Lutirizgani Kuthemba Ulongozgi Waku Yehova

1. Kumbi ndi vinthu wuli vo taŵanthu tikhumbikiya pa umoyu? (Mateyu 5:3)

YEHOVA waziŵa vo taŵanthu tikhumbikiya pa umoyu. Mwakuyeruzgiyapu, tikhumbika chakurya, vakuvwala kweniso pakuja kuti tije ndi umoyu. Asani tilivi chimoza mwa vinthu venivi, chinanga nkhwakanyengu kamanavi ŵaka, umoyu uja wakusuzga ukongwa. Kweni kusazgiyapu pa vinthu vakukhumbika venivi, Chiuta wakutilenga so ndi mtima wakuti tikhumbisiskengi kumuziŵa umampha. (Ŵerengani Mateyu 5:3.) Asani tikhumba kuti tikondwengi nadi ndi umoyu, titenere kuziŵa kuti tikhumbika kulongozgeka ndi iyu kweniso kulutirizga kumuthemba.

2. Kumbi ‘kuziŵa kuti tikhumbika Chiuta’ kung’anamuwanji? Kambani chakuyeruzgiyapu.

² Kumbi ‘kuziŵa kuti tikhumbika Chiuta’ kung’anamuwanji? Mu Chigiriki, mazu ngenanga ngang’anamuwa munthu yo wapemphesa chovyu chauzimu. Yeruzgiyani kuti muwona munthu yo wasuzgika ndipu wavwala malizwazwa kweniso waja mumphepeti mwa msewu kuti wapemphesengi. Iyu walivi nthazi chifukwa chakusoŵa chakurya ndipu ŵanthu atimugwentha chifukwa cha mo wawoneke. Ndi msana watufya ndi lumwi kweniso ndi usiku wapima ndi mphepu. Munthu wakupemphesa mwenuyu waziŵa kuti wakhumbika chovyu kuti vinthu visinthi pa umoyu waki. Mwakuyanana ŵaka, munthu yo waziŵa kuti wakhumbika Chiuta, wakhumbika kupempha chovyu chauzimu kuti vinthu visinthi pa umoyu waki. Mwaviyo, iyu wakhumbisiska kugwiriskiya ntchitu ulongozgi wo Yehova wapereka ku ŵanthu wo atimuyanja.

3. Kumbi tikambiskanengenji munkhani iyi?

³ Munkhani iyi, chakwamba tiwonengi vo tisambira ku munthukazi wa ku Fonike yo wanguŵeyere Yesu kuti wamuwovyi. Nkhani iyi yikonkhoska mijalidu yitatu yo ŵanthu wo aziŵa kuti akhumbika Chiuta atenere kuja nayu. Pavuli paki, tiwonengi vo tisambira kwaku Peturo, Paulo kweniso Fumu Davidi. Anthulumi ŵenaŵa athembanga ukongwa Yehova kuti waŵalongozgengi pa umoyu wawu.

MIJALIDU YITATU YAKUKHUMBIKA UKONGWA YO TITENERE KUJA NAYU

4. Kumbi munthukazi wa ku Fonike wakhumbanga kuti Yesu wamuchitiyenji?

⁴ Zuŵa linyaki, munthukazi wa ku Fonike wanguza kwaku Yesu. Mwana waki munthukazi ‘wasuzgikanga ukongwa ndi chiŵanda.’ (Mate. 15:​21-28) Wati wafika, munthukazi mwenuyu wangujikama ndipu waŵeyeriyanga Yesu kuti wamuwovyi. Iyu wangulongo mijalidu yakukhumbika ukongwa wati wafika kwaku Yesu. Kumbi wangulongo mijalidu wuli?

5. Kumbi munthukazi wa ku Fonike wangulongo mijalidu wuli, nanga Yesu wanguchita wuli? (Wonaniso chithuzi.)

⁵ Munthukazi wa ku Fonike wangulongo kuti ngwakujiyuyuwa ukongwa. Ntchifukwa wuli tikamba viyo? Chifukwa chakuti iyu wangukwiya cha ndi mo Yesu wangumumukiya. Yesu wangumuyeruzgiya ndi kamwana kagalu. Viwoneka kuti ŵanthu wo ŵenga Ayuda cha ayanjanga kuŵeta tiŵana tagalu ndipu atisunganga munyumba zawu. Kumbi asani mwenga yimwi mwatingi muchitengi wuli ndi vo Yesu wangumuka? Kumbi mwatingi mukwiyengi ndi kuleka kumupempha chovyu? Kweni ndivu munthukazi uyu wanguchita cha. Iyu wenga wakujiyuyuwa kweniso wangulutirizga kupempha chovyu kwaku Yesu. Kumbi ntchinthu wuli cho chingumuwovya kuchita venivi? Iyu wenga ndi chivwanu mwaku Yesu. Ndipu Yesu wati wawona kuti munthukazi uyu wenga ndi chivwanu chakukho, wangumuchitiya chinthu chinyaki chapade. Chinanga kuti pakwamba Yesu wangukamba kuti wakutumika kuti wakawovyi “mbereri zakusoŵa za nyumba yaku Isirayeli” pe, iyu wangutuzga chiŵanda cho chasuzganga mwana wa munthukazi wa ku Fonike.

6. Kumbi tisambiranji ku munthukazi wa ku Fonike?

⁶ Kuti tiyanduwengi ndi ulongozgi waku Yehova, tikhumbika kuyezga munthukazi wa ku Fonike. Nasi, tikhumbika kuja akujiyuyuwa, kulutirizga kupempha Yehova kuti watiwovyi kweniso kuja ndi chivwanu chakukho. Munthu wakujiyuyuwa pe ndiyu wangalutirizga kupempha Chiuta kuti wamuwovyi. Kweniso tikhumbika kuja ndi chivwanu mwaku Khristu Yesu ndipuso kuthemba ŵanthu wo watiŵagwiriskiya ntchitu pakulongozga akusambira ŵaki. (Mate. 24:​45-47) Yehova ndi Mwana waki akondwa ukongwa kuwovya kweniso kulongozga ŵanthu wo atesesa kuja ndi mijalidu yeniyi. (Yeruzgiyani ndi Yakobe 1:​5-7.) Sonu tiyeni tiwoni mo Yehova watitipaskiya chakurya chauzimu, mo watitiwovye kuvwala umunthu wufya kweniso vo wachita kuti wativikiliyi mwauzimu. Ndipu mwakugwiriskiya ntchitu chakuwoniyapu cha wakutumika Peturo, Paulo ndipuso Fumu Davidi, tiwonengi vo nasi tingachita kuti tisaniyengi vinthu venivi.

LUTIRIZGANI KURYA CHAKURYA CHAUZIMU NGE PETURO

7. Kumbi Peturo wangupaskika ntchitu wuli, nanga wakhumbikanga kuchitanji? Konkhoskani. (Aheberi 5:14–6:1)

⁷ Tiyeni tiwoni vo vinguchitikiya wakutumika Peturo. Iyu ndiyu wenga Myuda wakwamba kuziŵa kuti Yesu wenga Mesiya yo Yehova wagwiriskiyanga ntchitu kuti waryiski ŵanthu Ŵaki “mazu ngakupaska umoyu wamuyaya.” (Yoha. 6:​66-68) Ndipu Yesu wechendawere kuchanya, wangukambiya Peturo kuti: “Liska ŵana ambereri ŵangu.” (Yoha. 21:17) Peturo wangufiska kugwira ntchitu yeniyi mwakugomezgeka. Ndipu Yehova wangumugwiriskiya ntchitu kuti walembi makalata ngaŵi ngo nge mugulu la mabuku nga mu Bayibolu. Kweni Peturo wakhumbikanga so kusambira Mazu ngaku Chiuta pakuyija. Mwakuyeruzgiyapu, iyu waŵerenganga makalata ngo wakutumika Paulo wangulemba ngo ntchigaŵa cha Bayibolu. Mwakuti Peturo wanguzomereza kuti vinthu vinyaki vo Paulo wangulemba venga “vakusuzga kuvivwisa.” (2 Petu. 3:​15, 16) Chinanga kuti venga viyo, Peturo wangulutirizga mbwenu kusambira, ndipu wagomezganga kuti Yehova wamuwovyengi kuvwisa vo waŵerenganga kweniso kugwiriskiya ntchitu “chakurya chakukhoma” cho Paulo wangukambirika kuti walembi mu makalata ngaki.—Ŵerengani Aheberi 5:14–6:1.

8. Kumbi Peturo wanguchita wuli wati walonde ulongozgi wasonu kutuliya kwaku Yehova kuziya mwa mungelu?

⁸ Peturo wangulongo kuti wenga ndi chivwanu mwaku Yehova, chifukwa wavwiyanga ulongozgi wo wapaskikanga. Mwakuyeruzgiyapu, pa nyengu yo wenga mutawuni ya Yopa, Peturo wanguwona chiwona ndipu mungelu wangumukambiya kuti wabayi ndi kurya nyama zo zenga zakufipiskika mwakukoliyana ndi Dangu laku Mozesi. Chifukwa chakuti Peturo wenga Myuda, wanguwona kuti ulongozgi wo mungelu wangumupaska wenga wakwenere cha. Mwaviyo, pakwamba Peturo wangumuka kuti: “Ndingachita cha Ambuya, chifukwa ndechendaryepu chechosi chakukazuzgika ndipuso chakufipiskika.” Kweni mungelu yo wangumukambiya kuti: “Vinthu vo Chiuta wavitowesa, leka kuvikamba kuti vakufipiskika.” (Machi. 10:​9-15) Yapa sonu, Peturo wanguwamu. Kumbi tiziŵa wuli venivi? Peturo wati wawona ŵaka chiwona, kunguza anthulumi atatu wo angutumika ndi Koneliyasi yo wenga Myuda cha. Koneliyasi wakhumbanga kuti Peturo waluti kunyumba kwaki kuchikumana nayu. Asani wengavi kuwona chiwona, Peturo watingi wazomerengi cha kuchisere munyumba ya munthu yo wenga Myuda cha. Tikamba viyo chifukwa chakuti Ayuda awonanga kuti ŵanthu amitundu yinyaki ŵenga akufipiskika. (Machi. 10:​28, 29) Kweni nyengu yeniyo ndi yeniyo, Peturo wangusintha mo wawoniyanga vinthu kuti wakoliyani ndi ulongozgi wasonu wo Yehova wangumupaska. (Nthanthi 4:18) Iyu wangupharazgiya Koneliyasi kweniso ŵanthu a mubanja laki ndipu wangukondwa ukongwa kuŵawona achija ndi chivwanu, achilonde mzimu wakupaturika kweniso kubatizika.—Machi. 10:​44-48.

9. Kumbi tiyanduwa munthowa ziŵi nizi asani tikhumbisiska kurya chakurya chauzimu chakukhoma?

⁹ Nge Peturo, nyengu zosi nasi titenere kusambira fundu zipusu zo zisanirika mu Mazu ngaku Chiuta. Kweni titenere so kuja ndi mtima wakukhumbisiska kurya chakurya chauzimu chakukhoma, kung’anamuwa fundu za ndimba zo zingaŵa zakusuzga kuzivwisa. Mwaviyo, tikhumbika kupatuwa nyengu yakukwana kuti tisambirengi Mazu ngaku Chiuta mwakuphwere. Ndipu titenere kuyesesa kuvwisa vinthu vo pakwamba tavivwisanga cha. Chifukwa wuli? Tiyanduwa munthowa ziŵi: Chakwamba, tisambira vinthu vakukwaskana ndi Yehova vo vititiwovya kuti timuyanjengi ukongwa kweniso timutumbikengi. Ndipu chachiŵi, vititiwovya kuti tijengi ndi mtima wakukhumbisiska kukambiyaku anyidu vakukwaskana ndi Awusefwi akuchanya. (Aro. 11:33; Chivu. 4:11) Kusazgapu yapa, tisambirapu fundu yinyaki pa vo Peturo wanguchita. Asani gulu lasintha mo tavwiyanga fundu yinyaki ya mu Bayibolu, nasi tikhumbika kusintha mo tiŵanaŵaniya kweniso mo tichitiya vinthu. Venivi viwovyengi kuti Yehova walutirizgi kutilongozga kweniso kuti walutirizgi kutigwiriskiya ntchitu.

LUTIRIZGANI KUVWALA UMUNTHU WUFYA NGE PAULO

10. Kumbi kuvwala umunthu wufya kusazganjipu? (Akolose 3:​8-10)

¹⁰ Kuti tikondwesi Chiuta, tikhumbika kuvwala umunthu wufya. Kumbi kuvwala umunthu wufya kung’anamuwanji? Wakutumika Paulo wangulemba kuti tikhumbika ‘kuzuwa umunthu wakali’ ndi kuvwala “umunthu wufya.” (Ŵerengani Akolose 3:​8-10.) Kuvwala umunthu wufya kukhumbika phamphu kweniso kuto nyengu. Tiyeni tiwoni vo vinguchitikiya Paulo. Kwambiya pa unamana waki, wayesesanga kuchita vinthu vo vikondwesa Chiuta. (Aga. 1:14; Afi. 3:​4, 5) Kweni iyu wasopanga Yehova munthowa yambula kwenere chifukwa chakuti waliziŵanga umampha cha khumbu laku Chiuta. Ndipu kujikuzga kweniso kuleka kuziŵa vinthu vo Khristu wasambizanga, kungumuchitiska kuti waje “munthu waganyavu” yo wenga so ndi mijalidu yinyaki yiheni.—1 Timo. 1:13.

11. Kumbi Paulo walimbananga ndi suzgu wuli? Konkhoskani.

¹¹ Wechendaje Mkhristu, Paulo wasweranga cha kukwiya. Nkhani yo ye mu buku la Machitidu yikonkhoska kuti Paulo wanguŵakwiyiya ukongwa akusambira aku Yesu mwakuti ‘wangutuna cha pa nkhani yakuŵawofyeza ndi kuŵabaya.’ (Machi. 9:1) Tikayika cha kuti Paulo wati waja Mkhristu, wanguyesesa kuti wazuwi umunthu wakali wenuwu. (Aefe. 4:​22, 31) Kweni pa nyengu yo Paulo ndi Baranaba angupambana maŵanaŵanu, yiwu ‘angukwiyisana ukongwa.’ (Machi. 15:​37-39) Yapa venga nge kuti Paulo wayamba so jalidu laki lakali, kweni iyu wanguwere vuli cha. Mumalu mwaki, iyu walutirizganga ‘kupuma liŵavu laki’ kung’anamuwa kulimbana ndi vinthu vo wanangisanga kuti Yehova walutirizgi kumuyanja.—1 Akori. 9:27.

12. Kumbi ntchinthu wuli cho chinguwovya Paulo kulutirizga kusintha nkharu yaki?

¹² Paulo wangufiska kuzuwa umunthu waki wakali ndi kuvwala umunthu wufya chifukwa chakuti wathembanga nthazi zaki cha. (Afi. 4:13) Nge Peturo, Paulo nayu wathembanga “nthazi yo Chiuta wapereka.” (1 Petu. 4:11) Chinanga kuti venga viyo, nyengu zinyaki Paulo wajiwonanga kuti ngwakutondeka mbwenu. Kweni asani waguŵa, waŵanaŵaniyanga vinthu vamampha vo Awisi akuchanya angumuchitiya ndipu venivi vamupaskanga nthazi kuti walutirizgi kusintha kuti wakondwesengi Yehova.—Aro. 7:​21-25.

13. Kumbi tingamuyezga wuli Paulo?

¹³ Tingayezga Paulo asani tiziŵa kuti kwali tateŵete Yehova kwanyengu yitali wuli, tikhumbika kulutirizga kuzuwa umunthu wakali ndi kuvwala umunthu wufya wo Yehova watitiwovya kuja nawu. Asani tawona kuti tayamba so kuchita mijalidu yo tachitanga kali nge kukwiya liŵi pamwenga kulongoro mwaganyavu, titenere cha kujiwona kuti te akutondeka. Mumalu mwaki, tikhumbika kulutirizga kusintha mo tiŵanaŵaniya kweniso mo tichitiya vinthu. (Aro. 12:​1, 2; Aefe. 4:24) Asani tichita venivi, titenere kukumbuka fundu yakukhumbika iyi: Mwakupambana ndi vakuvwala chayivu vo tiwezesa kuti vitiyani, isi ndisi titenere kusintha kuti tikoliyani ndi fundu zaku Yehova. Mwaviyo, tikhumbika kusintha vo tichita kweniso mijalidu yidu kuti vikoliyani ndi vo Chiuta wakhumba.

LUTIRIZGANI KUTHEMBA YEHOVA KUTI WAKUVIKILIYENINGI MWAUZIMU NGE DAVIDI

14-15. Kumbi Yehova watiŵavikiliya wuli ŵanthu ŵaki mwauzimu? (Salimo 27:5) (Wonaniso chithuzi.)

¹⁴ Kusazgiyapu pa chakurya chauzimu kweniso kuvwala umunthu wufya, pe so chinthu chinyaki cho chingatiwovya kuti tikondwengi. Tikhumbika kuvikilirika mwauzimu. Kumbi mazu ngenanga ngang’anamuwanji, nanga tingachita wuli kuti Yehova walutirizgi kutivikiliya mwauzimu?

¹⁵ Fumu Davidi yingukonkhoska vo Yehova wachita kuti wativikiliyi mwauzimu. (Ŵerengani Salimo 27:5.) Yehova wavikiliya ateŵeti ŵaki ku ŵanthu kweniso chinthu chechosi cho chingaŵapweteka mwauzimu. Kumbi Yehova watiŵavikiliya wuli ateŵeti ŵaki mazuŵa nganu? Iyu wakulayizga kuti palivi chidya chechosi cho chikupangika kuti chipweteki ateŵeti ŵaki cho chazamuchita kanthu. (Salimo 34:7; Yesa. 54:17) Chinanga kuti Satana ndi viŵanda vaki ŵe ndi nthazi, kweni Yehova ngwanthazi ukongwa kuphara yiwu. Chinanga kuti angatibaya sonu, kweni Yehova wazakutiyuska. (1 Akori. 15:​55-57; Chivu. 21:​3, 4) Yehova watitiwovya so kumalana ndi vinthu vo vititifipiska mtima vo vingachitiska kuti tileke limu kumuteŵete. (Nthanthi 12:25; Mate. 6:​27-29) Kweniso Awusefwi achanju, akutipaska banja lauzimu la abali ndi azichi wo atitiwovya kweniso ŵara wo atitiphwere. (Yesa. 32:​1, 2) Ndipu asani tawungana ndi Akhristu anyidu ku maunganu, kanandi tikumbusika nthowa zo Yehova wagwiriskiya ntchitu kuti watiwovyi kweniso wativikiliyi mwauzimu.—Ahe. 10:​24, 25.

16. Kumbi Yehova wamuvikiliyanga wuli Davidi?

¹⁶ Pa nyengu yo Davidi wavwiyanga Yehova, iyu wavikilirikanga ku masuzgu ngo munthu wakumana nangu chifukwa chakuchita ubudi mwadala. (Yeruzgiyani ndi Nthanthi 5:​1, 2.) Kweni pa nyengu yo Davidi wanguleka kulondo fundu zaku Chiuta, Yehova wangumuvikiliya cha kuti waleki kukumana ndi masuzgu chifukwa cha vo wangusankha. (2 Samu. 12:​9, 10) Kweni nyengu zinyaki Davidi wakumananga ndi masuzgu chifukwa cha vo ŵanthu anyaki achitanga. Pa nyengu yeniyi, Davidi wakhutuliyanga Yehova vosi vo venga mumtima mwaki ndipu Yehova wamuwovyanga kuti walekengi kufipa ukongwa mtima mwakumusimikiziya kuti watimuyanja kweniso wamuphweriyengi.—Salimo 23:​1-6.

17. Kumbi tingamuyezga wuli Davidi?

¹⁷ Tingamuyezga Davidi asani tipemphera kwaku Yehova kweniso asani tigwiriskiya ntchitu ulongozgi waki pakusankha vakuchita. Tiziŵa so kuti nyengu zinyaki tingakumana ndi masuzgu chifukwa cha vinthu viheni vo taŵeni tasankha, mumalu mwakuŵanaŵana kuti Yehova watondeka kutivikiliya. (Aga. 6:​7, 8) Ndipu asani tikumana ndi masuzgu chifukwa cha vo ŵanthu anyaki asankha, timukambiyengi Yehova vo ve mumtima widu ndipu tigomezgengi kuti iyu wavikiliyengi mtima widu kweniso maŵanaŵanu ngidu.—Afi. 4:​6, 7.

LUTIRIZGANI KUTHEMBA ULONGOZGI WAKU YEHOVA

18. Kumbi tikumana ndi masuzgu wuli, nanga tingachita wuli kuti tilutirizgi kuthemba ulongozgi waku Yehova? (Wonaniso vithuzi.)

¹⁸ Lemba la chaka cha 2026 ndakuti: “Mbakukondwa wo aziŵa kuti akhumbika Chiuta.” Venivi vakukhumbika ukongwa mazuŵa nganu. Chifukwa wuli? Chifukwa ŵanthu anandi mazuŵa nganu azomereza cha fundu yakuti akhumbika Chiuta kweniso ulongozgi waki. Ndipu anyaki wo agomezga kuti kwe Chiuta, akhumba kuti amusopengi munthowa yo yiwu akhumba. Penipo anyaki atende fundu za ŵanthu. Vosi ivi vichitiska kuti alekengi kukondwa. Kweni isi titenere cha kuŵayezga. Kumbi tingachita wuli kuti tilutirizgi kuthemba Yehova? Titenere kulutirizga kurya chakurya chauzimu cho Yehova wapereka, kulutirizga kuvwala umunthu wufya kweniso kulutirizga kuthemba Yehova kuti wativikiliyengi mwauzimu.