MAHUNGU NYA YADI GUYA KHESI SI LOVIDWEGO KHU MATEWU

1 Libhuku nya matimu ya Jesu Kristo,* gyanana gya Dhavhidhe, gyanana gya Abrahama:

17 Khu kharato, gukhugeya ga Abrahama kala ga Dhavhidhe, gu vbindride 14 situgulwana; gukhugeya ga Dhavhidhe kala tepo Vaisrayeli va nga yiswa Bhabhiloni, gu vbindride 14 situgulwana; gukhugeya tepo va nga yiswa Bhabhiloni kala ga Kristo, gu vbindride 14 situgulwana.

18 Guvelegwa ga Jesu Kristo gu giregide kharati: Tepo Josefa a nga ba a tumbiside Mariya gu tshadha naye, Mariya a di khura mimba khu liphuvbo nya guage,* na va si gu tshadhi. 19 Ganiolu, kha nga olu mwama waye, Josefa, a nga ba ari muthu nyo lulame, kha nga ba a vbweta gu mu tshonegisa vathuni, khu kharato, a di hunga gu hambana naye gusihalani. 20 Na nga gu dundrugeya khu isoso, ngilozi ya Jehovha* yi di ganeya naye khomu nya loro, khiyo: “Josefa, gyanana gya Dhavhidhe, u nga thavi gu dzega mwangadzi wago Mariya u hongola naye gaya kholu mimba a gu nayo a di yi mana khu liphuvbo nya guage. 21 Uye a na velega gyanana nya gikhwathana, u na gi riya gu khuwe khigyo Jesu,* kholu a na vbulugisa vathu vaye sighohoni sawe.” 22 Satshavbo sesi si giregide gasi gu tadzisa esi Jehovha a si ganedego khu gu thumisa muprofeti waye, a nga khuye: 23 “Mu ngu wona, mbiri yi na khura mimba, yi velega gyanana nya gikhwathana gi na ridwago lina nyo pwani khu Emanuweli,” si thulago gu khiso “Nungungulu na ni ethu.”

24 Khavbovbo, Josefa a di khendzuga khu muligovbeni, a gira satshavbo a nga embedwa khu ngilozi ya Jehovha, a dzega mwangadzi waye a hongola naye gaya. 25 Khu kharato, kha hengeya naye malawu kala a hefemula gyanana, egi Josefa a nga gi riya gu khuye khigyo Jesu.

2 Hwane nya gu ba Jesu a velegidwe Bhetlehema wa Judheya, matshigoni ya pfhumu Herodhi,* vasasuli va thumisago dzinyeledzi va tago khu Khuga-dambo va di vboha Jerusalema, 2 vaya khavo: “Womo hayi oyu a velegidwego gasi gu khala pfhumu nya Vajudha? Hi wonide nyeledzi yaye tepo hi nga ba hi romo Khuga-dambo nigu hi dzude gasi guta mu khidzimeya.” 3 Tepo a ngapwa isoso, pfhumu Herodhi a di garadzega ngudzu gumogo ni vathu vatshavbo va Jerusalema. 4 Khavbovbo, uye a di tshanganisa vaprista vatshavbo nya vakhongolo ni valovi, a va wudzisa omu a nga hadzi velegedwa umo Kristo.* 5 Avo va di mu hlamula, khavo: “A na velegedwa Bhetlehema wa Judheya, kholu khiso si lovidwego khu muprofeti, a nga khuye: 6 ‘Uwe Bhetlehema wa Judha, kha wuri lidhoropa nya lidugwana ga vaghovhernadhori va Judha, kholu khavbo gwago yi na duga pfhumu yi na sayisago vathu vangu, Vaisrayeli.’”

7 Khavbovbo, khu gusihalani, Herodhi a di tshanganisa vasasuli vale nyo thumise dzinyeledzi a vbweta guti gu khuye lini gwadi-gwadi yi wonegidego nyeledzi yile. 8 Tepo a nga va rumeya Bhetlehema, a di va embeya, khuye: “Indrani mu ya vbwetedzeya gwadi gyanana gegi, tepo mu na gi manago, wuyani mu ta nyi embeya gasi aneni nyi hongola nyi ya gi khidzimeya.” 9 Hwane nya gu ba va mu engisede, va di beya ndziyani, khavbovbo, va di wona gu khavo nyeledzi yile va nga yi wona tepo va nga ba va romo Khuga-dambo yi di gu va thangeya. Tepo yi nga vboha avba gi nga ba gi romo gyanana, yi di ema. 10 Tepo va nga yi wona, va di tsaka ngudzu. 11 Tepo va nga beya nyumbani, va di wona gyanana na giri ni mamayi wagyo Mariya, khavbovbo va di gi khidzimeya. Va di tula dzipasta dzawe va dusa oru, olibhanu ni mira, va ninga gyanana. 12 Kha nga olu va nga ba va gengedzidwe khu Nungungulu khomu nya loro gasi va si bweleyi ga Herodhi, avo va di bweleya tigoni gwawe khu yimbe ndziya.

13 Hwane nya gu ba va khugide, ngilozi ya Jehovha yi di wonega ga Josefa khomu nya loro, khiyo: “Wuga, u dzega gyanana ni mamayi wagyo, mu thava mu hongola Egipto, mu ya khala iyoyo kala nyi mi embeya gilogyo, kholu nugunugu Herodhi a na vbwetedzeya gyanana gasi gu gi songa.” 14 Khavbovbo, Josefa a di wuga ni wutshigu a dzega gyanana ni mamayi wagyo va hongola Egipto. 15 Uye a di ya khala iyoyo kala Herodhi afa. Khu kharato, gu tadzisega esi Jehovha a ganedego khu gu thumisa muprofeti waye, khuye: “Nyi ranide gyanana gyangu khu Egipto.”

16 Tepo Herodhi a nga tugula gu khuye vasasuli vale nyo thumise dzinyeledzi va mu sengide, a di goroga ngudzu, a ruma gu khuye si songetedwa satshavbo sanana nya sikhwathana sa Bhetlehema ni mayigwana ya vbafuvbyana mule, si nga ba si si gu vbindrisi myaga mivili guya khu tepo a nga ba a embedwe khu vasasuli nyo thumise dzinyeledzi. 17 Gu tadzisega kharato malito ya muprofeti Jeremiya, a nga khuye: 18 “Gu di pwala lito nya dzihuwa ni gu liya khu Rama. Gu diri Rakeli a nga ba a liya sanana saye, kha nga ba a vbweta ni gu thaveledwa kholu iso si diri mwalo gambe.”

19 Tepo Herodhi a ngafa, ngilozi ya Jehovha yi di wonega ga Josefa khomu nya loro Egipto, 20 khiyo: “Khuga, dzega gyanana ni mamayi wagyo mu hongola Israyeli, kholu vale va nga ba va vbweta gu gi songa va fude.” 21 Khu kharato, a di wuga a dzega gyanana ni mamayi wagyo va hongola tigoni ga Israyeli. 22 Ganiolu, tepo a ngapwa gupwani Arkelawo khuye a nga ba a fuma Judheya wulangani ga papayi waye Herodhi, Josefa a di thava gu hongola iyo. Tepo a nga gengedzwa khu Nungungulu khomu nya loro, uye a di hongola Galileya. 23 Uye a di ya khala dhoropani ga Nazareta gasi gu tadzisega esi si nga ganedwa khu vaprofeti va nga khavo: “Uye a na ranwa gupwani Munazarenu.”

3 Matshigoni yale, Johane mubhabhatisi a di ya tshumayela giwulani gya Judheya, 2 na gu khuye: “Vbindrugedzani, kholu Mufumo wa Nungungulu womo vbafuvbi.” 3 Khu lisine, oyu khuye a nga thudwa khu muprofeti Isaya tepo a nga khuye: “Gu na ni lito nya muthu li pwalago giwulani li gu khilo: ‘Dongiseleyani ndziya Jehovha! Lulamisani dziruwa dzaye.’” 4 Johane a di gu ambala sombo nya mawoya nya dzikamelo ni libhandri nya lidowo giwununi. Guhodza gwaye gu diri khaba* ni wulombe nya likhabi. 5 Vathu va Jerusalema, ni vathu vatshavbo va Judheya ni vatshavbo va nga ba va vbanya bambe ga Joridhani va di gu hongola gwaye, 6 va ya bhabhatiswa* khuye Tsongoni ga Joridhani, na va gu dawuleya sighoho sawe guagani.

7 Tepo a nga wona Vafarisi ni Vasadhusi nya vangi na va guta gasi gu ta bhabhatiswa, a di va embeya, khuye: “Sanana nya dzinyoga! Khu mani a nga mi embeya gu khuye mu na si kodza gu tutuma zanga yi na tago? 8 Khu kharato, yeyedzani mihandro nya gu khenu mu ngu dzi laya. 9 Mu nga dzi sengi, khenu: ‘Papayi wathu khu Abrahama.’ Nyi ngu mi embeyani gu kheni: Nungungulu a ngu si kodza gu tumbulugiseya sanana Abrahama khomu nya siwindri sesi. 10 Gibhewula gi dongide gu koka misimbo khu mikhambani gakone. Khu kharato, ni wevbini simbo wu si velegigo mihandro nya yadi, wa gu kokwa wu rinywa niloni. 11 Eni nya gu bhabhatisa khu mati khu kotani nya gu dzi laye gwanu. Ganiolu, oyu a tago na ni tshivba guvbindra eni; nigu ne kha nyi yedwi khu gu mu tshula dzisandaliya. Uye a na mi bhabhatisa khu liphuvbo nya guage ni nilo. 12 Uye pharide lifoxola* nya gu vbevbere khilo. A na agisa wulanga gu vbevberedwago avbo dzimbewu, nigu a na wungedzeya trigu yaye gisangalani, ganiolu a vbisa mafisi* niloni si gu mba kodzega gu wu tshima.”

13 Jesu a di khuga khu Galileya a hongola Joridhani, ga Johane, gasi a ya bhabhatiswa khuye. 14 Ganiolu, Johane a di zama gu bomba, khuye: “Eni kheni nyi yedego gu bhabhatiswa khuwe; khu ginani u tago gwangu?” 15 Jesu a di mu hakha, khuye: “Dzumeya! Kholu ha gu gira isoso, ha gu landrisa satshavbo si lulamidego.” Khu kharato, Johane a di dzumeya. 16 Hwane nya gu bhabhatiswe, Jesu a di dzegeya gu duga khu matini; khavbovbo, ndzadzini gu di tulega. A di wona liphuvbo la Nungungulu na li gu releya kha nga gipomba vbatshani gwaye. 17 Gu di pwala lito khu ndzadzini, na li gu khilo: “Egi Gyanana gyangu nyi gi haladzago; gi nyi tsakisago ngudzu.”

4 Jesu a di yiswa giwulani khu liphuvbo la Nungungulu; khavbovbo Dhiyabhulosi a di mu linga. 2 Hwane nyo khale 40 matshigu* nya mba hodza, a dipwa ndzala. 3 Mulingi a di mu hidzimeleya, a ya khuye: “Wa gu ba uri gyanana gya Nungungulu, embeya siwindri sesi si vbindrugedza si khala dzipawu.”* 4 Ganiolu Jesu a di mu hakha, khuye: “Gu lovidwe gupwani: ‘Muthu kha yeli gu vbanya khu guhodza* basi, ganiolu khu malito yatshavbo ma tago khiyo ga Jehovha.’”

5 Khu gulandreya, Dhiyabhulosi a di mu dzega a mu yisa dhoropani nya guage, a ya mu emisa wulangani nya gu laphe ngudzu nya tempele, 6 a mu embeya, khuye: “Wa gu ba uri gyanana gya Nungungulu, dzi digeledze u thega, kholu gu lovidwe gupwani: ‘Uye a na rumeya dzingilozi dzaye dzi ta gu hakha gasi gu ne ngondro wago wu si ghumi giwindri.’” 7 Jesu, a mu hakha, khuye: “Gu lovidwe gambe gupwani: ‘U nga lingi Jehovha Nungungulu wago.’”

8 Khavbovbo, Dhiyabhulosi, a di mu dzega a mu yisa gigomoni nya gulaphe ngudzu aya mu yeyedza mifumo yatshavbo nya mafu ni sithanithani sakone. 9 A mu embeya, khuye: “Nyi na gu ninga satshavbo sesi wa gu khidzima u nyi khozeya gumogo basi.” 10 Jesu, a di mu hakha, khuye: “Khuga khavba, Sathane! Kholu gu lovidwe gupwani: ‘Khozeya Jehovha Nungungulu wago, khuye basi u yedego gu mu thumeya.’” 11 Khu kharato, Dhiyabhulosi a di mu diga; khavbovbo dzi dita dzingilozi, dzi ta mu thumeya.

12 Tepo a ngapwa gupwani Johane khothedwe, a di khuga a hongola Galileya. 13 Tepo a nga khuga khu Nazareta, a di ya khala Kafarinawume, bambe nya yiphwa, gipandreni gya Zebhuloni ni Nafitali, 14 gasi gu tadzisega esi si nga ganedwa khu muprofeti Isaya, a nga khuye: 15 “Uwe gipandre gya Zebhuloni ni gipandre gya Nafitali, mu gomogo ndziyani nya yiphwa, khu tshatugo ga Joridhani, Galileya wa va nya mayigo! 16 Vathu va khadego gidemani, va di wona guwonegeya nya gukhongolo, ava va khadego gidemani nya lufu va di wenengedzwa khu guwonegeya. 17 Gukhugeya avbovbo, Jesu a di pheya gu tshumayela, khuye: “Vbindrugedzani kholu Mufumo wa ndzadzini womo vbafuvbi.”

18 Na gu gimbiya bambe nya yiphwa ya Galileya, a di wona Simoni a ranwago pwani khu Pedro ni ndriyaye Andreya na va gu thesa dzikhoga matini kholu va diri vagogi. 19 Jesu a di va embeya, khuye: “Nyi landreni, nyi na mi gira vagogi nya vathu.” 20 Avo va di dzegeya gu diga dzikhoga dzawe va mu landreya. 21 Na gimbidenyana, a di wona gambe Jakobe gyanana gya Zebhedhewu ni ndriyaye Johane. Avo va diri ngalavani ni papayi wawe, Zebhedhewu, na va gu sonedzeya dzikhoga dzawe, uye a di va rana. 22 Va di dzegeya gu diga ngalava ni papayi wawe, va mu landreya.

23 Uye a di gimbiya Galileya gwatshavbo na gu hevbudza omu nya dzisinagoga dzawe, na gu tshumayela mahungu nya yadi nya Mufumo ni gu hawulugisa vathu madwali nya mafumbo yatshavbo, ni sitshetsheya nya mafumbo yatshavbo. 24 Mahungu yoyo ma di phalalega Siriya gwatshavbo. Khu kharato, va di mu reseya vatshavbo va nga ba va tshaniswa khu madwali nyo hambane-hambane, avo va nga ba vari ni madhimoni, va nya gu dwala khu sitshira ni sikhurubwa, a ta va hawulugisa. 25 Khu kotani nya isoso, a di landrisedwa khu vathu nya vangi va nga ba vata khu Galileya, Dhekapoli,* Jerusalema, Judheya ni tshatugo ga Joridhani.

5 Tepo a nga wona gitshungu, a di gweya gigomoni, hwane nya gu ba a khade, vapizane vaye va di mu hidzimeleya. 2 Khavbovbo, a di tula likana a pheya gu va hevbudza, khuye:

3 “Va ngu tsaka ava va dzitigo gu khavo va ngu vbweta gu thangedwa khu Nungungulu, kholu Mufumo wa ndzadzini khwawe.”

4 “Va ngu tsaka ava va liyago, kholu va na thaveledwa.

5 “Va ngu tsaka va nya gurula, kholu va na hodza thomba nya mafu.

6 “Va ngu tsaka ava va gu na ni ndzala ni lidora nya silo nyo lulame, kholu va na khuriswa.

7 “Va ngu tsaka va nya wuhindzi, kholu va na giredwa wuhindzi.

8 “Va ngu tsaka va nya myonyo nyo lulame, kholu va na wona Nungungulu.

9 “Va ngu tsaka ava va vbwetedzeyago gurula, kholu va na ranwa gupwani sanana sa Nungungulu.

10 “Va ngu tsaka vale va tshaniswago khu kotani nya gu gire silo nyo lulame, kholu Mufumo wa ndzadzini khwawe.

11 “Tsakani vathu va gu mi vala, va mi tshanisa, va mi singedza satshavbo silo nya guvivbe khu kotani yangu. 12 Tsakani mu nengeya, kholu tshatshazelo wanu wukhongolo ndzadzini, kholu khidzo va tshanisidwego khidzo navo vaprofeti va gale.

13 “Enu mu munyu nya mafu, ganiolu munyu wa gu pusa, si na kodzega kharini gu bwe wu pwala gambe? Kha wu ngo phasa gilo; wa gu vbaladzwa vbavbandze wu gandredzedwa khu vathu.

14 “Enu mu wenengedzo nya litigo. Kha si kodzegi gu siha lidhoropa li vbahidwego mugigomoni. 15 Vathu va gu khondrisa kandriya kha va yi fenengedzi khu rava,* ganiolu va gu yi handzega vbatshani nya gilo gasi yi wenengedza vatshavbo va gomogo nyumbani. 16 Khu gufana, anenu digani guwonegeya gwanu gu wenengedza vathu vatshavbo, gasi va wona mithumo yanu nya yadi va bwe va dhumisa Papayi wanu a gomogo ndzadzini.

17 “Mu nga pimisi gu khenu nyi tede gu ta fuvisa Nayo nya Vaprofeti. Kha nya teya gu ta wu fuvisa, ganiolu gu ta wu tadzisa. 18 Khu lisine, nyi ngu mi embeyani, kheni: Si nga vbevbuga gu ndzadzi ni mafu si vbindra, ganiolu gimwalo ni giletrana gimwegyo mwendro gidokhwana gimwegyo nya Nayo gi na vbindrago na si si gu tadzisegi satshavbo. 19 Khu kharato, ni wevbini a na fanyago moyo nya milayo yeyi nya midugwana a bwe a hevbudza vambe gu gira isoso, kha na nga beya* Mufumoni wa ndzadzini. Ganiolu, oyu a wu landrisago a bwe a hevbudza vambe, a na beya* Mufumoni wa ndzadzini. 20 Nyi ngu mi embeyani gu kheni: Gululama gwanu ga gu mba vbindra ogu ga valovi ni Vafarisi, gima kha mu na nga beya Mufumoni wa ndzadzini.

21 “Mu pwide esi va nga embedwa va gale gupwani: ‘U nga songi. Oyu a songago a na ya lamudwa tribhunali.’ 22 Ganiolu, nyi ngu mi embeyani gu kheni: Ni wevbini a simamago gu zangareya ndriyaye, a na ya lamudwa tribhunali. Nigu oyu a valago ndriyaye khu malito nyo thise a na ya lamudwa Tribhunali nya Yikhongolo. Ganiolu, oyu a na embeyago mumbe, khuye: ‘Gipumbu wewe nya mba phasa!’ a na rinywa Gehena* gu khondrago.

23 “Khu kharato, wa gu ya gira ningelo wago vbaalitaritunu, nuri avbovbo, u dundruga gu khuwe u ni gigaradzo ni ndriyago, 24 vega ningelo wago mbeli nya alitari, u bweleya, u pheya khu gu ya pwana ni ndriyago, khavbovbo u wuya u ta gira ningelo wago.

25 “Wa gu hongola tribhunali ni oyu u dwanisanago naye, dzegeya gu lulamisa sigaradzo sanu na mu ngari ndziyani, kholu a nga ya gu ningeya ga mulamuli, mulamuli a gu ningeya ga ghadhi nya lipaso, u khothedwa. 26 Khu lisine nyi ngu gu embeya gu kheni: Kha wu na nga duga khu mule na wu nga si livbi dzitsapawu dzatshavbo.

27 “Mu pwide esi si nga ganedwa nyo pwani: ‘U nga giri wubhayi.’ 28 Ganiolu, nyi ngu mi embeyani gu kheni: Ni wevbini a simamago gu khedza nyamayi nyo bwe a dogoreya gu hengeya naye malawu, bhayide naye khu monyoni. 29 Khu kharato, liso lago la nyamudye la gu gu tshunganisa, li duse u li dzudzuga hwindzo, kholu i tshukwana gu luza gimwegyo nya sivbango sago, guvbindra gu dzegwa givili gyago gyatshavbo gi rinywa Gehena.* 30 Ni gu gambe, la gu tshuka libogo lago la nyamudye li gu tshunganisa, li piye u li dzudzuga, kholu i tshukwana gu luza gimwegyo nya sivbango sago, guvbindra gu dzegwa givili gyago gyatshavbo gi rinywa Gehena.*

31 “Gu ganedwe gambe gu pwani: ‘Oyu a tshulago mutshadho ni mwangadzi waye, a na mu ninge gambe lidangaliya nya gu tshule mutshadho.’ 32 Ganiolu, nyi ngu mi embeyani gu kheni: Ni wevbini a tshulago mutshadho ni mwangadzi waye nasiri khu kotani nya wubhayi,* a gu mu vega mhangoni nya gu gire wubhayi, nigu ni wevbini a tshadhago ni nyamayi yoyo, a gu gira nuye wubhayi.

33 “Mu pwide gambe esi va embedwego va gale nya gupwani: ‘U nga sambanyi mahala, ganiolu tadzisa esi u fungidego ga Jehovha.’ 34 Ganiolu, nyi ngu mi embeyani gu kheni: Mu nga tshuki mu sambanya, ne khu ndzadzini, kholu gikhalo nya wufumu wa Nungungulu; 35 ne khu mafuni, kholu khavbo a handzegago avbo migondro yaye; ne khu Jerusalema, kholu lidhoropa la Pfhumu nya yikhongolo. 36 U nga sambanyi khu hungo wago, kholu u mwalo makodzelo nyo vbindrugedze ni moyo nya ndzudzu wago wu sivbala mwendro wu aga. 37 Ina wago, wu na khale ina; Ahihi wago wu na khale ahihi. Kholu satshavbo si hambanago ni isoso sa guta khiyo ga oyu nya guvivbe.

38 “Mu pwide esi si nga ganedwa nya gupwani: ‘Liso khu liso, likwaha khu likwaha.’ 39 Ganiolu, nyi ngu mi embeyani gu kheni: Mu nga dwani ni muthu nya guvivbedwe khu monyo. Ni wevbini a mi vetago pama gigundru gya nyamudye, ningedzeyani egi gimbe. 40 Nigu muthu a gu gu yisa tribhunali gasi gu ya gu dzegeya ngandzu yago, mu ninge gambe ni libhadzi lago; 41 nigu ya gu tshuka pfhumu nyo khaguri yi gu gurumedza gu yi vbwegedza pfhuka nya kilometro mweyo,* yi vbwegedze dzikilometro dzimbili.* 42 Oyu a gu lombago, mu ninge. U nga pfhurareyi oyu a vbwetago gu gu fiyari.*

43 “Mu pwide esi si nga ganedwa nya gu pwani: ‘Haladza muthu-kwanu, u nyenya nala wago.’ 44 Ganiolu, nyi ngu mi embeyani gu kheni: Simamani gu haladza valala vanu mu bwe mu gombeleya vale va mi tshanisago, 45 gasi mu yeyedza gu khenu mu sanana sa Papayi wanu a gomogo ndzadzini, kholu uye a ngu dugisa lidambo laye ga vathu nya mba vadi ni ga vathu nya vadi a bwe a wisa ndzadzi ga vathu nya gululame ni ga vathu nya gu mba lulama. 46 Kholu mwa gu haladza ava va mi haladzago, tshatshazelo muni mu na wu manago? Ina khandriso sasimweso si girwago khu vakhupisi? 47 Nigu mwa gu losani basi vandriyanu, gilo muni nya giphya mu girago? Ina khandriso sasimweso si girwago khu va nya mayigo? 48 Khu kharato, vbeleyani kha nga Papayi wanu wa ndzadzini a vbeledego.

6 “Dzi woneyeni gu girani silo nya sadi khu gu feya gu wonwa khu vathu. Mwa gu girani isoso, kha mu na nga tshatshazedwa khu Papayi wanu a gomogo ndzadzini. 2 Khu kharato, wa gu ninga gilo gisiwana, u nga wombi pundru kha nga edzi va girago khidzo vapfhadzedzeyi dzisinagogani ni dziruwani gasi va feya gu dhumiswa khu vathu. Khu lisine, nyi ngu mi embeyani, kheni: Va hakhide tshatshazelo wawe watshavbo. 3 Ganiolu, wa gu ninga gilo gisiwana, u nga dzumeleyi gu khuwe libogo lago la nyambade liti esi si girwago khu libogo lago la nyamudye, 4 gasi esi u ningedego si si tidwi khu muthu. Khu kharato, Papayi wago a wonago esi si sihadego, a na gu tshatshazeya.

5 “Nigu, mwa gu ba mu gombeya, mu nga girini kha nga vapfhadzedzeyi va golago gu gombeya na va emide mudzisinagogani ni mahandzakanyani nya dzindziya gasi va feya gu wonwa khu vathu. Khu lisine, nyi ngu mi embeyani, kheni: Va hakhide tshatshazelo wawe watshavbo. 6 Khu kharato, wa gu gombeya, beya nyumbani gwago u sega lidimba, u gombeya ga Papayi wago. Khu kharato, Papayi wago a wonago iso si sihadego a na gu tshatshazeya. 7 Wa gu ba u gombeya, u nga phindra-phindri malito ya mamowo, kha nga edzi va girago khidzo va nya mayigo, kholu va gu pimisa gu khavo va na pwidwa khu gu thumisa malito nya mangi. 8 Mu nga fani navo, kholu Papayi wanu a ngu siti esi mu si vbwetago ambari na mu ngasi mu lombi.

9 “Khu kharato, gombeyani kharati:

“‘Papayi wathu u gu romo ndzadzini, lina lago li na agiswe. 10 Mufumo wago wu nate, gugola gwago gu na girege mafuni kha nga edzi gu giregago khidzo ndzadzini. 11 Hi ninge guhodza* hi na gu vbwetago muhuno; 12 hi divaleye sighoho sathu kha nga edzi hi divaleyago khidzo ava va hi ghoheyago. 13 U nga hi digi hi thegeya silingoni ganiolu hi vbulugise ga oyu nya guvivbe.’

14 “Kholu mwa gu divaleya vathu sihoso sawe, Papayi wanu a gomogo ndzadzini a na mi divaleya nuye. 15 Ganiolu, mwa gu mba divaleya vathu sihoso sawe, Papayi wanu nuye kha na nga mi divaleya sihoso sanu.

16 “Mwa gu pfhunga, mu nga hungi siwombo gu fana ni vapfhadzedzeyi, kholu avo va gu vbindrugedza dzikhovbe* gasi vathu va va wona gu khavo va gu pfhunga. Khu lisine, nyi ngu mi embeyani, kheni: Va hakhide tshatshazelo wawe watshavbo. 17 Ganiolu, uwe wa gu pfhunga, hamba khovbe u bwe u tola mafura hungoni, 18 gasi u si wonwi khu muthu gu pwani wa gu pfhunga, ganiolu u wonwa khu Papayi wago basi. Khu kharato, Papayi wago a wonago esi si sihadego, a na gu tshatshazeya.

19 Mu nga hengeledzeyi dzithomba mafuni omu si kodzegago gu hodzwa khu muhwa ni feruji ni gu beya dzimbafa dziba. 20 Ganiolu, hengeledzeyani dzithomba ndzadzini, omu si si kodzegigo gu hodzwa khu muhwa ni feruji, omu si si kodzegigo gu beya dzimbafa dziba. 21 Kholu avbo yi gomogo thomba yago, khavbo gambe wu gomogo nuwo monyo wago.

22 “Kandriya nya givili, liso. Liso lago la gu ba li wona gwadi, givili gyago gyatshavbo gi na tala khu guwonegeya. 23 Ganiolu, liso lago la gu gireya lidiwo* esi vambe va gu naso, givili gyago gyatshavbo gi na khala mugidemani. Abari gu guwonegeya u gu nago gidema, gidema gyakone gi khongolo ngudzu.

24 Mwalo a si kodzago gu thumeya dzipfhumu dzimbili, kholu a na nyenya yimbe, a gola eyi yimbe. Mwendro a na ninga githawo yimbe, a kanyisa eyi yimbe. Kha si kodzegi gu thumeya Nungungulu ni gu thumeya dzithomba.

25 “Khu kharato, nyi ngu mi embeyani gu kheni: Mu nga garadzegi khu womi wanu, khu gu khenu mu na hodza ginani; mu na seya ginani; mwendro gu garadzega khu sivili sanu, khu gu khenu mu na ambala ginani. Ina womi wanu wu mwalo lisima guvbindra guhodza? Ina sivili sanu si mwalo lisima guvbindra sombo? 26 Nga khedzani gwadi sinyoni sa ndzadzini. Iso kha si yali, ne kha si vbweri nigu kha si hengeledzeyi gilo gisangalani, ganiolu Papayi wanu a gomogo ndzadzini a ngu si hodzisa. Ina enu mu mwalo lisima guvbindra sinyoni? 27 Khu mani vbakari gwanu a kodzago gu dzi engedzeya matshigwana* nya guvbanye khu kotani nya gugaradzege gwaye? 28 Nigu khu ginani mu garadzegago khu sombo nyo ambale? Hevbulani gilogyo avba nya sifilori nya likhabi, edzi si dandrago khidzo, ne kha si thumi, ne kha si soni sombo; 29 ganiolu nyi ngu mi embeyani gu kheni: Ambari Solomoni mufumoni waye watshavbo, gima kha ambala nga gimwegyo nya iso. 30 Ambari nya gu khenu mwasi, nya gu muhuno womo thembweni, mindru wu rinywa niloni, wu ambagiswago kharati khu Nungungulu, ahati enu ke, vathu nya gukhodwa nya gudugwana? 31 Khu kharato, mu nga garadzegi, khenu: ‘Hi na hodza ginani?’ mwendro ‘hi na seya ginani?’ mwendro ‘hi na ambala ginani?’ 32 Kholu silo satshavbo sesi khiso va nya mayigo va dzi garadzeyago gu si mana. Papayi wanu a gomogo ndzadzini a ngu dziti gu khuye mu ngu si vbweta satshavbo sesi.

33 “Khu kharato, simamani gu vbwetedzeya Mufumo wa Nungungulu ni gululama gwaye gupheya, esi simbe satshavbo mu na engedzeledwa. 34 Khu kharato, mu nga garadzegini khesi sa mindru, kholu litshigu la mindru li nagya ni sigaradzo salo. Litshigu ni litshigu li na ni sigaradzo salo.

7 “Digani gu lamula vakwanu, gasi anenu mu si lamudwi; 2 kholu edzi mu lamulago khidzo vakwanu, mu na lamudwa khidzo nenu; pimo mu pimago khuwo vakwanu, mu na pimwa khuwo nenu. 3 Khu ginani u khedzago gitoti gi gu romo omu nya liso la ndriyago, ganiolu u si woni gighodho gi gomogo omu nya liso lago? 4 Mwendro wa gu si kodza kharini gu embeya ndriyago gu khuwe: ‘Gwadi nyi gu dusa gitoti gi gomogo omu nya liso lago,’ narigu omu nya liso lago gighodho gi gomogo? 5 Mupfhadzedzeyi wewe! Pheya khu gu dusa gighodho gi gomogo omu nya liso lago, khavbo u na wonago gwadi gu dusa gitoti gi gomogo omu nya liso la ndriyago.

6 “Mu nga dzegi silo nya guage mu ninga dzimbwa, ne mu nga rinyi dziperola* dzanu dzikhumbani, gasi dzi si gandredzeyi, dzi mi wugeya, dzi mi hodza.

7 “Simamani gu lomba, mu na ningwa; simamani gu vbwetedzeya, mu na si mana; simamani gu khokhotha, mu na tuledwa; 8 kholu watshavbo a lombago a na ningwa, watshavbo a vbwetago a na si mana nigu watshavbo a khokhothago a na tuledwa. 9 Khu mani vbakari gwanu a ningago giwindri gyanana gyaye na gi mu lombide pawu? 10 Mwendro khu mani a gi ningago nyoga na gi mu lombide ndzandzi? 11 Khu kharato, ambari enu mu vivbedwego khu myonyo, mu kodzago gu ninga silo nya sadi sanana sanu, ahati Papayi wanu a gomogo ndzadzini, ina a na tandrega gu ninga silo nya sadi ga vale va mu lombago?

12 “Khu kharato, esi mu vbwetago gu khenu vathu va mi gireya, va gireyeni nenu. Khu lisine, isoso khiso si ganedwago khu Nayo ni Vaprofeti.

13 “Beyani khu mwanya nya gu honge, kholu mwanya wu yisago gufuviswani wu gude, ni ndziya yakone yikhongolo, nigu vangi va beyago khiyo; 14 ganiolu, mwanya wu yisago guvbanyani wudugwana, nigu ndziya yakona niyo yi hongide, vadugwana va yi manago.

15 “Dzi woneyeni ni vaprofeti nya malipha va tago gwanu na va ambade lidowo nya nvuta, narigu khu ndrani masolwa* ma havbidego. 16 Mu na vati khu mihandro yawe. Ina si ngu kodzega gu haveya dziuvha ni dzifigu* omu nya miba? 17 Khu gufana, misimbo yatshavbo nya yadi ya gu velega mihandro nya yadi, ganiolu misimbo yatshavbo nya mba yadi ya gu velega mihandro nya mba yadi. 18 Kha si kodzegi gu simbo nya wadi wu velega mihandro nya mba yadi; kha si kodzegi gambe gu simbo nya mba wadi wu velega mihandro nya yadi. 19 Simbo watshavbo wu gu mba velega mihandro nya yadi, wa gu kokwa wu rinywa niloni. 20 Khu lisine, vathu vovo mu na vati khu mihandro yawe.

21 “Khandri vatshavbo va gu khavo: ‘Pfhumu, Pfhumu,’ va na beyago Mufumoni wa ndzadzini, ganiolu oyu a na beyago, khu wule basi a girago gugola ga Papayi wangu a gomogo ndzadzini. 22 Nya vangi khu litshigu lolo va na nyi embeya, khavo: ‘Pfhumu, Pfhumu, kha ha profeta khu lina lago? Kha ha tutumisa madhimoni khu lina lago? Kha ha gira silo nya singi nyo hlamadzise khu lina lago?’ 23 Ganiolu, eni nyi na va hakha, kheni: ‘Gima kha nya miti! Khugani khavba, enu va nya gu gira silo nya guvivbe!’

24 “Khu kharato, ni wevbini a pwago mahungu yangu, a ma landrisa, a na fana ni muthu nyo gengeye a vbahidego nyumba yaye avba nya giwindri. 25 Yi diwa ndzadzi, gu tala mati, yi vetwa khu gingulu, ganiolu kha ya thega kholu yi di tsitsidwe gwadi vbagiwindrini. 26 Ganiolu, ni wevbini a pwago mahungu yaya yangu, ganiolu a si ma landrisi, a na fana ni mwama nya gipumbu a vbahidego nyumba yaye mulipfuleni. 27 Yi diwa ndzadzi, gu tala mati, yi vetwa khu gingulu, yi tshungunuga, yi thega wufendretiri.”

28 Tepo Jesu a nga vbedza gu ganeya mahungu yaya, gitshungu gi di hlamala khu mahevbudzelo yaye, 29 kholu a di gu hevbudza mahungu ma nga ba mata khiyo ga Nungungulu,* a di si fani ni valovi vawe.

8 Hwane nya gu ba Jesu a tshigide khu mugigomoni, a di landrwa khu gitshungu nya gikhongolo. 2 Khavbovbo, a di hidzimeledwa khu mwama moyo nya sokono, a ta mu khidzimeya, khuye: “Pfhumu, wa gu ba u dzina, nyi agise.” 3 Khu kharato, uye a di thawuludza libogo a kuha mwama wule, khuye: “Nyi ngu dzina! Aga.” Khu gitepwana gile, sokono yaye yi di vbindra. 4 Khavbovbo, Jesu a di mu embeya khuye: “U nga embeyi muthu, ganiolu gimbiya u ya dzi yeyedza ga muprista u bwe u gira ningelo owu wu emisidwego khu nayo wa Mosi gasi si khala wufakazi gwawe.”

5 Tepo a nga vboha Kafarinawume, a di hidzimeledwa khu muthangeyi nya masotshwa a ta mu lileya, 6 khuye: “Pfhumu, githumi gyangu gi lade gaya, gi di khwanyala* sivbango nigu gi ngu tshaniseka ngudzu.” 7 Jesu a di mu hakha, khuye: “Tepo nyi na vbohago, nyi na ta mu hawulugisa.” 8 Muthangeyi nya masotshwa a di mu hakha, khuye: “Pfhumu, kha nyi ninganedwi khu gu gu hakha nyumbani gwangu, ganiolu ganeya lito basi githumi gyangu gi na hawuluga. 9 Kholu, ambari olu nyi thangedwago, aneni nyi na ni masotshwa nyi ma thangeyago. Nya gu embeya limwedo, kheni: ‘Gimbiya,’ la gu hongola; nyi embeya limbe kheni: ‘Delu,’ la guta; nyi embeya githumi gyangu, kheni: ‘Gira esi,’ gyo gira.” 10 Tepo Jesu a ngapwa isoso, a di hlamala ngudzu a bwe a embeya ava va nga ba va mu landreya, khuye: “Khu lisine nyi ngu mi embeyani gu kheni tigoni ga Israyeli kha nya mana muthu a gu na ni gukhodwa nya nga ogu. 11 Ganiolu, nyi ngu mi embeyani gu kheni nya vangi va nata khu khuga-dambo ni muhwa-dambo, va ta khala vbamezatunu ni Abrahama ni Isaki ni Jakobe, Mufumoni wa ndzadzini; 12 narigu sanana nya Mufumo si na rinywa gidemani, vbavbandze. Khiyo va na guya liya ni gu khukhuruseya magwaha.” 13 Jesu a di embeya muthangeyi nya masotshwa, khuye: Gimbiya! Si na girege guya khu gukhodwa u gu yeyedzidego.” Githumi gi di hawuluga khu tepo yile kamo.

14 Tepo Jesu a nga beya ndrangani ga Pedro a di wona mamayi wa mwangadzi wa Pedro na lade khu gupwa feveri. 15 Khavbovbo, a di mu kuha mandza; feveri yi phalalega; a khuga a pheya gu mu thumeya. 16 Tepo li nga pfola, va di mu yiseya vathu nya vangi va nga ba vari ni madhimoni; uye a di tutumisa maphuvbo khu lito limwedo a bwe a hawulugisa vatshavbo vale va nga ba va tshaniseka, 17 gasi gu tadzisega esi si nga ganedwa khu muprofeti Isaya, a nga khuye: “Uye dzegide madwali yathu a bwe a rwala dzingumbi dzathu.”

18 Tepo Jesu a nga wona gu khuye randredwe khu vathu nya vangi, a di embeya vapizane vaye gu khuye va tshatuga va hongola yimbe bambe nya yiphwa. 19 A di hidzimeledwa khu mulovi, a mu embeya, khuye: “Muhevbudzi, nyi na gu landra ni hayini u hongolago.” 20 Ganiolu, Jesu a di mu hakha, khuye: “Migehe yi na ni mavbala yayo, sinyoni si na ni sisakha* saso, ganiolu Gyanana nya muthu gimwalo ni wulanga nyo vege hungo.” 21 Moyo nya vapizane a di mu embeya gu khuye: “Pfhumu, nyi dige nyi hongola nyi ya dzinga papayi wangu gupheya.” 22 Jesu a di mu hakha, khuye: “Simama gu nyi landreya. Diga vafi va dzinga vafi vawe.”

23 A di beya ngalavani, vapizane vaye va mu landra. 24 Gu di pheya gingulu nya gikhongolo matini nyo bwe ngalava yi pheya gu fenengedzwa khu mavimbi, ganiolu Jesu a di gu lade. 25 Vapizane vaye va diya mu wusa, khavo: “Pfhumu, hi vbulugise; hi ngufa!” 26 Ganiolu, Jesu a di va embeya, khuye: “Khu ginani mu thavago ngudzu? Vathu nya gukhodwa nya gudugwana!” Khavbovbo, a di wuga a kawuka phuvbo ni yiphwa. Gu manega malenga nya makhongolo. 27 Khu kharato, vapizane va di hlamala, havo khavo: “Gasi muthu muni oyu, nya gu gu dzega ni phuvbo ni yiphwa si mu engisa?”

28 Tepo a nga vboha tshatugo, gipandreni gya Vagadharenu, a di khingwa khu vama vavili, va nga ba vari ni madhimoni va nga ba va duga khumo nya dzisimitero. Avo va diri ni litsoro ngudzu ni maghilivindri. Mwalo a nga ba a tiya gu vbindra khu ndziya yile. 29 Avo va di khusedza lito, khavo: “Ginani hi nga gu ghoheya Gyanana gya Nungungulu? U tede guta hi tshanisa na yi si gu vbohi tepo yakone?” 30 Hwindzwanyana ni vbale, gu diri ni dzikhumba nya dzingi dzi nga ba dzi haviswa. 31 Madhimoni ma di mu lomba, khayo: “Wa gu hi tutumisa, hi rumeye hi ya beya omu nya dzikhumba.” 32 Jesu a di ma embeya, khuye: “Indrani!” Khavbovbo, ma di duga, ma ya beleya dzikhumba. Idzo dzi di tutuma dzi ya ndraga dzi thegeya matini, dzifa. 33 Vahavisi nya dzikhumba va di tutuma va beya dhoropani vaya ganeya satshavbo si nga girega gupata ni sile si nga giregeya vama vale va nga ba vari ni madhimoni. 34 Vathu vatshavbo va dhoropani va di duga va hongola eyi a nga ba a romo Jesu. Tepo va nga mu wona, va di mu lomba gu khavo a khuga khu gipandreni gwawe.

9 Jesu a di beya ngalavani a tshatuga a hongola dhoropani gwaye. 2 Nya mba hweya, va di mu reseya mwama a nga ba ari gilima na lade avba nya gikamana.* Tepo a nga wona gukhodwa gwawe, Jesu a di embeya mwama wule a nga ba ari gilima, khuye: “U nga garadzegi mwanangu, sighoho sago si divaledwe.” 3 Tepo va nga wona isoso, valovi nyo khaguri va di ganeya myonyoni gwawe, khavo: “Mwama yoyu a ngu valeteya.” 4 Jesu khu gu wona esi va nga ba va si pimisa myonyoni gwawe, a di khuye: “Khu ginani mu pimisago silo nya gu vivbe myonyoni gwanu? 5 Ginani gi vbevbugago? Gu ganeya gu khuwe: ‘Sighoho sago si divaledwe’? mwendro gu khuwe: ‘Khuga u gimbiya’? 6 Khu kharato, gasi mu dziti gu khenu Gyanana nya muthu gi ningidwe tshivba omu mafuni, nya gu divaleye sighoho . . . khavbovbo, a di embeya mwama wule nya gilima, khuye: “Khuga u dzega gikamana gyago u hongola gaya.” 7 Khu kharato, mwama wule a di khuga a hongola gaya gwaye. 8 Tepo gitshungu gi nga wona isoso, gi di thava, gi dhumisa Nungungulu a ningidego tshivba yoyo vathu.

9 Tepo a nga khuga khu vbale, Jesu, a di wona mwama moyo nyo pwani khu Matewu, na khade wulangani nya gu khupise. A di mu embeya, khuye: “Nyi landreye.” Khavbovbo, a di khuga a mu landreya. 10 Khu hwane nya tepo, na khade nyumbani na gu hodza, gu di vboha vakhupisi nya vangi ni sighohi, va ya hodza ni Jesu ni vapizane vaye. 11 Ganiolu, tepo Vafarisi va nga wona isoso, va di wudzisa vapizane vaye, khavo: “Khu ginani muhevbudzi wanu a hodzago ni vakhupisi ni sighohi?” 12 Tepo Jesu a nga vapwa a di va embeya, khuye: “Vathu va si dwaligo kha va vbweti dhogodheya, ganiolu ava va dwalago va ngu mu vbweta. 13 Gimbiyani mu ya hevbula tshamuselo nya malito yaya: ‘Nya gu hatha wuhindzi guvbindra miphaso.’ Kholu kha nya teya gu ta rana va nya gululama, ganiolu sighohi.”

14 Khavbovbo, vapizane va Johane va di mu hidzimeleya va mu wudzisa, khavo: “Khu ginani ethu ni Vafarisi hi pfhungago* ganiolu vapizane vago va si pfhungi?” 15 Jesu a di va hakha, khuye: “Ina dzipari nya noyivhu dzi na ni gighelo nya gu liye na dzi ngari nayo vbafuvbi? Ganiolu ma na vboha matshigu va na dzegedwago noyivhu, khavbovbo va na pfhunga.* 16 Mwalo a dzegago mwendra nya wuphya a sona khuwo giziva avba nya mwendra wa gale, kholu giziva nya mwendra nya wuphya gi na ndrindra mwendra wa gale, wu engedzeya gu pferuga. 17 Mwalo a theyago vhinyu nya yiphya omu nya madowo* ya gale, kholu so girwa isoso, madowo ma na pferuga, vhinyu yi vbalaga ma bwe madowo ma ghohekeya. Khu kharato, vhinyu nya yiphya yo thedwa omu nya madowo nya maphya gasi satshavbo si sayisega.”

18 Na nga gu va embeya isoso, gu di vboha moyo nya muthangeyi a ta mu khidzimeya, khuye: “Khu tepo yeyi, adzina gyanana gyangu nya gyagadzyana gi fude, ganiolu delu u ta gi handzega mandza, gi na wuga.”

19 Jesu ni vapizane vaye, va di khuga va hongola naye. 20 Khavbovbo, nyamayi moyo a nga ba ari ni madwali nya gu dugeleye novba khu 12 myaga, a di mu hidzimeleya khu hwane aya kuha matshakafula nya ngandzu yaye, 21 kholu a di gu dzi embeya, khuye: “Nya gu kuha basi sombo saye nyi na hawuluga.” 22 Jesu a di thendregedza, tepo a nga mu wona a di khuye: “U nga thavi mwanangu! Gukhodwa gwago gu gu vbanyiside.” Khu tepo yile kamo, nyamayi wule a di hawuluga.

23 Tepo a nga vboha gaya ga muthangeyi nya sinagoga, a wona vawombi nya dziflawuta* ni gitshungu na va gu wombedzeya dzihuwa, 24 Jesu a di va embeya, khuye: “Dugani khomu, kholu nyamahegyane khafa, a di lala.” Tepo va ngapwa isoso, va di mu hega. 25 Tepo vatshavbo va nga duga, Jesu a di beya a phara nyamahegyane khu libogo, nyamahegyane a wuga. 26 Esi si nga girega si di dzegeya gu phalalega gipandreni mule gwatshavbo.

27 Tepo Jesu a nga ba a khuga khu mule, a di landrwa khu sikhumu sivili na si gu rana khu lito nyo khugege, khiso: “Gyanana gya Dhavhidhe, hi pweye wusiwana.” 28 Tepo a nga vboha ndrangani, sikhumu sile si di mu hidzimeleya, Jesu a di si wudzisa, khuye: “Mu ngu khodwa gu khenu nyi ni makodzelo nya gu gire isoso?” Si di hlamula, khiso: “Ina Pfhumu.” 29 Khu kharato, a di kuha maho yaso, khuye: “Si na girege guya khu gukhodwa gwanu.” 30 Khu kharato, maho yawe ma di wona. Jesu a di va laya, khuye: “Si nga tidwi khu muthu esi si nga girega.” 31 Ganiolu, tepo va nga khuga khu vbale, va di si phalalegisa gipandreni mule gwatshavbo.

32 Tepo a nga ba a khuga khu vbale, gu dita vathu va mu reseya mwama moyo nya gidudu, a nga ba ari ni lidhimoni. 33 Tepo lidhimoni li nga tutumiswa, mwama wule nya gidudu a di pheya gu ganeya, gitshungu gi hlamala, khigyo: “Gima hi si gu woni silo nya nga esi Israyeli.” 34 Ganiolu, Vafarisi va di khavo: “A gu thumisa tshivba nya pfhumu nya madhimoni gasi gu tutumisa madhimoni.”

35 Jesu a di gimbiya-gimbiya madhoropani gwatshavbo ni dzialidheya dzatshavbo, na gu hevbudza omu nya dzisinagoga, na gu tshumayela mahungu nya yadi nya Mufumo ni gu hawulugisa vathu madwali nya mafumbo yatshavbo ni sitshetsheya nya mafumbo yatshavbo. 36 Tepo a nga wona gitshungu a di gi pweya wusiwana kholu gi di gu tshaniseka ni gu legalegiswa, nga dzinvuta nya mba na muhavisi. 37 Jesu a di embeya vapizane vaye, khuye: “Khu lisine, thumo nya gu vbwere wukhongolo, ganiolu sithumi sidugwana. 38 Khu kharato, lombani Mune thumo gasi a mi rumeleya sithumi, thumoni waye nya guvbwere.”

10 Jesu a di rana vapizane vaye nya 12, a va ninga tshivba nya gu tutumise maphuvbo nya guvivbe ni gu hawulugisa madwali ni dzingumbe nya mafumbo yatshavbo.

2 Malina nya vapostoli vovo nya 12, khaya: Nyo pheye, khu Simoni a ranwago gupwani khu Pedro, ni ndriyaye Andreya; Jakobe gyanana gya Zebhedhewu ni ndriyaye Johane; 3 Filipi ni Bharitolomewu; Tomasi ni Matewu, mukhupisi; Jakobe, gyanana gya Alifewu; Tadhewu; 4 Simoni, Mukhanani* ni Judha Sikariyoti, oyu khu gu gimbiya nya tepo a nga mu ningeya.

5 Jesu a di rumeya ava nya 12, a va ninga sileletelo sesi: “Mu nga hongolini ga va nya mayigo, nigu mu nga beyi omu nya madhoropa ya Vasamariya; 6 ganiolu, gimbiyani basi ga dzinvuta dzi dzimedego dza nyumbani ga Israyeli. 7 Gimbiyani na mu gu tshumayela, gu khenu: ‘Mufumo wa ndzadzini womo vbafuvbi.’ 8 Hawulugisani vadwali, mu wusa vale va fudego, mu agisa va nya sokono, mu tutumisa madhimoni. Mu ningidwe mahala; anenu ningeyani mahala. 9 Mu nga dongi oru, prata, ne gu theya kobre omu nya sipastana* sanu, 10 ne pasta nya dzimbuva, sombo nya gu vbindrugedze,* dzisandaliya, ne ndronga, kholu githumi gi na ni fanelo nyo ningwe guhodza.

11 “Ni levbini lidhoropa mwendro alidheya mu na beyago, vbwetedzeyani oyu a dzinago, mu khala avbovbo kala mu duga. 12 Tepo mu beyago ndrangani, va loseni. 13 Abari gu ndrangani momo va ngu dzina, gurula mu va suveyago gu na khale navo; ganiolu, va gu ba va si dzini, gurula gogo gu na khale nanu. 14 Ni hayini va na gu mba mi hakha, mwendro gu engisa mahungu yanu, mwa gu duga khu ndrangani mwendro dhoropani momo, phuphuthani kudzudzwani migondroni gwanu. 15 Khu lisine nyi ngu mi embeyani gu kheni: Khu Litshigu nya Gulamudwe, gutsayiswa nya lidhoropa lolo gu na vbindra ogu ga Sodhoma ni Ghomora.

16 “Nya gu mi rumeyani kha nga dzinvuta vbakari nya masolwa; khu kharato, gengeyani kha nga dzinyoga, mu rula* kha nga matuva. 17 Dzi woneyeni ni vathu, kholu va na mi ningeya dzitribhunali, va bwe va mi kwamula dzisinagogani gwawe. 18 Mu na yiswa ga vaghovhernadhori ni dzipfhumu khu kotani yangu gasi gu ninga wufakazi avo ni va nya mayigo. 19 Ganiolu, va gu mi ningeya, mu nga garadzegi khesi mu na ganeyago ni edzi mu na ganeyago khidzo, kholu mu na ningwa esi mu yedego gu ganeya khu tepo yoyo; 20 kholu khandrenu basi mu na ganeyago, ganiolu liphuvbo la Papayi wanu khilo li na mi ganeleyago. 21 Muthu a na ningeya ndriyaye gasi a songwa, papayi a ningeya gyanana gyaye, sanana si na wugeya vavelegi vaso, si va songisa. 22 Nigu enu mu na nyenywa khu vatshavbo khu kotani nya lina langu, ganiolu uye a na timiseyago kala mahegiso, a na vbulugiswa. 23 Mwa gu tshaniswa ga lidhoropa nyo khaguri, tutumeyani ga limbe. Khu lisine nyi ngu mi embeyani gu kheni: Kha mu na nga dzuluwugeya yatshavbo madhoropa ya Israyeli na gi nga si vbohi Gyanana nya muthu.

24 “Gihevbuli* kha gi vbindri muhevbudzi wagyo, ni githumi nigyo kha gi vbindri mune wagyo. 25 Si enede gu gihevbuli gi fana ni muhevbudzi wagyo, ni githumi nigyo gi fana ni mune wagyo. Ambari nya gu khuwe khu mune ndranga va nga mu rana gu khavo khu Bhelizebhu,* ahati va ndrangani gwaye ke! 26 Khu kharato, mu nga va thavi, kholu gi mwalo gi fenengedzidwego gi no ne funungudwa nigu gi mwalo gi sihadego gi na gu mba tidwa. 27 Esi nyi mi embeyago gusihalani, si ganeyeni guwonegeyani, esi nyi mi lembeyago, si tshumayeleni vbatshani nya dzinyumba. 28 Mu nga thavini ava va songago givili, ganiolu na va si kodzi gu songa hefemulo;* ganiolu thavani oyu a kodzago gu fuvisa sa sivili, givili ni hefemulo, Gehena.* 29 Ina kha si rengiswi sinyoni sivili nya sidugwana khu gingerengere nya tengo wa vbavbatshi? Ganiolu, gimwalo gi na thegago gi si tidwi khu Papayi wanu. 30 Ambari ni ndzudzu wa hungoni gwanu wu kotaredwe watshavbo. 31 Khu kharato, mu nga thavi, kholu enu mu na ni lisima ngudzu guvbindra sinyoni nya singi.

32 “Khu kharato, watshavbo a nyi dzumeyago mbeli nya vathu, nyi na mu dzumeya neni mbeli ga Papayi wangu a gomogo ndzadzini. 33 Ganiolu, oyu a nyi bombago mbeli nya vathu, nyi na mu bomba neni mbeli ga Papayi wangu a gomogo ndzadzini. 34 Mu nga pimisi gu khenu nyi di resa gurula mafuni, kha nya resa gurula, ganiolu nyi di resa xipadha. 35 Kholu nyi tede gu ta hambanisa lidzaha ni papayi walo, gyagadzyana ni mamayi wagyo, ngadzamwane ni nasale waye. 36 Khu lisine, valala nya muthu va na ba vari va ndrangani gwaye. 37 Oyu a golago ngudzu papayi waye mwendro mamayi waye gu vbindra eni, kha nyi faneyi; ni gu gambe, oyu a golago ngudzu gyanana gyaye nya gyagadzyana mwendro nya gikhwathana gu vbindra eni, kha nyi faneyi. 38 Nigu ni wevbi a si dzumeyigo gu rwala simbo waye nya tshanisa* a nyi landreya, kha nyi faneyi. 39 Uye a zamago gu vbulugisa womi waye, a na wu luza, ganiolu uye a luzago womi waye khu kotani yangu, a na wu mana.

40 “Oyu a mi hakhago, a gu nyi hakha neni, nigu oyu a nyi hakhago, a gu hakha nuye Oyu a nyi rumedego. 41 Oyu a hakhago muprofeti kholu a gu muprofeti, a na hakha tshatshazelo nya muprofeti. Oyu a hakhago muthu nya gululame kholu a gu muthu nya gululame, a na hakha tshatshazelo nya muthu nya gululame. 42 Nigu oyu a ningago kopo nya mati nya gudzidziye ga moyo nya ava nya vadugwana khu gu dziti gu khuye mupizane, khu lisine nyi ngu mi embeyani gu kheni, kha na nga dzimeledwa khu tshatshazelo waye.”

11 Tepo Jesu a nga vbedza gu ninga sileletelo vapizane vaye nya 12, a di khuga a ya hevbudza ni gu tshumayela madhoropani gwawe.

2 Johane na gu romo pasoni, a dipwa na gu ganedwa khu mithumo ya Kristo, khavbovbo, a di rumeya vapizane vaye 3 gasi va ya mu wudzisa gu khavo: “Ina khuwe Wule a Tago mwendro hi yede gu vireya mumbe?” 4 Jesu a di va hlamula, khuye: “Gimbiyani mu ya embeya Johane esi mu si pwago ni gu si wona, khenu: 5 Sikhumu si ngu wona, sikhurubwa si ngu gimbiya, va nya sokono va ngu agiswa, sivbwiri si ngupwa, ava va fudego va ngu wuswa nigu mahungu nya yadi ma ngu huweledwa ga sisiwana. 6 A ngu tsaka wule a si manigo gilo gi mu khunguvanyisago avba gwangu.”

7 Tepo va nga ba va hongola, Jesu a di pheya gu ganeya ni gitshungu maningano ni Johane, khuye: “Ginani mu nga ya gi wona giwulani? Tshava yi hanahaniswago khu phuvbo? 8 Gasi ginani mu nga ya gi wona? Muthu nya gu ambale sombo nya gu mbure? Ava va ambalago sombo nyo mbure* va gu dugeya dzindrangani nya wufumu. 9 Gasi khu ginani mu nga hongola eyi? Mu di yela gu ya wona muprofeti? Ina, nyi ngu mi embeya gu kheni uye a ngu vbindra ngudzu ni muprofeti. 10 Oyu khuye gu ganedwego khuye omu nya milowo, pwani: ‘Nyi ngu rumeya githumi* gyangu mbeli gwago, gasi guta gu dongiseleya ndziya yago.’ 11 Khu lisine nyi ngu mi embeya gu kheni: Vbakari nya vathu vatshavbo va velegidwego khu vanyamayi mwalo a gu khongolo guvbindra Johane Mubhabhatisi, ganiolu oyu a gu dugwana Mufumoni wa ndzadzini khongolo gu vbindra uye. 12 Gukhugeya matshigoni ya Johane Mubhabhatisi kala muhuno, Mufumo wa ndzadzini gilo gi dwanedwago ngudzu khu vathu, ganiolu ava va dzi garadzago ngudzu va ngu wu mana. 13 Kholu Vaprofeti ni Nayo va profetide kala dziteponi dza Johane; 14 nigu gani mu ngu khodwa gani kha mu khodwi, Johane khuye ‘Eliya oyu vaprofeti va ganedego gu khavo a nata.’ 15 Oyu a gu ni dzindzeve a napwe.

16 “Nyi na gi fananisa ni ginani gitugulwana gegi? Gya gu fana ni sanana si khadego bazaritunu si rana dzipari dzaso, 17 khiso: ‘Hi wombide dziflawuta!* ganiolu kha mwa hana; hi wombide dzihuwa, ganiolu kha mwa garadzega.’* 18 Khu ndziya nya gu fane, Johane dzude na si hodzi na si seyi, ganiolu vathu vari khavo: ‘A na ni lidhimoni.’ 19 Gyanana nya muthu gi dzude gi ta hodza ni gu seya, ganiolu vathu vari khavo: ‘A na ni limidzo nigu gidhakwa,* pari nya vakhupisi ni sighohi.’ Ganiolu, wugengeyi wo yeyedza gululama gwawo khu mithumo.”

20 Khavbovbo, a di pheya gu sola madhoropa a giridego umo silewugiso nya singi, kholu kha va vbindrugedza, khuye: 21 “Libango gwago Khorazini, libango gwago Bhetisayidha, kholu sisamadziso si giridwego omu gwanu nari khatshi si di girwa Tiro ni Sidhoni, avo na va vbindrugedzide gale, va ambala dzisaku va bwe va khala ngumani. 22 Ganiolu, nyi ngu mi embeyani gu kheni Litshigu nya Gulamudwe si na vbevbuga ga Tiro ni Sidhoni guvbindra gwanu. 23 Ahati uwe Kafarinawume, wo pimisa gu khuwe u na khusedzwa kala ndzadzini? U dzi pembide, u na releya kala thowoni kholu sisamadziso si giregidego tigoni gwago nari khatshi si di girega Sodhoma, ugo na gu simamide kala muhuno. 24 Khu lisine nyi ngu mi embeyani gu kheni khu Litshigu nya Gulamudwe si na vbevbuga ga Sodhoma guvbindra gwago.”

25 Khu kotani nya isoso, Jesu a di khuye: “Nyi ngu gu dhumisa vbakari nya vathu vatshavbo, Papayi, Pfhumu nya ndzadzi ni mafu, kholu u sihede silo sesi vathu nya gu gengeye ni va nya guti ngudzu, ganiolu u si tivegisa ga vathu nya gu dzi nogise nga sanana nya sidugwana. 26 Ina Papayi, kholu u si wonide na siri sadi gu si gira khu ndziya yeyi. 27 Satshavbo nyi ningidwe khu Papayi wangu. Mwalo a gi tigo gwadi Gyanana vbavbandze ga Papayi nigu mwalo a tigo gwadi Papayi vbavbandze ga Gyanana ni wule Gyanana gi dzinago gu mu hevbudza maningano ni Papayi wagyo. 28 Deluni gwangu enu mwatshavbo mu garadego ni gu lemedwa, eni nyi nata mi hefemudza. 29 Rwalani pingo* wangu, mu hevbula kheni, kholu eni nyi muthu nya gu rule ni gu dzi nogisa nigu mu na mana guhefemula. 30 Kholu pingo wangu kha wu ghongonyi nigu rwalo wangu wu vbevbugide.”

12 Khu tepo yile, khu litshigu nya Sabhadho, Jesu a di vbindra khomu nya mathembwe gu nga ba gu yadwe trigu. Vapizane vaye va dipwa ndzala, va vburumuleya trigu, va hodza. 2 Tepo Vafarisi va nga wona isoso, va di khavo: “Vapizane vago va gu gira silo si himbedzedwago gu girwa khu Sabhadho.” 3 A di va embeya, khuye: “Kha mwa hevbula esi Dhavhidhe ni vama a nga ba ari navo va nga gira tepo va ngapwa ndzala? 4 Kha mwa hevbula gupwani uye a di beya nyumbani ga Nungungulu, va ya hodza dzipawu nya ningelo, a gu silo si nga ba si si yeli gu hodzwa khuye ambari khu vale va nga ba vari naye, ganiolu si nga ba si yedwe gu hodzwa khu vaprista basi? 5 Mwendro kha mwa hevbula gambe omu nya nayo gupwani vaprista va di gu thuma tempeleni khu Sabhadho ganiolu va si ningwi nandru? 6 Ganiolu, nyi ngu mi embeyani gu kheni avba womo uye a gu khongolo ngudzu guvbindra tempele. 7 Nari khatshi mu di pwisiside gu khenu mo thula ginani malito yaya: ‘Nya gu hatha wuhindzi guvbindra miphaso,’ na mwa sa ninga nandru ava va gu mwalo nawo. 8 Kholu Gyanana nya muthu, Pfhumu nya Sabhadho.”

9 Tepo a nga khuga khu vbale, a di beya sinagogani gwawe, 10 a ya mana mwama a nga ba a haside libogo. Khu kharato, va di vbweta gighelo nyo mu ninge khigyo nandru, khu gu mu wudzisa, khavo: “Ina si ngu dzumedziswa gu hawulugisa muthu khu Sabhadho?” 11 A di va wudzisa, khuye: “Khu mani vbakari gwanu nya gu ya gu tshuka nvuta yaye yi thegeya phalani khu Sabhadho a si yi dusigo? 12 Ina muthu mwalo lisima ngudzu guvbindra nvuta? Khu kharato, khandri gighoho gu gira silo nya sadi khu Sabhadho. 13 Uye a di embeya mwama wule, khuye: “Thawuludza libogo lago.” Uye a di li thawuludza, ilo li di hawuluga, li fana ni lile limbe. 14 Ganiolu, Vafarisi va di duga va ya luga mano nyo mu songe. 15 Tepo Jesu a nga si tugula, a di khuga khu vbale. Nya vangi va di mu landra nigu uye a di hawulugisa vatshavbo. 16 Ganiolu, a di va laya gasi va si tshuki va mu tivegisa ga vambe vathu, 17 gasi gu tadzisega malito ya muprofeti Isaya, a nga khuye:

18 “Wonani githumi gyangu nyi gi hathidego, nyi gi golago, egi gi nyi tsakisago! Nyi na gi ninga liphuvbo langu nigu gi na hevbudza mayigo gu khigyo ginani gululama. 19 Kha gi na nga dwanisana ni muthu, ne kha gi na nga gulumeya nigu mwalo a na pwago lito lagyo mudziruwani nya dzikhongolo. 20 Kha gi na nga vbedzisa tshava yi fanyegidego, ne kha gi na nga tshima litirisidu li ngo tuvigago, kala a resa gululama. 21 Khu lisine, mayigo ma na tumba lina laye.”

22 Va di mu reseya mwama a nga ba ari gikhumu nigu a diri gidudu, uye a diri ni lidhimoni ganiolu Jesu a di mu hawulugisa, khavbovbo uye a pheya gu ganeya ni gu wona. 23 Gitshungu gi di hlamala, gi ganeya khigyo: “Ina khandrigyo egi Gyanana gya Dhavhidhe?” 24 Tepo Vafarisi va ngapwa isoso, va di khavo: “Mwama yoyu a gu tutumisa madhimoni khu tshivba ya Bhelizebhu,* pfhumu nya madhimoni.” 25 Kha nga olu a nga ba a siti esi va nga ba va pimisa, a di va embeya, khuye: “Watshavbo mufumo wu dzi kabanisago wu na thega, nigu ni levbini lidhoropa mwendro ndranga yi dzi kabanisago kha yi na nga tiya. 26 Khu gu fana, abari gu Sathane a gu tutumisa Sathane, uye a dzi kabaniside abune, a dzi wugeya; wu na pindruga kharini mufumo waye? 27 Abari gu eni nya gu tutumisa madhimoni khu tshivba ya Bhelizebhu, ahati sanana sanu ke, so ma tutumisa khu tshivba ya mani? Khiso isoso si na girago va khala valamuli vanu. 28 Ganiolu abari gu nya gu tutumisa madhimoni khu tshivba nya liphuvbo la Nungungulu, khu lisine, Mufumo wa Nungungulu wu mi vbohede. 29 Mwendro si nga kodzega kharini gu muthu a beya nyumbani nya mwama nya tshivba a ya mu phanga, nya mba pheya khu gu mu hunga? Hwane nya gu ba a mu hungide, khavbo a na si kodzago gu mu beya. 30 Uye a si emigo ni eni a ngu nyi wugeya, uye a si hengeledzigo ni eni a gu phalalegisa.

31 “Khu kharato, nyi ngu mi embeyani gu kheni: Vathu va na divaledwa ni gevbini gighoho mwendro givalo va girago, ganiolu oyu a valago liphuvbo nya guage kha na nga divaledwa. 32 Khu giyeyedzo, oyu a valago Gyanana nya muthu, a na divaledwa. Ganiolu ni wevbini a valago liphuvbo nya guage gima kha na nga divaledwa, ne teponi yeyi, ne teponi yi tago.

33 “Mwa gu limeya simbo nya wadi, wu na velega mihandro nya yadi. Ganiolu, mwa gu limeya simbo nya mba wadi wu na velega mihandro nya mba yadi, kholu simbo ni simbo wa gu tidwa khu mihandro yawo. 34 Sanana nya dzinyoga! Mu na si kodza kharini gu ganeya silo nya sadi narigu mu vivbedwe khu myonyo? Kholu likana lo ganeya esi si tadego monyoni. 35 Muthu nya wadi a gu dusa silo nya sadi khu thombani gwaye nya yadi, ganiolu muthu nya guvivbe a gu dusa silo nya gu vivbe khu thombani gwaye nyo vivbe. 36 Nyi ngu mi embeyani gu kheni vathu vatshavbo va na dzi hlamuleya khu Litshigu nya Gulamudwe khu satshavbo silo nya guvivbe va ganedego; 37 kholu guya khesi u ganeyago, u na wonwa nu lulamide nigu guya khesi u ganeyago gambe, u na ningwa nandru.”

38 Khavbovbo, valovi nyo khaguri ni Vafarisi, va di khavo: “Muhevbudzi, ho vbweta gu khethu u hi gireya giwoniso.” 39 A di va hakha, khuye: “Gitugulwana nya gu mba tumbega,* nya gu vivbedwe khu monyo, mu nga gu simama gu vbweta giwoniso. Ganiolu, gimwalo giwoniso mu na yeyedzwago nasiri egi gya muprofeti Jona. 40 Kholu gu fana ni Jona a khadego matshigu mararu ndrani nya ndzandzi nya yikhongolo, Gyanana nya muthu anigyo gi na khala matshigu* mararu vbavbatshi nya mafu. 41 Vathu va Ninivha va na wuswa gulamudwani ni gitugulwana gegi va bwe va gi ninga nandru kholu avo va vbindrugedzide tepo va nga tshumayedwa khu Jona. Ganiolu, avba womo oyu a gu khongolo guvbindra Jona. 42 Pfhumu nya nyamayi ya sul,* yi na wuswa gulamudwani ni gitugulwana gegi yi bwe yi gi ninga nandru, kholu yi khugide khu mahegiso nya litigo gasi gu tapwa wugengeyi wa Solomoni. Ganiolu avba womo uye a gu khongolo guvbindra Solomoni.

43 Tepo liphuvbo nya guvivbe li dugago khavbo nya muthu, la gu vbindra khu malangani nya gihala* na li gu gimbiya li vbwetedzeya wulanga nyo hefemule, li gu hamuga. 44 Khavbovbo, lo hegisa khu gu khilo: ‘Nyi na bweleya nyumbani gwangu nyi tago khumo.’ Tepo li nga vboha, li di ya mana nyumba na yiri liphanga, na yi vbiyedwe yi bwe yi mburisedwa. 45 Khavbovbo, li bweleya li ya dzega 7 maphuvbo nyo vivbe guvbindra ilo, ma ta beya nyumbani momo, ma khala umo yatshavbo, khu kharato mavbanyelo ya mwama yoyo ma vivba ngudzu guvbindra edzi a nga ba ari idzo gupheyani. Khiso sasimweso si na giregeyago gitugulwana gegi nya guvivbe.”

46 Na ngo ganeya ni gitshungu, mamayi waye ni vandriyaye va di emide vbavbandze na va gu vbweta gu ganeya naye, 47 Khu kharato, gu di dugeleya moyo a nga mu embeya, khuye: “Mamayi wago ni vandriyago vomo vbavbandze, va gu vbweta gu ganeya nago.” 48 Jesu a di mu hlamula, khuye: “Khu mani mamayi wangu nigu khu vamani vandriyangu?” 49 A di khusedza libogo a yeyedza vapizane vaye, khuye: “Mamayi wangu ni vandriyangu kha mu va woni ava! 50 Kholu ni wevbini a girago gugola ga Papayi wangu a gomogo ndzadzini, uyoyo khuye a gu ndriyangu nya mwama, ndriyangu nya nyamayi nigu khuye a gu mamayi wangu.”

13 Khu litshigu lolo, Jesu a di khuga khu ndrangani a ya khala bambe nya yiphwa. 2 A di randredwa khu gitshungu, khu kharato a di beya ngalavani a khala; gitshungu gyatshavbo gi ema funguni. 3 A di va embeya silo nya singi khu gu thumisa sipimaniso, khuye: “Muyali a di duga gasi gu ya yala dzimbewu dzaye. 4 Tepo a nga ba a yala, dzimbe dzimbewu dzi di thegeya bambe nya ndziya, sita sinyoni si ta rotheya. 5 Dzimbe dzi di thegeya musiwindrini gu nga ba guri mwalo mafu nya mangi; dzi di dzegeya gu buga kholu kha ga nga ba gu etide. 6 Ganiolu, tepo li nga vbisa lihani, dzi divbya, dzi wuna, kholu dzi diri mwalo mikhamba. 7 Dzimbe dzi di ya thegeya mibani, khavbovbo miba yi dandra yi dzi midza. 8 Dzimbe dzi di thegeya mafuni nya yadi, dzi pheya gu velega mihandro: Eyi yi velega 100, yimbe yi velega 60, yimbe yi velega 30 gu vbindra esi si nga ba si yadwe. 9 Oyu a gu ni dzindzeve a napwe.”

10 Khu kharato, vapizane va di mu teya va ta mu wudzisa, khavo: “Khu ginani u ganeyago navo khu gu thumisa sipimaniso?” 11 A di va hlamula, khuye: “Enu mu ningidwe gu pwisisa misihalo nya gu hathege nya Mufumo wa ndzadzini, ganiolu avo kha va ningwa. 12 Kholu, oyu a gu naso a na engedzedwa a mana nya singi; ganiolu, wule a gu mwalo naso, ambari esi a gu naso a na dzegedwa. 13 Khiso isoso si nyi girago nyi ganeya navo khu gu thumisa sipimaniso; kholu va ngu khedza, ganiolu kha va woni gilo; va ngu engiseya, ganiolu kha vapwi gilo, ambari gu si pwisisa. 14 Kholu gya gu tadzisega gwawe giprofeto gya Isaya gi gu khigyo: ‘Enu mu napwa, ganiolu kha mu na nga pwisisa gilo; mu na khedza, ganiolu kha mu na nga wona. 15 Kholu myonyo ya vathu vava yi tshorede; va tshikide dzindzeve,* va sega maho, gasi va si woni khu maho, ne va sipwi khu dzindzeve, ne va si pwisisi khu monyo gasi va vbindrugedza, nyi va hawulugisa.’

16 “Ganiolu, enu mu ngu tsaka, kholu maho yanu ma ngu wona, ni dzindzeve dzi ngupwa. 17 Khu lisine nyi ngu mi embeyani, kheni: Vaprofeti nya vangi ni vathu nya vangi nyo lulame va dzinide gu wona esi mu si wonago, ganiolu kha va si wona. Va dzinide gupwa esi mu si pwago, ganiolu kha va sipwa.

18 “Olu engiseyani gipimaniso gya mulimi wule a nga duga gasi gu ya swaya dzimbewu. 19 Muthu a gupwa mahungu nya Mufumo, ganiolu a si ma pwisisi, a guta oyu nya guvivbe a ta kula esi si yadwego monyoni; mbewu yeyi khiyo yi nga thegeya bambe nya ndziya. 20 Eyi yi thegedego musiwindrini, khu wule a pwago mahungu a dzegeya gu ma dzumeya khu gutsaka. 21 Kha nga olu mbewu yi nga mba tsitsa mikhamba monyoni gwaye, yo vbanya khu gitepwana. A gu tshaniswa mwendro gu wugedwa khu kotani nya mahungu ya Nungungulu, a gu dzegeya gu bweleleya hwane. 22 Eyi yi thegedego mibani khu wule a pwago mahungu, ganiolu sigaradzo nya mafu* yaya ni gu landriseya dzithomba si midza mahungu ma si theyi mihandro. 23 Gasi yile yi thegedego mafuni nya yadi, khu wule a pwago mahungu a ma pwisisa a bwe a velega mihandro: Eyi yi velega 100, yimbe yi velega 60, yimbe yi velega 30 gu vbindra esi si nga ba si yadwe.”

24 A di va ninga gimbe gipimaniso, khuye: “Mufumo wa ndzadzini wu nga fananiswa ni muthu a nga yala dzimbewu nya dzadi thembweni gwaye. 25 Vathu na va lade, gu dita nala waye a ta yala nyasavare vbakari nya trigu, a khuga a hongola. 26 Tepo trigu yi nga dandra, yi pheya gu theya mihandro, wu di wonega nuwo nyasavare. 27 Khu kharato, sithumi si diya wudzisa mune lithembwe, khiso: ‘Pfhumu, khandri u di yala basi dzimbewu nya dzadi thembweni? Nyasavare wa guta khu hayi?’ 28 Uye a di va hakha, khuye: ‘Nala a nga gira esi.’ Khavbovbo, sithumi si ganeya, khiso: ‘U ngu dzina gu khuwe hi wu kuleya hi wu wungedzeya?’ 29 A va hakha, khuye: ‘Ne! Nyo thava gu kheni tepo mu na kuleyago nyasavare mu kuleya ni trigu. 30 Si digeni si dandra gumogo kala yi vboha nango nya guvbwere, tepo yi na vbohago, nyi na embeya vavbweri, kheni: Pheyani khu gu wungedzeya nyasavare mu wu hunga khu sinyandrana gasi wu ya vbiswa, khavbovbo, mu wungedzeya trigu mugisangalani gwangu.’”

31 Jesu a di va ninga gimbe gipimaniso, khuye: “Mufumo wa ndzadzini wa gu fana ni mbewu nya ginapi* eyi muthu a yi dzegidego a ya yala thembweni gwaye. 32 Khu lisine eyi khiyo mbewu nya yidugwana ga dzatshavbo, ganiolu ya gu dandra ya gu vbindra mitongwe yatshavbo yi khala simbo nyo bwe sinyoni sita zumba omu nya matamo yakona.”

33 A di va ninga gimbe gipimaniso, khuye: “Mufumo wa ndzadzini wa gu fana ni livhirina* eyi nyamayi a yi sugago ni mipimo miraru* nya yikhongolo nya wuguvbi kala wuguvbi watshavbo wu gugumuga.”

34 Jesu a di embeya satshavbo sesi gitshungu khu gu thumisa sipimaniso. Khu lisine, gimwalo a nga ba a va embeya nya mba thumisa gipimaniso, 35 gasi gu tadzisega esi si nga ganedwa khu muprofeti, a nga khuye: “Nyi na tula likana langu khu gu thumisa sipimaniso; nyi na huweleya silo si sihadego gu khugeya gupheyani.”*

36 Hwane nya gu hambane ni gitshungu, a di beya ndrangani. Vapizane vaye va mu hidzimeleya, va ya khavo: “Hi tshamuseye gipimaniso nya nyasavare wu gomogo thembweni.” 37 A di va hlamula, khuye: “Muswayi nya dzimbewu nya dzadi khu Gyanana nya muthu; 38 lithembwe, litigo; dzimbewu nya dzadi, sanana nya Mufumo, ganiolu nyasavare sanana sa oyu nya guvivbe; 39 nala a yadego nyasavare khu Dhiyabhulosi; guvbwera, gu hegisa nya silo nya mafu;* vavbweri, dzingilozi. 40 Khu kharato, kha nga nyasavare wu wungedzedwago wu vbiswa niloni, si na girega kharato nugo guhegisani nya litigo.* 41 Gyanana nya muthu gi na rumeya dzingilozi dzagyo, idzo dzi na hengeledza sitshunganiso* satshavbo ni vathu vatshavbo va girago silo nya gu vivbe dzi va dusa Mufumoni waye, 42 dzi va rinya niloni, khiyo va na guya liya ni gu khukhuruseya magwaha. 43 Khu tepo yoyo, va nya gululama va na wenengedza nga lidambo Mufumoni wa Papayi wawe. Oyu a gu ni dzindzeve a napwe.

44 “Mufumo wa ndzadzini wa gu fana ni thomba yi sihidwego thembweni eyi muthu a nga yi mana a yi siha gambe. Khu gu ba na tsakide ngudzu, a diya rengisa satshavbo a nga ba ari naso gasi a renga lithembwe lolo.

45 “Mufumo wa ndzadzini wu ngu fana gambe ni murengisi a gimbiya-gimbiyago a vbwetedzeya dziperola* nya lisima. 46 Tepo a nga mana perola nya lisima ngudzu, a diya rengisa satshavbo a nga ba ari naso a yi renga.

47 “Mufumo wa ndzadzini wa gu fana gambe ni dzikhoga dzi nga theswa matini dzi mola dzindzandzi nya mafumbo yatshavbo. 48 Tepo dzi nga tala va di duga nadzo funguni, va ta khala vbavbatshi, va hatheya dzindzandzi nya dzadi va theya somboni, edzi nya mba dzadi va dzi dzudzuga. 49 Khidzo kharato gu na giregago khidzo guhegisani nya litigo.* Dzingilozi dzi na duga dzita hambanisa va nya guvivba vbakari ga ava nya gu lulame 50 dzi va rinya niloni. Khiyo va na gu ya liya ni gu khukhuruseya magwaha.

51 “Mu si pwisiside gu khenu sa gu thula ginani satshavbo sesi?” Avo va di mu hakha, khavo: “Ina.” 52 Khavbovbo, a di va embeya, khuye: “Khu kharato, ni wevbini muhevbudzi a hevbudzwago maningano ni Mufumo wa ndzadzini a gu fana ni mune ndranga a dusago khu thombani gwaye silo nya siphya niso sa gale.”

53 Tepo Jesu a nga vbedza gu va ninga sipimaniso satshavbo sesi, a di khuga khu vbale. 54 Tepo a nga vboha dhoropani gwaye a di pheya gu hevbudza dzisinagogani gwawe. Khu kharato, avo va di hlamala, khavo: “Mwama yoyu wu manide hayi wugengeyi watshavbo wowu ni tshivba nya gu gire sisamadziso? 55 Ina khandrigyo Gyanana gya karipintero* egi? Mamayi waye khandri Mariya nigu vandriyaye khandri Jakobe, Josefa, Simoni ni Judha? 56 Vandriyaye nya vanyamayi khandravo hi vbanyago navo tigoni momu? A gu si mana hayi satshavbo sesi?” 57 Khu kharato, va di pheya gu tshunganeya* khu kotani yaye. Khu kharato, Jesu a di va embeya, khuye: “Muprofeti a ngu zundzwa ni hayini, ganiolu kha zundzwi tigoni gwaye ni ndrangani gwaye.” 58 Khu kharato, kha gira silewugiso nya singi tigoni mule khu kotani nya gu mba khodwa gwawe.

14 Khu tepo yile, Herodhi, adhiministradhori nya dhistrito, a dipwa na gu ganedwa khesi si nga ba si girwa khu Jesu. 2 Khavbovbo, a di embeya sithumi saye, khuye: “Oyu khu Johane Mubhabhatisi. A wusidwe khu ga vafudego, khiso si mu girago a gira silewugiso nya sikhongolo.” 3 Herodhi* a di mode Johane a mu hunga a mu khotheya, khu kotani ya Herodhiya mwangadzi wa ndriyaye Filipi. 4 Kholu Johane a di gu mu embeya, khuye: “U mwalo fanelo nya gu mu dzege a khala mwangadzi wago.” 5 Ambari olu a nga ba a dogoreya gu mu songa, a di gu thava gitshungu kholu gi di gu mu wona nga muprofeti. 6 Ganiolu, litshigu Herodhi a nga gira festa nya gu tshanganise myaga nya gu velegwe, gyanana gya Herodhiya nya gyagadzyana gi di hana gi tsakisa ngudzu Herodhi, 7 nyo bwe a sambanya gu khuye a na mu ninga ni gevbini a na lombago. 8 Khavbovbo, na kutsedzedwe khu mamayi waye, a diya khuye: “Nyi ninge hungo wa Johane Mubhabhatisi khomu nya bhandeja.” 9 Ambari olu pfhumu yi nga ba yi garadzegide yi di ruma gu khiyo va mu reseya hungo khu kotani nya esi a nga ba a sambanyide ni githawo khu vale a nga ba a hodza navo. 10 Khu kharato, a di rumisa gu khuye Johane a pidwa hungo pasoni. 11 Hungo wa Johane wu di reswa khomu nya bhandeja* wu ta ningedwa ga nyamahegyane wule, a dzega a wu yisa ga mamayi waye. 12 Khu hwane nya tepo, vapizane va Johane va diya dzega girumbi va ya dzinga, va vbedza va ya embeya Jesu esi si nga girega. 13 Tepo Jesu a ngapwa isoso a di khuga a beya ngalavani a hongola wulanga nya giwula gasi guya khala enga. Ganiolu, tepo gitshungu gi ngapwa isoso, gi di mu landra khu mawundru gu khugeya khu madhoropani gwawe.

14 Tepo a nga ba a tshiga khu ngalavani, Jesu a di wona gitshungu nya gikhongolo a gi pweya wusiwana, a hawulugisa vadwali. 15 Ganiolu, tepo li nga pfola, vapizane vaye va di mu hidzimeleya va ya mu embeya, khavo: “Wulanga wowu giwula nigu li pfode; embeya gitshungu gi hongola gasi va ya dzi rengeya gilo nyo hodze dzialidheyani.” 16 Khu kharato, Jesu a di va embeya, khuye: “Va nga hongoli; va ningeni enu gilo nyo hodze.” 17 Va di mu hakha, khavo: “Hi mwalo gilo avba, ho wa ni 5 dzipawu ni dzindzadzi dzimbili basi.” 18 Uye a di khuye: “Si reseni eno gwangu.” 19 A di embeya gitshungu gu khuye gi khala mwasini. Khavbovbo, a dzega 5 dzipawu ni dzindzandzi dzimbili, a khedza ndzadzini a si kategisa. Hwane nya gu ba a pilelede dzipawu, a di ninga vapizane vaye, vapizane vaye va kabaniseya gitshungu. 20 Khu kharato, vatshavbo va di hodza va khura, va hengeledzeya sipandre si nga tshala si tadza 12 mirava.* 21 Khu kharato, ava va nga hodza va diri 5000 vama, nya mba kotari vanyamayi ni sanana. 22 Khavbovbo, nya mba hweya, uye a di ruma vapizane vaye gu beya omu nya ngalava va ba va thanga va hongola wumbe tshatugo, uye na ngo tshadzisana ni gitshungu.

23 Hwane nyo ba a tshadzisanide ni gitshungu, a di gweya enga gigomoni gasi guya gombeya kala gu khala wutshigu nari enga iyoyo. 24 Khu tepo yoyo, ngalava yi di romo vbakari nya mati na yi gu vetwa khu mavimbi kholu gu diri ni phuvbo nya yikhongolo. 25 Ganiolu, na gu hongola gugyani,* a di va yela na gu gimbiya khu vbatshani nya mati. 26 Tepo va nga mu wona na gu gimbiya khu vbatshani nya mati, vapizane va di thava, khavo: “Gikono!” Va womba dzihuwa khu gu thava. 27 Khavbovbo, Jesu a di dzegeya gu va embeya, khuye: “Tiyani hwambo! Mu nga thavi, kheni!” 28 Pedro a di mu hakha khuye: “Wa gu ba uri uwe Pfhumu, nyi rane nyita iyo gwago khu vbatshani nya mati.” 29 Jesu a di khuye: “Delu!” Khu kharato, Pedro a di tshiga khu ngalavani a yela Jesu, na gu gimbiya khu vbatshani nya mati. 30 Ganiolu, tepo a nga khedza, a wona gu khuye phuvbo yikhongolo, a di thava. Tepo a nga pheya gu dzama, a di womba huwa, khuye: “Pfhumu, nyi vbulugise!” 31 Jesu a di dzegeya gu thawuludza libogo laye a mu mola, khuye: “Muthu nya gukhodwa nya gudugwana, khu ginani u nga kanakana?” 32 Tepo va nga beya ngalavani, phuvbo yi di ema. 33 Khu kharato, ava va nga ba va romo ngalavani va di mu khidzimeya, khavo: “Khu lisine uwe u Gyanana gya Nungungulu.” 34 Khavbovbo, va di tshatuga va hongola Genezare.

35 Tepo va nga tugula gu khavo khu Jesu, vathu va tigoni mule va di tivisa vatshavbo va nga ba va vbanya vbafuvbyana mule. Khavbovbo, vathu va di mu reseya vatshavbo va nga ba va dwala. 36 Va di mu lomba gu khavo a va dzumedzisa gu kuha matshakafula nya sombo saye. Vatshavbo va nga ma kuha va di hawuluga.

15 Khavbovbo, Vafarisi nyo khaguri ni valovi va nga ba vata khu Jerusalema va di hidzimeleya Jesu, va ya khavo: 2 “Khu ginani vapizane vago va si landrisigo tumbunugo wa gale? Khu giyeyedzo, avo kha va hambi* mandza va gu ba va vbweta gu hodza.”

3 Jesu a di va hakha, khuye: “Enu ke, khu ginani mu ndragago nayo wa Nungungulu khu kotani nya tumbunugo wanu? 4 Khu giyeyedzo, Nungungulu a di khuye: ‘Ninga githawo papayi wago ni mamayi wago’ nigu ‘oyu a ganeyago guvivba* khu papayi waye ni mamayi waye yede gu songwa.’ 5 Ganiolu, enu mwari khenu: ‘Oyu a embeyago papayi waye ni mamayi waye, khuye: “Satshavbo nyi gu naso nyi nga ba nyi yede gu gu phasa khiso nyi si ningede ga Nungungulu,” 6 kha ngo yela gu ninga githawo papayi waye.’ Khu kharato, enu mu tshipiside lito la Nungungulu khu kotani nya tumbunugo wanu. 7 Vapfhadzedzeyi nenu! Isaya a di gu profeta maningano ni enu tepo a nga khuye: 8 ‘Vathu vava va gu nyi ninga githawo khu likana basi, ganiolu myonyo yawe yomo hwindzo ngudzu ni eni. 9 Kha si phasi gilo gu simama va nyi khozeya kholu milayo va hevbudzago khya vathu.’” 10 Khavbovbo, a di rana gitshungu a gi embeya, khuye: “Engisani mu bwe mu pwisisa gwadi esi: 11 Khandri egi gi beyago kanani nya muthu gi mu nyenyezisago, ganiolu a gu nyenyeziswa khegi gi dugago khu kanani gwaye.”

12 Khu kharato, vapizane vaye va di mu yela, vaya khavo: “U ngu dziti gu khuwe Vafarisi va tshunganede khesi u ganedego?” 13 A di va hakha, khuye: “Simbo watshavbo wu nga mba yadwa khu Papayi wangu a gomogo ndzadzini, wu na sigudwa. 14 Mu nga garadzegi khavo. Avo sikhumu si hetedzago sikhumu. Kholu gikhumu gya gu hetedza gimbe gikhumu, vatshavbo va na thegeya phalani.” 15 Pedro a di hakha, khuye: “Nga hi tshamuseya gwadi gipimaniso gegi.” 16 Jesu a di hakha, khuye: “Gasi anenu mu si gu si pwisisi? 17 Kha mu dziti gu khenu gyatshavbo gi beyago kanani gya gu vbindra khu ndrani gi hegisa khu gu hongola gikoti? 18 Ganiolu, gyatshavbo gi dugago khu kanani gya guta khu monyoni; egi khigyo gi nyenyezisago muthu. 19 Khu giyeyedzo, khu monyoni gu ngu duga mahingigedzo nya guvivbe: wughevenga, wubhayi,* wuvafa, gulipha ni gu valeteya. 20 Esi khiso si nyenyezisago muthu, ganiolu gu hodza nya mba hamba* mandza kha si nyenyezisi muthu.”

21 Tepo a nga khuga khu vbale, Jesu a di hongola Tiro ni Sidhoni. 22 Khavbovbo, nyamayi moyo nya Mufenisiya a nga ba a vbanya mule, a di mu hidzimeleya a ta mu lileya, khuye: “Nyi pweye wusiwana, Pfhumu, Gyanana gya Dhavhidhe, nyamahegyane wangu na ni lidhimoni li mu tshanisago ngudzu.” 23 Ganiolu, kha mu hakha gilo. Khu kharato, vapizane vaye va di mu yela, va ya khavo: “Mu tutumise kholu a ngu hi gulumeya.” 24 A di hakha, khuye: “Eni nyi di rumedwa basi ga dzinvuta dzi dzimedego dza ndrangani ga na Israyeli.” 25 Ganiolu, nyamayi wule a dita mu khidzimeya, khuye: “Pfhumu, nyi phase!” 26 A di mu hakha, khuye: “Kha si yeli gu dzega guhodza nya sanana u ninga simbwana.” 27 Nyamayi wule a di hakha, khuye: “Ina Pfhumu, ganiolu simbwana si ngu roledzeya guhodzana* gu thegeyago khu vbamezatunu ga vamune vaso.” 28 Jesu a di mu hakha, khuye: “Nyamayi, gukhodwa gwago gukhongolo; si na girege esi u si lombago.” Gyanana gyaye gi di dzegeya gu hawuluga.

29 Jesu a di khuga a hongola vbafuvbi ni yiphwa ya Galileya, a gweya gigomoni a ya khala iyo. 30 A di hidzimeledwa khu vathu nya vangi, va mu reseya sikhurubwa, silima, sikhumu, sidudu ni vambe, va ta va vega migondroni gwaye, a va hawulugisa. 31 Khu kharato, gitshungu gi di hlamala khu gu wona sidudu na si gu ganeya, silima na si gu hawulugide, sikhurubwa na si gu gimbiya, sikhumu na si gu wona; va dhumisa Nungungulu wa Israyeli.

32 Jesu a di rana vapizane vaye ata khuye: “Nyi ngu va pweya vathu vava, kholu va na ni matshigu mararu na vari ni eni nigu va mwalo gilo nya gu hodze, kha nyi vbweti gu va phalalegisa ni ndzala kholu va nga tshuka va thega khu ndziya.” 33 Ganiolu, vapizane vaye va di mu wudzisa, khavo: “Hi na dzi mana hayi dzipawu nyo khurise gitshungu gyatshavbo gegi giwulani momu?” 34 Jesu a di va wudzisa gu khuye: “Dzipawu dzingani mu gu nadzo?” Va di mu hakha, khavo: “Hi ni 7 nya idzo ni sindzandzyana nyo khaguri.” 35 Khu kharato, hwane nyo rume gitshungu gi khala vbavbatshi, 36 a di dzega 7 dzipawu ni dzindzandzi a bonga a vbedza a si pileleya a ningeya vapizane; vapizane va kabaniseya gitshungu.” 37 Vatshavbo va di hodza va khura, va roledzeya esi si nga ba si tshade va tadza 7 mirava* nya yikhongolo. 38 Avo va nga hodza va diri 4000 vama, nya mba kotari vanyamayi ni sanana. 39 Hwane nya gu ba a tshadzisanide ni gitshungu, Jesu a di beya ngalavani a hongola Magadhani.

16 A di hidzimeledwa khu Vafarisi ni Vasadhusi gasi gu mu linga, va diya mu lomba gu khavo a va yeyedza giwoniso gya ndzadzini. 2 A di va hlamula, khuye: “Tepo li pfolago, mwari khenu: ‘Gu nagya gwadi, kholu ndzadzini gu fuvide,’ 3 dzimindrudzile mwari khenu: ‘Muhuno gu na dzidziya nigu yi nawa ndzadzi kholu ndzadzini gu fuvide nigu gu ni mazuvi.’ Enu mu ngu si kodza gu tshamuseya makhalelo ya ndzadzini, ganiolu kha mu si kodzi gu tshamuseya siwoniso nya dzinango. 4 Gitugulwana nya gu mba tumbega, nya gu vivbedwe khu monyo, mu nga gu simama gu vbweta giwoniso. Ganiolu gimwalo giwoniso mu na yeyedzwago nasiri egi gya Jona.” Khavbovbo, a di va diga a khuga a hongola.

5 Vapizane va di tshatuga va hongola yimbe bambe nya yiphwa ganiolu va divala gu dzega dzipawu. 6 Jesu a di va embeya, khuye: “Gengeyani! Dzi woneyeni ni livhirina nya Vafarisi ni Vasadhusi.” 7 Khu kharato, va di pheya gu bhula khu gyawe, khavo: “Kha ha ta ni dzipawu.” 8 Jesu a di khuye: “Vathu nya gukhodwa nya gudugwana, khu ginani mu ganeyago gu khenu kha mwata ni dzipawu? 9 Mu si gu si pwisisi? Kha mu dundrugi gu khenu nyi hodziside 5000 vathu khu 5 dzipawu mu bwe mu tadza mirava* nya yingi khu sipandre si tshadego? 10 Mwendro kha mu dundrugi gu khenu nyi hodziside 4000 vathu khu 7 dzipawu mu bwe mu tadza mirava* nya yikhongolo khu sipandre si tshadego? 11 Khu ginani mu gu mba si pwisisa gu khenu khandri nyo ganeya khu dzipawu? Nyi di kheni dzi woneyeni ga livhirina nya Vafarisi ni Vasadhusi.” 12 Khavbo va nga pwisisa gu khavo kha nga ba a va kutsa gu dzi woneya avba nya livhirina nya dzipawu, ganiolu ga sihevbudzo sa Vafarisi ni Vasadhusi.

13 Tepo a nga vboha Sezareya ga Filipi, Jesu a di wudzisa vapizane vaye, khuye: “Vathu vari khavo Gyanana nya muthu khu mani?” 14 Va di hakha, khavo: “Vomo va gu khavo khu Johane Mubhabhatisi, vambe vari khavo khu Eliya, vambe khavo khu Jeremiya mwendro moyo nya vaprofeti.” 15 Uye a di va wudzisa gu khuye: “Enu ke, mwari khenu kheni mani?” 16 Simoni Pedro a di mu hlamula, khuye: “Uwe khuwe Kristo, Gyanana gya Nungungulu a vbanyago.” 17 Jesu a di mu hakha, khuye: “U kategide Simoni, gyanana gya Jona, kholu silo sesi kha wa embedwa khu muthu, ganiolu khu Papayi wangu a gomogo ndzadzini. 18 Nyi ngu gu embeya gambe gu kheni: Uwe khuwe Pedro, vbatshani nya giwindri gegi nyi na vbaha libandla langu nigu kha li na nga padwa khu myanya nya lithowo.* 19 Nyi ngu gu ninga dzipfhungulo nya Mufumo wa ndzadzini, egi u na gi hungago mafuni gi na ba gi hungidwe ndzadzini, egi u na gi tshulago mafuni gi na ba gi tshudwe ndzadzini.” 20 Khavbovbo, a di laya vapizane gasi va si embeyi muthu gu khavo uye khuye Kristo.

21 Gukhugeya avbovbo, Jesu a di pheya gu va tshamuseya gu khuye Kristo a di yede gu hongola Jerusalema a ya tshaniswa ngudzu khu madhota ni vaprista nya vakhongolo ni valovi, a songwa a bwe a wuswa khu litshigu nya wuraru. 22 Pedro a di mu rana khu phuvbo a ya mu kawuka, khuye: “U nga ganeyi isoso Pfhumu; isoso gima kha si na nga gu dugeleya.” 23 Khavbovbo, Jesu a di pfhurareya Pedro, khuye: “Khuga khavba Sathane! Uwe u gitshunganiso gwangu, kholu mapimo yago khandri ya Nungungulu ganiolu khya vathu.”

24 Jesu a di embeya vapizane vaye, khuye: “Oyu a vbwetago gu nyi landreya, a na dzi dige, a rwala simbo waye nya tshanisa* a simama gu nyi landreya. 25 Kholu oyu a vbwetago gu vbulugisa womi waye a na wu luza, ganiolu ni wevbini a luzago womi waye khu kotani yangu a na wu mana. 26 So phasa ginani gu muthu a mana litigo latshavbo, ganiolu a luza womi waye? Nigu ginani egi muthu a na gi ningeyago gasi gu vbulugisa womi waye? 27 Kholu Gyanana nya muthu gi nata khu wudhumo wa Papayi wagyo ni dzingilozi dzagyo gasi guta tshatshazeya muthu ni muthu guya khu mithumo yaye. 28 Khu lisine nyi ngu mi embeyani gu kheni: Vomo va gomogo avba va na gu mba linga gufa na va si gu woni Gyanana nya muthu na gita khu Mufumoni wagyo.”

17 Hwane nya 6 matshigu, Jesu a di rana Pedro ni Jakobe ni ndriyaye Johane a hongola navo gigomoni nya gulaphe. 2 Uye a di vbindrugedza mahoni gwawe. Khovbe yaye yi di gu ngangameya nga lidambo nigu sombo saye si di gu khedziga* nga wenengedzo. 3 Khavbovbo, gu di wonega Mosi ni Eliya na va gu bhula naye. 4 Khavbovbo, Pedro a di embeya Jesu, khuye: “Pfhumu, si ngu tsakisa gu khala avba. Wo si tsakeya nyi na tsitsa matendra mararu, lago, la Mosi ni la Eliya.” 5 Na ngo ganeya, li dita lipfhi nya gungangameye lita va fenengedza. Khavbovbo, gu pwala lito omu nya lipfhi na li gu khilo: “Egi Gyanana gyangu nyi gi haladzago, gi nyi tsakisago ngudzu, gi engiseni.” 6 Tepo va ngapwa isoso, vapizane va di khidzima va tsitsa dzikhovbe khu gu thava ngudzu. 7 Jesu a di va hidzimeleya, a ya va kuha, khuye: “Wugani. Mu nga thavi.” 8 Tepo va nga khedza vbatshani, kha va wona mumbe muthu, va di wona Jesu basi. 9 Tepo va nga ba va tshiga khu mugigomoni, Jesu a di va embeya, khuye: “Mu nga embeyini muthu esi mu si wonidego, kala Gyanana nya muthu gi wuswa khu ga vafudego.”

10 Ganiolu, vapizane va di mu wudzisa gu khavo: “Khu ginani valovi va ganeyago gu khavo Eliya yede gu pheya khuye ata?” 11 A di va hlamula, khuye: “Khu lisine, Eliya a nguta nigu a na ta wusedza silo satshavbo. 12 Ganiolu, nyi ngu mi embeyani gu kheni: Eliya dzude, ganiolu avo kha va muti nigu va mu giride ni gevbini va nga gi vbweta. Khu ndziya yamweyo, Gyanana nya muthu anigyo gi na tshaniseka mandzani gwawe.” 13 Vapizane va di tugula gu khavo a di gu ganeya khu Johane Mubhabhatisi.

14 Tepo va nga vboha avbo gi nga ba gi romo gitshungu, gu dita mwama nyo khaguri a ta mu khidzimeya, khuye: 15 “Pfhumu, gireya wuhindzi gyanana gyangu kholu igyo gi na ni gitshira gi mu tshanisago ngudzu. Gi ngu thega dzitepo nya dzingi niloni ni matini. 16 Nyi gi reside ga vapizane vago, ganiolu kha va si kodza gu gi hawulugisa.” 17 Jesu a di hakha, khuye: “Enu gitugulwana nya mba khodwa, nya gu vivbedwe khu monyo, nyi na khala nanu kala lini? Nyi na mi timiseya kala lini? Gi reseni eno.” 18 Jesu a di tutumisa lidhimoni li duga ga gikhwathana gile, igyo gi di dzegeya gu hawuluga. 19 Khavbovbo, vapizane va di wudzisa Jesu khu phuvbo, khavo: “Khu ginani ethu hi nga tandrega gu li tutumisa?” 20 Jesu a di va hlamula, khuye: “Khu kotani nya gukhodwa gwanu nya gudugwana. Khu lisine, nyi ngu mi embeyani gu kheni: Mwa gu ba muri ni gukhodwa nyo dingane ni mbewu nya ginapi,* mu na embeya gigomo gegi, khenu: ‘Siguga khavba u ya khala vbale,’ igyo gi na siguga; gimwalo mu na gi tandrago.” 21 *——

22 Tepo va nga ba va tshanganide Galileya, Jesu a di va embeya, khuye: “Gyanana nya muthu gi na ningedwa mandzani nya vathu. 23 Va na gi songa, ganiolu khu litshigu nya wuraru gi na wuswa.” Vapizane vaye va di garadzega ngudzu.

24 Tepo va nga vboha Kafarinawume, vama va nga ba va hengiseya khupo wa tempeleni va di hidzimeleya Pedro, va mu wudzisa gu khavo: “Ina muhevbudzi wago a ngu livba khupo* wa tempeleni?” 25 Pedro a di khuye: “Ina, a ngu livba.” Ganiolu, tepo a nga vboha gaya, Jesu a di pheya khuye a mu wudzisa gu khuye: “Wo si wona kharini Simoni? Dzipfhumu nya mafu dzo khupisa vamani? Vo khupisa sanana sawe mwendro gitshungu?” 26 Tepo a nga ganeya gu khuye: “Gitshungu,” Jesu a di mu embeya, khuye: “Khu kharato, sanana sawe kha si gurumedzegi gu khupa. 27 Ganiolu, gasi hi si va tshunganisi gimbiya phwani, u ya lova. Dzega ndzandzi nyo pheye u na yi molago u yi tula likana u na mana gingerengere nya prata, u na gi dzega u ta livba khigyo khupo wangu ni owu wago.

18 Khu tepo yile, vapizane va di hidzimeleya Jesu va ya mu wudzisa, khavo: “Khu mani gwadi-gwadi a gu khongolo Mufumoni wa ndzadzini?” 2 Khavbovbo, a di rana gyanana a ta gi emisa vbakari gwawe, 3 khuye: “Khu lisine nyi ngu mu embeyani gu kheni: Mwa gu mba vbindrugedza mu khala nga sanana, kha mi na nga beya Mufumoni wa ndzadzini. 4 Khu kharato, uye a dzi nogisago nga gyanana gegi, khuye a gu khongolo Mufumoni wa ndzadzini; 5 nigu uye a hakhago gyanana nya nga egi khu lina langu, a nyi hakhide neni. 6 Ganiolu, uye a tshunganisago moyo nya ava nya vadugwana va khodwago gwangu, gu diri tshukwana a hungeledwa giwindri* nya gikhongolo thamoni gwaye, a rikiswa linene.

7 “Libango ga litigo, kholu li ngu gira vathu va ghoha! Khu lisine, kha si na nga hamugega silo si ghohisago* vathu, ganiolu libango li na ni wule a si vangago! 8 Khu kharato, la gu tshuka libogo lago mwendro litundru lago li gu tshunganisa, li piye u li dzudzuga hwindzo. Tshukwana gu beya womini nuri gilima mwendro na wu ndzodola, guvbindra gu rinywa niloni nya gupindruge na wuri ni mawogo ni mawundru yago ya mavili. 9 Nigu liso lago la gu gu gira u ghoha, li duse u li dzudzuga hwindzo. Tshukwana gu beya womini na wuri ni liso limwedo, guvbindra gu rinywa Gehena* gu khondrago ni maho yago ya mavili. 10 Mu nga tshuki mu kanyisa moyo nya ava nya vadugwana, kholu nyi ngu mi embeyani, kheni: Dzingilozi dzawe dzi gomogo ndzadzini, tepo yatshavbo dzi ngu wonana* ni Papayi wangu a gomogo ndzadzini. 11 *——

12 “Mwa gu si wona kharini? Ina muthu a gu ni 100 dzinvuta, yi dzimeya mweyo, kha na nga diga edzi nya 99 sigomoni, a gimbiya a vbwetedzeya eyi yi nga dzimeya? 13 A gu yi mana, nyi ngu mi embeyani gu kheni a na tsaka ngudzu khiyo, guvbindra dzile nya 99 dzi nga mba dzimeya. 14 Khu ndziya ya yimweyo, Papayi wangu* a gomogo ndzadzini, kha vbweti gu khuye ni moyo nya ava nya vadugwana a dzimeya.

15 “Vbavbandze nya isoso, ga gu tshuka ndriyago a gu ghoheya, gimbiya u ya bhula naye na muri mwavavili basi. A gu gu engisa, u phaside ndriyago gu gira esi nya sadi. 16 Ganiolu, a gu mba gu engisa, dzega muthu moyo mwendro vavili u hongola navo, gasi gu satshavbo si lamudwa khu wufakazi nya vathu vavili mwendro vararu. 17 A gu mba va engisa, embeya libandla. A gu mba engisa nilo libandla, mu wone nga muthu wa va nya mayigo ni mukhupisi.

18 “Khu lisine nyi ngu mi embeyani gu kheni: Ni gevbini mu na gi hungago mafuni, gi na ba gi hungidwe ndzadzini; nigu ni gevbini mu na gi tshulago mafuni, gi na ba gi tshudwe ndzadzini. 19 Khu lisine nyi ngu mi embeya gambe gu kheni: Ga gu tshuka vavili vanu mafuni va lomba gilo nya lisima, Papayi wangu a gomogo ndzadzini, a na va ninga. 20 Kholu avba gu gomogo vavili mwendro vararu va tshanganidego khu lina langu, aneni nyi womo vbakari gwawe.”

21 Pedro a di mu hidzimeleya, a ya mu wudzisa, khuye: “Pfhumu, nya gu ghohedwa khu ndriyangu, nyi yede gu mu divaleya gungani? 7 nya ugo?” 22 Jesu a di mu hakha, khuye: “Kha nyi na nga gu embeya gu kheni 7 nya ugo, ganiolu kala 77 nya ugo.”

23 “Khu kharato, Mufumo wa ndzadzini, wu nga fananiswa ni pfhumu yi nga ba yi vbweta gu hengula mangava sithumi saye. 24 Tepo a nga pheya gu hengula, va di mu reseya mwama a nga ba a dhevha 10 000 dzitalenta.* 25 Kha nga olu a nga ba ari mwalo dzitsapawu nya gu livbe khidzo, pfhumu yile yi di ruma gu khiyo gu rengiswa uye, ni mwangadzi waye, ni sanana saye ni satshavbo a nga ba ari naso, gasi gu livba mangava. 26 Khavbovbo, githumi gi di mu khidzimeya, khigyo: ‘Nyi laphiseye monyo, nyi na gu livba mangava yatshavbo.’ 27 Pfhumu yile yi di mu pweya wusiwana, yi mu diga a hongola, yi mu divaleya mangava yaye. 28 Ganiolu, githumi gile gi di duga gi ya manana ni githumi-kwawe gi nga ba gi mu dhevha 100 dzidhenaryo.* A di gi mola, a gi dzwinya ngolo, khuye: ‘Nyi livbe esi u nyi dhevhago.’ 29 Githumi gile gi di mu khidzimeya, gi mu lomba, khigyo: ‘Nyi laphiseye monyo, yi na gu livba.’ 30 Ganiolu, uye a di bomba; a di mu khotheya pasoni kala a livba mangava yatshavbo. 31 Tepo sithumi-kwawe si nga si wona, si di garadzega ngudzu, si ya embeya pfhumu satshavbo si nga girega. 32 Khavbovbo, pfhumu yi di mu ranisa, yi ta mu embeya, khiyo: ‘Githumi nya gu vivbedwe khu monyo! Eni nyi gu divalede mangava yago yatshavbo tepo u nga nyi lomba. 33 Ina kha wa nga ba u yede gu gireya wuhindzi githumi-kwanu nya nga edzi nyi gu giredego khidzo wuhindzi neni?’ 34 Khavbovbo, pfhumu yi di goroga ngudzu, yi mu khotheya pasoni,* kala a livba mangava yatshavbo. 35 Papayi wangu a gu romo ndzadzini a na mi gira sasimweso moyo ni moyo wanu a gu mba divaleya ndriyaye khu monyo waye watshavbo.”

19 Tepo Jesu a nga vbedza gu ganeya mahungu yaya, a di khuga khu Galileya a hongola mivbinganoni ya Judheya, khu gumbe tshatugo ga Joridhani. 2 Nigu a di landrisedwa khu vathu nya vangi; a hawulugisa vale va nga ba va dwala.

3 Vafarisi nyo khaguri va di mu hidzimeleya na va vbweta gu mu linga, va mu wudzisa, khavo: “Ina si ngu dzumedziswa gu mwama a tshula mutshadho ni mwangadzi waye khu gighelo ni gevbini?” 4 Jesu, a di va hakha, khuye: “Ina kha mwa leri gu pwani uye a nga va gira gupheyani, a di gira mwama ni nyamayi, 5 a bwe gambe khuye: ‘Khu gighelo gyogyo, mwama a na tshiya papayi waye ni mamayi waye, a ya patana ni mwangadzi waye, va vavili va khala nyama mweyo’ gani? 6 Khavbovbo, khandri vavili gambe, ganiolu nyama mweyo. Khu kharato, esi Nungungulu a si hungidedo, si nga tshudwi khu muthu.” 7 Va di mu wudzisa gu khavo: “Khu ginani Mosi a nga ruma gu khuye mwama a na ninge nyamayi lidangaliya nya gu tshule mutshadho, a bwe a mu tutumisa?” 8 Jesu a di va hlamula, khuye: “Mosi a di mi dzumedzisa gu hula vagadzi vanu khu kotani nya gu lemeye nya myonyo yanu. Ganiolu, gupheyani kha sa nga ba si khade kharato. 9 Nyi ngu mi embeyani gu kheni: Ni wevbini a tshulago mutshadho ni mwangadzi waye nasiri khu kotani nya wubhayi,* a bwe a tshadha ni mumbe, a gu gira wubhayi.”

10 Vapizane va di mu hakha, khavo: “Abari gu lipango li khade kharati, tshukwana gu mba tshadha.” 11 Jesu a di va embeya gu khuye: “Khandri vatshavbo va si kodzago gu gira isoso, sa gu kodzwa basi khu vale va gu ni giningwa nya gu gire isoso. 12 Kholu vomo va nga velegwa na vari mithenwa, vomo va nga girwa mithenwa* khu vathu, vomo va nga dzi gira mithenwa khu kotani nya Mufumo wa ndzadzini. Oyu a si kodzago gu gira isoso, a na gire.”

13 Vambe va di mu reseya sanana gasi a ta si handzega mandza, a si gombeleya, ganiolu vapizane va di va kawuka. 14 Jesu a va hakha, khuye: “Digani sanana, mu nga zami gu si himbedzeya guta eno gwangu, kholu Mufumo wa ndzadzini wa gu lumba vathu nya gu fane naso.” 15 Uye a di si handzega mandza, a vbedza a khuga khu vbale.

16 A di hidzimeledwa khu muthu a ta mu wudzisa, khuye: “Muhevbudzi, ginani nya gyadi nyi yedego gu gira gasi nyi mana womi nya gupindruge?” 17 Uye a di mu embeya, khuye: “Khu ginani u nyi wudzisago khu silo nya sadi? Kholu nya wadi moyo basi. Ganiolu, wa gu vbweta gu mana womi, tepo yatshavbo engisa milayo.” 18 Uye a di wudzisa, khuye: “Yevbini yakona?” Jesu a di mu hakha, khuye: “U nga songi, u nga giri wubhayi, u ngabi, u nga ningeyi wufakazi nya malipha, 19 ninga githawo papayi wago ni mamayi wago, nigu haladza muthu-kwanu nga edzi u dzi haladzago khidzo.” 20 Lidzaha lile li di mu hakha, khilo: “Nyi ngu gira satshavbo soso; ginani gi ngo nyi keneleyago?” 21 Jesu a di li hakha, khuye: “Wa gu vbweta gu vbeleya, gimbiya u ya rengisa satshavbo u gu naso, u ninga dzitsapawu dzakone sisiwana, u na mana thomba ndzadzini; khavbovbo delu u ta nyi landreya.” 22 Tepo lidzaha lile li ngapwa isoso, li di khuga li hongola na li swihade, kholu li diri ni dzithomba nya dzingi. 23 Jesu a di embeya vapizane vaye, khuye: “Khu lisine nyi ngu mi embeyani, gu kheni: Si na garadza gu muthu a ghanyidego a beya Mufumoni wa ndzadzini. 24 Nyi ngu mi embeyani gambe, kheni: Si ngu vbevbuga gu kamelo yi vbindra khu vbagihogotunu nya tshingano gu vbindra gu muthu nya gu ghanye a beya Mufumoni wa Nungungulu.”

25 Tepo vapizane va ngapwa isoso, va di hlamala ngudzu, khavo: “Abari kharato, khu mani a na vbulugiswago?” 26 Jesu a di va khedza gwadi dzikhovbeni gwawe, khuye: “Ga vathu esi kha si kodzegi, ganiolu ga Nungungulu satshavbo si ngu kodzega.”

27 Pedro a di hakha, khuye: “Hi digide satshavbo hi gu landreya. Tshatshazelo muni hi na wu manago?” 28 Jesu a di va embeya, khuye: “Khu lisine nyi ngu mi embeya gu kheni: Tepo satshavbo si na wusedzwago nyaluphye, tepo Gyanana nya muthu gi na khalago gikhalotunu gyaye nya wufumu nya gu tale khu wudhumo, enu mu nga nyi landreyani, mu na khala avba nya 12 sikhalo nya wufumu, mu lamula 12 mahundzu ya Israyeli. 29 Nigu, ni wevbini a digidego dzindranga, vandriye nya vama mwendro nya vanyamayi, mwendro papayi, mwendro mamayi, mwendro sanana, mwendro sipeto khu kotani nya lina langu, a na si mana na si engedzedwe 100 nya ugo, a bwe a mana womi nya gupindruge.

30 “Ganiolu, nya vangi va gu va nya gu pheya va na khala vamahegiseya, ava va gu vamahegiseya va na khala va nya gu pheya.

20 “Kholu Mufumo wa ndzadzini, wa gu fana ni mune ndranga a nga khuga ni dzimindru a ya vbweta sithumi gasi si ta thuma omu nya lithembwe laye nya miuvha. 2 Hwane nya gu ba a bhude navo gu va hakhisa dhenaryo* mweyo khu litshigu, a di va rumeya va hongola thembweni gwaye nya miuvha. 3 Tepo a nga duga khomu nya dzi 9 ora,* a di wona vambe va nga ba va romo merkadhu, na vari mwalo thumo; 4 a di va embeya, khuye: ‘Gimbiyani nenu thembweni gwangu, nyi na mi hakhisani esi si mi yelago.’ 5 Khu kharato, avo va di hongola. A di duga gambe khu dzi 12 ora,* ni dzi 15 ora,* a ya gira sasimweso. 6 Khu guhegisa, a di duga gambe khu dzi 17 ora,* a ya mana vambe na va emide, a va wudzisa, khuye: ‘Khu ginani mu emidego avba litshigu latshavbo nya mba thuma gilo?’ 7 Va di mu hakha, khavo: ‘Kholu mwalo a nga hi thola.’ Uye a di va hakha, khuye: ‘Gimbiyani nenu thembweni nya miuvha.’

8 “Tepo li nga pfola, mune lithembwe a di embeya muwoneleyi nya sithumi saye, khuye: ‘Rana sithumi u ta si hakhisa; pheya khesi nyo hegise, u hegisa khesi nyo pheye.’ 9 Tepo si nga vboha sithumi si nga thodwa khu dzi 17 ora,* gimwegyo ni gimwegyo nya iso, gi di hakha dhenaryo* mweyo. 10 Khu kharato, tepo vale nya gu pheye va nga vboha, va di pimisa gu khavo va na hakhiswa dzitsapawu nya dzingi, ganiolu anavo moyo ni moyo wawe a di hakhiswa dhenaryo* mweyo. 11 Tepo va nga hakha, va di pheya gu ngurangureya mune lithembwe, 12 khavo: “Ava vama nyo hegise va di thuma ora mweyo basi, ganiolu u va hakhiside dzitsapawu nyo fane ni ethu hi nga thuma litshigu latshavbo, na hivbya khu lihani!” 13 Ganiolu, a di hlamula moyo wawe, khuye: ‘Kha nyi gu kalaveyi gilo wandruye. Gasi kha ha pwana gu gu livba dhenaryo* mweyo? 14 Dzega esi si gu sago u hongola. Nyo vbweta gu ninga oyu nyo hegise tengo nya gu fane ni oyu nyi nga gu ninga. 15 Ina nyi mwalo fanelo nya gu gire esi nyi si vbwetago khu silo sangu? Mwendro wa gupwa lidiwo kholu nyi nga va gireya wuwadi?’ 16 Khu kharato, nya vangi va gu va nya gupheya va na khala va mahegiseya, va mahegiseya va na khala va nya gupheya.”

17 Na vari ndziyani, na va gu gweya Jerusalema, Jesu a di rana vapizane vaye nya 12 khu phuvbo, a va embeya, khuye: 18 “Mu ngu wona, olu ha gu hongola Jerusalema. Iyoyo Gyanana nya muthu gi na ya ningedwa ga vaprista nya vakhongolo ni valovi. Avo va na ya khavo a na songwe 19 nigu va na mu ningeya ga vanyamayigo gasi va mu poyila, va mu kwamula va bwe va mu songa vbasimbotunu, ganiolu khu litshigu nya wuraru a na wuswa.”

20 Khavbovbo, a di hidzimeledwa khu mamayi nya sanana sa Zebhedhewu gumogo ni sanana saye, a ta mu khidzimeya, a mu lomba gilo. 21 Jesu a di mu wudzisa, khuye: “Wa gu vbweta ginani?” A di mu hakha, khuye: “Dzumeya gu khuwe Mufumoni wago, sanana sesi sangu sasivili si khale gimwegyo khu nyamudye, gimbe khu nyambade gwago.” 22 Jesu a di hlamula, khuye: “Kha mu giti igyo mu lombago. Ina mu na si kodza gu seya kopo eyi nyi vbwetago gu yi seya?” Avo va di hakha, khavo: “Ina.” 23 Jesu a di va embeya, khuye: “Khu lisine enu mu na seya kopo yangu; ganiolu, gu khala nyamudye gwangu mwendro nyambade gwangu, khandreni nyi sitigo. Malanga yoyo ma gu lumba vale va dongiseledwego ayo khu Papayi wangu.”

24 Tepo vale nya 10 va ngapwa isoso, va di sola va na ndruye ni ndruye vale va vavili. 25 Ganiolu, Jesu a di va rana, a va embeya, khuye: “Mu ngu dziti gu khenu dzipfhumu nya litigo dzi ngu lemedziseya giemo vale dzi va fumeyago nigu vakhongolo vawe va gu va fuma. 26 Enu mu nga girini kharato; ganiolu oyu a vbwetago gu khala khongolo vbakari gwanu, yede gu khala githumi gyanu, 27 nigu oyu a vbwetago gu khala nyo pheye vbakari gwanu, yede gu khala gumbi yanu. 28 Kha nga Gyanana nya muthu gi nga mba teya gu ta thumedwa ganiolu gu ta thumeya ni gu ningeya womi wagyo gasi gu dzegisa nya vangi.”

29 Tepo va nga khuga khu Jeriko, a di landrwa khu vathu nya vangi. 30 Sikhumu sivili si nga ba si khade bambe nya ruwa si dipwa gu pwani khu Jesu a vbindrago khu vbale. Si di khusedza lito, khiso: “Pfhumu, Gyanana gya Dhavhidhe, hi gireye wuhindzi!” 31 Ganiolu, gitshungu gi di va kawuka, gi va degudza. Ganiolu, avo va di khusedza lito, khavo: “Pfhumu, Gyanana gya Dhavhidhe, hi pweye wusiwana!” 32 Khavbovbo, Jesu a di ema, a va rana, khuye: “Mwa gu vbweta gu khenu nyi mi gireya ginani?” 33 Va di hlamula, khavo: “Pfhumu, hi tule maho.” 34 Jesu a di va pweya, a va kuha maho. Avo va di dzegeya gu hawuluga, va mu landreya.

21 Na va romo vbafuvbi ni Jerusalema, va di vboha Bhetifage, Gigomoni nya Miolivha. Jesu, a di ruma vapizane vavili, 2 khuye: “Gimbiyani omu nya alidheya mu yi wonago khavba, mu na ya mana buru na yi hungidwe, na yiri ni giburwana, dzi tshuleni muta nadzo. 3 A gu tshuka muthu nyo khaguri a ganeya gilogyo, mu embeyeni gu khenu: ‘Pfhumu a gu dzi vbweta.’ Khu kharato, va na dzegeya gu mi diga mu wuya nadzo.”

4 Esi si giregide gasi gu tadzisega malito ya muprofeti, a nga khuye: 5 “Embeyani nyamahegyane wa Siyoni, khenu: ‘Pfhumu yago yi nguta gwago, muthu nyo rule, khilede buru, ina, khilede giburwana.’”

6 Vapizane va di hongola va ya gira esi Jesu a va rumidego. 7 Va di wuya ni buru ni giburwana gyayo, va ta dzega sombo sawe va ladza vbatshani nya dziburu, Jesu a khala khu vbatshani nya sombo. 8 Vathu nya vangi va di ladzeleya sombo sawe ndziyani, vambe va di piya matamo nya migindru va ladzeleya ndziyani. 9 Ava va nga ba va thangide ni ava va nga ba va tshade khu hwane va di gu khusedza lito, khavo: “Nungungulu, hi ngu gu lomba, vbulugisa Gyanana gya Dhavhidhe! Kategide wule a tago khu lina la Jehovha! Mu vbulugise hi ngu lomba, uwe u gomogo vbatshani ndzadzini!

10 Tepo Jesu a nga beya Jerusalema, lidhoropa latshavbo li di ema-ema, na va gu khavo: “Khu mani oyu?” 11 Gitshungu gi di gu khigyo: “Oyu khu muprofeti Jesu wa Nazareta ga Galileya!”

12 Jesu a di beya omu nya tempele a ya tutumisa vatshavbo va nga ba va rengisa ni gu renga omu nya tempele, a tshungunula dzimeza dza vatrokarisi nya dzitsapawu ni dzikadera dza vale va nga ba va rengisa sipomba, 13 a va embeya, khuye: “Gu lovidwe gupwani: ‘Nyumba yangu yi na ranwa gu pwani nyumba nya nombelo,’ ganiolu enu mwa gu yi gira gisakha nya dzimbafa.” 14 Nigu a di tedwa khu sikhumu ni silima tempeleni a ta si hawulugisa.

15 Tepo vaprista nya vakhongolo ni valovi va nga wona silo a nga ba a gira ni sanana si nga ba si ganeya khu lito nyo khugege tempeleni, khiso: “Nungungulu, hi ngu gu lomba, vbulugisa Gyanana gya Dhavhidhe!” va di goroga 16 va bwe va mu wudzisa, khavo: “U ngu sipwa esi si ganeyago?” Jesu a di va hlamula, khuye: “Nyi ngu sipwa. Mu si gu leri esi si lovidwego, nya gu pwani: ‘Sanana nya sidugwana ni esi si ngo mamago, si gu dhumiside’?” 17 A di va tshiya, a khuga khu dhoropani, a hongola Bhetaniya a ya lala iyoyo.

18 Ni dzimindru, tepo a nga wuya dhoropani a dipwa ndzala. 19 A di wona nguyu* na wu romo bambe nya ndziya. A di wu yela, ganiolu kha mana gilo, a di ya mana mahagani basi. A di wu embeya, khuye: “U nga velegi gambe mihandro.” Nguyu wule wu di dzegeya gu banga. 20 Tepo vapizane va nga wona isoso, va di hlamala, khavo: “Si kodzegide kharini gu nguyu yoyu wu dzegeya gu banga?” 21 Jesu a di va hakha, khuye: “Khu lisine nyi ngu mi embeya, kheni: Mwa gu ba muri ni gukhodwa, na mu si kanakani, kha mu na nga gira basi esi nyi nga gira nguyu yoyu, ganiolu ambari mwa gu ruma gigomo gegi, khenu: ‘Siguga khavba u dzi rinya linene’, si na girega. 22 Nigu satshavbo mu si lombago khu nombelo na muri ni gukhodwa, mu na ningwa.”

23 Tepo Jesu a nga beya tempeleni, vaprista nya vakhongolo ni madhota va di mu hidzimeleya na gu hevbudza, va ya mu wudzisa, khavo: “Wa gu yi mana hayi tshivba nya gu gire silo sesi? Nigu khu mani a nga gu ninga tshivba yoyo?” 24 Jesu a di va hlamula, khuye: “Aneni nyi na ni giwudziso. Mwa gu nyi hlamulani, aneni nyi na mi embeya gu kheni nya gu yi mana hayi tshivba nya gu gire silo sesi: 25 Gubhabhatisa ga Johane ga guta khu hayi? Khu ndzadzini mwendro khu ga vathu?” Va di pheya gu ganedzisana khu gyawe, khavo: “Ha gu khethu: ‘Khu ndzadzini,’ a na khuye: ‘Khu ginani mu nga ne khodwa gwaye?’ 26 Ganiolu, ha gu khethu: ‘Khu ga vathu,’ hi ngu thava gitshungu, kholu vatshavbo va gu wona Johane nga muprofeti.” 27 Va di mu hlamula, khavo: “Kha hi dziti.” Khu kharato, a di va embeya, khuye: “Aneni kha nyi mi embeyi omu nyi yi manago tshivba nya gu gire silo sesi.

28 “Mwa gu si wona kharini? Mwama moyo a diri ni sanana sivili. A di embeya egi nyo pheye, khuye: ‘Mwanangu, indra thuma thembweni nya miuvha muhuno.’ 29 Gyanana gile gi di hlamula, khigyo: ‘Nyawowe.’ Ganiolu khu hwane nya tepo gi di dzi laya, gi hongola. 30 A di yela egi nya wuvili a ya gi embeya sasimweso. Gi di mu hlamula, khigyo: “Ina papayi, nyi na hongola,” ganiolu kha gya hongola. 31 Khu wevbini ga ava va vavili a nga gira gugola ga papayi wawe?” Va di hakha, khavo: “Khuye nya gupheye.” Jesu a di va embeya, khuye: “Khu lisine nyi ngu mi embeyani, kheni: Vakhupisi ni maphuphulu* va na mi thangeya gu beya Mufumoni wa Nungungulu. 32 Kholu Johane dzude gwanu a ta mi yeyedza ndziya nya gululame; enu kha mwa khodwa gwaye. Ganiolu, vakhupisi ni maphuphulu va khodwe gwaye. Ambari tepo mu nga wona isoso, kha mwa dzi laya mu khodwa gwaye.

33 “Engiseyani gimbe gipimaniso: Gu diri ni mwama nyo khaguri a nga ba a yade miuvha omu nya lithembwe laye. A di li bhiyela, a gira wulanga nya gu sugeye avbo dziuvha gasi gu gira vhinyu a bwe a vbaha nyumba nya gulaphe.* A di tshiyedza* lithembwe lile ga valimi a endra a hongola limbe litigo. 34 Tepo yi nga vboha nango nya mihandro, a di rumeya sithumi saye ga valimi vale gasi guya hakha mihandro yaye. 35 Ganiolu, valimi va di mola sithumi saye, va veta gimwegyo, va songa gimbe, va pfara gimbe khu siwindri. 36 A di rumeya simbe sithumi nya singi gu vbindra esi nyo pheye, ganiolu va di ya si gira sasimweso. 37 Khu guhegisa, a di rumeya gyanana gyaye, na gu pimisa, khuye: ‘Va na ya ninga githawo gyanana gyangu.’ 38 Tepo va nga wona gyanana gyaye, valimi vale va di bhula khu gyawe, khavo: ‘Khuye oyu a na tshalago ni thomba. Hongoleni hi mu songa, gasi hi tshala ni thomba yaye!’ 39 Khu kharato, va di gi mola, va gi rinya vbavbandze nya lithembwe, va ya gi songa. 40 Litshigu mune lithembwe a na wuyago, ginani a nata girago ga valimi vale?” 41 Va di hakha, khavo: “Olu va vivbedwego khu myonyo, a nata songa vatshavbo, a ningeya lithembwe lile ga vambe valimi ava va na mu ningago mihandro khu tepo yakona.”

42 Jesu a di va hakha, khuye: “Ina mu si leri omu nya Milowo, gupwani: ‘Giwindri* gi nga nyenywa khu vavbahi khigyo gi khadego giwindri nya litshina gya vbakhonatunu. Esi sa guta khiyo ga Jehovha, nigu si lulamide mahoni gwathu’? 43 Khu kharato, nyi ngu mi embeyani, kheni: Mu na dzegedwani Mufumo wa Nungungulu wu ningedwa ga limbe litigo li na velegago mihandro yakone. 44 Nigu, uye a na thegeyago giwindri gegi, a na tshala khu sipandre. Uye gi na mu thegeyago, gi na mu kuya huye bhi.”

45 Tepo vaprista nya vakhongolo ni Vafarisi va ngapwa sipimaniso saye, va di tugula gu khavo a di gu thula avo. 46 Ambari olu va nga ba va vbweta gu mu mola, va di gu thava gitshungu kholu gi di gu mu wona nga muprofeti.

22 Jesu a di ganeya navo gambe khu gu thumisa sipimaniso, khuye: 2 “Mufumo wa ndzadzini wu nga fananiswa ni pfhumu yi nga gireya festa nya mutshadho gyanana gyayo. 3 Iyo yi di ruma sithumi sayo gu ya rana vale va nga ba va ranedwe festa nya mutshadho, ganiolu avo va di bomba guta. 4 Yi di ruma gambe simbe sithumi sayo, khiyo: ‘Embeyani vale va ranedwego mutshadho, khenu: “Guhodza gwatshavbo gu dongisedwe; nyi songide dzimombe ni sirengo nya gunone, satshavbo si dongisedwe. Deluni festatunu nya mutshadho.”’ 5 Ganiolu, vale va nga ba va ranidwe kha va khathala khiso, mumbe a di khuga a hongola thembweni gwaye, mumbe a khuga a hongola dzinogosini gwaye; 6 vambe va di mola sithumi saye va si tshanisa va bwe va si songa.

7 “Pfhumu yi di goroga ngudzu yi rumeya masotshwa yaye ma ya songa sighevenga sile, ma vbisa madhoropa yaso. 8 Khavbovbo, a di embeya sithumi saye, khuye: ‘Festa nya mutshadho yi vbede gu dongisedwa, ganiolu ava va nga ba va ranidwe kha va nga ba va yedwa khu gu manega avba nya festa. 9 Khu kharato, gimbiyani dzindziyani dzi khugeyago khu dhoropani, mu rana ni wevbini mu mu manago gasi ata festatunu nya mutshadho.’ 10 Sithumi sile si di hongola dzindziyani si ya rana vatshavbo si nga va mana; nya vadi ni ava nya mba vadi, khu kharato nyumba nya mutshadho yi di tala khu vapfhumba.*

11 “Tepo pfhumu yi nga beya gasi gu ya wona vapfhumba, yi di wona mwama a nga ba a ambade sombo si si yeligo gu hongola khiso mutshadhotunu. 12 A di mu wudzisa, khuye: ‘Ama sa, u bede kharini omu na wa sa ambala sombo nyo hongole khiso mutshadhotunu?’ Mwama wule a di hamuga lito. 13 Pfhumu yi di embeya sithumi sayo, khiyo: ‘Mu hungeni mawogo ni mawundro, mu mu rinya gidemani vbavbandze, khiyo a na gu ya liya ni gu khukhuruseya magwaha.’

14 “Kholu vangi va ranidwego ganiolu vadugwana va hathidwego.”

15 Khavbovbo, Vafarisi va di khuga va hongola va ya hevbula mano gasi gu mu kona khu malito yaye. 16 Khavbovbo, va di rumeya vapizane vawe gumogo ni tsawa wa na Herodhi gasi gu ya mu wudzisa, khavo: “Muhevbudzi, hi ngu dziti gu khethu u muthu nya lisine nigu wa gu hevbudza ndziya ya Nungungulu khu lisine, kha wu dwaneyi gu tsakedwa khu vathu, nigu kha wu khedzi muthu guya khu khovbe. 17 Nga hi embeya: Khu mawonelo yago, ina si ngu khala gu livba khupo ga Sezari mwendro ne?” 18 Ganiolu, Jesu na tugude guvivba ga myonyoni yawe, a di khuye: “Vapfhadzedzeyi nenu, khu ginani mu nyi lingago? 19 Nga nyi yeyedzani gingerengere gyakone nya khupo.” Va di mu reseya dhenaryo* mweyo. 20 A di va wudzisa, khuye: “Githombe gegi ni lina leli, khya mani?” 21 Va di mu hlamula, khavo: “Khya Sezari.” Khavbovbo, a di va embeya, khuye: “Khu kharato, livbani ga Sezari esi si gu sa Sezari, ganiolu ga Nungungulu esi si gu sa Nungungulu.” 22 Tepo va ngapwa isoso, va di hlamala ngudzu, va mu diga va khuga va hongola.

23 Khu litshigu lile, a di hidzimeledwa khu Vasadhusi va nga ba va si khodwi gu khavo gomo guwuswa ga vale va fudego, va ta mu wudzisa, khavo: 24 “Muhevbudzi, Mosi a di khuye: A gufa mwama nya mba tshiya sanana, ndriyaye yede gu dzegana ni noni yile gasi a velegeya sanana ndriyaye.’ 25 Gu diri ni 7 vama va nga ba vari va na ndriye ni ndriye. Oyu nyo pheye a di tshadha, afa nya mba tshiya sanana, mwangadzi waye a tshala a dzegwa khu ndriyaye. 26 Sasimweso si di giregeya oyu nya wuvili, uye nya wuraru, kala vatshavbo nya 7 va vbeya. 27 Khu guhegisa, nyamayi wule nuye a difa. 28 Khu kharato, guwuswani ga vale va fudego, nyamayi yoyo a na khala mwangadzi wa mani ga ava nya 7? Kholu khade mwangadzi wa vatshavbo.”

29 Jesu a di va hakha, khuye: “Mu dzi pembide, kholu kha mu yiti Milowo ambari tshivba ya Nungungulu, 30 kholu guwuswani ga vale va fudego vama kha va na nga dzega, vanyamayi kha va na nga dzegwa, ganiolu va na fana ni dzingilozi ndzadzini. 31 Maningano ni guwuswa ga vale va fudego kha mwa leri esi Nungungulu a nga mi embeya gu khuye: 32 ‘Eni nyi Nungungulu wa Abrahama, Nungungulu wa Isaki ni Nungungulu wa Jakobe’? Uye khandri Nungungulu wa vale va fudego, ganiolu khwa ava va vbanyago.” 33 Tepo gitshungu gi ngapwa isoso, gi di hlamala khu mahevbudzelo yaye.

34 Tepo Vafarisi va ngapwa gupwani Vasadhusi va tandregide gu hlamula Jesu, va di tshangana va gira tsawa moyo. 35 Moyo wawe a nga ba ari muhevbudzi nya Nayo, a di mu linga khu gu mu wudzisa, khuye: 36 “Muhevbudzi, avba nya Nayo wa Mosi, khu wevbini nya wukhongolo ga yatshavbo?” 37 Jesu a di mu hlamula, khuye: “‘Haladza Jehovha Nungungulu wago khu monyo wago watshavbo ni hefemulo* wago watshavbo ni mapimo yago yatshavbo.’ 38 Owu khuwo nayo nyo pheye nya wukhongolo ga yatshavbo. 39 Nya wuvili nya gu fane ni owu, khowu: ‘Haladza muthu-kwanu nga edzi u dzi haladzago khidzo.’ 40 Milayo yeyi ya mivili, khiyo litshina nya nayo watshavbo ni vaprofeti.”

41 Tepo Vafarisi va nga ba va tshanganide, Jesu a di va wudzisa gu khuye: 42 “Mwari khenu ginani khu Kristo? Gyanana gya mani?” Avo va di khavo: “Gya Dhavhidhe.” 43 A di va wudzisa gu khuye: “Khu ginani Dhavhidhe, na gu thumiswa khu liphuvbo nya guage a mu ranidego Pfhumu, khuye: 44 ‘Jehovha a di embeya Pfhumu yangu, khuye: “Khala khu nyamudye gwangu kala nyi vega valala vago vbavbatshi nya migondro yago”’? 45 Abari gu Dhavhidhe a mu ranide Pfhumu, sa gu kodzega kharini gu bwe a khala gyanana gyaye?” 46 Mwalo a nga kodza gu mu hlamula, gukhugeya litshigu lile mwalo gambe a nga tiya gu mu wudzisa gilogyo.

23 Jesu a di embeya gitshungu ni vapizane vaye, khuye: 2 “Valovi ni Vafarisi va dzi vegide wulangani wa Mosi. 3 Khu kharato, girani mu bwe mi landrisa esi va mi embeyago, ganiolu mi nga landri khavo kholu esi va ganeyago khandriso va girago. 4 Kholu va gu hunga mirwalo nya gu lemeye va yi handzega magatani nya vathu, ganiolu avo kha va dzini ni gu yi kuha khu nyala. 5 Satshavbo esi va girago vo gireya gu wonwa khu vathu, kholu va di gu gudzisa sikaxana* va nga ba va ambala siwomboni ni mawogoni gasi gu dzi vhikheya ga silo nya guvivbe, va bwe va laphisa matshakafula nya sombo sawe. 6 Avo va gu gola gu khala malangani nya lisima omu nya dzifesta, ni gu khaleya dzikadera nya gupheye dzisinagogani 7 ni gu loswa omu gu tadego vathu,* ni gu ranwa gu pwani Rabi.* 8 Ganiolu, enu mu nga ranwi pwani Rabi, kholu Muhevbudzi wanu moyo basi nigu enu mu va na ndriye ni ndriye. 9 Ni gu gambe, mu nga rani muthu omu mafuni gu khenu papayi, kholu Papayi wanu Moyo basi, oyu a gomogo ndzadzini. 10 Ni gu gambe, mu nga ranwi gu pwani vathangeyi, kholu Muthangeyi wanu moyo basi, a gu Kristo. 11 Ganiolu, oyu a gu khongolo gwanu yede gu khala githumi gyanu. 12 Oyu a dzi khusedzago a na vegwa vbavbatshi, oyu a dzi vegago vbavbatshi a na khusedzwa.

13 “Libango gwanu, valovi ni Vafarisi, vapfhadzedzeyi nenu! Kholu mwa gu segeya vathu Mufumo wa ndzadzini; enu kha mu beyi nigu kha mu digi va beya ava va dzinago. 14 *——

15 “Libango gwanu, valovi ni Vafarisi, vapfhadzedzeyi nenu! Kholu mwa gu gimbiya-gimbiya linene ni mafuni na mu vbweta muthu nya gu mu vbindrugedze. Mwa gu mu kodza, mwa gu mu gira a yedwa khu Gehena* guvili gu vbindra enu.

16 “Libango gwanu, vathangeyi nenu nya sikhumu, mu gu khenu: ‘Muthu a gu sambanya khu tempele, khandri gigaradzo; ganiolu, a gu sambanya khu oru yi gomogo omu nya tempele, a ngu gurumedzega gu tadzisa gisambanyo gyaye.’ 17 Sipumbu nenu nya gupate ni wukhumu! Ginani gi gu gikhongolo? I oru mwendro tempele yi agisago oru? 18 Ni gu gambe, mwari khenu: ‘Muthu a gu sambanya khu alitari, gu mwalo gigaradzo; ganiolu, muthu a gu sambanya khu ningelo wu gomogo avba nya alitari, a ngu gurumedzega gu tadzisa gisambanyo gyaye.’ 19 Sikhumu nenu! Gasi ginani gi gu gikhongolo? Ningelo mwendro alitari yi agisago ningelo? 20 Khu kharato, uye a sambanyago khu alitari, a gu sambanya khiyo ni satshavbo si gomogo vbatshani gwayo. 21 Oyu a sambanyago khu tempele a gu sambanya khiyo gumogo ni Oyu a vbanyago gwayo; 22 nigu oyu a sambanyago khu ndzadzini, a gu sambanya khu gikhalo nya wufumu gya Nungungulu ni Oyu a khadego gwagyo.

23 “Libango gwanu, valovi ni Vafarisi, vapfhadzedzeyi nenu! Kholu mwa gu ningeya gipandre nya wu 10 nya ortela, ni endro ni kominyo,* ganiolu mu si theyi kota khu silo nya lisima ngudzu nya Nayo, a gu: Gululama, wuhindzi ni gutumbega. Esi silo si nga ba si yede gu girwa ganiolu nya mba diga simbe. 24 Vathangeyi nenu nya sikhumu, mu hutago tshuna, ganiolu mu midza kamelo!

25 “Libango gwanu, valovi ni Vafarisi, vapfhadzedzeyi nenu! Kholu mwa gu handza kopo ni parato khu vbavbandze, ganiolu ndrani gakone gu tade khu wudogodogo* ni gu gira silo khu guvbindrisa. 26 Mufarisi wewe nya gikhumu, pheya khu gu handza ndrani nya kopo ni parato, gasi gu vbavbandze nugo gu aga.

27 “Libango gwanu, valovi ni Vafarisi, vapfhadzedzeyi nenu! Kholu mwa gu fana ni marowo ma pitaridwego, ma wonegago na ma mburide khu vbavbandze, ganiolu khu ndrani na ma tade khu sirambo nya vathu nya gufe ni mafumbo yatshavbo nya silo nya gu nyenyeze. 28 Khu ndziya nya gufane, vbavbandze mwa gu wonega na mu lulamide ga vathu, ganiolu khu ndrani mu tade khu wukanganyisi ni satshavbo si gu mba yelana ni nayo.

29 “Libango gwanu, valovi ni Vafarisi, vapfhadzedzeyi nenu! Kholu mwa gu vbaheya marowo vaprofeti, mu mburiseya marowo ya va nyo lulama, 30 mu bwe khenu: ‘Nari khatshi hi di vbanyide matshigoni ya va kokwe vathu na ha sa hengeya navo gu vbaladza novba nya vaprofeti.’ 31 Khu kharato, mwa gu dzi yeyedza mwabune gu khenu mu sanana sa vale va vbaladzidego novba wa vaprofeti. 32 Khu kharato, vbedzisani thumo wu phedwego khu vakokwe vanu.

33 “Dzinyoga nenu! Sanana nya dzinyoga! Mu na vbuluga kharini gu lamudwa ni gu rinywa Gehena?* 34 Khu kharato, Nyi ngu mi rumeleya vaprofeti, ni va nya guti ni vahevbudzi. Vambe mu na va songa, mu va khokhotheya misimboni. Vambe mu na va kwamula dzisinagogani gwanu, mu va tshanisa khu lidhoropa ni lidhoropa, 35 gasi gu novba watshavbo wa va nya gululama wu vbalagidego mafuni wuta vbatshani gwanu: Gukhugeya ga novba wa muthu nyo lulame Abheli, kala ga novba wa Zakariya gyanana gya Bharakiya, mu nga gi songago vbakari nya tempele ni alitari. 36 Khu lisine, nyi ngu mi embeyani gu kheni: Satshavbo sesi si na girega ga gitugulwana gegi.

37 “Jerusalema, Jerusalema, u songago vaprofeti ni gu pfara khu siwindri ava va rumedwego gwago . . . gungani nyi nga zama gu wungedzeya sanana sago nga edzi khugu yi wungedzeyago khidzo sikhugwana sayo vbavbatshi nya mambapi! Ganiolu enu kha mwa dzumeya. 38 Olu ndranga yanu yi na tshala na yiri marumbi. 39 Kholu nyi ngu mi embeya gu kheni: Gukhugeya olu kha mu na nga nyi wonani gambe kala mu ganeya gu khenu: ‘Kategide wule a tago khu lina la Jehovha!’”

24 Tepo Jesu a nga ba a duga khomu nya tempele, vapizane vaye va di mu hidzimeleya gasi gu mu yeyedza tempele yatshavbo. 2 Uye a di va hakha, khuye: “Mu ngu si wona satshavbo sesi? Khu lisine nyi ngu mi embeya, kheni: Kha gu na nga tshala giwindri vbatshani nya gimbe giwindri; satshavbo si na khungumudwa.”

3 Na khade Gigomoni nya Miolivha, vapizane vaye va di mu hidzimeleya na vari vonga, va ya mu wudzisa, khavo: “Nga hi embeya: Lini si na giregago silo sesi nigu giwoniso muni gi na yeyedzago guta gwago ni gu hegisa nya litigo* leli?”

4 Jesu a di va hamula, khuye: “Dzi woneyeni gasi mu si pengiswi khu muthu, 5 kholu nya vangi va nata khu lina langu va ta khavo: ‘Eni kheni Kristo,’ va pengisa nya vangi. 6 Mu napwa na gu ganedwa khu dzinyimbi, ni mahungu nya dzinyimbi. Mu nga thurugi, kholu silo sesi si yede gu girega, ganiolu khandri mahegiso.

7 “Kholu litigo li na wugeya litigo, mufumo wu wugeya mufumo. Gu na manega dzindzala, ni sirevareva malangani nyo hambane-hambane. 8 Satshavbo sesi gupheya nya dzitshanisa.

9 “Vathu va na mi tshanisani, va mi songa; nigu mu na nyenywa khu mayigo yatshavbo khu kotani nya lina langu. 10 Nya vangi va na vbeledwa khu gukhodwa, va ningeyana va bwe va vengana. 11 Gu na tumbunuga vaprofeti nya vangi nya malipha, va pengisa vathu nya vangi. 12 Lihaladzo nya vathu nya vangi li na dzidziya khu kotani nya guengedzeye nya wuvivbi. 13 Ganiolu, uye a na timiseyago kala mahegiso, a na vbulugiswa. 14 Mahungu yaya nya yadi nya Mufumo ma na tshumayedwa mafuni gwatshavbo, gasi ma khala wufakazi ga mayigo yatshavbo, khavbo gu na tago guhegisa.

15 “Khu kharato, mwa gu wona gilo nya gu nyenyeze gi ghoheteyago silo satshavbo na gi emide wulangani nya gu age, kha nga edzi gu khumbugidwego khidzo khu muprofeti Dhaniyeli (muleri a na zame gu si pwisisa,) 16 ava va gomogo Judheya va na tutume va hongola sigomoni. 17 Uye a na gu bani a romo vbatshani nya nyumba, a nga tshigi gasi gu ta dzega esi si gomogo nyumbani gwaye, 18 uye a na gu ba ari thembweni, a nga bweleyi gasi gu ya dzega ngandzu yaye. 19 Va tshanisekide vanyamayi va na ta manwago khu matshigu yoyo na vari ni dzimimba, ni avo va na ta manwago na va gu mamisa! 20 Simamani gu gombeleya gu khenu matshigu yoyo nya gu tutume ma si kotsani ni nango nya girame mwendro litshigu nya Sabhadho; 21 kholu yi na manega tshanisa nya yikhongolo nya gu gima yi si manegi, gukhugeya guvangwani nya litigo kala olu, nigu gima kha yi na nga manega gambe. 22 Khu lisine, nari khatshi matshigu yoyo kha ma rodziswa, mwalo a nga hadzi vbuluga. Ganiolu, khu kotani nya ava va hathidwego, matshigu yoyo ma na rodziswa.

23 “A gu tshuka muthoyo, khuye: ‘Oyu avba Kristo!’ mwendro, khuye: ‘Wule!’ mu nga khodwi. 24 Kholu gu na dugeleya Vakristo nya malipha ni vaprofeti nya malipha; nigu va na gira siwoniso nya sikhongolo ni silewugiso gasi gu pengisa ambari ava va hathidwego sa gu kodzega. 25 Nya gu mi gengedza na si nga si giregi. 26 Khu kharato, vathu va gu khavo: ‘Womo giwulani,’ mu nga dugi. Va gu khavo: ‘Womo nyumbani,’ mu nga khodwi. 27 Kholu kha nga gulasa gu dugago khu khuga-dambo, gu wenga kala pfola-dambo, si na girega kharato gasi gu yeyedza gu khiso Gyanana nya muthu gyomo vbakari gwanu. 28 Avbo gu na ba guri ni girumbi, makoti* ma na hengeledzana avbo.

29 “Hwanenyana nya tshanisa ya matshigoni yoyo, lidambo li na sivbala, ngima nuwo kha wu na nga wenengedza; dzinyeledzi dzi na thega khu ndzadzini; dzitshivba dza ndzadzini dzi na kutsungwa. 30 Hwane nya isoso, gu na wonega giwoniso nya Gyanana nya muthu ndzadzini, nigu vathu nya mafumbo yatshavbo ya mafuni va na dzi veteleya dzikhana khu gu garadzega. Va na wona Gyanana nya muthu na gita khu mapfhini ya ndzadzini ni tshivba ni wudhumo nya wukhongolo. 31 Gi na womba pundru wu dzuma ngudzu, gi ruma dzingilozi dzaye gasi dzi tshanganisa sihathwa saye sa dzikhonani dzatshavbo nya mafu,* gukhugeya khu maphelo kala mahegiso nya ndzadzi.

32 “Hevbulani khu gipimaniso gegi nya nguyu: Tepo sitamwana si pheyago gu thunga mahagani nya maphya, mu ngu dziti gu khenu nango nya guvbise yomo vbafuvbi. 33 Khu gufana, mwa gu wona satshavbo sesi, dzitini gu khenu Gyanana nya muthu gyomo vbafuvbi; gyomo vbamwanya. 34 Khu lisine nyi ngu mi embeya gu kheni: Gitugulwana gegi kha gi na nga vbindra silo sesi satshavbo na si nga si giregi. 35 Ndzadzi ni mafu si na vbindra, ganiolu malito yangu kha ma na nga vbindra.

36 “Maningano ni litshigu lolo ni ora, mwalo a sitigo, ne dzingilozi dza ndzadzini, ne Gyanana, ganiolu sa gu tidwa khu Papayi enga. 37 Gufana ni esi si giregidego matshigoni ya Nowa, si na girega gambe kharato tepo gi na tago Gyanana nya muthu. 38 Kholu gufana ni esi si nga ba si girega matshigoni yale na yi nga si vbohi Ndrambi, vathu va di gu hodza ni gu seya, vama va di gu dzega nigu vanyamayi va di gu dzegwa, kala litshigu Nowa a nga beya litaroni;* 39 kha va theya kota khiso, kala va nga ta vbiyedwa vatshavbo khu ndrambi. Si na girega nugu kharato tepo Gyanana nya muthu gi na tago. 40 Vama vavili va na ba va romo thembweni: Moyo a na dzegwa, mumbe a tshidwa. 41 Vanyamayi vavili va nata manwa na vari gitshindrotunu na va tshindra: A na dzegwa moyo, mumbe a tshidwa. 42 Khu kharato, khalani na mu virede, kholu kha mu liti litshigu yi na tago khilo Pfhumu yanu.

43 “Ganiolu, dzitini gu khenu: Nari khatshi mune ndranga a ngu yiti ora yi na tago khiyo mbafa vbawutshigutunu, a di hadzi khala na dongide gasi nyumba yaye yi si pandrwi. 44 Khu kharato, khalani na mi dongide, kholu Gyanana nya muthu gi nata khu ora eyi mu gu mba yi vireya.

45 “Khu mani gwadi-gwadi githumi nya gutumbege ni nya gugengeye, egi mune wagyo a gi ningidego thumo nya gu ninge guhodza sithumi sayo khu tepo yakona? 46 Gi kategide githumi gyogyo pfhumu yagyo ya gu wuya yi ta gi mana na gi gira isoso! 47 Khu lisine nyi ngu mi embeya, kheni: Uye a na gi ninga thumo nya gu woneleye satshavbo a gu naso.

48 “Ganiolu, githumi gyogyo nya guvivbe gya gu tshuka gi ganeya monyoni gwagyo, khigyo: ‘Pfhumu yangu yi ngu hweya,’ 49 gi pheya gu veta sithumi-kwawe, gi hodza ni gu seya ni sidhakwa,* 50 pfhumu nya githumi gyogyo yi nata khu litshigu gi gu mba li vireya ni ora gi gu mba yiti, 51 iyo yi nata gi tsayisa khu tshivba, yi gi rinya wulanga wawumowo ni vapfhadzedzeyi. Khiyo gi na guya liya ni gu khukhuruseya magwaha.

25 “Mufumo wa ndzadzini wu nga fananiswa ni 10 sagadzyana* si nga dzega dzikandriya dzaso, si khuga si khinga noyivhu. 2 Livbandre nya iso si diri sipumbu, esi simbe nya livbandre si di gu gengede. 3 Esi nya sipumbu si di dzega dzikandriya ganiolu si si dzegi mafura, 4 ganiolu esi nya gu gengeye si di dzega dzikandriya ni mafura omu nya maboteri. 5 Kha nga olu noyivhu yi nga ba yi hweya, vatshavbo va di pheya gu woteya va lala. 6 Ni vbakari nya wutshigu gu di pwala lito nyo khugege na li gu khilo: ‘Noyivhu eyi avba! Dugani mu yi khinga.’ 7 Khavbovbo, sagadzyana satshavbo si di wuga si dongiseya dzikandriya dzaso. 8 Sile nya sipumbu si di embeya esi nyo gengeye, khiso: ‘Hi vbunguleyeni mafura madugwana, kholu dzikandriya dzathu dzomo vbafuvbi ni gu tshimega.’ 9 Esi nya gu gengeye si di hlamula, khiso: ‘Ahihi, kholu ma nga hi keneleya hatshavbo. Tshukwana mu ya vbweta ava va rengisago mafura gasi mu renga yanu.’ 10 Na va hongode va ya renga mafura, noyivhu yi di tshala yi vboha. Sagadzyana si nga ba si dongide, si di beya ni noyivhu festatunu nya mutshadho, lidimba li segwa. 11 Hwane nya isoso, si di wuya sile simbe sagadzyana, si ta khiso: ‘Pfhumu, Pfhumu, hi tuleye lidimba!’ 12 Uye a di va hlamula, khuye: ‘Khu lisine, eni kha nyi miti.’

13 “Khu kharato, khalani na mu dongide, kholu kha mu liti litshigu ambari ora.

14 “Mufumo wa Nungungulu wu nga fananiswa ni muthu a vbwetago gu endra a hongola limbe litigo, ganiolu a pheya khu gu rana sithumi saye a ta si tshiyela thomba yaye. 15 Moyo a di mu ninga 5 dzitalenta,* mumbe a mu ninga dzimbili, mumbe a mu ninga mweyo; muthu ni muthu guya khu makodzelo yaye, khavbovbo a endra. 16 Wule a nga ningwa 5 dzitalenta a di dzegeya gu khuga a ya gira nogosi khu dzitsapawu dzile, a mana gambe 5 nya idzo. 17 Wule a nga ba a ningidwe dzimbili, a di mana nuye dzimbili. 18 Ganiolu, githumi gile gi nga ningwa mweyo, gi di khuga gi ya kemba liphala gi siha dzitsapawu* dza pfhumu yagyo.

19 “Hwane nya tepo nya gulaphe, pfhumu nya sithumi sile yi di wuya yi ta vbweta guti gu khiyo ginani va nga tshala va gira khu dzitsapawu dzile. 20 Oyu a nga ba a hakhide 5 dzitalenta, a di hongola ga pfhumu ni dzimbe 5 dzitalenta, a ya khuye: ‘Pfhumu, u di nyi tshiyede 5 dzitalenta; nyi tshade nyi velegisa gambe 5 dzitalenta.’ 21 Pfhumu yaye yi di mu embeya, khiyo: ‘U thumide, githumi nya gyadi, nya gutumbege! U tumbegide avba nya silo nya sidugwana, nyi na gu emisa gasi u khathaleya silo nya singi. Tsaka ni pfhumu yago.’ 22 Khu gu landreya, oyu a nga ba a hakhide dzitalenta dzimbili, a di hongola ga pfhumu yaye, a ya khuye: ‘Pfhumu, u di nyi tshiyede dzitalenta dzimbili; nyi tshade nyi velegisa dzitalenta dzimbili.’ 23 Pfhumu yi di mu embeya, khiyo: ‘U thumide, githumi nya gyadi, nya gutumbege! U tumbegide avba nya silo nya sidugwana, nyi na gu emisa gasi u khathaleya silo nya singi. Tsaka ni pfhumu yago.’

24 “Khu gu hegisa, githumi gi nga ba gi hakhide talenta mweyo, gi dita ga pfhumu yagyo, gi ta khigyo: ‘Pfhumu, nyi di gu dziti gu kheni uwe u muthu nya gugaradze, u vbwerago omu u nga mba yala, u wungedzeya dzimbewu u nga mba dzi thumeya. 25 Khu kharato, nyi di thava, nyi siha talenta yago mafuni. Khu yi woni eyi, dzega esi si gu sago.’ 26 Pfhumu yi di mu hakha, khiyo: ‘Githumi wewe nyo vivbedwe khu monyo ni wugara. Gasi u di gu dziti gukhuwe nyi ngu vbwera omu nyi nga mba yala, nyi bwe nyi hengeledza dzimbewu nyi nga mba dzi thumeya? 27 Ina ka, na wu vegide dzitsapawu* dzangu bhanku, gasi nya gu wuya nyi ta dzi mana ni dzijuro.*

28 “‘Khu kharato, mu dzegeyeni talenta yile a gu nayo mu ninga wule a gu ni 10 dzitalenta. 29 Kholu ni wevbini wule a gu naso, a na ningwa simbe, si khala nya singi. Ganiolu, wule a gu mwalo naso, ni esi a gu naso a na dzegedwa. 30 Rinyani vbavbandze, gidemani githumi gegi nya gu mba phasa gilo. Khiyo gi na gu ya liya ni gu khukhuruseya magwaha.’

31 “Tepo Gyanana nya muthu gi na tago khu wudhumo wagyo ni dzingilozi dzatshavbo, gi na khala vbagikhalotunu gyaye nya wufumu. 32 Mayigo yatshavbo ma na tshanganiswa mbeli gwaye. A na hambanisa vathu khu mitsawa mivili, nga khatshi muhavisi a hambanisago dzinvuta ga dziphongo. 33 A na vega dzinvuta khu nyamudye gwaye, ganiolu dziphongo a dzi vega khu nyambade gwaye.

34 “Khavbovbo, Pfhumu yi na embeya ava va gomogo khu nyamudye gwaye, khiyo: ‘Deluni enu mu nga kategiswa khu Papayi wangu, hodzani thomba nya Mufumo mu dongiseledwego gukhugeya guvangwani nya litigo. 35 Kholu nyi diri ni ndzala, mu nyi ninga gilo nya gu hodze. Nyi diri ni lidora, mu nyi ninga mati nya gu seye. Mu di si nyiti, ambari ulolo mu nyi hakhide dzindrangani gwanu. 36 Nyi diri mwalo gilo nya gu ambale, ganiolu mu nyi ambagiside. Nyi di gu dwala, ganiolu mu nyi sayiside. Nyi diri pasoni, ganiolu mu nyi holede.’ 37 Khavbovbo, va nyo lulama va na mu hakha, khavo: ‘Pfhumu, lini hi nga gu wona ni ndzala, hi gu ninga gilo nya gu hodze, mwendro ni lidora hi gu ninga gilo nya gu seye? 38 Lini hi nga ba hi si guti, ganiolu hi gu hakha dzindrangani gwathu, mwendro na wuri mwalo gilo nya gu ambale, ganiolu hi gu ambagisa? 39 Lini hi nga gu wona na wu dwala mwendro na wuri pasoni, hi ta gu wuseya?’ 40 Pfhumu yi na va hlamula, khiyo: ‘Khu lisine nyi ngu mi embeyani, kheni: Esi mi nga gireya moyo nya vandriyangu vava nya vadugwana, mu nyi girede neni.’

41 “Khavbovbo, a na embeya ava va gomogo nyambade gwaye, khuye: ‘Khugani khavba enu mu konedwego gu rinywa niloni nya gupindruge wu dongisedwego Dhiyabhulosi ni dzingilozi dzaye. 42 Kholu nyi di gupwa ndzala, ganiolu kha mwa nyi ninga gilo nya gu hodze. Nyi di gupwa lidora, ganiolu kha mwa nyi ninga gilo nyo seye. 43 Mu di si nyiti, ganiolu kha mwa nyi hakha dzindrangani gwanu. Nyi diri mwalo gilo nyo ambale, ganiolu kha mwa nyi ambagisa. Nyi di gu dwala nigu nyi diri pasoni, ganiolu kha mwa nyi wuseya.’ 44 Anavo va na hakha, khavo: ‘Pfhumu, lini hi nga gu wona na wuri ni ndzala, mwendro na wuri ni lidora, mwendro na hi si guti, mwendro na wuri mwalo gilo nya gu ambale, mwendro na wu dwala, mwendro na wuri pasoni, hi si gu phasi?’ 45 Pfhumu yi na va hlamula, khiyo: ‘Khu lisine nyi ngu mi embeyani, kheni: Esi mu nga mba gireya moyo nya vandriyangu vava nya vadugwana, kha mwa nyi gireya neni.’ 46 Ava va na hongola gu mbembiswani nya gupindruge, ganiolu va nya gululama va na hongola guvbanyani nya gupindruge.”

26 Khavbovbo, tepo Jesu a nga vbedza gu ganeya silo satshavbo sesi, a di embeya vapizane vaye, khuye: 2 “Mu ngu dziti gu khenu gu tshade matshigu mavili gasi gu gira Phasika, khu kharato Gyanana nya muthu gi na ningedwa gasi gi songwa avba nya simbo.”

3 Vaprista nya vakhongolo ni madhota va di tshangana ndrangani ga muprista nya khongolo ngudzu* a nga ba a ranwa gu pwani khu Khayifasi, 4 va luga mano nya gu mole Jesu va mu songa. 5 Ganiolu va di gu khavo: “Hi nga mu moli festatunu gasi hi si wusi ligwaha vbakari nya vathu.”

6 Tepo Jesu a nga ba a romo Bhetaniya, ndrangani ga Simoni, oyu nya sokono, 7 a di hidzimeledwa khu nyamayi a nga ba ari ni liboteri nya alabhastru li nga ba liri ni mafura nyo nungeye, nyo dhure. Tepo Jesu a nga ba a hodza, nyamayi wule a dita mu theya mafura yale hungoni gwaye. 8 Tepo vapizane va nga wona isoso va di goroga ngudzu, khavo: “Khu ginani a haganiseyago mafura yale? 9 Kholu mafura yale na ma rengisidwe khu dzitsapawu nya dzingi dzi ningedwa sisiwana.” 10 Tepo Jesu a ngati isoso, a di va embeya, khuye: “Khu ginani mu garadzago nyamayi yoyu? Uye nyi girede silo nya sadi ngudzu. 11 Kholu sisiwana mu naso tepo yatshavbo, ganiolu khandri tepo yatshavbo mu na gu ba muri ni eni. 12 Nyamayi yoyu a di theya mafura nyo nungeye givilini gyangu gasi gu dongiseya gudzingwa gwangu. 13 Khu lisine nyi ngu mi embeya, kheni: Ni hayini gu na tshumayedwago mahungu nya yadi mafuni gwatshavbo, esi nyamayi yoyu a giridego si na ganedwa gasi gu mu dundruga.”

14 Khavbovbo, moyo nya vale nya 12 a nga ba a ranwa pwani khu Judha Sikariyoti, a di hongola ga vaprista nya vakhongolo, 15 a ya khuye: “Ginani mu na nyi ningago nya gu mu ningeya gwanu?” Va di mu tumbisa 30 singerengere nya prata. 16 Gukhugeya avbovbo, a di pheya gu vbwetedzeya ndziya nya gu mu ningeye khiyo.

17 Khu litshigu nyo pheye nya Festa nya Dzipawu nya mba thedwa Livhirina,* vapizane va di mu hidzimeleya va ya mu wudzisa, khavo: “Wo vbweta gu khuwe hi dongiseya hayi Phasika?” 18 A di va hlamula, khuye: “Gimbiyani dhoropani ga mwama nyo khaguri mu ya mu embeya, khenu: ‘Muhevbudzi wari khuye: “Tepo yangu yomo vbafuvbi; nyi na hodza Phasika ni vapizane vangu gaya gwago.”’” 19 Khu kharato, vapizane va di gira idzo va nga leletedwa khidzo khu Jesu, va dongiseya Phasika.

20 Tepo li nga pfola, Jesu a di khala vbamezatunu ni vapizane vaye nya 12. 21 Tepo va nga ba va hodza a di va embeya, khuye: “Khu lisine nyi ngu mi embeya gu kheni moyo wanu a na nyi ningeya.” 22 Avo va di garadzega ngudzu khu kotani nya isoso, moyo ni moyo wawe a di mu wudzisa, khuye: “Kheni gani Pfhumu?” 23 A di hlamula, khuye: “Oyu nyi bedzago naye libogo mbiyani khuye a na nyi rengisago. 24 Khu lisine, Gyanana nya muthu gi ngu hongola kha nga si lovidwego maningano nagyo, ganiolu libango ga wule a rengisago Gyanana nya muthu. Gu diri tshukwana nari khatshi kha velegwa muthu yoyo.” 25 Judha a nga ba ari vbafuvbi ni gu mu ningeya a di wudzisa, khuye: “Ina kheni gani Rabi?” Jesu a di mu hlamula, khuye: “Khiso kamo u ganeyago.”

26 Tepo va nga ba va hodza, Jesu a di dzega pawu, hwane nya gu ba a yi kategiside a di yi piya a ninga vapizane vaye, khuye: “Dzegani mu hodza. Iyo ya gu emeya givili gyangu.” 27 A di dzega kopo nya vhinyu a bonga Nungungulu, a ninga vapizane vaye, khuye: “Seyani khiyo mwatshavbo, 28 kholu vhinyu yeyi ya gu emeya novba wangu nya pwanano wu na vbaladzwago gasi gu divaleya sighoho nya vathu nya vangi. 29 Nyi ngu mi embeya gu kheni: Kha nyi na nga seya gambe vhinyu kala litshigu nyi na seyago gambe nanu vhinyu nya yiphya Mufumoni wa Papayi wangu.” 30 Khu gu hegisa, hwane nya gu embeleye dzindzimo nya gu dhumise Nungungulu va di hongola Gigomoni nya Miolivha.

31 Jesu a di va embeya, khuye: “Wutshigu wowu mwatshavbo mu na nyi diga khu kotani nya esi si na nyi giregeyago kholu gu lovidwe gu pwani: ‘Nyi na bayisa muhavisi nigu dzinvuta dzatshavbo dzi na phalalega.’ 32 Ganiolu, hwane nya gu ba nyi wusidwe khu ga vafudego, mu na ta nyi mana Galileya.” 33 Ganiolu Pedro a di mu hakha, khuye: “Ambari vatshavbo va gu gu diga, eni gima kha nyi na nga gu diga.” 34 Jesu a di mu embeya, khuye: “Khu lisine nyi ngu gu embeya gu kheni: Wutshigu wowu, khonge na wu nga si embi, u na nyi danga guraru.” 35 Pedro a di mu embeya, khuye: “Ambari sa gu lomba gufa nago, eni gima kha nyi na nga gu danga.” Vapizane vatshavbo va di ganeya navo sasimweso.

36 Khu hwane nya isoso, Jesu a di vboha ni vapizane vaye wulanga wu ranwago pwani Getsemani, a di va embeya, khuye: “Khalani avba, nyi ngo hongola vbale nyi ya gombeya.” 37 A di dzega Pedro ni sanana sasivili sa Zebhedhewu a hongola naso. A pheya gu garadzega ngudzu. 38 A di va embeya, khuye: “Nyi ngu garadzega ngudzu* nyo bwe khatshi nyi nafa. Khalani avba mu vireya ni eni.” 39 A di hongolanyana mbeli a ya khidzima a kuha vbavbatshi khu khovbe a gombeya, khuye: “Papayi, sa gu kodzega ndreyisa kopo yeyi gwangu. Ganiolu si nga giregi guya khu gugola gwangu, ganiolu guya khu gugola gwago.”

40 A di wuya ga vapizane vaye a ta va mana na va lade a embeya Pedro, khuye: “Mu di tandrega gu dzi phara mu si lali khu ora mweyo basi? 41 Khalani na mu virede, mu gombeya tepo yatshavbo, gasi mu si thegeyi gulingwani. Khu lisine, monyo wu ngu dzina ganiolu givili* gi garade.” 42 A di hongola gambe nya wuvili a ya gombeya, khuye: “Papayi so ba si si kodzegi gu kopo yeyi yi leya nya mba yi seya, gu na girege gugola gwago.” 43 A di wuya gambe a ta va mana na va lade kholu maho yawe ma di gu lemeya khu ligovbe. 44 A di va tshiya a hongola gambe aya gombeya nya wuraru a ganeya malito yamamowo. 45 Khavbovbo, a di wuya ga vapizane vaye a ta va embeya gu khuye: “Ga tepo nya nga eyi enu mwa gu lala, mu hefemula! Ora nya gu Gyanana nya muthu gi ningedwa mandzani nya sighohi yi vbohide. 46 Khugani hi hongola! Oyu a nyi ningeyago a ngu vboha.” 47 Na ngo ganeya a di vboha Judha, moyo nya ava nya 12, nari ni gitshungu nya gikhongolo na giri ni dzispadha ni mighomba. Avo va di gu rumedwe khu vaprista nya vakhongolo ni madhota.

48 Oyu a nga mu ningeya a di gu va ningide giyeyedzo nyo khuye: “Uye nyi na mu bhejarigu, khuye kamo yoyo, mu moleni.” 49 A di dzegeya gu yela Jesu, a ya khuye: “Sewe Rabi!” A mu bhejari. 50 Ganiolu, Jesu a di mu wudzisa, khuye: “Ama sa, ginani gi gu tisago avba?” Avo va di hidzimeya va mola Jesu va hongola naye. 51 Moyo nya ava va nga ba vari ni Jesu, a di homola xipadha, a dhumeya githumi gya muprista nya khongolo ngudzu, a gi piya ndzeve. 52 Jesu a di mu embeya, khuye: “Bweledza xipadha wulangani wayo, kholu vatshavbo va thumisago xipadha va na songwa khu xipadha. 53 Mwendro wa gu pimisa gu khuwe nya gu tandrega gu lomba Papayi wangu gasi a nyi rumeleya olu kamo 12 sikwata* nya dzingilozi? 54 Nya gu gira isoso, yi di hadzi tadzisega kharini milowo yi gu khiyo silo si yede gu girega khu ndziya yeyi? 55 Jesu a di embeya gitshungu khuye: “Mwa guta ni dzispadha ni mighomba gasi gu ta nyi mola nga khatshi nyi mbafa? Tshigu ni tshigu nyi di gu khala tempeleni nyi hevbudza, ganiolu kha mwa nyi mola. 56 Satshavbo sesi si giregide gasi gu tadzisega esi si lovidwego* khu vaprofeti.” Khavbovbo, vapizane va di mu diga va tutuma.

57 Ava va ngata gasi gu ta mola Jesu, va di mu yisa ga Khayifasi, muprista nya khongolo ngudzu,* iyo gu nga ba gu tshanganide valovi ni madhota. 58 Ganiolu, Pedro a di gu landriseya khu hwindzo, kala ndrangani ga muprista nya khongolo ngudzu. Tepo a nga beya a diya khala ni sithumi gasi gu wona esi si nga hadzi girega.

59 Vaprista nya vakhongolo ni Tribhunali yatshavbo nya Yikhongolo nya Gijudha, va di gu vbwetedzeya wufakazi nya malipha gasi gu singedza Jesu, va kodza gu mu songa. 60 Ganiolu, ne mowo kha va wu mana ambari olu dzi nga ba dzi dugeleya dzifakazi nya dzingi nya malipha. Khu gu hegisa dzi di dugeleya dzimbili, 61 khidzo: “Oyu mwama a di gu khuye: ‘Eni nyi nga si kodza gu khungumula tempele ya Nungungulu nyi bwe nyi yi vbahedza khu matshigu mararu.’” 62 Tepo muprista nya khongolo ngudzu a ngapwa isoso, a di khuga a ema a mu wudzisa gu khuye: “Kha wu hakhi gilo? U ngu khuwe ginani khesi vama vava va ganeyago khuwe?” 63 Ganiolu, Jesu a di simama gu degula. Khu kharato, muprista nya khongolo ngudzu a di khuye: “Nyi ngu gu sambanyisa khu Nungungulu a vbanyago gu kheni u hi embeya gu khuwe uwe khuwe Kristo Gyanana gya Nungungulu gani!” 64 Jesu a di mu hakha, khuye: “Khiso u ganeyago. Khu kharato, nyi ngu mi embeyani gu kheni: Gukhugeya olu mu na wona Gyanana nya muthu na gi khade nyamudye ga Oyu nya tshivba na gi guta khu mapfhini ya ndzadzini.” 65 Khavbovbo, muprista nya khongolo ngudzu a pferula ngandzu yaye, khuye: “A valetede! Hi nga gu vbweteya gambe ginani dzifakazi? Mu mu pwide na valeteya. 66 Mwari khenu ginani?” Avo va di hakha, khavo: “A na songwe!” 67 Va di mu hetsheya khovbeni, va mu veta sibhakeya, vambe va mu veta dzipama 68 na va gu khavo: “Nga hi profeteya Kristo, khu mani a nga gu veta?”

69 Pedro a di gu khade khu vbavbandze, khavbovbo githumi gimwegyo nya nyamayi gi mu hidzimeleya gi ya khigyo: “Uwe nuwe u diri ni Jesu Mugalilewu! 70 Ganiolu, uye a di mu danga mahoni ga vatshavbo, khuye: “Kha nyi siti esi u ganeyago khiso.” 71 Tepo a nga khuga a hongola vbamwanya nya ndranga, a di wonwa khu gimbe gyagadzyana, gi embeya ava va nga ba va romo avbovbo, khigyo: “Mwama yoyu nuye a diri ni Jesu Munazarenu.” 72 A di danga gambe, a sambanya, khuye: “Kha nyi muti mwama yoyo!” 73 Hwane nya isoso, ava va nga ba va emide vbale va di hidzimeleya Pedro, va ya khavo: “Khu lisine anuwe u moyo wawe kholu maganelelo yago ma ngu gu thuledza.” 74 Khavbovbo a di bomba khu lito nyo khugege* na gu sambanya, khuye: “Eni kha nyi muti mwama yoyo!” Khu gitepwana gyogyo, khonge wu di emba. 75 Pedro a di dundruga esi Jesu a nga ba a ganede nyo khuye: “Khonge na wu nga si embi u na nyi danga guraru.” Khavbovbo, a di duga vbavbandze a ya liya na vbisegide ngudzu.

27 Tepo gu ngagya, vaprista vatshavbo nya vakhongolo ni madhota va di tshangana gasi gu hunga gu khavo va na songa kharini Jesu. 2 Hwane nya gu ba va mu hungide, va di hongola naye va ya mu ningeya ga ghovhernadhori Pilato.

3 Tepo Judha, oyu a nga ningeya Jesu, a nga wona gu khuye gu hungidwe gu pwani Jesu a na songwe, a di vetwa khu livhalo a bweledza 30 singerengere sile ga vaprista nya vakhongolo ni madhota, 4 khuye: “Nyi ghohide khu gu rengisa novba wu gu mwalo nandru.” Avo va di mu hakha, khavo: “Ha gu beya hayini ethu avba nya isoso? Khyago isoso!” 5 Khavbovbo, a di rinya singerengere sile nya prata omu nya tempele a duga. Khu gu landreya a hongola a ya tshwedza. 6 Ganiolu, vaprista nya vakhongolo va di roleya singerengere sile nya prata, khavo: “Kha si dzumedziswi gu theya dzitsapawu dzedzi omu gu khalago dzitsapawu tempeleni, kholu dzitsapawu nya novba.” 7 Hwane nya gu ba va bhude, va di dzega dzitsapawu dzile va ya renga gipeto* gasi gu dzingeya umo vathu va gu siri va mule. 8 Khu kharato, lithembwe lile la gu ranwa pwani Lithembwe nya Novba kala muhuno. 9 Khu kharato, gu di tadzisega malito ya muprofeti Jeremiya a nga khuye: “Va di dzega 30 singerengere nya prata, a gu tengo wu nga ba wu rengiswa khuwo muthu oyu simbe nya sanana sa na Israyeli si nga ghema gu mu rengisa khuwo, 10 va renga lithembwe la muwumbi guya khedzi Jehovha a nga nyi ruma khidzo.”

11 Jesu na emide mbeli ga ghovhernadhori, ghovhernadhori a di mu wudzisa, khuye: “Uwe u Pfhumu nya Vajudha?” Jesu a di mu hlamula, khuye: “Khiso u ganeyago.” 12 Ganiolu, tepo a nga ba a singedzwa khu vaprista nya vakhongolo ni madhota, uye kha hakha gilo. 13 Khavbovbo Pilato a di mu wudzisa, khuye: “Kha wu sipwi esi va gu singedzago?” 14 Ganiolu, uye kha hlamula ne lito limwedo, khu kharato ghovhernadhori a di hlamala ngudzu.

15 Ga festa ni festa nya Phasika, ghovhernadhori a diri ni giolovedzo nya gu tshule gibotshwa gimwegyo egi gi hathidwego khu gitshungu. 16 Gu diri ni gibotshwa gi nga ba gi khothedwe nyo pwani khu Bharabhasi, gi nga ba giri gighevenga nyo tidwe ngudzu. 17 Tepo va nga ba va tshanganide, Pilato a di wudzisa, khuye: “Khu wevbini mu vbwetago gu khenu nyi mu tshula? Khu Bharabhasi mwendro Jesu a ranwago Kristo?” 18 Kholu Pilato a di gu dziti gu khuye va di mu ningeya khu kotani nya lidiwo. 19 Vbavbandze nya isoso, tepo a nga ba a khade avba nya gikhalo nya wulamuli, mwangadzi waye a di rumeya mwangu nyo khuye: “U nga mu giri gilo mwama yoyo nyo lulame kholu muhuno nyi tshanisekide ngudzu omu nya ndroro khu kotani yaye.” 20 Ganiolu, vaprista nya vakhongolo ni madhota va di kutsedzeya gitshungu gasi gi lomba gu khigyo gu tshudwa Bharabhasi, ganiolu Jesu a songwa. 21 Khavbovbo, ghovhernadhori a di wudzisa gu khuye: “Khu wevbini ga ava vavavili mu vbwetago gu khenu nyi mu tshula?” Avo va di khavo: “Tshula Bharabhasi!” 22 Pilato a di va wudzisa, khuye: “Mo vbweta gu khenu nyi rini khu Jesu, a ranwago pwani khu Kristo?” Vatshavbo va di hakha, khavo: “A na khokhotedwe vbasimbotunu!”* 23 Uye a di khuye: “Khu ginani? Ginani a nga ghoha?” Avo va di kwanguluga ngudzu, khavo: “A na khokhotedwe vbasimbotunu!”

24 Tepo Pilato a nga wona gu khuye tandregide nigu sa gu wusa ligwaha basi, a di dzega mati a hamba mandza na gu wonwa khu gitshungu, khuye: “Eni nyi mwalo nandru nya novba wa mwama yoyu. Isoso khyanu.” 25 Gitshungu gyatshavbo gi di hlamula, khigyo: “Novba waye wu na thegeye ethu gumogo ni sanana sathu.” 26 Khavbovbo, a di va tshuleya Bharabhasi ganiolu a ruma gu khuye Jesu a na kwamudwe a bwe a songwa vbasimbotunu.

27 Khavbovbo, masotshwa ya ghovhernadhori ma di dzega Jesu, ma hongola naye gaya ga ghovhernadhori, ma ya tshanganisa masotshwa yatshavbo ma mu randreya. 28 Hwane nya gu ba va mu tshude sombo, va di mu fenengedza khu mwendra nyo fuviye. 29 Va di luga korowa khu miba va mu handzega hungoni, va mu pharisa tshava khu libogo laye la nyamudye, va mu khidzimeya va mu poyila, khavo: “Sewe, Pfhumu nya Vajudha!” 30 Khavbovbo va mu hetsheya, va dzega tshava va mu veta khiyo hungoni. 31 Khu guhegisa, hwane nya gu ba va vbedzide gu hagana khuye, va di mu tshula mwendra va mu ambagisa gambe sombo saye, khavbovbo va mu dzega gasi a ya khokhotedwa vbasimbotunu.

32 Tepo va nga ba va duga va di mana mwama wa Sirene, nyo pwani khu Simoni, va mu gurumedza gu rwala simbo nya tshanisa.* 33 Tepo va nga vboha wulanga wu ranwago gu pwani Goligota, si thulago: Wulanga nya Girwarwa,* 34 va di mu ninga vhinyu nyo patwe ni silo nya gu vave, ganiolu tepo a nga linga a di bomba gu seya. 35 Hwane nya gu ba va mu khokhotede avba nya simbo, va di kabana sombo saye khu gu thumisa dzisolo. 36 Va bwe va khala vbale va mu ghadha. 37 Nigu va di handzega vbatshani nya hungo waye milowo nya nandru va nga ba va mu singedza, yi nga ba yi khiyo: “Oyu khu Jesu, Pfhumu nya Vajudha.”

38 Gu diri ni dzimbafa dzimbili dzi nga ba dzi khokhotedwe naye, mweyo khu nyamudye gwaye yimbe khu nyambade gwaye. 39 Ava va nga ba va vbindra khu vbale va di gu mu vala na va gu kutsunga mihungo, 40 na va gu khavo: “Uwe u nga ba u vbweta gu tshungunula tempele u bwe u yi vbaha khu matshigu mararu, dzi vbulugise! Wa gu ba uri gyanana gya Nungungulu, tshiga khu vbasimbotunu nya tshanisa!” 41 Khu gufana, vaprista nya vakhongolo ni valovi gumogo ni madhota, va di pheya navo gu mu poyileya, khavo: 42 “Uye vbulugiside vambe, ganiolu kha kodzi gu dzi vbulugisa abune! Uye Pfhumu ya Israyeli, a na tshige kamo olu khu vbasimbotunu nya tshanisa,* hi na khodwa gwaye. 43 A di gu tumba Nungungulu; a na vbulugiswe khuye olu a gu ba a mu tsakeya, kholu a di khuye: ‘Eni nyi Gyanana gya Nungungulu.’” 44 Ambari dzimbafa dzi nga ba dzi khokhotedwe dzibambe gwaye, dzi di mu vala nidzo.

45 Gukhugeya dzi 12* ora kala dzi 15* ora gu di khala gidema tigoni mule gwatshavbo. 46 Omu nya dzi 15 ora,* Jesu a di khusedza lito, khuye: “Eli, Eli, lama sabhaktani?” Si thulago gu khiso: “Nungungulu wangu, Nungungulu wangu, khu ginani u nga nyi diga?” 47 Tepo va ngapwa isoso, vambe va nga ba va romo vbale, va di khavo: “Mwama yoyu a gu rana Eliya.” 48 Khu gu vbiredza moyo wawe a di tutuma a ya dzega xiponja a yi nega omu nya vhinyu nyo dunge a yi tshomega avba nya tshava a mu ninga gasi a seya. 49 Ganiolu, ava vambe va di khavo: “Mu dige, ho vbweta gu wona gu khethu Eliya a nata mu vbulugisa gani!” 50 Jesu a di rana gambe khu lito nyo khugege, afa.*

51 Khavbovbo, kortina ya wulanga nyo age wa tempeleni, yi di pferuga khu vbakari ni vbakari gu khugeya vbatshani kala vbavbatshi, gu girega girevareva, siwindri si pandregeya. 52 Marowo ma di tulega nigu sirumbi nya singi sa va nya guaga va nga ba va lade gufani si di duga 53 si wonwa khu vathu nya vangi (vathu va nga duga khu marowoni hwane nya gu ba Jesu a wusidwe va di beya dhoropani nya guage). 54 Khu kharato, tepo muthangeyi nya masotshwa* ni ava a nga ba a ghadha navo Jesu va nga wona girevareva ni satshavbo si nga ba si girega, va di thava ngudzu va ganeya, khavo: “Khu lisine egi gi diri Gyanana gya Nungungulu.”

55 Gu diri ni vanyamayi nya vangi va nga ba va khedziseya na va emide khu hwindzo, avo va di gu landrisede Jesu gukhugeya Galileya gasi va mu thumeya. 56 Vbakari gwawe gu diri ni Mariya Madhalene ni Mariya mamayi wa Jakobe ni Juze ni mamayi wa sanana sa Zebhedhewu.

57 Tepo li nga pfola, gu di vboha mwama nyo ghanye, wa Arimateya nyo pwani khu Josefa a nga ba a khade nuye mupizane wa Jesu. 58 Mwama yoyu a di hidzimeleya Pilato a ya lomba girumbi gya Jesu. Pilato a di ruma gu khuye va na mu ninge. 59 Josefa a di fumbeya girumbi omu nya mwendra nya lisima nya linyu, nyo age 60 a ya gi vega omu nya lithowo laye nya liphya a nga ba a pode avba nya giwindri. A vbedza a wumbuluseya giwindri nya gikhongolo a tshika khigyo vbamwanya nya lithowo a khuga a hongola. 61 Ganiolu, Mariya Madhalene ni mumbe Mariya, va di simama vbale, va khala mbeli nya lithowo.

62 Khu mindru wakone, khu litshigu nya Sabhadho,* vaprista nya vakhongolo ni Vafarisi va di ya tshangana ga Pilato, 63 va ya khavo: “Pfhumu, ha gu dundruga gu khethu mukanganyisi wule na nga gu vbanya a di gu ganeya, khuye: ‘Hwane nya matshigu mararu nyi na wuswa khu gufani.’ 64 Khu kharato, rumisa gu khuwe lithowo li ghadhwa, gasi va siti vapizane vaye va ta muba va vbedza va embeya vathu, khavo: ‘Uye wusidwe khu ga vafudego!’ Kholu malipha yaya nyo hegise ma na ba ma vivbide ngudzu gu vbindra aya nyo pheye.” 65 Pilato a di va embeya, khuye: “Dzegani masotshwa, mu hongola mu ya ghadha lithowo khavba mu si kodzago khavbo.” 66 Khu kharato, avo va di ya vhikeya lithowo khu gu manya gwadi giwindri va bwe va vega masotshwa gasi ma ghadha.

28 Na yi vbindride Sabhadho, na gu hongola gugyani, khu litshigu nyo pheye nya semana, Mariya Madhalene ni mumbe Mariya va di hongola va ya wona lithowo.

2 Gu di giregide girevareva nya gikhongolo, kholu ngilozi ya Jehovha yi di gu tshigide khu ndzadzini yi hongola lithowotunu, yi ya wumbuluseya giwindri, yi khala vbatshani gwagyo. 3 Makhalelo yayo ma di gu fana ni gulasa; sombo sayo si di agide nga khatshi i hunguva. 4 Tepo vaghadhi va nga yi wona, va di ndrendremeya, va dzima khu gu thava.

5 Ganiolu, ngilozi yi di embeya vanyamayi vale, khiyo: “Mu nga thavi, kholu nyi ngu dziti gu kheni mwa gu vbweta Jesu oyu a songidwego vbasimbotunu. 6 Uye mwalo avba, kholu wusidwe khu ga vafudego kha nga idzo a ganedego khidzo. Deluni mu ta wona avba a nga ba a ladzisidwe avbo. 7 Vbiredzani mu ya embeya vapizane vaye, khenu: Uye wusidwe khu ga vafudego, olu womo ndziyani nya gu hongole Galileya, khiyo mu na gu ya mu wona iyo. Khiso nyi nga teya gu ta mi embeya.”

8 Khu kharato, va di dzegeya gu khuga khu vbalithowotunu, na va gu thava, ganiolu na va tsakide ngudzu; va tutuma va ya embeya satshavbo vapizane vaye. 9 Khavbovbo, Jesu a di khinga vanyamayi vale, huye khuye: “Gu gideni!” Avo va di mu hidzimeleya, va ya mu phara migondro, va mu khidzimeya. 10 Jesu a di va embeya, khuye: “Mu nga thavi! Gimbiyani mu ya embeya esi vandriyangu, gasi va hongola Galileya. Khiyo va na gu ya nyi wona iyo.”

11 Vanyamayi vale na va ngari ndziyani, vaghadhi nyo khaguri va di khuga va hongola dhoropani va ya embeya vaprista nya vakhongolo satshavbo si nga girega. 12 Hwane nya gu ba vaprista nya vakhongolo va tshanganide ni madhota gasi gu hunga gu khavo va na gira ginani, va di dzega dzitsapawu nya dzingi* va ninga masotshwa, 13 va ma embeya, khavo: “Ganeyani khenu: ‘Vapizane vaye va di ta muba ni wutshigu ethu na hi lade.’ 14 Sa gu tidwa khu ghovhernadhori, hi na mu tshamuseya mahungu yaya. Enu mu nga garadzegi.” 15 Khavbovbo, va di dzega dzitsapawu dzile, va gira esi va rumidwego. Mahungu yaya ma di phalalega ga Vajudha kala muhuno.

16 Vapizane vale nya 11 va di hongola Galileya, gigomoni egi Jesu a nga va embeya gu khuye a na ya manana iyo navo. 17 Tepo va nga mu wona, va di mu khidzimeya, ganiolu vambe va di gu kanakana. 18 Jesu a di va hidzimeleya, a va embeya, khuye: “Nyi ningidwe wufumu watshavbo ndzadzini ni mafuni. 19 Khu kharato, gimbiyani mu ya gira vapizane vathu nya mayigo yatshavbo, mu va bhabhatisa khu lina la Papayi, ni la Gyanana, ni la liphuvbo nya guage, 20 mu va hevbudza gu landrisa satshavbo nyi mi hevbudzidego. Eni nyi nanu matshigu yatshavbo kala guhegisani nya litigo.*