Mithumo ya Vapostoli
15 Vama nyo khaguri va di releya khu Judheya, va ta hevbudza vandruye, khavo: “Mwa gu mba hana wugwera* khu guya khu nayo wa Mosi kha mu na nga vbulugiswa.” 2 Ganiolu, hwane nya gu ba Pawulo ni Bharinabha va ganedzisanide ni vama vale khu gu ba vari ni mawonelo nyo hambane navo, vatshavbo va di pwana gu rumeya Pawulo ni Bharinabha gumogo ni vambe va hongola Jerusalema gasi gu ya lulamisa mahungu yaya ni vapostoli ni madhota.
3 Khu kharato, hwane nya gu ba libandla li va vbwegedzide kala wulanga nyo khaguri, vama vava va di simama ni ndziya yawe, va vbindra khu Fenisiya ni Samariya, na va gu tshamuseya vandruye edzi vanyamayigo va nga vbindrugedza khidzo va khodwa nigu vandruye va di gu tsaka tepo va nga ba vapwa isoso. 4 Tepo va nga vboha Jerusalema, va di hakhwa gwadi khu libandla, khu vapostoli ni madhota; va va embeya silo nya singi Nungungulu a nga gira khu gu thumisa avo. 5 Ganiolu, vambe nya tsawa nya Vafarisi va nga ba va vbindrugedzide va khodwa, va di khuga va ganeya, khavo: “Gu vbwetega va haniswa wugwera va bwe va landrisa Nayo wa Mosi.”
6 Khavbovbo, madhota ni vapostoli va di tshangana gasi gu bhula khu mahungu yaya. 7 Hwane nyo manege ni guganedzisana nya gukhongolo khu tepo nyo laphe, Pedro a di khuga a ema, khuye: “Vandruye, mu ngu dziti gwadi gu khenu gukhugeya matshigoni nyo pheye, Nungungulu nyi hathide vbakari gwanu gasi gu embeya vanyamayigo mahungu nya yadi gasi va khodwa. 8 Nigu Nungungulu a tigo myonyo yeyedzide gu khuye a ngu va dzumeya* khu gu va ninga liphuvbo nya guage kha nga edzi a hi ningidego khidzo nethu. 9 Uye kha vega guhambana vbakari gwathu ni avo, ganiolu agiside myonyo yawe khu gukhodwa. 10 Khu kharato, khu ginani enu mu lingago Nungungulu khu gu handzega magatani ga vapizane kanga owu ambari ethu ni vakokwe vathu hi nga mba si kodza gu wu rwala? 11 Ganiolu, ethu hi ngu khodwa gu khethu hi ngu vbulugiswa khu wuwadi wa Pfhumu Jesu gufana ni avo.”
12 Khavbovbo, vatshavbo va di degula va engiseya Bharinabha ni Pawulo na va gu tshamuseya siwoniso ni silewugiso nya singi esi Nungungulu a giredego vanyamayigo khu gu thumisa avo. 13 Hwane nya gu ba va vbedzide gu ganeya, Jakobe a di hakha, khuye: “Vandruye, nyi engiseni. 14 Simiyoni hi embede gu khuye olu Nungungulu a dzumede vanyamayigo gasi gu hatha vbakari gwawe vathu va nga hadzi ranwa khu lina laye. 15 Malito yaya ma ngu pwana ni esi vaprofeti va lovidego, khavo: 16 ‘Hwane nya silo sesi, nyi na wuya nyi ta wusedza nyumba ya Dhavhidhe yi thegidego; nyi na vbahedza marumbi yayo, nyi yi wusedza 17 gasi ava va nga tshala va vbwetedzeya Jehovha khu monyo watshavbo gumogo ni vanyamayigo vatshavbo va ranwago khu lina laye, a ngu ganeya Jehovha, oyu a girago silo sesi 18 si tidwago gukhugeya gale.’ 19 Khu kharato, makungo yangu gu mba lemedziseya giemo vanyamayigo va vbindrugedzago va khodwa ga Nungungulu, 20 ganiolu gu va loveya gasi va dzi hambanisa ni silo si nga nyenyeziswa khu sifananiso, wubhayi,* sirengo si ngafa khu gu dzwinywa ni novba. 21 Gukhugeya gale, mabhuku ya Mosi ma na ni milayo yeyi yi tshumayedwago madhoropani gwatshavbo kholu yi ngu lerwi khu lito nyo khugege dzisinagogani dzisabhadho dzatshavbo.”
22 Khavbovbo, vapostoli ni madhota gumogo ni libandla latshavbo va di hunga gu hatha vama vbakari gwawe va va rumeya Antiyokiya na vari ni Pawulo ni Bharinabha. Va di rumeya Judha a nga ba a ranwa gu pwani khu Bharisabha gumogo ni Silasi, va nga ba vari vama va nga ba va thangeya vbakari nya vandruye. 23 Va di lova lidangaliya leli, va va rumeleya khu gu thumisa avo, khavo:
“Vandriyanu, vapostoli ni madhota va ngu mi rumeleya malosedzeya enu vandruye mu gu va mambe mayigo mu gomogo Antiyokiya ni Siriya ni Silisiya. 24 Hi pwide gu pwani gu dugide vambe vbakari gwanu va mi gireya sigaradzo khiso va nga ganeya, va zama gu mi ndreyisa ndziyani, ganiolu ethu kha ha va ruma gilo. 25 Khu kharato, hi hungide gu hatha vama nyo khaguri hi mi rumeleya gumogo ni sigodwa sathu Bharinabha ni Pawulo, 26 vama va ningedego womi wawe khu kotani nya lina la Pfhumu yathu Jesu Kristo. 27 Khu kharato, hi mi rumelede Judha ni Silasi gasi va ta mi tshamuseyani silo sesi khu likana. 28 Liphuvbo nya guage ni ethu hi wonide gu khethu tshukwana hi si mi rwegini silo nya gu lemeye vbavbandze nya silo sesi si vbwetegago: 29 Simamani gu dzi hambanisa ni silo si phasedwego sifananiso, novba, sirengo nya gufe khu gu dzwinywa ni wubhayi. Mwa gu landrisa milayo yeyi, mu na vbanya gwadi. Hakhani malosedzeya yathu!”
30 Hwane nya gu ba va khugide khu vbale, va di releya Antiyokiya, va ya tshanganisa tsawa watshavbo va va ninga lidangaliya. 31 Hwane nya gu ba va li leride, va di tsaka khu gu ba va tiyisidwe. 32 Kha nga olu Judha ni Silasi anavo va nga ba vari vaprofeti va di tiyisa vandruye khu dziganelo nya dzingi. 33 Hwane nya gu ba va khade tepo nyo khaguri eyi, va di tshadzisana ni vandruye, va bweleya khu gurula ga ava va nga va rumeya. 34 *—— 35 Ganiolu, Pawulo ni Bharinabha va di khala Antiyokiya gumogo ni vambe vathu, va hevbudza ni gu tshumayela mahungu nya yadi ya Jehovha.
36 Hwane nya matshigu nyo khaguri, Pawulo a di embeya Bharinabha, khuye: “Hongole hi bweleya hi ya wuseya vandruye madhoropani gwatshavbo hi nga tshumayela mahungu ya Jehovha hi ya va wona gu khethu vomo kharini.” 37 Bharinabha a di gu vbweta gu khuye va hongola ni Johane, oyu a nga ba a ranwa gu pwani khu Marko. 38 Ganiolu, Pawulo kha nga ba a dzina gu khuye va hongola ni Johane kholu a di gu va digide Panfiliya nigu a diri mwalo navo tepo va nga gira thumo wowu. 39 Khu kharato, va di manega ni gu ganedzisana nya gukhongolo avba nya gu va hegisa khu gu hambana. Bharinabha a di dzega Marko va beya ngalava va hongola Kipre. 40 Hwane nya gu ba vandruye va gombede ga Jehovha gasi a yeyedza wuwadi waye ga Pawulo, Pawulo a di hatha Silasi va hongola. 41 Va di vbindra khu Siriya ni Silisiya na va gu tiyisa mabandla.