Mithumo ya Vapostoli
26 Agripa a di embeya Pawulo, khuye: “U ngu dzumedziswa gu dzi emeya.” Pawulo a di khusedza libogo a ganeya, khuye:
2 “Nyi tsakide Pfhumu Agiripa, olu muhuno nyi emidego mbeli gwago gasi nyi dzi emeleya ga satshavbo esi Vajudha va nyi singedzidego, 3 ngudzu-ngudzu olu u tigo gwadi siolovedzo sa Vajudha ni esi va gu mba pwana gwaso. Khu kharato, nyo lomba gu kheni u nyi engiseya khu gu laphisa monyo.
4 “Vajudha vatshavbo va ngu mati mavbanyelo yangu gukhugeya na nyi ngari lidzaha, va nguti edzi nyi vbanyidego khidzo tigoni gwathu ni Jerusalema. 5 Vajudha va nyi tigo gukhugeya gale va ngu dziti gu khavo nyi vbanyide kha nga Mufarisi; va ngu dziti gambe gu khavo nyi di gu landrisa gwadi nayo nyo garadze ngudzu nya wukhongeyi wathu, va gu dzina va na fakaze. 6 Olu nya gu lamudwa khu kotani nya gitumbiso egi Nungungulu a tumbisidego vakokwe vathu. 7 Gitumbiso gegi khigyo gyagimwegyo egi mahundzu yathu nya 12 ma gi vireyago gu gi wona na gi gu tadzisega. Khu kotani nya gitumbiso gyogyo, avo va gu thumeya Nungungulu wutshigu ni mihani khu tshivba yawe yatshavbo. Khigyo gitumbiso gegi gi girago Vajudha va nyi ketsari, Pfhumu Agripa.
8 “Khu ginani mu si khodwigo gu khenu Nungungulu a ngu si kodza gu wusa ava va fudego? 9 Eni nyi di gu pimisa gukheni nyi di yede gu gira satshavbo nyi si kodzago gasi gu fuvisa lina la Jesu wa Nazareta. 10 Khiso kamo nyi nga gira Jerusalema, nyi khothede vapizane* nya vangi kholu nyi di gu dzumeledwe khu vaprista nya vakhongolo gu gira isoso nigu tepo va nga ba va vbweta gu songwa nyi di gu seketeya mawonelo yoyo. 11 Nyi va tshaniside dzisinagogani dzatshavbo na nyi gu zama gu kheni nyi na va digisa gukhodwa gwawe. Nigu kha nga olu nyi nga ba nyiri ni giviti nya gikhongolo khavo nyi di bwe nyi ya tshanisa ni vambe va nga ba va romo omu nya mambe madhoropa ya vbavbandze.
12 “Na nyiri ndziyani nya gu hongole Dhamasko gasi gu ya gira isoso khu gu ba nyi dzumeledwe khu vaprista nya vakhongolo, 13 u ngu dziti Pfhumu, ni vbakari nya mihani nyi di wona gulasa nyo gendze nyo vbindre ni lidambo na guta khu ndzadzini gu ta nyi fenengedza gumogo ni ava nyi nga ba nyiri navo. 14 Hatshavbo hi di thega vbavbatshi, khavbovbo nyipwa lito na li gu nyi embeya khu Gihebheru, khilo: ‘Sawule, Sawule, khu ginani u nyi tshanisago? Wo dzi bayiseya wabune khu gu zama gu dwana ni eni.’* 15 Khavbovbo, nyi di mu wudzisa, kheni: ‘Khuwe mani, Pfhumu?’ Pfhumu yi di nyi hakha, khiyo: ‘Kheni Jesu oyu u mu tshanisago. 16 Khuga u ema, kholu nyi gu hathide gasi gu khala githumi gyangu ni fakazi nya silo u si wonidego ni esi nyi na gu yeyedzago maningano ni eni. 17 Nyi na gu vbulugisa mandzani ga Vajudha ni ga mayigo nyi na gu rumeyago gwawo 18 gasi u ya va tula maho, u va dusa gidemani, u va yisa guwonegeyani; u va dusa mandzani ga Sathane, u va yisa ga Nungungulu gasi va divaledwa sighoho va bwe va hakha thomba eyi Nungungulu a ningidego ava a va hathidego kholu va khodwago avba gwangu.’
19 “Khu kharato, Pfhumu Agiripa, kha nya gi kanyisa giwoniso gya ndzadzini. 20 Ganiolu, gupheya nyi di ya tshumayela vathu va Dhamasko, khavbovbo nyi ya tshumayela va Jerusalema, nyi ya tshumayela Judheya gwatshavbo nyi bwe nyi ya tshumayela vanyamayigo, nyi va embeya gu kheni va yede gu vbindrugedza va wuya ga Nungungulu khu gu va gira mithumo yi yeyedzago gu khiyo va dzi layide. 21 Khiso si nga gira Vajudha va nyi mola tempeleni va zama gu nyi songa. 22 Ganiolu, kha nga olu Nungungulu a nyi phasago nyi ngo simama gu tshumayela kala muhuno, vadugwana ni vakhongolo, nigu kha nyi ganeyi simbe nyo hambane ni esi vaprofeti ni Mosi va ganedego gu khavo si na girega: 23 nyo khiso Kristo a na tshaniseka nigu a na khala oyu nyo pheye nya gu wuswe khu ga vafudego. A na tshumayela guwonegeya ga Vajudha ni vanyamayigo.”
24 Pawulo na ngo ganeya, Festo a di ganeya khu lito nyo khugege, khuye: “U ngu handruga Pawulo, gu hevbula ngudzu gu ngu gu handrugisa!” 25 Ganiolu, Pawulo a di hakha, khuye: “Khandri nyo handruga Pfhumu Festo, ganiolu esi nyi ganeyago lisine nigu si ngu pwala. 26 Nyi ngu dzipwa na nyi tshulegide gu ganeya ni pfhumu kholu uye a ngu mati gwadi mahungu yaya. Nyi ngu tiyisega gu kheni gimwalo ni gimwegyo nya silo sesi gi nga mu vbindra kholu gimwalo nya iso gi nga girwa gusihalani. 27 Pfhumu Agripa u ngu khodwa ga vaprofeti? Nyi ngu dziti gu kheni u ngu khodwa.” 28 Ganiolu, Agripa a di hakha Pawulo, khuye: “Vbadugwana u nga hadzi nyi vbindrugedza nyi khala Mukristo.” 29 Khavbovbo, Pawulo a di hakha, khuye: “Nya gu lomba ga Nungungulu gu kheni gu hweya ni gu mba hweya uwe Pfhumu Agripa ni vatshavbo muhuno va nyi pwago va khala nga eni, ganiolu na va sa hungeledwa dzikorenti dzedzi.”
30 Khavbovbo, pfhumu yi di khuga yi ema, ghovhernadhori, Bherenise ni vambe va nga ba va khade va di khuga navo va ema. 31 Tepo va nga ba va duga, va di pheya gu bhula, khavo: “Mwama yoyu kha ghoha gilo gi yelago gu a songwa mwendro gu khothedwa.” 32 Khavbovbo, Agiripa a di embeya Festo, khuye: “Nari khatshi mwama yoyu kha lomba gu hongola ga Sezari na tshudwe.”