MAHUNGU NYA YADI GUYA KHESI SI LOVIDWEGO KHU JOHANE

1 Gupheyani li di romo Lito, Lito li diri ni Nungungulu, nigu ilo li diri nungungulu. 2 Uye a diri ni Nungungulu gukhugeya gupheyani. 3 Nungungulu thumiside uye gasi gu gira silo satshavbo, nigu gimwalo gi nga girwa nya mba thumiswa uye.

Womi wu manegide 4 khu gu thumiswa uye nigu womi wu diri wenengedzo nya vathu. 5 Guwonegeya gu ngu wenengedza gidemani, ganiolu gidema kha gya si kodza gu gu pala.

6 Gu di dugeleya mwama a nga ba a rumedwe khu Nungungulu; lina laye gu diri Johane. 7 Mwama yoyu dzude kha nga fakazi, gasi gu ta ninga wufakazi nya guwonegeye gasi gu vathu nya mafumbo yatshavbo va khodwa khavba gwaye. 8 Uye a di siri guwonegeya gogo, ganiolu a dita gasi gu ta ningeya wufakazi nya guwonegeye gogo.

9 Gu diri vbafuvbi ni guta guwonegeya nya lisine tigoni, gu wenengedzago vathu nya mafumbo yatshavbo. 10 Uye a di romo tigoni, nigu litigo li vangidwe khu gu thumiswa uye, ganiolu kha la muti. 11 Uye a di teya vathu vaye, ganiolu avo kha va mu hakha. 12 Ganiolu, vatshavbo va nga mu hakha, uye a va ningide wufumu nyo khale sanana sa Nungungulu kholu va di gu khodwa avba nya lina laye. 13 Avo kha va velegwa khu novba, ne khu gugola nya nyama, ne gugola nya muthu, ganiolu khu gugola ga Nungungulu.

14 Lito li di vbindrugedza li khala muthu,* li vbanya vbakari gwathu. Ethu hi wonide wudhumo wagyo; wudhumo wu ningwago gyanana gi velegidwego gyonga; uye a di tade khu wuwadi wa Nungungulu ni lisine. 15 (Johane a di ningeya wufakazi maningano naye, khuye: “Oyu khuye nyi nga mu thula tepo nyi nga kheni: ‘Oyu a tago khu hwane gwangu a nyi thangede, kholu uye a di romo eni na nyi si velegwi.’”) 16 Kha nga olu a nga ba a tade khu wuwadi nya wukhongolo wa Nungungulu ni lisine, a hi girede nethu wuwadi nya wukhongolo. 17 Kha nga olu nayo wu ningedwego khu gu thumiswa Mosi, wuwadi nya wukhongolo ngudzu wa Nungungulu ni lisine si manegide khu gu thumiswa Jesu Kristo. 18 Mwalo muthu a wonidego Nungungulu; gyanana gi velegidwego gyonga gi fanago ni Nungungulu, gi gomogo vbafuvbi ga Papayi wagyo, khigyo gi nga mu tivegisa.

19 Owu khuwo wufakazi wu nga ningedwa khu Johane tepo Vajudha va nga rumeya vaprista ni Valevhi khu Jerusalema gasi gu ya mu wudzisa, khavo: “Khuwe mani?” 20 Uye kha bomba gu hlamula, khu lisine a di ganeya, khuye: “Khandreni Kristo.” 21 Avo va di mu wudzisa, khavo: “Gasi khuwe mani? Khuwe Eliya?” Uye a di hakha, khuye: “Khandreni.” Khavo: “U muprofeti?” Uye a hakha, khuye: “Ahihi!” 22 Khu kharato, va di mu wudzisa, khavo: “Khuwe mani? Nga hi embeya gasi hi kodza gu ya hlamula ava va nga hi rumeya! Uwe wari khuwe khuwe mani?” 23 Uye a di khuye: “Eni kheni lito la wule a ganeyago giwulani, khuye: ‘Lulamisani ndziya ya Jehovha,’ kha nga si ganedwego khu muprofeti Isaya.” 24 Ava va nga ba va rumedwe va diri va tsawa nya Vafarisi. 25 Va di mu wudzisa gambe, khavo: “Khu ginani u bhabhatisago narigu khandruwe Kristo, ne khandruwe Eliya, ne khandri u Muprofeti?” 26 Johane a di va hlamula, khuye: “Eni nya gu bhabhatisa khu mati. Vbakari gwanu, womo mu si mu tigo, 27 a gu oyu a tago khu hwane gwangu, nigu ne kha nyi yedwi khu gu mu tshula dzisandaliya.” 28 Silo sesi si giregide Bhetaniya, tshatugo ga Joridhani, avba Johane a nga ba a bhabhatisa.

29 Khu mindru gakone, Johane a di wona Jesu na gu mu teya, huye khuye: “Nga wonani Ginvutana gya Nungungulu egi gi dusago gighoho nya litigo! 30 Oyu khu wule nyi nga mu thula tepo nyi nga kheni: ‘Hwane gwangu gu nguta mwama a nyi thangedego, kholu uye a di romo eni na nyi si gu velegwi.’ 31 Ambari eni kha nya nga ba nyi muti. Khu kharato, nyi dzude nyi ta mu bhabhatisa khu mati gasi gu uye a tidwa Israyeli.” 32 Johane gambe a di ningeya wufakazi wowu, khuye: “Nyi di wona liphuvbo nya guage na li gu tshiga khu ndzadzini kha nga gipomba, li ta mbaka vbatshani gwaye. 33 Eni neni kha nya nga ba nyi muti, ganiolu Oyu a nga nyi rumeya gasi gu ta bhabhatisa khu mati a di nyi embeya, khuye: ‘Wule u na wonago liphuvbo nya guage na li gu tshiga li ta mbaka vbatshani gwaye, khuye a bhabhatisago khu liphuvbo nya guage.’ 34 Nigu eni nyi si wonide isoso, nyi bwe nyi ningeya wufakazi nyo kheni oyu Gyanana gya Nungungulu.”

35 Khu mindru gakone, Johane a di romo gambe iyoyo ni vavili nya vapizane vaye. 36 Tepo a nga wona Jesu na gu gimbiya, a di khuye: “Nga wonani Ginvutana gya Nungungulu!” 37 Tepo vapizane vale nya vavili va ngapwa isoso, va di landreya Jesu. 38 Tepo Jesu a nga thendregedza, a wona gu khuye va di gu mu landra, a di va wudzisa, khuye: “Mo vbweta ginani?” Avo va di mu hlamula, khavo: “Rabi (la gu vbindrugedzedwa li thulago gu khilo: “Muhevbudzi”), wo khala hayi?” 39 Uye a di va hakha, khuye: “Hongoleni, mu na ya gu wona.” Khavbovbo va di hongola naye va ya wona avba a nga ba a khala; va khala naye litshigu lolo; gu diri omu nya dzi 16* ora. 40 Andreya, ndriye wa Simoni Pedro, a diri moyo nya ava va nga pwago malito ya Johane va landreya Jesu. 41 A di pheya khu gu mana ndriyaye Simoni a mu embeya, khuye: “Hi manide Mesiya” (la gu vbindrugedzedwa li thulago gu khilo: “Kristo”). 42 Khavbovbo, a di hongola naye ga Jesu. Tepo Jesu a nga mu khedza, a di ganeya khuye: “Uwe khuwe Simoni, gyanana gya Johane; u na ranwa gu pwani khuwe Khefasi” (la gu vbindrugedzedwa li thulago gu khilo: “Pedro”).

43 Khu mindru gakone, Jesu a di gu vbweta gu hongola Galileya. Khavbovbo, a di manana ni Filipi a mu embeya, khuye: “Nyi landreye.” 44 Filipi a diri wa Bhetisayidha, dhoropani ga Andreya ni Pedro. 45 Filipi a di mana Nataniyeli a mu embeya, khuye: “Hi manide wule Mosi a lovidego maningano naye omu nya Nayo, gu lovidwego gambe maningano naye khu Vaprofeti, khavo: Jesu, gyanana gya Josefa wa Nazareta.” 46 Ganiolu Nataniyeli a di hakha, khuye: “Ina gu nga duga gilo nya gyadi khu Nazareta?” Filipi a di mu hlamula, khuye: “Delu u ta wona.” 47 Tepo Jesu a nga wona Nataniyeli na gu hidzimeya, a di ganeya maningano naye, khuye: “Oyu Muisrayeli nya lisine, oyu gwaye gu gu mwalo wukanganyisi.” 48 Nataniyeli a di mu wudzisa, khuye: “Wa gu nyi teya hayi?” Jesu a di mu hakha, khuye: “Filipi na si gu rani, nyi gu wone na wuri vbavbatshi nya nguyu.* 49 Nataniyeli a di hakha, khuye: “Rabi, uwe u Gyanana gya Nungungulu, Pfhumu ya Israyeli.” 50 Jesu a di mu hakha, khuye: “Ina wa gu khodwa kholu nyi nga ganeya gu kheni nyi gu wone na wuri vbavbatshi nya nguyu? U na wona silo nya sikhongolo nyo vbindre esi.” 51 Khavbovbo, a di khuye: “Khu lisine nyi ngu mi embeya gu kheni mu na wona ndzadzini na gu tulegide, dzingilozi dza Nungungulu na dzi gu gweya ni gu releya ga Gyanana nya muthu.”

2 Khu litshigu nya wuraru gu di girega festa nya mutshadho, Khanani ga Galileya, nigu mamayi wa Jesu a diri iyoyo. 2 Jesu ni vapizane vaye anavo va di ranedwe mutshadho wowo.

3 Tepo vhinyu yi nga ba yi vbeya, mamayi wa Jesu a di embeya Jesu, khuye: “Avo va mwalo vhinyu.” 4 Ganiolu, Jesu a di hakha, khuye: “Nyamayi, eni nago ho beya hayi avba nya silo soso? Tepo yangu yi si gu vbohi.” 5 Mamayi waye a di embeya ava va nga ba va thuma, khuye: “Girani satshavbo a na mi embeyago.” 6 Avbovbo gu diri ni 6 dzikhali nya dzikhongolo* nyo girwe khu siwindri, dzi nga ba dzi thumisedwa gu theya mati gasi va hamba khayo mandza na va si gu hodzi guya khesi wu nga ba wu lomba nayo nya Vajudha. 7 Jesu a di va embeya, khuye: “Tadzani dzikhali khu mati.” Khu kharato, avo va di dzi tadza hidzo khapa. 8 Khavbovbo, Jesu a di va embeya, khuye: “Regani mu ya ninga muthangeyi nya festa.” Avo va di gira isoso. 9 Tepo muthangeyi nya festa a nga linga mati ma nga ba ma vbindrugedzide ma khala vhinyu, kha nga olu a nga ba a si dziti khuye vhinyu yile ya guta khu hayi, a di rana noyivhu (ambari olu vale va nga rega mati va nga ba va dziti) 10 a mu embeya, khuye: “Vatshavbo vo pheya khu gu ningeya vhinyu nya yadi, khavbovbo tepo vathu va levago va ningeya eyi nya mba yadi. Ganiolu, uwe u sayiside vhinyu nya yadi kala olu.” 11 Jesu giride isoso Khanani ga Galileya. Egi khigyo gilewugiso gyaye nyo pheye a giridego. Uye a di yeyedza wudhumo waye nigu vapizane va di khodwa gwaye.

12 Hwane nya isoso, Jesu ni mamayi waye ni vandriyaye ni vapizani vaye va di releya Kafarinawume, ganiolu kha va khala matshigu nya mangi iyoyo.

13 Gu di gu hidzimeya Phasika nya Vajudha, khavbovbo Jesu a di gweya Jerusalema. 14 Tepo Jesu a nga beya tempeleni a di ya mana vathu na va gu rengisa dzimombe, dzinvuta ni sipomba ni vatrokarisi nya dzitsapawu na va khade malangani yawe. 15 Khavbovbo, hwane nya gu ba a giride lipitso nya dzingodzi, a di tutumisa vatshavbo tempeleni ni dzimombe dzawe ni dzinvuta dzawe, a phalalegiseya singerengere sa vatrokarisi nya dzitsapawu, a theseleya dzimeza dzawe. 16 A di embeya ava va nga ba va rengisa sipomba, khuye: “Dusani silo sesi khomu! Mu nga dzegini nyumba ya Papayi wangu mu yi gira nyumba nya dzinogosi!”* 17 Vapizane vaye va di dundruga gu khavo gu lovidwe gu pwani: “Lihaladzo* khu nyumba yago li na khondra nga nilo monyoni gwangu.”

18 Khu kharato, Vajudha va di mu wudzisa, khavo: “Giwoniso muni u na hi yeyedzago gi fakazago gu khigyo u na ni fanelo nyo gire isoso?” 19 Jesu a di va hlamula, khuye: “Tshungunulani tempele yeyi, eni nyi na yi wusedza khu matshigu mararu.” 20 Vajudha va di hakha, khavo: “Tempele yeyi yi vbedzide 46 myaga na yi gu vbahwa, ganiolu uwe wari khuwe u na yi wusedza khu matshigu mararu?” 21 Ganiolu, tempele a nga ba a yi thula Jesu gu diri givili gyaye. 22 Tepo Jesu a nga wuswa khu ga vafudego, vapizani vaye va di dundruga gu khavo uye a di gu oloveya gu ganeya isoso, khavbovbo avo va di khodwa avba nya milowo va bwe va khodwa esi Jesu a nga ganeya.

23 Tepo a nga ba a romo Jerusalema avba nya festa nya Phasika, vathu nya vangi va di khodwa avba nya lina laye tepo va nga ba va wona silewugiso a nga ba a gira. 24 Ganiolu, Jesu kha nga ba a va tumba khu gu vbeleya kholu a di gu vati vatshavbo, 25 nigu kha nga ba a vbweta gu khuye ne moyo a mu tshamuseya gilo maningano ni vathu, kholu a di gu siti esi si gu romo myonyoni nya vathu.

3 Gu diri ni Mufarisi moyo nyo pwani khu Nikodhemo a nga ba ari mufumeyi nya Vajudha. 2 A di hongola ga Jesu ni wutshigu aya khuye: “Rabi, hi ngu dziti gu khethu u dzude kha nga muhevbudzi a rumedwego khu Nungungulu, kholu mwalo ni moyo a si kodzago gu gira silewugiso nya nga esi u girago vbavbandze nya gu ba a phaswa khu Nungungulu.” 3 Jesu a di mu hakha, khuye: “Khu lisine nyi ngu gu embeya gu kheni, uye a na gu mba velegwa nyaluphye kha na nga wona Mufumo wa Nungungulu.” 4 Ganiolu, Nikodhemo a di mu wudzisa, khuye: “Si nga kodzega kharini gu muthu a velegwa nyaluphye na gumbide? Ina si ngu kodzega gu a beya ndrani ga mamayi waye a velegwa gambe?” 5 Jesu a di mu hlamula, khuye: “Khu lisine nyi ngu gu embeya gu kheni, uye a na gu mba velegwa khu mati ni liphuvbo, kha na nga si kodza gu beya Mufumoni wa Nungungulu. 6 Igyo gi velegwago khu nyama, nyama, nigu igyo gi velegwago khu liphuvbo liphuvbo. 7 U nga hlamali khu gu ba nyi gu embede gu kheni: Gu vbwetega mu velegwa nya luphye. 8 Phuvbo yo furugedza omu yi gu nago, uwe wa gupwa ligwaha layo, ganiolu khu guti omu yi dugago khumo ni omu yi hongolago umo. Khiso sasimweso si giregago ni wule a velegwago khu liphuvbo.”

9 Khu kharato, Nikodhemo a di mu wudzisa, khuye: “So kodzega kharini isoso?” 10 Jesu a di mu hlamula, khuye: “Kha wu siti isoso nuri muhevbudzi tigoni ga Israyeli? 11 Khu lisine nyi ngu gu embeya gu kheni, ethu ho ganeya esi hi sitigo, hi bwe hi ningeya wufakazi nya esi hi si wonago, ganiolu enu kha mu dzumeyi wufakazi hi mu ningago. 12 Olu mu si khodwigo tepo nyi mi embeyago khu silo sa mafuni, mu na khodwa kharini nya gu mi embeya khu silo sa ndzadzini? 13 Vbavbandze nya isoso, mwalo muthu a nga gweya ndzadzini nasiri oyu a nga releya khu ndzadzini, a gu Gyanana nya Muthu. 14 Gu fana ni edzi Mosi a vbayegidego khidzo nyoga giwulani, Gyanana nya Muthu nigyo gi na vbayegwa avba nya simbo, 15 gasi gu ni wevbini a khodwago gwagyo a mana womi nya mba vbeya.

16 “Nungungulu haladzide ngudzu litigo gu kala a ningeya Gyanana gyaye gi velegidwego gyonga, gasi ni wevbini a khodwago gwagyo a si fuviswi, ganiolu a mana womi nya gupindruge. 17 Nungungulu rumede Gyanana gyaye gasi gu litigo li ta vbulugiswa khu kotani yagyo, nasiri guta lamula litigo. 18 Uye a khodwago gwagyo kha na nga lamudwa. Ganiolu, uye a si khodwigo gwagyo lamudwe, kholu kha yeyedza gukhodwa avba nya lina la Gyanana gya Nungungulu gi velegidwego gyonga. 19 Khu kharato, egi khigyo giseketelo nya gulamule: guwonegeya gu dzude mafuni, ganiolu vathu va di gu gola ngudzu gidema guvbindra guwonegeya, kholu mithumo yawe yi di vivbide. 20 Kholu oyu a girago silo nyo vivbe a gu nyenya guwonegeya nigu kha hidzimeyi vbafuvbi nya guwonegeye gasi mithumo yaye yi si tugudwi. 21 Ganiolu, oyu a girago silo nya sadi a gu hidzimeya guwonegeyani gasi mithumo yaye yi wonega gu khiyo yi ngu gimbidzisana ni gugola ga Nungungulu.”

22 Hwane nya isoso, Jesu ni vapizane vaye va di hongola Judheya, uye vbedzide tepo nyo khaguri iyoyo ni vapizane nigu a di gu bhabhatisa. 23 Ganiolu, Johane nuye a di gu bhabhatisa tigoni ga Enoni vbafuvbi ni Salimi, kholu iyoyo gu diri ni mati nya mangi, nigu vathu va di gu hongola gwaye gasi aya va bhabhatisa; 24 kholu khu tepo yoyo Johane a di si khothedwi.

25 Vapizane va Johane va di ganedzisana ni Mujudha moyo maningano ni gu agiswa. 26 Khavbovbo, avo va di embeya Johane, khavo: “Rabi, mwama a nga ba ari nago tshatugo ga Joridhani, oyu u nga ningeya wufakazi maningano naye, o bhabhatisa, nigu vatshavbo vo hongola gwaye.” 27 Johane a di va hlamula, khuye: “Mwalo a si kodzago gu hakha gilo vbavbandze nya gu ba a ningidwe khu ndzadzini. 28 Enu mu dzifakazi nya esi nyi ganedego tepo nyi nga kheni: ‘Eni khandreni Kristo, ganiolu nyi rumedwe gasi nyi thanga mbeli gwaye.’ 29 Noyivhu khiyo yi gu na ni noyivha. Ganiolu, tepo pari ya noyivhu yi manegago vbafuvbi yi mupwa, yi ngu tsaka ngudzu khu gu ba yi pwide lito la noyivhu. Khu kharato, aneni nyi tsakide ngudzu. 30 Uye yede gu simama gu dandra, ganiolu eni nyi vbunguga.”

31 Oyu a tago khu vbatshani khugegide guvbindra vatshavbo. Oyu wa mafuni khwa mafuni nigu o ganeya khu silo sa mafuni. Oyu a tago khu ndzadzini khugegide guvbindra vatshavbo. 32 Uye a gu ningeya wufakazi nya silo a nga si wona ni gu sipwa, ganiolu mwalo a dzumeyago wufakazi waye. 33 Ni wevbini a dzumeyago wufakazi waye a gu yeyedza gu khuye Nungungulu khwa lisine. 34 Oyu a nga rumedwa khu Nungungulu, a gu ganeya malito ya Nungungulu, kholu tepo a ningeyago liphuvbo nya guage khayi khu gu pimeya. 35 Papayi a ngu gola Gyanana gyaye ni gu vegisa satshavbo mandzani gwagyo. 36 Oyu a khodwago ga Gyanana na ni womi nya gupindruge, ganiolu oyu a si engisigo Gyanana kha na nga mana womi, nigu zanga ya Nungungulu kha yi na nga duga gwaye.

4 Tepo Jesu* a ngati gu khuye Vafarisi va pwide gu pwani uye a ngu gira ni gu bhabhatisa vapizani nya vangi guvbindra Johane 2 (ambari olu a nga ba a siri Jesu abune a nga ba a bhabhatisa, ganiolu gu diri vapizane vaye) 3 a di khuga khu Judheya, a hongola gambe Galileya. 4 Ganiolu, a di yede gu vbindra gambe khu Samariya. 5 Khavbovbo, a di vboha dhoropani ga Samariya gu ranwago pwani Sikari, vbafuvbi ni gipeto egi Jakobe a ningidego gyanana gyaye Josefa. 6 Avbovbo gu diri ni nambo wa Jakobe. Kha nga olu Jesu a nga ba a garade khu gu gimbiya, a di khala vbafuvbi ni nambo wowo. Gu diri omu nya dzi 12 ora.*

7 Nyamayi moyo nya Musamariya a dita a ta rega mati. Khavbovbo, Jesu a di mu lomba, khuye: “Nga nyivba mati nyo seye.” 8 (Vapizane vaye va di hongode dhoropani va ya renga gilo nyo hodze.) 9 Khu kharato, nyamayi wule nya Musamariya a di mu hakha, khuye: “Khu ginani uwe, nuri Mujudha, u lombago mati eni nyi gu Musamariya?” (Vajudha va di si pwani ni Vasamariya.) 10 Jesu a di mu hlamula, khuye: “Nari khatshi u ngu giti giningwa nya mahala gya Nungungulu, nigu nari khatshi u ngu muti oyu a gu khuye: ‘Nga nyivba mati nyo seye,’ na wu mu lombide, uye na gu ningide mati nya womi.” 11 Nyamayi wule a di mu hakha, khuye: “Pfhumu, u mwalo purumwa, nari gu nambo wu khongolo. Mati yoyo nya womi u ma thulago, wa gu ma mana hayi? 12 Ina uwe u khongolo guvbindra kokwe wathu Jakobe, a gu uye a nga hi ninga nambo wowu, a gu uye a nga ba a seya mati uye ni sanana saye ni sirengo saye?” 13 Jesu a di mu hakha, khuye: “Watshavbo a seyago mati nya nambo wowu, a napwa gambe lidora. 14 Oyu a seyago mati nyi na mu ningago, gima kha na ngapwa gambe lidora. Ganiolu, mati nyi na mu ningago, ma na vbindrugedza ma khala gifefe nya mati ma ningago guvbanya nya gupindruge.” 15 Nyamayi wule a di hakha, khuye: “Pfhumu, nyi ninge mati yoyo, gasi nyi sipwi gambe lidora, ne nyi siti gambe avba nyi ta rega mati.”

16 Jesu a di mu embeya, khuye: “Gimbiya u ya rana mwama wago u wuya naye.” 17 Nyamayi wule a di hakha, khuye: “Nyi mwalo mwama.” Jesu a mu embeya, khuye: “Khiso kamo u ganedego nyo khuwe u mwalo mwama, 18 kholu u manegide ni 5 vama nigu mwama u gu naye olu khandri mwama wago. Lisine u ganedego.” 19 Khavbovbo, nyamayi wule a di mu embeya, khuye: “Pfhumu, nyi ngu wona gu kheni u muprofeti. 20 Vakokwe vathu va di gu khozeya avba nya gigomo gegi, ganiolu va na gyanu vari khavo va yede gu ya khozeya Jerusalema.” 21 Jesu a di mu embeya, khuye: “Khodwa avbo gwangu, kholu yi nguta tepo nya gu enu kha mu na nga khozeya Papayi avba nya gigomo gegi, ne Jerusalema. 22 Enu mwa gu khozeya igyo mu si gitigo; ethu ha gu khozeya igyo hi gitigo, kholu guvbanyiswa ga guta khiyo ga Vajudha. 23 Ganiolu, yi nguta tepo, nigu khiyo eyi, avba vakhozeyi nya lisine va na khozeyago Papayi khu liphuvbo ni lisine, kholu khu lisine, khavo vathu vovo va vbwetedzedwago khu Papayi gasi va mu khozeya. 24 Nungungulu Liphuvbo nigu ava va mu khozeyago gu vbwetega va mu khozeya khu liphuvbo ni lisine.” 25 Nyamayi wule a di hakha, khuye: “Nyi ngu dziti gu kheni a nguta Mesiya, a ranwago pwani khu Kristo. Tepo a na vbohago, a na hi embeya guagani silo satshavbo.” 26 Jesu a di mu embeya, khuye: “Kheni oyu nyi ganeyago nago.”

27 Khu tepo yoyo kamo, vapizane vaye va di vboha, va hlamala kholu va nga mu wona na gu ganeya ni nyamayi. Ganiolu, mwalo a nga mu wudzisa, khuye: “Ginani u gi vbwetago gwaye?” mwendro “Khu ginani u ganeyago naye?” 28 Khu kharato, nyamayi wule a di tshiya khali yaye nya mati, a hongola dhoropani a ya embeya vathu, khuye: 29 “Hongoleni mu ya wona mwama a nyi embedego satshavbo nyi giridego. Ina kamo khandruye Kristo?” 30 Avo va di duga khu dhoropani gasi gu ya wona Jesu.

31 Khu tepo yoyo, vapizane va di gu mu gurumedza, khavo: “Hodza Rabi.” 32 Ganiolu, Jesu a di va embeya, khuye: “Nyi na ni gumbe guhodza mu si gutigo.” 33 Khu kharato, vapizane va di wudzisana, khavo: “Ina womo a nga mu reseya gilo nyo hodze?” 34 Jesu a di va embeya, khuye: “Guhodza gwangu gu gira gugola ga wule a nyi rumedego ni gu vbedza thumo waye. 35 Ina enu khandri mwari khenu go keneleya 4 migima gasi gu vboha nango nya guvbwere? Ganiolu, engisani esi nyi na mi embeyago: Khusani maho mu khedza mathembwe, mu na wona gu khenu dzimbewu dzi vidzidwe gasi gu vbwerwa. Gukhugeya olu, 36 muvbweri phede gu hakha nigu a ngu hengeledzeya mihandro nya womi nya gupindruge, gasi gu muyali ni muvbweri va tsaka gumogo. 37 Kholu ma ngu tadzisega malito ma gu khayo: Moyo muyali, mumbe muvbweri. 38 Nyi ngu mi rumeya gasi mu ya vbwera esi mu nga mba si thumeya. Vambe va thumide ngudzu, ganiolu enu mu wuyedwe khu thumo wawe.”

39 Vasamariya nya vangi va dhoropani mule va khodwe ga Jesu khu kotani ya nyamayi wule a nga ningeya wufakazi nyo khuye: ‘Uye nyi embede satshavbo nyi giridego.’ 40 Khu kharato, tepo Vasamariya va nga mu yela, va di ya mu lomba gu khavo a khala navo. Uye a di khala navo matshigu mavili. 41 Vathu nya vangi va di khodwa khu kotani nya esi a ganedego, 42 va embeya nyamayi wule, khavo: “Ethu khandri ha gu khodwa basi khu kotani nya esi u hi embedego, ganiolu hi diya khu gu mupwa habune. Nigu hi ngu dziti gu khethu mwama yoyu khu lisine muvbulugisi nya litigo.”

43 Hwane nya matshigu yaya ya mavili, uye a di khuga khu vbale a hongola Galileya. 44 Jesu abune a di gu khuye muprofeti kha zundzwi tigoni gwaye nya mavelego. 45 Khu kharato, tepo a nga vboha Galileya, vathu va iyoyo va di mu hakha gwadi kholu va di wonide satshavbo esi a giridego Jerusalema avba nya festa, kholu anavo va di hongode festatunu.

46 Khavbovbo, a di hongola gambe Khanani ga Galileya, iyo a nga vbindrugedza mati ma khala vhinyu. Iyoyo gu diri ni mwama moyo a nga ba a thuma nyumbani nya wufumu. Uye a di gu dwaledwa khu gyanana gyaye gi nga ba giri Kafarinawume. 47 Tepo mwama yoyu a ngapwa gu pwani Jesu khugide khu Judheya a hongola Galileya, a di mu yela, a ya mu lomba gu khuye a releya naye gasi a ya hawulugisa gyanana gyaye, kholu gi diri vbafuvbi ni gufa. 48 Ganiolu, Jesu a di mu embeya, khuye: “Mwa gu mba wona siwoniso ni silewugiso, gima kha mu na nga khodwa.” 49 Mwama wule a di mu embeya, khuye: “Pfhumu, hongole gyanana gyangu na gi si gufi.” 50 Jesu a di mu embeya, khuye: “Gimbiya, gyanana gyago gi ngu vbanya.” Mwama wule a di khodwa esi Jesu a nga ganeya, a hongola. 51 Ganiolu, na ngari ndziyani, sithumi saye si di mu khinga si ta mu embeya khiso gyanana gyaye gi ngu vbanya.* 52 Khu kharato, a di va wudzisa gu khuye gi khade tshukwana khu ora muni. Va di mu hlamula, khavo: “Feveri yi phalalegide vbanova omu nya dzi 13.”* 53 Mwama wule a di tugula gu khuye khiyo ora yile yayimweyo Jesu a nga mu embeya gu khuye: “Gyanana gyago gi ngu vbanya.” Khu kharato, uye ni vatshavbo va ndrangani gwaye va di khodwa. 54 Egi gilewugiso nya wuvili Jesu a nga gira tepo a nga wuya Galileya na gu khuga khu Judheya.

5 Hwane nya isoso, gu di manega festa nya Vajudha, nigu Jesu a di hongola Jerusalema. 2 Jerusalema, vbafuvbi ni Mwanya nya Dzinvuta, gu diri ni lidhamo li nga ba liri ni 5 dzipilari, khu Gihebheru li ranwago pwani Bhetesadha. 3 Avbovbo gu di gu lade vadwali nya vangi, sikhumu, silima ni va nyo khwanyala. 4 *—— 5 Avbovbo gu diri ni mwama moyo a nga ba a dwala khu gipimo nya 38 myaga. 6 Tepo Jesu a nga wona mwama yoyo na lade vbovbo, na gu dziti khuye na ni myaga nya yingi na gu dwala, a di mu wudzisa, khuye: “U ngu dzina gu hawuluga?” 7 Mwama wule a di hakha, khuye: “Pfhumu, nyi mwalo muthu nya gu nyi bedze lidhamoni tepo mati ma kudzugago, tepo nyi gu kheni nyo hongola, nyo thangedwa.” 8 Jesu a di mu embeya, khuye: “Khuga u ema! Dzega lidahu* lago u hongola.” 9 Mwama wule a di dzegeya gu hawuluga a dzega lidahu laye a hongola.

Isoso si giregide khu litshigu nya Sabhadho. 10 Khu kharato, Vajudha va di embeya mwama wule a nga hawulugiswa khavo: “Muhuno Sabhadho, kha wu dzumedziswi gu rwala lidaho.” 11 Ganiolu, uye a di va hakha, khuye: “Mwama a nga nyi hawulugisa a di nyi embeya, khuye: ‘Dzega lidaho lago u hongola.’” 12 Avo va di mu wudzisa, khavo: “Khu mani muthu wakona a nga gu embeya, khuye: ‘Dzega lidahu lago u hongola’?” 13 Ganiolu, mwama wule a nga hawulugiswa, kha nga ba a dziti khuye khu mani, kholu Jesu a di gu mu dzimelede kha nga olu gu nga ba gu tade vathu nya vangi avbovbo.

14 Khu hwane nya isoso, Jesu a di mu mana tempeleni a mu embeya, khuye: “U hawulugide. U nga ghohi gambe, gasi u si dugeledwi khu silo nyo vbindre esi si gu dugeledego.” 15 Mwama wule a di ya embeya Vajudha gu khuye khu Jesu a nga mu hawulugisa. 16 Khu kotani nya isoso, Vajudha va di pheya gu wugeya Jesu, kholu uye a di gu gira silo sesi khu Sabhadho. 17 Ganiolu, uye a di va hakha, khuye: “Papayi wangu a nga gu thuma kala olu, nigu aneni nyi nga gu thuma.” 18 Khiso si giridego gu Vajudha va engedzeya gu vbwetedzeya dzindziya nyo mu songe khidzo, kholu kha nga ba a ndraga basi nayo nya Sabhadho, ganiolu a di gu rana Nungungulu khuye Papayi waye, a dzi fananisa ni Nungungulu.

19 Khu kharato, Jesu a di va embeya, khuye: “Khu lisine nyi ngu mi embeyani gu kheni, gimwalo gilo Gyanana gi girago khu gu si khugeya, ganiolu gyo gira basi esi gi wonago Papayi wagyo na gu gira. Kholu esi Papayi a girago, Gyanana nigyo gyo gira khu ndziya nyo fane. 20 Kholu Papayi a ngu gola Gyanana nigu a ngu gi yeyedza satshavbo esi a girago nigu a na gi yeyedza mithumo nya yikhongolo guvbindra eyi, gasi enu mu hlamala. 21 Kha nga Papayi a wusago ava va fudego a va ninga womi, Gyanana nigyo gi ngu ninga womi ni wevbini gi dzinago gu mu ninga. 22 Kholu Papayi kha lamuli muthu, ganiolu hendzeledzide ga Gyanana gyaye gulamula gwatshavbo, 23 gasi vatshavbo va dhumisa Gyanana nga edzi va dhumisago khidzo Papayi. Oyu a si dhumisigo Gyanana kha dhumisi Papayi a gi rumedego. 24 Khu lisine nyi ngu mi embeyani gu kheni: Watshavbo a pwago malito yangu a khodwa ga Wule a nyi rumedego, na ni womi nya gupindruge, nigu kha na nga lamudwa, ganiolu dugide khu gufani a beya guvbanyani.

25 “Khu lisine nyi ngu mi embeyani gu kheni: Yi nguta tepo nigu khiyo eyi kamo avba ava va fudego va na pwago lito la Gyanana gya Nungungulu, avo va dembidego dzindzeve va na vbanya. 26 Kha nga olu Papayi a gu gifefe nya womi, uye ningide Gyanana gyaye tshivba nyo ninge womi. 27 Nigu gi ningide wufumu nyo lamule kholu gi gu Gyanana nya Muthu. 28 Mu nga hlamalini khesi nyi nga ganeya, kholu yi nguta tepo eyi vatshavbo vale va gu romo marowoni* va na pwago lito laye 29 va duga, avo va giridego silo nya sadi va mana womi, avo va giridego silo nyo vivbe va lamudwa. 30 Gimwalo nyi yedego gu gira khu gu gi khugeya. Eni nya gu lamula guya khesi nyi embedwego khu Papayi, nigu gulamula gwangu gu lulamide, kholu nyo gira gugola ga wule a nyi rumedego nasiri gugola gwangu.

31 “Nari khatshi nya gu dzi fakazeya, wufakazi wangu na wu siri lisine. 32 Gu ni mumbe a ningeyago wufakazi maningano ni eni, nigu nyi ngu dziti gu kheni wufakazi wowo a ningeyago lisine. 33 Enu mu rumede vathu ga Johane, nigu esi a mi embedego maningano ni eni lisine. 34 Ambari ulolo, eni kha nya dzumeya wufakazi nya muthu, ganiolu nya gu mi embeya silo sesi gasi mu vbulugiswa. 35 Johane a diri kandriya yi nga ba yi khondra yi wenengedza, nigu enu mu tsakide khu wenengedzo waye khu tepo nya yidugwana. 36 Ganiolu, eni nyi na ni wufakazi nya wukhongolo guvbindra owu wa Johane, kholu mithumo eyi Papayi a nyi rumidego guta gira, a gu mithumo eyi nyi girago, yo ningeya wufakazi nyo khiyo nyi rumedwe khu Papayi. 37 Nigu Papayi a nyi rumedego ningede wufakazi maningano ni eni. Enu gima mu si gupwi lito laye ne gu wona khovbe yaye, 38 nigu kha mwa hakha lito laye kholu kha mwa khodwa ga wule a mu rumedego.

39 “Enu mwa gu gevisisa Milowo kholu mwa gu pimisa gu khenu mu na mana womi nya gupindruge khu kotani yayo, khiyo Milowo yoyo kamwe yi ningeyago wufakazi maningano ni eni. 40 Ambari ulolo, kha mu dzini guta gwangu gasi mu mana womi. 41 Kha nyi vbweti gu dhumiswa khu vathu, 42 nigu nyi ngu dziti gwadi gu kheni enu kha mu haladzi Nungungulu. 43 Nyi dzude khu lina la Papayi wangu, ganiolu enu kha mwa nyi hakha. Nari khatshi a di dzude mumbe muthu khu lina laye, enu na mu mu hakhide. 44 Mu na khodwa kharini, nari gu mo ningana wudhumo khu gyanu, nigu kha mu vbwetedzeyi wudhumo wutago khiyo ga Nungungulu wamoyo? 45 Mu nga pimisi gu khenu nyi na mi thuledza ga Papayi, womo oyu a mi thuledzago, a gu Mosi, a gu uye mu vegago gwaye gutumba gwanu. 46 Khu lisine, nari khatshi mu di gu khodwa ga Mosi, na mu gu khodwa avba gwangu, kholu uye lovide maningano ni eni. 47 Ganiolu, mwa gu ba mu si khodwi esi a lovidego, mu na khodwa kharini esi nyi ganeyago?”

6 Hwane nya isoso, Jesu a di tshatuga yiphwa ya Galileya, yi ranwago gambe pwani yiphwa ya Tibheriyadhe. 2 Vathu nya vangi va di gu mu landra kholu va di gu wona silewugiso a nga ba a gira na gu hawulugisa vadwali. 3 Khavbovbo, Jesu a di gweya gigomoni a ya khala ni vapizane vaye. 4 Yi di gu hidzimeya Phasika, festa nya Vajudha. 5 Tepo Jesu a nga khusa maho, a wona gitshungu gi nga ba gi mu hidzimeleya, a di wudzisa Filipi, khuye: “Hi na renga hayi dzipawu nya gu hodzise vathu vava?” 6 A di mu wudzisa isoso gasi gu mu linga kholu a di gu giti gilo nyo gire. 7 Filipi a di mu hlamula, khuye: “Ambari ha gu renga dzipawu nya 200 dzidhenaryu kha dzi na nga eneya gu muthu ni muthu a mana gipandryana nyo hodze.” 8 Moyo nya mupizane waye nyo pwani khu Andreya, ndriye wa Simoni Pedro, a di mu embeya, khuye: 9 “Avba gu na ni gikhwathana gimwegyo gi gu na ni 5 dzipawu nyo girwe khu sevhadha ni sindzandzyana sivili. Ganiolu, ina isoso si na enedza vathu vatshavbo vava?”

10 Jesu a di hakha, khuye: “Va rumeni va khala vbavbatshi.” Avbovbo gu diri ni mwasi nya wungi, khavbovbo va di khala; va diri tanga nya 5000 vama. 11 Jesu a di dzega dzipawu dzile a gombeya, khavbovbo a dzi kabaniseya ava va nga ba va khade; a di gira sasimweso ni sindzandzyana, avo va di hodza edzi va nga dzina khidzo. 12 Ganiolu, tepo va nga khura, Jesu a di embeya vapizane, khuye: “Hengeledzeyani sipandre si nga tshala gasi gu si luzi gilo.” 13 Khavbovbo, va di tadza 12 mirava* khu sipandre va nga hengeledzeya si nga tshidwa khava va nga hodza 5 dzipawu nya sevhadha.

14 Tepo vathu va nga wona gilewugiso a giridego va di ganeya, khavo: “Oyu khu lisine khu Muprofeti a nga ba a yede guta mafuni.” 15 Khavbovbo, tepo Jesu a nga tugula gu khuye va di gu vbweta guta mu gira pfhumu, a di khuga khu vbale a bweleya gambe gigomoni enga.

16 Tepo li nga pfola, vapizane vaye va di releya yiphwani, 17 va di ya beya ngalava va kongoma Kafarinawume. Gu diri wutshigu, ganiolu Jesu a di si gu hongoli a ya manana navo. 18 Linene li di gu kudzuga kholu yi di gu furugedza phuvbo nya yikhongolo. 19 Hwane nya gu ba va dzuwide makasiya khu gipimo nya 5 mwendro 7 dzikilometro, va di wona Jesu na gu gimbiya khu vbatshani nya mati na gu hidzimeleya ngalava, avo va di thava ngudzu. 20 Ganiolu, Jesu a di va embeya, khuye: “Kheni, mu nga thavi!” 21 Avo va di mu hakha ngalavani, nya mba hweya va di vboha omu va nga ba va hongola.

22 Khu mindru gakone, gitshungu gi nga ba gi tshade khu wumbe tshatugo nya yiphwa gi di tugula gu khigyo vbale gu diri mwalo ngalava, gingalavana gimwegyo basi gi nga ba gi romo, ganiolu Jesu kha beya omu nya ngalava ni vapizane vaye tepo va nga khuga; avo va di hongola vonga. 23 Gu di vboha dzingalava dzi nga ba dzita khu Tibheriyade vbafuvbi ni vbale va nga hodza dzipawu hwane nya gu ba Pfhumu yi bongide. 24 Ganiolu, tepo va nga wona gu khavo Jesu ni vapizane vaye va mwalo vbale, va di beya dzingalavani dzawe va hongola Kafarinawume va ya vbwetedzeya Jesu.

25 Tepo va nga ya mu mana khu wumbe tshatugo nya yiphwa va di mu wudzisa, khavo: “Rabi, u vbohide vbanyalini avba?” 26 Jesu a di va hlamula, khuye: “Khu lisine nyi ngu mi embeya gu kheni khandri mo nyi vbwetedzeya khu gu ba mu wonide silewugiso, ganiolu mo nyi vbwetedzeya khu gu ba mu hodzide dzipawu mu khura. 27 Mu nga thumeyini guhodza gu hinago, ganiolu thumeyani guhodza gu ningago womi nya gupindruge, ogu Gyanana nya muthu gi na mi ningago, kholu Papayi a gu Nungungulu mu vegide gifungo nyo yeyedze gu khuye a ngu mu tsakeya.

28 Khavbovbo, va di mu wudzisa, khavo: “Ginani gi vbwetegago gasi gu gira mithumo ya Nungungulu?” 29 Jesu a di va hlamula, khuye: “Nungungulu o vbweta gu khuye mu khodwa ga oyu a nga mu rumeya.” 30 Va di mu wudzisa, khavo: “Gilewugiso muni u na girago gasi hi gi wona hi bwe hi khodwa gwago? Ginani u na girago? 31 Vakokwe vathu va hodzide mana giwulani, kha nga edzi si lovidwego khidzo, pwani: ‘Uye va ningide pawu ya ndzadzini gasi va hodza.’” 32 Khavbovbo, Jesu a di va embeya, khuye: “Khu lisine nyi ngu mi embeya, kheni: Mosi kha mi ninga pawu ya ndzadzini, ganiolu Papayi wangu a ngu mi ninga pawu nya lisine ya ndzadzini. 33 Kholu pawu ya Nungungulu khu wule a tshigago khu ndzadzini a ninga guvbanya litigo.” 34 Khavbovbo, va di mu embeya, khavo: “Pfhumu, hi ninge pawu yoyo tepo yatshavbo.”

35 Jesu a di va embeya, khuye: “Eni kheni pawu nya womi, oyu a tago gwangu gima kha na ngapwa ndzala, nigu uye a khodwago gwangu gima kha na ngapwa lidora. 36 Ganiolu, kha nga nyi mi embedego, mu nyi wonide, ganiolu kha mwa khodwa. 37 Vatshavbo ava Papayi a nyi ningago va nata gwangu nigu eni gima kha nyi na nga bomba ava va tago gwangu, 38 kholu nyi tshigide khu ndzadzini gasi gu ta gira gugola ga wule a nyi rumedego nasiri gugola gwangu. 39 Gugola ga wule a nyi rumedego, khogu: kha nyi yeli gu luza ne ni moyo nya vale a nyi ningidego, ganiolu nyi yede gu va wusa khu litshigu nyo hegise. 40 Gugola ga Papayi wangu, khogu: watshavbo wule a hakhago Gyanana a bwe a khodwa gwagyo a na mana womi nya gupindruge nigu eni nyi na mu wusa khu litshigu nyo hegise.”

41 Khavbovbo, Vajudha va di pheya gu ngurangura kholu a ganedego gu khuye eni nyi pawu yi tshigidego khu ndzadzini. 42 Avo va di wudzisana, khavo: “Ina khandruye oyu Jesu gyanana gya Josefa, oyu vavelegi vaye hi vatigo? Khu ginani olu a ganeyago, khuye: ‘Nyi tshigide khu ndzadzini’?” 43 Jesu a di va hakha, khuye: “Digani gu ngurangura khu gyanu. 44 Mwalo a si kodzago guta gwangu o mba tiswa khu Papayi, oyu a nyi rumedego, nigu eni nyi na mu wusa khu litshigu nyo hegise. 45 Vaprofeti va lovide, khavo: ‘Vatshavbo va na hevbudzwa khu Jehovha.’ Watshavbo oyu a pwago ni gu hevbudzwa khu Papayi a nguta gwangu. 46 Mwalo a tshukidego a wona Papayi vbavbandze ga wule a tago khiyo ga Nungungulu; uyoyo wonide Papayi. 47 Khu lisine nyi ngu mi embeya gu kheni: Oyu a khodwago na ni womi nya gupindruge.

48 “Eni nyi pawu nya womi. 49 Vakokwe vanu va hodzide mana giwulani, ambari ulolo va fude. 50 Eyi i pawu yi tshigago khu ndzadzini gasi ni wevbini a hodzago a sifi. 51 Eni nyi pawu nyo vbanye yi tshigidego khu ndzadzini. Uye a hodzago pawu yeyi a na vbanya kala gupindruga; khu lisine pawu nyi na mu ningago givili gyangu gasi gu vbulugisa litigo.”

52 Vajudha va di pheya gu ganedzisana khu gyawe, khavo: “Mwama yoyu a na si kodza kharini gu hi ninga givili gyaye gasi hi hodza?” 53 Khavbovbo, Jesu a di va embeya, khuye: “Khu lisine nyi ngu mi embeya gu kheni: Mwa gu mba hodza givili gya Gyanana nya muthu ni gu seya novba wagyo, mu mwalo womi. 54 Oyu a hodzago givili gyangu ni gu seya novba wangu na ni womi nya gupindruge nigu nyi na mu wusa khu litshigu nyo hegise, 55 kholu givili gyangu guhodza nya lisine nigu novba wangu guseya nya lisine. 56 Oyu a hodzago givili gyangu ni gu seya novba wangu a ngu pwanana ni eni nigu eni nyi ngu pwanana naye. 57 Kha nga olu Papayi, a vbanyago, a nyi rumedego ni olu eni nyi vbanyago khu kotani ya Papayi, wule a hodzago givili gyangu a na vbanya khu kotani yangu. 58 Eyi i pawu yi tshigidego khu ndzadzini. Kha yi fani ni pawu yile yi hodzidwego khu vakokwe vanu ambari ulolo vafa. Uye a hodzago pawu yeyi a na vbanya kala gupindruga.” 59 Jesu ganede silo sesi na gu hevbudza omu nya sinagoga* nyo khaguri ya Kafarinawume.

60 Tepo vapizane nya vangi va ngapwa isoso, va di khavo: “Malito yaya ma ngu lemeya; khu mani a na ma engiseyago?” 61 Ganiolu, tepo Jesu a nga tugula gu khuye vapizane va di gu ngurangura khu kotani nya isoso, a di va wudzisa, khuye: “Isoso sa gu mi tshunganisa? 62 Ahati mwa gu wona Gyanana nya muthu na gi gu gweya gi hongola eyi gi nga ba gi romo, mu na khenu ginani? 63 Liphuvbo nyo age khilo li ningago womi ganiolu givili kha gi phasi gilo. Esi nyi mi embedego sa gu duga khiyo nya liphuvbo nya guage nigu si na mi ninga womi. 64 Ganiolu, gu na ni vambe vbakari gwanu va si khodwigo.” Gukhugeya gupheyani, Jesu a di gu vati ava va nga ba va si khodwi ni oyu a na mu ningeyago. 65 A di engedza gambe, khuye: “Khiso si nyi giridego nyi mi embeya kheni mwalo a si kodzago guta gwangu nya mba dzumeledwa khu Papayi.”

66 Khu kotani nya isoso, vapizane vaye nya vangi va di bweleleya esi va nga si tshiya hwane, va si mu landreyi gambe. 67 Khu kharato, Jesu a di wudzisa ava nya 12, khuye: “Mo vbweta gu bweleya nenu?” 68 Simoni Pedro a di mu hlamula, khuye: “Pfhumu, hi na bweleya ga mani? Uwe u na ni malito ma ningago womi nya gupindruge. 69 Ethu hi ngu khodwa nigu hi ngu dziti gu khethu uwe khuwe u Agidego u tago khiyo ga Nungungulu.” 70 Jesu a di va hakha, khuye: “Ina khandreni nyi nga mi hatha enu nya 12? Ambari ulolo, moyo wanu avba a gu fana ni Dhiyabhulosi.”* 71 Avba Jesu a di gu ganeya khu Judha, gyanana gya Simoni Sikariyoti, kholu mwama yoyu khuye a nga hadzi gu mu ningeya ambari olu a nga ba ari moyo nya ava nya 12.

7 Hwane nya isoso, Jesu a di simama gu gimbiya-gimbiya Galileya. Uye kha nga ba a vbweta gu hongola Judheya kholu Vajudha va di gu vbweta gu mu songa. 2 Ganiolu, Festa nya Dzitabherinakeli* yi nga ba yi girwa khu Vajudha yi diri vbafuvbi. 3 Khavbovbo, vandriyaye va di mu embeya, khavo: “Gimbiya Judheya gasi gu vapizane vago va ya wona navo mithumo u girago. 4 Kholu mwalo muthu a girago silo gusihalani na gu vbweta gu tidwa guagani. Wa gu ba u gira silo sesi, dzi yeyedze ga vathu vatshavbo.” 5 Khu lisine vandriyaye va di si khodwi gwaye. 6 Khu kharato, Jesu a di va embeya, khuye: “Tepo yangu yi si gu vbohi, ganiolu gwanu ni yevbini tepo khyadi. 7 Litigo li mwalo gighelo nya gu mi nyenye, ganiolu eni li ngu nyi nyenya, kholu nya gu ningeya wufakazi maningano nalo nya gu kheni mithumo yalo yi vivbide. 8 Gimbiyani festatunu; eni kha nyi na nga hongola olu kholu tepo yangu yi si gu vbohi.” 9 Hwane nya gu ba a va embede silo sesi, uye a di tshala Galileya.

10 Hwane nya gu ba vandriyaye va hongode festatunu, uye nuye a di hongola, ganiolu gusihalani. 11 Khu kharato, Vajudha va di pheya gu mu vbwetedzeya festatunu, khavo: “Gasi womo hayi mwama wule?” 12 Vbakari nya gitshungu, nya vangi va di gu mu lemba. Vambe va di gu khavo: “Uye muthu nya wadi.” Vambe khavo: “Ne. Uye a ngu kanganyisa vathu.” 13 Khu lisine mwalo a nga ba a ganeya khuye guagani, kholu va di gu thava Vajudha.

14 Tepo festa yi nga ba yiri vbakari, Jesu a di gweya tempeleni a ya pheya gu hevbudza. 15 Vajudha va di hlamala va ganeya, khavo: “So kodzega kharini gu mwama yoyu a manega ni guti gwatshavbo gogu nya Milowo narigu kha hevbula omu nya dzixikola?”* 16 Khu kharato, Jesu a di va hlamula, khuye: “Esi nyi hevbudzago khandri sangu, ganiolu khya wule a nyi rumedego. 17 Ni wevbini a vbwetago guti gugola ga Nungungulu, a nati gu khuye esi nyi hevbudzago sa guta khiyo ga Nungungulu mwendro sa guta khiyo gwangu. 18 Ni wevbini wule a ganeyago silo si dugeyago hungoni gwaye, a gu dzi vbweteya wudhumo; ganiolu ni wevbini a vbwetago gu dhumisa wule a nga mu rumeya, a gu ganeya lisine nigu lulamide. 19 Mosi a mi ningide Nayo, khandridzo? Ganiolu mwalo gwanu a wu engisago. Khu ginani mu vbwetago gu nyi songa?” 20 Gitshungu gi di hlamula, khigyo: “U na ni lidhimoni. Khu mani a vbwetago gu gu songa?” 21 Jesu a di va hlamula, khuye: “Nyi di gira gilewugiso gimwegyo basi, ganiolu enu mwatshavbo mwa gu hlamala. 22 Khu gighelo gyogyo, Mosi a mi ningide wugwera (khandri khatshi wu di guta khiyo gwaye, ganiolu khiyo ga vakokwe), ganiolu enu mu ngu hanisa wugwera* muthu khu sabhadho. 23 Abari gu muthu a ngu haniswa wugwera khu sabhadho gasi wu si ndragwi Nayo wa Mosi, khu ginani enu mu nyi zangareyago ngudzu khu gu ba nyi hawulugiside muthu khu sabhadho? 24 Mu nga lamuleni guya khu khovbe, ganiolu lamulani khu gululama.”

25 Khavbovbo, vavbanyi nyo khaguri va Jerusalema, va di khavo: “Ina khandruye mwama yoyu va vbwetago gu mu songa? 26 Uye womo avba a ganeya guagani, ganiolu avo kha va ganeyi gilo. Ina vathangeyi vathu khandri vo khodwa gu khavo khuye Kristo? 27 Ethu hi ngu dziti gu khethu mwama yoyu a guta khu hayi narigu tepo a na tago Kristo, mwalo a na dzitigo gu khuye a guta khu hayi.” 28 Khavbovbo, tepo Jesu a nga ba a hevbudza tempeleni, a di khusedza lito, khuye: “Enu mu ngu nyiti nigu mu ngu guti omu nyi tago khumo. Eni kha nyata khu gu si khugeya, ganiolu Wule a nyi rumedego khwa lisine nigu enu kha mu muti. 29 Eni nyi ngu muti, kholu nyi dzude khu lina laye nigu khuye a nga nyi rumeya.” 30 Khu kharato, va di zama gu mu mola, ganiolu kha va si kodza kholu tepo yaye yi di nga si vbohi. 31 Ambari ulolo, vathu nya vangi vbakari nya gitshungu va di gu khodwa gwaye, nigu va di gu khavo: “Tepo Kristo a na tago, ina a na ta gira silewugiso nya singi nyo vbindre esi si girwago khu mwama yoyu?”

32 Vafarisi va pwide gitshungu na gi lemba silo sesi maningano naye, khu kharato vaprista nya vakhongolo ni Vafarisi va di rumeya dzigwardha gasi dzi ya mu mola. 33 Khavbovbo, Jesu a di va embeya, khuye: “Nyi ngari ni tepwana nyo khale nanu na nyi nga si hongoli ga Oyu a nga nyi rumeya. 34 Enu mu na nyi vbwetedzeya, ganiolu kha mu na nga nyi mana, kholu omu nyi hongolago enu kha mu na nga si kodza gu hongola.” 35 Khu kharato, Vajudha va di wudzisana, khavo: “Wulanga muni a vbwetago gu hongola mwama yoyu nya gu hi si mu mani? Ina khandri o vbweta gu hongola ga Vajudha va phalalegidego vbakari nya Vagreki, a ya hevbudza Vagreki? 36 A gu vbweta gu khuye ginani, a gu khuye: ‘Enu mu na nyi vbwetedzeya, ganiolu kha mu na nga nyi mana, kholu omu nyi hongolago enu kha mu na nga si kodza gu hongola’?”

37 Khu litshigu nya guhegise, a gu litshigu nya likhongolo nya festa, Jesu a di khuga a ema a ganeya khu lito nyo khugege, khuye: “Oyu a gu na ni lidora, a nate gwangu a ta seya mati. 38 Kha nga si ganedwago khu Milowo, oyu a khodwago gwangu, ‘khu monyoni gwaye, gu na duga mati ma ningago womi.’” 39 Tepo a nga ba a ganeya isoso, Jesu a di gu thula vale va nga hadzi ningwa liphuvbo khu gu ba va khodwe gwaye, kholu khu tepo yoyo va di nga si ningwi liphuvbo kholu Jesu a di si gu dhumiswi. 40 Tepo vambe vbakari nya gitshungu va ngapwa isoso, va di khavo: “Oyu khu lisine Muprofeti.” 41 Vambe va di gu khavo: “Oyu khu Kristo.” Ganiolu vambe va ganeya, khavo: “Kristo nya gute khu Galileya? 42 Gasi Milowo khandri yari khiyo Kristo a na dugeya ga gitugulwana gya Dhavhidhe ni Bhetlehema, omu a nga ba a dugeya umo Dhavhidhe?” 43 Khu kharato, gu di manega guhambana vbakari nya gitshungu khu kotani yaye. 44 Vambe gwawe va di gu vbweta gu mu mola, ganiolu mwalo a nga ba a si kodza.

45 Khavbovbo, dzigwardha dzi di bweleya ga vaprista nya vakhongolo ni ga Vafarisi. Avo va di ya dzi wudzisa, khavo: “Khu ginani mu nga mba wuya naye?” 46 Idzo dzi di hlamula, khidzo: “Gima hi si gupwi muthu na gu ganeya nga mwama yoyu.” 47 Khavbovbo, Vafarisi, khavo: “Ina khandri mu di ya kanganyiswa nenu? 48 Ina vambe vathangeyi vathu ni Vafarisi khandri vo khodwa gwaye? 49 Ganiolu gitshungu gegi gi si wu tigo nayo, vathu va vadwego.” 50 Nikodhemo, a nga ba ari moyo wawe, oyu a nga nga hongola ga Jesu, a di va wudzisa khuye: 51 “Ina Nayo wathu wu ngu dzumedzisa gu lamula muthu nya mba pheya khu gu mupwa ni guti esi a girago?” 52 Avo va di mu hlamula, khavo: “Ina khandri wa guta nuwe khu Galileya? Gevisisa Milowo, u na wona gu khuwe gu mwalo Muprofeti a na dugeyago khu Galileya.”*

8 12 Jesu a di va embeya gambe, khuye: “Eni kheni guwonegeya nya litigo. Oyu a nyi landreyago kha na nga gimbiya gidemani, ganiolu a na ba ari guwonegeyani nya womi.” 13 Khavbovbo, Vafarisi va di khavo: “Wa gu dzi gireya wufakazi wabune; wufakazi wago khandri wa lisine.” 14 Jesu a di va hakha, khuye: “Ambari nya gu ba nyi dzi fakazeya nyabune, wufakazi wangu lisine, kholu eni nyi ngu guti omu nyi tago khumo ni omu nyi hongolago umo. Ganiolu, enu kha mu guti omu nyi tago khumo ni omu nyi hongolago umo. 15 Enu mwa gu lamula khu guya khu mawonelo nya vathu; eni kha nyi lamuli muthu. 16 Ambari nya gu lamula, gulamula gwangu khwa lisine kholu kha nyiri nyonga, ganiolu Papayi, a gu uye a nyi rumedego, na ni eni. 17 Nigu omu nya Nayo wanu gu lovidwe gu pwani: ‘Wufakazi nya vathu vavili khwa lisine.’ 18 Eni nya gu ningeya wufakazi maningano ni eni, nigu Papayi, a gu uye a nyi rumedego, anuye a ngu ningeya wufakazi maningano ni eni.” 19 Khavbovbo, avo va di mu wudzisa, khavo: “Womo hayi Papayi wago?” Jesu a di va hlamula, khuye: “Enu kha mu nyiti nigu ne Papayi wangu kha mu muti. Nari khatshi mu ngu nyiti, na mu gu muti nuye Papayi wangu.” 20 Uye ganede malito yaya tepo a nga ba a hevbudza tempeleni nari avba dzi nga ba dzi khala avbo dzikaxa nya miningelo. Ganiolu mwalo a nga mu mola, kholu yi di si gu vbohi tepo yaye.

21 A di va embeya gambe, khuye: “Eni nyi ngu hongola, nigu enu mu na nyi vbwetedzeya, ganiolu mu nafa sighohoni sanu. Omu nyi hongolago, enu kha mu si kodzi gu hongola.” 22 Khavbovbo, Vajudha va di khavo: “Ina khandri o vbweta gu dzi songa? Kholu wari khuye: ‘Omu nyi hongolago, enu kha mu si kodzi gu hongola.’” 23 Jesu a di engedza gambe, khuye: “Enu mu va vbavbatshi, ganiolu eni nyi wa vbatshani; enu mu va tigoni momu, ganiolu eni kha nyiri wa tigoni momu. 24 Khiso si nyi giridego nyi mi embeya gu kheni: “Enu mu nafa sighohoni sanu. Kholu kha nga olu mu si khodwigo gu khenu kheni mani, mu nafa sighohoni sanu.” 25 Va di mu wudzisa, khavo: “Gasi khuwe mani?” Jesu a di va hlamula, khuye: “Nyo dzi vbedzeya tepo yangu khu gu ganeya nanu! 26 Nyi na ni silo nya singi nyo ganeye maningano nanu ni gulamula. Khu lisine Wule a nyi rumedego khwa lisine nigu eni nyo embeya litigo esi nyi si pwidego gwaye.” 27 Avo kha va si tugula gu khavo uye a di gu ganeya navo maningano ni Papayi. 28 Khavbovbo, Jesu a di va embeya, khuye: “Hwane nya gu ba mu vbayegide Gyanana nya muthu vbasimbotunu, khavbo mu na dzi tigo gu khenu kheni mani nigu gimwalo nyi girago khu gu gi khugeya, ganiolu nyo ganeya esi nyi hevbudzidwego khu Papayi. 29 Wule a nyi rumedego na ni eni; uye kha nyi diga nyonga, kholu tepo yatshavbo nyo gira esi si mu tsakisago.” 30 Tepo a nga ba a ganeya silo soso, nya vangi va di khodwa gwaye.

31 Khavbovbo, Jesu a di embeya Vajudha va nga ba va khodwa gwaye, khuye: “Mwa gu simama gu landrisa malito yangu, khu lisine mu vapizane vangu, 32 nigu mu nati lisine, nigu lisine li na mi tshula.” 33 Avo va di mu hakha, khavo: “Ethu hi situgulwana sa Abrahama nigu gima hi si khali dzigumbi nya muthu. Khu ginani u ganeyago gu khuwe: ‘Mu na tshulega’?” 34 Jesu a di va hakha, khuye: “Khu lisine nyi ngu mi embeya gu kheni watshavbo a ghohago gumbi nya gighoho. 35 Ganiolu, gumbi kha yi simami kala gupindruga ndrangani ga mune wayo; gyanana khigyo gi simamago kala gupindruga. 36 Khu kharato, mwa gu tshudwani khu Gyanana, mu na ba mu tshulegide khu lisine. 37 Nyi ngu dziti gu kheni mu situgulwana sa Abrahama. Ganiolu enu mo vbweta gu nyi songa, kholu kha mu khodwi esi nyi mi hevbudzago. 38 Eni nyo ganeya silo nyi si wonidego tepo nyi nga ba nyiri ni Papayi wangu, ganiolu enu mo ganeya silo mu si pwidego ga papayi wanu.” 39 Avo va di hakha, khavo: “Papayi wathu khu Abrahama.” Jesu a di va embeya, khuye: “Nari khatshi mu sanana sa Abrahama, mu di hadzi gira esi si giridwego khu Abrahama. 40 Ganiolu, enu mo vbweta gu nyi songa, eni nyi mi embedego lisine nyi li pwidego ga Nungungulu. Ganiolu, Abrahama kha gira isoso. 41 Enu mwa gu gira mithumo ya papayi wanu.” Avo va di hakha, khavo: “Ethu kha ha velegedwa muwubhayini;* hi na ni Papayi moyo, a gu Nungungulu.”

42 Jesu a di va embeya, khuye: “Nari khatshi Nungungulu Papayi wanu, enu na mu gu nyi haladza, kholu nyi dzude khiyo ga Nungungulu nigu nyi womo avba. Kha nyata khu gu si khugeya, ganiolu khuye a nyi rumedego. 43 Khu ginani mu si pwisisigo esi nyi ganeyago? Kholu kha mu engisi malito yangu. 44 Enu mo dugeya ga papayi wanu Dhiyabhulosi, khu kharato mo girani gugola ga papayi wanu. Gukhugeya gupheyani uye musongi nigu kha emi lisineni, kholu gwaye li mwalo lisine. A gu lipha, a gu landra tumbunugo nya makhalelo yaye, kholu uye muliphi nigu papayi nya malipha. 45 Eni nya gu mi embeya lisine, ganiolu kha mu khodwi gwangu. 46 Khu mani gwanu a nga tiyago gu nyi embeya khuye eni nyi gighohi? Tepo nyi nga mi embeya lisine, khu ginani mu si khodwigo gwangu? 47 Oyu a gu wa Nungungulu a ngupwa malito ya Nungungulu. Kha nga olu mu si ma pwigo so yeyedza gu khiso kha muri va Nungungulu.”

48 Vajudha va di mu embeya, khavo: “Kha hi liphi tepo hi gu khethu: ‘U Musamariya nigu u na ni lidhimoni’.” 49 Jesu a di va hlamula, khuye: “Eni nyi mwalo lidhimoni, ganiolu nyo ninga wuzundzo Papayi wangu, enu mu nyi poyila. 50 Ganiolu eni kha nyi dzi vbweteyi wudhumo; khu Nungungulu a vbwetago gu khuye nyi dhumiswa nigu khuye a gu mulamuli. 51 Khu lisine nyi ngu mi embeya gu kheni: Oyu a engisago malito yangu, gima kha na ngafa.” 52 Vajudha va di mu embeya, khavo: “Olu hi ngu khodwa kamo gu khethu u na ni lidhimoni. Abrahama fude, vaprofeti navo va fude, ganiolu uwe wari khuwe: ‘Ni wevbini a landrisago malito yangu, gima kha na ngafa.’ 53 Ina uwe u khongolo guvbindra papayi wathu Abrahama a fudego? Vaprofeti navo va fude. Wo pimisa gu khuwe khuwe mani?” 54 Jesu a di va hlamula, khuye: “Nya gu ba nyi dzi dhumisa, wudhumo wangu khandri wa gilo. Khu Papayi wangu a nyi dhumisago, a gu oyu mu gu khenu Nungungulu wanu. 55 Ambari ulolo, enu kha mu muti, ganiolu eni nyi ngu muti. Nya gu kheni kha nyi muti, a na ba nari nyo lipha gu fana nanu. Ganiolu, eni nyi ngu muti nigu nyi ngu mu engisa. 56 Papayi wanu Abrahama tsakede ngudzu gu wona litshigu langu nigu uye a li wonide a bwe a tsaka.” 57 Khavbovbo, Vajudha va di hakha, khavo: “Uwe ne 50 myaga u mwalo, ganiolu wari khuwe u wonide Abrahama?” 58 Jesu a di va embeya, khuye: “Khu lisine nyi ngu mi embeya gu kheni Abrahama na si gu velegwi, eni nyi di romo.” 59 Khavbovbo, va di rola siwindri gasi gu mu veta khiso, ganiolu Jesu a di sihala a duga khu tempeleni.

9 Tepo Jesu a nga ba a vbindra, a di wona mwama a nga ba a velegidwe nari gikhumu. 2 Khavbovbo, vapizane vaye va di mu wudzisa, khavo: “Rabi, khu mani a nga ghoha gasi mwama yoyu a velegwa nari gikhumu? Khuye mwendro vavelegi vaye?” 3 Jesu a di va hlamula, khuye: “Ne mwama yoyu kha ghoha, ne vavelegi vaye kha va ghoha, ganiolu esi si giregide gasi mithumo ya Nungungulu yi tidwa khavbo gwaye. 4 Gu vbwetega hi gira mithumo ya wule a nyi rumedego na gu ngari mihani, kholu gu nguta wutshigu, avbo ne moyo a na si kodzago gu thuma. 5 Na nyi nga romo tigoni eni nyi guwonegeya nya litigo.” 6 Hwane nyo ganeye isoso, a di hetsha vbavbatshi, a gira thomwa khu dzindrura, a yi todza mahoni ya mwama wule, 7 a mu embeya, khuye: “Gimbiya u ya dzi handza lidhamuni la Silowe” (Silowe so thula “Oyu a Rumedwego”). Khavbovbo, uye a di hongola a ya dzi handza a bweleya na gu wona.

8 Vavhizinyu va nga ba va oloveya gu mu wona na gu lomba zomola va di wudzisa, khavo: “Ina khandruye mwama yoyu a nga ba a lomba zomola?” 9 Vambe va di gu khavo: “Khuye.” Vambe, khavo: “Ne, khandruye, a gu fana naye.” Ganiolu, mwama wule a di gu khuye: “Ne, kheni kamo.” 10 Khavbovbo, va di mu wudzisa, khavo: “Ma tulegide kharini maho yago?” 11 Uye a di va hlamula, khuye: “Mwama moyo nyo pwani khu Jesu a di gira thomwa a yi todza mahoni gwangu, a nyi embeya, khuye: ‘Gimbiya Silowe u ya dzi handza.’ Khavbovbo, eni nyi di hongola nyi ya dzi handza, nyi pheya gu wona.” 12 Khu kharato, va di mu wudzisa, khavo: “Womo hayi mwama yoyo.” Uye a di va hakha, khuye: “Kha nyi dziti.”

13 Avo va di dzega mwama wule a nga ba ari gikhumu va mu yisa ga Vafarisi. 14 Litshigu lile Jesu a nga gira thomwa a mu tula maho gu diri Sabhadho. 15 Khu kharato, Vafarisi va di mu wudzisa navo, khavo: “Ma tulegide kharini maho yago?” Uye a di va hlamula, khuye: “Uye a di todza thomwa mahoni gwangu, khavbovbo nyi ya dzi handza nyi pheya gu wona.” 16 Khu kharato, Vafarisi nyo khaguri va di khavo: “Mwama yoyu khandri wa Nungungulu kholu kha sayisi Sabhadho.” Vambe va ganeya, khavo: “Si nga kodzega kharini gu muthu a gu gighohi a gira silewugiso nya nga esi?” Khavbovbo, gu di manega guhambana vbakari gwawe. 17 Vafarisi va di wudzisa gambe mwama wule a nga ba ari gikhumu, khavo: “U ngu khuwe ginani khuye, kha nga olu ma gu maho yago ma tudwego?” Mwama wule a di va hlamula, khuye: “Uye muprofeti.”

18 Ganiolu, Vajudha kha va nga ba va khodwa gu khavo mwama wule a diri gikhumu nigu a di gu hawulugisidwe, kala va ranisa vavelegi vaye, 19 va ta va wudzisa, khavo: “Khigyo gyanana gyanu egi mu gu khenu gi velegidwe na giri gikhumu? Si kodzegide kharini gu olu gi wona?” 20 Vavelegi vakone va di hlamula, khavo: “Hi ngu dziti gu khethu egi gyanana gyathu ni gu khethu gi velegidwe na giri gikhumu. 21 Ganiolu, kha hi dziti gu khethu ma tulegide kharini maho yaye, ne kha hi muti uye a nga mu tula maho. Mu wudziseni. Uye muthu a dandridego. A na dzi hlamuleya abune.” 22 Vavelegi vakone va di ganeya isoso khu gu thava Vajudha kholu Vajudha va di hungide gu tutumisa Sinagogani ni wevbini a nga hadzi dzumeya gu khuye Jesu khuye Kristo. 23 Khiso si giridego gu vavelegi vaye va ganeya, khavo: “Uye muthu a dandridego. Mu wudziseni.”

24 Khu kharato, va di rana gambe mwama wule a nga ba ari gikhumu va ta mu embeya, khavo: “Dhumisa Nungungulu;* hi ngu dziti gu khethu mwama wule gighohi.” 25 Uye a di hlamula, khuye: “Abari gu uye gighohi, eni kha nyi siti, iso nyi sitigo khu gu eni nyi diri gikhumu olu nyi ngu wona.” 26 Khavbovbo, va di mu wudzisa, khavo: “Ginani a nga gu gira? A ma tude kharini maho yago?” 27 Uye a di va hlamula, khuye: “Eni nyi mi embede, ganiolu kha mwa nyi engisa. Khu ginani mu vbwetago gu khenu nyi ganeya gambe. Ina khandri mwa gu vbweta gu khala nenu vapizane vaye?” 28 Khu kharato, avo va di mu yuyuteya, khavo: “Uwe u mupizane wa mwama wule, ganiolu ethu hi vapizane va Mosi. 29 Hi ngu dziti gu khethu Nungungulu ganede ni Mosi, ganiolu mwama yoyu kha hi guti omu a tago khumo.” 30 Mwama wule a di va hakha, khuye: “Si ngu samadzisa ngudzu gu ba mu si guti omu a tago khumo, ambari ulolo uye a nyi tude maho. 31 Hi ngu dziti gu khethu Nungungulu kha engisi sighohi, ganiolu ni wevbini wule a mu thavago a gira gugola gwaye, uye a ngu mu engisa. 32 Gukhugeya gale ni gale gima hi si gupwi gu pwani womo muthu a tudego maho nya muthu a velegidwego nari gikhumu. 33 Nari khatshi mwama yoyu khandri wa Nungungulu na sa kodza gu gira gilo.” 34 Khavbovbo, avo va di mu hakha, khavo: “U velegidwe gighohoni, ambari ulolo wa gu vbweta gu hi hevbudza?” Khavbovbo, va di mu tutumisa.

35 Jesu a dipwa gu pwani mwama wule tutumisidwe. Tepo a nga manana naye a di mu wudzisa, khuye: “Uwe u ngu khodwa ga Gyanana nya muthu?” 36 Mwama wule a di hlamula, khuye: “Pfhumu, nyi embeye gu khuwe khuye mani gasi nyi khodwa gwaye.” 37 Jesu a di mu embeya, khuye: “U di nga mu wona, khu lisine khoyu kamo u ganeyago naye.” 38 Mwama wule a di khuye: “Eni nyi ngu khodwa gwaye Pfhumu.” Khavbovbo, a mu khidzimeya. 39 Khavbovbo, Jesu a di khuye: “Nyi dzude mafuni gasi gu ta lamula, gasi gu avo va gu mba wona, va wona; vale va wonago, va khala sikhumu.” 40 Tepo Vafarisi nyo khaguri va nga ba vari naye va ngapwa isoso, va di mu wudzisa, khavo: “Ethu nethu hi sikhumu?” 41 Jesu a di va embeya, khuye: “Nari khatshi mu diri sikhumu, na mu si ningwi nandru nya gighoho. Ganiolu, kha nga mu gu khenu: “Ethu hi ngu wona, gighoho gyanu kha gi na nga divaledwa.”

10 “Khu lisine nyi ngu mi embeya gu kheni: Oyu a si beyigo phandroni nya dzinvuta khavba nya mwanya, ganiolu a beya khu wumbe wulanga, mbafa nigu muphangi. 2 Ganiolu, oyu a beyago khu mwanya khuye a gu muhavisi nya dzinvuta. 3 Oyu khuye a tuledwago lidimba khu muwoneleyi nya liphandro, nigu dzinvuta dzi ngu engisa lito laye. Uye a gu dzi rana khu malina yadzo a duga nadzo vbavbandze. 4 Hwane nya gu ba a duside dzinvuta dzaye dzatshavbo, uye a gu thanga mbeli gwadzo, idzo dzi mu landreya kholu dzi ngu liti lito laye. 5 Idzo gima kha dzi na nga landreya muthu dzi si mutigo, ganiolu dzi na mu tutuma, kholu kha dziti lito nya vathu dzi gu mba vati.” 6 Jesu a di va embeya gifananiso gegi, ganiolu avo kha va si pwisisa esi a nga ba a vbweta gu va embeya.

7 Khu kharato, Jesu a di va embeya gambe, khuye: “Khu lisine nyi ngu mi embeya gu kheni: Eni kheni mwanya nya dzinvuta. 8 Vatshavbo va ngata wulangani gwangu dzimbafa nigu vaphangi; ganiolu dzinvuta dzangu kha dza va engisa. 9 Eni nyi mwanya. Ni wevbini a beyago khavbo gwangu a na vbulugiswa, a beya a bwe a duga, nigu a na mana gilo nyo hodze. 10 Mbafa yo teya basi gu taba, yi songa yi bwe yi phanga. Ganiolu eni nyi dzude gasi mu ta manega ni womi nya gupindruge. 11 Eni nyi muhavisi nya wadi, nigu muhavisi nya wadi a ngu ningeya womi waye khu kotani nya dzinvuta dzaye. 12 Githumi gile gi sirigo muhavisi, gi sirigo gambe mune nya dzinvuta, tepo gi wonago lisolwa* na li guta, gya gu diga dzinvuta gi tutuma, lisolwa li ta saseya dzinvuta li dzi phalalegisa; 13 igyo gyo tutuma kholu githumi, kha gi khathali khu dzinvuta. 14 Eni nyi muhavisi nya wadi. Nyi ngu dziti dzinvuta dzangu, nigu dzinvuta dzangu dzi ngu nyiti. 15 Kha nga Papayi a nyi tigo, aneni nyi ngu muti, nigu nyi ngu ningeya womi wangu khu kotani nya dzinvuta.

16 “Nyi na ni dzimbe dzinvuta, dzi sirigo dza liphandro leli, idzo nidzo nyi yede gu dzi resa, nigu idzo dzi na engisa lito langu, khu kharato dzi na khala tshambi mowo wu gu na ni muhavisi moyo. 17 Khigyo gi girago gu Papayi a nyi haladza, kholu eni nya gu ningeya womi wangu, gasi nyi wu mana gambe. 18 Kha nyi dzegedwi khu muthu, ganiolu nya gu wu ningeya khu gu dzina gwangu. Nyi na ni fanelo nya gu wu ningeye nigu nyi na ni fanelo* nya gu wu hakhe gambe. Nyi hakhide gileletelo gegi khiyo ga Papayi wangu.”

19 Gu di manega gambe guhambana vbakari nya Vajudha khu kotani nya malito yaya. 20 Nya vangi vbakari gwawe, va di gu khavo: “Uye na ni lidhimoni nigu handrugide. Khu ginani mu mu engiseyago?” 21 Vambe va di gu khavo: “Aya khandri malito nya muthu a gu na ni lidhimoni. Ina lidhimoni li nga si kodza gu tula maho nya sikhumu?”

22 Gu di girega festa nya gu agiswe tempele Jerusalema. Gu diri nango nya girame, 23 nigu Jesu a di gu gimbiya tempeleni, avba nya koredhori* ya Solomoni. 24 Khu kharato, Vajudha va di mu randreya va mu wudzisa, khavo: “Kala lini na wu gu hi tshiya ni gukanakana? Abari gu khuwe Kristo, dzegeya gu hi embeya.” 25 Jesu a di va hakha, khuye: “Eni nyi mi embede, ganiolu enu kha mwa khodwa. Mithumo nyi girago khu lina la Papayi wangu, yi ngu fakaza maningano ni eni. 26 Ganiolu enu kha mu khodwi kholu kha muri dzinvuta dzangu. 27 Dzinvuta dzangu dzi ngu engisa lito langu, nigu eni nyi ngu dziti, nigu idzo dzi ngu nyi landreya. 28 Nya gu dzi ninga womi nya gupindruge, nigu idzo gima kha dzi na nga fuviswa, nigu mwalo a na dzi wandrago mandzani gwangu. 29 Dzinvuta nyi ningidwego khu Papayi wangu dzi na ni lisima guvbindra satshavbo, nigu mwalo a na si kodzago gu dzi wandra mandzani ga Papayi. 30 Eni ni Papayi hi ngu pwanana.”

31 Vajudha va di rola gambe siwindri gasi gu mu pfara khiso. 32 Khavbovbo, Jesu a di va embeya, khuye: “Nyi mi yeyedzide mithumo nya yingi nya yadi yitago khiyo ga Papayi. Mo vbweta gu nyi pfara khu siwindri khu kotani nya wevbini wakona?” 33 Vajudha va di mu hlamula, khavo: “Ethu kha hi vbweti gu gu pfara khu kotani nya thumo nya wadi u wu giridego, ganiolu ho vbweta gu gu pfara kholu u valeteyago; kholu ambari olu u gu muthu, wa gu dzi gira nungungulu.” 34 Jesu a di va hakha, khuye: “Kha ga lowa nayoni gwanu gu pwani: ‘Eni nyi di kheni: “Enu mu vanungungulu”’? 35 Abari gu ranide vale va kawukidwego khu lito Laye khuye vanungungulu . . . nigu kha nga olu milowo yi si vbindrugedzwigo . . . 36 enu mwa gu embeya eni, a gu eni nyi agisidwego khu Papayi nyi bwe nyi rumedwa mafuni, khenu: ‘U ngu valeteya’, khu kotani nya olu nyi nga kheni: ‘Nyi Gyanana gya Nungungulu’? 37 Abari gu mithumo nyi girago khandri ya Papayi wangu, mu nga khodwi gwangu. 38 Ganiolu, abari gu nyi ngu gira mithumo yoyo, ambari mwa gu ba mu si khodwi avbo gwangu, khodwani avba nya mithumo, gasi muti ni gu khodwa gu khenu Papayi a ngu pwanana ni eni, nigu eni nyi ngu pwanana ni Papayi.” 39 Avo va di zama gambe gu mu mola, ganiolu kha va mu mana.

40 A di hongola gambe tshatugo ga Joridhani, a ya khala avba Johane a nga ba a bhabhatisa avbo gupheyani. 41 Vathu nya vangi va di hongola avbo gwaye, vaya khavo: “Johane kha gira ne gilewugiso gimwegyo, ganiolu satshavbo esi Johane a ganedego maningano ni mwama yoyu si diri lisine.” 42 Vathu nya vangi va nga ba vari vbale va di khodwa gwaye.

11 Mwama moyo nyo pwani khu Lazaro, a di gu dwala; uye a diri wa Bhetaniya, gidhoropana gya Mariya ni ndriyaye Marta. 2 Mariya yoyu khu wule a nga todza mafura nyo nungeye Pfhumu a bwe a bavbula migondro yaye khu ndzundzu waye; Lazaro, a gu oyu a nga ba a dwala, a diri ndriyaye. 3 Khu kharato, vandriyaye nya vanyamayi va di rumeya mwangu ga Jesu, wu gu khuwo: “Pfhumu, wule u mu golago a ngu dwala.” 4 Ganiolu, tepo Jesu a ngapwa isoso, a di khuye: “Madwali yaya khandri ya gu songa, ganiolu khya gu ninga wudhumo Nungungulu, gasi gu Gyanana gya Nungungulu gi dhumiswa khu kotani yawo.”

5 Jesu a di gu gola ngudzu Marta ni ndriyaye nya nyamayi ni Lazaro. 6 Ambari ulolo, tepo a ngapwa gu pwani Lazaro a ngu dwala, a di simama iyo a nga ba a romo khu matshigu mavili. 7 Hwane nya isoso, uye a di embeya vapizani, khuye: “Hongoleni gambe Judheya.” 8 Vapizane va di mu embeya, khavo: “Rabi, khandri gale va nga ba va vbweta gu gu pfara khu siwindri Judheya, olu wo vbweta gu bweleya gambe iyoyo?” 9 Jesu a di va hakha, khuye: “Gasi litshigu li mwalo 12 dziora nya guwonegeye? Oyu a gimbiyago mihani kha dzi ghumi, kholu a ngu wona guwonegeya nya litigo leli. 10 Ganiolu, uye a gimbiyago wutshigu, a ngu dzi ghuma, kholu mwalo guwonegeya.”

11 Hwane nyo ganeye isoso, a di khuye: “Pari yathu Lazaro lade, ganiolu eni nya gu hongola iyoyo gasi gu ya mu wusa.” 12 Khavbovbo, vapizane vaye va di mu embeya, khavo: “Pfhumu, abari a gu lala, a na hawuluga.” 13 Khu lisine, Jesu a di gu ganeya khu gufa ga Lazaro; ganiolu, avo va di gu pimisa gukhavo uye a di gu ganeya khu gu lala ligovbe. 14 Khu kharato, Jesu a di dzegeya gu va pwadzeya khuye: “Lazaro fude; 15 nigu eni nyi ngu tsaka kholu nyi nga ba nyiri mwalo iyoyo, gasi gu enu mu khodwa. Ganiolu hongoleni eyi a gu romo.” 16 Tomasi, a nga ba a ranwa pwani Mavbaha, a di embeya vambe vapizane, khuye: “Hongoleni nethu gasi hi yafa ni Jesu.”

17 Tepo Jesu a nga vboha iyoyo, a di embedwa gu pwani gu di vbindride 4 matshigu Lazaro na dzingidwe. 18 Bhetaniya gu diri vbafuvbi ni Jerusalema khu pfhuka nya 3 dzikilometro 19 nigu Vajudha nya vangi va di gu hongode va ya thaveleya Marta ni Mariya khu kotani nya olu va nga ba va fedwe khu ndriyawe. 20 Tepo Marta a ngapwa gu pwani Jesu a ngu vboha, a di khuga a mu khinga; ganiolu, Mariya a di tshala gaya. 21 Khavbovbo, Marta a di embeya Jesu, khuye: “Pfhumu, nari khatshi u di romo avba, ndriyangu na safa. 22 Ambari ulolo, nyi ngu dziti gu kheni ni gevbini u lombago ga Nungungulu, uye a na gu ninga.” 23 Jesu a di mu embeya, khuye: “Ndriyago a na wuga.” 24 Marta a di mu hakha, khuye: “Nyi ngu dziti gu kheni a na wuga guwuswani ga ava va fudego, khu litshigu nya guhegise.” 25 Jesu a di mu embeya, khuye: “Eni kheni guwuga ni womi. Ni wevbini a khodwago gwangu, ambari a gufa, a na wuswa a vbanya; 26 nigu ni wevbini a vbanyago a khodwago gwangu, gima kha na ngafa. U ngu si khodwa isoso?” 27 Marta a di hlamula, khuye: “Ina Pfhumu, eni nyi ngu khodwa gu kheni uwe khuwe Kristo, Gyanana gya Nungungulu, egi a gi rumedego mafuni.” 28 Hwane nya gu ba Marta a ganede esi, a di ya rana ndriyaye Mariya, a mu embeya khu phuvbo, khuye: “Muhevbudzi womo avba, a ngu gu rana.” 29 Tepo Mariya a ngapwa isoso, a di khuga khu guvbiredza a mu yela.

30 Jesu a di si gu beyi gidhoropanani, ganiolu a di ngo emide avba Marta a nga manana naye. 31 Tepo Vajudha va nga ba va romo ndrangani ga Mariya na va gu mu thaveleya, va nga wona gu khavo khugide khu guvbiredza, va di mu landra, na va gu pimisa gu khavo adzina a di hongola lithowutunu gasi guya liya. 32 Tepo Mariya a nga vboha avbo Jesu a nga ba a romo a mu wona, a di khidzima migondroni gwaye, khuye: “Pfhumu, nari khatshi u di romo avba, ndriyangu na safa.” 33 Tepo Jesu a nga wona gu khuye Mariya ni Vajudha va nga ba vari naye va di gu liya, a di khumbega ngudzu a garadzega. 34 A va wudzisa, khuye: “Mu mu dzingide hayi?” Va ganeya khavo: “Pfhumu, delu uta gu wona.” 35 Khavbovbo, Jesu a di pheya gu liya. 36 Tepo va nga wona isoso, Vajudha va di khavo: “Nga wonani edzi a nga ba a mu gola khidzo!“ 37 Ganiolu, vambe va di gu khavo: “Gasi khandruye mwama a nga tula maho gikhumu, khu ginani a nga mba himbedzeya gu khuye Lazaro afa?”

38 Khavbovbo, na khumbegide ngudzu, Jesu a di hongola vbalithowutunu. Khu lisine, gu diri phago, yi nga ba yi segidwe khu giwindri. 39 Jesu a di khuye: “Dusani giwindri.” Marta, ndriye wa oyu a nga ba a fude, a di khuye: “Pfhumu, si nga gira na gu nunga, kholu gu ngu vbindra 4 matshigu na fude.” 40 Khavbovbo, Jesu a di mu hakha, khuye: “Kha nya gu embeya gu kheni wa gu khodwa u na wona wudhumo wa Nungungulu?” 41 Khavbovbo, va di dusa giwindri. Jesu a di khedza ndzadzini a ganeya, khuye: “Papayi, nyi ngu bonga kholu u nga nyipwa. 42 Khu lisine, nyi di gu dziti gu kheni tepo yatshavbo u ngu nyipwa, ganiolu nyi ganede esi khu kotani nya gitshungu gi nyi randredego, gasi gu va khodwa gukhavo u nyi rumede.” 43 Hwane nyo ganeye isoso, a di khusedza lito khuye: “Lazaro, duga vbavbandze!” 44 Mwama a nga ba a fude a di duga, mawundru yaye ni mawogo yaye na si hungeledwe khu mikeka, khovbe yaye na yi dzongeledzedwe khu mwendra. Jesu a di khuye: “Mu tshuleni mikeka mu mu diga a hongola.”

45 Khu kharato, Vajudha nya vangi va nga ba va hongode va ya wuseya Mariya, va di wona esi Jesu a nga gira, va khodwa gwaye. 46 Ganiolu, vambe vbakari gwawo va di ya embeya Vafarisi esi Jesu a nga gira. 47 Khavbovbo, vaprista nya vakhongolo ni vafarisi va di ya tshangana Tribhunali va ganeya, khavo: “Hi na rini olu mwama yoyu a girago silewugiso nya singi? 48 Ha gu mu diga a simama gu gira esi, vatshavbo va na khodwa gwaye, nigu Varoma va na ta hi dzegeya wulanga* wathu ni litigo lathu.” 49 Ganiolu, moyo wawe, nyo pwani khu Khayifasi, a nga ba ari uye muprista nya khongolo ngudzu khu mwaga yoyo, a di va embeya, khuye: “Enu kha muti gilo. 50 Ina kha mu dzitini gu khenu tshukwana gu muthu moyo afa a feya vatshavbo, guvbindra gu litigo latshavbo li fuviswa?” 51 Ganiolu, uye kha ganeya isoso khu gu si khugeya, ganiolu kha nga olu a nga ba ari uye muprista nya khongolo ngudzu khu mwaga wule, uye a di profeta gu khuye Jesu a na feya litigo, 52 nasiri litigo longa, ganiolu gasi gu tshanganisa sanana sa Nungungulu si phalalegidego si khala tsawa mowo. 53 Khu kharato, gukhugeya litshigu lolo va di gira makungo nya gu mu songe.

54 Khu kotani nya isoso, Jesu kha nga ba a gimbiya-gimbiya gambe vbakari nya Vajudha, ganiolu a di khuga khu vbale a hongola dhoropani ga Efrayimi, gu nga ba gu manega vbafuvbi ni giwulani, a ya khala iyoyo ni vapizane. 55 Gu diri vbafuvbi ni gu vboha Phasika, khu kharato Vajudha nya vangi va nga ba va vbanya vbavbandze nya lidhoropa, va di gweya Jerusalema gasi va ya dzi agisa guya khu nayo na yi si gu vbohi Phasika. 56 Va di gu vbwetedzeya Jesu tempeleni, na va gu wudzisana khu gyawe, khavo: “Mo si wona kharini? Ina a nata festatunu?” 57 Ganiolu, vaprista nya vakhongolo ni Vafarisi, va di ganede gu khavo, ni wevbini oyu a na gutigo omu a gu romo Jesu, a di yede gu va embeya, gasi gu va ya mu mola.

12 Na gu keneleya 6 matshigu gasi gu vboha Phasika, Jesu a di vboha Bhetaniya, eyi a nga ba a romo Lazaro a mu wusidego khu gufani. 2 Va di ya mu dongiseleya gilo nyo hodze, nigu Marta a di gu phameya, ganiolu Lazaro a diri moyo nya ava a nga ba a hodza navo. 3 Khavbovbo, Mariya a di dzega gipimo nya meyu litro nya mafura nyo dhure ngudzu, nyo nungeye gwadi, nyo girwe khu nardhu* nya yadi, a ma guhula migondroni ga Jesu a vbedza a yi bavbula khu ndzundzu waye. Nyumbani gwatshavbo gu di nungeya mafura yoyo. 4 Ganiolu, Judha Sikariyoti, moyo nya vapizane vaye, a nga ba ari vbafuvbi ni gu mu ningeya, a di khuye: 5 “Khu ginani mafura yaya ma nga mba rengiswa khu 300 dzidhenaryo,* dzitsapawu dzakone dzi ningedwa sisiwana.” 6 Judha khandri a di ganeya esi khu gu ba a khathala khu sisiwana, ganiolu kholu a nga ba ari mbafa. Uye a di gu khathaleya kaxa nya miningelo nigu a di guba dzitsapawu dzi nga ba dzi thedwa umomo. 7 Khavbovbo, Jesu a di mu embeya, khuye: “Mu dige. Uye a gu gira esi gasi gu dongigeya gudzingwa gwangu. 8 Kholu sisiwana mu naso tepo yatshavbo, ganiolu khandri tepo yatshavbo mu na gu ba muri ni eni.”

9 Tepo Vajudha nya vangi va ngati gu khavo Jesu womo Bhetaniya, avo va di hongola iyoyo nasiri gu ya wona Jesu basi, ganiolu gasi gu ya wona nuye Lazaro oyu a nga mu wusa khu gufani. 10 Vaprista nya vakhongolo va di gira makungo nyo songe nuye Lazaro, 11 kholu khu kotani yaye, Vajudha nya vangi va di gu hongola iyoyo nigu va di gu khodwa ga Jesu.

12 Khu mindru gakone, vathu nya vangi va nga ba va hongode festatunu va diti gu khavo Jesu a diri vbafuvbi ni gu vboha Jerusalema. 13 Khavbovbo, va di dzega matamo nya migindro va mu khinga na va gu huweleya khu lito nya likhongolo, khavo: “Nungungulu, hi ngu gu lomba, vbulugisa Gyanana gya Dhavhidhe! Kategide wule a tago khu lina la Jehovha. Yi kategide Pfhumu ya Israyeli!” 14 Tepo Jesu a nga mana giburwana a di khileya, kha nga edzi si lovidwego khidzo, pwani: 15 “U nga thavi nyamahegyane wa Siyoni. Phumu yago yi nguta na yi khilede giburwana.” 16 Gupheyani, vapizane kha va nga ba va si pwisisa, ganiolu tepo Jesu a nga dhumiswa va di dundruga gu khavo silo sesi si di lovidwe maningano naye nigu si mu dugelede.

17 Avo va nga ba vari naye tepo a nga rana Lazaro khu thowoni a bwe a mu wusa khu ga vafudego, va di ningeya wufakazi. 18 Khiso si giridego gambe gu gitshungu gi mu khinga kholu gi di pwide gu pwani giride gilewugiso gegi. 19 Khu kharato, Vafarisi va di bhula khu gyawe, khavo: “Somo guagani gu khiso kha hi na nga si kodza. Mu ngu wona edzi litigo latshavbo li mu landreyago khidzo!”

20 Vbakari nya avo va nga gweyago gasi gu ya khozeya festatunu gu diri ni Vagreki. 21 Avo va di hidzimelaya Filipi, a nga ba ari wa Bhetisayidha ga Galileya, va ya mu lomba, khavo: “Ha gu vbweta gu wona Jesu.” 22 Filipi a di ya embeya isoso Andreya. Khavbovbo Andreya ni Filipi va ya ganeya ni Jesu.

23 Ganiolu, Jesu a di hakha, khuye: “Yi vbohide tepo nya gu Gyanana nya muthu gi dhumiswa. 24 Khu lisine, nyi ngu mi embeya gu kheni: Mbewu nya trigu ya gu thega mafuni yi sifi, ya gu simama gu khala mbewu mweyo basi; ganiolu, ya gufa, ya gu ninga mihandro nya yingi. 25 Uye a golago womi* waye a na wu luza,* ganiolu uye a nyenyago womi* waye tigoni momu a na wu sayisa gasi a mana womi nya gupindruge. 26 Uye a vbwetago gu nyi thumeya, a na nyi landreye, nigu avba nyi na gu ba nyi romo, githumi gyangu gi na ba gi romo nigyo vbovbo. Uye a vbwetago gu nyi thumeya a na zundzwa khu Papayi. 27 Olu nyi ngu garadzega, nigu nyi na kheni ginani? Papayi, nyi vbulugise ga tepo yeyi. Ganiolu, khiso nyi nga si teya, nyi tede tepo yeyi. 28 Papayi, dhumisa lina lago.” Khavbovbo, gu di pwala lito khu ndzadzini khilo: “Eni nyi li dhumiside nigu nyi nga na gu li dhumisa.”

29 Vathu va nga ba va romo vbale, va di pwa isoso va ganeya khavo libara li nga veta. Vambe va ganeya, khavo: “Ngilozi yi nga ganeya naye.” 30 Jesu a di va hlamula, khuye: “Lito leli kha la pwala khu kotani yangu, ganiolu khu kotani yanu. 31 Olu gu na ni gulamudwa nya litigo leli, nigu pfhumu nya litigo leli yi na tutumiswa. 32 Ganiolu, tepo nyi na gu vbayegwago vbasimbotunu, nyi na ndrindra vathu nya mafumbo yatshavbo vata avba gwangu.” 33 Khu lisine uye a di ganeya isoso gasi gu yeyedza edzi a na fago khidzo. 34 Khu kharato, gitshungu gi di mu hakha, khigyo: “Hi pwide omu nya Nayo gu pwani Kristo a na simama kala gupindruga. Khu ginani u ganeyago gu khuwe Gyanana nya muthu gi yede gu vbayegwa? Khu mani Gyanana gyogyo nya muthu?” 35 Jesu a di va embeya, khuye: “Guwonegeya gu na simama vbakari gwanu khu gitepwana nya gidugwana. Gimbiyani na gu ngari ni guwonegeya gasi mu si padwi khu gidema. Oyu a gimbiyago gidemani kha guti omu a hongolago. 36 Khodwani avba nya guwonegeya na gu ngo romo gasi mu khala sanana nya guwonegeye.”

Hwane nyo ganeye isoso, Jesu a di hongola a ya va sihaleya. 37 Ambari olu a giridego silewugiso nya singi mbeli gwawe, avo kha va khodwa gwaye, 38 gasi ma tadzisega malito ya muprofeti Isaya a nga khuye: “Jehovha, khu mani a khodwego ga esi hi ganedego?* Nigu libogo la Jehovha li wonegisidwe ga mani?” 39 Isaya ganede gambe khu gighelo gi va giridego va si khodwi, khuye: 40 “Uye va segide maho a bwe a va bangisa myonyo, gasi va si woni khu maho ne va si pwisisi khu monyo, va kodza gu dzi laya nyi va hawulugisa.” 41 Isaya a di ganeya isoso kholu wonide wudhumo wa Kristo a bwe a ganeya khuye. 42 Ambari ni vathangeyi nya vangi nya Vajudha va di gu khodwa gwaye, ganiolu khu kotani nya Vafarisi, avo kha va nga ba va ganeya isoso guagani gasi va si tutumiswi sinagogani; 43 kholu avo va di gu gola gu dhumiswa khu vathu guvbindra gudhumiswa khu Nungungulu.

44 Ganiolu, Jesu a di khusedza lito, khuye: “Ni wevbini a khodwago gwangu, khandri a gu khodwa basi gwangu, ganiolu a gu khodwa gambe ga wule a nyi rumedego, 45 nigu oyu a nyi wonago, a gu wona gambe Wule a nyi rumedego. 46 Nyi dzude kha nga guwonegeya mafuni, gasi ni wevbini wule a khodwago gwangu a si simami gidemani. 47 Uye a pwago mahungu yangu, ganiolu a si ma landrisi, kha nyi mu lamuli, kholu kha nya teya gu ta lamula litigo, ganiolu gu ta li vbulugisa. 48 Oyu a si theyigo kota kheni a bwe a si dzumeyi esi nyi ganedego, gu ni oyu a na mu lamulago. Esi nyi ganedego khiso si na mu lamulago khu litshigu nyo hegise. 49 Kholu kha nya ganeya khu gu si khugeya, ganiolu Papayi a gu uye a nyi rumedego khuye a nyi embedego esi nyi yedego gu ganeya. 50 Nigu eni nyi ngu dziti gu kheni sileletelo saye so thula womi nya gupindruge. Khu kharato, satshavbo esi nyi ganeyago nyo ganeya khedzi Papayi a nyi embedego khidzo.”

13 Na li si gu vbohi litshigu nya festa nya Phasika, Jesu a di gu dziti gu khuye yi di vbohide tepo nya gu a diga litigo a hongola ga Papayi. Kha nga olu a nga ba a haladza valandreyi vaye, uye va haladzide kala mahegiso. 2 Na va nga gu hodza, Dhiyabhulosi a di thede monyoni ga Judha Sikariyoti, gyanana gya Simoni, mapimo nya gu ningeye Jesu. 3 Jesu a di gu dziti gu khuye Papayi a di mu ningide satshavbo, nigu a di guta khiyo ga Nungungulu ni gu a di gu hongola ga Nungungulu. 4 Khavbovbo, a di khuga khu vbamezatunu, a tshula libhadzi laye, a dzega towaliya a tshomega* mugiwununi. 5 Hwane nya ba a thede mati basiyani, a di pheya gu handza migondro ya vapizane a bwe a yi bavbula khu towaliya a nga ba a tshomegide mugiwununi. 6 Tepo a nga vboha ga Simoni Pedro, Simoni Pedro a di mu wudzisa, khuye: “Pfhumu, wo vbweta gu handza migondro yangu?” 7 Jesu a di mu hlamula, khuye: “Esi nyi girago khu na nga si pwisisa olu, ganiolu u na si pwisisa khu gu gimbiya nya tepo.” 8 Pedro a di mu embeya, khuye: “Khu na nga tshuka nu handzide migondro yangu.” Jesu a mu hakha, khuye: “Nya gu mba gu handza, khu nyi lumbi.” 9 Simoni Pedro a di hakha, khuye: “Pfhumu, u nga nyi handzi migondro basi, ganiolu nyi handze gambe mandza ni hungo.” 10 Jesu a di mu hakha, khuye: “Uye a hambidego agide, kha gu ngo vbwetega gu hamba gimbe gilo vbavbandze nya migondro basi. Enu mu agide, ganiolu khandrenu mwatshavbo.” 11 Jesu a di gu muti oyu a nga hadzi mu ningeya, khiso si nga gira a ganeya, khuye: “Khandrenu mwatshavbo mu agidego.”

12 Khavbovbo, hwane nya gu ba a vbedzide gu va handza migondro, a di ambala gambe libhadzi laye, a khala gambe vbamezatunu, a va wudzisa, khuye: “Mu si pwisiside esi nyi nga mi gira?” 13 Enu mwa gu nyi rana khenu ‘Muhevbudzi’ mwendro ‘Pfhumu,’ khiso mu ganeyago, kheni kamo. 14 Khu kharato, abari gu eni nyi gu Pfhumu ni Muhevbudzi nyi mi handzide migondro, anenu mu yede gu handzana migondro. 15 Nyi mi vegedeni giyeyedzo gasi gu esi nyi mi giredego mu gira nenu. 16 Khu lisine nyi ngu mi embeya gu kheni: Githumi khandri gikhongolo guvbindra pfhumu yagyo, nigu gambe oyu a rumedwego khandri khongolo guvbindra oyu a nga mu rumeya. 17 Kha nga olu mu tigo silo sesi, mu na tsaka mwa gu si landrisa. 18 Kha nyi thuli enu mwatshavbo; nyi ngu vati ava nyi va hathidego, ganiolu nyi ganede esi gasi gu tadzisega milowo yi gu khiyo: “Oyu a hodzago pawu yangu a nyi wugede.* 19 Nyo mi embeya esi olu, na si nga si giregi, gasi tepo si na giregago mu khodwa gu khenu kheni mani. 20 Khu lisine, nyi ngu mi embeya gu kheni: Oyu a hakhago ni wevbini nyi mu rumeyago, a nyi hakhide neni, nigu oyu a nyi hakhago, hakhide ni Oyu a nyi rumedego.

21 Hwane nya ba Jesu a ganede silo sesi, a di garadzega ngudzu, khuye: “Khu lisine nyi ngu mi embeya gu kheni moyo wanu avba a na nyi ningeya.” 22 Vapizane va di khedzana, na va si dziti gu khavo o thula mani. 23 Moyo nya vapizane vaye, oyu Jesu a nga ba a mu gola, a di khade vbafuvbi ni Jesu. 24 Khavbovbo, Simoni Pedro a di khweneta mupizane yoyo khu hungo, khuye: “Gasi o thula mani?” 25 Khavbovbo, mupizane yoyo a di hidzimeleya Jesu a ya mu wudzisa, khuye: “Wo thula mani, Pfhumu?” 26 Jesu a di hlamula, khuye: “Khoyu nyi na mu ningago gipandre nya pawu nyi na gi negago omu nya tijela.” Khavbovbo, hwane nyo nege gipandre nya pawu omu nya tijela, a di ninga Judha, gyanana gya Simoni Sikariyoti. 27 Hwane nya gu ba Judha a dzegide gipandre gile nya pawu, Sathane a di mu beleya. Khavbovbo, Jesu a di embeya Judha, khuye: “Esi u girago, si gire khu gu vbiredza ngudzu.” 28 Ganiolu, mwalo ni moyo a nga ba a khade vbamezatunu a nga pwisisa gu khuye khu ginani Jesu a nga mu embeya isoso. 29 Ganiolu, kha nga olu Judha a nga ba a khathaleya kaxa nya dzitsapawu, vambe vbale va di gu pimisa gu khavo Jesu a di gu mu embeya, khuye: “Indra renga esi hi na si vbwetago avba nya festa,” mwendro a di yede gu ninga gilogyo sisiwana. 30 Khu kharato, hwane nya gu ba a hakhide gipandre nya pawu, a di dzegeya gu duga. Gu diri wutshigu.

31 Hwane nya gu ba Judha a dugide, Jesu a di khuye: “Olu Gyanana nya muthu gi ngu dhumiswa, nigu Nungungulu a ngu dhumiswa khavbo gwagyo. 32 Nungungulu khu abune a na gi dhumisa, nigu a na dzegeya gu gi dhumisa. 33 Vanavangu, nyi ngari nanu gambe khu gitepwana. Mu na nyi vbwetedzeya. Kha nga nyi embedego Vajudha, nyi ngu mi embeya nenu gu kheni: ‘Omu nyi hongolago kha mu na nga si kodza gu hongola.’ 34 Nyi ngu mi ningani nayo nya wuphya wu gu khuwo: Haladzanani. Kha nga eni nyi mi haladzidego, anenu haladzanani. 35 Mwa gu haladzana, khavbo vathu va na dzitigo gu khavo mu vapizane vangu.”

36 Simoni Pedro a di mu wudzisa, khuye: “Pfhumu, wo hongola hayi?” Jesu a di mu hlamula, khuye: “Omu nyi hongolago, kha si kodzegi gu nyi landra olu, ganiolu u na nyi landra khu gu gimbiya nya tepo.” 37 Pedro a di mu hakha, khuye: “Pfhumu, khu ginani si si kodzegigo gu nyi gu landra olu? Eni nyi na ningeya womi* wangu khu kotani yago.” 38 Jesu a mu hakha, khuye: “Wari khuwe u na ningeya womi wago khu kotani yangu? Khu lisine nyi ngu gu embeya gu kheni: Khonge na wu nga si embi u na nyi danga guraru.”

14 “Mu nga garadzegi myonyoni gwanu. Khodwani ga Nungungulu mu bwe mu khodwa avbo gwangu. 2 Nyumbani ga Papayi wangu gu na ni malanga nya mangi. Nari khatshi khandri kharato na nyi mi embede, kholu nya gu hongola gasi nyi ya mi dongiseleya malanga. 3 Nigu hwane nya gu ba nyi hongode nyi ya mi dongiseleya malanga, nyi na wuya gambe nyita mi dzega, gasi gu avba nyi na ba nyi romo mu manega nenu. 4 Mu ngu yiti ndziya nyo hongole umo nyi hongolago umo.”

5 Tomasi a di hakha, khuye: “Pfhumu, ethu kha hi guti omu u hongolago. Hi na yiti kharini ndziya yakone?”

6 Jesu a di mu hlamula, khuye: “Eni kheni ndziya ni lisine ni womi. Mwalo a hongolago ga Papayi nasiri khavbo gwangu. 7 Nari khatshi mu di nyi tide, na mu tide Papayi wangu nuye. Gukhugeya olu mu ngu muti nigu mu mu wonide.”

8 Filipi a di hakha, khuye: “Pfhumu, hi yeyedze Papayi, isoso basi si enede gwathu.”

9 Jesu a di mu hakha, khuye: “Filipi, nyi na ni tepo nyo laphe nanu, kala olu u si gu nyiti? Uye a nyi wonago a gu wona nuye Papayi. Khu ginani u gu khuwe: ‘Hi yeyedze Papayi’? 10 Ina khu khodwi gu khuwe eni nyi ngu pwanana ni Papayi nigu Papayi a ngu pwanana ni eni? Esi nyi mi embeyago kha si dugi khavbo gwangu, ganiolu Papayi a pwananago ni eni a gu gira mithumo yaye. 11 Khodwani gwangu tepo nyi mi embeyago gu kheni nyi ngu pwanana ni Papayi nigu Papayi a ngu pwanana ni eni; mwa gu mba khodwa ga isoso khodwani khu mithumo yakona. 12 Khu lisine nyi ngu mi embeya gu kheni: Uye a khodwago avbo gwangu a na gira nuye mithumo nya nga eyi nyi girago, nigu uye a na gira mithumo nya yikhongolo guvbindra eyi, kholu eni nyo hongola ga Papayi. 13 Nigu, satshavbo esi mu lombago khu lina langu, nyi na gira, gasi Papayi a dhumiswa khu kotani nya Gyanana. 14 Ni gevbini mu na lombago khu lina langu, nyi na gira.

15 “Mwa gu ba mu nyi haladza, mu na engisa milayo yangu. 16 Nigu nyi na lomba Papayi gasi a mi rumeleya mumbe muphasedzeyi a na manegago nanu kala gupindruga, 17 a gu liphuvbo nya lisine, eli litigo li si kodzigo gu li hakha, kholu kha va li woni ne kha va liti. Enu mu ngu liti, kholu la gu simama nanu nigu li nanu. 18 Kha nyi na nga mi tshiya mwenga.* Nyi na wuya gwanu. 19 Nugunugu, litigo kha li na nga nyi wona gambe, ganiolu enu mu na nyi wona, kholu eni nyi ngu vbanya nigu enu mu na vbanya. 20 Litshigu lolo mu na dziti gu khenu, eni nyi ngu pwanana ni Papayi wangu nigu enu mu ngu pwanana ni eni nigu eni nyi ngu pwanana nanu. 21 Uye a dzumeyago milayo yangu a bwe a yi landrisa khuye a nyi golago. Nigu oyu a nyi golago a na godwa khu Papayi wangu, nigu eni nyi na mu gola nyi dzi yeyedza gwaye.”

22 Judha, nasiri Sikariyoti, a di mu wudzisa, khuye: “Pfhumu, ginani gi nga girega olu u vbwetago gu dzi yeyedza gwathu nasiri ga litigo?”

23 Jesu a di mu hlamula, khuye: “Uye a nyi golago, a na landrisa esi nyi ganeyago, nigu Papayi wangu a na mu gola, nigu ethu hi nata gwaye hi ta khala naye. 24 Oyu a si nyi goligo kha engisi malito yangu. Malito mu ma pwago khandri yangu, ganiolu khya Papayi, oyu a nga nyi rumeya.

25 “Nya gu mi embeya silo sesi na nyi ngari nanu. 26 Ganiolu, muphasedzeyi a gu liphuvbo nya guage, eli Papayi a na mi rumeyago khu lina langu, li na mi hevbudza satshavbo li bwe li mi dundrugisa satshavbo nyi mi embedego. 27 Nyi ngu mi tshiyela gurula; nyi ngu mi ninga gurula gwangu. Kha nyi mi ningi nga edzi litigo li ningago khidzo. Mu nga garadzegi myonyoni gwanu nigu mu nga thavi. 28 Mu si pwide esi nyi nga mi embeya nyo kheni: ‘Nya gu hongola, ganilou nyi na wuya gwanu.’ Nari khatshi mu di gu nyi gola mu di hadzi tsaka kholu nyi hongolago ga Papayi, kholu Papayi khongolo guvbindra eni. 29 Nya gu mi embeya isoso na si nga si giregi, gasi mu khodwa tepo si na giregago. 30 Kha nyi na nga ganeya ngudzu nanu, kholu a ngu vboha mufumeli nya litigo nigu uye mwalo tshivba ne yidugwana avbo gwangu. 31 Ganiolu, gasi gu litigo li dziti gu khilo eni nyi ngu mu gola Papayi, nya gu gira esi Papayi a nga nyi ruma. Khugani hi hongola.

15 “Eni nyi simbo nya dziuvha nya lisine, nigu Papayi wangu khuye mulimi wakone. 2 Uye a gu piya gwangu yatshavbo matamo ma gu mba ninga mihandro a bwe a agisa* aya ma ningago mihandro gasi ma theya mihandro nya yingi. 3 Enu mu agide khu kotani nya malito nyi mi embedego. 4 Simamani gu pwanana ni eni, nigu aneni nyi na simama gu pwanana nanu. Kha nga litamo li si kodzigo gu ninga mihandro la gu ba liri mwalo vbasimbotunu wakone, anenu kha mu si kodzi gu ninga mihandro mwa gu mba simama gu pwanana ni eni. 5 Eni kheni simbo nya dziuvha, enu mu matamo yakone. Uye a simamago gu pwanana ni eni, eni nyi pwanana naye a na ninga minhandro nya yingi; kholu mwa gu mba pwanana ni eni gimwalo mu na si kodzago gu gira. 6 Uye a si pwananigo ni eni a gu dzudzugwa nga litamo a banga. Matamo yoyo ma gu wungeledzedwa ma vbedza ma vbiswa. 7 Mwa gu simama gu pwanana ni eni, mu landrisa malito yangu, lombani ni gevbini mu gi vbwetago gi na girega. 8 Mwa gu simama gu theya mihandro nya yingi mu bwe mu yeyedza gu khenu mu vapizane vangu, Papayi wangu a na dhumiswa. 9 Kha nga Papayi a nyi haladzago, aneni nyi ngu mi haladza; simamani lihaladzoni gwangu. 10 Mwa gu engisa milayo yangu, mu na simamani lihaladzoni gwangu kha nga eni nyi engisago milayo ya Papayi, nyi simama lihaladzoni gwaye.

11 “Nyi mi embede silo sesi gasi mupwa litsako la limwedo nyi lipwago ni gu bwe litsako lanu li vbeleya. 12 Nyi ngu mi ningani nayo wowu: Haladzanani khu gyanu kha nga edzi nyi mi haladzidego khidzo. 13 Mwalo a gu na ni lihaladzo nya likhongolo guvbindra wule a ningeyago womi waye khu kotani nya dzipari dzaye. 14 Enu mu dzipari dzangu mwa gu gira esi nyi mi rumago. 15 Eni kha nyi mi rani gambe sithumi, kholu githumi kha gi siti esi mune wagyo a girago. Ganiolu, nya gu mi rana dzipari, kholu nyi mi embede satshavbo nyi si pwidego ga Papayi wangu. 16 Khandrenu mu nga nyi hatha, ganiolu kheni nyi mi hathidego nyi bwe nyi mi ninga thumo nya gu gimbiye mu ninga mihandro, nigu mihandro yanu yi nga vbeyi, gasi ni gevbini mu na lombago khu lina langu ga Papayi, uye a mi ninga.

17 “Nya gu mi ninga milayo yeyi gasi mu haladzana khu gyanu. 18 Litigo la gu mi nyenya dzitini gu khenu li phede kheni li nyi nyenya. 19 Nari khatshi mu di gu gira gipandre nya litigo, litigo na li gu mi gola. Ganiolu, kha nga olu mu si girigo gipandre nya litigo ni olu nyi mi hathidego tigoni, litigo li ngu mi nyenya. 20 Dundrugani esi nyi mi embedego, nyo kheni: Githumi kha giri gikhongolo guvbindra mune wagyo. Abari gu va nyi tshaniside, va na mi tshanisa nenu. Nigu abari gu va engiside malito yangu va na engisa malito yanu nenu. 21 Ganiolu, va na mi girani silo satshavbo sesi khu kotani nya lina langu kholu kha va muti Wule a nyi rumedego. 22 Nari khatshi kha nyata ganeya navo, na vari mwalo nandru nya gighoho. Ganiolu olu, avo va mwalo gighelo nyo dzi emeleye avba nya gighoho gyawe. 23 Uye a nyi nyenyago a gu nyenya Papayi wangu gambe. 24 Nari khatshi kha nya gira vbakari gwawe mithumo eyi yi nga mba girwa khu mumbe muthu, na va si ningwi nandru nya gighoho. Ganiolu olu, avo va nyi wonide va bwe va nyenya eni ni Papayi wangu. 25 Ganiolu, isoso si giregide gasi gu tadzisega esi si lovidwego avba nya Nayo wawe, pwani: ‘Avo va nyi nyenyide nya mba na gighelo.’ 26 Tepo a na tago muphasedzeyi nyi na mu rumeyago khiyo ga Papayi, a gu liphuvbo nya lisine li tago khiyo ga Papayi, li na ta ninga wufakazi maningano ni eni; 27 nigu enu nenu mu na ningeya wufakazi kholu mu na ni eni gukhugeya gupheyani.

16 “Nyi mi embede silo sesi gasi mu si tshunganeyi. 2 Vathu va na mi tutumisani khu dzisinagogani. Khu lisine, yi nguta tepo eyi vatshavbo ava va na mi songago va na pimisago gu khavo vo gireya Nungungulu thumo nya guhathege. 3 Ganiolu, va na gira silo sesi kholu kha va muti Papayi ne eni. 4 Nya gu mi embeya silo sesi, gasi ya gu vboha tepo si na giregago, mu dundruga gu khenu nyi mi embede.

“Kha nya mi embeya silo sesi gupheyani, kholu nyi diri nanu. 5 Ganiolu, olu nya gu hongola ga Wule a nyi rumedego, ambari ulolo mwalo gwanu a nyi wudzisago, khuye: ‘Wo hongola hayi?’ 6 Ganiolu, myonyo yanu yi ngu garadzega ngudzu kholu nyi mi embedego silo sesi. 7 Ganiolu, lisine kheli: I tshukwana nyi hongola, kholu nya gu mba hangola, kha na ngata muphasedzeyi, ganiolu nya gu hongola, nyi na mi rumeleya muphasedzeyi. 8 Tepo a na vbohago, a na ta yeyedza vathu nya litigo gighoho gyawe, a na ta yeyedza litigo gu khuye esi nyi girago si lulamide nigu khu vamani ava Nungugnulu a va lamulago: 9 Nyo pheye, a na yeyedza litigo gighoho gyawe, kholu kha va khodwi gwangu; 10 khavbovbo a yeyedza litigo gu khuye esi nyi girago si lulamide, kholu nya gu bweleya ga Papayi, nigu kha mu na nga nyi wona gambe; 11 khu gu landreya, a yeyedza litigo gu khuye khu vamani ava Nungungulu ava lamulago, kholu mufumeyi nya litigo leli lamudwe.

12 “Nyi ngari ni silo nya singi nyo mi embeye, ganiolu kha mu na nga si kodza gu si rwala olu. 13 Ganiolu tepo muphasedzeyi a na tago, khu mambe maganelelo, tepo liphuvbo nya guage li yeyedzago lisine li na tago, li na ta mi phasa gu pwisisa lisine latshavbo, kholu kha li na nga ganeya silo nya gu si khugeye, ganiolu li na ganeya esi li si pwidego li bwe li mi embeya esi si na tago. 14 Ilo li na nyi dhumisa, kholu li na mi embeya esi li nga sipwa avbo gwangu. 15 Satshavbo si gu ni Papayi khyangu. Khiso si nyi giridego nyi mi embeya gu kheni ilo li na mi embeya esi li sipwidego avbo gwangu. 16 Nugunugu kha mu na nga nyi wona, nigu gambe nugunugu mu na nyi wona.”

17 Khu kharato, vapizane nyo khaguri va di wudzisana khu gyawe, khavo: “A di gu vbweta gu khuye ginani tepo a nga khuye: ‘Nugunugu kha mu na nga nyi wona, nigu gambe nugunugu mu na nyi wona’ nigu ‘a di gu vbweta gu khuye ginani tepo a nga khuye, kholu nya gu hongola ga Papayi’?” 18 Avo va di gu khavo: “A di gu vbweta gu khuye ginani tepo a nga khuye: ‘Nugunugu’? Kha hi siti gu khethu o thula ginani.” 19 Jesu a di gu dziti gu khuye va di gu vbweta gu mu gira siwudziso soso, khavbovbo, a va embeya khuye: “Mwa gu wudzisana khu gyanu gu khenu khu ginani nyi nga mi embeya gu kheni: ‘Nugunugu kha mu na nga nyi wona, nigu gambe nugunugu mu na nyi wona’? 20 Khu lisine nyi ngu mi embeya gu kheni, enu mu na liya, ganiolu litigo li na tsaka; enu mu na garadzega, ganiolu gugaradzega gwanu gu na vbindrugedza gu khala gutsaka. 21 Tepo nyamayi a lumwago, a gu tshaniseka kholu yi vbohide tepo yaye, ganiolu tepo a hefemulago, uye kha dundrugi gambe gutshaniseka gule khu kotani nya litsako a lipwago khu gu ba a velegide gyanana. 22 Khu ndziya nyo fane, enu olu mu ngu garadzega; ganiolu nyi na wuya nyita mi wona nigu myonyo yanu yi na tsaka, nigu mwalo a na mi duseyago gutsaka gogo. 23 Khu litshigu lolo, kha mu na nga nyi wudzisa gambe gilo. Khu lisine nyi ngu mi embeya gu kheni: Mwa gu lomba ni gevbini gilo ga Papayi khu lina langu, uye a na mi ninga. 24 Kala olu mu si lombi ne gilo gimwegyo khu lina langu. Lombani mu na ningwa, gasi mu mana gutsaka nya gukhongolo.

25 “Nya gu mi embeya silo sesi khu gu thumisa sipimaniso. Ganiolu, yi nguta tepo nyi na gu mba mi embeya gambe khu gu thumisa sipimaniso, ganiolu nyi na mi embeya maningano ni Papayi khu ndziya nyo pwale gwadi. 26 Litshigu lolo, mu na lomba ga Papayi khu lina langu, ganiolu khandri nyari kheni nyi na mi lombeya. 27 Papayi a ngu mi gola, kholu enu mu ngu nyi gola nigu mu ngu khodwa gu khenu nyi rumedwe khu Nungungulu. 28 Nyi dzude tigoni kha nga muemeyi wa Papayi. Olu nya gu diga litigo nyi hongola ga Papayi.”

29 Vapizane vaye va di mu embeya, khavo: “Khupwi, olu wo ganeya khu ndziya nyo pwale gwadi nya mba thumisa sipimaniso. 30 Olu hi ngu dziti gu khethu u nguti satshavbo ni gu khethu khu vbweti gu khuwe u girwa siwudziso. Khu kharato, hi ngu khodwa gu khethu wa guta khiyo ga Nungungulu.” 31 Jesu a di va wudzisa, khuye: “Olu ke mu ngu khodwa? 32 Dzitini gu khenu, yi nguta tepo nigu yi vbohide kamo, eyi enu mu na phalalegiswago, moyo ni moyo a hongola gaya gwaye, mu nyi tshiya nyenga. Ganiolu kha nyiri nyonga, kholu Papayi na ni eni. 33 Nyi di mi embeya silo sesi gasi mu manega ni gurula khu kotani yangu. Tigoni mu na manega ni sigaradzo, ganiolu tiyani hwambo! Eni nyi pade litigo.”

17 Hwane nya gu ba Jesu a vbedzide gu ganeya silo sesi, a di khusedza maho a khedza ndzadzini, a gombeya, khuye: “Papayi, yi vbohide tepo. Dhumisa gyanana gyago gasi igyo gi gu dhumisa nigyo, 2 kha nga olu u gi ningidego tshivba vbatshani nya vathu vatshavbo, gasi gi ninga womi nya gupindruge vatshavbo vale u gi ningidego. 3 Gasi va mana womi nya gupindruge, gu vbwetega va guti uwe Nungungulu wa moyo nya lisine gumogo ni wule u mu rumedego a gu Jesu Kristo. 4 Nyi gu dhumiside mafuni nigu nyi vbedzide thumo u nyi rumidego gu gira. 5 Papayi nyi vege khu bambe gwago u bwe u nyi ninga wuzundzo nyi nga ba nyiri nawo khu bambe gwago litigo na li nga si vangwi.

6 “Nyi tivegiside lina lago ga vathu u nyi ningidego mafuni. Avo va diri vago, ganiolu uwe u nyi ningide nigu va ngu landrisa lito lago. 7 Olu avo va ngu dziti gu khavo satshavbo u nyi ningidego sa guta khiyo gwago, 8 kholu eni nyi va embede satshavbo u nyi embedego. Avo va si hakhide nigu va ngu dziti gwadi gu khavo nyi dzude kha nga muemeyi wago, nigu va ngu khodwa gu khavo khuwe u nyi rumedego. 9 Nyi ngu va lombeleya, kha nyi lombi khu kotani nya litigo, ganiolu khu kotani nya vale u nyi ningidego kholu va gu lumba uwe. 10 Nigu satshavbo silo sangu khyago, nigu esi sago khyangu, nigu eni nyi dhumisidwe vbakari gwawe.

11 Eni nyi mwalo gambe mafuni, ganiolu avo vomo mafuni; eni nya guta iyo gwago. Papayi u agidego, va woneleye khu kotani nya lina lago, lina u nyi ningidego, gasi va pwanana kha nga eni nago hi pwananago. 12 Tepo nyi nga ba nyiri navo, nyi di gu va woneleya khu kotani nya lina lago, lina u nyi ningidego. Eni nyi va vhikede, mwalo ni moyo wawe a dzimedego, vbavbandze ga wule a na fuviswago, gasi yi tadzisega milowo. 13 Nyo ganeya silo sesi na nyi ngo romo tigoni gasi gu avo vapwa gutsaka gwangu khu lisine. 14 Nyi va hevbudzide lito lago, ganiolu litigo li ngu va nyenya kholu kha va giri gipandre nya litigo, kha nga olu eni neni nyi si girigo gipandre nya litigo.

15 Kha nyi lombi gu kheni u va dusa tigoni, ganiolu nyo lomba gu kheni u va woneleya khu kotani ya oyu nya guvivbe. 16 Avo kha va giri gipandre nya litigo kha nga olu aneni nyi si girigo gipandre nya litigo. 17 Va agise khu lisine, lito lago lisine. 18 Kha nga olu uwe u nyi rumedego tigoni, aneni nyi va rumede tigoni. 19 Eni nya gu simama gu dzi agisa khu kotani yawe, gasi anavo va agiswa khu lisine.

20 “Kha nyi lombeleyi khu ava basi, ganiolu nyi ngu lombeleya ni vale va yeyedzago gukhodwa avba gwangu khu malito yawe, 21 gasi vatshavbo va pwanana kha nga uwe Papayi u pwananago ni eni, ni eni nyi pwananago nago; gasi gu avo va pwanana ni ethu, gasi litigo li khodwa gu khilo u nyi rumede. 22 Nyi va ningide wudhumo u nyi ningidego, gasi va pwanana nga eni ni uwe hi pwananago. 23 Eni nyi pwanana navo, uwe u pwanana ni eni, gasi va pwanana khu guvbeleya, gasi litigo liti gu khilo u nyi rumede nigu u va haladzide nga edzi u nyi haladzidego khidzo. 24 Papayi, nyo vbweta gu kheni vale u nyi ningidego va manega ni eni ni hayini nyi na gu ba nyi romo, gasi va wona wudhumo u nyi ningidego, kholu u nyi haladzide litigo na li si gu vangwi. 25 Papayi u lulamidego, litigo khu lisine kha li guti, ganiolu eni nyi ngu guti, nigu ava va ngu dziti gu khavo u nyi rumede. 26 Eni nyi va tiviside lina lago, nigu nyi na simama gu li tivegisa, gasi lihaladzo u nyi haladzidego khilo li khala navo, nigu aneni nyi pwanana navo.

18 Hwane nyo ganeye silo sesi, Jesu a di khuga ni vapizane vaye va hongola tshatugo nya gitsongwana gya Kedroni; iyoyo gu diri ni jardhim umo a nga beya ni vapizane vaye. 2 Judha, wule a nga ba a vbweta gu mu ningeya, anuye a di gu wuti wulanga wowo kholu Jesu a di gu oloveya gu tshangana vbovbo ni vapizane vaye. 3 Khu kharato, Judha a di hongola iyoyo ni tsawa nya masotshwa ni dzigwardha nya tempele va nga rumedwa khu vaprista nya vakhongolo ni vafarisi; va di hongola ni myenge ni dzikandriya ni matshari. 4 Kha nga olu Jesu a nga ba a siti esi si nga hadzi gu mu dugeleya, a di va hidzimeleya a va wudzisa, khuye: “Mwa gu vbweta mani?” 5 Va di hakha, khavo: “Ha gu vbweta Jesu wa Nazareta.” Huye khuye: “Kheni oyu.” Judha a gu uye a nga ba a mu ningeya, a diri navo.

6 Ganiolu, tepo Jesu a nga khuye: “Kheni oyu”, avo va di bweleya hwane va thega vbavbatshi. 7 Khu kharato, Jesu a di va wudzisa gambe, khuye: “Mwa gu vbweta mani?” Avo va di khavo: “Jesu wa Nazareta.” 8 Jesu a di va hlamula, khuye: “Nyi mi embede gukheni kheni. Abari gu mwa gu vbweta eni, digani ava vambe va hongola.” 9 Esi si di girega gasi gu si tadzisega esi a nga ba a ganede nyo khuye: “Kha nya luza ne ni moyo nya ava u nyi ningidego.”

10 Simoni Pedro a di homola xipadha a nga ba ari nayo, a wugeya githumi gya muprista nya khongolo ngudzu, a gi piya ndzeve ya nyamudye. Githumi gegi khu Maliko. 11 Ganiolu, Jesu a di embeya Pedro, khuye: “Bweledza xipadha wulangani wayo. Ina kha nyi yeli gu seya kopo eyi nyi ningidwego khu Papayi wangu?”

12 Khavbovbo, masotshwa ni komandante nya masotshwa ni dzigwardha nya Vajudha, va di mola Jesu, va mu hungeleya. 13 Avo va di pheya khu gu mu yisa ga Anasi, a nga ba ari papayi* wa Khayifasi, oyu a nga ba ari muprista nya khongolo ngudzu khu mwaga wule. 14 Khu lisine, Khayifasi khuye a nga ba a embede Vajudha khuye i tshukwana gu mwama moyo afa a feya vatshavbo.

15 Simoni Pedro gumogo ni mumbe mupizane, va di gu landra Jesu. Mupizane yoyo a di gu tivana ni muprista nya khongolo ngudzu, khu kharato a di beya ni Jesu ndrangani ga muprista nya khongolo ngudzu, 16 ganiolu Pedro a di tshala vbavbandze, vbamwanya. Khu kharato, mupizane wule a nga ba a tivana ni muprista nya khongolo ngudzu, a di duga aya ganeya ni githumi nya nyamayi gi nga ba gi ghadha vbamwanya, a dzega Pedro a beya naye. 17 Githumi gile nya nyamayi gi nga ba gi ghadha vbamwanya, gi di wudzisa Pedro, khigyo: “Ina uwe nuwe kha wuri moyo nya vapizane va mwama yoyu?” Pedro a di hakha, khuye: “Ahihi.” 18 Kha nga olu gu nga ba gu dzidziya, sithumi ni dzigwardha, va di gu wora nilo va nga ba va khondriside. Pedro nuye a di romo vbale a wora nilo.

19 Khavbovbo, muprista nya khongolo a di thethiseya Jesu maningano ni vapizane vaye ni esi a nga ba a hevbudza. 20 Jesu a di hlamula, khuye: “Nyi di gu ganeya si tidwa khu vathu vatshavbo. Nyi di gu oloveya gu hevbudza omu nya dzisinagoga ni tempeleni, a gu omu Vajudha va tshanganago umo, gimwalo nyi nga ganeya gusihalani. 21 Khu ginani u nyi thethiseyago? Thethiseya ava va nga sipwa esi nyi nga va embeya. Avo khu lisine va ngu siti esi nyi nga ganeya.” 22 Hwane nya gu ba Jesu a ganede isoso, moyo nya gwardha a nga ba a romo vbale a di mu veta pama, khuye: “Khidzo u hakhago khidzo muprista nya khongolo kharati?” 23 Jesu a di mu hakha, khuye: “Gyo ba gi romo nya guvivbe nyi ganedego, nyi embeye khuwe khu gevbi; ganiolu, abari gu esi nyi ganedego lisine, khu ginani u nyi vetago?” 24 Khu kharato, Anasi a di rumeya Jesu ga muprista nya khongolo ngudzu, Khayifasi, na hungeledwe.

25 Simoni Pedro a di gu romo vbale a wora nilo. Khu kharato, va di mu wudzisa, khavo: “Ina uwe nuwe khandri u moyo nya vapizane vaye?” Uye a di danga, khuye: “Khandreni.” 26 Moyo nya sithumi sa muprista nya khongolo ngudzu, a gu nongo wa oyu Pedro a nga mu piya ndzeve, a di mu wudzisa, khuye: “Ina khandruwe nyi nga gu wona nuri naye jardhim?” 27 Ganiolu, Pedro a di danga gambe. Khu gitepwana gyogyo, khonge wu di emba.

28 Khavbovbo, va di dzega Jesu khu gaya ga Khayifasi va mu yisa gaya ga governadhori. Gu di ngari dzimindru. Ganiolu, avo kha va beya ndrangani ga governadhori gasi va si dzi nyenyezisi, gasi va kodza gu hodza Phasika. 29 Pilato a di duga vbavbandze, a va yela aya va wudzisa, khuye: “Ketso muni mu gu nayo khu mwama yoyo?” 30 Avo va di mu hlamula, khavo: “Nari khatshi mwama yoyu khandri gighohi, na ha sa mu resa gwago.” 31 Khu kharato, Pilato a di va embeya, khuye: “Mu dzegeni enu kamo, mu ya mu lamula guya khu nayo wanu.” Vajudha va di khavo: “Ethu kha hi dzumeledwi gu songa muthu.” 32 Esi si giregide gasi gu tadzisega esi Jesu a nga ganeya maningano ni edzi a nga hadzi gufa khidzo.

33 Khavbovo, Pilato a di beya gambe ndrangani ga governadhori, a ya rana Jesu a mu wudzisa, khuye: “Uwe u Pfhumu nya Vajudha?” 34 Jesu a di mu hakha, khuye: “Wa gu nyi wudzisa isoso khu gu si khugeya mwendro womo a nga gu embeya gilogyo maningano ni eni?” 35 Pilato a di mu hakha, khuye: “Eni kha nyiri Mujudha. Va na gyanu ni vaprista nya vakhongolo, khavo va nga gu ningeya gwangu. Ginani u nga ghoha?” 36 Jesu a di mu hlamula, khuye: “Mufumo wangu kha wu giri gipandre nya litigo leli. Nari khatshi Mufumo wangu wu ngu gira gipandre nya litigo leli, valandreyi vangu na va nyi dwanede gasi gu nyi si ningedwi ga Vajudha. Ganiolu, lisine khu gu Mufumo wangu khandri wa omu.” 37 Khu kharato, Pilato a di mu wudzisa, khuye: “Ina uwe u Pfhumu gani?” Jesu a di hlamula, khuye: “Khiso u ganeyago. Nyi velegedwe isoso nigu khiso nyi si tedego mafuni, gasi nyi ta ningeya wufakazi nya lisine. Ni wevbini oyu a emago ni lisine, a ngu engisa lito langu.” 38 Pilato a di mu wudzisa, khuye: “Ginani lisine?”

Hwane nyo ganeye silo sesi, a di yela gambe Vajudha a ya va embeya, khuye: “Eni kha nya mana gihoso gwaye. 39 Ganiolu, mu na ni giolovedzo nya gu khu nango nya Phasika nyi yede gu tshula muthu moyo. Ina mu ngu dzina gu khenu nyi tshula Pfhumu nya Vajudha?” 40 Va di khusedza gambe lito va ganeya, khavo: “U nga tshuli mwama yoyo, tshula Bharabhasi!” Ganiolu, Bharabhasi a diri gighevenga.

19 Pilato a di dzega Jesu a mu ningeya gasi a kwamudwa. 2 Masotshwa ma di luga korowa khu miba ma yi handzega hungoni ga Jesu, ma vbedza ma mu ambagisa mwendra nyo fuviye. 3 Va di mu hidzimeleya vaya khavo: “Sewe, Pfhumu nya Vajudha!” Va bwe va mu veta dzipama. 4 Pilato a di duga gambe a embeya gitshungu, khuye: “Nyi na mu dusa vbavbandze, gasi mu wona gukhenu eni kha nya mana nandru gwaye.” 5 Khavbovbo, Jesu a di duga na handzegidwe korowa nya miba na ambagisidwe mwendra nyo fuviye. Khavbovbo, Pilato a di va embeya, khuye: “Kha mu mu woni oyu muthu wanu!” 6 Khu kharato, tepo vaprista nya vakhongolo ni dzigwardha va nga mu wona, va di khusedza lito, khavo: “A na khokhothedwe! A na khokhothedwe!” Khavbovbo, Pilato khuye: “Mu dzegeni enu kamo mu ya mu khokhotheya, kholu eni kha nya mana nandru gwaye.” 7 Vajudha va di mu hakha, khavo: “Ethu hi na ni nayo, nigu guya khu nayo wathu uye yede gufa, kholu dzi giride gyanana gya Nungungulu.”

8 Tepo Pilato a ngapwa esi va nga ba va ganeya, a di engedzeya gu thava; 9 a di beya gambe nyumbani ga ghovernadhori a ya wudzisa Jesu, khuye: “Wa guta khu hayi?” Ganiolu, Jesu kha mu hlamula gilo. 10 Khu kharato, Pilato a di mu wudzisa, khuye: “Wo nyi deguleya? Khu dziti gu khuwe eni nyi na ni tshivba nyo gu tshule ni tshivba nyo gu songe?”* 11 Jesu a di mu hlamula, khuye: “Uwe na wuri mwalo tshivba vbatshani gwangu nari khatshi khwa ningwa tshivba yoyo khu Nungungulu. Khu gighelo gyogyo, oyu a nyi ningedego gwago, na ni nandru nya wukhongolo.”

12 Khu kharato, Pilato a di gu vbweta dzindziya nya gu mu tshule, ganiolu Vajudha va di gu khusedza lito, khavo: “Wa gu tshula mwama yoyo, kha wuri pari ya Sezari. Ni wevbini wule a dzi girago pfhumu a gu wugeya Sezari.” 13 Hwane nya gupwe malito yaya, Pilato a di dzega Jesu a duga naye vbavbandze a ya khala tribhunali, wulangani wu nga bambatedwa khu siwindri, khu Gihebheru gu ranwago pwani Ghabhata. 14 Gu diri umo nya dzi 12 hora,* khu litshigu nya gu dongiseye Phasika. Khavbovbo, uye a di embeya Vajudha, khuye: “Kha mu yi woni pfhumu yanu eyi!” 15 Ganiolu, avo va di khusedza lito, khavo: “A na songwe! A na songwe! A na khokhothedwe!”* Khavbovbo, Pilato a va wudzisa, khuye: “Mo vbweta gu khenu nyi songa pfhumu yanu?” Vaprista nya vakhongolo va di hlamula, khavo: “Hi mwalo yimbe pfhumu vbavbandze ga Sezari.” 16 Khu kharato, Pilato a di mu ningeya gwawe gasi va ya mu songa vbasimbotunu.

Khavbovbo, avo va di dzega Jesu va hongola naye. 17 Jesu a di rwala abune simbo,* a duga a hongola wulanga wu ranwago pwani Girwarwa, khu Gihebheru gu ranwago pwani Goligota. 18 Tepo va nga vboha avbovbo, va di ya mu khokhotheya avbo nya simbo, vbakari nya vama vavili, moyo khu nyamudye gwaye mumbe khu nyambade gwaye. 19 Pilato a di lova malito nyo khaguri a ma vega avba nya simbo.* Malito yoyo ma di gu khayo: “Jesu wa Nazareta, Pfhumu nya Vajudha.” 20 Vajudha nya vangi va leride malito yoyo, kholu wulanga avba Jesu a nga ba a khokhothedwe avbo gu diri vbafuvbi ni lidhoropa, nigu malito yoyo ma di lovidwe khu Gihebheru, Gilati ni Gigreki. 21 Ganiolu, vaprista nya vakhongolo nya Vajudha, va di embeya Pilato khavo: “U nga lovi khuwe: ‘Pfhumu nya Vajudha,’ ganiolu lova khuwe: A di khuye: ‘Nyi Pfhumu nya Vajudha.’” 22 Pilato a di va hlamula, khuye: “Esi nyi lovidego nyi lovide.”

23 Hwane nya gu ba masotshwa ma khokhothede Jesu, ma di dzega sombo saye ma si kabanisa khu 4 sipandre, va kabana gimwegyo gimwegyo va bwe va dzega ngandzu yaye. Ganiolu, ngandzu yaye kha ya nga ba yi sonidwe, kholu yi di giridwe khu gu lugwa gukhugeya vbatshani kala vbavbatshi. 24 Khu kharato, va di bhula khu gyawe, khavo: “Hi nga yi pferuli, ganiolu hongoleni hi vetani dzisolo, gasi hiti gu khethu yi na khala ya mani.” Isoso si giregide gasi gu tadzisega lowo wu gu khuwo: “Va kabanide sombo sangu va bwe va veta dzisolo khu kotani nya ngadzu yangu.” Nigu khiso kamo soso si giridwego khu masotshwa yale.

25 Vbafuvbi ni simbo a nga ba a khokhothedwe Jesu, gu di romo mamayi waye, ni ndriye wa mamayi waye nya nyamayi ni Mariya mwangadzi wa Klopasi ni Mariya Madhalene. 26 Tepo Jesu a nga wona mamayi waye ni mupizane a nga ba a mu gola, na va romo vbafuvbi, a di embeya mamayi waye, khuye: “Nyamayi, khu gi woni egi gyanana gyago!” 27 Khu gu landreya a di embeya mupizane wule, khuye: “Khu mu woni oyu mamayi wago!” Gukhugeya avbovbo, mupizane wule a di dzega mamayi wa Jesu a hongola naye gaya.

28 Hwane nya isoso, tepo Jesu a nga wona gu khuye satshavbo si tadzisegide, nigu gasi gu tadzisega milowo, a di khuye: “Nyopwa lidora.” 29 Vbafuvbi vbale gu diri ni jaru yi nga ba yi tade khu vhinyu nyo dunge. Khu kharato, avo va di dzega xiponja yi nga ba yi tade khu vhinyu yoyo nyo dunge va yi tsomega avba nya isopo,* va yi gwedzisa kala kanani gwaye. 30 Hwane nya gu ba a munyide vhinyu yile nyo dunge, Jesu a di khuye: “Si tadzisegide!” khavbovbo a nogisa thamo, afa.*

31 Kha nga olu gu nga ba guri litshigu nya gu Dongiseye, Vajudha va di ya lomba Pilato gasi a rumisa gu khuye va ya fanya mawundru ya vama vale ni gu dusa sirumbi sawe vbamisimbotunu, gasi sirumbi si si simami vbamisimbotunu khu litshigu nya Sabhadho (kholu Sabhadho yile yi diri Sabhadho nya yikhongolo). 32 Khu kharato, masotshwa ma di ya fanya mawundru ya vama vale nya vavili va nga ba va khokhothedwe gumogo ni Jesu. 33 Ganiolu, tepo va nga vboha ga Jesu, va di wona gu khavo uye fude, khu kharato kha va mu fanya mawundru. 34 Ganiolu, limwedo nya masotshwa a di mu paya limbambu khu litshari, a dzegeya gu duga mati ni novba. 35 Uye a wonidego isoso a ngu ningeya wufakazi, nigu wufakazi waye lisine, uye a ngu dziti gu khuye a gu ganeya lisine, gasi anenu mu khodwa. 36 Isoso si giregide gasi gu tadzisega milowo yi gu khiyo: “Gimwalo ni gimwegyo nya sirambo saye gi na fanywago.” 37 Ni gimbe gipandre nya milowo gi gu khigyo: “Va na khedza wule va nga mu paya.”

38 Hwane nya isoso, Josefa wa Arimateya (a nga bari mupizane wa Jesu, ganiolu gusihalani, khu kotani nya olu a nga ba a thava Vajudha) a di lomba Pilato gasi guya dzega girumbi gya Jesu, nigu Pilato a di mu dzumeleya. Khu kharato, uye a di hongola a ya dusa girumbi gya Jesu. 39 Nikodhemo, mwama wule a nga hongola a ya bhula ni Jesu khu tepo nyo pheye ni wutshigu, anuye a di hongola, na pharide gipimo nya 33 dzikilo nya mira ni alowe. 40 Avo va di dzega girumbi gya Jesu va gi fumbeya khu myendra nya linyu, gumogo ni mafura nyo nungeye, guya khedzi Vajudha va nga ba va dongiseya khidzo girumbi gasi va ya dzinga. 41 Vbafuvbi ni avbo a nga songwa avbo, si di kotsana na guri ni jardhim yi nga ba yi ri ni lithowo nya liphya nya gu gima gu di si gu dzingwi muthu. 42 Kha nga olu gu nga ba guri litshigu nya gudongiseye nya Vajudha ni olu lithowo li nga ba liri vbafuvbi, va di dzinga umomo Jesu.

20 Khu litshigu nyo pheye nya semana, Mariya Madhalene a di vboha lithowotunu ni dzimindru, na gu ngo phumide. A di ya mana gu khuye giwindri gi nga ba gi fenengedzide lithowo gi dusidwe. 2 Khavbovbo, a di khuga khu gu tutuma a hongola ga Simoni Pedro ni ga mumbe mupizane, oyu Jesu a nga ba a mu gola, a ya va embeya, khuye: “Va duside Pfhumu khu thowoni ni gu kha hi dziti gu khethu va mu vegide hayi.”

3 Khavbovbo, Pedro ni mumbe mupizane va di khuga va hongola lithowotunu. 4 Vatshavbo va di tutuma, ganiolu wule mumbe mupizane a di tutuma ngudzu a tshiya Pedro, a pheya khuye a vboha lithowotunu. 5 Tepo a nga noga a holeya, a di wona myendra nya linyu na yi romo vbavbatshi, ganiolu kha beya. 6 Khavbovbo, a di vboha nuye Simoni Pedro a nga ba a landra khu hwane, a ya beya thowoni, a wona gu khuye myendra yi di romo vbavbatshi. 7 Mwendra wu nga ba wu romo hungoni ga Jesu wu diri mwalo wulanga wa wumowo ni yile yimbe myendra, ganiolu wu di petidwe, wu vegwa khu phuvbo. 8 Khavbovbo, wule mumbe mupizane a nga pheya khuye a vboha, a di beya nuye. Tepo a nga si wona, a di khodwa. 9 Kholu va di nga si yi pwisisi Milowo yi nga ba yi khiyo uye a na wuswa khu ga vafudego. 10 Khavbovbo, vapizane va di bweleya magaya gwawe.

11 Ganiolu, Mariya a di ema vbavbandze, vbafuvbi ni lithowo, a liya. Tepo a nga ba a liya, a di noga a holeya thowoni. 12 A di wona dzingilozi dzimbili na dzi ambade sombo nyo age, na dzi khade avba gu nga ba gu vegidwe girumbi gya Jesu; mweyo khu mihungotunu, yimbe khu mawundrutunu. 13 Dzi di wudzisa Mariya, khidzo: “Nyamayi, khu ginani u liyago?” Uye a di hlamula, khuye: “Va dzegide Pfhumu yangu nigu kha nyi guti omu va yi vegidego.” 14 Hwane nya gu ba a ganede isoso, a di thendregedza, a wona Jesu na emide, ganiolu kha tugula gu khuye a diri Jesu. 15 Jesu a di mu wudzisa, khuye: “Nyamayi, khu ginani u liyago? Khu mani u mu vbwetago?” Mariya na gu pimisa gu khuye mwama wule a diri jardhineru wa vbale, a di mu hakha, khuye: “Abari gu khuwe u nga mu dusa khavba, nyi embeye gu khuwe u mu vegide hayi, gasi nyi ya mu dzega.” 16 Jesu a di mu hakha, khuye: “Mariya!” Tepo Mariya a nga thendregedza, a di hakha khu Gihebheru, khuye: “Raboni!” (si tshamuseyago gu khiso: “Muhevbudzi!”) 17 Jesu a di mu hakha, khuye: “Nyi dige nyi hongola, kholu nyi si gu gweyi ga Papayi. Ganiolu, indra embeya vandriyangu, khuwe: ‘Eni nya gu hongola ga Papayi wangu a gu Papayi wanu nenu, ga Nungungulu wangu a gu Nungungulu wanu nenu.’” 18 Mariya Madhalene a diya embeya vapizane, khuye: “Nyi wonide Pfhumu!” A bwe a va embeya esi Jesu a nga mu embeya.

19 Khu siyambo sakone nya litshigu lile, gu nga ba guri litshigu nyo pheye nya semana, omu vapizane va nga ba va romo gu di gu khothidwe malimba khu kotani nya olu va nga ba va thava Vajudha. Jesu a di dugeleya vbakari gwawe, a va embeya, khuye: “Gurula gu na manege ni enu.” 20 Hwane nya gu ganeye isoso, a di va yeyedza mandza ni limbambo laye. Khavbovbo, vapizane va di tsaka tepo va nga wona Pfhumu. 21 Jesu a di va embeya gambe, khuye: “Gurula gu na manege ni enu. Kha nga olu Papayi a nyi rumedego, aneni nyi ngu mi rumeyani.” 22 Hwane nya gu ganeye isoso, a di va furugedza, khuye: “Hakhani liphuvbo nya guage. 23 Mwa gu divaleya sighoho vathu, va na divaledwa, ganiolu mwa gu mba va divaleya, kha va na nga divaledwa.”

24 Ganiolu, Tomasi, a nga ba ari moyo nya vale nya 12, a nga ba a ranwa pwani Mavbaha, a diri mwalo vbale tepo Jesu a nga dugeleya. 25 Khavbovbo, ava vambe vapizane va di mu embeya, khavo: “Ethu hi wonide Pfhumu!” Ganiolu, uye a di va hakha, khuye: “Nya gu mba wona sivanga nya dzikhogo mandzani gwaye, nyi si kuhi sivanga nya dzikhogo khu nyala yangu nyi bwe nyi si kuhi limbambo laye khu mandza yangu, gima kha nyi na nga khodwa.”

26 Hwane nya 8 matshigu, vapizane vaye va di tshanganide gambe, Tomasi nuye a di romo. Ambari olu malimba ma nga ba ma khothidwe, Jesu a di dugeleya vbakari gwawe, khuye: “Gurula gu na manege ni enu.” 27 Khavbovbo, a embeya Tomasi, khuye: “Vega nyala yago avba, u bwe u wona mandza yangu. Thanuludza libogo, u kuha limbambo langu. Diga gu kanakana,* u khodwa.” 28 Tomasi a di mu hakha, khuye: “Pfhumu yangu ni Nungungulu wangu!” 29 Jesu a di mu wudzisa, khuye: “Wa gu khodwa kholu u nyi wonidego? Va ngu tsaka ava va khodwago, ganiolu nya mba nyi wona.”

30 Khu lisine, Jesu giride silewugiso nya singi na gu wonwa khu vapizane, ganiolu kha sa lowa omu nya libhuku* leli. 31 Ganiolu, esi si lovidwe gasi mu khodwa gu khenu Jesu khu Kristo, Gyanana gya Nungungulu, nigu mwa gu khodwa mu mana womi khu kotani nya lina laye.

21 Khu hwane nya isoso, Jesu a di dzi wonegisa gambe ga vapizane vaye yiphwani ya Tibheriyade. Uye a dzi wonegiside kharati: 2 Gu diri ni Simoni Pedro, Tomasi (a nga ba a ranwa gupwani Mavbaha), Nataniyeli wa Khanani ga Galileya, sanana sa Zebhedhewu ni vapizane vavili vaye. 3 Simoni Pedro a di va embeya, khuye: “Nyi nga gu hongola nyi ya goga.” Avo va di mu hakha, khavo: “Hi na hongola nago.” Khu kharato, va di hongola va ya beya umu nya ngalava, ganiolu kha va mana gilo wutshigu wule.

4 Tepo gu nga ba gugya, Jesu a di emide funguni, ganiolu vapizane kha va tugula gu khavo khu Jesu. 5 Khavbovbo, Jesu a di va wudzisa, khuye: “Vanavangu, mu na ni gilogyo* nyo hodze?” Avo va di mu hakha, khavo: “Ahihi!” 6 Uye a di va embeya, khuye: “Thesani dzikhoga khu nyamudye nya ngalava, mu na mana gilogyo.” Khavbovbo, avo va di thesa, ganiolu kha va si kodza gu ndrindra dzikhoga, kholu dzi di gu tade khu dzindzandzi nya dzingi. 7 Khu kharato, mupizane a nga ba a godwa khu Jesu, a di embeya Pedro, khuye: “Khu Pfhumu!” Tepo Simoni Pedro a ngapwa isoso, a di ambala sombo saye, kholu a diri wumbwiri,* a vbhumula matini. 8 Ganiolu, vambe vapizane va di vboha khomu nya gingalavana, na va gu ndrindra dzikhoga dzi nga ba dzi tade khu dzindzandzi, kholu va diri vbafuvbi ni fungu, khu pfhuka nya 90 dzimetro.

9 Tepo va nga tshiga khu ngalavani, va di wona nilo ni ndzandzi yi nga ba yi vawudwa, ni pawu. 10 Jesu a di va embeya, khuye: “Deluni ni dzindzandzi nyo khaguri mu ngarigo gu mola.” 11 Khu kharato, Simoni Pedro a di beya ngalavani, a ndrindra dzikhoga dzita funguni, idzo dzi di tade khu dzindzandzi, gu diri 153 dzindzandzi nya dzikhongolo. Ambari olu gu nga ba guri ni dzindzandzi nya dzingi, dzikhoga kha dza pferuga. 12 Jesu a di va embeya, khuye: “Deluni mu ta hodza.” Ganiolu, mwalo mupizane a nga tiya gu mu wudzisa gu khuye, khuye mani, kholu vatshavbo va di gu dziti gukhavo khu Pfhumu. 13 Jesu a diya dzega pawu a va ninga, a gira sasimweso ni ndzandzi. 14 Eyi gu diri tepo nya wuraru Jesu na gu dzi wonegisa ga vapizane vaye, hwane nya gu ba a wusidwe khu ga vafudego.

15 Tepo va nga vbedza gu hodza, Jesu a di wudzisa Simoni Pedro, khuye: “Simoni, gyanana gya Johane, u ngu nyi gola guvbindra esi?” Uye a di mu hakha, khuye: “Ina Pfhumu, u ngu dziti gu khuwe nyi ngu gu gola.” Jesu a di mu embeya, khuye: “Hodzisa dzinvuta dzangu.” 16 A di mu wudzisa gambe nya wuvili, khuye: “Simoni gyanana gya Johane, u ngu nyi gola?” Uye a di mu hlamula, khuye: “Ina Pfhumu, u ngu dziti gu khuwe nyi ngu gu gola.” Jesu a di mu embeya, khuye: “Havisa sinvutana sangu.” 17 Uye a di mu wudzisa gambe nya wuraru, khuye: “Simoni gyanana gya Johane, u ngu nyi gola?” Pedro a di garadzega kholu a nga mu wudzisa nya wuraru, khuye: “U ngu nyi gola?” Khu kharato, uye a di mu embeya, khuye: “Pfhumu, uwe u ngu siti satshavbo. U ngu dziti gu khuwe nyi ngu gu gola. Jesu a di mu embeya, khuye: “Hodzisa sinvutana sangu. 18 Khu lisine nyi ngu gu embeya, kheni: Tepo u nga ba uri lidzaha, u di gu ambala u hongola ni hayini u nga ba u gu vbweta. Ganiolu tepo u na gumbago, u na thawuludza mawogo, u ambagiswa khu mumbe muthu a bwe a gu yisa omu u gu mba gu vbweta.” 19 Jesu a di ganeya isoso gasi gu yeyedza gu khuye gufa ga Pedro gu di hadzi dhumisa Nungungulu. Hwane nyo ganeye isoso, uye a di mu embeya, khuye: “Simama gu nyi landreya.”

20 Tepo Pedro a nga thendregedza, a wona mupizane a nga ba a godwa khu Jesu na gu va landra, a gu uye a nga ba a khade vbafuvbi ni Jesu tepo va nga ba va hodza, a bwe a wudzisa gu khuye: “Pfhumu, khu mani a na gu ningeyago?” 21 a di wudzisa Jesu, khuye: “Pfhumu, ahati mwama yoyu ke, ginani gi na mu dugeleyago?” 22 Jesu a di mu hakha, khuye: “Ahati nya gu vbweta gu kheni a simama gu vbanya kala nyi wuya ke, ginani gi gu garadzago? Uwe simama gu nyi landreya.” 23 Khavbovbo, si di phalalega vbakari ga vandruye gupwani mupizane yoyu kha na ngafa. Ganiolu, Jesu kha ganeya gu khuye kha na ngafa, uye a di khuye: “Ahati nya gu vbweta gu kheni a simama gu vbanya kala nyi wuya ke, ginani gi gu garadzago?”

24 Oyu khu mupizane a nga ningeya wufakazi nya silo sesi a bwe a si lova, nigu ethu hi ngu dziti gu khethu wufakazi waye khwa lisine.

25 Khu lisine, gu na ni silo nya singi esi Jesu a giridego. Nari khatshi si di lovidwe satshavbo gimwegyo khu gimwegyo, adzina tigoni gwatshavbo na guri mwalo wulanga nyo vege mabhuku* yakone.