Esi si lovidwego khu Matewu

21 Na va romo vbafuvbi ni Jerusalema, va di vboha Bhetifage, Gigomoni nya Miolivha. Jesu, a di ruma vapizane vavili, 2 khuye: “Gimbiyani omu nya alidheya mu yi wonago khavba, mu na ya mana buru na yi hungidwe, na yiri ni giburwana, dzi tshuleni muta nadzo. 3 A gu tshuka muthu nyo khaguri a ganeya gilogyo, mu embeyeni gu khenu: ‘Pfhumu a gu dzi vbweta.’ Khu kharato, va na dzegeya gu mi diga mu wuya nadzo.”

4 Esi si giregide gasi gu tadzisega malito ya muprofeti, a nga khuye: 5 “Embeyani nyamahegyane wa Siyoni, khenu: ‘Pfhumu yago yi nguta gwago, muthu nyo rule, khilede buru, ina, khilede giburwana.’”

6 Vapizane va di hongola va ya gira esi Jesu a va rumidego. 7 Va di wuya ni buru ni giburwana gyayo, va ta dzega sombo sawe va ladza vbatshani nya dziburu, Jesu a khala khu vbatshani nya sombo. 8 Vathu nya vangi va di ladzeleya sombo sawe ndziyani, vambe va di piya matamo nya migindru va ladzeleya ndziyani. 9 Ava va nga ba va thangide ni ava va nga ba va tshade khu hwane va di gu khusedza lito, khavo: “Nungungulu, hi ngu gu lomba, vbulugisa Gyanana gya Dhavhidhe! Kategide wule a tago khu lina la Jehovha! Mu vbulugise hi ngu lomba, uwe u gomogo vbatshani ndzadzini!

10 Tepo Jesu a nga beya Jerusalema, lidhoropa latshavbo li di ema-ema, na va gu khavo: “Khu mani oyu?” 11 Gitshungu gi di gu khigyo: “Oyu khu muprofeti Jesu wa Nazareta ga Galileya!”

12 Jesu a di beya omu nya tempele a ya tutumisa vatshavbo va nga ba va rengisa ni gu renga omu nya tempele, a tshungunula dzimeza dza vatrokarisi nya dzitsapawu ni dzikadera dza vale va nga ba va rengisa sipomba, 13 a va embeya, khuye: “Gu lovidwe gupwani: ‘Nyumba yangu yi na ranwa gu pwani nyumba nya nombelo,’ ganiolu enu mwa gu yi gira gisakha nya dzimbafa.” 14 Nigu a di tedwa khu sikhumu ni silima tempeleni a ta si hawulugisa.

15 Tepo vaprista nya vakhongolo ni valovi va nga wona silo a nga ba a gira ni sanana si nga ba si ganeya khu lito nyo khugege tempeleni, khiso: “Nungungulu, hi ngu gu lomba, vbulugisa Gyanana gya Dhavhidhe!” va di goroga 16 va bwe va mu wudzisa, khavo: “U ngu sipwa esi si ganeyago?” Jesu a di va hlamula, khuye: “Nyi ngu sipwa. Mu si gu leri esi si lovidwego, nya gu pwani: ‘Sanana nya sidugwana ni esi si ngo mamago, si gu dhumiside’?” 17 A di va tshiya, a khuga khu dhoropani, a hongola Bhetaniya a ya lala iyoyo.

18 Ni dzimindru, tepo a nga wuya dhoropani a dipwa ndzala. 19 A di wona nguyu* na wu romo bambe nya ndziya. A di wu yela, ganiolu kha mana gilo, a di ya mana mahagani basi. A di wu embeya, khuye: “U nga velegi gambe mihandro.” Nguyu wule wu di dzegeya gu banga. 20 Tepo vapizane va nga wona isoso, va di hlamala, khavo: “Si kodzegide kharini gu nguyu yoyu wu dzegeya gu banga?” 21 Jesu a di va hakha, khuye: “Khu lisine nyi ngu mi embeya, kheni: Mwa gu ba muri ni gukhodwa, na mu si kanakani, kha mu na nga gira basi esi nyi nga gira nguyu yoyu, ganiolu ambari mwa gu ruma gigomo gegi, khenu: ‘Siguga khavba u dzi rinya linene’, si na girega. 22 Nigu satshavbo mu si lombago khu nombelo na muri ni gukhodwa, mu na ningwa.”

23 Tepo Jesu a nga beya tempeleni, vaprista nya vakhongolo ni madhota va di mu hidzimeleya na gu hevbudza, va ya mu wudzisa, khavo: “Wa gu yi mana hayi tshivba nya gu gire silo sesi? Nigu khu mani a nga gu ninga tshivba yoyo?” 24 Jesu a di va hlamula, khuye: “Aneni nyi na ni giwudziso. Mwa gu nyi hlamulani, aneni nyi na mi embeya gu kheni nya gu yi mana hayi tshivba nya gu gire silo sesi: 25 Gubhabhatisa ga Johane ga guta khu hayi? Khu ndzadzini mwendro khu ga vathu?” Va di pheya gu ganedzisana khu gyawe, khavo: “Ha gu khethu: ‘Khu ndzadzini,’ a na khuye: ‘Khu ginani mu nga ne khodwa gwaye?’ 26 Ganiolu, ha gu khethu: ‘Khu ga vathu,’ hi ngu thava gitshungu, kholu vatshavbo va gu wona Johane nga muprofeti.” 27 Va di mu hlamula, khavo: “Kha hi dziti.” Khu kharato, a di va embeya, khuye: “Aneni kha nyi mi embeyi omu nyi yi manago tshivba nya gu gire silo sesi.

28 “Mwa gu si wona kharini? Mwama moyo a diri ni sanana sivili. A di embeya egi nyo pheye, khuye: ‘Mwanangu, indra thuma thembweni nya miuvha muhuno.’ 29 Gyanana gile gi di hlamula, khigyo: ‘Nyawowe.’ Ganiolu khu hwane nya tepo gi di dzi laya, gi hongola. 30 A di yela egi nya wuvili a ya gi embeya sasimweso. Gi di mu hlamula, khigyo: “Ina papayi, nyi na hongola,” ganiolu kha gya hongola. 31 Khu wevbini ga ava va vavili a nga gira gugola ga papayi wawe?” Va di hakha, khavo: “Khuye nya gupheye.” Jesu a di va embeya, khuye: “Khu lisine nyi ngu mi embeyani, kheni: Vakhupisi ni maphuphulu* va na mi thangeya gu beya Mufumoni wa Nungungulu. 32 Kholu Johane dzude gwanu a ta mi yeyedza ndziya nya gululame; enu kha mwa khodwa gwaye. Ganiolu, vakhupisi ni maphuphulu va khodwe gwaye. Ambari tepo mu nga wona isoso, kha mwa dzi laya mu khodwa gwaye.

33 “Engiseyani gimbe gipimaniso: Gu diri ni mwama nyo khaguri a nga ba a yade miuvha omu nya lithembwe laye. A di li bhiyela, a gira wulanga nya gu sugeye avbo dziuvha gasi gu gira vhinyu a bwe a vbaha nyumba nya gulaphe.* A di tshiyedza* lithembwe lile ga valimi a endra a hongola limbe litigo. 34 Tepo yi nga vboha nango nya mihandro, a di rumeya sithumi saye ga valimi vale gasi guya hakha mihandro yaye. 35 Ganiolu, valimi va di mola sithumi saye, va veta gimwegyo, va songa gimbe, va pfara gimbe khu siwindri. 36 A di rumeya simbe sithumi nya singi gu vbindra esi nyo pheye, ganiolu va di ya si gira sasimweso. 37 Khu guhegisa, a di rumeya gyanana gyaye, na gu pimisa, khuye: ‘Va na ya ninga githawo gyanana gyangu.’ 38 Tepo va nga wona gyanana gyaye, valimi vale va di bhula khu gyawe, khavo: ‘Khuye oyu a na tshalago ni thomba. Hongoleni hi mu songa, gasi hi tshala ni thomba yaye!’ 39 Khu kharato, va di gi mola, va gi rinya vbavbandze nya lithembwe, va ya gi songa. 40 Litshigu mune lithembwe a na wuyago, ginani a nata girago ga valimi vale?” 41 Va di hakha, khavo: “Olu va vivbedwego khu myonyo, a nata songa vatshavbo, a ningeya lithembwe lile ga vambe valimi ava va na mu ningago mihandro khu tepo yakona.”

42 Jesu a di va hakha, khuye: “Ina mu si leri omu nya Milowo, gupwani: ‘Giwindri* gi nga nyenywa khu vavbahi khigyo gi khadego giwindri nya litshina gya vbakhonatunu. Esi sa guta khiyo ga Jehovha, nigu si lulamide mahoni gwathu’? 43 Khu kharato, nyi ngu mi embeyani, kheni: Mu na dzegedwani Mufumo wa Nungungulu wu ningedwa ga limbe litigo li na velegago mihandro yakone. 44 Nigu, uye a na thegeyago giwindri gegi, a na tshala khu sipandre. Uye gi na mu thegeyago, gi na mu kuya huye bhi.”

45 Tepo vaprista nya vakhongolo ni Vafarisi va ngapwa sipimaniso saye, va di tugula gu khavo a di gu thula avo. 46 Ambari olu va nga ba va vbweta gu mu mola, va di gu thava gitshungu kholu gi di gu mu wona nga muprofeti.