Muyeruzgiyengi Kuti Muwona vo Vichitika mu Nkhani yo Musambira

Mu Bayibolu, mwe nkhani zinandi zo zikonkhoska vinthu chayivu vo vikuchitika ndipu nkhani zenizi zititisambiza fundu zakukhumbika ukongwa. Asani tiyeruzgiya kuti tiwona vo vichitika mu nkhani zenizi, vingatiwovya kuvwisa vo tiŵerenga kweniso kusambirapu kanthu. Tiyeni tiwoni fundu zinyaki zo zingakuwovyani kuti muyeruzgiyengi kuti muwona vo vichitika asani musambira nkhani za mu Bayibolu.

• Muŵerengengi mwakukweza. Kuŵerenga Bayibolu mwakukweza kungakuwovyani kuti muyeruzgiyengi kuti muwona vo vichitika. Asani muŵerenga Bayibolu nge banja, mungachita umampha kupaska munthu weyosi wa mu banja linu kuti waŵerengi chigaŵa cha munthu weyosi yo wazumbulika mu nkhani yo.

• Muyeruzgiyengi kuti muwona vo vichitika. Yesani kuvwisa vo ŵanthu wo azumbulika munkhani yo aŵanaŵananga kweniso mo avwiyanga. Mwakuyeruzgiyapu, jifumbeni kuti: ‘Ntchifukwa wuli munthu uyu wangukamba pamwenga kuchita venivi? Kumbi asani ndenga ini, ndatingi ndichitengi wuli pamwenga ndatingi ndivwengi wuli?’

• Mujambulengi vithuzi. Chinanga kuti mulivi lusu la kujambula, kweni kujambula vithuzi va nkhani za mu Bayibolu kungakuwovyani kuti muyeruzgiyengi kuti muwona vo vichitika kweniso kuti mukumbukengi umampha nkhani zo mwasambira.