Esi si lovidwego khu Matewu

12 Khu tepo yile, khu litshigu nya Sabhadho, Jesu a di vbindra khomu nya mathembwe gu nga ba gu yadwe trigu. Vapizane vaye va dipwa ndzala, va vburumuleya trigu, va hodza. 2 Tepo Vafarisi va nga wona isoso, va di khavo: “Vapizane vago va gu gira silo si himbedzedwago gu girwa khu Sabhadho.” 3 A di va embeya, khuye: “Kha mwa hevbula esi Dhavhidhe ni vama a nga ba ari navo va nga gira tepo va ngapwa ndzala? 4 Kha mwa hevbula gupwani uye a di beya nyumbani ga Nungungulu, va ya hodza dzipawu nya ningelo, a gu silo si nga ba si si yeli gu hodzwa khuye ambari khu vale va nga ba vari naye, ganiolu si nga ba si yedwe gu hodzwa khu vaprista basi? 5 Mwendro kha mwa hevbula gambe omu nya nayo gupwani vaprista va di gu thuma tempeleni khu Sabhadho ganiolu va si ningwi nandru? 6 Ganiolu, nyi ngu mi embeyani gu kheni avba womo uye a gu khongolo ngudzu guvbindra tempele. 7 Nari khatshi mu di pwisiside gu khenu mo thula ginani malito yaya: ‘Nya gu hatha wuhindzi guvbindra miphaso,’ na mwa sa ninga nandru ava va gu mwalo nawo. 8 Kholu Gyanana nya muthu, Pfhumu nya Sabhadho.”

9 Tepo a nga khuga khu vbale, a di beya sinagogani gwawe, 10 a ya mana mwama a nga ba a haside libogo. Khu kharato, va di vbweta gighelo nyo mu ninge khigyo nandru, khu gu mu wudzisa, khavo: “Ina si ngu dzumedziswa gu hawulugisa muthu khu Sabhadho?” 11 A di va wudzisa, khuye: “Khu mani vbakari gwanu nya gu ya gu tshuka nvuta yaye yi thegeya phalani khu Sabhadho a si yi dusigo? 12 Ina muthu mwalo lisima ngudzu guvbindra nvuta? Khu kharato, khandri gighoho gu gira silo nya sadi khu Sabhadho. 13 Uye a di embeya mwama wule, khuye: “Thawuludza libogo lago.” Uye a di li thawuludza, ilo li di hawuluga, li fana ni lile limbe. 14 Ganiolu, Vafarisi va di duga va ya luga mano nyo mu songe. 15 Tepo Jesu a nga si tugula, a di khuga khu vbale. Nya vangi va di mu landra nigu uye a di hawulugisa vatshavbo. 16 Ganiolu, a di va laya gasi va si tshuki va mu tivegisa ga vambe vathu, 17 gasi gu tadzisega malito ya muprofeti Isaya, a nga khuye:

18 “Wonani githumi gyangu nyi gi hathidego, nyi gi golago, egi gi nyi tsakisago! Nyi na gi ninga liphuvbo langu nigu gi na hevbudza mayigo gu khigyo ginani gululama. 19 Kha gi na nga dwanisana ni muthu, ne kha gi na nga gulumeya nigu mwalo a na pwago lito lagyo mudziruwani nya dzikhongolo. 20 Kha gi na nga vbedzisa tshava yi fanyegidego, ne kha gi na nga tshima litirisidu li ngo tuvigago, kala a resa gululama. 21 Khu lisine, mayigo ma na tumba lina laye.”

22 Va di mu reseya mwama a nga ba ari gikhumu nigu a diri gidudu, uye a diri ni lidhimoni ganiolu Jesu a di mu hawulugisa, khavbovbo uye a pheya gu ganeya ni gu wona. 23 Gitshungu gi di hlamala, gi ganeya khigyo: “Ina khandrigyo egi Gyanana gya Dhavhidhe?” 24 Tepo Vafarisi va ngapwa isoso, va di khavo: “Mwama yoyu a gu tutumisa madhimoni khu tshivba ya Bhelizebhu,* pfhumu nya madhimoni.” 25 Kha nga olu a nga ba a siti esi va nga ba va pimisa, a di va embeya, khuye: “Watshavbo mufumo wu dzi kabanisago wu na thega, nigu ni levbini lidhoropa mwendro ndranga yi dzi kabanisago kha yi na nga tiya. 26 Khu gu fana, abari gu Sathane a gu tutumisa Sathane, uye a dzi kabaniside abune, a dzi wugeya; wu na pindruga kharini mufumo waye? 27 Abari gu eni nya gu tutumisa madhimoni khu tshivba ya Bhelizebhu, ahati sanana sanu ke, so ma tutumisa khu tshivba ya mani? Khiso isoso si na girago va khala valamuli vanu. 28 Ganiolu abari gu nya gu tutumisa madhimoni khu tshivba nya liphuvbo la Nungungulu, khu lisine, Mufumo wa Nungungulu wu mi vbohede. 29 Mwendro si nga kodzega kharini gu muthu a beya nyumbani nya mwama nya tshivba a ya mu phanga, nya mba pheya khu gu mu hunga? Hwane nya gu ba a mu hungide, khavbo a na si kodzago gu mu beya. 30 Uye a si emigo ni eni a ngu nyi wugeya, uye a si hengeledzigo ni eni a gu phalalegisa.

31 “Khu kharato, nyi ngu mi embeyani gu kheni: Vathu va na divaledwa ni gevbini gighoho mwendro givalo va girago, ganiolu oyu a valago liphuvbo nya guage kha na nga divaledwa. 32 Khu giyeyedzo, oyu a valago Gyanana nya muthu, a na divaledwa. Ganiolu ni wevbini a valago liphuvbo nya guage gima kha na nga divaledwa, ne teponi yeyi, ne teponi yi tago.

33 “Mwa gu limeya simbo nya wadi, wu na velega mihandro nya yadi. Ganiolu, mwa gu limeya simbo nya mba wadi wu na velega mihandro nya mba yadi, kholu simbo ni simbo wa gu tidwa khu mihandro yawo. 34 Sanana nya dzinyoga! Mu na si kodza kharini gu ganeya silo nya sadi narigu mu vivbedwe khu myonyo? Kholu likana lo ganeya esi si tadego monyoni. 35 Muthu nya wadi a gu dusa silo nya sadi khu thombani gwaye nya yadi, ganiolu muthu nya guvivbe a gu dusa silo nya gu vivbe khu thombani gwaye nyo vivbe. 36 Nyi ngu mi embeyani gu kheni vathu vatshavbo va na dzi hlamuleya khu Litshigu nya Gulamudwe khu satshavbo silo nya guvivbe va ganedego; 37 kholu guya khesi u ganeyago, u na wonwa nu lulamide nigu guya khesi u ganeyago gambe, u na ningwa nandru.”

38 Khavbovbo, valovi nyo khaguri ni Vafarisi, va di khavo: “Muhevbudzi, ho vbweta gu khethu u hi gireya giwoniso.” 39 A di va hakha, khuye: “Gitugulwana nya gu mba tumbega,* nya gu vivbedwe khu monyo, mu nga gu simama gu vbweta giwoniso. Ganiolu, gimwalo giwoniso mu na yeyedzwago nasiri egi gya muprofeti Jona. 40 Kholu gu fana ni Jona a khadego matshigu mararu ndrani nya ndzandzi nya yikhongolo, Gyanana nya muthu anigyo gi na khala matshigu* mararu vbavbatshi nya mafu. 41 Vathu va Ninivha va na wuswa gulamudwani ni gitugulwana gegi va bwe va gi ninga nandru kholu avo va vbindrugedzide tepo va nga tshumayedwa khu Jona. Ganiolu, avba womo oyu a gu khongolo guvbindra Jona. 42 Pfhumu nya nyamayi ya sul,* yi na wuswa gulamudwani ni gitugulwana gegi yi bwe yi gi ninga nandru, kholu yi khugide khu mahegiso nya litigo gasi gu tapwa wugengeyi wa Solomoni. Ganiolu avba womo uye a gu khongolo guvbindra Solomoni.

43 Tepo liphuvbo nya guvivbe li dugago khavbo nya muthu, la gu vbindra khu malangani nya gihala* na li gu gimbiya li vbwetedzeya wulanga nyo hefemule, li gu hamuga. 44 Khavbovbo, lo hegisa khu gu khilo: ‘Nyi na bweleya nyumbani gwangu nyi tago khumo.’ Tepo li nga vboha, li di ya mana nyumba na yiri liphanga, na yi vbiyedwe yi bwe yi mburisedwa. 45 Khavbovbo, li bweleya li ya dzega 7 maphuvbo nyo vivbe guvbindra ilo, ma ta beya nyumbani momo, ma khala umo yatshavbo, khu kharato mavbanyelo ya mwama yoyo ma vivba ngudzu guvbindra edzi a nga ba ari idzo gupheyani. Khiso sasimweso si na giregeyago gitugulwana gegi nya guvivbe.”

46 Na ngo ganeya ni gitshungu, mamayi waye ni vandriyaye va di emide vbavbandze na va gu vbweta gu ganeya naye, 47 Khu kharato, gu di dugeleya moyo a nga mu embeya, khuye: “Mamayi wago ni vandriyago vomo vbavbandze, va gu vbweta gu ganeya nago.” 48 Jesu a di mu hlamula, khuye: “Khu mani mamayi wangu nigu khu vamani vandriyangu?” 49 A di khusedza libogo a yeyedza vapizane vaye, khuye: “Mamayi wangu ni vandriyangu kha mu va woni ava! 50 Kholu ni wevbini a girago gugola ga Papayi wangu a gomogo ndzadzini, uyoyo khuye a gu ndriyangu nya mwama, ndriyangu nya nyamayi nigu khuye a gu mamayi wangu.”