MAHUNGU NYA YADI GUYA KHESI SI LOVIDWEGO KHU LUKA

1 Vathu nya vangi va dzi garadzede gu lova mahungu hi ma tumbago, 2 va ma manidego ga vale va nga si wona khu maho ni gu tshumayela mahungu yoyo gukhugeya gupheyani. 3 Hwane nya gu ba nyi gevisiside gwadi mahungu yoyo gukhugeya gupheyani, nyi di hunga gu gu loveya uwe pfhumu Teyofilo, guya khedzi si nga dugeleya khidzo 4 gasi u kodza gu tiyisega gwadi khu silo u hevbudzidwego.

5 Matshigoni ya Herodhi,* pfhumu ya Judheya, gu diri ni muprista nyo pwani khu Zakariya a nga ba a gira gipandre nya tsawa nya vaprista wu nga ba wu ranwa gu pwani Abhiya. Mwangadzi waye a diri Elizabheti, a nga ba ari moyo nya sanana sa Aroni. 6 Va vavili va di lulamide mahoni ga Nungungulu nigu va di gu landrisa khu guvbeleya* milayo yaye yatshavbo ni satshavbo si nga ba si vbwetwa khu Jehovha. 7 Ganiolu, avo va diri mwalo sanana kholu Elizabheti kha nga ba a velega nigu va vavili va di gumbide.

8 Zakariya a di gu gira thumo waye nya wuprista mahoni ga Nungungulu kha nga olu yi nga ba yi vbohide tepo yi nga ba yi lumba tsawa waye. 9 Guya khu giolovedzo gi nga ba gi landrwa khu vaprista, yi di vboha tepo yaye nya gu beye tempeleni ya Jehovha gasi gu ya vbisa libani. 10 Tepo li nga ba li vbiswa libani, vathu vatshavbo va di romo vbavbandze na va gu gombeya. 11 Khavbovbo, ngilozi ya Jehovha yi di wonega gwaye na yi emide khu nyamudye nya alitari ya Nungungulu. 12 Tepo Zakariya a nga yi wona a di garadzega, a thava ngudzu. 13 Ganiolu, ngilozi yi di khiyo: “U nga thavi Zakariya, kholu milombelo yago yi pwidwe, mwangadzi wago Elizabheti a na gu velegeya gyanana; u na gi riya gu khuwe khigyo Johane. 14 U na tsaka ngudzu u bwe u nengeya nigu nya vangi va na tsaka khu guvelegwa gwagyo 15 kholu igyo gi na ba giri gikhongolo mahoni ga Jehovha, ganiolu kha gi yeli gu seya vhinyu mwendro ni wevbini wadwa wu levisago. Gi na tala khu liphuvbo nya guage gukhugeya ndrani ga mamayi wagyo. 16 Gi na wuyisa sanana nya singi sa Israyeli ga Jehovha, Nungungulu waso. 17 Nigu gi na rumedwa mbeli ga Nungungulu khu liphuvbo ni tshivba ya Eliya gasi gu gira gu myonyo ya vavelegi yi fana ni eyi ya sanana ni gu phasa va nya gu mba engisa gu gira silo khu wugengeyi ni gu gira silo nya gululame gasi gu reseya Jehovha vathu va dongidego.”

18 Zakariya a di hakha ngilozi yile, khuye: “Nyi nga si khodwa kharini isoso? Kholu eni nyi gumbide nigu mwangadzi wangu nuye gumbide.” 19 Ngilozi yi di mu hlamula, khiyo: “Eni kheni Gabriyeli nigu nyi womo mbeli ga Nungungulu. Nyi di rumedwa gasi gu ta gu embeya mahungu yaya nya yadi. 20 Ganiolu, olu u na khala gidudu kala litshigu si na giregago silo sesi, kholu khwa khodwa: esi nyi nga gu embeya, si na giregago khu tepo yakona.” 21 Khu tepo yoyo, vathu va di gu vireya Zakariya, ganiolu va di gu hlamala kholu a di gu hweya ngudzu tempeleni. 22 Tepo a nga duga, kha nga ba a kodza gu ganeya, khu kharato va di dzegeya gu tugula gu khavo wonide giwoniso tempeleni. Uye a di gu ganeya navo khu gu thumisa dzijesto kholu a di khade gidudu. 23 Tepo ma nga vbeya matshigu yaye nya wuprista tempeleni, a di bweleya gaya.

24 Hwane nya matshigu nyo khaguri, mwangadzi waye, Elizabheti, a di khura mimba. Uye kha dzi wonegisa ga vathu khu 5 migima kholu a di gu khuye: 25 “Esi khiso Jehovha a nyi gireyago matshigwanaya. Uye nyi dundrugide gasi gu nyi dusa dzitshoni vbakari nya vathu.”

26 Tepo a nga tshanganisa 6 migima, Nungungulu a di rumeya ngilozi Gabriyeli dhoropani ga Galileya gu ranwago pwani Nazareta, 27 ga nyamahegyane* nyo pwani khu Mariya, a nga ba a tumbisidwe mutshadho khu mwama nyo pwani khu Josefa, wa ndrangani ga Dhavhidhe. 28 Tepo ngilozi yi nga beya omu a nga ba a romo, yi di khiyo: “Sewe, uwe u kategisidwego ngudzu khu Nungungulu! Jehovha na ni uwe.” 29 Ganiolu, Mariya a di garadzega ngudzu khu malito yoyo, a zama gu pwisisa gu khuye ma di gu tshamuseya ginani maloselo yale. 30 Khu kharato, ngilozi yi di mu embeya, khiyo: “U nga thavi Mariya, kholu Nungungulu tsakisidwe ngudzu khuwe. 31 U na khura mimba, u velega gyanana nya gikhwathana, u na gi riya gu khuwe khigyo Jesu. 32 Uye a na ba ari khongolo nigu a na ranwa pwani Gyanana gya Oyu a Khugegidego Ngudzu nigu Jehovha Nungungulu a na mu ninga gikhalo nya wufumu gya papayi waye Dhavhidhe. 33 Uye a na fumeya ndranga ya Jakobe kala gupindruga; Mufumo waye kha wu na nga vbeya.”

34 Mariya a di wudzisa ngilozi yile, khuye: “Si na girega kharini isoso, kholu nyi si guti mwama?” 35 Ngilozi yi di mu hlamula, khiyo: “Liphuvbo nya guage li na gu tshigeya nigu tshivba ya Oyu a Khugegidego Ngudzu yi na gu fenengedza. Oyu a na velegwago a na ranwa gu pwani oyu a agidego, Gyanana gya Nungungulu. 36 Nigu dziti gu khuwe nongo wago, Elizabheti, a tidwago na si velegi, anuye a na velega gyanana muwukhosaneni gwaye. Owu ngima waye nya wu 6; 37 kholu ga Nungungulu gimwalo gi si kodzegigo.” 38 Khavbovbo, Mariya a di khuye: “Eni nyi githumi gya Jehovha! Si na girege gwangu kha nga edzi u ganedego khidzo.” Khavbovbo, ngilozi yi di khuga yi hongola.

39 Khu matshigu yoyo, Mariya a di khuga khu guvbiredza a hongola ga limwedo nya madhoropa ya Judha, gu nga ba gu khaleya sigomoni. 40 Tepo a nga vboha ndrangani ga Zakariya, a di losa Elizabheti. 41 Tepo Elizabheti a ngapwa gulosa ga Mariya, gyanana gi nga ba gi romo ndrani gwaye gi di dzi khutha-khutha,* khavbovbo a di tala khu liphuvbo nya guage. 42 Elizabheti a di khusedza lito, khuye: “U kategide vbakari nya vanyamayi nigu gi kategide gyanana u na velegago! 43 Kheni mani eni nyo kala nyi ta wusedwa khu mamayi wa Pfhumu yangu? 44 Tepo nyi ngapwa gulosa gwago, gyanana gi gu romo ndrani gwangu gi di ndraga-ndraga khu gutsaka. 45 A ngu tsaka oyu a khodwego kholu silo a nga embedwa khu Jehovha khu lisine si na tadzisega.”

46 Mariya a di khuye: “Hefemulo* wangu wu ngu dhumisa Jehovha, 47 monyo wangu wu ngu tsaka ngudzu khu kotani ya Nungungulu, Muvbulugisi wangu, 48 kholu dundrugide githumi gyaye nigu gukhugeya muhuno mimela ni mimela yi na khiyo nyi tsakide 49 kholu Oyu nya dzitshivba nyi girede silo nya sikhongolo nigu lina laye li agide, 50 nigu khu mimela ni mimela wuhindzi waye womo ga vale va mu ningago githawo. 51 Uye giride silo nya sikhongolo khu mandza yaye, a phalalegisa va nya gu dzi khusedza. 52 Tshiside dzipfhumu khu sikhaloni sawe nya wufumu a khusedza va nya gu dzi nogisa; 53 khuriside khu silo nya sadi vale va nga ba vapwa ndzala, a tutumisa vale va nga ba vari ni dzithomba va tshala nya mba na gilo. 54 Uye vbulugiside githumi gyaye, Israyeli, gasi gu yeyedza gu khuye tepo yatshavbo a ngu dundruga gitumbiso gyaye nya gu yeyedze wuhindzi 55 ga Abrahama ni gitugulwana gyaye kha nga edzi a tumbisidego khidzo vakokwe vathu.” 56 Mariya a di khala ni Elizabheti khu gipimo nya migima miraru, khu hwane nya isoso a di bweleya gaya gwaye.

57 Tepo ma nga vboha matshigu yaye nya gu velege, Elizabheti a di hefemula gyanana nya gikhwathana. 58 Tepo vavhizinyu ni valongo vaye va ngapwa gupwani Jehovha mu girede wuhindzi, va di tsaka naye. 59 Khu litshigu nya wu 8, va di ya hanisa wugwera* gyanana nigu va di gu vbweta gu gi riya lina la papayi wagyo, Zakariya. 60 Ganiolu mamayi wagyo a di khuye: “Ne! Gi na ranwa pwani khigyo Johane.” 61 Avo va di mu hakha, khavo: “U mwalo nongo a gu ni lina lolo.” 62 Va di wudzisa papayi wagyo khu dzijesto gu khavo o vbweta gu gi riya gu khuye khigyo mani? 63 A di lomba gitabwana a lova, khuye: “Khigyo Johane.” Vatshavbo va di hlamala. 64 Likana laye li di dzegeya gu tulega, lidimi laye li di tshulega a pheya gu ganeya, a dhumisa Nungungulu. 65 Vavhizinyu va di thava ngudzu, ndruma yakona yi di pwala musigomoni gwatshavbo ga Judheya. 66 Vatshavbo va nga sipwa, va di si vegedza myonyoni gwawe, khavo: “Gi na ba giri mani gyanana gegi?” Kholu Jehovha a diri nagyo.

67 Khavbovbo, Zakariya, papayi wagyo a di tala khu liphuvbo nya guage, a profeta, khuye: 68 “A na dhumiswe Jehovha Nungungulu wa Israyeli kholu dundrugide vathu vaye a va vbulugisa. 69 Uye a hi resede muvbulugisi* nya tshivba, a dugeyago khu ndrangani ga githumi gyaye Dhavhidhe, 70 kha nga edzi a nga ba a ganede khidzo khu gu thumisa vaprofeti vaye va gale, 71 gasi a hi vbulugisa ga valala vathu ni ga vatshavbo va hi nyenyago, 72 gasi gu hi yeyedza wuhindzi a tumbisidego vapapayi vathu ni gu hi dundrugisa gidzumeledzwano gyaye nya guage, 73 gisambanyo a giredego Abrahama, papayi wathu 74 nya gu hi ninge lithomo nya gu mu thumeye hwane nya gu ba a hi vbulugiside ga valala; 75 hi mu thumeya khu gutumbega ni gululama tshigu ni tshigu. 76 Ganiolu, uwe gyanana wewe u na ranwa pwani u muprofeti wa Oyu a Khugegidego Ngudzu kholu u na thanga mbeli ga Jehovha gasi gu dongiseya dzindziya dzaye, 77 gasi gu ninga vathu vaye guti nya guvbulugise khu gu divaledwa sighoho sawe 78 khu kotani nya wuhindzi nya wukhongolo wa Nungungulu wathu nigu wuhindzi wowo wa ndzadzini wu na hi wenengedza nga lidambo 79 gasi gu wenengedza ava va khadego gidemani ni ava va khadego mutsani nya lufu ni gu hi gimbidzisa ndziyani nya gurule.”

80 Gyanana gi di dandra gi bwe gi tiyiswa khu liphuvbo nya guage. Gi di simama giwulani kala litshigu gi nga dzi wonegisa ga va na Israyeli.

2 Matshigoni yale, Sezari Augusto a di ruma gu khuye vathu vatshavbo va lovedwa. 2 (Giloveya gegi nyo pheye gi giregide tepo Kirino a nga ba ari ghovhernadhori wa Siriya.) 3 Muthu ni muthu a di ya dzi lovedzisa dhoropani gwaye. 4 Kha nga giolovedzo, Josefa nuye a di khuga khu Galileya, dhoropani ga Nazareta, a hongola Judheya dhoropani ga Dhavhidhe gu ranwago gu pwani Bhetlehema, kha nga olu a nga ba ari wa ndrangani ga Dhavhidhe. 5 A di ya dzi lovedzisa ni mwangadzi waye Mariya, a nga ba ari vbafuvbi ni gu hefemula. 6 Tepo va nga ba vari iyoyo, ma di vboha matshigu yaye nya gu hefemule. 7 Mariya a di hefemula gyanana gyaye nya matewula, a gi fumbeya khu myendra, a gi ladzisa mugighowoloni kholu kha va mana kwartu nya vapfhumba gasi gu khala.

8 Vbafuvbyana mule, gu diri ni vahavisi va nga ba vari tendreyani, va ghadha dzinvuta dzawe wutshigu. 9 Khu githugedza, gu di wonega gwawe ngilozi ya Jehovha nigu wudhumo wa Jehovha wu di va wenengedza vatshavbo, va thava ngudzu. 10 Ganiolu ngilozi yi di khiyo: “Mu nga thavi! Nyo teya gu ta mi tivisa mahungu nya yadi ma na tsakisago vathu vatshavbo. 11 Muhuno, dhoropani ga Dhavhidhe, mu velegedwe muvbulugisi a gu Kristo, Pfhumu. 12 Giwonegiso mu na mu tigo khigyo khegi: Mu na mana gyanana na gi fumbedwe omu nya myendra, na gi ladzisidwe mugighowoloni.” 13 Khu githugedza, gu di wonega gumogo ni ngilozi yile libutho la ndzadzini, na li gu dhumisa Nungungulu, khilo: 14 “A na dhumiswe Nungungulu ndzadzini nigu gu na manege gurula ga avo va mu tsakisago mafuni.”

15 Tepo dzingilozi dzi nga bweleya ndzadzini, vahavisi va di ganeya, khavo: “Hongoleni Bhetlehema, hi ya wona esi si dugeledego, esi Jehovha a nga hi tivisa.” 16 Va di hongola khu guvbiredza, va ya mana Mariya ni Josefa ni gyanana, na gi ladzisidwe mugighowoloni. 17 Tepo va nga va wona, va di ganeya esi va nga embedwa maningano ni gyanana. 18 Vatshavbo va ngapwa iso si nga ganedwa khu vahavisi vale va di hlamala ngudzu, 19 ganiolu Mariya a di vegedza satshavbo a nga sipwa, a zama gu dundrugeya khu tshamuselo wakone. 20 Vahavisi va di bweleya na va gu dhumisa Nungungulu khu satshavbo va nga sipwa ni gu si wona, kholu si giregide nga edzi va nga embedwa khidzo.

21 Tepo a nga tshanganisa 8 matshigu, ma nga ba mari matshigu nya gu hanise wugwera,* va di mu riya gu khavo khuye Jesu, a gu lina a nga ridwa khu ngilozi; Mariya na si khuri mimba.

22 Nigu tepo ma nga vboha matshigu nya guagiswe gwawe khu guya khu Nayo wa Mosi, va di mu dzega va hongola naye Jerusalema gasi guya mu bikeya ga Jehovha, 23 kha nga si lovidwego nayoni ga Jehovha gupwani yatshavbo matewula nya sikhwathana ma yede gu ranwa gu pwani ma agide mahoni ga Jehovha. 24 Va di ya ningeya muphaso guya khedzi wu rumago khidzo Nayo wa Jehovha: “Matuva mavili mwendro sipombana sivili.”

25 Gu diri ni mwama moyo a nga ba a vbanya Jerusalema nyo pwani khu Simiyoni. A diri muthu nya gululame a nga ba a ninga githawo Nungungulu, a nga ba a vireya tepo eyi Nungungulu a nga hadzi phasa khiyo Israyeli nigu liphuvbo nya guage li diri naye. 26 Nigu a di wonisidwe khu liphuvbo nya guage gu pwani kha na ngafa na nga si woni Kristo wa Jehovha. 27 A di kutswa khu liphuvbo nya guage gu hongola tempeleni. Tepo vavelegi va Jesu va nga mu dzega va beya naye tempeleni gasi guya gira esi si nga ba si rumwa khu Nayo, 28 Simiyoni a di dzega gyanana a gi wugareya a dhumisa Nungungulu, khuye: 29 “Pfhumu yangu u Khugegidego, olu githumi gyago gi na hongola khu gurula, kha nga u ganedego, 30 kholu nyi wonide ndziya u na yi thumisago gasi gu vbulugisa khiyo; 31 u yi dongisedego gasi yi wonwa khu vathu vatshavbo. 32 Uye guwonegeya gu na dusago gidema gi girago mayigo ma si woni nigu uye wuzundzo nya vathu vago, va na Israyeli.” 33 Vavelegi vaye va di gu hlamala khesi vathu va nga ba va ganeya khu gyanana gyawe. 34 Simiyoni a di va kategisa, a embeya Mariya, mamayi nya gyanana, khuye: “Gyanana gegi gi na thesa ni gu wusa Vaisrayeli nya vangi nigu gi na ganedzisa 35 (ganiolu uwe u na paywa khu xipadha nya gulaphe), gasi gu wonegiswa mahingigedzo nya vathu nya vangi.”

36 Gu diri ni muprofeti nya gikhosane nyo pwani khu Ana, gyanana gya Fanuweli, wa lihundzo la Aseri. Uye tshadhide wuphyani waye, a khala basi 7 myaga ni mwama waye. 37 Uye a diri noni nigu a diri ni 84 myaga. Kha nga ba a hamugega tempeleni, a di gu thumeya Nungungulu wutshigu ni mihani na gu pfhunga* ni gu gombeya. 38 Khu tepo yile kamo a di vboha, a pheya gu bonga Nungungulu ni gu ganeya khu gyanana ga vatshavbo vale va nga ba va vireya gutshudziswa ga Jerusalema.

39 Hwane nyo landrise esi si nga ba si rumwa khu Nayo wa Jehovha, va di bweleya Galileya, dhoropani gwawe, Nazareta. 40 Gyanana gi di simama gu dandra, gi tiya, gi tala khu wugengeyi nigu Nungungulu a di gu gi kategisa.

41 Mwaga ni mwaga, vavelegi vagyo va di gu oloveya gu hongola Jerusalema khu tepo nya festa nya Phasika. 42 Tepo a nga ba ari ni 12 myaga, va di hongola festatunu kha nga giolovedzo gyawe. 43 Tepo festa yi nga vbeya, avo va di bweleya gaya. Jesu a di tshala Jerusalema ganiolu vavelegi vaye kha va si tugula. 44 Va di gimbiya pfhuka nya litshigu limwedo na va pimisa gu khavo Jesu womo vbakari nya vathu vale va nga ba va endra navo. Va di pheya gu mu vbwetedzeya gilongoni ni ga vathu vale va nga ba va tivana navo. 45 Ganiolu kha va mu mana, khu kharato va di bweleya Jerusalema, va ya mu vbwetedzeya gwadi. 46 Hwane nya matshigu mararu, va di ya mu mana tempeleni na khade vbakari nya vahevbudzi na gu va engiseya ni gu va gira siwudziso. 47 Vatshavbo va nga ba va mu engiseya va di gu hlamala khu mapwisiselo ni mihlamulo yaye. 48 Tepo va nga mu wona, va di hlamala. Mamayi waye, khuye: “Mwanangu, khu ginani u nga hi gira esi? Eni ni papayi wago hi di gu gu vbwetedzeya na hi garadzegide.” 49 Ganiolu, a di va hakha, khuye: “Khu ginani mu nyi vbwetedzeyago? Kha mwa nga ba mu dziti gu khenu nyi yede gu khala nyumbani ga Papayi wangu?” 50 Ganiolu kha va si pwisisa esi a nga ba a va embeya.

51 A di bweleya navo Nazareta, a simama gu va engisa. Mamayi waye a di gu vegisa satshavbo sesi monyoni gwaye. 52 Jesu a di gu dandra nigu wugengeyi waye wu di gu engedzeya na gu tsakedwa khu Nungungulu ni vathu.

3 Khu mwaga nya wu 15 nya gu fume ga Tibheriyu Sezari, tepo Pontiyo Pilato a nga ba ari ghovhernadhori wa Judheya, Herodhi* nari ghovhernadhori nya dhistrito ya Galileya, ndriyaye Filipi nari ghovhernadhori nya dhistrito nya litigo la Itureya ni Trakonite, Lizaniya nari ghovhernadhori nya dhistrito ya Abhileni, 2 matshigoni ya muprista nya khongolo Anasi ni ya Khayifasi, mahungu ya Nungungulu ma di vboha ga Johane, gyanana gya Zakariya. Johane a diri giwulani.

3 Uye a di gu gimbiya-gimbiya Joridhani gwatshavbo na gu tshumayela maningano ni gubhabhatiswa kha nga giyeyedzo nya gudzilaye gasi gu divaledwa sighoho 4 guya khesi si lovidwego omu nya libhuku la muprofeti Isaya, a nga khuye: “Gu ni lito nya muthu li pwalago giwulani, li gu khilo: ‘Dongiseleyani ndziya Jehovha! Lulamisani dziruwa dzaye. 5 Mikova yatshavbo yi na futedwe, sigomo satshavbo si na khungumudwe, dzindziya nya guwegeye dzi na lulamiswe, dzindziya dzi gu ni mavbala dzi na bambatedwe; 6 vatshavbo va na wona guvbanyisa ga Nungungulu.’”

7 Tepo vathu va nga ba va hongola ga Johane gasi a ya va bhabhatisa, a di gu va embeya, khuye: “Sanana nya dzinyoga! Khu mani a nga mi embeya gu khuye mu na si kodza gu tutuma zanga yi na tago? 8 Khu kharato, yeyedzani mihandro nyo khenu mu ngu dzi laya. Mu nga dzi sengi sanu, khenu: ‘Papayi wathu khu Abrahama.’ Nyi ngu mi embeyani gu kheni: Nungungulu a ngu si khodza gu tumbunuseya sanana Abrahama khomu nya siwindri sesi. 9 Gibhewula gi dongide gu koka misimbo khu mikhambani gakone. Khu kharato, ni wevbini simbo wu si velegigo mihandro nya yadi, wu na kokwa wu rinywa niloni.”

10 Vathu va di mu wudzisa, khavo: “Ginani hi yedego gu gira?” 11 A di va hlamula, khuye: “Uye a gu ni dzingandzu dzimbili, a na ninge mweyo wule a gu mwalo nayo; oyu a gu ni gilo nyo hodze, a na hodze ni wule a gu mwalo nagyo.” 12 Vakhupisi navo va di hongola gasi gu ya bhabhatiswa. Avo va di mu wudzisa, khavo: “Muhevbudzi, ginani hi yedego gu gira?” 13 A di va hlamula, khuye: “Mu nga khuphisi guvbindra esi si emisidwego khu nayo.” 14 Masotshwa nayo ma di mu wudzisa, khayo: “Ginani hi yedego gu gira?” A di ma hlamula, khuye: “Mu nga wandreyi silo vathu mwendro gu va singedza, ganiolu eneledwani khesi mu hakhago.”

15 Kha nga olu vathu va nga ba va virede guta ga Kristo, va di gu dzi wudzisa maningano ni Johane, khavo: “Ina khandruye Kristo oyu?” 16 Johane a di va hlamula, khuye: “Eni nya gu mi bhabhatisa khu mati, ganiolu oyu a tago na ni tshivba guvbindra eni, nigu eni ne kha nyi yedwi khu gu tshula dzingodzi nya dzisandaliya dzaye. Uye a na mi bhabhatisa khu liphuvbo nya guage ni nilo. 17 Uye pharide lifoxola* nya gu vbevbere khilo. A na agisa wulanga nya gu vbevbere avbo dzimbewu nigu a na wungedzeya trigu yaye gisangalani, ganiolu a vbisa mafisi* niloni si gu mba kodzega gu wu tshima.”

18 Johane a di va ninga gambe simbe sileletelo a bwe a simama gu tshumayela mahungu nya yadi. 19 Ganiolu, uye a di gu kawuka Herodhi ghovhernadhori nya dhistrito, khu kotani ya Herodhiya mwangadzi wa ndriyaye, ni simbe silo nyo vivbe a nga ba a gira. 20 Avba nya silo satshavbo nya guvivbe Herodhi a nga ba a gira, a di engedzeya gimbe gambe: A di khotheya Johane pasoni.

21 Hwane nya gu ba vathu vatshavbo va bhabhatisidwe, Jesu a di bhabhatiswa nuye. Tepo a nga ba a gombeya, ndzadzini gu di tulega. 22 Liphuvbo nya guage li di releya vbatshani gwaye kha nga gipomba. Gu di pwala lito khu ndzadzini na li gu khilo: “Uwe u Gyanana gyangu nyi gi haladzago; gi nyi tsakisago ngudzu.”

4 Jesu na tade khu liphuvbo nya guage, a di khuga khu Joridhani a yiswa giwulani khu liphuvbo la Nungungulu, 2 a ya khala 40 matshigu. Khavbovbo Dhiyabhulosi a di ya mu linga. Kha hodza gilo ndrani nya matshigu yoyo. Tepo ma nga vbeya, a dipwa ndzala. 3 Khu kharato, Dhiyabhulosi a di mu embeya, khuye: “Wa gu ba uri gyanana gya Nungungulu, embeya giwindri gegi gi vbindrugedza gi khala pawu.*” 4 Ganiolu Jesu a di mu hakha, khuye: “Gu lovidwe gu pwani: ‘Muthu kha yeli gu vbanya khu guhodza* basi.’”

5 Khavbovbo, Dhiyabhulosi a di mu dzega a mu yisa vbatshani, a ya mu yeyedza mifumo yatshavbo nya mafu khu gitepwana, 6 a mu embeya, khuye: “Nyi na gu ninga watshavbo wufumu wowu ni wudhumo nya mifumo yeyi kholu satshavbo sesi somo mandzani gwangu nigu nyo si ningeya ga oyu nyi mu nago. 7 Wa gu nyi khozeya gumogo basi, satshavbo sesi khyago.” 8 Jesu a di mu hakha, khuye: “Gu lovidwe gu pwani: ‘Khozeya Jehovha Nungungulu wago, khuye basi u yedego gu mu thumeya.’”

9 Dhiyabhulosi a di mu dzega a mu yisa Jerusalema, a ya mu emisa wulangani nya gulaphe ngudzu nya tempele, a mu embeya, khuye: “Wa gu ba uri gyanana gya Nungungulu, dzi digeledze u thega, 10 kholu gu lovidwe gu pwani: ‘Uye a na rumeya dzingilozi dzaye gasi dzi ta gu vbulugisa,’ 11 nigu: ‘Idzo dzi na gu hakha gasi gu ne ngondro wago wu si ghumi giwindri.’” 12 Jesu a di mu hakha, khuye: “Gu ganedwe gu pwani: ‘U nga lingi Jehovha, Nungungulu wago.’” 13 Tepo Dhiyabhulosi a nga vbedza gu mu linga a di khuga a hongola, a ya vireya yimbe tepo nya yadi nya gu mu linge khiyo.

14 Jesu a di bweleya Galileya khu tshivba nya liphuvbo nigu gipandreni gyatshavbo gya vbafuvbyana mule gu di gu ganedwa gwadi khuye. 15 A di pheya gambe gu hevbudza omu nya dzisinagoga dzawe nigu a di gu ningwa githawo khu vatshavbo.

16 Hwane nya isoso, a di hongola Nazareta, omu a nga dandreya umo. Kha nga giolovedzo gyaye, khu litshigu nya Sabhadho a di beya omu nya sinagoga, a khuga a ema gasi gu leri. 17 Va di mu ninga libhuku* la muprofeti Isaya. A di li thawuludza, a mana wulanga gu nga ba gu lovidwe gu pwani: 18 “Liphuvbo la Jehovha lomo vbatshani gwangu, kholu uye a nyi todzide gasi gu tshumayela mahungu nya yadi ga sisiwana, a nyi rumede gu ya embeya dzigumbi gutshulega gwadzo, gu tivisa sikhumu gu hawulugiswa nya maho, gu ninga gutshulega vale va tshaniswago 19 ni gu tshumayela maningano ni mwaga owu Jehovha a na kategisago gambe vathu vaye.” 20 Khavbovbo, a di fumba libhuku a li bweledza ga muphasedzeyi, a khala vbavbatshi. Vatshavbo sinagogani va di gu mu khedza. 21 Khavbovbo a di va embeya, khuye: “Muhuno yi tadzisegide milowo yeyi mu ngarigo gu yipwa.”

22 Vatshavbo va di pheya gu ganeya gwadi khuye ni gu hlamala khu malito nya yadi nyo kuhe monyo ma nga ba ma duga khu kanani gwaye, khavo: “Ina khandrigyo egi gyanana gya Josefa?” 23 Khu kharato, uye a di va embeya, khuye: “Khu lisine enu mu na ganeya livingu leli na mu thula eni, khenu: ‘Dhogodheya, dzi hawulugise wabune! Mu bwe khenu: Gira numo omu dhoropani gwago nya mavelego esi hi nga sipwa gupwani u giride Kafarinawume.’” 24 Khavbovbo a di va embeya, khuye: “Khu lisine nyi ngu mi embeyani, kheni: Mwalo muprofeti a ningwago wuzundzo tigoni gwaye nya mavelego. 25 Nyi ngu mi embeyani gu kheni: Gu diri ni dzinoni nya dzingi matshigoni ya Eliya, tepo ndzadzini gu nga dzi sega khu myaga miraru ni 6 migima, gu manega ndzala nya yikhongolo tigoni mule gwatshavbo. 26 Ambari ulolo, Eliya kha rumedwa ne ga moyo nya vanyamayi vovo, a di rumedwa ga noni ya Sarepita, tigoni ga Sidhoni. 27 Gu diri ni vathu nya vangi va nga ba vari ni sokono tigoni ga Israyeli teponi ya muprofeti Elizewu, ganiolu ne moyo wawe kha hawulugiswa, uye basi a nga hawulugiswa khu Namani wa Siriya.” 28 Vatshavbo va ngapwa malito yoyo sinagogani va di goroga ngudzu. 29 Va di khuga, va duga naye vbavbandze nya lidhoropa khu guvbiredza, va gweya naye gigomoni gu nga ba gu vbahidwe avbo lidhoropa lawe, gasi va ya mu rinya khiyoyo a thega vbavbatshi. 30 Ganiolu Jesu a di vbindra khu vbakari gwawe a hongola.

31 Khu vbale, a di releya Kafarinawume, limwedo nya madhoropa ya Galileya iyo a nga hevbudza vathu khu Sabhadho. 32 Avo va di hlamala ngudzu khu mahevbudzelo yaye kholu esi a nga ba a hevbudza si di guta khiyo ga Nungungulu. 33 Sinagogani mule gu diri ni mwama a nga ba ari ni lidhimoni. Uye a di khusedza lito, khuye: 34 “Ginani u gi vbwetago gwathu, Jesu wa Nazareta? Wa gu teya gu ta hi fuvisa? Nyi ngu guti gwadi gu kheni khuwe mani, Githumi gi Agidego gya Nungungulu.” 35 Ganiolu, Jesu a di li kawuka, khuye: “Degula! Duga ga muthu yoyo.” Hwane nya gu ba liphuvbo lile nya guvivbe* na li theside mwama wule vbavbatshi, li di duga gwaye nya mba mu bayisa. 36 Vatshavbo va di hlamala ngudzu, va pheya gu wudzisana khesi si nga girega, khavo: “Nga pwani tshivba nya malito yaya! Ambari maphuvbo nya guvivbe* ma ngu mu engisa, ma duga khomu nya vathu!” 37 Khu kharato, ndruma ya Jesu yi di phalalega malangani yatshavbo ya vbafuvbyana mule.

38 Tepo a nga duga khu sinagogani a di beya ndrangani ga Simoni. Mamayi wa ngadza Simoni a di gu tshaniseka khu feveri nya yikhongolo. Va di mu lomba gu khavo a mu phasa. 39 Khavbovbo uye a di ya noga avba a nga ba a lade, a kawuka feveri, iyo yi di vbindra, uye a di dzegeya gu khuga a ema a pheya gu va thumeya.

40 Ganiolu, tepo li nga pfola, vatshavbo va nga ba vari ni vathu va nga ba va dwala khu madwali nya gu hambane-hambane va di va resa avbo gwaye, uye a ta va handzega mandza a va hawulugisa. 41 Madhimoni nayo ma di gu duga ga vathu nya vangi na ma khusedza lito ma ganeya, khayo: “Uwe u Gyanana gya Nungungulu.” Ganiolu uye a di gu ma kawuka a si ma dzumeleyi gu khuye ma ganeya, kholu ma di gu dziti gu khayo uye khuye Kristo.

42 Ganiolu, ni dzimindru a di khuga a hongola wulanga nyo khaguri gasi a ya khala enga. Gitshungu gi di pheya gu mu vbwetedzeya kala gi nga ya vboha avba a nga ba a romo, gi ya zama gu mu lomba gu khigyo a nga hongoli. 43 Ganiolu, uye a di va embeya, khuye: “Nyi yede gu tshumayela mahungu nya yadi nya Mufumo wa Nungungulu omu nya mambe madhoropa kholu khiso nyi nga rumedwa gu ta gira.” 44 Khu kharato, uye a di simama gu tshumayela omu nya dzisinagoga dza Judheya.

5 Litshigu nyo khaguri, Jesu a diri bambe nya litsiva la Genezare, na randredwe khu vathu nya vangi va nga ba va mu gundra na va gu vbweta gupwa lito la Nungungulu. 2 A di wona dzingalava dzimbili dzi nga ba dzi tshegemisidwe siwoni; vagogi vakone va di tshigide na va gu handza dzikhoga. 3 A di beya omu nya mweyo nya dzingalava yi nga ba yiri ya Simoni, a lomba gu khuye va yi hidzimisanyana matini, a khala ngalavani a hevbudza gitshungu. 4 Tepo a nga vbedza gu ganeya a di embeya Simoni, khuye: “Hidzimisani ngalava nondrwani, mu thesa dzikhoga dzanu mu goga.” 5 Khavbovbo, Simoni a di mu hakha, khuye: “Muhevbudzi, hi zamide gu goga wutshigu watshavbo, kha ha mana gilo. Ganiolu kha nga u nga hi ruma hi na thesa dzikhoga.” 6 Tepo va nga gira esi a nga ganeya, va di mola dzindzandzi nya dzingi nyo bwe dzikhoga dzi pheya gu pferuga. 7 Va di khweneta dzipari dzawe dzi nga ba dzi romo omu nya yimbe ngalava gasi dzi ta va phasa. Tepo va nga vboha, dzingalava dzadzimbili dzi di tala khu dzindzandzi nyo bwe dzingalava dzi pheya gu dzama. 8 Tepo Simoni Pedro a nga wona isoso a di khidzimeya Jesu, khuye: “Pfhumu, kha nyi yedwi khu gu manega vbafuvbi nago kholu nyi gighohi.” 9 Simoni ni ava a nga ba ari navo va di gu hlamala ngudzu khu dzindzadzi va nga ba va mode. 10 Aniso sanana sa Zebhedhewu, Jakobe ni Johane, si nga ba si thuma ni Simoni si di hlamala. Ganiolu Jesu a di embeya Simoni, khuye: “U nga thavi! Gukhugeya muhuno u na ba uri mugogi nya vathu.”* 11 Khu kharato, va di dusa dzingalava vbavbandze, va diga satshavbo va mu landreya.

12 Khu limbe litshigu nari dhoropani nyo khaguri, a di tedwa khu mwama a nga ba a tade* khu sokono. Tepo a nga wona Jesu, a di khidzima a kuha vbavbatshi khu khovbe, khuye: “Pfhumu, wa gu ba u dzina, nyi hawulugise.” 13 Khu kharato, uye a di thawuludza libogo a kuha mwama wule, khuye: “Nyi ngu dzina! Hawuluga.” Khu gitepwana gile sokono yaye yi di vbindra. 14 Khavbovbo, Jesu a di laya mwama wule gasi a si embeyi muthu a bwe khuye: “Ganiolu gimbiya u ya dzi yeyedza ga muprista u bwe u gira ningelo nya gu agiswe, owu wu emisidwego khu Nayo wa Mosi, gasi si khala wufakazi gwawe.” 15 Mahungu yoyo ma di simama gu phalalega nigu vathu nya vangi va di gu tshangana gasi gu engiseya Jesu ni gu hawulugiswa madwali yawe. 16 Ganiolu, dzitepo nya dzingi a di gu hongola malangani gu nga ba guri mwalo vathu gasi a ya gombeya.

17 Litshigu limwedo na gu hevbudza, gu dita Vafarisi ni vahevbudzi nya Nayo, va nga ba va dzude khomu nya dzialidheya dzatshavbo dza Galileya ni Judheya ni Jerusalema va ta khala vbale. Jehovha a di ningide tshivba Jesu gasi gu hawulugisa vathu. 18 Va dita vama nyo khaguri va nga ba va rwade mwama a nga ba ari gilima, a nga ba a lade avba nya gikamana.* Avo va di gu zama gu beya naye nyumbani gasi va ya mu ningeya ga Jesu. 19 Kha nga olu va nga ba va tandrega gu beya khu kotani nya vathu nya vangi, va di lita vbatshani nya nyumba va ya reledza gikamana* gile gi nga ba gi lade avbo gilima gile avba a nga ba a romo avbo Jesu. 20 Tepo Jesu a nga wona gukhodwa va nga ba vari nago a di embeya mwama wule nya gilima, khuye: “Sighoho sago si divaledwe.” 21 Khavbovbo, Valovi ni Vafarisi va di pheya gu ganeya khu gyawe, khavo: “Khu mani mwama yoyu a valeteyago? Khu mani a gu na ni makodzelo nyo divaleye sighoho nasiri Nungungulu basi?” 22 Tepo Jesu a nga tugula esi va nga ba va pimisa, a di va wudzisa khuye: “Ginani mu pimisago myonyoni gwanu? 23 Ginani gi vbevbugago? Gu ganeya gu khuwe: ‘Sighoho sago si divaledwe’? mwendro gu khuwe: ‘Khuga u gimbiya’? 24 Ganiolu gasi mu dziti gu khenu Gyanana nya muthu gi ningidwe tshivba omu mafuni nya gu divaleye sighoho . . .”, a di embeya mwama wule nya gilima, khuye: “Khuga u dzega gikamana gyago u hongola gaya.” 25 Khu kharato, mwama wule a di khuga, a rwala gikamana gyaye a hongola gaya na gu dhumisa Nungungulu. 26 Khu kharato, vatshavbo va di hlamala ngudzu, va tala khu githawo, va pheya gu dhumisa Nungungulu, khavo: “Muhuno hi wonide silo nyo samadzise ngudzu!”

27 Hwane nya isoso, Jesu a di wona mwama moyo nyo pwani khu Levhi, na khade wulangani nya gu khupise. A a di mu embeya, khuye: “Nyi landreye.” 28 Levhi a di diga satshavbo a khuga a mu landreya. 29 Khavbovbo, a di gira festa nya yikhongolo gaya gwaye a rana Jesu; gu diri ni vakhupisi nya vangi ni vambe va nga ba va hodza navo. 30 Khavbovbo, Vafarisi ni Valovi va di pheya gu ngurangura, va wudzisa vapizane vaye, khavo: “Khu ginani enu mu hodzago ni gu seya ni vakhupisi ni sighohi? 31 Jesu a di va hlamula, khuye: “Vathu va si dwaligo kha va vbweti dhogodheya, ganiolu avo va dwalago va ngu mu vbweta. 32 Kha nya teya gu ta rana va nya gululama, ganiolu nyi tede gu ta rana sighohi gasi si dzi laya.”

33 Avo va di mu embeya, khavo: “Vapizane va Johane va ngu oloveya gu pfhunga* ni gu gira milombelo, avo va Vafarisi navo va ngu gira isoso, ganiolu avo vago va gu hodza ni gu seya.” 34 Jesu a di va embeya, khuye: “Ina dzipari nya noyivhu dzi na ni gighelo nyo pfhunge na dzi ngari naye? 35 Ganiolu ma na vboha matshigu va na dzegedwago noyivhu, khavbovbo va na pfhunga.”*

36 A di va embeya gambe gipimaniso gegi, khuye: “Mwalo a piyago gipandre nya mwendra nya wuphya a sona khuwo giziva avba nya mwendra wa gale. A gu gira isoso giziva nya giphya gi na tshulega nigu giziva nya mwendra nya wuphya kha gi na nga yelana ni mwendra wa gale. 37 Khu gufana, mwalo a theyago vhinyu nya yiphya omu nya madowo ya gale, kholu a gu gira isoso, vhinyu nya yiphya yi na pferula madowo yi vbalaga nigu madowo* nayo ma na ghohekeya. 38 Ganiolu vhinyu nya yiphya yi yede gu thedwa omu nya madowo nya maphya. 39 Mwalo a seyago vhinyu ya gale a vbedza a dogoreya eyi nya yiphya, kholu wari khuye: “Eyi ya gale khiyo yi gu yadi.”

6 Khu litshigu nya sabhadho, Jesu a di vbindra khu mathembweni gu nga ba gu yadwe trigu. Vapizane vaye va di yi vburumuleya, va yi vbihigeya mandzani va hodza. 2 Khavbovbo, Vafarisi nyo khaguri, va di khavo: “Khu ginani mu girago silo si himbedzedwago gu girwa khu sabhadho?” 3 Jesu a di va hlamula, khuye: “Kha mwa hevbula esi Dhavhidhe ni vama a nga ba ari navo va nga gira tepo va ngapwa ndzala? 4 Kha mwa hevbula gupwani uye a di beya nyumbani ga Nungungulu, a ya hodza dzipawu nya ningelo ni vama a nga ba ari navo, a gu silo si nga ba si si yeli gu hodzwa khuye ambari khu vale va nga ba vari naye, ganiolu si nga ba si yede gu hodzwa khu vaprista basi?” 5 A di bwe a va embeya, khuye: “Gyanana nya muthu Pfhumu nya Sabhadho.”

6 Khu yimbe sabhadho, a di beya sinagogani a hevbudza, umomo gu diri ni mwama a nga ba a haside libogo la nyamudye. 7 Valovi ni Vafarisi va di gu mu khedziseya gwadi gasi gu wona gu khavo a na hawulugisa muthu khu Sabhadho gani, gasi gu mana gilo nya gu mu ninge khigyo nandru. 8 Ganiolu, Jesu a di gu siti esi va nga ba va pimisa, khu kharato a di embeya mwama wule a nga ba a haside libogo, khuye: “Khuga u ema vbakari!” Uye a di khuga a ema. 9 Jesu a di khuye: “Nyi ngu mi wudzisani, kheni: Ina si ngu dzumedziswa khu Sabhadho gu gira silo nya sadi mwendro gu gira silo nya guvivbe? Gu vbulugisa womi mwendro gu songa?” 10 Hwane nya gu ba a khedzide ava va nga ba va mu randrede, a di embeya mwama wule, khuye: “Thawuludza libogo lago.” Mwama wule a di li thawuludza, li hawuluga. 11 Vafarisi ni valovi va di goroga, va pheya gu bhula khesi va na girago Jesu.

12 Litshigu limwedo, a di hongola gigomoni gasi guya gombeya; a ya vbedza wutshigu watshavbo na gombeya ga Nungungulu. 13 Tepo gu ngagya a di rana vapizane a ta hatha 12 nya avo a va rana gu khuye vapostoli, 14 a di hatha Simoni, oyu a nga mu rana khuye khu Pedro, ni ndriyaye Andreya, Jakobe, Johane, Filipi, Bharitolomewu, 15 Matewu, Tomasi, Jakobe gyanana gya Alifewu, Simoni a ranwago “nya sighingi,” 16 Judha gyanana gya Jakobe, ni Judha Sikariyoti, oyu khu gu gimbiya nya tepo a nga mu rengisa.

17 A di releya navo, a ya ema wulanga nyo lulame, avbovbo gu diri ni vapizane vaye nya vangi ni vathu nya vangi va nga ba vata khu Judheya gwatshavbo ni Jerusalema ni bambe nya yiphwa ya Tiro ni Sidhoni, va ngata gasi gu tapwa Jesu ni gu hawulugiswa madwali. 18 Ambari vale va nga ba va tshaniswa khu maphuvbo nya gu vivbe va di gu hawulugiswa. 19 Vathu vatshavbo va di gu zama gu mu kuha, kholu avbo gwaye yi di gu duga tshivba yi hawulugisa vatshavbo.

20 A di khedza vapizane vaye, khuye:

“Mu ngu tsaka enu sisiwana, kholu Mufumo wa Nungungulu khwanu.

21 “Mu ngu tsaka enu mu gu ni ndzala olu, kholu mu na khuriswa.

“Mu ngu tsaka enu mu liyago olu, kholu mu na hegeleya.

22 “Tsakani tepo yatshavbo vathu va mi nyenyago, va mi tutumisa, va mi vala, va ganeya guvivba khu lina lanu khu kotani nya Gyanana nya muthu. 23 Sa gu girega isoso, tsakani mu bwe mu ghiya, kholu tshatshazelo wanu wukhongolo ndzadzini. Khiso sasimweso vakokwe vawe va nga ba va gira vaprofeti.

24 “Libango gwanu enu sighanyi, kholu mu hakhide tshatshazelo wanu watshavbo.

25 “Libangu gwanu enu mu khuridego olu, kholu mu na khala ni ndzala.

“Libangu gwanu enu mu hegago olu, kholu mu na liya.

26 “Libangu gwanu enu mu zundzwago khu vathu vatshavbo, kholu khiso sasimweso vakokwe vawe va giridego vaprofeti nya malipha.

27 “Mwatshavbo mu nyi engiseyago nyi ngu mi embeyani gu kheni: Simamani gu haladza valala vanu, mu gireya wuwadi ava va mi nyenyago, 28 mu kategisa ava va mi lombeleyago silo nya guvivbe, mu gombeleya ava va mi valago. 29 Oyu a gu vetago pama gigundru gimwego ningedzeya egi gimbe, oyu a gu dzegeyago libhadzi u nga mu himbedzeyi gu dzega ni ngandzu. 30 Uye a gu lombago mu ninge, oyu a gu dzegeyago silo sago u nga mu henguli.

31 “Esi mu vbwetago gu khenu vathu va mi gireya, va gireyeni navo kharato.

32 “Mwa gu haladza ava va mi haladzago, wuzundzu muni mu na wu manago? Kholu ambari sighohi si ngu haladza ava va si haladzago. 33 Mwa gu gireya wuwadi ava va mi gireyago wuwadi wuzundzu muni mu na wu manago? Kholu ambari sighohi si ngu gira sasimweso. 34 Nigu mwa gu fiyarisa basi vale mu tumbago gu khenu va na mi livba, wuzundzu muni mu na wu manago? Kholu ambari sighohi si ngu fiyarisa sighohi na si gu tumba gu livbwa. 35 Gasi enu, simamani gu haladza valala vanu, mu gira wuwadi mu bwe mu fiyarisa nya mba vireya gu livbwa. Mwa gu gira isoso, tshatshazelo wanu wu na ba wuri wukhongolo nigu mu na khala sanana sa Oyu a Khugegidego Ngudzu, kholu uye a ngu gireya wuwadi va nya mba bonga ni vale va girago silo nya guvivbe. 36 Simamani gu gireya wuhindzi vakwanu kha nga Papayi wanu a gu ni wuhindzi.

37 “Nigu digani gu lamula vakwanu gasi mu si lamudwi nenu, digani gu ninga nandru vakwanu gasi mu si ningwi nenu nandru, simamani gu divaleya vakwanu anenu mu na divaledwa. 38 Ningani, mu na ningwa nenu. Mu na guhuledwa omu nya mwendra wanu pimo nya gutale gwadi, wu gonyeledwa wu bwe wu vbalageya, kholu pimo mu pimago khuwo vakwanu, mu na pimedwa nenu khuwo.”

39 Khavbovbo, a di va ninga gimbe gipimaniso, khuye: “Ina si ngu kodzega gu gikhumu gi hetedza gikhumu kwawe? Ina va vavili kha va na nga ya thegeya phalani? 40 Gihevbuli kha gi vbindri muhevbudzi wagyo, ganiolu ni wevbini a hevbudzwago gwadi a nati gufana ni muhevbudzi waye. 41 Khu ginani u khedzago gitoti gi gu romo omu nya liso la ndriyago, ganiolu u si woni gighodho gi gu romo omu nya liso lago? 42 Wa gu si kodza kharini gu embeya ndriyago, khuwe: ‘Wandruye, gwadi nyi gu dusa gitoti gi gomogo omu nya liso lago,’ narigu uwe kha wu woni gighodho gi gomogo omu nya liso lago? Mupfhadzedzeyi wewe! Pheya khu gu dusa gighodho gi gomogo omu nya liso lago khavbo u na wonago gwadi gu dusa gitoti gi gomogo omu nya liso la ndriyago.

43 “Wu mwalo simbo nya wadi wu velegago mihandro nya mba yadi nigu wu mwalo simbo nya mba wadi wu velegago mihandro nya yadi. 44 Simbo ni simbo wa gu tidwa khu mihandro yawo. Khu giyeyedzo, kha si kodzegi gu haveya dzifigu* omu nya miba ambari gu haveya dziuvha omu nya miba. 45 Muthu nya wadi a gu dusa silo nya sadi khu thombani nya yadi ya monyoni gwaye, ganiolu muthu nya gu vivbedwe khu monyo a gu dusa silo nya gu vivbe khu thombani yaye nya guvivbe. Kholu likana laye lo ganeya esi si tadego monyoni.

46 “Khu ginani mu nyi ranago, khenu: ‘Pfhumu! Pfhumu!’, na mu si giri esi nyi mi embeyago? 47 Ni wevbini a tago gwangu a bwe apwa mahungu yangu a ma landrisa, nyi na mi yeyedza gu kheni a gu fana ni mani: 48 A gu fana ni muthu a vbahago nyumba, a pheya khu gu kemba, a releya ngudzu, a ya theya khokhweni vbatshani nya giwindri. Tepo yi nga vboha ndrambi, nyumba yi di vetwa khu tshivba khu mati nya tsongo, ganiolu kha ma si kodza ni gu yi kutsunga kholu yi di gu vbahidwe gwadi. 49 Gasi oyu a pwago a si giri gilo, a gu fana ni muthu a nga vbaha nyumba mulipfuleni nya mba theya khokhweni, yi di vetwa khu mati nya tsongo yi dzegeya gu tshungunuga yi thega wufendretiri.”

7 Tepo Jesu a nga vbedza gu ganeya esi a nga embeya gitshungu, a di beya Kafarinawume. 2 Muthangeyi moyo nya masotshwa a diri ni githumi a nga ba a gi gola ngudzu. Igyo gi di gu dwala ngudzu nigu gi diri vbafuvbi ni gufa. 3 Tepo muthangeyi wule a ngapwa ndruma ya Jesu, a di rumeya madhota nyo khaguri nya Vajudha gasi va ya mu lomba gu ta hawulugisa githumi gyaye. 4 Tepo va nga vboha ga Jesu, va di mu lomba khu monyo wawe watshavbo, khavo: “Uye muthu nya wadi! Ha gu lomba gu khethu u mu phasa, 5 kholu a ngu gola va na gyathu nigu khuye a nga vbaha sinagoga yathu.” 6 Jesu a di hongola navo. Ganiolu, tepo a nga ba ari vbafuvbi ni gu vboha, muthangeyi nya masotshwa a di rumeya dzipari dzaye ni mwangu, wu gu khuwo: “Pfhumu, u nga dzi garadzi, kha nyi ninganedwi khu gu gu hakha nyumbani gwangu. 7 Khiso si nyi giridego nyi dzipwa na nyi si ninganedwi khu gu ta manana nago. Ganiolu, ganeya lito basi, githumi gyangu gi na hawuluga. 8 Kholu, ambari olu nyi thangedwago, aneni nyi na ni masotshwa nyi ma thangeyago. Nya gu embeya limwedo, kheni: ‘Gimbiya,’ la gu hongola; nyi embeya limbe kheni: ‘Delu,’ la guta; nyi embeya githumi gyangu, kheni: ‘Gira esi,’ gyo gira.” 9 Tepo Jesu a ngapwa isoso, a di hlamala ngudzu a bwe a embeya ava va nga ba va mu landreya, khuye: “Khu lisine nyi ngu mi embeyani, kheni: Ambari tigoni ga Israyeli kha nya mana muthu a gu ni gukhodwa nya nga ogu.” 10 Tepo vale va nga rumedwa va nga bweleya gaya, va di ya mana githumi gile na gi hawulugide.

11 Hwane nya isoso, Jesu a di hongola dhoropani ga Nayimi, gumogo ni vapizane vaye, ni gitshungu nya gikhongolo. 12 Na vari vbafuvbi ni gu vboha dhoropani, a di manana ni vathu va nga ba va rwade girumbi, na va duga nagyo gasi gu ya gi dzinga; gu diri gyanana gya gimwegyo gya mamayi moyo nya noni. Gu diri ni vathu nya vangi va dhoropani va nga ba va hongola naye. 13 Tepo Jesu a nga wona nyamayi wule, a di mu pweya, a mu embeya, khuye: “U nga liyi.” 14 Khavbovbo, Jesu a di hidzimeya, a kuha lithatho, avo va nga ba va li rwade va ema. Khavbovbo, huye khuye: “Lidzaha, nyi ngu gu ruma, wuga!” 15 Lidzaha lile li nga ba li fude, li di wuga li khala, li pheya gu ganeya; Jesu a li ningeya ga mamayi walo. 16 Vatshavbo va di tala khu githawo, va dhumisa Nungungulu, khavo: “Gu tumbunugide muprofeti nya khongolo vbakari gwathu.” Va bwe khavo: “Nungungulu dundrugide vathu naye.” 17 Mahungu ma ganeyago khesi Jesu a nga gira, ma di phalalega Judheya gwatshavbo ni sipandreni satshavbo sa vbafuvbyana mule.

18 Vapizane va Johane va di mu embedzeya satshavbo sesi. 19 Johane a di rana vapizane vavili vaye, a va rumeya ga Pfhumu, gasi va ya mu wudzisa, khavo: “Ina khuwe Wule a Tago, mwendro hi yede gu vireya mumbe?” 20 Tepo vapizane vale va nga vboha ga Jesu, va di mu wudzisa, khavo: “Johane a hi rumede gwago gasi gu ta gu wudzisa gu khethu: ‘Ina khuwe Wule a Tago, mwendro hi yede gu vireya mumbe?’” 21 Khu tepo yile, a di gu hawulugisa vathu nya vangi va nga ba vari ni sitshetsheya, madwali nya makhongolo, a tutumisa maphuvbo nya guvivbe, a bwe a tula maho nya sikhumu nya singi. 22 Uye a di va hlamula, khuye: “Gimbiyani mu ya embeya Johane esi mu si pwago ni gu si wona, khenu: Sikhumu si ngu wona, sikhurubwa si ngu gimbiya, va nya sokono va ngu agiswa, sivbwiri si ngupwa, ava va fudego va ngu wuswa nigu mahungu nya yadi ma ngu huweledwa ga sisiwana. 23 A ngu tsaka wule a si manigo gilo gi mu khunguvanyisago avba gwangu.”

24 Tepo vapizane va Johane va nga hongola, Jesu a di pheya gu ganeya ni gitshungu maningano ni Johane, khuye: “Ginani mu nga ya gi wona giwulani? Tshava yi hanahaniswago khu phuvbo? 25 Gasi ginani mu nga ya gi wona? Muthu nya gu ambale sombo nyo mbure? Ava va ambalago sombo nyo mbure,* va gu ni womi nyo khadzisege, vo dugeya dzindrangani nya wufumu. 26 Ginani khu lisine mu nga yela gu ya gi wona? Muprofeti? Ina, nyi ngu mi embeya gu kheni uye a ngu vbindra ngudzu ni muprofeti. 27 Oyu khuye gu ganedwego khuye omu nya milowo, pwani: ‘Nyi ngu rumeya githumi* gyangu mbeli gwago, gasi gu ta gu dongiseleya ndziya yago.’ 28 Nyi ngu mi embeyani, kheni: Vbakari nya vathu vatshavbo va velegidwego khu vanyamayi, mwalo a gu khongolo guvbindra Johane. Ganiolu oyu a gu dugwana Mufumoni wa Nungungulu khongolo guvbindra uye.” 29 (Tepo va ngapwa isoso, vathu vatshavbo ni vakhupisi, va di ganeya gu khavo Nungungulu lulamide, kholu va di bhabhatisidwe khu bhabhatiso wa Johane. 30 Ganiolu Vafarisi ni vahevbudzi nya Nayo, kha va nga ba va theya kota khesi Nungungulu a nga ba a si vbweta gwawe, kholu kha va nga ba va bhabhatisidwe khu Johane.)

31 “Nyi na va fananisa ni ginani vathu nya gitugulwana gegi? Va gu fana ni mani? 32 Va gu fana ni sanana si khadego bazaritunu, na si gu ganeya ni dzipari dzaso, khiso: ‘Hi wombide dziflawuta,* ganiolu, kha mwa hana! Hi wombide dzihuwa, ganiolu kha mwa garadzega!’ 33 Khu ndziya nya gufane, Johane dzude na si hodzi guhodza,* na si seyi vhinyu, ganiolu enu mwari khenu: ‘A na ni lidhimoni.’ 34 Gyanana nya muthu gi dzude gi ta hodza ni gu seya, ganiolu enu mwari, khenu: ‘Na ni limidzo nigu gidhakwa,* pari nya vakhupisi ni sighohi.’ 35 Ganiolu, wugengeyi wa gu yeyedza gululama gwawo khu sanana* sawo satshavbo.”

36 Moyo nya Mufarisi a di gurumedza Jesu gu ya hodza naye. Khavbovbo, Jesu a di beya gaya ga Mufarisi yoyo, a ya khala vbamezatunu. 37 Tepo nyamayi moyo a nga ba a tidwa dhoropani nga gighohi a nga dziti gu khuye Jesu a di gu hodza ndrangani ga Mufarisi, a di hongola ni liboteri nya alabhastru li nga ba liri ni mafura nyo nungeye. 38 A di ya khidzima migondroni ga Jesu, a liya, a naganisa migondro ya Jesu khu marongo yaye, a bwe a yi bavbula khu ndzudzu waye. Nigu a di bhejari migondro ya Jesu, a bwe a yi todza mafura nyo nungeye. 39 Tepo Mufarisi wule a nga mu rana a nga wona isoso, a di ganeya khu monyoni gwaye, khuye: “Nari khatshi mwama yoyu khu lisine muprofeti, na gu dziti gu khuye khu mani a mu kuhago, nigu muthu muni; na gu dziti gu khuye gighohi.” 40 Ganiolu, Jesu a di mu embeya, khuye: “Simoni, gyomo nyi vbwetago gu gu embeya.” Uye a di hakha, khuye: “Ganeya, Muhevbudzi!”

41 “Mufiyarisi moyo a di gu dhevhwa khu vama vavili; moyo a di gu mu dhevha 500 dzidhenariyo,* mumbe a di gu mu dhevha 50. 42 Kha nga olu va nga ba vari mwalo gilo nya gu mu livbe khigyo, a di va divaleya vatshavbo va vavili. Khu wevbini ga ava vavavili a na golago ngudzu mufiyarisi wule?” 43 Simoni a di mu hlamula, khuye: “Nya gu wona gu kheni khu wule a nga mu divaleya dzitsapawu nya dzingi.” Jesu a di mu embeya, khuye: “Lisinelo!”* 44 Jesu a di khedza nyamayi wule, a embeya Simoni, khuye: “U ngu mu wona nyamayi yoyu? Nyi bede nyumbani gwago, khwa nyi ninga mati nyo hambe migondro yangu, ganiolu nyamayi yoyu naganiside migondro yangu khu marongo yaye, a bwe a yi bavbula khu ndzudzu waye. 45 Uwe khwa nyi bhejari, ganiolu nyamayi yoyu gukhugeya nyi nga beya, kha ema gu bhejari migondro yangu. 46 Uwe khwa nyi todza mafura hungoni, ganiolu nyamayi yoyu nyi todzide mafura nyo nungeye migondroni. 47 Khu kharato, nyi ngu gu embeya, kheni: Ambari olu sighoho saye si gu singi,* si divaledwe, kholu uye haladzide ngudzu. Ganiolu, wule a divaledwago vbadugwana, a gu haladza vbadugwana.” 48 Khavbovbo, a di embeya nyamayi wule, khuye: “Sighoho sago si divaledwe.” 49 Avo a nga ba a khade navo vbamezatunu, va di pheya gu wudzisana khu gyawe, khavo: “Gasi khu mani mwama yoyu a kodzago ni gu divaleya sighoho?” 50 Ganiolu, Jesu a di embeya nyamayi wule, khuye: “Gukhodwa gwago gu gu vbanyiside. Gimbiya khu gurula.”

8 Khu hwane nya tepo, a di gimbiya khu lidhoropa ni lidhoropa ni alidheya ni alidheya na gu tshumayela ni gu huweleya mahungu nya yadi nya Mufumo wa Nungungulu. A diri ni ava nya 12 2 ni vanyamayi nyo khaguri va nga vbanyiswa khu gu tutumiswa madhimoni va nga ba vari nawo ni gu hawulugiswa madwali yawe: Mariya a nga ba a ranwa gu pwani khu Madhalene, a nga duswa 7 madhimoni; 3 Jowana mwangadzi wa Kuza, muthangeyi nya ndranga ya Herodhi; Suzana ni vambe vanyamayi nya vangi va nga ba va phasedzeya Jesu ni vapizane vaye khu gu thumisa dzithomba dzawe.

4 Tepo vathu nya vangi va nga ta manana ni ava va nga ba vata khu madhoropani nya gu hambane-hambane, Jesu a di pheya gu va hevbudza khu gu thumisa gipimaniso, khuye: 5 “Muyali a di duga gasi gu ya yala dzimbewu dzaye, tepo a nga ba a yala, dzimbe dzi di thega bambe nya ndziya dzi gandredzedwa dzi bwe dzi ta rothedwa khu sinyoni. 6 Dzimbe dzi di thegeya siwindrini, ganiolu hwane nya gu ba dzi bugide, dzi di banga kholu gu diri mwalo thomwa. 7 Dzimbe dzi di thegeya mibani, khavbovbo miba yi di dandra nadzo yi dzi midza. 8 Ganiolu dzimbe dzi di thegeya omu nya mafu nyo none, hwane nya gu ba dzi bugide, dzi di velega 100 guvbindra esi si nga ba si yadwe.” Hwane nya gu ba a ganede isoso, a di ganeya khu lito nyo khugege, khuye: “Uye a gu ni dzindzeve gasi gupwa, a napwe.”

9 Vapizane vaye va di mu wudzisa gu khavo khu wevbini tshamuselo nya gipimaniso gegi. 10 A di va hlamula, khuye: “Enu mu ningidwe gu pwisisa misihalo nya gu hathege nya Mufumo wa Nungungulu, ganiolu vambe va gu embedwa satshavbo khu gu thumisa sipimaniso, gasi va khedza ganiolu va si woni gilo, va sipwa ganiolu va si pwisisi. 11 Tshamuselo ya gipimaniso, khowu: Mbewu lito la Nungungulu. 12 Dzimbewu dzi nga thega bambe nya ndziya ga gu thudwa vale va ngapwa mahungu, ganiolu a ta Dhiyabhulosi a ta va duseya lito la Nungungulu myonyoni gwawe gasi va si khodwi ni gu bwe va si vbulugiswi. 13 Edzi dzi nga thegeya musiwindrini, khu vale va pwago lito la Nungungulu va li dzumeya khu gutsaka, ganiolu va si tsitsi mikhamba. Va gu khodwa khu gitepwana, ganiolu tepo va lingwago va gu si diga. 14 Edzi dzi nga thegeya mibani, khu vale va ngapwa, ganiolu va padwa khu sigaradzo nya mafu yaya, dzithomba ni sivbungadzo nya mafu yaya, va midzwa khiso va si velegi mihandro nyo vidzwe. 15 Edzi dzi nga thegeya mafuni nya yadi, khu vale va ngapwa mahungu va ma hakha khu monyo watshavbo, va ma vegedza, va velega mihandro khu gutimiseya.

16 “Mwalo a khondrisago kandriya a yi fenengedza khu gilo mwendro gu yi vega vbavbatshi nya kama, ganiolu a gu yi handzega vbatshani nya gilo gasi gu wenengedza ava va beyago. 17 Kholu gimwalo gi sihidwego gi na gu mba wonegiswa nigu gimwalo gi sihidwego gwadi gi na gu mba tidwa mwendro gu duswa vbavbandze. 18 Khu kharato, engiseyani gwadi: Oyu a gu naso a na ningwa nya singi, ganiolu oyu a gu mwalo naso ni esi a pimisago gu khuye naso a na dzegedwa.”

19 A di vboha mamayi waye ni vandriyaye, ganiolu kha va si kodza gu mu vboheya vbafuvbi kholu gu di tade khu vathu nya vangi. 20 Va di mu embeya, khavo: “Mamayi wago ni vandriyago vomo vbavbandze, vo vbweta gu gu wona.” 21 A di va hakha, khuye: “Mamayi wangu ni vandriyangu khava va pwago lito la Nungungulu va li landrisa.”

22 Litshigu limwedo a di beya ngalavani ni vapizane vaye a va embeya, khuye: “Hongoleni tshatugo nya litsiva.” Avo va di hongola. 23 Tepo va nga ba va tshatuga, uye a di lala. Gu di pheya gingulu nya gikhongolo matini, ngalava yi pheya gu tala khu mati nigu yi di gu vbweta gu dzama. 24 Khavbovbo, va di ya mu wusa, khavo: “Muhevbudzi, Muhevbudzi, hi ngufa!” Uye a di wuga, a kawuka phuvbo ni mavimbi, si ema, gu manega malenga. 25 Uye a di va embeya, khuye: “Gomo hayi gukhodwa gwanu?” Ganiolu, avo va di thava ngudzu, va hlamala, va wudzisana, khavo: “Gasi khu mani mwama yoyu gwadi-gwadi? Kholu a gu kawuka ambari mati ni phuvbo si bwe si mu engisa.”

26 Va di vboha tshatugo, gipandreni gya Vagerazi gi khedzanidego ni Galileya. 27 Tepo Jesu a nga duga khu ngalavani a di khingwa khu mwama moyo a nga ba ari ni madhimoni. Gu di gu vbindra tepo nyo laphe nya mba ambala sombo nigu a di si khali ndrangani, a di gu khala omu nya dzisimitero. 28 Tepo a nga wona Jesu, a di womba huwa, a khidzima mbeli gwaye, a ganeya khu lito nyo khugege, khuye: “Ginani u gi vbwetago gwangu, Jesu, Gyanana gya Nungungulu a khugegidego ngudzu? Nyi ngu gu lomba gu kheni u nga nyi tsayisi.” 29 (Kholu Jesu a di gu li rumide gu khuye li duga ga mwama wule. Liphuvbo lile li di gu mu tshanisa dzitepo nya dzingi nigu va di gu tala gu mu hunga mawundru ni mawogo khu dzikorenti, va mu ghadha, ganiolu uye a di gu phinuleya dzikorenti, a yiswa giwulani khu lidhimoni.) 30 Jesu a di mu wudzisa, khuye: “Khuwe mani?” A di hlamula, khuye: “Kheni gikwata.” Kholu a di gu mbakidwe khu madhimoni nya mangi. 31 Ma di lomba Jesu gasi a si ma tutumisi ma hongola phalani nyo ete. 32 Vbafuvbyana mule gu diri ni dzikhumba nya dzingi dzi nga ba dzi haviswa gigomoni. Khu kharato, ayo ma di mu lomba gu khayo a ma dzumeleya gu ya beya dzikhumbani. Uye a di ma dzumeleya. 33 Madhimoni ma di duga ga mwama wule ma beleya dzikhumba. Idzo dzi di tutuma dzi ya ndraga dzi thegeya matini, dzifa. 34 Tepo vahavisi nya dzikhumba va nga wona isoso, va di tutuma va ya embeya ava va nga ba va khala dhoropani ni ava va nga ba va khala bambe nya lidhoropa esi si nga girega.

35 Vathu va di duga gasi gu ta wona esi si nga dugeleya. Tepo va nga hidzimeleya Jesu, va di wona mwama wule a nga duswa madhimoni na ambade sombo, na dzi khota gwadi, na khade migondroni ga Jesu, va thava. 36 Ava va nga si wona va di va embedzeya edzi mwama wule a nga ba ari ni madhimoni a nga hawulugiswa khidzo. 37 Vathu nya vangi va gipandreni gya Vagerazi, va di lomba gu khavo Jesu a khuga khu tigoni gwawe, kholu va di gu thava ngudzu. Khu kharato, uye a di beya ngalavani gasi gu hongola. 38 Mwama wule a nga ba a dusidwe madhimoni, a di mu lomba gu khuye a hongola naye, ganiolu Jesu a di mu himbedzeya, khuye: 39 “Gimbiya gaya, simama gu ganeya khesi Nungungulu a gu giredego.” Mwama wule a di hongola, na gu huweleya dhoropani gwatshavbo esi Jesu a nga mu gireya.

40 Tepo Jesu a nga wuya, gitshungu gi di mu hakha gwadi kholu vatshavbo va di gu mu vireya. 41 Gu di vboha mwama moyo nyo pwani khu Jayiro a nga ba ari muthangeyi nya sinagoga. A di ya khidzima migondroni ga Jesu a mu lomba gu khuye a hongola gaya gwaye, 42 kholu gyanana gyaye gyagimwegyo nya gyagadzyana gi nga ba giri ni tanga nya 12 myaga, gi diri vbafuvbi ni gufa.

Tepo Jesu a nga ba a hongola, gitshungu gi di gu mu gundra. 43 Gu diri ni nyamayi moyo a nga ba ari ni madwali nyo dugeleye novba khu 12 myaga nigu mwalo a nga si kodza gu mu hawulugisa. 44 Nyamayi wule a di hidzimeleya Jesu khu hwane, a ya kuha matshakafula nya ngandzu yaye. Novba wu di dzegeya gu ema gu duga. 45 Khavbovbo, Jesu a di wudzisa gu khuye: “Khu mani a nga nyi kuha?” Kha nga olu vatshavbo va nga ba va bomba, Pedro a di khuye: “Muhevbudzi, u randredwe khu vathu nya vangi nigu va ngu gu gundra.” 46 Ganiolu Jesu a di khuye: “Womo a nga nyi kuha kholu nyi pwide tshivba na yi duga khavbo gwangu.” 47 Tepo nyamayi wule a nga wona gu khuye tugudwe, a di hidzimeleya Jesu na gu ndrendremeya a ya khidzima, a ganeya na gu pwidwa khu vatshavbo egi gi nga mu gira a mu kuha ni edzi a nga dzegeya gu hawuluga khidzo. 48 Ganiolu, Jesu a di mu embeya, khuye: “Mwanangu, gukhodwa gwago gu gu vbanyiside, gimbiya khu gurula.”

49 Na nga gu ganeya, gu di vboha muemeyi wa muthangeyi wule nya sinagoga, a ta khuye: “Gyanana gyago gi fude, u nga garadzi gambe Muhevbudzi.” 50 Tepo Jesu a ngapwa isoso, a di khuye: “U nga thavi, khodwa basi, gyanana gyago gi na vbanyiswa.” 51 Tepo a nga vboha ndrangani, kha dzumeleya mumbe muthu gu beya nyumbani, vbavbandze ga Pedro, Johane, Jakobe ni vavelegi nya gyanana. 52 Ganiolu, vatshavbo va di gu liya ni gu dzi veteleya dzikhana khu gugaradzega. Jesu a di va embeya, khuye: “Mu nga liyi, kholu gyanana kha gyafa, gi di lala.” 53 Khu kharato, va di mu hega kholu va di gu dziti gu khavo gyanana gi fude. 54 Ganiolu, Jesu a di gi phara khu libogo a gi rana, khuye: “Nyamahegyane, wuga!” 55 Gyanana gile gi di dzegeya gu wuga,* Jesu a va ruma gu khuye va gi ninga gilo nya gu hodze. 56 Vavelegi vagyo va di tsaka ngudzu, ganiolu Jesu a di va laya gasi va si embeyi muthu esi si nga girega.

9 Khavbovbo, a di rana vapizane vaye nya 12, a va ninga tshivba nya gu tutumise madhimoni ni gu hawulugisa madwali, 2 a bwe a va rumeya gu gimbiya va tshumayela Mufumo wa Nungungulu ni gu hawulugisa, 3 a va embeya, khuye: “Mu nga dongi gilo, ne ndronga, ne pasta nya dzimbuva, ne pawu, ne dzitsapawu,* ne sombo nya guvbindrugedze.* 4 Ganiolu ni yevbini ndranga mu na beyago, khalani avbovbo kala mu duga khu gipandreni momo. 5 Ganiolu ni hayini va na gu mba mi hakha, tepo mu dugago khu dhoropani momo, phuphuthani kudzudzwane migondroni gwanu gasi si khala wufakazi gwawe.” 6 Khavbovbo, va di khuga va beya khu alidheya ni alidheya na va gu huweleya mahungu nya yadi ni gu hawulugisa vathu va malangani yatshavbo.

7 Tepo Herodhi,* ghovhernadhori nya dhistrito, a ngapwa satshavbo si nga ba si dugeleya, a di hamuga ni gilo nyo gire kholu vambe va di gu khavo Johane wusidwe khu ga vafudego, 8 ganiolu vambe va di gu khavo khu Eliya a nga wuya, vambe gambe va di gu khavo Moyo nya muprofeti wa gale a nga wuga. 9 Herodhi a di khuye: “Eni nyi rumide gu kheni Johane a pidwa hungo, ahati oyu va gu pwani a ngu gira satshavbo sesi, khu mani?” Uye a di gu vbweta gu mu wona.

10 Tepo vapostoli va nga wuya, va di ta embedzeya Jesu satshavbo va nga gira. Khavbovbo, a di va dzega a hongola navo dhoropani ga Bhetisayidha gasi va ya khala vonga. 11 Tepo vathu va nga si tugula, va di mu landra. Jesu a di va hakha gwadi, a va hevbudza maningano ni Mufumo wa Nungungulu a bwe a hawulugisa ava va nga ba va dwala. 12 Tepo li nga pfola, ava nya 12 va di mu hidzimeleya, va ya khavo: “Embeya vathu va hongola dzialidheyani ni sipandreni sa vbafuvbyana momu gasi va ya mana wulanga nyo lale ni gilo nyo hodze kholu avba hi gomogo mugiwulani.” 13 Ganiolu a di va embeya, khuye: “Va ningeni enu gilo nyo hodze.” Avo va mu hakha, khavo: “Hi mwalo gilo avba, ho wa ni 5 dzipawu ni dzindzandzi dzimbili basi. Mwendro hi hongola ethu hi ya renga guhodza gasi gu ninga vathu vatshavbo vava.” 14 Vbale gu diri ni tanga nya 5000 vama. Ganiolu a di embeya vapizane, khuye: “Va rumeni va khala khu mitsawa nya 50 vathu.” 15 Avo va di gira kamo isoso, va va ruma gu khavo vatshavbo va khala. 16 A di dzega 5 dzipawu ni dzindzandzi dzimbili, a khedza ndzadzini a si kategisa. Hwane nya gu ba a si pilelede, a di ningeya vapizane vaye gasi va kabaniseya gitshungu. 17 Vatshavbo va di hodza va khura, va hengeledzeya sipandre si nga tshala, si tadza 12 mirava.*

18 Litshigu limwedo na gu gombeya enga, vapizane va di mu hidzimeleya. Uye a di va wudzisa, khuye: “Gitshungu gyari khigyo kheni mani?” 19 Va di hlamula, khavo: “Johane Mubhabhatisi, ganiolu vambe vari khavo khuwe Eliya, vomo gambe va gu khavo u moyo nya vaprofeti va gale a nga wuga.” 20 Khavbovbo, a di va wudzisa, khuye: “Enu ke, mwari khenu kheni mani?” Pedro a di mu hlamula, khuye: “Uwe khuwe Kristo wa Nungungulu.” 21 Khavbovbo, Jesu a di va laya gasi va si embeyi muthu 22 a bwe a va embeya, khuye: “Gyanana nya muthu gi yede gu tshaniseka ngudzu, gi nyenywa khu madhota ni vaprista nya vakhongolo ni valovi nigu gi yede gu songwa, gi wuswa hwane nya matshigu mararu.”

23 Khavbovbo, a di embeya vatshavbo, khuye: “Uye a vbwetago gu nyi landreya, a na dzi dige, a rwala simbo waye nya tshanisa,* tshigu ni tshigu, a simama gu nyi landreya. 24 Kholu oyu a vbwetago gu vbulugisa womi waye a na wu luza, ganiolu ni wevbini a luzago womi waye khu kotani yangu khuye a na wu vbulugisago. 25 So phasa ginani gu muthu a mana litigo latshavbo, ganiolu a luza womi waye mwendro gu dzi vbweteya sigaradzo? 26 Kholu ni wevbini a pwago dzitshoni khu gu khala mupizane wangu ni gu khodwa mahungu yangu, Gyanana nya muthu nigyo gi na ta mu khaleya dzitshoni tepo khiyo gi na tago khu wudhumo wagyo ni wudhumo wa Papayi wagyo ni dzingilozi nya guage. 27 Khu lisine nyi ngu mi embeyani gu kheni, vomo va gomogo avba va na gu mba linga gufa na va si woni Mufumo wa Nungungulu.”

28 Hwane nya gu ba gu vbindride gipimo nya 8 matshigu na ganede malito yaya, a di dzega Pedro, Johane ni Jakobe a gweya navo gigomoni gasi guya gombeya. 29 Tepo a nga ba a gombeya, khovbe yaye yi di vbindrugedza, sombo saye si khendziga. 30 Gu di dugeleya vama vavili va nga ba va bhula naye; gu diri Mosi ni Eliya. 31 Avo va di gu tade khu wudhumo nigu va di gu ganeya khu gu hongola gwaye gu nga ba guri vbafuvbi ni gu tadzisega Jerusalema. 32 Pedro ni ava a nga ba ari navo va di gu lade, ganiolu tepo va nga khendzuga, va di wona wudhumo waye ni vama vavili a nga ba ari navo. 33 Tepo vama vale va nga ba va hongola, Pedro a di embeya Jesu, khuye: “Muhevbudzi, si ngu tsakisa gu khala avba. Hongoleni hi tsitsa matendra mararu, limwedo lago, limbe la Mosi, limbe la Eliya.” Uye kha nga ba a giti ni egi a nga ba a ganeya. 34 Na ngo ganeya, va di pheya gu fenengedzwa khu lipfhi. Tepo li nga va fenengedza khu guvbeleya, va di thava. 35 Khavbovbo gu di pwala lito khomu nya lipfhi na li gu khilo: “Egi Gyanana gyangu gi hathidwego! Gi engiseni.” 36 Tepo gu nga pwala lito, Jesu a di tshala enga. Ga matshigu yale, va di degula naso va si embeyi muthu esi va nga si wona.

37 Khu litshigu li nga landreya, tepo va nga tshiga khu gigomoni, a di khingwa khu vathu nya vangi. 38 Vbakari gwawe, a di duga mwama a nga khusedza lito, khuye: “Muhevbudzi, nya gu lomba gu kheni u phasa gyanana gyangu, kholu khigyo gya gimwegyo basi nyi gu nagyo. 39 Gu na ni lidhimoni li mu tshanisago; gu mu beleya li mu beleyago, a gu womba huwa, li mu thesa vbavbatshi khu gitshira, a pupuma liguvi khu kanani. Li ngu garadza gu mu diga, la gu mu diga basi hwane nya gu ba li mu bayisede. 40 Nyi lombide vapizane vago gasi gu li tutumisa ganiolu kha va li kodza.” 41 Jesu a di hakha, khuye: “Enu gitugulwana nya gu mba khodwa, nya guvivbedwe khu monyo, nyi na khala nanu kala lini? Nyi na mi timiseyani kala lini? Gi rese eno.” 42 Tepo gyanana gile gi nga ba gi hidzimeya, lidhimoni li di gi thesa vbavbatshi, li gi ndrendremedzisa khu tshivba ni tshivba. Ganiolu Jesu a di kawuka liphuvbo lile nya guvivbe* a hawulugisa gyanana, a gi ningeya ga papayi wagyo. 43 Vatshavbo va di hlamala khu gu wona tshivba nya yikhongolo ya Nungungulu.

Tepo vatshavbo va nga ba va hlamala khu gu wona esi Jesu a nga ba a gira, a di embeya vapizane vaye, khuye: 44 “Engiseyani gwadi malito yaya mu bwe mu ma dundruga: Gyanana nya muthu gi na ningedwa mandzani nya vathu. 45 Ganiolu kha va si pwisisa esi a nga ganeya. Khu lisine, avo va di sihedwa gasi va si si pwisisi nigu va di gu thava gu mu wudzisa maningano ni isoso.

46 Khavbovbo, va di pheya gu ganedzisana khu gu khavo khu mani a gu khongolo vbakari gwawe. 47 Kha nga olu Jesu a nga ba ati esi va nga ba va si pimisa, a di dzega gyanana a gi emisa bambe gwaye, 48 a va embeya, khuye: “Uye a hakhago gyanana gegi khu lina langu a ngu nyi hakha neni nigu oyu a nyi hakhago a ngu hakha gambe ni Wule a nyi rumedego. Kholu oyu a dzi girago dugwana vbakari gwanu, khuye a gu khongolo.”

49 Johane a di hakha, khuye: “Muhevbudzi, hi wonide muthu na gu tutumisa madhimoni khu lina lago hi zama gu mu himbedzeya kholu uye kha gu landreyi gumogo ni ethu.” 50 Ganiolu, Jesu a di mu embeya, khuye: “U nga zami gu mu himbedzeya kholu oyu a si gu wugeyigo a gu ema ni uwe.”

51 Kha nga olu yi nga ba yi vboha tepo yaye nya gu a dzegwa a hongola ndzadzini, uye a di dzi emiseya gu hongola Jerusalema. 52 A di rumeya vambe nya vapizane vaye va ba va thanga. Avo va diya beya ga mweyo nya dzialidheya dza Vasamariya gasi gu mu dongiseleya wulanga nyo hefemule. 53 Ganiolu, Vasamariya kha va mu hakha kholu uye a di dzi emisede gu hongola Jerusalema. 54 Tepo Jakobe ni Johane va nga wona isoso, va di khavo: “Pfhumu, u ngu dzina gu khuwe hi ranisa nilo khu ndzadzini gasi gu ta va fuvisa?” 55 Ganiolu, Jesu a di thendregedza a va kawuka. 56 Khavbovbo, va di hongola ga yimbe alidheya.

57 Tepo va nga ba vari ndziyani, gu di dugeleya muthu, a nga khuye: “Eni nyi na gu landreya ni hayini u na hongolago.” 58 Ganiolu, Jesu a di mu embeya, khuye: “Migehe yi na ni mavbala yayo, ni sinyoni sa damboni si na ni sisakha* saso, ganiolu Gyanana nya muthu gi mwalo ni wulanga nyo vege hungo.” 59 Khavbovbo, uye a di embeya mumbe, khuye: “Nyi landreye.” Uye a di mu hakha, khuye: “Pfhumu, nyi dige nyi hongola nyi ya dzinga papayi wangu gupheya.” 60 Ganiolu, Jesu a di mu embeya, khuye: “Diga vafi va dzinga vafi vawe ganiolu uwe gimbiya u ya huweleya Mufumo wa Nungungulu.” 61 Mumbe a di khuye: “Pfhumu, eni nyi na gu landreya, ganiolu nyi dige nyi pheya khu gu ya vbangana valongo vangu.” 62 Jesu a di mu hakha, khuye: “Watshavbo a pharago liphadza nya dzimombe a vbedza a khedza hwane kha ninganedwi khu Mufumo wa Nungungulu.”

10 Hwane nya isoso, Pfhumu yi di hatha gambe 70 vathu yi va rumeya vavili-vavili va ba va thanga va hongola omu nya madhoropa yatshavbo ni malanga yatshavbo a nga hadzi gu hongola. 2 Uye a di va embeya, khuye: “Khu lisine, thumo nya guvbwere wukhongolo, ganiolu sithumi sidugwana. Khu kharato, lombani mune thumo gasi a mi rumeleya sithumi, thumoni waye nya guvbwere. 3 Gimbiyani! Nyi ngu mi rumeyani kha nga dzinvuta vbakari nya masolwa. 4 Mu nga dzegi gipatsi, ne pasta nya dzimbuva, ne dzisandaliya nigu mu nga losi muthu ndziyani. 5 Ni ga yevbini ndranga mu na beyago, pheyani khu gu khenu: ‘Gurula gu na manege ndrangani momu.’ 6 A gu ba a romo muthu a golago gurula ndrangani momo, gurula gwanu gu na khale naye, ganiolu a gu ba ari mwalo nago, ugo gu na bweleye gwanu. 7 Khalani ndrangani momo, mu hodza ni gu seya esi va na mi ningago kholu githumi gi ngu yedwa khu gu hakha tshatshazelo wagyo. Mu nga khugi khu ndrangani momo mu gimbiya mu vbweta mambe malanga nya gu khale.

8 Nigu ni ga levbini lidhoropa mu na beyago, va gu mi hakha, hodzani esi va na mi ningago. 9 Hawulugisani vadwali mu na va manago, mu va embeya gu khenu: ‘Mufumo wa Nungungulu womo vbafuvbi gwanu.’ 10 Ni levbini lidhoropa mu na beyago, vathu va si mi hakhi, dugani mu hongola omu nya dziruwa nya lidhoropa lolo, mu ya khenu: 11 ‘Ethu hi na phuphuta ambari ni kudzudzwane nya lidhoropa lanu wu gomogo migondroni gwathu gasi si khala wufakazi gwanu. Ganiolu, dzitini gu khenu Mufumo wa Nungungulu womo vbafuvbi.’ 12 Nyi ngu mi embeyani gu kheni: Khu litshigu lolo si na vbevbuga ga Sodhoma guvbindra ga lidhoropa lolo.

13 “Libango gwago Khorazini, libango gwago Bhetisayidha, kholu sisamadziso si giridwego omu gwanu nari khatshi si di girwa Tiro ni Sidhoni avo na va vbindrugedzide gale, va ambala dzisaku va bwe va khala ngumani. 14 Khu kharato, khu litshigu nya gu lamudwe si na vbevbuga ga Tiro ni Sidhoni guvbindra gwanu. 15 Ahati uwe Kafarinawume, wo pimisa gu khuwe u na khusedzwa kala ndzadzini? U dzi pembide, u na releya kala thowoni!

16 “Uye a mi engiseyago a ngu nyi engiseya neni. Oyu a si theyigo kota khenu kha theyi kota gambe kheni. Nigu oyu a si theyigo kota kheni kha theyi kota khu wule a nyi rumedego.”

17 Vale nya 70 va di wuya na va tsakide, va ta khavo: “Pfhumu, ambari ni madhimoni ma ngu hi engisa kholu hi thumisago lina lago.” 18 Khu kharato, uye a di va embeya, khuye: “Nyi ngu wona Sathane na thegide kha nga gulasa ga ndzadzini. 19 Nyi mi ningide wufumu nyo gandredzeye dzinyoga ni dzihume, ni tshivba nyo pale nala ni dzitshivba dzaye nigu gi mwalo gi na mi bayisago. 20 Ambari ulolo, mu nga tsakini khu gu ba mu engiswa khu maphuvbo, ganiolu tsakani khu gu ba malina yanu ma lovidwe ndzadzini.” 21 Khu gitepwana gile kamo, uye a di tala khu gutsaka khu kotani nya liphuvbo nya guage, khuye: “Nyi ngu gu dhumisa vbakari nya vathu vatshavbo, Papayi, Pfhumu nya ndzadzi ni mafu, kholu u sihede silo sesi vathu nya gugengeye ni va nya guti ngudzu, ganiolu u si tivegisa ga vathu nya gu dzi nogise nga sanana nya sidugwana. Ina Papayi, kholu u si wonide na siri sadi gu si gira khu ndziya yeyi. 22 Satshavbo nyi ningidwe khu Papayi wangu. Mwalo a gi tigo gwadi Gyanana vbavbandze ga Papayi nigu mwalo a mu tigo gwadi Papayi vbavbandze ga Gyanana ni wule Gyanana gi dzinago gu mu hevbudza maningano ni Papayi wagyo.”

23 Jesu a di thendregedza a khedza vapizane vaye, a va embeya vonga, khuye: “Ma ngu tsaka maho ma wonago silo mu si wonago. 24 Khu lisine nyi ngu mi embeyani gu kheni: Vaprofeti nya vangi ni dzipfhumu va dzinide gu wona esi mu si wonago enu, ganiolu kha va si wona. Va dzinide gupwa esi mu si pwago, ganiolu kha va sipwa.”

25 Khavbovbo, muhevbudzi moyo nya Nayo a di khuga gasi gu mu linga, khuye: “Muhevbudzi, ginani nyi yedego gu gira gasi nyi mana womi nya gupindruge?” 26 Jesu a di mu wudzisa, khuye: “Ginani gi lovidwego omu nya Nayo? Wa gu wu pwisisa kharini?” 27 A di mu hlamula, khuye: “‘Haladza Jehovha Nungungulu wago khu monyo wago watshavbo, khu hefemulo* wago watshavbo, khu tshivba yago yatshavbo ni mapimo yago yatshavbo’ nigu ‘haladza muthu-kwanu nga edzi u dzi haladzago khidzo.’” 28 Jesu a di mu embeya, khuye: “Khiso u ganedego, simama gu gira isoso u na mana womi.”

29 Ganiolu, na gu vbweta gu dzi yeyedza gu khuye lulamide, mwama wule a di wudzisa Jesu, khuye: “Gwadi-gwadi khu mani muthu-kwathu?” 30 Jesu a di mu hlamula, khuye: “Mwama moyo a di gu releya khu Jerusalema na gu hongola Jeriko, a di tshangana ni dzimbafa, idzo dzi di mu tshula sombo, dzi mu veta dzi mu diga dzi hongola nari vbafuvbi ni gufa. 31 Si di kotsana na gu vbindra muprista khu vbale, ganiolu tepo a nga mu wona a di leya a hongola. 32 A di vbindra nuye Mulevhi khu vbale, ganiolu tepo a nga mu wona a di leya a hongola. 33 Ganiolu, Musamariya moyo a nga ba a vbindra khu vbale, tepo a nga mu wona a di mu pweya. 34 A di mu hidzimeleya, a ya theya mafura ni vhinyu omu nya silondra saye, a si hungeleya. Khavbovbo, a mu khiledza avba nya buru yaye a hongola naye ndrangani nya vaendri a ya mu sayisa. 35 Khu mindru gakona a di dusa dzidhenariyu* dzimbili a ningeya ga mune ndranga a mu embeya, khuye: ‘Mu sayise gwadi, wa gu thumisa silo nya guvbindre dzitsapawu dzedzi, nyi na ta gu ninga tepo nyi na wuyago.’ 36 Khu mawonelo yago, khu mani ga vama vava vavararu a nga khala muthu-kwawe ga mwama wule a nga tshangana ni dzimbafa?” 37 Uye a di hlamula, khuye: “Khu wule a nga mu gireya wuhindzi.” Jesu a di mu embeya, khuye: “Gimbiya nuwe u ya gira sasimweso.”

38 Na va gu hongola, va di beya omu nya alidheya mweyo. Nyamayi moyo nyo pwani khu Marta a di mu hakha kha nga pfhumba ndrangani gwaye. 39 Uye a diri ni ndriye nyo pwani khu Mariya, uye a nga ya khala migondroni ga Pfhumu, a engiseya esi a nga ba a ganeya. 40 Ganiolu, Marta a di gu pfhade khu mithumo nya yingi. Khu kharato uye a di hidzimeleya Jesu a ya mu embeya, khuye: “Pfhumu, khu theyi kota kholu ndriyangu a nyi digedzago mithumo yatshavbo? Mu embeye a ta nyi phasa.” 41 Pfhumu a di mu hakha, khuye: “Marta, Marta, wa gu garadzega ni gu dzi hita khu silo nya singi. 42 Ganiolu, sidugwana si vbwetegago, mwendro gimwegyo basi. Mariya hathide esi nya sadi nigu kha na nga dzegedwa khu muthu.”

11 Litshigu limwedo, Jesu a di romo wulanga nyo khaguri na gu gombeya. Tepo a nga vbedza, moyo nya vapizane vaye a di mu embeya, khuye: “Pfhumu, hi hevbudze gu gombeya kha nga Johane a nga hevbudza vapizane vaye.”

2 Jesu a di mu hakha, khuye: “Tepo yatshavbo mu gombeyago ganeyani, khenu: ‘Papayi, lina lago li na agiswe. Mufumo wago wu nate. 3 Hi ninge guhodza* hi na gu vbwetago tshigu ni tshigu. 4 Hi divaleye sighoho sathu kholu anethu hi ngu divaleya vale va hi ghoheyago; u nga hi digi hi thegeya silingoni.’”

5 A di va embeya gambe, khuye: “Nga dundrugeyani moyo wanu nari ni pari, a yi yela ni vbakari nya wutshigu, a ya khuye: ‘Pari yangu, nga nyi lomba dzipawu dziraru, 6 kholu nyi endredwe khu pari yangu, ganiolu nyi mwalo gilo nyo yi ninge.’ 7 Ganiolu uye a di mu hlamula khu nyumbani, khuye: ‘U nga nyi garadzi, lidimba li khothidwe nigu eni ni sanana sangu hi lade vbakamatunu. Kha si na nga kodzega gu nyi wuga nyi ta gu ninga gilo.’ 8 Nyi ngu mi embeyani gu kheni: Khu lisine uye a na wuga a mu ninga satshavbo a si vbwetago nasiri kholu a gu pari yaye, ganiolu khu kotani nya edzi a mu gurumedzago khidzo ni gu mu garadza. 9 Khu kharato, nyi ngu mi embeyani gu kheni: Simamani gu lomba, mu na ningwa; simamani gu vbwetedzeya, mu na si mana; simamani gu khokhotha, mu na tuledwa. 10 Kholu watshavbo a lombago a na ningwa, watshavbo a vbwetago a na si mana nigu watshavbo a khokhothago a na tuledwa. 11 Khu wevbini papayi vbakari gwanu a ningago nyoga gyanana gyaye na gi mu lombide ndzandzi? 12 Mwendro a gi ningago hume na gi mu lombide litandra? 13 Khu kharato, ambari enu mu vivbedwego khu myonyo mu kodzago gu ninga silo nya sadi sanana sanu, ahati Papayi wanu a gu romo ndzadzini, uye a na ninga liphuvbo nya guage vale va mu lombago!”

14 Khu hwane nya tepo uye a di tutumisa lidhimoni nya gidudu ga mwama nyo khaguri. Tepo lidhimoni li nga duga, mwama wule a di pheya gu ganeya, vathu va hlamala. 15 Ganiolu vambe gwawe va di khavo: “Uye a gu tutumisa madhimoni khu tshivba ya Bhelizebhu,* pfhumu nya madhimoni.” 16 Nigu vambe gasi gu mu linga va di mu lomba giwoniso gya ndzadzini. 17 Kha nga olu a nga ba a siti esi va nga ba va pimisa, a di va embeya, khuye: “Watshavbo mufumo wu dzi kabanisago, wu na thega, nigu ndranga ya gu kabanega kha yi na nga tiya. 18 Khu ndziya nya gufane, abari gu Sathane dzi kabaniside abune, wu na pindruga kharini mufumo waye? Kholu enu mwari khenu eni nya gu tutumisa madhimoni khu tshivba ya Bhelizebhu. 19 Abari gu eni nya gu tutumisa madhimoni khu tshivba ya Bhelizebhu, ahati sanana sanu ke, sa gu ma tutumisa khu tshivba ya mani? Khiso isoso si na girago va khala valamuli vanu. 20 Ganiolu abari gu nya gu tutumisa madhimoni khu nyala ya Nungungulu, khu lisine, Mufumo wa Nungungulu wu mi vbohede. 21 Mwama nya tshivba a gu ni matshari a gu ghadha ndranga yaye, dzithomba dzaye dzi na vhikedwa. 22 Ganiolu, a guta mwama nya tshivba guvbindra uye, a ta dwana naye a mu pala, a gu mu wandreya matshari yaye yatshavbo a nga ba a ma tumba a kabana ni vambe vathu esi a nga mu wandreya. 23 Uye a si emigo ni eni a ngu nyi wugeya, ni uye a si hengeledzeyigo ni eni a gu phalalegisa.

24 “Tepo liphuvbo nya guvivbe li dugago khavbo nya muthu, la gu vbindra khu malangani nya gihala,* na li gu gimbiya li vbwetedzeya wulanga nyo hefemule, la gu wu hamuga lo hegisa khu gu khilo: ‘Nyi na bweleya nyumbani gwangu nyi tago khumo.’ 25 Tepo li vbohago, la gu ya mana nyumba na yi vbiyedwe yi bwe yi mburisedwa. 26 Khavbovbo, lo bweleya li ya dzega 7 maphuvbo nyo vivbe guvbindra ilo ma ta beya nyumbani momo ma khala umo. Khu kharato, mavbanyelo ya mwama yoyo ma vivba ngudzu guvbindra edzi a nga ba ari idzo gupheyani.”

27 Na nga gu ganeya isoso, gu di dugeleya nyamayi khu vbakari nya gitshungu a khusedza lito, khuye: “A ngu tsaka nyamayi a gu velegidego ni gu gu mamisa!” 28 Jesu a di khuye: “Ne, ganiolu va ngu tsaka vale va pwago lito la Nungungulu va li landrisa!”

29 Tepo vathu va nga ba va engedzeyana, uye a di khuye: “Gitugulwana gegi gi vivbedwe khu monyo! Gya gu vbweta giwoniso, ganiolu gimwalo giwoniso va na ningwago nasiri egi gya Jona. 30 Kholu, kha nga olu Jona a nga khala giwoniso ga Vaninivha, Gyanana nya muthu nigyo gi na khala giwoniso ga gitugulwana gegi. 31 Pfhumu nya nyamayi ya sul* yi na wuswa gulamudwani ni vathu nya gitugulwana gegi yi bwe yi va ninga nandru, kholu yi khugide khu mahegiso nya litigo gasi gu tapwa wugengeyi wa Solomoni. Ganiolu avba womo oyu a gu khongolo guvbindra Solomoni. 32 Vathu va Ninivha va na wuswa gulamudwani ni gitugulwana gegi va bwe va gi ninga nandru kholu avo va vbindrugedzide tepo va nga tshumayedwa khu Jona. Ganiolu, avba womo oyu a gu khongolo guvbindra Jona. 33 Vathu vo khondrisa kandriya kha va yi vegi wulanga nyo sihale mwendro gu yi vega vbavbatshi nya rava,* ganiolu va gu yi vega vbatshani nya gilo gasi gu vale va beyago va mana guwonegeya. 34 Kandriya nya givili, liso. Liso lago la gu ba li wona gwadi, givili gyago gi na tala khu guwonegeya. Ganiolu liso lago la gu ba liri ni lidiwo,* givili gyago gyatshavbo gi na khala mugidemani. 35 Khu kharato, dzi woneye gasi guwonegeya u gu nago gu si khali gidema. 36 Khu kharato, givili gyago gyatshavbo gyo ba gi wenengedza, na giri mwalo wulanga nya gidema, gyatshavbo gi na wenengedza nga kandriya yi gu wenengedzago.”

37 Hwane nyo ganeye isoso, Mufarisi moyo a di mu lomba gasi gu ya hodza naye. Uye a di beya a ya khala vbamezatunu. 38 Ganiolu Mufarisi wule a di hlamala tepo a nga wona gu khuye Jesu kha pheya khu gu hamba* mandza gasi gu hodza. 39 Ganiolu Pfhumu yi di mu hakha, khiyo: “Enu Vafarisi, mwa gu handza kopo ni parato khu vbavbandze ganiolu khu ndrani mu tade khu wudogodogo* ni wuvivbi. 40 Sipumbo nenu! Wule a nga gira vbavbandze khandruye a nga gira gambe ndrani? 41 Khu kharato, gireyani silo nya sadi sisiwana, silo sanu satshavbo si na aga. 42 Libango gwanu Vafarisi, kholu mwa gu ningeya gipandre nya wukhume* ortela, ni arudha* ni mitongwe yatshavbo, ganiolu kha mu theyi kota khu gululama ni gu haladza Nungungulu! Mu di yede gu gira silo sesi, ganiolu nya mba diga gu gira esi simbe. 43 Libangu gwanu Vafarisi, kholu mwa gu gola dzikadera nya gu pheye dzisinagogani ni gu loswa omu gu tadego vathu.* 44 Libangu gwanu kholu mwa gu fana ni marowo yale ma si wonegigo, vathu va gimbiya khu vbatshani gwawo na va si dziti.”

45 Moyo nya vahevbudzi nya Nayo a di hakha, khuye: “Muhevbudzi, maganelelo yoyo wa gu hi vala nethu.” 46 Jesu a di mu hakha, khuye: “Libangu gwanu nenu vahevbudzi nya nayo, kholu mwa gu rwega vathu mithumo nya gu lemeye narigu enu kha mu yi kuhi ne khu nyala mweyo.

47 “Libangu gwanu, kholu mwa gu vbaheya marowo vaprofeti narigu va di songwa khu vakokwe vanu. 48 Khu lisine enu mu dzifakazi nya mithumo ya vakokwe vanu nigu mu ngu yi seketeya. Kholu avo va songide vaprofeti ganiolu enu mu ngu va vbaheya marowo. 49 Khiso si giridego guti ga Nungungulu nugo, khugo: ‘Nyi na va rumeleya vaprofeti ni vapostoli, avo va na songa ni gu tshanisa vambe vakona. 50 Gasi gu novba wa vatshavbo vaprofeti wu nga vbaladzwa gukhugeya guvangwani nya mafu wu hengudwa ga gitugulwana gegi. 51 Gukhugeya ga novba wa Abheli kala ga novba wa Zakariya, a nga songwa vbakari nya tempele ni alitari.’ Khu lisine nyi ngu mi embeya gu kheni wu na hengudwa ga gitugulwana gegi.

52 “Libangu gwanu vahevbudzi nya Nayo kholu mu dzegide dzipfhungulu dzi tulago vathu gasi vati Nungungulu. Enu kha mu beyi nigu mwa gu zama gu himbedzeya ava va dzinago gu beya.”

53 Tepo a nga khuga khu vbale, valovi ni Vafarisi va di pheya gu mu garadza ngudzu ni gu mu gira siwudziso nya singi, 54 na va gu mu riya gasi va kodza gu mu mana avba nya esi a na ganeyago.

12 Gu di hengeledzana dzimiliyoni nya dzingi nya vathu nyo bwe va gandrana. Khavbovbo, Jesu a di pheya gu ganeya ni vapizane vaye, khuye: “Dzi woneyeni ni livhirina* nya Vafarisi, a gu wupfhadzedzeyi, 2 kholu gimwalo gi sihidwego gwadi gi na gu mba tugudwa nigu gimwalo gi sihadego gi na gu mba tidwa. 3 Khu kharato, esi mu ganeyago gidemani si na pwidwa guwonegeyani nigu esi mu lembago nyumbani si na tshumayedwa vbatshani nya dzinyumba. 4 Dzipari dzangu, vbavbandze nya isoso, nyi ngu mi embeyani gambe, kheni: Mu nga thavi ava va songago givili, khavbovbo va si kodzi gu gira gambe gilo. 5 Ganiolu, nyi na mi yeyedza oyu mu yedego gu mu thava: Thavani wule a gu ni makodzelo nyo songe a bwe a rinya Gehena.* Nyi ngu mi embeyani gu kheni uyoyo khuye mu yedego gu mu thava. 6 Ina kha gu rengiswi 5 sinyoni nya sidugwana khu singerengere sivili nya tengo wa vbavbatshi? Ganiolu, gimwalo gi divadwago khu Nungungulu. 7 Ambari ni ndzudzu wa hungoni gwanu wu kotaredwe watshavbo. Mu nga thavi, kholu enu mu na ni lisima ngudzu guvbindra sinyoni nya singi.

8 “Nyi ngu mi embeyani gu kheni watshavbo a nyi dzumeyago mbeli nya vathu, Gyanana nya muthu nigyo gi na mu dzumeya mbeli nya dzingilozi dza Nungungulu. 9 Ganiolu, oyu a nyi bombago mbeli nya vathu, anuye a na bombwa mbeli nya dzingilozi dza Nungungulu. 10 Ni wevbini a na ganeyago guvivba khu Gyanana nya muthu a na divaledwa, ganiolu uye a valago liphuvbo nya guage kha na nga divaledwa. 11 Va gu mi yisa mitshanganoni* ga vathu va emisidwego khu wufumu ni ga dzipfhumu, mu nga garadzegi khedzi mu na ganeyago khidzo ni esi mu na ganeyago gasi gu dzi emeya, 12 kholu liphuvbo nya guage li na mu hevbudzani esi mu yedego gu ganeya khu tepo yoyo kamo.”

13 Khavbovbo, moyo a nga ba a romo avba nya gitshungu, a di khuye: “Muhevbudzi, embeya ndriyangu a kabana ni eni thomba.” 14 Uye a di hakha, khuye: “Ama sa, khu mani a nga nyi vega kha nga mulamuli mwendro kha nga mukabanisi wanu nya dzithomba?” 15 Khavbovbo, a di va embeya, khuye: “Gengeyani, mu bwe mu dzi woneya ni wudogodogo watshavbo, kholu ambari muthu a gu ba ari ni silo nya singi, womi waye kha wuti khu ga silo soso.” 16 A di va embeya gipimaniso gimwegyo, khuye: “Lithembwe la mwama nyo khaguri nyo ghanye li di fuma gwadi. 17 Khu kharato, a di pheya gu pimisa, khuye: ‘Nyi na rini olu nyi gu mwalo wulanga nyo vege esi nyi fumidego?’ 18 Khavbovbo, khuye: ‘Nyi na gira kharati: Nyi na tshungunula sisangala sangu, nyi vbaha nya sikhongolo, nyi na vega umo dzimbewu dzangu dzatshavbo ni silo sangu satshavbo. 19 Khavbovbo, nyi na dzi embeya, kheni: “Hefemula, hodza, seya, tangala kholu u vegedzede silo nya singi u na hodzago khu myaga nya yingi.”’ 20 Ganiolu, Nungungulu a di mu embeya, khuye: ‘Gipumbu wewe! Muhuno wutshigu u nafa. Khu mani a na tshalago ni satshavbo sesi u nga hengedzeya?’ 21 Esi khiso si giregago ni muthu a dzi hengeledzeyago dzithomba, ganiolu nari gisiwana ga Nungungulu.”

22 Khavbovbo, a di embeya vapizane vaye, khuye: “Khidzo kharato nyi mi embeyago khidzo, kheni: “Digani gu garadzega khu womi wanu, khu gu khenu mu na hodza ginani ni gu garadzega khu givili gyanu khu gu khenu mu na ambala ginani. 23 Kholu womi* wu na ni lisima ngudzu guvbindra guhodza nigu givili gi na ni lisima ngudzu guvbindra sombo. 24 Nga wonani vamahigunganye, avo kha va yali, ne kha va vbweri, ne va mwalo sisangala, ganiolu Nungungulu a ngu va khurisa. Ina enu mu mwalo lisima guvbindra sinyoni? 25 Khu mani vbakari gwanu khu kotani nya gugaradzege a kodzago gu laphisa womi waye? 26 Khu kharato, abari gu kha mu kodzi gu gira gilwana nya gidugwana nya nga igyogyo, khu ginani mu garadzegago ngudzu khu simbe silo? 27 Nga wonani edzi sifilori nya likhabi si dandrago khidzo, iso kha si thumi ne kha si soni sombo, ganiolu nyi ngu mi embeyani gu kheni ambari Solomoni, mufumoni waye watshavbo gima kha ambala nga gimwegyo nya iso. 28 Ambari nya gu khenu mwasi nya gu muhuno womo thembweni mindru wu rinywa niloni wu ambagiswago kharato khu Nungungulu, ahati enu ke? Vathu nya gukhodwa nya gudugwana! 29 Khu kharato, digani gu garadzega khu gilo nyo hodze ni gilo nyo seye ni gu digani gugaradzega ngudzu 30 kholu silo satshavbo sesi khiso va nya mayigo va dzi garadzeyago gu si mana, ganiolu Papayi wanu a ngu dziti gu khuye mu ngu si vbweta. 31 Vbavbandze nya isoso, simamani gu vbwetedzeya Mufumo waye, esi simbe mu na engedzedwa.

32 “Mu nga thavi, tshambi-dugwana, kholu gudzina ga Papayi wanu gu mi ningani Mufumo. 33 Rengisani silo sanu, mu phasa sisiwana, sonani sipatsi si si hagaligu, a gu thomba yi si vbeyigo ndzadzini, iyo mbafa yi si vbohigo ni gu mba hodzwa khu muhwa. 34 Kholu avbo yi gomogo thomba yago khavbo gambe wu gomogo monyo wago.

35 “Khalani na mu hungide siwunu sanu khu libhandri,* na mu khondriside dzikandriya dzanu. 36 Dzi gireni sithumi si vireyago pfhumu yaso gu wuya khu mutshadhotunu, gasi gu ya gu vboha, yi khokhotha lidimba, si dzegeya gu yi tuleya. 37 Si kategide sithumi sile si na ta manwago khu pfhumu yaso na si gu khedziseya, khu lisine nyi ngu mi embeyani gu kheni: Uye a na ya vbindrugedza sombo a embeya sithumi saye gu ya khala vbamezatunu a bwe a si theleya guhodza. 38 Si ngu tsaka, ambari a gu vboha ni wutshigu* mwendro ni mambagugya* a ta si mana na si dongide. 39 Ganiolu, dzitini gu khenu nari khatshi mune ndranga a ngu yiti ora yi na tago khiyo mbafa na sa diga nyumba yaye yi pandrwa. 40 Anenu khalani na mu dongide, kholu Gyanana nya muthu gi nata khu ora mu gu mba yi pimisa.”

41 Pedro a di wudzisa, khuye: “Pfhumu, gipimaniso gegi wo embeya ethu basi mwendro wo embeya vathu vatshavbo?” 42 Pfhumu a di hakha, khuye: “Khu mani gwadi-gwadi githumi nya gutumbege ni nya gugengeye, egi pfhumu yagyo a na gi hathago gasi gu sayisa sithumi saye, gi si ninga guhodza khu tepo yakona? 43 Gi kategide githumi gyogyo pfhumu yagyo ya gu wuya yi ta gi mana na gi gira isoso! 44 Khu lisine nyi ngu mi embeyani gu kheni: Uye a na gi ninga thumo nya gu woneleye satshavbo a gu naso. 45 Ganiolu, githumi gyogyo gya gu ganeya monyoni gwagyo, khigyo: ‘Pfhumu yangu yi ngu hweya,’ gi pheya gu veta sithumi, gi hodza, gi seya ni gu leva, 46 pfhumu nya githumi gyogyo yi nata khu litshigu gi gu mba li vireya ni ora gi gu mba yiti, yi na ta gi tsayisa khu tshivba yi gi rinya wulanga wawumowo ni vathu nya mba tumbega. 47 Githumi gile gi nga pwisisa gugola ga pfhumu yagyo, ganiolu gi si dzini gu gira esi gi nga rumwa khu pfhumu yagyo, gi na vetwa ngudzu. 48 Ganiolu, gile gi nga mba pwisisa, gi gira silo gi yedego gu tsayiswa khiso gi na vetwa vbadugwana. Khu lisine, ni wevbini a nga ningwa silo nya singi a na hengudwa nya singi, oyu a nga ningwa thumo nya wungi a na hengudwa silo nya sikhongolo ngudzu.

49 “Nyi tede gu ta rotha nilo mafuni, olu wu khondrago nyi nga gira gambe ginani? 50 Khu lisine, nyi na ni bhabhatiso nyi yedego gu bhabhatiswa khuwo nigu nyi ngu tshaniseka ngudzu kala wu tadzisega. 51 Mwa gu pimisa gu khenu nyi tede gu ta resa gurula mafuni? Nyi ngu mi embeyani gu kheni ahihi, wulangani nya isoso nyi di resa guhambana. 52 Gukhugeya olu, gu na manega guhambana ndrangani. Go ba guri ni 5 vathu, vararu va na wugeya vavili, vavili va na wugeya vararu. 53 Papayi a na wugeya gyanana gyaye nya gikhwathana, lidzaha li na wugeya papayi walo, mamayi a na wugeya gyanana gyaye nya gyagadzyana, gyagadzyana gi na wugeya mamayi wagyo, nasale a na wugeya ngadzamwane waye nigu ngadzamwane a na wugeya nasale waye.”

54 A di embeya gambe gitshungu, khuye: “Mwa gu wona lipfhi na lita khu muhwa-dambo mo dzegeya gu khenu: ‘Gi nguta gingulu,’ si girega kamo. 55 Yo furugedza phuvbo khu sul* mo ganeya, khenu: ‘Li na manega lithonga,’ li manega kamo. 56 Vapfhadzedzeyi nenu! Mu ngu kodza gu tshamuseya makhalelo nya mafu ni ndzadzi, khu ginani mu hangwago khu gu tshamuseya tepo yeyi? 57 Khu ginani mu si tuguligo khu mwabune esi si lulamidego? 58 Khu giyeyedzo, wa gu ba u hongola tribhunali ni oyu u dwanisanago naye, na mu ngari ndziyani dzi garadzeye gu lulamisa sigaradzo sanu gasi a si yi gu ningeya ga mulamuli, mulamuli a gu ningeya ga ghadhi nya lipaso, ghadhi nya lipaso yi gu khotheya. 59 Nyi ngu gu embeya, kheni: Khu na nga duga khu mule na wu nga si livbi dzitsapawu dzatshavbo.”

13 Khu tepo yile, vambe va nga ba vari vbale, va di mu bhuleya khu Vagalilewu ava Pilato a nga pata novba wawe ni miphaso yawe. 2 Jesu a di va hakha, khuye: “Mo pimisa gu khenu Vagalilewu vovo va nga dugeledwa khu silo soso va diri sighohi nya sikhongolo guvbindra vambe Vagalilewu? 3 Nyi ngu mi embeyani, kheni: Ahihi! Ganiolu, mwa gu mba dzi laya, mwatshavbo mu na fuviswa khu ndziya yamweyo. 4 Mwendro mo pimisa gu khenu vale nya 18 va nga thegedwa khu nyumba nya gulaphe ya Silowe yi va songa va diri sighohi nya sikhongolo guvbindra vathu vatshavbo va vbanyago Jerusalema? 5 Ahihi. Ganiolu, mwa gu mba dzi laya, mwatshavbo mu na fuviswa nga avo.”

6 Khavbovbo, a di va embeya gipimaniso gegi: “Mwama moyo a diri ni nguyu* wu nga ba wu yadwe thembweni gwaye nya miuvha. A di ya wu khedza gasi gu wona gu khuye wu ni mihandro mwendro ne, ganiolu kha mana gilo. 7 Uye a di embeya mwama wule a nga ba a sayisa lithembwe laye, khuye: ‘Gu na ni myaga miraru na nyi guta nyi ta khedza mihandro omu nya nguyu yoyu, ganiolu kha nyi mani gilo. Wu piye, kholu wo dzega wulanga mahala.’ 8 Musayisi wule a di mu hakha, khuye: ‘Pfhumu, wu dige mwaga moyo basi. Nyi na kela tshinani gakone, nyi theya xitrumi. 9 Wa gu velega mihandro mindru wa tshigu, khavbo gwadi. Ganiolu wa gu mba velega, wu piye.’”

10 Jesu a di gu hevbudza ga mweyo nya dzisinagoga khu Sabhadho. 11 Gu diri ni nyamayi a nga ba ari ni liphuvbo nya guvivbe li nga mu dwadzisa khu 18 myaga. Uye a di gu gimbiya na nogide, a di si kodzi gu ololoka. 12 Tepo Jesu a nga mu wona, a di mu embeya, khuye: “Nyamayi wewe, hawuluga madwali yago.” 13 Jesu a di mu handzega mandza, khavbovbo nyamayi wule a dzegeya gu ololoka, a pheya gu dhumisa Nungungulu. 14 Tepo muthangeyi nya sinagoga a nga wona gu khuye Jesu hawulugiside muthu khu Sabhadho, a di goroga, a embeya gitshungu, khuye: “Gu na ni 6 matshigu gu dzumeledwago gu thuma, khu kharato deluni khu matshigu yoyo mu ta hawulugiswa, mu ngati khu Sabhadho.” 15 Pfhumu Jesu a di hakha, khuye: “Vapfhadzedzeyi nenu! Khu mani vbakari gwanu a si tshuligu mombe mwendro buru yaye a ya yi sedzisa mati khu Sabhadho? 16 Ina kha sa nga ba si yede gu nyamayi yoyu a gu gyanana gya Abrahama, a tshanisidwego khu Sathane khu 18 myaga, a tshudwa avba nya gigaradzo gegi khu litshigu nya Sabhadho?” 17 Tepo a nga ganeya isoso, vawugeyi vaye vatshavbo va di khala dzitshoni. Ganiolu, gitshungu gi di tsaka ngudzu khu kotani nya satshavbo silo nya sadi a nga gira.

18 A di bwe khuye: “Mufumo wa Nungungulu wa gu fana ni ginani? Nyi nga wu fananisa ni ginani? 19 Wa gu fana ni mbewu nya ginapi eyi muthu a yi dzegidego a ya yala thembweni gwaye. Mbewu yi di dandra yi khala simbo, sinyoni si ta gira sisakha* omu nya matamo yakone.

20 A di bwe khuye: “Mufumo wa Nungungulu nyi nga wu fananisa ni ginani? 21 Wa gu fana ni livhirina eyi nyamayi a yi sugago ni 10 dzikilu nya wuguvbi kala wuguvbi watshavbo wu gugumuga.”

22 Tepo Jesu a nga ba a hongola Jerusalema, a di gimbiya khu lidhoropa ni lidhoropa, ni alidheya ni alidheya na gu hevbudza. 23 Mwama moyo a di mu wudzisa, khuye: “Pfhumu, ina vadugwana va vbulugiswago?” Jesu a di va hakha, khuye: 24 “Dzi garadzeyeni gu beya khu mwanya nyo honge, kholu nyi ngu mi embeyani gu kheni, nya vangi va na zama gu beya khuwo, ganiolu kha va na nga si kodza. 25 Tepo mune ndranga a na khugago a khotha lidimba, enu mu na ema khu vbavbandze, mu khokhotha lidimba, khenu: ‘Pfhumu, hi tuleye!’ Ganiolu uye a na mi hakha, khuye: ‘Kha nyi guti omu mu tago khumo.’ 26 Khavbovbo, mu na khenu: ‘Hi hodzide ni gu seya nago nigu u hi hevbudzide dziruwani dza dhoropani gwathu.’ 27 Ganiolu, uye a na mi hakha, khuye: ‘Kha nyi guti omu mu tago khumo. Khugani khavba enu mwatshavbo mu girago silo nyo vivbe!’ 28 Khiyo mu na gu ya liya ni gu khukhuruseya magwaha tepo mu na wonago Abrahama, Isaki, Jakobe ni vaprofeti vatshavbo Mufumoni wa Nungungulu, ganiolu enu mu rinywa vbavbandze. 29 Vbavbandze nya isoso, gu nata vathu khu khuga-dambo ni muhwa-dambo, ni norte* ni sul* va ta khala vbamezatunu nya Mufumo wa Nungungulu. 30 Mu ngupwa! Gu ni ava nyo hegise va na khalago va nyo pheye nigu gu ni va nyo pheye va na khalago va nyo hegisa.”

31 Khu tepo yoyo kamo, a di hidzimeledwa khu Vafarisi nyo khaguri va ya mu embeya, khavo: “Khuga u hongola, kholu Herodhi o vbweta gu gu songa.” 32 Jesu a di va hakha, khuye: “Gimbiyani mu ya embeya ngehe wule, khenu: ‘Muhuno ni mindru nyi nga gu tutumisa madhimoni ni gu hawulugisa vathu. Khu litshigu nya wuraru nyi na ba nyi vbedzide.’ 33 Nyi yede gu simama gu thuma muhuno, mindru ni libwegewo kholu kha si dzumeledwi gu muprofeti a songwa vbavbandze ga Jerusalema. 34 Jerusalema, Jerusalema, u songago vaprofeti ni gu pfara khu siwindri ava va rumedwago gwago . . . gungani nyi nga zama gu wungedzeya sanana sago nga edzi khugu yi wungedzeyago khidzo sitshondryana sayo vbavbatshi nya mambapi! Ganiolu, uwe kha wa dzumeya. 35 Ndranga yanu yi na tshala na yiri marumbi. Nyi ngu mi embeya, kheni: Gukhugeya olu, kha mu na nga nyi wonani gambe, kala mu ganeya, khenu: ‘Kategide wule a tago khu lina la Jehovha.’

14 Litshigu limwedo, khu litshigu nya Sabhadho, Jesu a di beya ndrangani ga muthangeyi nya Vafarisi gasi guya hodza; avo va nga ba va romo vbale va di mu khedza gwadi. 2 Mbeli gwaye gu diri ni mwama a nga ba ari ni madwali nyo simbe mawogo ni mawundru. 3 Khavbovbo, Jesu a di wudzisa vahevbudzi nya nayo ni Vafarisi, khuye: “Ina si ngu dzumedziswa gu hawulugisa muthu khu Sabhadho?” 4 Ganiolu avo va di degula. Khu kharato, uye a di kuha mwama wule, a mu hawulugisa, a mu diga a hongola. 5 Khavbovbo, a di va wudzisa, khuye: “Khu mani vbakari gwanu a si dzegeyigo gu nula gyanana gyaye mwendro mombe yaye ya gu thega namboni khu litshigu nya Sabhadho?” 6 Avo va di hamuga ni gilo nyo ganeye.

7 Tepo Jesu a nga wona gu khuye avo va nga ba va ranidwe va di gu hatha malanga nya lisima, a di va embeya gipimaniso, khuye: 8 “Wa gu tshuka u ranedwa festa nya mutshadho, u nga khali malanga nyo hathege ngudzu. Adzina gu na ni mumbe muthu nya giemo nya gikhongolo ngudzu guvbindra uwe a ranidwego nuye. 9 Khavbovbo, uye a mi ranidego mwavavili, a na gu teya, a ta khuye: ‘Ningeya wulanga wowo mwama yoyu.’ U na khuga khu vbale na wu tade khu dzitshoni u ya khala wulanga wa vbavbatshi ngudzu. 10 Ganiolu wa gu ranwa, indra khaleya kadera ya hwane, gasi a guta oyu a gu ranidego a ta gu embeya, khuye: ‘Pari yangu, delu u ta khaleya kadera ya frenti.’ Khavbovbo, u na mana wuzundzo mbeli ga vatshavbo va ranidwego. 11 Kholu watshavbo a dzi khusedzago a na vegwa vbavbatshi, uye a dzi vegago vbavbatshi a na khusedzwa.”

12 Khavbovbo, Jesu a di bwe a embeya oyu a nga mu ranago, khuye: “Wa gu gira festa, u nga rani dzipari dzago, ne vandriyago, ne valongo vago, ne vavhizinyu vago nyo ghanye, kholu anavo va nga gu rana kha nga olu anuwe u va ranidego. 13 Ganiolu wa gu gira festa rana sisiwana, silima, sikhurubwa ni sikhumu. 14 Uwe u na tsaka kholu avo va mwalo gilo nya gu gu bweledzeye khigyo, ganiolu u na bweledzedwa guwuswani ga va nya gululama.”

15 Tepo moyo nya vale va nga ba va ranidwe a ngapwa isoso, a di khuye: “A ngu tsaka oyu a pategago avba nya festa* nya Mufumo wa Nungungulu.”

16 Jesu a di va embeya, khuye: “Mwama moyo a di gira festa nya yikhongolo, a rana vathu nya vangi. 17 Tepo yi nga vboha ora nya festa, a di ruma githumi gyaye gasi gu ya rana ava va nga ba va ranidwe, khigyo: ‘Deluni kholu satshavbo si vbede gu dongisedwa.’ 18 Ganiolu vatshavbo va di pheya gu dzi vbweteya sighelo nya gu mba hongola festatunu. Nyo pheye a di khuye: ‘Nyi rengide lithembwe, nyo vbweta gu ya li wona; nyi divaleye.’ 19 Mumbe a di khuye: ‘Nyi rengide 10 dzimombe, nyo vbweta gu ya dzi wona edzi dzi thumago khidzo; nyi divaleye.’ 20 Mumbe gambe a di khuye: ‘Nyi ngari gu tshadha, khu kharato kha nyi na nga si kodza guta.’ 21 Khavbovbo, githumi gi di ya embeya pfhumu yagyo isoso. Pfhumu yile yi di goroga ngudzu, yi embeya githumi gyayo, khiyo: ‘Gimbiya khu guvbiredza omu nya dziruwa ni sindziyana sa dhoropani, u ya rana sisiwana, silima, sikhumu ni sikhurubwa.’ 22 Githumi gi di wuya gi ta khigyo: ‘Pfhumu, nyi giride esi u nga nyi ruma ganiolu gu ngo tshade wulanga.’ 23 Pfhumu yi di embeya githumi gile, khiyo: ‘Gimbiya dziruwani ni dzindziyani, u ya va gurumedza gu beya gasi gu nyumba yangu yi tala. 24 Kholu nyi ngu mi embeyani, kheni: Mwalo ni moyo nya vale va nga ba va ranidwe a na lingago guhodza nya festa yangu.’”

25 Gu diri ni vathu nya vangi va nga ba va endra navo. Uye a di thendregedza, a va embeya, khuye: 26 “Uye a tago gwangu, ganiolu na si nyenyi* papayi waye, mamayi waye, mwangadzi waye, sanana saye, vandriyaye nya vama, vandriyaye nya vanyamayi ambari kamo ni womi waye, kha si kodzi gu khala mupizane wangu. 27 Uye a si rwaligo simbo waye nya tshanisa* a nyi landreya, kha si kodzi gu khala mupizane wangu. 28 Khu giyeyedzo, khu mani vbakari gwanu a gu vbweta gu vbaha nyumba nyo laphe,* a si pheyigo khu gu khala vbavbatshi a wona dzitsapawu a gu nadzo gasi guti gu khuye dzi ngu eneya gu yi vbedza gani? 29 A gu mba gira isoso, a na pheya gu yi vbaha ganiolu a tandrega gu yi vbedza nigu vatshavbo va na yi wonago va na mu hega, 30 khavo: ‘Mwama yoyu phede gu vbaha, ganiolu tandregide gu vbedza.’ 31 Mwendro khu yevbini pfhumu ya gu vbweta gu ya dwana ni yimbe pfhumu yi si pheyigo khu gu khala vbavbatshi yi bhula ni vambe gasi gu wona gu khiyo yi na si kodza gu ya pala pfhumu yi gu na ni 20 mil masotshwa nari gu iyo yo wa ni 10 mil masotshwa basi? 32 Ya gu si wona gu khiyo kha yi na nga si kodza, ya gu rumeya vathu* va khinga pfhumu yile yimbe na yi ngari hwindzo va ya lomba gurula. 33 Khu ndziya nyo fane, mwalo ni moyo wanu a gu mba diga silo saye satshavbo a na si kodzago gu khala mupizane wangu.

34 “Munyu khwadi, ganiolu wa gu pusa, si na kodzega kharini gu bwe wu pwala gambe? 35 Kha wu ngo phasa gilo, ne kha wu swaywi mafuni ambari gu khala xitrumi, wa gu dzudzugwa. Uye a gu ni dzindzeve gasi gupwa, a napwe.”

15 Vakhupisi vatshavbo ni sighohi, va di mu hidzimeleya gasi gu mu engiseya. 2 Vafarisi ni valovi va di gu ngurangura, khavo: “Mwama yoyu a gu hakha sighohi a bwe a hodza naso.” 3 Khavbovbo, Jesu a di va embeya gipimaniso gegi, khuye: 4 “Khu mani vbakari gwanu a gu ba ari ni 100 dzinvuta, a gu dzimeledwa khu mweyo a si digigo edzi nya 99 giwulani a gimbiya a vbwetedzeya eyi yi nga dzimeya kala a yi mana? 5 Tepo a yi manago a gu yi vbagara, a tsaka. 6 Tepo a vbohago gaya, a gu rana dzipari dzaye ni vavhizinyu a va embeya, khuye: ‘Tsakani ni eni, kholu nyi yi mane nvuta yangu yi nga ba yi dzimede.’ 7 Nyi ngu mi embeyani gu kheni: Khu gufana, gu na ba guri ni gutsaka nya gukhongolo ndzadzini khu kotani nya gighohi gimwegyo gi dzi layago guvbindra 99 vathu nya gululame si si lombigo gu va dzi laya.

8 “Mwendro khu wevbini nyamayi a gu ba ari ni 10 dzidrakima,* a gu dzimedza mweyo a si khondrisigo kandriya a vbiyela nyumbani a vbwetedzeya gwadi kala a yi mana? 9 Tepo a yi manago a gu rana dzipari dzaye ni vavhizinyu a va embeya, khuye: ‘Tsakani ni eni, kholu nyi yi mane drakima yangu nyi nga ba nyi dzimedzide.’ 10 Nyi ngu mi embeyani gu kheni: Khu ndziya nya gufane, dzingilozi dza Nungungulu dzi ngu tsaka khu kotani nya gighohi gimwegyo gi dzi layago.”

11 A di vbedza, khuye: “Mwama nyo khaguri a diri ni sanana sivili nya sikhwathana. 12 Oyu nya nandra a di embeya papayi waye, khuye: ‘Papayi, nyi ninge thomba yi nyi lumbago.’ Khavbovbo, uye a di va kabanisa thomba. 13 Hwane nya matshigwana, gyanana gile nya nandra gi di dzega tomba yagyo yatshavbo gi endra gi hongola hwindzo. Tepo gi nga vboha iyoyo, gi di manega ni mavbanyelo nyo vivbe khu kharato gi phalalegisa thomba yagyo yatshavbo. 14 Hwane nya gu ba a vbedzide thomba yaye yatshavbo gu di manega ndzala nya yikhongolo tigoni mule, a pheya gu tshaniseka. 15 A di ya lomba thumo ga moyo wa tigoni mule, uye a di mu rumeya gasi gu ya sayisa dzikhumba petoni gwaye. 16 Uye a di gupwa ndzala nyo bwe a dogoreya gu hodza guhodza nya dzikhumba, ganiolu mwalo a nga ba a mu ninga gilo.

17 “Tepo a nga pimisa gwadi, a di khuye: ‘Sithumi sa papayi wangu si na ni guhodza nya gungi narigu eni nya gufa khu ndzala. 18 Nyi na bweleya ga Papayi wangu nyi ya kheni: “Papayi, nyi ghohede Nungungulu nyi bwe nyi ghoheya uwe. 19 Kha nyi ngo yedwa gu ranwa gambe gu pwani nyi gyanana gyago, nyi phare nga moyo nya sithumi sago.”’ 20 Khavbovbo, a di khuga a bweleya ga papayi waye. Na ngari hwindzo, papayi waye a di mu wona, a mu pweya, a khuga khu gututuma a ya mu abrasari a bwe a mu bhejari. 21 Gyanana gile gi di khigyo: ‘Papayi, nyi ghohede Nungungulu nyi bwe nyi ghoheya uwe, kha nyi ngo ninganedwa gu ranwa gambe gu pwani nyi gyanana gyago.’ 22 Ganiolu, papayi wakona a di embeya sithumi saye, khuye: ‘Vbiredzani, resani ngandzu nya gulaphe, nya yadi ga dzatshavbo, mu ta mu ambagisa, mu mu ambagisa phera mandzani ni dzisandaliya migondroni. 23 Deluni gambe ni gimombyana nya gunone mu ta gi songa, hi gira festa hi hodza, 24 kholu gyanana gyangu gi di gu fude, ganiolu gi wugide; gi di gu dzimede, ganiolu gi wide.’ Khavbovbo, va di pheya gu gira festa.

25 “Gyanana gile nya koma gi di gu romo thembweni, tepo gi nga ba gi wuya, na giri vbafuvbi ni gu vboha gaya gi dipwa vathu na va gu womba dzindzimo ni gu hana. 26 Khu kharato, gi di rana moyo nya githumi gi mu wudzisa gu khigyo ginani gi giregago. 27 Githumi gile gi di mu embeya, khigyo: ‘Khu ndriyago a nga wuya, papayi wago a songide gimombyana nya gunone kholu ndriyago a widego nari wadi.’* 28 Ganiolu, igyo gi di zangari, gi bomba gu beya ndrangani, khu kharato papayi wakona a di duga a ya gi pembeledzeya gasi gi beya. 29 Gyanana gile gi di embeya papayi wagyo, khigyo: ‘Nyi na ni myaga nya yingi na nyi gu gu thumeya nigu ne litshigu limwedo nyi si gu kanyisi milayo yago, ganiolu gima u si gu nyi ningi phongo gasi nyi gira festa, nyi hodza ni dzipari dzangu. 30 Ganiolu, guvboha gi nga vboha gyanana gegi gyago, gi nga phalalegiseya thomba yago ni maphuphulu, u gi songede gimombyana nya gunone.’ 31 Papayi wakona a di gi hakha, khuye: ‘Mwanangu, uwe tepo yatshavbo u na ni eni nigu satshavbo nyi gu naso khyago. 32 Ethu hi di gira festa basi gasi gu tsaka, kholu ndriyago a di gu fude, olu wugide; a di gu dzimede, olu wide.’”

16 Khavbovbo, Jesu a di embeya vapizane vaye, khuye: “Gu diri ni mwama moyo nyo ghanye, a nga embedwa gu pwani githumi* gyaye gi ngu phalalegiseya thomba yaye. 2 Pfhumu yi di rana githumi gile yi ta gi embeya, khiyo: ‘Iso nyi si pwago khuwe, kha si nyi tsakisi. Khu kharato, lova lidangaliya u tshamuseya edzi u nga thumisa khidzo dzitsapawu dzangu kholu nyo vbweta gu gu tutumisa.’ 3 Githumi gile gi di pimisa, khigyo: ‘Nyi na rini olu patrawu wangu a vbwetago gu nyi tutumisa thumoni? Nyi mwalo tshivba nya gu lime nigu nyi na ni dzitshoni nya gu lombe zomola. 4 Aha! Nyi ngu giti egi nyi na girago gasi gu vathu va nyi hakha magaya gwawe nya gu tutumiswa thumoni.’ 5 A di rana ava va nga ba va dheva patrawu waye, a ta wudzisa oyu nyo pheye, khuye: ‘Ginani u dhevago patrawu wangu?’ 6 Uye a di mu hlamula, khuye: ‘Nyo mu dhevha 100 mipimo* nya mafura nya miolivha.’* Uye a di mu hakha, khuye: ‘Eli avba lidangaliya lago nya mangava, khala vbavbatshi u lova khu guvbiredza khuwe 50 mipimo.’ 7 Githumi gile gi di wudzisa mumbe, khigyo: ‘Uwe ke, ginani u mu dhevago?’ A di hakha, khuye: ‘Nya gu mu dheva 100 mipimo nya mikhongolo* nya trigu.’ Githumi gi di mu embeya, khigyo: ‘Eli lidangaliya lago nya mangava, dzega u lova khuwe 80 mipimo.’ 8 Ambari olu githumi gile gi nga gira silo nya guvivbe, patrawu wagyo a di gi zundza kholu gi nga gira silo khu wugengeyi. Kholu vathu nya litigo* leli va gengede ngudzu avbo nya gu lulamise silo sawe guvbindra vathu va gu romo guwonegeyani.

9 “Nyi ngu mi embeyani gambe, kheni: Girani dzipari khu dzithomba nya mba lulama, gasi dza gu vbeya va mi embeyani khavo: Deluni ndrangani momu, iyo gima kha yi na nga tshungunudwa, ganiolu yi na simama kala gupindruga. 10 Uye a tumbegago avba nya silo nya sidugwana a ngu tumbega gambe avba nya silo nya sikhongolo; uye a si tumbegigo avba nya silo nya sidugwana kha tumbegi gambe avba nya silo nya sikhongolo. 11 Khu kharato, mwa gu mba tumbega avba nya thomba nya mafu yaya, khu mani a na tiyago gu mi pharisa thomba nya lisine? 12 Mwa gu mba tumbega avba nya silo sa vane, khu mani a na gu mi ningago esi si gu sanu? 13 Mwalo a si kodzago gu thumeya dzipfhumu dzimbili, kholu a na nyenya yimbe a gola eyi yimbe, mwendro a na ninga githawo yimbe a kanyisa eyi yimbe. Kha si kodzegi gu thumeya Nungungulu ni dzithomba.”

14 Vafarisi va nga ba va gola dzitsapawu, va di gu sipwa satshavbo soso, khavbovbo va di pheya gu mu poyila. 15 Khu kharato, Jesu a di va embeya, khuye: “Enu mwa gu dzi gira va nyo lulama mahoni nya vathu, ganiolu Nungungulu a ngu yiti myonyo yanu. Kholu esi si gu sa lisima mahoni nya vathu, mahoni ga Nungungulu si nyenyezide.

16 “Nayo ni malito ya Vaprofeti si huweledwe kala ga Johane. Gukhugeya avbovbo, Mufumo wa Nungungulu wu ngu tshumayedwa kha nga mahungu nya yadi, nigu vathu nya mafumbo yatshavbo va ngu dzi garadza gasi gu beya omu nya mufumo wowo. 17 Khu lisine si ngu vbevbuga gu ndzadzi ni mafu si vbindra, ganiolu gimwalo ni gidokhwana gimwegyo nya letra nya nayo gi na gu mba tadzisega.

18 “Ni wevbini a tshulago mutshadho ni mwangadzi waye, a ya tshadha ni mumbe nyamayi, a gu gira wubhayi, nigu ni wevbini a tshadhago ni nyamayi yoyo a nga tshula mutshadho, anuye a gu gira wubhayi.

19 “Gu diri ni mwama a nga ba a ambala sombo nya gu dhure, nigu a di gu vbanya womi nyo khadzisege ngudzu. 20 Ganiolu, gu diri ni mwama moyo gambe nyo pwani khu Lazaro a nga ba a tade khu silondra. Uye a di gu vbanya khu gu lomba zomola nigu va di gu oloveya gu mu vega vbamwanya nya ndranga ya mwama yoyo nyo ghanye. 21 Khu gupwa ndzala, uye a di gu dogoreya ni gu hodza esi si nga ba si thegeleya khu vbamezatunu ga mwama wule nya gu ghanye. Gu di dzega ni dzimbwa dzi ta mu dandzeya silondra. 22 Khu gu gimbiya nya tepo, mwama wule nyo lombe zomola a difa a dzegwa khu dzingilozi a yiswa ga Abrahama.

“Mwama wule nyo ghanye nuye a difa a dzingwa. 23 Nari khu Thowoni,* a di khusedza maho na gu tshaniseka, a wona Abrahama khu hwindzo nari ni Lazaro. 24 Khu kharato, a di mu rana khuye: ‘Papayi Abrahama, nyi pweye wusiwana, u ruma Lazaro a nega pota nya nyala yaye omu nya mati a ta dzidzidzisa lidimi langu, kholu nya gu tshaniseka omu nya nilo wowu nya wukhongolo.’ 25 Ganiolu, Abrahama a di hakha, khuye: ‘Mwanangu, dundruga gu khuwe u dzi buzide khu silo nya sadi nu ngu gu vbanya, ganiolu Lazaro a di gu tshaniseka basi. Olu uye a gu thaveledwa, ganiolu uwe wo tshaniseka 26 nigu gu na ni liphala nya likhongolo ngudzu vbakari gwathu ni enu, nya gu kha si kodzegi gu ava va gomogo eno vata iyoyo gwanu, ne ava va gomogo iyoyo gwanu vata enu gwathu.’ 27 Mwama wule nyo ghanye a di hakha Abrahama, khuye: ‘Papayi, abari gu kharato, nyo lomba gu kheni u mu rumeya gaya ga papayi wangu, 28 kholu nyi na ni 5 vandriye, nyo vbweta gu kheni a ya va gengedza gasi va siti navo wulangani wowu nya gutshaniseke.’ 29 Ganiolu, Abrahama a di mu hakha, khuye: ‘Avo va na ni Mosi ni Vaprofeti, va na va engise.’ 30 Ganiolu, mwama wule nyo ghanye a di khuye: ‘Ahihi Papayi Abrahama, ganiolu a gu hongola mufi moyo a ya va gengedza, va na vbindrugedza mavbanyelo.’ 31 Ganiolu, Abrahama a di mu hakha, khuye: ‘Va gu mba engisa Mosi ni Vaprofeti, ambari muthu a wusidwego khu gufani kha va na nga mu engisa.’”

17 Hwane nya isoso, a di embeya vapizane vaye, khuye: “Kha si na nga hamugega silo si ghohisago* vathu, ganiolu libangu li na ni wule a si vangago. 2 Gu diri tshukwana gwaye gu a hungeledwa giwindri* nya gikhongolo thamoni, a rikiswa linene guvbindra gu tshunganisa moyo nya ava nya vadugwana. 3 Dzi woneyeni. A gu tshuka ndriyago a gu ghoheya, mu kawuke; a gu dzi laya, mu divaleye. 4 Ambari a gu gu ghoheya 7 nya ugo khu litshigu, a wuya gambe 7 nya ugo a ta khuye: ‘Nyi divaleye,’ u yede gu mu divaleya.”

5 Vapostoli va di embeya Pfhumu, khavo: “Engedzeya gukhodwa gwathu.” 6 Pfhumu yi di khiyo: “Nari khatshi mu diri ni gukhodwa nyo dingane ni mbewu nya ginapi,* mu di hadzi embeya simbo* wowu, khenu: ‘Siguga khavba, u ya dzi tsitsa phwani.’ Uwo wu di hadzi mi engisa.

7 “Khu mani gwanu a embeyago githumi gyaye gya gu wuya khu gundze mwendro kheyi nya gu havise sifuyu saye, khuye: ‘Delu khu guvbiredza hi ta hodza’? 8 Ina khandri a gu gi embeya, khuye: ‘Vbindrugedza sombo, u nyi dongiseleya jantari, u nyi theleya esi nyi si vbwetago kala nyi vbedza gu hodza ni gu seya, khavbo u na hodzago ni gu seya nuwe’? 9 Ina a na bonga githumi gyaye khu gu ba gi giride thumo a nga gi ruma? Ahihi. 10 Khu ndziya nyo fane, mwa gu vbedza gu gira esi mu nga rumwa, indrani khenu: ‘Hi sithumi nya mba phasa gilo, esi hi giridego khiso hi nga ba hi yede gu gira.’”

11 Tepo Jesu a nga ba a hongola Jerusalema, a di vbindra khu vbinganoni ga Samariya ni Galileya. 12 Tepo a nga ba a beya omu nya alidheya nyo khaguri a di tedwa khu 10 vama va nga ba vari ni sokono, ganiolu va di ema khu hwindzo, 13 va khusedza lito, khavo: “Jesu, muhevbudzi, hi pweye wusiwana.” 14 Tepo a nga va wona, a di va embeya, khuye: “Gimbiyani mu ya dzi yeyedza ga vaprista.” Tepo va nga ba va hongola, va di agiswa. 15 Moyo wawe tepo a nga wona gu khuye hawulugisidwe a di wuya na gu dhumisa Nungungulu khu lito nyo khugege. 16 A di ya khidzima migondroni ga Jesu, a kuha vbavbatshi khu khovbe a mu bonga. Uye a diri Musamariya. 17 Jesu a di ganeya, khuye: “Vatshavbo nya 10 va hawulugisidwe, khandridzo? Vomo hayi ava vambe nya 9? 18 Mwalo ni moyo gwawe a nga wuya gasi gu ta dhumisa Nungungulu, nasiri mwama yoyu a gu wa limbe lifumbo.” 19 Jesu a di embeya mwama wule, khuye: “Khuga u hongola, gukhodwa gwago gu gu vbanyiside.”

20 Vafarisi va di mu wudzisa gu khavo Mufumo wa Nungungulu wu nata lini. Jesu a di va hlamula, khuye: “Tepo Mufumo wa Nungungulu wu na tago khandri vatshavbo va na wu wonago. 21 Mwalo a na gu khuye: ‘Kha mu wu woni owu!’ mwendro, khuye: ‘Wule vbale!’ kholu dzitini gu khenu Mufumo wa Nungungulu womo vbakari gwanu.”

22 Khavbovbo, a di embeya vapizane vaye, khuye: “Yi nata tepo mu na vbwetago gu wona limwedo nya matshigu ya Gyanana nya muthu, ganiolu kha mu na nga li wona. 23 Nigu vathu va na mi embeyani, khavo: ‘Kha mu mu woni wule!’ mwendro: ‘Kha mu mu woni oyu!’ Mu nga dugi, ne mu nga va landri. 24 Kha nga gulasa gu wenengedzago ndzadzini gukhugeya mahegiso kala gumbe mahegiso, gu na ba guri kharato nugo ni Gyanana nya muthu tepo li na vbohago litshigu lagyo. 25 Ganiolu, gu vbwetega a pheya khu gu tshaniseka ngudzu a bwe a nyenywa khu gitugulwana gegi. 26 Nigu gufana ni esi si nga girega matshigoni ya Nowa, si na girega gambe kharato matshigoni ya Gyanana nya muthu: 27 Vathu va di gu hodza ni gu seya, vama va di gu dzega, vanyamayi va di gu dzegwa, kala litshigu Nowa a nga beya litaroni,* guta ndrambi yi ta va fuvisa vatshavbo. 28 Si na fana ni esi si nga girega matshigoni ya Loti: vathu va di gu hodza ni gu seya, va renga ni gu rengisa, va yala ni gu vbaha. 29 Ganiolu, litshigu Loti a nga duga khu Sodhoma, gu diwa nilo ni enxofre* khu ndzadzini, si ta va fuvisa vatshavbo. 30 Gu na girega kharato nugo litshigu Gyanana nya muthu gi na wonegiswago.

31 “Khu litshigu lolo, uye a na gu ba a romo vbatshani nya nyumba a nga tshigi gasi gu ta dzega silo saye nyumbani. Khu ndziya nyo fane, uye a na gu ba a romo thembweni a nga bweleleyi esi a nga si tshiya hwane. 32 Dundrugani ngadza Loti. 33 Uye a vbwetago gu vbulugisa womi waye a na wu luza, ganiolu uye a na wu luzago a na wu mana. 34 Nyi ngu mi embeyani gu kheni: Khu litshigu lolo, vathu vavili va na ba va romo vbakamatunu, moyo a na dzegwa mumbe a na tshidwa. 35 Vanyamayi vavili va na ta manwa na va tshindra avba nya gitshindro gyagimwegyo, a na dzegwa moyo mumbe a tshidwa.” 36 *—— 37 Khu kharato, vapizane vaye va di mu wudzisa, khavo: “Si na girega hayi isoso, Pfhumu?” Uye a di va hlamula, khuye: “Avbo gu na ba guri ni girumbi, makoti* ma na hengeledzana avbo.”

18 Khavbovbo, a di va embeya gipimaniso maningano ni lisima nya gu gombeye tepo yatshavbo ni gu va si tsukuli, 2 khuye: “Dhoropani nyo khaguri gu diri ni mulamuli a nga ba a si ningi githawo Nungungulu ambari vathu. 3 Dhoropani momo gu diri ni noni mweyo yi nga ba yi khaleya gu hongola ga mulamuli wule, yi ya khiyo: ‘Nyi lamule khu ndziya nyo lulame ni oyu nyi dwanisanago naye.’ 4 Gu vbindride tepo nyo laphe mulamuli wule na si dzini gu gira isoso, ganiolu khu gu gimbiya nya tepo a di dzi embeya, khuye: ‘Ambari olu nyi si ningigo githawo Nungungulu ni vathu, 5 kha nga olu noni yeyi yi nyi garadzago, nyi na yi gireya gululama gasi yi si nyi garadzi gambe.’” 6 Pfhumu yi di khiyo: “Ngapwani esi mulamuli a nga ganeya ambari olu a nga vivbedwa khu monyo. 7 Ina Nungungulu kha na nga gira gu sihathwa saye si mu lombago wutshigu ni mihani si giredwa gululama, narigu uye a ngu si laphiseya monyo? 8 Nyi ngu mi embeyani gu kheni: Uye a na gira gu sithumi saye si giredwa gululama khu guvbiredza. Ganiolu, tepo Gyanana nya muthu gi na vbohago, ina kamo gi na ta mana gukhodwa nya nga ogu mafuni?”

9 Uye a di embeya gambe gipimaniso gegi ga vathu nyo khaguri va nga ba va tumba gululama gwawe, va si theyi kota khu vambe, khuye: 10 “Vama vavili va di hongola tempeleni gasi gu ya gombeya, moyo a diri Mufarisi, mumbe a diri mukhupisi. 11 Mufarisi a di ya ema a pheya gu gombeya khu monyoni, khuye: ‘Nungungulu, nyi ngu gu bonga ngudzu kholu nyi si fanigo ni ava vambe, va gu dzimbafa, va nya mba lulama, sibhayi ni gu gambe kha nyi fani ni mukhupisi yoyu. 12 Nyi ngu pfhunga* guvili khu semana, nigu nyi ngu ningeya gipandre nya likhume* nya satshavbo nyi gu naso.’ 13 Ganiolu, mukhupisi a di ema khu hwindzo, a si tiyi ni gu khedza ndzadzini a bwe a veteleya khana yaye na gu ganeya gu khuye: ‘Nungungulu, nyi gireye wuhindzi kholu nyi gighohi.’ 14 Nyi ngu mi embeyani gu kheni: Mwama yoyu bwelede gaya na lulamide ngudzu guvbindra mufarisi wule, kholu ni wevbini a dzi khusedzago a na vegwa vbavbatshi, oyu a dzi vegago vbavbatshi a na khusedzwa.”

15 Vathu va di gu mu reseya sanana sawe gasi a ta si handzega mandza a si kategisa, ganiolu tepo vapizane va nga wona isoso va di va kawuka. 16 Ganiolu, Jesu a di rana sanana sita vbafuvbi gwaye a ganeya, khuye: “Digani sanana sita gwangu, mu nga zami gu si himbedzeya kholu Mufumo wa Nungungulu wa gu lumba vathu nya gu fane naso. 17 Khu lisine nyi ngu mi embeya gu kheni: Oyu a si hakhigo Mufumo wa Nungungulu nga gyanana, kha na nga beya gwawo.”

18 Muthangeyi moyo nya Vajudha a di mu wudzisa, khuye: “Muhevbudzi nya wadi, ginani nyi yedego gu gira gasi nyi mana womi nya gupindruge?” 19 Jesu a di mu hlamula, khuye: “Khu ginani u nyi ranago nya wadi? Uye a gu wadi khu Nungungulu basi. 20 U ngu yiti milayo yeyi yi gu khiyo: ‘U nga giri wubhayi, u nga songi, u ngabi, u nga ningeyi wufakazi nya malipha, ninga githawo papayi wago ni mamayi wago.’” 21 Mwama wule a di embeya Jesu, khuye: “Eni nyi ngu gira satshavbo soso gukhugeya wuphyani gwangu.” 22 Tepo a ngapwa isoso, Jesu a di mu embeya, khuye: “Wa gu keneledwa khu gilo gimwegyo basi: Rengisa satshavbo u gu naso, u dzega dzitsapawu dzakone u kabaniseya sisiwana, u na mana thomba ndzadzini; khavbovbo delu u ta nyi landreya.” 23 Tepo a ngapwa isoso, a di swihala ngudzu kholu a di gu ghanyide ngudzu.

24 Jesu a di mu khedza a mu embeya, khuye: “Edzi si na garadzago khidzo gu ava va gu ni dzitsapawu va beya Mufumoni wa Nungungulu! 25 Khu lisine, si ngu vbevbuga ngudzu gu kamelo yi vbindra khu vbagihogotunu nya tshingano guvbindra gu muthu nya gughanye a beya Mufumoni wa Nungungulu.” 26 Ava va ngapwa isoso, va di khavo: “Khu mani a na vbulugiswago?” 27 Uye a di khuye: “Esi si si kodzegigo ga vathu, ga Nungungulu si ngu kodzega.” 28 Ganiolu, Pedro a di khuye: “Hi digide satshavbo hi nga ba hiri naso hi gu landreya.” 29 Uye a di va embeya, khuye: “Khu lisine nyi ngu mi embeya gu kheni: Mwalo a digidego ndranga, mwangadzi, vandriyaye, vavelegi mwendro sanana khu kotani nya Mufumo wa Nungungulu 30 a na gu mba hakha silo nya singi ga tepo yeyi ni womi nya gupindruge tepo yi tago.”

31 Khavbovbo, a di rana vale nya 12 khu phuvbo, a va embeya, khuye: “Mu ngu wona, olu ha gu gweya Jerusalema ni gu satshavbo silo si nga lowa khu vaprofeti maningano ni Gyanana nya muthu si na tadzisega. 32 Khu giyeyedzo, gi na ya ningedwa ga vanyamayigo, avo va na ya gi poyila, va gi tshanisa ni gu gi hetsheya. 33 Hwane nya gu ba va gi kwamude, va na gi songa, ganiolu gi na wuswa khu litshigu nya wuraru.” 34 Ganiolu, avo kha va wu pwisisa tshamuselo nya silo sesi kholu va di sihedwe tshamuselo wakone.

35 Tepo Jesu a nga ba a vboha Jeriko, gikhumu gimwegyo gi di khade bambe nya ruwa na gi gu lomba zomola. 36 Tepo gi ngapwa ligwaha nya vathu na va gu vbindra, gi di wudzisa gu khigyo ginani gi giregago. 37 Va di gi embeya, khavo: “Khu Jesu wa Nazareta a vbindrago.” 38 Khavbovbo, gi di khusedza lito, khigyo: “Jesu, Gyanana gya Dhavhidhe, nyi pweye wusiwana!” 39 Ava va nga ba va thangide, va di gi kawuka khavo gi na degule, ganiolu igyo gi di engedzeya gu khusedza lito, khigyo: “Gyanana gya Dhavhidhe, nyi gireye wuhindzi!” 40 Jesu a di ema, a ruma gu khuye va mu reseya gikhumu gile. Tepo gi nga vboha vbafuvbi, Jesu a di gi wudzisa, khuye: 41 “Wa gu vbweta gu khuwe nyi gu gireya ginani?” Igyo gi di khigyo: “Pfhumu, nyi hawulugise maho.” 42 Khu kharato, Jesu a di gi embeya, khuye: “Hawuluga maho yago, gukhodwa gwago gu gu vbanyiside.” 43 Igyo gi di dzegeya gu hawuluga maho gi mu landreya na gi gu dhumisa Nungungulu. Vathu vatshavbo va nga wona isoso, va di dhumisa navo Nungungulu.

19 Jesu a di vbindra khu dhoropani ga Jeriko. 2 Dhoropani momo, gu di gu vbanya mwama nyo pwani khu Zakewu, uye a diri muthangeyi nya vakhupisi nigu a di gu ghanyide. 3 Uye a di gu vbweta gu wona gu khuye khu mani Jesu yoyo, ganiolu kha nga ba a si kodza khu kotani nya vathu nya vangi, kholu a di gu rode. 4 Khu kharato, a di tutuma a thanga a ya lita vbatshani nya nguyu* gasi a kodza gu mu wona kholu a diri vbafuvbi ni gu vbindra khu vbale. 5 Khavbovbo, tepo Jesu a nga vboha vbale, a di khedza vbatshani a mu embeya, khuye: “Zakewu, tshiga khu guvbiredza, kholu muhuno nyi pfhumba wago.” 6 Khu kharato, a di tshiga khu guvbiredza a hakha Jesu ndrangani gwaye khu gu tsaka. 7 Tepo va nga wona isoso, vatshavbo va di ngurangura, khavo: “A di endra ndrangani nya gighohi.” 8 Ganiolu, Zakewu a di khuga a embeya Pfhumu, khuye: “Pfhumu, nyi na ninga sisiwana metadi nya dzithomba dzangu nigu oyu nyi nga mu beya gilogyo nyi na mu bweledzeya 4 nya ugo.” 9 Jesu a di mu embeya, khuye: “Muhuno guvbanyiswa gu bede ndrangani momu, kholu uwe nuwe u gyanana gya Abrahama. 10 Kholu Gyanana nya muthu gi tede gu ta vbulugisa ava va dzimedego.”

11 Na va nga gu engiseya isoso, uye a di va embeya gimbe gipimaniso, kholu a diri vbafuvbi ni Jerusalema nigu va di gu pimisa gu khavo Mufumo wa Nungungulu wu nata khu guvbiredza. 12 Khu kharato, a di va embeya, khuye: “Mwama nyo khaguri a dugeyago ndrangani nya wufumu, a di endra a hongola limbe litigo gasi gu ya ningwa wufumu, hwane nya isoso a wuya. 13 A di rana 10 sithumi saye a si ninga 10 dzimina,* a si embeya, khuye: ‘Girani nogosi khu dzimina dzedzi kala nyi wuya.’ 14 Ganiolu, vathu va tigoni gwaye va di gu mu nyenya, khu kharato va di rumeya tsawa nya vathu* va mu landra va ya khavo: ‘Kha hi dzumeyi gu fumedwa khu mwaga wowu.’

15 “Tepo a nga wuya na khade Pfhumu, a di ta tshanganisa sithumi sile a nga ba a si ningide dzitsapawu gasi guti gu khuye i tengo muni si nga tshala si velegisa omu nya dzinogosi dzaso. 16 Khu kharato, oyu nyo pheye a di hidzimeya a ta khuye: ‘Pfhumu, mina* yago yi velegide 10 dzimina.’ 17 Uye a di mu embeya, khuye: ‘U giride gwadi githumi nya gyadi! Kha nga olu u nga tumbegago ga silo nya sidugwana, nyi ngu gu ninga 10 madhoropa gasi u ma fumeya. 18 Oyu nya wuvili a dita, khuye: ‘Pfhumu, mina* yago yi velegide 5 dzimina.’ 19 A di embeya githumi gile nigyo, khuye: ‘Uwe nuwe nyi ngu gu ninga 5 madhoropa gasi u ma fumeya.’ 20 Ganiolu, gu dita mumbe a ta khuye: ‘Pfhumu, eyi avba mina* yago, nyi di gu yi sihide omu nya mwendra 21 kholu nyi di gu gu thava kha nga olu u gu muthu nyo garadze, u dzegago esi u nga mba vega u bwe u vbwera omu u nga mba yala.’ 22 Uye a di gi embeya, khuye: ‘Nyi ngu gu lamula khu malito yago, githumi wewe nya gu vivbedwe khu monyo. Gasi u di gu dziti gu khuwe nyi muthu nyo garadze nyi dzegago esi nyi nga mba vega ni gu vbwera esi nyi nga mba yala? 23 Ina ka, khu ginani u nga mba vega dzitsapawu* dzangu bhanku, gasi nya gu wuya nyi ta dzi mana ni dzijuru?’*

24 “Khu kharato, a di embeya vale va nga ba va emide vbale, khuye: ‘Mu dzegeyeni mina yoyo mu ninga wule a gu ni 10 dzimina.’ 25 Ganiolu, avo va di mu embeya, khavo: ‘Pfhumu, oyu na ni 10 dzimina.’* 26 Uye a di hakha, khuye: ‘Nyi ngu mi embeya gu kheni: Ni wevbini wule a gu naso a na ningwa simbe, ganiolu wule a gu mwalo naso ni esi a gu naso a na dzegedwa. 27 Nigu gambe deluni ni valala vangu, vale va nga ba va si dzini gu khavo nyi khala pfhumu yawe, mu ta va songa mbeli gwangu.’”

28 Tepo a nga vbedza gu ganeya silo sesi a di simama ni lipfhumba laye a gweya a hongola Jerusalema. 29 Tepo a nga ba a vboha Bhetifage ni Bhetaniya, gigomoni gi ranwago pwani Gigomo nya Miolivha, a di rumeya vapizane vavili, 30 khuye: “Gimbiyani omu nya alidheya mu yi wonago khavba, tepo mu na vbohago mu na ya mana giburwana nya gu gima gi si gu khiledwi khu muthu, na gi hungidwe. Gi tshuleni muta nagyo. 31 Ganiolu, a gu tshuka muthu nyo khaguri a mi wudzisa, khuye: ‘Mwa gu gi tshuleya ginani giburwana gyogyo?’ Ganeyani gu khenu: ‘Pfhumu a gu gi vbweta.’” 32 Khu kharato, vapizane vale va nga ba va rumidwe va di hongola va ya mana satshavbo kha nga edzi Jesu a nga ba a ganede khidzo. 33 Tepo va nga ba va tshula giburwana, va mune vakone va di va wudzisa, khavo: “Mwa gu gi tshuleya ginani giburwana gyogyo?” 34 Avo va di hlamula, khavo: “Pfhumu a gu gi vbweta.” 35 Avo va di gi dzega va hongola nagyo ga Jesu, va dzega sombo sawe va ladzeleya vbatshani gwagyo, Jesu a khileya.

36 Tepo a nga ba a hongola, va di ladzeleya sombo sawe ndziyani. 37 Tepo va nga vboha ga ndziya yi nga ba yi releya khu Gigomoni nya Miolivha, vapizane vaye vatshavbo va di tsaka, va khusedza lito va dhumisa Nungungulu khu kotani nya silewugiso satshavbo va si wonidego, 38 na va gu khavo: “Kategide wule a tago nga Pfhumu khu lina la Jehovha! Gurula gu na manege ndzadzini ni wudhumo ga Nungungulu a gomogo vbatshani ndzadzini.” 39 Ganiolu, Vafarisi nyo khaguri va nga ba va romo vbakari nya gitshungu, va di khavo: “Muhevbudzi, kawuka vapizane vago.” 40 Ganiolu, Jesu a di va hakha, khuye: “Nyi ngu mi embeyani gu kheni ambari nari khatshi va gu degula, siwindri si di hadzi gu huweleya.”

41 Tepo a nga hidzimeya, a di wona lidhoropa, a liya khu kotani yalo, 42 na gu khuye: “Uwe, uwe kamo, nari khatshi muhuno u di sitide silo si nga hadzi gu gu reseya gurula . . . ganiolu si sihidwe mahoni gwago. 43 Kholu ma nguta matshigu aya valala vago va na bhiyago mudzibambe gwago khu misimbo nyo tiye yi gu na ni dzipota, va gu randreya khu dzibambe dzatshavbo. 44 Avo va na gu thesa vbavbatshi gumogo ni sanana sago satshavbo, kha va na nga tshiya giwindri vbatshani nya gimbe giwindri kholu kha wa liti litshigu u nga hadzi gu lamudwa khilo.”

45 Khavbovbo, a di beya tempeleni a ya tutumisa ava va nga ba va rengisa mule, 46 a va embeya, khuye: “Gu lovidwe gu pwani: ‘Nyumba yangu yi na ranwa gu pwani nyumba nya nombelo, ganiolu enu mwa gu yi gira gisakha nya dzimbafa.”

47 Uye a di gu simama gu hevbudza tempeleni tshigu ni tshigu. Ganiolu, vaprista nya vakhongolo ni valovi ni vathangeyi nya gitshungu va di gu vbwetedzeya dzindziya nya gu mu songe khidzo, 48 ganiolu kha va nga ba va mana ndziya nya gu mu songe khiyo kholu vathu va di gu khala naye tepo yatshavbo, va mu engiseya.

20 Ga limwedo nya matshigu yoyo, tepo a nga ba a hevbudza vathu tempeleni ni gu huweleya mahungu nya yadi, a di tedwa khu vaprista nya vakhongolo ni valovi ni madhota, 2 va ta mu wudzisa, khavo: “Nga hi embeya, wa gu yi mana hayi tshivba nya gu gire satshavbo sesi? Khu mani a nga gu ninga tshivba yoyo?” 3 Uye a di va hakha, khuye: “Aneni nyi na mi girani giwudziso, nyi hlamuleni: 4 Gubhabhatiswa ga Johane ga guta khu hayi, khu ndzadzini mwendro khu ga vathu?” 5 Khu kharato, va di pheya gu ganeya khu gyawe, khavo: “Ha gu khethu: ‘Khu ndzadzini,’ a na khuye: ‘Khu ginani mu nga mba khodwa gwaye?’ 6 Ganiolu, ha gu khethu: ‘Khu ga vathu,’ gitshungu gyatshavbo gi na hi pfara khu siwindri, kholu vatshavbo va gu khodwa gu khavo Johane a diri muprofeti.” 7 Khu kharato, va di hlamula gu khavo kha va nga ba va dziti gu khavo ga guta khu hayi. 8 Jesu a di va embeya, khuye: “Aneni kha nyi mi embeyi omu nyi yi manago tshivba nya gu gire silo sesi.”

9 Khavbovbo, a di embeya gitshungu gipimaniso gegi, khuye: “Mwama moyo, a di yala miuvha omu nya lithembwe laye, a li tshiyedza* valimi, a endra a hongola ga limbe litigo, a ya khala tepo nyo laphe. 10 Khu tepo yakona, a di va rumeleya gimwegyo nya sithumi saye gasi va ya gi ninga mihandro nyo khaguri, ganiolu valimi vale va di ya mola githumi gile va gi veta, va gi tutumisa nya mba gi ninga gilo. 11 Ganiolu, a di va rumeleya gimbe githumi, anigyo va di ya gi veta, va gi poyila va gi tutumisa nya mba gi ninga gilo. 12 A di va rumeleya gambe egi nya wuraru, ganiolu avo va di ya gi bayisa, va gi tutumisa. 13 Khu kharato, mune nya lithembwe a di khuye: ‘Nyi na rini olu? Nyi na va rumeleya gyanana gyangu nyi gi haladzago. Adzina va na ya gi ninga githawo.’ 14 Tepo valimi vale va nga gi wona, va di bhula khu gyawe, khavo: ‘Oyu khuye a na tshalago ni thomba, hongoleni hi mu songa gasi hi tshala ni thomba.’ 15 Khu kharato, avo va di gi rinya vbavbandze nya lithembwe, va ya gi songa. Ginani egi mune nya lithembwe a na ta va girago valimi vale? 16 Uye a na ta songa valimi vovo a ningeya lithembwe lile ga vambe valimi.”

Tepo va ngapwa isoso, va di khavo: “Isoso gima si nga giregi!” 17 Ganiolu, uye a di va khedza, a ganeya, khuye: “So thula ginani esi si nga lowa nya gupwani: ‘Giwindri* gi nga nyenywa khu vavbahi khigyo gi khadego giwindri nya litshina gya vbakhonatunu’? 18 Ni wevbini oyu a na thegeyago giwindri gegi, a na tshala khu sipandre. Oyu gi na mu thegeyago, gi na mu kuya huye bhi.”

19 Valovi ni vaprista nya vakhongolo va di gu vbweta gu mu mola khu tepo yile kamo, kholu va si tugude gu khavo uye ganede gipimaniso gile na gu thula avo, ganiolu va di gu thava gitshungu. 20 Hwane nya gu ba va mu khedzide gwadi, avo va di ruma vama nyo khaguri va nga ba va va rengide gusihalani gasi va ya gira nga khatshi vathu nya vadi, va feya gu mu mola omu nya malito yaye va ya mu ningeya ga wufumu ni ga ghovhernadhori. 21 Avo va di mu wudzisa, khavo: “Muhevbudzi, hi ngu dziti gu khethu u ngu ganeya ni gu hevbudza gwadi nigu u mwalo gihatheya, ganiolu wa gu hevbudza ndziya ya Nungungulu guya khu lisine. 22 Ina gwathu si ngu khala gu livba khupo ga Sezari mwendro ne?” 23 Ganiolu, Jesu a di tugula mano yawe, a va embeya, khuye: 24 “Nga nyi yeyedzani dhenaryo* mweyo. Githombe gegi ni lina leli khya mani?” Avo va di hlamula, khavo: “Khya Sezari.” 25 Uye a di va embeya, khuye: “Khu kharato, livbani ga Sezari esi si gu sa Sezari, ganiolu ga Nungungulu esi si gu sa Nungungulu.” 26 Khu kharato, kha va si kodza gu mu mola avba nya malito yaye vbakari nya vathu, ganiolu va di hlamadziswa ngudzu khu hlamulo waye, va degula.

27 Ganiolu, vambe nya Vasadhusi va nga ba va si khodwi gu khavo gomo guwuswa ga vale va fudego, va di mu hidzimeleya va ta mu wudzisa, khavo: 28 “Muhevbudzi, Mosi livide, khuye: ‘A gufa mwama a tshiya mwangadzi waye, ganiolu nya mba tshiya sanana, ndriyaye yede gu dzegana ni noni yile gasi a velegeya sanana ndriyaye.’ 29 Gu diri ni 7 vama va nga ba vari va na ndriye ni ndriye. Oyu nyo pheye a di tshadha, ganiolu afa nya mba tshiya sanana. 30 Oyu nya wuvili 31 ni oyu nya wuraru va di tshadha navo ni noni yile. Vatshavbo nya 7 va di tshadha ni noni yile ganiolu vafa nya mba tshiya sanana. 32 Khu guhegisa, nyamayi wule nuye a difa. 33 Khu kharato, guwuswani ga vale va fudego, nyamayi yoyu a na khala mwangadzi wa mani ga ava nya 7? Kholu khade mwangadzi wa vatshavbo.”

34 Jesu a di va hakha, khuye: “Sanana nya litigo* leli si ngu dzega ni gu dzegwa. 35 Ganiolu, ava va yedwago khu gu vbanya teponi* yi tago ni gu wuswa khu ga vafudego kha va dzegi ne kha va dzegwi. 36 Khu lisine, avo kha va na ngafa gambe, kholu va gu fana ni dzingilozi nigu kha nga olu va nga wuswago khu gufani, avo va na ba vari sanana sa Nungungulu. 37 Ganiolu, maningano ni guwuswa ga vale va fudego, ambari Mosi ganede khiso omu nya matimo ma ganeyago khu gipopwana gi nga ba gi khondra, tepo a nga khuye Jehovha ‘Nungungulu wa Abrahama, Nungungulu wa Isaki nigu Nungungulu wa Jakobe.’ 38 Uye khandri Nungungulu wa vale va fudego ganiolu khwa ava va vbanyago, kholu gwaye vatshavbo va ngu vbanya.” 39 Valovi nyo khaguri va di hakha, khavo: “Muhevbudzi, u ganede gwadi.” 40 Kholu kha va nga ba va tiya gambe gu mu wudzisa gimbe gilo.

41 Khavbovbo, Jesu a di va wudzisa, khuye: “Khu ginani mu ganeyago gu khenu Kristo gyanana gya Dhavhidhe? 42 Kholu Dhavhidhe abune ganede omu nya libhuku nya Dzindzimo, khuye: ‘Jehovha a di embeya Pfhumu yangu, khuye: “Khala khu nyamudye gwangu 43 kala nyi vega valala vago vbavbatshi nya migondro yago.”’ 44 Olu Dhavhidhe a mu ranago Pfhumu, so kodzega kharini gu bwe a khala gyanana gyaye?”

45 Khavbovbo, vatshavbo na va gu sipwa, a di embeya vapizane vaye, khuye: 46 “Dzi woneyeni ni valovi va golago gu gimbiya na va ambade sombo nya gulaphe, ni gu loswa omu gu tadego vathu, ni gu khaleya dzikadera nya gupheye dzisinagogani, ni gu khala malangani nya lisima omu nya dzifesta, 47 ni ava va phangago dzindranga nya dzinoni* va bwe va gira milombelo nya gulaphe gasi va dzi yeyedza. Avo va na lamudwa khu ndziya nya gulemeye ngudzu.”

21 Tepo Jesu a nga khusa maho, a di wona sighanyi na si theya miningelo yaso omu nya dzikaxa nya miningelo. 2 A di wona gambe noni mweyo nya gisiwana na yi gu theya kaxani singerengere* sivili nya tengo wa vbavbatshi ngudzu, 3 a va embeya, khuye: “Khu lisine nyi ngu mi embeyani, kheni: Noni yeyi nya gisiwana yi ningede guvbindra vatshavbo, 4 kholu vatshavbo va di theya esi si nga va tshaleya, ganiolu, iyo wusiwanani gwayo, yi di theya satshavbo yi nga ba yiri naso gasi gu dzi vbanyisa.”

5 Khu hwane nya tepo, tepo vambe va nga ba va ganeya khu tempele edzi yi nga mburisedwa khidzo khu siwindri nyo mbure ni miningelo yi nga ba yi ningedwa ga Nungungulu, 6 Jesu a di va embeya, khuye: “Ma nguta matshigu si na khungumudwago satshavbo sesi mu si wonago. Kha gu na nga tshala giwindri vbatshani nya gimbe giwindri.” 7 Khavbovbo, va di mu wudzisa, khavo: “Muhevbudzi, lini si na giregago silo sesi nigu giwoniso muni gi na yeyedzago gu khigyo silo sesi somo vbafuvbi ni gu girega?” 8 A di va embeya, khuye: “Dzi woneyeni gasi mu si pengiswi khu muthu, kholu nya vangi va nata khu lina langu va ta khavo: ‘Kheni uye,’ ni gu khavo: ‘Tepo yi nga thudwa yomo vbafuvbi.’ Mu nga va landreyi. 9 Nigu mwa gupwa na gu ganedwa khu dzinyimbi ni guwugeyana, mu nga thurugi, kholu silo sesi si yede gu pheya khiso si girega, ganiolu mahegiso kha ma na nga dzegeya gu vboha.”

10 Khavbovbo, a di va embeya, khuye: “Litigo li na wugeya litigo, mufumo wu wugeya mufumo. 11 Gu na manega sirevareva nya sikhongolo nigu malangani nyo hambane-hambane gu na manega ndzala ni mitungu nigu vathu va na wona silo nya guthise ni siwoniso nya sikhongolo ndzadzini.

12 “Ganiolu, na si nga si giregi satshavbo sesi, mu na modwa mu tshaniswa. Mu na ningedwa omu nya dzisinagoga ni mapasoni nigu mu na yiswa ga dzipfhumu ni ga vaghovhernadhori khu kotani nya lina langu. 13 Isoso si na mi tuleyani ndziya nya gu ningeye wufakazi. 14 Vegedzani gwadi myonyoni gwanu malito yaya, mu nga dzi garadzini khu gu vbweta guti gu khenu ginani mu na va hakhago gasi gu dzi emeleya, 15 kholu nyi na mi ningani wugengeyi ni silo nyo ganeye; valala vanu kha va na nga kodza gu mi temari ambari gu mi hlamula. 16 Vbavbandze nya isoso, mu na ningedwa khu vavelegi vanu, vandriye, valongo ni dzipari dzanu nigu va na songa vambe vbakari gwanu. 17 Enu mu na nyenywa khu vatshavbo khu kotani nya lina langu. 18 Ganiolu, ambari ni ndzudzu moyo basi wa hungoni gwanu kha wu na nga dzimeya. 19 Khu gutimiseya gwanu, mu na vbulugisa womi* wanu.

20 “Ganiolu, mwa gu wona Jerusalema na gu randredwe khu masotshwa, dzitini gu khenu gutshungunudwa gwaye gomo vbafuvbi. 21 Khu kharato, ava va gomogo Judheya va na tutumeye sigomoni, ava va gomogo Jerusalema va na duge nigu ava va gomogo vbavbandze ga Jerusalema va nga beyi, 22 kholu matshigu yoyo ma na ba mari matshigu nya gu gire gululama gasi si tadzisega satshavbo si nga lowa. 23 Va tshanisekide vanyamayi va ta manwago khu matshigu yoyo na vari ni dzimimba ni ava va na ta manwago na va gu mamisa! Kholu gu na manega tshanisa nya yikhongolo tigoni nigu vathu vakona va na yi wona mihimbo.* 24 Avo va na songwa khu dzispadha nigu va na yiswa mayigoni yatshavbo kha nga dzigumbi. Jerusalema a na gandredzedwa khu mayigo kala tepo yi nga vegiswa ya vanyamayigo yi vbeya.

25 “Vbavbandze nya isoso, gu na manega siwoniso damboni, ngimani ni omu nya dzinyeledzi nigu vathu mafuni va na liya nyo bwe va si giti ni gilo nyo gire khu kotani nya gudzume ni gu kudzuga nya linene. 26 Vathu va na dzima khu hwanga ni gu wona silo si na tago mafuni, kholu dzitshivba dza ndzadzini dzi na kutsungwa. 27 Khavbovbo, va na wona Gyanana nya muthu na gi guta khomu nya lipfhi ni tshivba ni wudhumo nya wukhongolo. 28 Tepo silo sesi si na pheyago gu girega, khugani mu ema mu khusedza mihungo yanu, kholu gutshudziswa gwanu gomo vbafuvbi.”

29 Khavbovbo, a di va embeya gipimaniso gegi, khuye: “Nga khedzani nguyu* ni misimbo yatshavbo. 30 Tepo yi pheyago gu theya nyenvu, mu yi wona, mo dzegeya gu dziti gu khenu nango nya guvbise yomo vbafuvbi. 31 Khu gufana, mwa gu wona silo sesi na si gu dugeleya, dzitini gu khenu Mufumo wa Nungungulu womo vbafuvbi. 32 Khu lisine nyi ngu mi embeyani, kheni: Gitugulwana gegi kha gi na nga vbindra silo sesi satshavbo na si nga si giregi. 33 Ndzadzi ni mafu si na vbindra, ganiolu malito yangu kha ma na nga vbindra.

34 “Khu kharato, dzi woneyeni gasi gu myonyo yanu yi si pfhali khu gu hodza ngudzu ni gu seya ngudzu ni gugaradzega khu silo nya guvbanye, mu ta manwa khu litshigu lolo na mu pfhade 35 nga khatshi girengo gi modwago khu naphwi. Kholu ilo li nata ga vatshavbo va vbanyago mafuni. 36 Khu kharato, khalani na mu dongide mu bwe mu gombeya tepo yatshavbo gasi mu si kodza gu vbuluga ga satshavbo sesi si na dugeleyago ni gu ema mbeli ga Gyanana nya muthu.”

37 Vbamihanitunu, Jesu a di gu hevbudza tempeleni, ganiolu vbasiyambotunu a di gu hongola a ya lala gigomoni gi nga ba gi ranwa pwani Gigomo nya Miolivha. 38 Vbadzimindrutunu ngudzu, vathu vatshavbo va di gu mu yela gasi va ya mu engiseya tempeleni.

22 Li di gu hidzimeya litshigu nya Festa nya Dzipawu nya mba thedwa Livhirina,* yi ranwago pwani Phasika. 2 Vaprista nya vakhongolo ni valovi va di gu vbwetedzeya ndziya nya gu mu songe khiyo, kholu va di gu thava vathu. 3 Khavbovbo, Sathane a di beya ga Judha a ranwago gu pwani Sikariyoti, a nga ba ari moyo nya vale nya 12. 4 Uye a di hongola ga vaprista nya vakhongolo ni vawoneleyi nya tempele gasi va ya bhula khedzi a na ningeyago khidzo Jesu. 5 Avo va di tsaka ngudzu khu isoso, va mu tumbisa gu mu ninga dzitsapawu nya prata. 6 Khu kharato, a di dzumeya a pheya gu vbwetedzeya ndziya nya gu mu ningeye khiyo na si si tidwi khu muthu.

7 Li di vboha litshigu nya Festa nya Dzipawu nya mba thedwa Livhirina, a gu litshigu nya gu ningedwe muphaso nya Phasika. 8 Khu kharato, Jesu a di rumeya Pedro ni Johane, khuye: “Gimbiyani mu ya dongiseya Phasika gasi hi ta hodza.” 9 Va di mu wudzisa, khavo: “Wa gu vbweta gu khuwe hi ya dongiseya hayini?” 10 A di va hlamula, khuye: “Tepo mu na beyago dhoropani, mu na tedwa khu mwama moyo a rwadego khali yi gu na ni mati. Mu landreni mu ya beya ndrangani a na beyago. 11 Embeyani mune ndranga, khenu: ‘Muhevbudzi a di khuye: “Yomo hayi sala nya vapfhumba, gasi nyi ta hodzeya umo Phasika ni vapizane vangu?”’ 12 Mwama yoyo a na mi yeyedzani sala nya yikhongolo yi gomogo vbatshani, yi dongisedwego gwadi. Dongiseyani umomo Phasika.” 13 Khu kharato, avo va di hongola, va ya mana satshavbo kha nga edzi a va embedego khidzo. Va dongiseya Phasika.

14 Na yi vbohide tepo, Jesu a di ya khala vbamezatunu ni vapostoli. 15 A di va embeya, khuye: “Nyi ngu dogoreya ngudzu gu hodza Phasika yeyi nanu, na nyi nga si tshaniseki, 16 kholu nyi ngu mi embeyani, kheni: Kha nyi na nga hodza gambe Phasika kala satshavbo si gimbileyanago nayo si tadzisega Mufumoni wa Nungungulu.” 17 A di hakha kopo, a bonga Nungungulu, a vbedza, khuye: “Dzegani mu tshiyelana mwatshavbo, 18 kholu gukhugeya olu kha nyi na nga seya gambe vhinyu na wu nga si vbohi Mufumo wa Nungungulu.”

19 A di dzega gambe pawu a bonga Nungungulu, a yi piya, a va ninga, khuye: “Pawu yeyi yo emeya givili gyangu gi na ningedwago khu kotani yanu. Simamani gu gira esi gasi gu nyi dundruga.” 20 Hwane nya gu ba va hodzide, a di dzega kopo a gira sasimweso, khuye: “Kopo yeyi yo emeya pwanano nya wuphya wu tiyiswago khu novba wangu, wu na vbaladzwago gasi gu phasa enu.

21 “Ganiolu, dzitini gu khenu oyu a nyi ningeyago womo vbamezatunu vbavba ni eni. 22 Khu lisine, Gyanana nya muthu gi ngu hongola guya khesi si hungidwego, ganiolu libango li na ni wule a gi ningeyago.” 23 Khavbovbo, va di pheya gu wudzisana khu gyawe khavo khu mani a na girago isoso.

24 Gu di wuga gambe litunga nya likhongolo khu gu vbweta guti gu khavo khu mani a nga ba ari khongolo vbakari gwawe. 25 Ganiolu, uye a di va embeya, khuye: “Dzipfhumu nya litigo dzi ngu lemedziseya giemo vale dzi va fumeyago nigu vale va dzi fumeyago va gu tidwa nga vathu va gireyago silo nya sadi vambe. 26 Ganiolu, enu mu nga girini kharato. Oyu a gu khongolo vbakari gwanu a na dzi gire gyanana. Oyu a thangeyago a na dzi gire githumi. 27 Khu mani a gu khongolo, khu wule a gomogo vbamezatunu mwendro khu wule a phameyago guhodza? Khandri wule a gomogo vbamezatunu? Ganiolu, eni nyi womo vbakari gwanu kha nga wule a phameyago.

28 “Enu khenu mu nyi bangaladzidego sigaradzoni sangu; 29 Nyi ngu gira pwanano nya mufumo nanu nga edzi papayi wangu a giridego khidzo pwanano ni eni, 30 gasi mu hodza ni gu seya vbamezatunu gwangu nya Mufumo ni gu khala sikhaloni nya Mufumo gasi gu lamula 12 mahundzu ya Israyeli.

31 “Simoni, Simoni! Sathane lombide gu khuye mwatshavbo mu vbevberwa nga tirigu. 32 Ganiolu, nyi ngu gombeya khuwe gasi gukhodwa gwago gu si vbeyi, nigu tepo u na dzi layago u wuya, tiyisa vandriyago.” 33 Khavbovbo, a di mu embeya, khuye: “Pfhumu, eni nyi dzi emisede gu hongola nago ni hayini, gani pasoni, gani gufani.” 34 Ganiolu, Jesu a di mu embeya, khuye: “Pedro, nyi ngu gu embeya gu kheni: Muhuno, khonge na wu si gu embi, u na nyi danga guraru gu khuwe khu nyiti.”

35 Jesu a di va embeya gambe, khuye: “Tepo nyi nga mu rumeyani nya mba na sipatsi nya dzitsapawu, nya mba na pasta nya dzimbuva, nya mba na dzisandaliya, ina gyomo gi nga mi keneleya?” Avo va di khavo: “Ne!” 36 Khavbovbo, a di va embeya, khuye: “Ganiolu, olu, uye a gu na ni gipatsi nya dzitsapawu a na dzege, a na dzege gambe pasta nya dzimbuva. Uye a gu mwalo xipadha a na rengise ngandzu yaye gasi a renga xipadha. 37 Kholu nyi ngu mi embeyani nya gu kheni si yede gu tadzisega gwangu esi si lovidwego maningano ni eni nya gu pwani: ‘Uye kontaridwe gumogo ni sighohi.’ Khu lisine isoso si ngu tadzisega gwangu.” 38 Khavbovbo, avo va di ganeya, khavo: “Pfhumu, hi na ni dzispadha dzimbili.” Uye a di va hakha, khuye: “Dzi enede.”

39 Tepo a nga khuga khu vbale, kha nga giolovedzo, a di hongola Gigomoni nya Miolivha, vapizane vaye va di mu landra. 40 Tepo va nga vboha iyoyo, Jesu a di va embeya, khuye: “Simamani gu gombeya gasi mu si thegeyi gulingwani.” 41 Khavbovbo, a hambana navo khu pfhuka nya wudugwana* a ya khidzima a gombeya, 42 khuye: “Papayi, wa gu dzina, ndreyisa kopo yeyi gwangu. Ambari ulolo, gu nga giregi gugola gwangu, ganiolu gu na girege gugola gwago.” 43 Khavbovbo, gu dita ngilozi khu ndzadzini yi ta mu tiyisa. 44 Ganiolu, uye a di garadzega ngudzu nyo bwe a gombeya khu tshivba ni tshivba, na gu ruta lithonga li nga ba li gira khatshi madona nya novba ma nga ba ma thegeleya vbavbatshi. 45 Tepo a nga vbedza gu gombeya, a bweleya ga vapizane vaye, a di ya va mana na va lade, na va vbede tshivba khu kotani nya gugaradzege. 46 A di va embeya, khuye: “Khu ginani mu lalago? Wugani mu simama gu gombeya gasi mu si thegeyi gulingwani.”

47 Na ngo ganeya, gu di vboha gitshungu gi nga ba gi thangedwa khu mwama moyo nyo pwani khu Judha, moyo nya ava nya 12, uye a di hidzimeleya Jesu gasi gu mu bhejari. 48 Ganiolu, Jesu a di mu wudzisa, khuye: “Judha, wa gu ningeya Gyanana nya muthu khu bheju?” 49 Tepo avo va nga ba va mu randrede va nga wona esi si nga ba si vbweta gu dugeleya, va di khavo: “Pfhumu, hi va saseya khu xipadha?” 50 Moyo wawe a di wugeya githumi gya muprista nya khongolo ngudzu, a gi piya ndzeve ya nyamudye. 51 Ganiolu, Jesu a di khuye: “Mu nga girini isoso.” A kuha ndzeve ya githumi gile a yi hawulugisa. 52 Jesu a di embeya vaprista nya vakhongolo, ni vawoneleyi nya tempele ni madhota ma nga ba ma dzude gasi gu ta mu mola, khuye: “Mwa guta ni dzispadha ni mighomba gasi gu ta nyi mola nga khatshi nyi mbafa? 53 Tepo nyi nga ba nyiri nanu tempeleni tshigu ni tshigu, kha mwa nyi mola. Ganiolu, eyi tepo yanu ni tepo nya gu fume gidema.”

54 Khavbovbo, va di mu mola va hongola naye gaya ga muprista nya khongolo ngudzu, ganiolu Pedro a di gu va landriseya khu hwindzo. 55 Tepo va nga khondrisa nilo vbakari nya ndranga va khala va wora, Pedro a diya khala nuye navo. 56 Tepo githumi gimwegyo nya nyamayi gi nga mu wona na gu khade na gu wora nilo, gi di mu khedza gwadi gi ganeya khigyo: “Mwama yoyu nuye a diri naye.” 57 Ganiolu, uye a di bomba, a ganeya, khuye: “Kha nyi muti mwama wule.” 58 Gitepwana hwane nya isoso, a di wonwa khu mumbe muthu, a ganeya nuye khuye: “Uwe nuwe u moyo wawe.” Pedro a di hakha, khuye: “Ne! Kha nyiri moyo wawe.” 59 Na gu vbindride tanga nya ora, mwama nyo khaguri a di ganeya na tiyide, khuye: “Mwama yoyu khu lisine a diri naye kholu Mugalilewu!” 60 Ganiolu, Pedro a di khuye: “Asa, kha nyi giti nigyo u ganeyago.” Khu gitepwana gyogyo, na ngo ganeya, khonge wu di emba. 61 Khavbovbo, Pfhumu yi di thendregedza yi khedza Pedro, Pedro a di dundruga esi Pfhumu yi nga ba yi ganede nyo khiyo: “Muhuno, khonge na wu si gu embi u na nyi danga guraru.” 62 Khu kharato, Pedro a di duga vbavbandze a ya liya ngudzu.

63 Vama vale va nga ba va mode Jesu va di pheya gu mu poyileya na va gu mu veta, 64 va mu fenengedza khovbe va ganeya, khavo: “Nga profeta! Khu mani a nga gu veta?” 65 Va bwe va mu valeteya khu silo nya singi.

66 Tepo gu ngagya, gu di tshangana madhota nya gitshungu, vaprista nya vakhongolo ni valovi, va mu dzega va hongola naye Tribhunali nya Yikhongolo nya Gijudha, va ya khavo: 67 “Abari gu khuwe Kristo, hi embeye.” Ganiolu, uye a di va hakha, khuye: “Ambari nya gu mi embeya, kha mu na nga khodwa. 68 Nigu nya gu mi gira siwudziso kha mu na nga nyi hlamula. 69 Ganiolu, gukhugeya olu Gyanana nya muthu gi na khala khu nyamudye ga Nungungulu nya tshivba yatshavbo.” 70 Khu kharato, vatshavbo va di mu wudzisa gu khavo: “So yeyedza gu khiso uwe u Gyanana gya Nungungulu?” Uye a di va hlamula, khuye: “Khiso mu ganeyago.” 71 Avo va di ganeya, khavo: “Khu ginani hi nga gu vbwetago gambe wumbe wufakazi? Kholu hatshavbo hi mu pwide na gu ganeya abune.”

23 Khu kharato, gitshungu gi di khuga gi dzega Jesu gi hongola naye ga Pilato. 2 Gi di ya mu singedza, khigyo: “Hi manide mwama yoyu na gu pengisa va na gyathu, na gu va himbedzeya gu livba khupo ga Sezari a bwe a ganeya gu khuye uye khuye Kristo, pfhumu.” 3 Khu kharato, Pilato a di mu wudzisa, khuye: “Uwe u Pfhumu nya Vajudha?” Jesu a di mu hlamula, khuye: “Khiso u ganeyago.” 4 Khavbovbo, Pilato a di embeya vaprista nya vakhongolo ni gitshungu, khuye: “Kha nyi mani gihoso ga mwama yoyu.” 5 Ganiolu, avo va di simama gu ganeya, khavo: “Uye a gu wusa sigaradzo nya sikhongolo vbakari nya vathu khu kotani nya esi a hevbudzago Judheya gwatshavbo, gukhugeya Galileya kala eno.” 6 Tepo Pilato a ngapwa isoso, a di wudzisa gu khuye mwama yoyu Mugalilewu gani. 7 Tepo a ngati gu khuye a guta khu tigoni gu fumedwago khu Herodhi, a di mu rumeya ga Herodhi, oyu a nga ba a romo Jerusalema khu matshigu yale.

8 Tepo Herodhi a nga wona Jesu, a di tsaka ngudzu kholu gu di gu vbindra tepo nyo laphe na gu vbweta gu mu wona nigu a di gu pwide vathu nya vangi na va gu ganeya ngudzu khuye nigu a di gu vireya gu mu wona na gu gira gilewugiso nyo khaguri. 9 A di pheya gu mu gira siwudziso nya singi, ganiolu Jesu kha hlamula ne gimwegyo. 10 Ganiolu, vaprista nya vakhongolo ni valovi va di khuga va mu singedza khu tshivba ni tshivba. 11 Khu kharato, Herodhi gumogo ni masotshwa yaye va di mu gira gihegiso, va mu poyila, va mu ambagisa sombo nya gumbure, khavbovbo va mu bweledza ga Pilato. 12 Khu litshigu lolo, Herodhi ni Pilato va di khala dzipari, ambari olu gale va nga ba va si pwani.

13 Pilato a di tshanganisa vaprista nya vakhongolo ni vathangeyi ni gitshungu, 14 a va embeya, khuye: “Mu nyi resede mwama yoyu na mu gu khenu a ngu kutsedzeya gitshungu gu wugeya Mufumo, khu kharato eni nyi mu giride siwudziso mahoni gwanu, ganiolu ga satshavbo mu nga mu singedza, kha nya mana gihoso ga mwama yoyu. 15 Khu lisine, ambari Herodhi kha mana gilo, khu kharato a di mu bweledza eno gwathu. Kha nga mu si wonago, uye kha ghoha gilo gi yelago gu a songwa. 16 Khu kharato, eni nyi na mu tsayisa nyi vbedza nyi mu diga a hongola.” 17 *—— 18 Ganiolu, gitshungu gyatshavbo gi di khusedza lito, khigyo: “Songa mwama yoyo, u tshula Bharabhasi!” 19 (Mwama yoyu a di gu khothedwe pasoni, kholu a di gu wugede Mufumo a bwe a songa.) 20 Pilato a di ganeya navo gambe, kholu uye a di gu vbweta gu tshula Jesu. 21 Ganiolu, avo va di khusedza lito, khavo: “A na khokhothedwe vbasimbotunu! A na khokhothedwe vbasimbotunu!” 22 Uye a di va wudzisa nya wuraru, khuye: “Khu ginani? Ginani a nga ghoha mwama yoyu? Eni kha nya mana gilo gi yelago gu a songwa, khu kharato nyi na mu tsayisa, nyi mu diga a hongola.” 23 Ganiolu, avo va di simama gu lomba khu lito nyo khugege, va gurumedza gu khavo a na songwe* nyo bwe gilombo gyawe gi pwidwa. 24 Khu kharato, Pilato a di hunga gu gira gugola gwawe. 25 Uye a di tshula mwama wule va nga ba va mu vbweta, a nga ba a khothedwe khu gu wugeya Mufumo ni gu songa, a va ninga Jesu khu guya khu gugola gwawe.

26 Tepo va nga ba va hongola naye, va di mola mwama moyo nyo pwani khu Simoni wa Sirene, a nga ba ata khu vbavbandze nya lidhoropa, va mu rwega simbo nya tshanisa* magatani gwaye, a landra Jesu. 27 A di gu landrwa khu vathu nya vangi, gupata ni vanyamayi va nga ba va dzi veteleya dzikhana khu gu garadzega ni gu liya khu kotani yaye. 28 Jesu a di thendregedza a embeya vanyamayi vale, khuye: “Sanana sa Jerusalema, mu nga liyi khu kotani yangu. Wulangani nya isoso, liyani khenu vamune ni sanana sanu; 29 kholu dzitini gukhenu ma nguta matshigu aya vathu va na gu khavo: ‘Va kategide vanyamayi va gu mba velega, va kategide vanyamayi va gu mwalo sanana nigu ma kategide mavele ma nga mba mamisa.’ 30 Khu kharato, va na embeya sigomo, khavo: ‘Hi thegeyeni!’ va bwe va embeya sigomwana, khavo: ‘Hi fenengedzeni!’ 31 Olu va girago isoso simbo na wu ngo nagana, ginani gi na dugeleyago tepo wu na bangago?”

32 Gu diri ni vama vavili nya sighevenga va nga ba va yiswa gasi gu ya songwa ni Jesu. 33 Tepo va nga vboha wulanga wu ranwago pwani Girwarwa,* a di khokhothedwa vbasimbotunu gumogo ni sighevenga sile, gimwegyo khu nyamudye gwaye gimbe khu nyambade gwaye. 34 Ganiolu, Jesu, a di khuye: “Papayi, va divaleye, kholu kha va giti ni egi va girago.” Va di bwe va kabana sombo saye khu gu thumisa dzisolo. 35 Gitshungu gi di ema gi khedziseya, ganiolu vathangeyi va di mu hega na va gu khavo: “Uye vbulugiside vambe, a na dzi vbulugise abune abari gu khuye Kristo wa Nungungulu, a hathidwego.” 36 Masotshwa nayo ma di mu poyila khu gu mu hidzimeleya ma mu ninga vhinyu nyo dunge, 37 khayo: “Wa gu ba uri Pfhumu nya Vajudha, dzi vbulugise wabune.” 38 Gu diri gambe ni malito ma nga ba ma lovidwe khu vbatshani gwaye ma nga ba ma ganeya, khayo: “Eyi khiyo Pfhumu nya Vajudha.”

39 Khavbovbo, gighevenga gimwegyo gi nga ba gi khokhothedwe nigyo gi di mu vala, khigyo: “Gasi khandruwe Kristo? Dzi vbulugise u bwe u hi vbulugisa nethu!” 40 Egi gimbe gighevenga gi di kawuka gile gimbe, khigyo: “Ina khu thavi Nungungulu, olu u nga lamudwa khu ndziya ya yimweyo ni mwama yoyu? 41 Gwathu si lulamide kholu ha gu hakha tsayiso nya mithumo yathu, ganiolu mwama yoyu kha ghoha gilo.” 42 Khavbovbo, a mu embeya, khuye: “Jesu, nyi dundruge tepo u na beyago Mufumoni gwago.” 43 Uye a di mu embeya, khuye: “Khu lisine, nyi ngu gu embeya muhuno gu kheni: U na ba uri ni eni Paradhesini.”

44 Gu diri dzi 12* ora, ganiolu gu di khala gidema tigoni mule gwatshavbo kala dzi 15* ora, 45 kholu lidambo li di ema gu wenengedza, kortina ya wulanga nya guage wa tempeleni yi pferuga khu vbakari. 46 Jesu a di khusedza lito, khuye: “Papayi, nyi ngu vega womi wangu mandzani gwago.” Hwane nyo ganeye isoso a difa. 47 Tepo muthangeyi nya masotshwa* a nga wona esi si nga ba si dugeleya, a di dhumisa Nungungulu, khuye: “Oyu khu lisine a diri muthu nyo lulame.” 48 Tepo vathu vatshavbo va nga ba va tshanganide iyoyo va nga wona esi si nga dugeleya, va di bweleya gaya na va gu dzi veteleya dzikhana khu gugaradzega. 49 Vatshavbo va nga ba va muti va di gu emide khu hwindzo. Nigu vanyamayi va nga ba va dzude naye gukhugeya Galileya, va di romo navo avbovbo nigu va si wone esi si nga girega.

50 Gu diri ni mwama moyo nyo pwani khu Josefa, a nga ba ari givbango nya Tribhunali nya Yikhongolo nya Gijudha, uye a diri muthu nya wadi nigu a di gu lulamide. 51 (Mwama yoyu kha nga ba a seketede mano yawe ni esi va giridego.) Uye a diri wa Arimateya, lidhoropa limwedo la Judheya nigu a di gu vireya Mufumo wa Nungungulu. 52 Mwama yoyu a di hongola ga Pilato, a ya lomba girumbi gya Jesu. 53 Khavbovbo, a di gi dusa kheyi a ya gi fumbeya khu mwendra nya lisima nya linyu a ya gi theya omu nya lithowo li nga ba li podwe avba nya giwindri nya gu gima gu di nga si dzingwi muthu. 54 Gu diri litshigu nya gu dongiseye Sabhadho yi nga hadzi vboha khu mindru gakona. 55 Ganiolu, vanyamayi va nga ba va dzude khu Galileya, va di hongola navo thowoni gasi gu ya wona edzi girumbi gya Jesu gi nga ba gi dzingidwe khidzo. 56 Khavbovbo, va di bweleya gasi gu ya dongiseya silo nyo khaguri nyo nungeye ni mafura nyo nungeye, ganiolu avo va di hefemula khu Sabhadho, kha nga edzi nayo wu nga ba wu lomba khidzo.

24 Khu litshigu nya gupheye nya semana, va di vboha lithowotunu ni dzimindru ngudzu na vari ni mafura yale nyo nungeye va nga ba va dongisede. 2 Va di ya mana gu giwindri gi nga ba gi segide lithowo gi di gu rindrividzidwe 3 nigu tepo va nga beya thowoni kha va gi mana girumbi gya Pfhumu Jesu. 4 Na va nga gu hlamala khu isoso, gu di dugeleya vama vavili khu bambe gwawe va nga ba va ambade sombo nya gukhendzige. 5 Vanyamayi vale va di tsitsa dzithamo khu gu thava, khavbovbo vama vale va va wudzisa, khavo: “Khu ginani mu vbwetago oyu a vbanyago vbakari ga vale va fudego? 6 Mwalo avba, wusidwe. Dundrugani gu khenu tepo a nga ba ari Galileya a mi embede, khuye: 7 Gyanana nya muthu gi di yede gu ningedwa mandzani nya sighohi, gi songwa vbasimbotunu, ganiolu gi wuswa khu litshigu nya wuraru.” 8 Khavbovbo, vanyamayi vale va di dundruga malito yale a nga ba a ganede. 9 Khu kharato, tepo va nga wuya khu lithowotunu, va di ta embedzeya satshavbo sesi vale nya 11 ni vambe vathu. 10 Gu diri Mariya Madhalene, Jowana ni Mariya mamayi wa Jakobe. Nigu vanyamayi va nga ba vari navo va di embeya silo sesi vapostoli. 11 Ganiolu, vapostoli va di gu si wona na si si pwali isoso, khu kharato si di gu va garadzeya gu khodwa esi vanyamayi vale va nga ba va ganeya.

12 Ganiolu, Pedro a di khuga khu gu tutuma a hongola lithowotunu, a ya noga a holeya a wona basi myendra nya linyu, khavbovbo a khuga a hongola na gu dzi wudzisa gu khuye ginani gi nga girega.

13 Khu litshigu lile kamo, vavili vawe va di gu endra va hongola alidheya ya Emawusi, yi nga ba yi manegeya gipimo nya 11 dzikilometro gukhugeya khu Jerusalema, 14 nigu avo va di gu bhula khu satshavbo si nga girega.

15 Tepo va nga ba va bhula khu silo soso, Jesu a di va hidzimeleya a pheya gu gimbiya navo, 16 ganiolu maho yawe ma di segegide gasi va si muti. 17 Khavbovbo, a di va wudzisa, khuye: “Ginani mu bhulago khigyo na mu gu gimbiya?” Avo va di ema va mu khedza na va tade khu wusiwana. 18 Moyo wawe a ranwago pwani khu Keleyofasi, a di mu hakha, khuye: “Ina uwe wo va pfhumba, u vbanyago wenga Jerusalema nyo bwe u si siti esi si nga dugeleya iyoyo matshigwana yaya?” 19 Uye a di va wudzisa, khuye: “Silo muni?” Avo va di mu hlamula, khavo: “Silo si dugeledego Jesu wa Nazareta, a nga ba ari muprofeti nya tshivba khu sigiro ni malito mahoni ga Nungungulu ni ga vathu, 20 a nga ningedwago khu vaprista nya vakhongolo ni vathangeyi nya vathu gasi a songwa va bwe va mu khokhotheya vbasimbotunu, 21 narigu ethu hi di gu vireya gu khethu mwama yoyu khuye a nga hadzi gu tshudzisa Israyeli nigu muhuno litshigu nya wuraru silo sesi na si giregide 22 nigu vomo vanyamayi nyo khaguri vbakari gwathu va nga ta hi thurugisa kholu va di gu hongode lithowotunu ni dzimindru, 23 avo va di ya hamuga girumbi gyaye, va wuya va ta ganeya gu khavo va di tumbulugedwa khu dzingilozi dzi nga va embeya gu khidzo Jesu a ngu vbanya. 24 Khavbovbo, vambe vbakari gwathu va di hongola lithowotunu, va ya mana satshavbo nga edzi vanyamayi vale va nga ganeya khidzo, ganiolu kha va mu wona.”

25 Khu kharato, uye a di va embeya, khuye: “Vathu nenu nya mihungo nya gubange yi hweyago gu pwisisa silo satshavbo si ganedwego khu vaprofeti! 26 Gasi kha sa nga ba si vbwetega gu khiso Kristo a tshaniseka khu silo satshavbo sesi gasi a beya wudhumoni waye?” 27 Uye a di va tshamuseya Milowo yatshavbo yi nga ba yi ganeya khuye gukhugeya ga Mosi kala ga vaprofeti vatshavbo.

28 Tepo va nga ba va vboha ga alidheya va nga ba va hongola gwayo, uye a di gira khatshi a nga gu hongola hwindzo, 29 ganiolu avo va di mu gurumedza gu khala navo, khavo: “Khala ni ethu kholu lidambo li pfode nigu nugunugu gu na khala wutshigu.” Khu kharato, uye a di beya a khala navo. 30 Tepo va nga ba va hodza, a di dzega pawu a yi kategisa a yi piya, a va ninga. 31 Khavbovbo, maho yawe ma di tulega va muti, ganiolu uye a di mwalalega. 32 Avo va di pheya gu bhula khu gyawe, khavo: “Ina kha ha nga ba hipwa myonyo yathu na yi gu dzura* tepo a nga ba a bhula ni ethu ndziyani na gu hi tshamuseya gwadi Milowo?” 33 Avo va di dzegeya gu khuga khu gitepwana gile va bweleya Jerusalema, va ya mana vale nya 11 ni vambe va nga ba va tshanganide navo, 34 va va embeya, khavo: “Khu lisine, Pfhumu yi wusidwe nigu yi dzi wonegiside ga Simoni!” 35 Khavbovbo, va tshamuseya esi si nga girega ndziyani ni edzi va nga muti khidzo tepo a nga piya pawu.

36 Na va ngo ganeya silo sesi, Jesu a di dzi wonegisa vbakari gwawe, khuye: “Gurula gu na manege ni enu.” 37 Ganiolu, avo va di thuruga va thava, va pimisa gu khavo va di gu wona ngilozi.* 38 Khu kharato, Jesu a di va embeya, khuye: “Khu ginani mu thavago ni gu kanakana myonyoni gwanu? 39 Khedzani mandza yangu ni migondro yangu, kheni kamo; nyi phareni mu nyi wona kholu ngilozi* yi mwalo nyama ni sirambo, ganiolu mu ngu si wona gu khenu eni nyi naso.” 40 Uye a di ganeya isoso na gu va yeyedza mandza yaye ni migondro. 41 Ganiolu, avo va di tsakide ngudzu ni gu hlamala nyo bwe va si khodwi, khavbovbo a di va wudzisa, khuye: “Gyomo gilo nyo hodze?” 42 Khavbovbo, va di mu ninga gipandre nya ndzandzi nyo vawudwe, 43 Uye a di hakha a hodza na va gu mu wona.

44 A di vbedza a va embeya, khuye: “Aya khu malito yangu nyi nga mi embeyani tepo nyi nga ba nyiri nanu gu kheni: Silo satshavbo si lovidwego maningano ni eni omu nya Nayo wa Mosi, omu nya Vaprofeti ni omu nya Dzindzimo si yede gu tadzisega.” 45 Khavbovbo, uye a di va phasa* gu pwisisa gwadi tshamuselo nya Milowo, 46 a va embeya, khuye: “Gu lovidwe gu pwani: Kristo a na tshaniseka a bwe a wuswa khu ga vafudego khu litshigu nya wuraru. 47 Nigu khu lina laye gukhugeya Jerusalema, mayigoni gwatshavbo gu na tshumayedwa mahungu ma ganeyago khu gudzilaya gasi gu divaledwa sighoho. 48 Enu mu na khala dzifakazi nya silo sesi 49 nigu dzitini gu khenu nyi na mi rumeyani esi si tumbisidwego khu Papayi wangu. Ganiolu, simamani gu khala dhoropani kala mu hakha tshivba yi tago khu vbatshani.”

50 Hwane nya isoso, uye a di va dzega a hongola navo Bhetaniya, tepo va nga vboha iyoyo, a di khusedza mandza a va kategisa. 51 Tepo a nga ba a va kategisa, a di hambaniswa navo, a dzegwa a hongola ndzadzini. 52 Khavbovbo, va di mu khidzimeya, khu hwane nya isoso va di bweleya Jerusalema na va tsakide ngudzu. 53 Avo va di gu khala tempeleni tepo yatshavbo, va dhumisa Nungungulu.