JOYELI
1 Jehovha a di embeya Joyeli, gyanana gya Petuweli, gu ganeya malito yaya:
2 “Gupwani, enu madhota,
Riyani dzindzeve enu mwatshavbo vavbanyi va tigoni momu.*
Ina gu di nga girega silo nya gu fane matshigoni yanu
Mwendro matshigoni ya vakokwe vanu?
3 Embeyani sanana sanu,
Sanana sanu niso si na embeye sanana sawe,
Ni gu sanana sawe si na embeye gitugulwana gi landreyago.
4 Esi si tshidwego khu khaba wu ghoheteyago, si hodzidwe khu khaba wu vbuvbago;
Esi si tshidwego khu khaba wu vbuvbago, si hodzidwe khu khaba wu gu mwalo mambapi;
Esi si tshidwego khu khaba nya mba na mambapi, si hodzidwe khu khaba wu tshungunulago.
5 Enu sidhakwa,* wugani mu liya!
Enu mwatshavbo mu seyago vhinyu, dileyani,
Kholu mu dusedwe vhinyu nya yiphya* kanani gwanu.
6 Kholu gu ni libuthu li gwedego tigoni gwangu; li na ni tshivba, nigu likhongolo ngudzu nya gu mwalo a kodzago gu li kotari.
Magwaha yalo, magwaha nya ngala, ni gu kanani gwalo ga gu fana ni ogu nya ngala.
7 Ilo li sasede lithembwe langu nya miuvha, li bwe li vbindrugedza nguyu wangu* wu khala gihuru.
Va kwabulede magoba yatshavbo va ma dzudzuga,
Ambari ni omu nya sitamwana, kha gwa tshala gilo.
8 Dileyani gu fana ni esi si girwago khu nyamahegyane* a ambadego saku,*
Khu gu ba a luzide noyivhu* ya wuphyani gwaye.
9 Nyumbani ga Jehovha, ningelo nya trigu ni ningelo nya vhinyu, si vbede;
Vaprista, va gu sithumi sa Jehovha, vomo gililoni.
10 Lithembwe li sasedwe, mafu momo gililoni;
Kholu trigu yi tshungunudwe, vhinyu nya yiphya yi bangide, azeyiti yi vbede.
11 Valimi va vbede tshivba, valimi nya dziuvha va gu dileya
Khu kotani nya trigu ni sevhadha;
Kholu, thembweni gu mwalo gilo gasi gu vbwera.
12 Simbo nya gu velege dziuvha wu bangide,
Nguyu wu wunide.
Simbo nya gu velege dziroma, gindru ni simbo nya gu velege mansa;
Misimbo yatshavbo ya thembweni yi bangide;
Gutsaka gu vbindrugedzide gu khala dzitshoni vbakari nya vathu.
13 Enu vaprista, ambalani dzisaku, mu khala gililoni;*
Dileyani, enu mu thumeyago vbaalitaritunu.
Enu sithumi sa Nungungulu wangu, beyani, mu vbedza wutshigu watshavbo na mu ambade dzisaku;
Kholu mwalo gambe a resago miningelo nya trigu ni miningelo nya vhinyu nyumbani ga Nungungulu wanu.
14 Dongiseyani* gu pfhunga; ranani vathu gasi vata tshanganoni nya guage.
Tshanganisani madhota ni vavbanyi vatshavbo nya litigo leli,
Omu nya nyumba ya Jehovha Nungungulu wanu; lombani giphaso ga Jehovha.
15 Libango khu kotani nya litshigu leli!
Kholu litshigu la Jehovha lomo vbafuvbi,
Nigu li nata nga gu tshungunula gutago khiyo ga Oyu Nya Tshivba Yatshavbo!
16 Ina guhodza kha ga dzegwa na hi gu si wona khu maho yathu?
Ina gutsaka ni gunengeya kha sa duswa khu nyumbani ga Nungungulu wathu?
17 Dzimbewu* dzi wunide vbavbatshi nya mafoxola yawe.
Sisangala si mwalo gilo.
Sithathe si tshungunudwe, kholu trigu yi bangide.
18 Sifuyo niso si ngu keta!
Dzimombe dzomo pfilupfiluni kholu dzimwalo wulanga nyo hodze!
Dzinvuta dzomo gutshanisekani.
19 Nyi na lomba giphaso avbo gwago, uwe Jehovha;
Kholu nilo wu tshungunude malanga ya giwulani omu sirengo si hodzago,
Nigu malavbelavbe ma tshungunude misimbo yatshavbo ya thembweni.
20 Sirengo nya likhabi niso so vireya giphaso gyago,
Kholu mati ma bangide
Ni gu nilo wu tshungunude malanga ya giwulani omu sirengo si hodzago.”
2 “Wombani pundru Siyoni!
Girani ligwaha nya nyimbi umo nya gigomo gyangu nya guage.
Vatshavbo vavbanyi nya litigo* leli va na ndrendremeye,
Kholu litshigu la Jehovha li ngu vboha! Lomo vbafuvbi!
2 Litshigu nya gidema nya gikhongolo,
Litshigu nya mazuvi ni gidema nyo phume,
La gu fana ni guwonegeya nya gu duge nya lidambo gu swayegago vbatshani nya sigomo.
Gu na ni vathu nya vangi nya tshivba;
Gu si gu manegi vathu nya nga vovo,
Nigu kha gu na nga tshuka gu manegide vathu nya nga avo
Umo nya mimela yatshavbo.
3 Mbeli gwaye womo nilo wu tshungunulago,
Nigu hwane gwaye gu na ni malavbelavbe nya nilo ma fuvisago.
Mathembwe ma gu romo mbeli gwaye ma gu fana ni lithembwe la Edheni,
Ganiolu, hwane gwaye giwula a gu mwalo muthu.
Gimwalo gi na vbulugago.
4 Giemo gyawe gya gu fana ni egi nya dzikavhalu,
Nigu avo va gu tutuma nga dzikavhalu nya nyimbi.
5 Sikingu sawe sa gu fana ni ligwaha li girwago khu dzikareta nya nyimbi tepo dzi tutumago vbatshani nya sigomo,
Nga ligwaha nya nilo wu khondrago tepo wu vbisago mwasi wu tshaledzedego thembweni.
Va gu fana ni vathu nya tshivba va dzi dongisedego gu dwana nyimbi.
6 Vathu va na vbeya tshivba khu kotani yawe.
Dzatshavbo dzikhovbe dzawe dzi na yeyedza gu garadzega.*
7 Avo va ngu dhumeya gu fana ni vadwani nya nyimbi,
Va lita muru gu fana ni masotshwa,
Moyo ni moyo a gu simama ndziyani gwaye,
Ni gu kha va ndreyi mu dzindziyani gwawe.
8 Kha va rindrividzani khu gyawe;
Moyo ni moyo a gu simama ndziyani gwaye.
Vambe va gu songwa khu matshari,
Ava vambe va gu simama gu gimbiya.
9 Va gu dhumeya lidhoropa, va tutuma khu vbatshani nya muru yalo.
Va lita dzinyumba, va beya khu dzijaneya kha nga dzimbafa.
10 Mbeli gwawe, mafu ma gu tseka-tseka, ndzadzini gu ndrendremeya.
Lidambo ni ngima si sivbade,
Nigu dzinyeledzi dzi luzide wenengedzo wadzo.
11 Jehovha a na khusedza lito laye mbeli ga libuthu laye, kholu libuthu leli li na ni masotshwa nya mangi.
Uye a landrisago malito Yaye a tiyide;
Kholu litshigu la Jehovha likhongolo nigu li ngu thisa ngudzu;
Khu mani a na li tiyelago?”
12 “Khu kharato, na gu ngari ni tepo,” a ngu ganeya Jehovha, “wuyani gwangu khu myonyo yanu yatshavbo,
Mu pfhunga, mu liya ni gudileya.
13 Pferulani myonyo yanu nasiri sombo sanu,
Wuyani ga Jehovha, Nungungulu wanu,
Kholu a na ni pweya-wusiwana, wuwadi, gulaphisa-monyo* ni gu tade khu lihaladzo nyo tumbege,
A na dzipwa a si resi mhango.
14 Adzina a na bweleya hwane a vbindrugedza makungo yaye,
A mi reseya makategwa,
Gasi mu gireya Jehovha Nungungulu wanu ningelo nya trigu nuwo nya vhinyu.
15 Wombani pundru Siyoni!
Dongiseyani* gu pfhunga; raneyani vathu tshangano nya guage.
16 Tshanganisani vathu; agisani libandla.
Ranani vama va dandridego khu tanga;* mu tshanganisa sanana ni sanana si ngarigo gu velegwa.
Noyivhu yi na duge, nigu noyivha yi na duge khu vbakamatunu gwayo.
17 Vbakari nya koredhori ni alitari
Va na liye vaprista sithumi sa Jehovha, na va gu khavo:
‘Pweya vathu vago uwe Jehovha,
U nga digi thomba yago yi khala gihegiso,
Khu gu va diga va fumedwa khu mayigo.
Khu gevbini gighelo gi yedego gu gira vathu va ganeya gu khavo: “Womo hayi Nungungulu wawe?”’
18 Jehovha a na vhikeya litigo laye,
A na pweya-wusiwana vathu vaye.
19 Jehovha a na hlamula vathu vaye, khuye:
‘Nyi na mi rumeleya trigu, vhinyu nya yiphya ni azeyiti,
Nigu enu mu na khura khiso;
Kha nyi na nga mi khadzisa gambe gihegiso vbakari ga vanyamayigo.
20 Nyi na yisa hwindzo nanu muthu a tago khu norte;
Nyi na mu yisa gihalani gu gu mwalo muthu,
Avo va gomogo mbeli gwaye va na wuya yiphwani ya khuga-dambo,*
Avo va tshadego khu hwane va na yiswa yiphwani ya pfola-dambo.*
Gu nunga gwaye gu na pwala tigoni gwatshavbo;
Mahema yaye ma na simama gu pwala tigoni gwatshavbo;
Kholu Nungungulu a na gira silo nya sikhongolo.’
21 Uwe litigo, U nga thavi.
Tsaka u nengeya, kholu Jehovha a na gira silo nya sikhongolo.
22 Enu sirengo nya likhabi, mu nga thavi,
Kholu malanga ya giwulani omu sirengo si hodzago gu na nyuga,
Nigu misimbo yi na velega mihandro;
Nguyu* ni simbo wu velegago dziuvha, si na velega ngudzu.
23 Enu sanana sa Siyoni, tsakani mu bwe mu nengeya ga Jehovha Nungungulu wanu;
Kholu uye a na mi ningani ndzadzi nyo pheye khu pimo nya wadi,
Nigu a na mi wiseyani ndzadzi nya yingi,
Ndzadzi nya nango nyo pheye, ni ndzadzi nya nango nya gu yale, gu fana ni gale.
24 Umo gu vbevberedwago umo dzimbewu gu na tala khu trigu nya yadi,
Nigu umo gu sugedwago umo vhinyu gu na pfhurugeya vhinyu nya yiphya ni azeyiti.
25 Nyi na mi livbani myaga mu nga sasedwa khu khaba,
Khu khaba nya mba na mambapi, khaba nya gu ghoheteye ni khaba nya gu tshungunule,
A gu libuthu langu nya likhongolo nyi nga mi rumeleya.
26 Khu lisine, mu na hodza mu khura,
Nigu mu na dhumisa lina la Jehovha Nungungulu wanu,
Oyu a nga mi gireya silo nyo hlamadzise;
Nigu vathu vangu gima kha va na nga thedwa gambe dzitshoni.
27 Nigu enu mu nati gu khenu nyi womo vbakari ga va na Israyeli,
Nigu eni kheni Jehovha Nungungulu wanu — mwalo mumbe!
Vathu vangu gima kha va na nga thedwa gambe dzitshoni.
28 Hwane nya isoso nyi na guhula liphuvbo langu ga vatshavbo vathu,
Nigu sanana sanu nya sikhwathana ni esi nya sagadzyana si na profeta,
Vama vanu va dandridego khu tanga* va na manega ni miloro,
Nigu madzaha yanu ma na manega ni siwoniso.
29 Ga matshigu yoyo nyi na guhula liphuvbo langu
Ambari kamo ga sithumi sangu nya vama ni ga esi nya vanyamayi.
30 Nyi na gira silewugiso ndzadzini ni mafuni,
Novba, nilo ni wutshi nya wungi.
31 Na li nga si vbohi litshigu nya likhongolo nyo thise la Jehovha, lidambo li na vbindrugedza li khala gidema,
Nigu ngima wu na khala nga novba.
32 Nigu watshavbo wule a ranago lina la Jehovha a na vbulugiswa;
Kholu gigomoni gya Siyoni ni Jerusalema vomo avo va na vbulugago, kha nga edzi Jehovha a ganedego khidzo;
Avo va vbulugago khu ava va ranwago khu Jehovha.”
3 “Wonani! ga matshigu yoyo ni ga tepo yoyo,
Tepo nyi na wuyisago dzigumbi dza Judha ni dza Jerusalema,
2 Nyi na tshanganisa mayigo yatshavbo
Nyi bwe nyi ma gira ma releya Kovani wa Josafati.*
Iyoyo nyi na ya ma lamula
Nyi seketeya thomba yangu Israyeli
Kha nga olu avo va nga phalalega ni mayigo,
Nigu va di kabaneyana litigo langu khu gyawe.
3 Va di sasula dzisolo avba nya vathu vangu;
Va di gu rengisa gikhwathana gasi gu thola liphuphuli
Nigu va di gu rengisa nyamahegyane gasi va mana vhinyu nyo seye.
4 Enu Tiro ni Sidhoni, ni satshavbo sipandre sa Filisitiya, ginani mu gu nagyo ni eni?
Mwa gu nyi bweledzeya khu gilo nyo khaguri nyi nga mi gireya?
Abari gu mwa gu nyi bweledzeya,
Nya mba hweya nyi na tisa vbatshani nya mihungo yanu tshatshazelo wanu.
5 Kha nga olu mu nga dzega prata yangu ni oru yangu,
Mu bwe mu dzega dzithomba dzangu nya lisima mu dzi yisa umo nya dzitempele dzanu;
6 Mu bwe mu rengisa Judha ni Jerusalema ga Vagreki,
Khu gu feya gu va yisa hwindzo ni litigo lawe;
7 Nyi na va wuyisa khomu mu va rengisidego umo,
Nigu nyi na resa tshatshazelo wanu vbatshani nya mihungo yanu.
8 Nyi na ningeya* sanana sanu nya sikhwatana niso nya sagadzyana mandzani ga Vajudha,
Nigu avo va na si ningeya* ga vathu va Sebha, a gu litigo la hwindzo,
Kholu khu Jehovha a ganedego isoso.
9 Huweleyani ga mayigo, khenu:
‘Dzidongiseyeni* gasi gu hongola nyimbitunu! Khendzugisani ava nya tshivba!
Masotshwa yatshavbo ma na hidzimeye, ma na dwane!
10 Vbindrugedzani mavbadza yanu ma khala dzispadha ni sighalala* sanu si khala matshari.
Oyu a vbedego tshivba a na ganeye gu khuye: “Nyi na ni tshivba.”
11 Deluni nigu phasanani, enu mayigo yatshavbo ma gomogo bambe, tshanganani!’”
Uwe Jehovha, reledza eyi va nya tshivba vago.*
12 Mayigo ma na khendzuge nigu ma nate Kovani wa Josafati;
Kholu vbale nyi na khala gasi gu lamula mayigo yatshavbo ma gomogo bambe.
13 Thumisani sikela,* kholu nango nya guvbwere yi vbohide.
Deluni nigu gandredzeyani, kholu avba gu sugedwago avbo vhinyu gu tade.
Avba gu sugedwago avbo ga gu pfhurugeya, kholu wuvivbi nya mayigo wu khongolo ngudzu.
14 Gitshungu gyomo kovani nya gulamule,*
Kholu litshigu la Jehovha lomo vbafuvbi,
Lomo kovani nya gulamule.
15 Lidambo ni ngima si na sivbala,
Nigu dzinyeledzi dzi na luza guwonegeya gwadzo.
16 Nigu Jehovha a na dzuma khu Siyoni,
Khu Jerusalema a na khusedza lito laye.
Ndzadzi ni mafu si na ndrendremeya;
Ganiolu, Jehovha a na khala wuthavelo ga vathu vaye,
Ni likhokhola ga vathu va Israyeli.
17 Nigu enu mu na dziti gu khenu eni kheni Jehovha Nungungulu wanu, a khalago Siyoni, gigomoni gyangu nya guage.
Jerusalema a na khala wulanga nya guage,
Nigu valuveli* kha va na nga vbindra gambe khumo.
18 Ga litshigu lolo, sigomo si na doteya vhinyu nya gu lovbeye
Sigomwana si na goga leti,
Nigu mitsongo ya Judha yi na tala khu mati.
Khu nyumbani ga Jehovha gu na duga gifefe,
Gi na regarigo Kova nya Miakasiya.
19 Ganiolu, Egipto gu na khala nya mba na muthu,
Nigu Edhomi, gu na khala giwula nya mba na muthu,
Khu kotani nya wughevenga wu giredwego vathu va Judha,
A gu litigo va nga vbaladza novba nya mba na nandru.
20 Ganiolu, Judha gu na vbanya vathu kala gupindruga
Nigu Jerusalema, vathu va na vbanya khu mimela ni mimela.
21 Kha nyi na nga va wona gambe nga vathu va gu na ni nandru;*
Nigu Jehovha a na khala Siyoni.
Mwendro: “mafuni momu.”
Mwendro: “vamaleveni.”
Mwendro: “vhinyu nyo lovbeye.”
Mwendro: “figueira”
Khu gukongoma: “nyamayi nya gu gima a si gu hengeyi malawu.”
Mwendro: “mwama.”
Mwendro: “dziveteleyeni dzikhana.”
Khu gukongoma: “Agisani.”
Mwendro adzina: “dzifigu nyo bange.”
Mwendro: “nya mafu.”
Mwendro: “gu vbindrugedza kori.”
Mwendro: “a hweya gu goroga.”
Khu gukongoma: “agisani.”
Mwendro: “madhota.”
Go thudwa: “yiphwa nya gufe.”
Go thudwa: “yiphwa ya Medhiteraniyu.”
Mwendro: “Figueira.”
Mwendro: “madhota.”
Si thulago: “Jehovha mulamuli.”
Khu gukongoma: “nyi na rengisa.”
Khu gukongoma: “va na si rengisa.”
Khu gukongoma: “Dzi agiseni.”
Mwendro: “podadeira.”
Mwendro: “vadwani nya nyimbi.”
Mwendro: “givbwero.”
Mwendro: “avba gu hungedwago avbo mahungu.”
Mwendro: “vaestranjeru.”
Khu gukongoma: “Nyi na wona novba wawe na wuri mwalo nandru.”