa ngakumaliya” vazamuchitiska kuti umoyu uzije ‘wakusuzga ukongwa.’ (2 Timote 3:1-5) Vinthu venivi vikwamba kuchitika ukongwa kutuliya mu 1914.

3. Ntchifukwa wuli vinthu vanangika ukongwa pacharu kutuliya po Ufumu waku Chiuta ukwambiya kulamuliya?

Yesu wati waja waka Fumu ya Ufumu waku Chiuta, wanguchita nkhondu kuchanya ndi Satana limoza ndi viŵanda vaki. Satana wanguluza nkhondu yeniyi. Bayibolu likamba kuti iyu “wanguponyeka pacharu chapasi ndipu angelu ŵaki nawu anguponyeke nayu limoza.” (Chivumbuzi 12:9,10,12) Satana ngwakukwiya ukongwa chifukwa waziŵa kuti wabayikengi pambula kuswera yapa. Ndichu chifukwa chaki iyu wachitiska kuti ŵanthu asuzgikengi ukongwa pacharu chapasi. Venivi ndivu vachitiska kuti vinthu vinangiki ukongwa pacharu! Kweni Ufumu waku Chiuta wazamutuzgapu masuzgu ngosi ngenanga.

SAMBIRANI VINANDI

4. Vo Bayibolu likamba vilongo kuti Ufumu waku Chiuta ukwamba kulamuliya mu 1914

VIDIYO: Ufumu Waku Chiuta Ukwamba Kulamuliya mu 1914 (5:02)

Chiuta wanguchitiska Fumu Nebukadinezara ya ku Babiloni kuti yiloti malotu ngakukwaskana ndi vo vatingi vizichitikengi kunthazi. Malotu ngenanga kweniso vo Daniyeli wangukamba pakufwatuliya malotu ngenanga, vakwaskanga ufumu waku Nebukadinezara kweniso Ufumu waku Chiuta.—Ŵerengani Daniyeli 4:17.a

Ŵerengani Daniyeli 4:20-26, ndipu pavuli paki gwiriskiyani ntchitu tchati pakukambiskana mafumbu yanga:

• (A) Kumbi Nebukadinezara wanguwonanji mu malotu?—Wonani vesi 20 ndi 21.

• (B) Kumbi ndi vinthu wuli vo vatingi vichitikiyengi chimiti?—Wonani vesi 23.

• (C) Kumbi ndi vinthu wuli vatingi vichitikengi kukumaliya kwa “nyengu 7”?—Wonani vesi 26.

Kumbi Malotu nga Chimiti ngo Nebukadinezara Wangulota Ngakoliyana Wuli ndi Ufumu Waku Chiuta?

UCHIMI (Daniyeli 4:20-36)

Ufumu

(A) Chimiti chikulu ukongwa

Ufumu watimbanyizgika

(B) “Chidumuliyeni pasi chimiti cho,” ndipu pajumphi “nyengu 7”

Ufumu wawezekiyapu

(C) “Ufumu winu wazamuwere so kwaku yimwi”

Pa nyengu yo uchimi uwu wafiskikanga kakwamba . . .

• (D) Kumbi chimiti chamiyanga yani?—Wonani vesi 22.

• (E) Kumbi ufumu waki ungutimbanyizgika wuli?—Ŵerengani Daniyeli 4:29-33.

• (F) Nanga ntchinthu wuli chinguchitikiya Nebukadinezara kukumaliya kwa “nyengu 7”?—Ŵerengani Daniyeli 4:34-36.

MO UNGUFISKIKIYA KAKWAMBA

Ufumu

(D) Nebukadinezara Fumu ya ku Babiloni

Ufumu watimbanyizgika

(E) Chaka cha 606 B.C.E., chati chajumpha, Nebukadinezara wangufuntha ndipu wangulamuliya so cha kwa vyaka 7 chayivu

Ufumu wawezekiyapu

(F) Nebukadinezara wanguchira ndipu wangwamba so kulamuliya

Pa nyengu yo uchimi uwu wafiskikanga kachiŵi . . .

• (G) Kumbi chimiti chamiyanga yani?—Ŵerengani 1 Mbiri 29:23.

• (H) Kumbi ufumu wawu ungutimbanyizgika wuli? Nanga tiziŵa wuli kuti ufumu uwu walamuliyanga mbwenu cha pa nyengu yo Yesu wenga pacharu chapasi?—Ŵerengani Luka 21:24.

• (I) Kumbi ufumu wenuwu unguwezekiyapu zukwanji ndipuso nunkhu?

MO UNGUFISKIKIYA KACHIŴI

Ufumu

(G) Mafumu nga Isirayeli ngo ngamiyanga ulamuliru waku Chiuta

Ufumu watimbanyizgika

(H) Yerusalemu wangubwangandulika ndipu venivi vingutimbanyizga mzeri wa mafumu nga Isirayeli kwa vyaka 2,520

Ufumu wawezekiyapu

(I) Yesu wangwamba kulamuliya kuchanya nge Fumu ya Ufumu waku Chiuta

5. Charu chikusintha ukongwa kutuliya mu 1914

Woneriyani VIDIYO.

VIDIYO: Charu Chikusintha Ukongwa Kutuliya mu 1914 (1:10)

Yesu wangukambiya limu vo vazamuchitika pacharu asani wazija Fumu. Ŵerengani Luka 21:9-11, pavuli paki kambiskanani fumbu ili:

• Pa vinthu vo taŵerenga pa lemba ili, kumbi ndi vinthu nivi vo yimwi mwawonapu pamwenga kuvwa?

Wakutumika Paulo wangukonkhoska mo ŵanthu azamuchitiya vinthu mu mazuŵa ngakumaliya nga ulamuliru wa ŵanthu. Ŵerengani 2 Timote 3:1-5, pavuli paki kambiskanani fumbu ili:

• Pa mijalidu yo lemba ili lakamba, kumbi ndi mijalidu niyi yo muwona kuti ŵanthu achita mazuŵa nganu?

6. Tikhumbika kuchitapu kanthu mwaliŵi chifukwa Ufumu waku Chiuta ulamuliya

Ŵerengani Mateyu 24:3, 14, pavuli paki kambiskanani mafumbu yanga:

• Kumbi ndi ntchitu yakukhumbika ukongwa niyi yo yilongo kuti Ufumu waku Chiuta ulamuliya nadi sonu?

• Kumbi mungachita wuli kuti namwi mugwirengeku ntchitu yeniyi?

Ufumu waku Chiuta ulamuliya sonu, ndipu kwaja kamanavi kuti uyambi kulamuliya charu chosi. Ŵerengani Aheberi 10:24, 25, pavuli paki kambiskanani fumbu ili:

• Kumbi weyosi wakhumbika kuchitanji po tiwona kuti “zuŵa lo le pafupi”?

KUMBI MWASAMBIRANJI?

Uchimi wa mu Bayibolu, mbiri ndipuso vinthu vo vichitika pacharu vilongo kuti Ufumu waku Chiuta ulamuliya nadi sonu. Tingalongo kuti tigomezga fundu yeniyi asani tipharazga vakukwaskana ndi ufumu wenuwu ndipuso asani tiwungana.

Kuweriyamu

• Kumbi ndi vinthu wuli vo vinguchitika kukumaliya kwa nyengu 7 zo buku la Daniyeli lingukambiya limu?

• Kumbi musimikiza wuli kuti Ufumu waku Chiuta ungwamba nadi kulamuliya mu 1914?

• Kumbi mungalongo wuli kuti mugomezga kuti Ufumu waku Chiuta ulamuliya nadi sonu?

FUFUZANI

Wonani vo akulemba mbiri ndipuso vo ŵanthu anyaki akamba vakukwaskana ndi mo vinthu vasinthiya pacharu kutuwa mu 1914.

“Nyengu yo Mijalidu ya Ŵanthu Yingusinthiya Ukongwa” (Jani Masu!, April 2007)

Ŵerengani nkhani iyi kuti muwoni mo uchimi wa pa Mateyu 24:14 ungusinthiya umoyu wa munthu munyaki.

“Ndayanjanga Ukongwa Baseball Kuphara Chechosi!” (Chigongwi cha Alinda Na. 3 2017)

Kumbi tiziŵa wuli kuti uchimi wa mu Daniyeli chaputala 4 ukamba za Ufumu waku Chiuta?

“Kumbi Ufumu Waku Chiuta Ukwamba Zuŵanji Kuwusa? (Chigaŵa 1)” (Chigongwi cha Alinda, November 1, 2014)

Kumbi ntchinthu wuli chilongo kuti “nyengu 7” zo zikambika mu Daniyeli chaputala 4 zingumala mu 1914?

“Kumbi Ufumu Waku Chiuta Ukwamba Zuŵanji Kuwusa? (Chigaŵa 2)” (Chigongwi cha Alinda, November 1, 2014)

Ufumu waku Chiuta ukwamba kali kulamuliya. Pambula kuswera yapa usinthengi vinthu vikuluvikulu pacharu chapasi. Tiyeni tiwoni vinthu vinyaki vamampha vo tilindizga kuti Ufumu waku Chiuta wazamuchita.

1. Kumbi Ufumu waku Chiuta wazamuchita wuli kuti uweziyepu chimangu ndipuso urunji pacharu?

Pa nkhondu ya Aramagedoni, Yesu yo ndi Fumu ya Ufumu waku Chiuta wazamutuzgapu ŵanthu aheni pacharu kweniso maboma ngosi nga ŵanthu. (Chivumbuzi 16:14, 16) Pa nyengu yeniyo, uchimi uwu wa mu Bayibolu wazamufiskika: “Kwaja kanyengu kamanavi ndipu ŵanthu aheni azamuŵaku so cha.” (Salimo 37:10) Mwakugwiriskiya Ntchitu Ufumu, Yesu wazamuwonesesa kuti pacharu chosi pe chimangu ndipuso urunji.—Ŵerengani Yesaya 11:4.

2. Kumbi umoyu wazamukuŵa wuli asani khumbu laku Chiuta lazifiskika pacharu chapasi?

Asani Ufumu waku Chiuta waziyamba kulamuliya charu chosi, “ŵanthu arunji azamulonde charu chapasi, ndipu azamuja mwenimo kwamuyaya.” (Salimo 37:29) Yeruzgiyani kuti muja mucharu cho munthu weyosi ndi murunji, watanja Yehova ndipuso watanja anyaki! Palivi yo wazamutama ndipu weyosi wazamuja kwamuyaya.

3. Kumbi ndi vinthu wuli vo Ufumu waku Chiuta wazamuchita asani ŵanthu aheni wosi azibayika?

Asani ŵanthu aheni wosi azibayika, Yesu wazamulamuliya nge Fumu kwa vyaka 1,000. Pa nyengu iyi, iyu limoza ndi anyaki 144,000 wo walamuliya nawu azamuwovya ŵanthu pacharu chapasi kuti aje akufikapu kweniso ambula ubudi. Kukumaliya kwa vyaka 1,000 venivi, charu chapasi chazamuja paradayisu wakutowa ukongwa, ndipu pazamujanga ŵanthu akukondwa wo Yehova waŵatumbika chifukwa chakuvwiya marangu ngaki. Pavuli paki, Yesu wazamuweze Ufumu kwa Awisi a Yehova. Pa nyengu iyi, ‘zina laku Yehova lazamutowa’ ukongwa. (Mateyu 6:9, 10) Pazamuŵavi so kukayikiya kuti Yehova ndi Fumu yamampha ndipuso waphwere ŵanthu ŵaki. Pakumaliya, Yehova wazamubaya Satana ndi viŵanda vaki kweniso munthu weyosi yo wazamugarukiya ulamuliru Waki. (Chivumbuzi 20:7-10) Vinthu vosi vamampha vo Ufumu waku Chiuta wazamuchita pacharu chapasi vazamujaku kwamuyaya.

SAMBIRANI VINANDI

4. Ufumu waku Chiuta wazamutuzgapu maboma ngosi nga ŵanthu

“Munthu wapweteka munthu munyaki pakumulamuliya.” (Wakutawula 8:9) Mwakugwiriskiya ntchitu Ufumu waki, Yehova wazamutuzgapu vinthu vambula urunji venivi.

Ŵerengani Daniyeli 2:44 ndipuso 2 Atesalonika 1:6-8, pavuli paki kambiskanani mafumbu yanga:

• Kumbi Yehova ndi Mwana waki Yesu azamuchitanji nangu maboma nga ŵanthu limoza ndi ŵanthu ŵawu?

• Kumbi vo mwasambira vakukwaskana ndi Yehova ndipuso Yesu, vitikusimikiziyani wuli kuti yiwu azamuchita vinthu mwaurunji?

5. Yesu ngwakwenere nadi kuja Fumu

Nge Fumu ya Ufumu waku Chiuta, Yesu wazamuchita vinthu vinandi kuti wawovyi ŵanthu pacharu chapasi. Woneriyani VIDIYO kuti muwoni kuti Yesu wakhumbisiska kuwovya ŵanthu ndipuso kuti Chiuta wakumupaska nthazi zakuchitiya venivi.

VIDIYO: Yesu Wangulongo vo Ufumu Waku Chiuta Wazamuchita (1:13)

Vinthu vo Yesu wanguchita po wenga pacharu chapasi, vingulongo vo Ufumu wazamuchita. Kumbi ndi vitumbiku nivi pa vitumbiku ivi vo mukhumba kuziwona kuti vafiskika? Ŵerengani malemba ngo ngaŵikika kunthazi kwa vitumbiku venivi ngo ngatitiwovya kuziŵa vinandi.

6. Ufumu waku Chiuta wazamuchitiska kuti vinthu vizije umampha kunthazi

VIDIYO: Chithuzi cha Vinthu Vamampha vo Vichitikengi Kunthazi (4:38)

Ŵerengani Salimo 145:16, pavuli paki kambiskanani fumbu ili:

• Kumbi mutuvwa wuli kuziŵa kuti Yehova wazamupaska “chamoyu chechosi . . . vo chikhumba”?

KUMBI MWASAMBIRANJI?

Ufumu waku Chiuta wazamufiska vo iyu wakhumba kuti vichitiki. Ufumu uwu wazamusintha charu chosi kuti chije paradayisu yo pazamuja ŵanthu wo azamusopa Yehova kwamuyaya.

Kuweriyamu

• Kumbi Ufumu waku Chiuta wazakulitowesa wuli zina laku Yehova?

• Ntchifukwa wuli tigomezga kuti Ufumu waku Chiuta wazamufiska vinthu vamampha vo Bayibolu likamba kuti vichitikengi kunthazi?

• Kumbi ndi vinthu wuli vo Ufumu wazamuchita vo yimwi mukhumbisiska kuziwona?

FUFUZANI

Ziŵani vo mazu ngakuti Aramagedoni ngang’anamuwa.

“Kumbi Nkhondu ya Aramagedoni ndi Nkhondu Wuli?” (Nkhani ya pa webusayiti)

Wonani vo vazamuchitika mu ulamuliru waku Yesu wa vyaka 1,000 kweniso vo vazamuchitika kukumaliya kwa vyaka venivi.

“Kumbi ndi Vinthu Wuli vo Vazamuchitika pa Zuŵa la Cheruzgu?” (Chigongwi cha Alinda, September 1, 2012)

Wonani vo mabanja ngangachita pakuŵanaŵaniya vinthu vamampha vo Ufumu wazakutichitiya kunthazi.

Yeruzgiyani Kuti Mwe mu Paradayisu (1:50)

Ŵerengani nkhani yakuti “Ndenga ndi Mafumbu Nganandi Ukongwa,” kuti muwoni mo chigaŵenga chingumukikiya mafumbu ngaki.

“Bayibolu Lisintha Ŵanthu” (Chigongwi cha Alinda, January 1, 2012)