Mithumo ya Vapostoli
16 Pawulo a di vboha Dherbhe, a ya vbindra a hongola Listra. Iyoyo gu diri ni mupizane moyo nyo pwani khu Thimoti, gyanana gya nyamayi moyo nya Mujudha a nga ba a khodwe, ganiolu papayi waye a diri Mugreki. 2 Vandruye va Listra ni Ikoniya va di gu ganeya gwadi khuye. 3 Pawulo a di gu vbweta gu khuye Thimoti a hongola naye, khu kharato, a di mu hanisa wugwera* khu kotani nya Vajudha va mule, kholu va di gu dziti gu khavo papayi waye a diri Mugreki. 4 Tepo va nga ba va vbindra khu madhoropani, va di gu embeya vandruye esi si hungidwego khu vapostoli ni madhota va nga ba vari Jerusalema, gasi va si landrisa. 5 Khu kharato, mabandla ma di gu simama gu tiyiswa gukhodwani nigu ma di gu engedzeya tshigu ni tshigu.
6 Va di vbindra khu Firijiya ni Galatiya kholu liphuvbo nya guage li di gu va himbedzede gu tshumayela mahungu ya Nungungulu provhinsiya ya Aziya. 7 Nigu tepo va nga releya Misiya, va di zama gu beya Bhitiniya, ganiolu Jesu a di va himbedzeya khu gu thumisa liphuvbo a nga hakha khiyo ga Papayi waye. 8 Khu kharato, va di vbindra khu Misiya va releya Trowadhe. 9 Ni wutshigu, khomu nya giwoniso, Pawulo a di wona mwama moyo wa Makedhoniya na emide. Mwama wule a di lomba Pawulo, khuye: “Delu Makedhoniya u ta hi phasa.” 10 Hwane nya gu ba Pawulo a wonide giwoniso, hi di zama gu hongola Makedhoniya, na hi gu tumba gu khethu Nungungulu a di hi rana gasi hi ya va tshumayela mahungu nya yadi.
11 Khu kharato, hi di khileya ngalava khu Trowadhe hi hongola Samotarasiya. Ganiolu, khu litshigu li nga landreya, hi di hongola Neyapoli. 12 Khiyoyo hi di hongola dhoropani ga Filipi, a gu lidhoropa nya likhongolo la Makedhoniya li nga ba li fumwa khu Varoma. Hi di khala dhoropani momo matshigu nyo khaguri. 13 Khu litshigu nya Sabhadho, hi di duga khu dhoropani hi hongola bambe nya tsongo, na hi gu pimisa gu khethu gu diri ni wulanga nyo gire avbo milombelo. Hi di ya khala, hi pheya gu ganeya ni vanyamayi va nga ba va tshanganide vbale. 14 Vbale, gu diri ni nyamayi moyo wa dhoropani ga Tiyatira nyo pwani khu Lidhiya, a nga ba a rengisa sombo nyo dhure* nigu a diri mukhozeyi wa Nungungulu. Uye a di gu engiseya. Jehovha a di tula monyo wa nyamayi wule gasi a vega gupima avba nya esi Pawulo a nga ba a ganeya. 15 Hwane nya gu ba uye ni vandrangani gwaye vatshavbo va bhabhatisidwe, a di lomba, khuye: “Mwa gu ba mu nyi wona na nyi gu tumbegide ga Jehovha, deluni mu ta khala gaya gwangu.” A di hi gurumedza gu hongola naye.
16 Litshigu limwedo na hi gu hongola wulanga nyo gombeye, hi di tedwa khu nyamahegyane moyo a nga ba ari githumi; a nga ba ari ni lidhimoni nya wutumbe. Uye a di gu ghanyisa ngudzu vatholi vaye, kholu a di gu kodza guti silo nya wumindru. 17 Nyamahegyane yoyu a di gu landriseya ethu ni Pawulo, na gu ganeya khu lito nyo khugege, khuye: “Vama vava sithumi sa Nungungulu a Khugegidego Ngudzu nigu va gu mi tivisa ndziya nya guvbulugise.” 18 Uye a di gira isoso khu matshigu nya mangi. Khavbovbo, Pawulo a di garala khiso, a thendregedza a embeya liphuvbo lile, khuye: “Nyi ngu gu ruma khu lina la Jesu Kristo gu kheni: Duga gwaye.” Liphuvbo lile li di dzegeya gu duga.
19 Tepo vatholi va nyamahegyane wule va nga wona gu khavo nogosi yi vbede, va di mola Pawulo ni Silasi va va ndrindra-ndrindra kala merkadhu, va ya va ningeya ga dzipfhumu. 20 Va di va yisa ga dzipfhumu nya lidhoropa, va ya khavo: “Vama vava va gu wusa pfilupfilu dhoropani. Avo Vajudha 21 nigu va gu huweleya siolovedzo esi ethu hi si yeligo gu si hakha mwendro gu si landrisa kha nga olu hi gu Varoma.” 22 Gitshungu gyatshavbo gi di va wugeya. Dzipfhumu nya lidhoropa dzi di va tshula sombo,* dzi rumisa gu khidzo va kwamudwa khu mapitso. 23 Hwane nya gu va vete ngudzu, dzi di va khotheya pasoni, dzi ruma ghwardha nya lipaso gu va ghadha gwadi. 24 Tepo a nga embedwa isoso, a di va dzega a ya va khotheya wulanga wu nga ba wu romo khu ndrani nya lipaso, a va hunga mawundru avba nya gighodho.
25 Ganiolu, ni vbakari nya wutshigu, Pawulo ni Silasi va di gu gombeya ni gu dhumisa Nungungulu khu dzindzimo. Va di gu pwidwa khu sibotshwa. 26 Khu githugedza, gu di manega girevareva nya gikhongolo gi nga kutsunga lipaso, malimba yatshavbo nya lipaso ma tulega, dzikorenti dza vatshavbo dzi tshulega. 27 Tepo ghwardha yi nga wuga, yi wona gu khiyo malimba nya lipaso ma tulegide, yi di dzega xipadha yi vbweta gu dzi songa na yi gu pimisa gu khiyo sibotshwa si tutumide. 28 Ganiolu, Pawulo a di khusedza lito, khuye: “U nga dzi songi, hatshavbo hi womo avba!” 29 Khavbovbo, ghwardha yile yi di lomba gu khiyo yi resedwa kandriya, yi beya khu gu tutuma na yi gu ndrendremeya, yi ya khidzima mbeli ga Pawulo ni Silasi. 30 Yi di duga navo vbavbandze, yi ya va wudzisa, khiyo: “Ginani nyi yedego gu gira gasi nyi vbulugiswa?” 31 Va di hlamula, khavo: “Khodwa ga pfhumu Jesu, uwe ni ndranga yago mu na vbulugiswa.” 32 Va di mu embeya mahungu ya Jehovha uye ni ndranga yaye yatshavbo. 33 Ni wutshigu wowo, a di va dzega a ya va handza silondra. Khavbovbo, uye ni ndranga yaye yatshavbo, va di bhabhatiswa nya mba hweya. 34 A di va dzega a hongola navo gaya gwaye a ya va dongiseleya gilo nyo hodze. Uye ni vandrangani gwaye va di tsaka ngudzu khu gu ba va khodwe ga Nungungulu.
35 Tepo gu ngagya, dzipfhumu nya lidhoropa dzi di rumeya dzighwardha gasi gu ya embeya ghwardha yile nya lipaso, khavo: “Tuleya vama vovo.” 36 Ghwardha yile nya lipaso yi di embeya Pawulo, khiyo: “Dzipfhumu nya lidhoropa dzi nyi rumide gu khidzo nyi mi tuleya mwavavili. Dugani olu kamo mu hongola khu gurula.” 37 Ganiolu, Pawulo a di va embeya, khuye: “Avo va hi vetide na hi wonwa khu vathu, nya mba hi lamula. Va hi khotheya pasoni nari gu hi Varoma. Olu vo hi tuleya gusihalani? Isoso kha si pwali! Va nate avo va ta hi dusa.” 38 Dzighwardha dzile dzi di ya embeya malito yaya ga dzipfhumu nya lidhoropa. Tepo dzipfhumu nya lidhoropa dzi ngapwa gu pwani vama vale va diri Varoma, dzi di thava ngudzu. 39 Khu kharato, dzipfhumu dzile dzi di hongola dzi ya va lomba divalelo. Khavbovbo, dzi di duga navo vbavbandze, dzi ya va lomba gu khidzo va duga khu dhoropani mule. 40 Tepo Pawulo ni Silasi va nga duga khu pasoni, va di hongola gaya ga Lidhiya. Tepo va nga wona vandruye, va di va tiyisa, khu hwane nya isoso va di khuga va hongola.