AGEWU

1 Ga mwaga nya wuvili nya gufume ga Pfhumu Dharyo, khu ngima nya wu 6, khu litshigu nyo pheye nya ngima, Zorobhabheli ghovhernadhori wa Judha, gyanana gya Salatiyeli ni muprista Josuwa gyanana gya Jehozadhaki, va di hakha malito yaya khiyo ga Jehovha khu gu thumisa muprofeti Agewu:*

2 “Jehovha nya mabuthu, wari khuye: ‘Vathu vava, vari khavo: “Tepo nya gu vbahe* nyumba* ya Jehovha yi si gu vbohi.”’”

3 Jehovha a di ganeya gambe khu gu thumisa muprofeti Agewu, khuye: 4 “Ina eyi tepo nya gu mu vbanya dzinyumbani nya gu mburisedwe khu madhera narigu nyumba yeyi yi khade marumbi? 5 Olu, Jehovha nya mabuthu, wari khuye: ‘Vegani gupima* dzindziyani gwanu. 6 Enu mwa gu yala dzimbewu nya dzingi, ganiolu mwa gu vbwera silo nya sidugwana. Mu ngu hodza, ganiolu kha mu khuri. Mu ngu seya, ganiolu kha mu kodwi. Mu ngu ambala sombo, ganiolu kha si mi furumedzi. Oyu a thumago a gu theya esi a hakhago omu nya pasta* nya gu polege.’”

7 “Jehovha nya mabuthu, wari khuye: ‘Vegani gupima* dzindziyani gwanu.’

8 “‘Gweyani sigomoni mu ya dzega madhera mu ta vbaha nyumba gasi gu eni nyi tsaka khiyo nyi bwe nyi dhumiswa,’ a ngu ganeya Jehovha.”

9 “‘Mu di gu vireya nya singi, ganiolu mu manide nya sidugwana; tepo mu nga resa silo sesi nya sidugwana nyumbani, eni nyi di ta si furugedza si phalalega. Khu ginani?’ a ngu ganeya Jehovha nya mabuthu. ‘Kholu nyumba yangu yi tshade khu marumbi narigu enu, moyo ni moyo wanu a pharegide khu gu sayisa nyumba yaye. 10 Khu kharato, ndzadzini gu segede thondrwane yayo nigu mafu ma segede dzimbewu dzayo. 11 Nigu nyi reside gihala mafuni, sigomoni, omu nya dzimbewu, omu nya vhinyu nya yiphya, omu nya azeyiti, omu nya mihandro yi dugago mafuni, ni ga vathu, ni ga sirengo ni ga yatshavbo mithumo nya mandza yanu.’”

12 Zorobhabheli, gyanana gya Salatiyeli, ni muprista nya khongolo Josuwa, gyanana gya Jehozadhaki ni vathu vatshavbo, va dipwa lito la Jehovha Nungungulu wawe ni malito ya muprofeti Agewu, kholu Jehovha Nungungulu wawe, a di gu mu rumede nigu vathu vatshavbo va di pheya gu thava Jehovha.

13 Khavbovbo, Agewu, a nga ba a rumedwe khu Jehovha, a di ganeya malito yaya ga vathu, a tadzisa thumo a nga ba a ningidwe khu Jehovha, khuye: “‘Eni nyi na ni enu,’ a ngu ganeya Jehovha.”

14 Jehovha a di kutsa ghovhernadhori wa Judha, a gu Zorobhabheli gyanana gya Salatiyeli, ni muprista nya khongolo Josuwa, gyanana gya Jehozadhaki ni vathu vatshavbo gasi va pheya gu gira thumo nya gu vbahedze nyumba ya Jehovha nya mabuthu, Nungungulu wawe. 15 Isoso si giregide khu litshigu nya wu 24, nya ngima nya wu 6 ga mwaga nya wuvili nya gufume ga Pfhumu Dharyo.

2 Khu ngima nya wu 7, khu litshigu nya wu 21, Jehovha a di ganeya khu gu thumisa muprofeti Agewu, khuye: 2 “Wudzisa Zorobhabheli ghovhernadhori wa Judha, gyanana gya Salatiyeli, ni muprista nya khongolo Josuwa, gyanana Jehozadhaki, ni vathu vatshavbo, khuwe: 3 ‘Ina vbakari gwanu, womo a nga yi wona nyumba* yeyi na yi ngari ni wudhumo wayo? Mwa gu yi wona kharini olu, ina khandri mwa gu yi wona nga khatshi kha yiri ya gilo mwa gu yi fananisa ni edzi yi nga ba yi romo khidzo gale?’

4 “‘Olu tiya, uwe Zorobhabheli,’ a ngu ganeya Jehovha, ‘tiya uwe Josuwa muprista nya khongolo, gyanana gya Jehozadhaki.’

“‘Tiyani enu vathu vatshavbo nya litigo leli,’ a ngu ganeya Jehovha, ‘nigu thumani.’

“‘Kholu nyi na ni enu,’ a ngu ganeya Jehovha nya mabuthu. 5 ‘Dundrugani esi nyi nga mi tumbisa tepo mu nga duga khu Egipto, nigu liphuvbo langu li nga gu simama nanu.* Mu nga thavi.’”

6 “Kholu Jehovha nya mabuthu, wari khuye: ‘Nya mba hweya, nyi na gira gambe gu ndzadzini, mafuni, linene ni mafu nyo bange si ndrendremeya.’

7 “‘Nyi na gira gu mayigo yatshavbo ma ndrendremeya nigu silo nya lisima nya mayigo yatshavbo si na beya nyumbani momu nigu nyi na yi tadza khu wudhumo,’ a ngu ganeya Jehovha nya mabuthu.

8 “‘Prata khyangu nigu oru khyangu,’ a ngu ganeya Jehovha nya mabuthu.

9 “‘Wudhumo wu na manegago avba nya nyumba yeyi wu na ba wuri wukhongolo guvbindra owu wa gale,’ a ngu ganeya Jehovha nya mabuthu.

“‘Nigu nyi na vega gurula wulangani wowu,’ a ngu ganeya Jehovha nya mabuthu.”

10 Khu litshigu nya wu 24 nya ngima nya wu 9, ga mwaga nya wuvili nya gufume ga Dharyo, muprofeti Agewu a di hakha malito yaya khiyo ga Jehovha: 11 “Jehovha nya mabuthu, wari khuye: ‘Nga wudzisa silo sesi vaprista maningano ni nayo: 12 “A gu tshuka muthu a dzega nyama yi agidego a yi theya omu nya tshoka nya sombo saye, sombo sesi saye si kuha pawu, si kuha guhodza, si kuha vhinyu mwendro mafura mwendro ni gevbini gimbe gilo nya gu hodze, ina silo sesi si na manega na si agide niso?”’”

Vaprista va di khavo: “Ahihi!”

13 Khavbovbo, Agewu a di va wudzisa, khuye: “Ahati a gu tshuka muthu a dzi nyenyezisa khu gu kuha girumbi* ganiolu a ta kuha silo sesi, ina aniso si na manega na si nyenyezide?”

Vaprista va di hlamula, khavo: “Aniso si na nyenyeza.”

14 Khu kharato, Agewu a di khuye: “‘Khidzo nyi va wonago khidzo vathu vava ni litigo leli,’ a ngu ganeya Jehovha, ‘nigu khidzo nyi wu wonago khidzo thumo watshavbo nya mandza yawe; satshavbo va si resago omu si nyenyezide.’

15 “‘Ganiolu gu khugeya muhuno, vegani gupima avba nya silo sesi: Na yi si pheyi tempele ya Jehovha, 16 silo si di romo kharini? Tepo muthu a nga ba a hongola sigomoni nya dzimbewu na gu pimisa gu khuye a na ya mana 20 mipimo, uye a di gu ya mana 10; tepo muthu a nga ba a hongola iyo gu sugedwago iyo dziuvha na gu khuye a na ya mana 50 mipimo nya vhinyu, a di gu ya mana 20. 17 Nyi ghohetede thumo watshavbo nya mandza yanu, nyi rumede lihani nya guvbise ngudzu, ni gukura ni maralala, ganiolu ne moyo wanu kha wuya gwangu,’ a ngu ganeya Jehovha.

18 “‘Vegani gupima* avba nya silo sesi gu khugeya muhuno, litshigu nya wu 24 nya ngima nya wu 9, litshigu gu nga phedwa gu vbahwa nyumba ya Jehovha; vegani gupima avba nya silo sesi: 19 Ina gu ngari ni dzimbewu omu dzi vegedzedwago umo? Simbo nya dziuvha, nguyu, simbo nya maroma ni simbo nya miolivha kha ya theya mihandro, khandridzo? Gu khugeya muhuno, nyi na mi kategisa.’”

20 Khu litshigu nya wu 24, Agewu a di hakha nya wuvili lito li nga ba lita khiyo ga Jehovha, na li gu khilo: 21 “Embeya Zorobhabheli ghovhernadhori wa Judha, khuwe: ‘Nyi na gira gu ndzadzini ni mafuni gu ndrendremeya. 22 Nyi na fuvisa sikhalo nya mifumo nigu nyi na fuvisa dzitshivba nya mifumo nya mayigo; nyi na fuvisa dzikareta nya nyimbi ni vakhileyi vadzo. Dzikavhalo ni vakhileyi vadzo va na thega; va na songana khu xipadha.’”

23 “‘Ga litshigu lolo,’ a ngu ganeya Jehovha nya mabuthu, ‘nyi na gu thumisa, uwe githumi gyangu Zorobhabheli, gyanana gya Salatiyeli,’ a ngu ganeya Jehovha, ‘nyi na gu gira u fana ni phera nya gifungo, kholu khuwe nyi gu hathidego,’ a ngu ganeya Jehovha nya mabuthu.”