Lidangaliya nya wuraru la Johane
1 Eni, mwama nyi dandridego khu tanga,* nyi ngu loveya Gayo, nyi mu haladzago khu lisine.
2 Gigodwa gyangu, nyi ngu lombeleya gu kheni satshavbo si gu gimbileya gwadi, u manega ni womi nya wadi nga olu. 3 Nyi tsakide ngudzu tepo va ngata vandruye va ta nyi embeya gu khavo u ngu phareleya lisine nigu u ngu simama gu gimbiya lisineni. 4 Gimwalo gi nyi tsakisago* guvbindra gupwa gu pwani sanana sangu si ngu simama gu gimbiya lisineni.
5 Gigodwa gyangu, u ngu yeyedza gutumbega gwago ga esi u gireyago vandruye, ambari na wu si vati. 6 Avo va ganede vbakari nya libandla khu lihaladzo lago. Tepo va na khugago khu yoyo, nyi ngu lomba gu kheni u va phasa khu ndziya yi na tsakisago Nungungulu, 7 kholu va khugide khu yoyo khu lina laye, nigu kha va hakha gilo khiyo ga vanyamayigo. 8 Khu kharato, gu vbwetega hi hakha gwadi vandruye nya nga vovo, gasi hi khala sithumi-khwathu lisineni.
9 Somo nyi lovedego libandla, ganiolu Dhiyotrefe, a golago gu khala malangani nyo pheye vbakari gwawe, kha ningi githawo esi hi ganeyago. 10 Khu kharato, tepo nyi na tago yoyo, nyi nata mu kawuka khu kotani nya esi a girago ni malipha a phalalegiseyago maningano ni ethu. Khandri soso basi: Uye gambe a gu bomba gu hakha vandruye khu githawo nigu a gu himbedzeya ni gu tutumisa libandlani vale va dzinago gu hakha vandruye.
11 Gigodwa gyangu, u nga pimedzeyi esi nyo vivbe, ganiolu pimedzeya esi nya sadi. Oyu a girago esi nya sadi, a gu lumba Nungungulu, ganiolu oyu a girago esi nya guvivbe, a si gu muti Nungungulu. 12 Vathu vatshavbo va ngu ganeya gwadi khu Dhemetriyo, nigu mavbanyelo yaye ma ngu gimbidzisana ni lisine. Khu lisine, anethu hi ngu ningeya wufakazi khuye nigu u ngu dziti gu khuwe wufakazi hi ningeyago khwa lisine.
13 Nyi diri ni silo nya singi gasi gu gu loveya, ganiolu kha nyi vbweti guya khu gu si lova.* 14 Ganiolu, nyi na ta gu wona nya mba hweya nigu hi na ta bhula khovbe ni khovbe.
Gurula gu na manege nago.
Dzipari dzi ngu gu losedzeya. Losedzeya nuwe dzipari dzangu, mweyo khu mweyo.*