Malito nyo pheye

MILOWO nya Guage yi lovidwe khu Gihebheru, Giaramayiko, ni Gigreki, na yi gu thangedwa khu Nungungulu. Gasi gu vathu “nya mayigo yatshavbo” va phasega khu Lito la Nungungulu, Milowo gu vbwetega yi vbindrugedzedwa khu malimi nya mangi. (Matewu 24:14) Mabhuku yatshavbo nya 27, ma khugeyago khavbo ga Matewu kala Gutuledwa ma gu ranwa pwani “Milowo nya Gigreki nya Wukristo” kholu gu pheyani yi lovidwe khu Gigreki khu Makristo ma nga ba ma thangedwa khu Nungungulu ga lizana myaga nyo pheye, teponi yathu.

Wuvbindrugedzeyi nya Mafu nya Maphya nya Gigreki nya Wukristo wu manegide gupheya khu Gingiza khu 1950. Wuvbindrugedzeyi wowu wu di gu dzi seketeya ngudzu avba nya mabhuku ma nga ba mari ni ndruma ngudzu, ya Westcott ni Hort, aya ma nga ba ma pwanana ni mabhuku nya Gigreki ya teponi yoyo. Wuvbindrugedzeyi nya Mafu nya Maphya wu vbindrugedzede malito nya Gigreki khu ndziya nya gutumbege. Gu thumisidwe Bhibhiliya nya 2013 nya Gingiza gasi gu vbindrugedzeya Bhibhiliya yeyi nya Gitonga, ni gu dzi garadzeya gu lowa silo nya gutumbege gu fana ni eyi nya Gingiza.

Lina la Nungungulu a gu Jehovha, li ngu manega 237 malanga omu nya Bhibhiliya nya Guage, Matewu — Gutuledwa. Kha nga olu guagisa lina la Nungungulu si gu sa lisima, ni olu vathu nya vangi va yedego gu rana lina leli gasi va vbulugiswa, omu nya Bhibhiliya yeyi gu bweledzedwe lina la Jehovha gwatshavbo li nga ba li manega omu nya Milowo nya Guage. — Matewu 6:9; Varoma 10:13.

Lina Wuvbindrugedzeyi nya Mafu nya Maphya, la guta khavba nya gitumbiso gya Nungungulu nyo gire gu mafu ma khala maphya gasi vathu vatshavbo va phasega. (2 Pedro 3:13) Vavbindrugedzeyi nya Bhibhiliya yeyi va haladzago Nungungulu, Muni nya Milowo nya Guage, va ngu pwisisa edzi si gu sa lisima khidzo gu vbindrugedzeya mapimo ni malito ya Nungungulu khu ndziya nya gutumbege. Ha gu gombeleya gu khethu Bhibhiliya yeyi yi phasa ngudzu ava va na lerigo na va gu vbweta ‘guti lisine’ khu monyo watshavbo. — 1 Thimoti 2:4.