MITHUMO YA VAPOSTOLI

1 Teyofilo, avba nya libhuku nya gupheye, nyi lovide satshavbo esi Jesu a giridego ni gu hevbudza gukhugeya gupheyani 2 kala litshigu eli a nga dzegwa a hongola ndzadzini, hwane nya gu ba a ningede sileletelo khu gu thumisa liphuvbo nya guage ga vapostoli a va hathidego. 3 Hwane nya gu ba a tshanisekide, uye a di dzi wonegisa gwawe khu dzindziya nya gu hambane-hambane gasi va dziti gu khavo a ngu vbanya. Avo va mu wonide khu gipimo nya 40 matshigu nigu a di gu ganeya khu Mufumo wa Nungungulu. 4 Tepo a nga ba a tshanganide navo, a di va embeya, khuye: “Mu nga khugi khu Jerusalema, ganiolu simamani gu vireya esi Papayi a tumbisidego kha nga mu si pwidego gwangu; 5 kholu Johane bhabhatiside khu mati, ganiolu enu ndrani nya matshigwana mu na bhabhatiswa khu liphuvbo nya guage.”

6 Tepo va nga tshangana, avo va di mu wudzisa, khavo: “Pfhumu, ina khavbo olu u na wusedzago mufumo Israyeli?” 7 Uye a di va hlamula, khuye: “Kha si lumbi enu guti dzitepo ni dzinango edzi Papayi a dzi emisidego khu gudzina gwaye. 8 Ganiolu, tepo liphuvbo nya guage li na mi tshigeyago, mu na hakha tshivba ni gu mu na khala dzifakazi dzangu Jerusalema, ni Judheya gwatshavbo ni Samariya kala mahegiso nya mafu.” 9 Hwane nya gu ba a ganede silo sesi, a di gwedziswa ndzadzini na va gu mu wona. Gu dita lipfhi li ta mu fenengedza, va si mu woni gambe. 10 Na va gu khedza ndzadzini tepo Jesu a nga ba a gweya, khu gitepwana gu di dugeleya vama vavili khu dzibambe gwawe va nga ba va ambade sombo nya guage, 11 khavo: “Vama va Galileya, khu ginani mu emidego vbovbo mu khedza ndzadzini? Jesu yoyu a dusidwego vbakari gwanu a gweya ndzadzini a na wuya nga edzi mu mu wonidego khidzo na gu gweya ndzadzini.”

12 Khavbovbo, avo va di bweleya Jerusalema na va gu khugeya khu gigomoni gi ranwago pwani Gigomo nya Miolivha gi gu romo vbafuvbi ni Jerusalema khu pfhuka nya kilometro mweyo.* 13 Tepo va nga vboha, avo va di gweya salani ya vbatshani a gu umo va nga ba va romo. Avbovbo gu diri ni Pedro, Johane, Jakobe, Andreya, Filipi, Tomasi, Bharitolomewu, Matewu, Jakobe gyanana gya Alifewu, Simoni oyu nya sighingi ni Judha gyanana gya Jakobe. 14 Vatshavbo khu gupwanana va di simama gu gombeya gumogo ni vanyamayi nyo khaguri, gupata ni Mariya mamayi wa Jesu ni vandriye va Jesu.

15 Khu matshigu yale, Pedro a di khuga a ema vbakari nya vandruye, (gu diri tanga nya 120 vathu) a ganeya, khuye: 16 “Vandruye, si di yede gu tadzisega esi liphuvbo nya guage li ganedego omu nya milowo khu gu thumisa Dhavhidhe maningano ni Judha oyu a nga thangeya ava va nga mola Jesu. 17 Uye a diri moyo wathu nigu a di hathidwe gasi gu patega avba nya thumo wowu. 18 (Mwama yoyu a di renga gipeto khu dzitsapawu nya wuvivbi, a thega khu hungo a pferuga khu vbakari, mahembe yaye ma vbalaga vbavbatshi. 19 Silo sesi si di tidwa khu vavbanyi vatshavbo va Jerusalema, khu kharato, gipeto gile va di gi rana khu lidimi lawe khavo Akelidhama si thulago gu khiso: “Gipeto nya Novba.”) 20 Kholu si lovidwe omu nya libhuku nya Dzindzimo gu pwani: ‘Ndranga yaye yi na khale marumbi nigu ne muthu moyo a nga vbanyi avbo’ nigu: ‘Thumo waye kha nga muwoneleyi wu na thumwe khu mumbe muthu.’ 21 Khu kharato, moyo nya vama va nga ba va gimbiya ni ethu tepo Pfhumu Jesu a nga ba a gira mithumo* yaye vbakari gwathu, 22 gukhugeya tepo a nga bhabhatiswa khu Johane, kala ga litshigu a nga dzegwa vbakari gwathu a hongola ndzadzini, mwama yoyo gumogo ni ethu gu vbwetega a khala fakazi nya guwuswe ga Jesu.”

23 Khu kharato, avo va di hatha vama vavili: Josefa a nga ba a ranwa pwani khu Bharisabha, na gu tidwa pwani khu Justo, ni Matiya. 24 Khavbovbo, avo va di gombeya, khavo: “Uwe Jehovha, u tigo myonyo ya vatshavbo, hi yeyedze gu khuwe khu mani u mu hathidego ga vama vava vavavili 25 gasi gu tshikedza thumoni nya gu khale mupostoli, owu Judha a nga wu diga a hongola wulanga nyo tidwe khuye mune.” 26 Khu kharato, va di veta dzisolo gasi gu hatha moyo wawe, solo yi di thega ga Matiya. Khu kharato, uye a di kotarwi* gumogo ni 11 vapostoli.

2 Khu litshigu nya festa nya Pentekosta, vatshavbo va di gu tshanganide wulanga wumowo. 2 Khu githugedza, gu di pwala ligwaha khu ndzadzini nyo fane ni phuvbo nya yikhongolo, li tadza nyumbani gwatshavbo mule va nga ba va romo. 3 Khavbovbo, avo va di pheya gu wona malimi ma nga ba ma fana ni nilo ma nga ba ma phalalegeya ma mbaka vbatshani ga moyo ni moyo wawe. 4 Vatshavbo va di tala khu liphuvbo nya guage va pheya gu ganeya mambe malimi kha nga edzi va nga ba va thangedwa khidzo khilo.

5 Khu tepo yoyo, Jerusalema gu di tshanganide Vajudha va ningago ngudzu githawo Nungungulu va dzudego khu mayigoni nya gu hambane-hambane. 6 Khu kharato, tepo li nga pwala ligwaha lile, gu di tshangana gitshungu. Igyo gi di gu hlamala kholu muthu ni muthu a di gupwa vapizane na va gu ganeya khu lidimi laye. 7 Khu lisine, va di hlamala ngudzu va ganeya, khavo: “Ina vatshavbo vava va ganeyago khandri vathu va Galileya? 8 So kodzega kharini gu moyo ni moyo wathu a vapwa na va gu ganeya khu lidimi laye nya mavelego? 9 Vbakari gwathu gu na ni Vapariti, Vamedhi, Vaelemi, vathu va vbanyago Mesopotamiya, Judheya, Kapadhokiya, Pontu, Aziya, 10 Firijiya, Panfiliya, Egipto ni va gipandre gya Libhiya vbafuvbi ni Sirene, ni vathu va tago khu Roma a gu Vajudha ni Vaprozelitu,* 11 vathu va tago khu Kereta ni va Arabhiya . . . hi va pwide na va gu ganeya silo nya gu samadzise maningano ni Nungungulu khu malimi yathu.” 12 Vatshavbo va di hlamala, va wudzisana khu gyawe, khavo: “So thula ginani esi?” 13 Ganiolu, vambe va di gu va hega, khavo: “Va levide khu vhinyu.”

14 Khavbovbo, Pedro a di khuga a ema gumogo ni vale nya 11, a khusedza lito a ganeya, khuye: “Enu vathu va Judheya ni mwatshavbo enu vavbanyi va Jerusalema, engiseyani gwadi esi nyi vbwetago gu mi embeya. 15 Khu lisine, vathu vava kha va leva, kha nga edzi mu pimisago khidzo kholu gu ngari dzi 9 ora.* 16 Ganiolu, go tadzisega esi si nga ganedwa khu muprofeti Joyeli, a nga khuye: 17 ‘Nungungulu wari khuye: “Matshigoni nya guhegise, nyi na guhula liphuvbo langu vbatshani nya vathu nya mafumbo yatshavbo nigu sanana sanu nya sikhwathana ni esi nya sagadzyana si na profeta, madzaha yanu ma na wona siwoniso nigu sikhosane sanu si na manega ni miloro, 18 nigu matshigoni yoyo gambe nyi na guhula liphuvbo vbatshani nya sithumi sangu nya vama ni ga sithumi sangu nya vanyamayi, aniso si na profeta. 19 Nigu nyi na gira silewugiso vbatshani ndzadzini ni siwoniso vbavbatshi mafuni: novba, nilo ni mapfhi nya wutshi. 20 Na li nga si vbohi litshigu nya likhongolo nya wudhumo la Jehovha, lidambo li na vbindrugedzwa li khala gidema, ngima wu vbindrugedzwa wu khala novba. 21 Nigu ni wevbini a ranago lina la Jehovha a na vbulugiswa.”’

22 “Vama va Israyeli, gupwani malito yaya: Jesu wa Nazareta, a diri mwama oyu Nungungulu a mi yeyedzidego khu mithumo nya tshivba, silewugiso ni siwoniso esi Nungungulu a nga gira vbakari gwanu khu gu thumisa uye, kha nga mu dzitigo. 23 Mwama yoyu a nga ningedwa gasi gu tadzisa esi si nga ba si hungidwe ni esi Nungungulu a nga ba a siti mu mu khokhothede avba nya simbo khu gu thumisa mandza nya sighohi, mu mu songa. 24 Ganiolu, Nungungulu a mu wuside, a mu vbulugisa dzingodzini nya lufu, kholu kha sa nga ba si kodzega gu lufu li simama gu mu mola. 25 Kholu maningano ni uye, Dhavhidhe wari khuye: ‘Tepo yatshavbo nya gu vega Jehovha mbeli gwangu, kholu uye womo nyamudye gwangu gasi nyi si tshuki nyi tsekatsekiswa. 26 Khu kharato, monyo wangu wu tsakide nigu lidimi langu li tsakide ngudzu. Nyi na vbanya khu gutumba, 27 kholu khu na nga nyi diga* Thowoni* nigu khu na nga dzumeleya githumi gyago nyo tumbege gi hina. 28 U nyi yeyedzide dzindziya nya womi, u na nyi tadza khu gutsaka mbeli gwago.’

29 “Vandruye, nyi dzumeleyeni gu ganeya khu kokwe wathu Dhavhidhe na nyi tshulegide, uye fude a dzingwa, nigu lithowo laye lomo vbakari gwathu kala muhuno. 30 Kha nga olu a nga ba ari muprofeti ni olu a nga ba a dziti gu khuye Nungungulu mu tumbiside khu gusambanya gu khuye gimwegyo nya situgulwana saye gi na khala vbagikhalotunu gyaye nya wufumu, 31 uye wonide guwuswa ga Kristo na gu si gu vbohi a bwe a ganeya khugo gu khuye kha na nga digwa Thowoni nigu nyama yaye kha yi na nga hina. 32 Nungungulu wuside Jesu yoyu khu gufani ni gu hatshavbo hi dzifakazi nya isoso. 33 Khu kharato, kha nga olu uye a nga khusedzwa nyamudye ga Nungungulu a bwe a hakha liphuvbo nya guage a tumbisidwego khu Papayi, a li guhude vbatshani gwathu kha nga mu si wonago ni gu sipwa. 34 Kholu Dhavhidhe kha gweya ndzadzini, ganiolu wari khuye: ‘Jehovha embede Pfhumu yangu, khuye: “Khala khu nyamudye gwangu 35 kala nyi vega valala vago vbavbatshi nya migondro yago.”’ 36 Khu kharato, ndranga yatshavbo ya Israyeli yi na tiyisege khu guvbeleya gu khiyo Jesu yoyu mu nga mu songa avbo nya simbo, Nungungulu mu giride Pfhumu ni Kristo.”

37 Tepo va ngapwa isoso, va di garadzega ngudzu myonyoni gwawe, va wudzisa Pedro ni vambe vapostoli, khavo: “Vandruye, ginani hi yedego gu gira?” 38 Pedro a di va hlamula, khuye: “Dzi layeni, mu bhabhatiswa khu lina la Jesu Kristo gasi mu divaledwa sighoho sanu mu bwe mu hakha giningwa* nya liphuvbo nya guage. 39 Kholu gitumbiso gegi gi giredwe enu ni sanana sanu ni vatshavbo vale va gomogo hwindzo; vatshavbo vale Jehovha Nungungulu wathu a na va ranago va hongola iyo gwaye.” 40 Uye a di gu va ninga wufakazi nyo vbeleye ni gu va tiyisa khu malito nya mangi, khuye: “Dzi hambaniseni ni gitugulwana gegi nya gu vivbedwe khu monyo gasi mu vbulugiswa.” 41 Avo va nga dzumeya malito yawe khu gutsaka va di bhabhatiswa nigu khu litshigu lolo tanga nya 3000 vathu* va di patana navo. 42 Va di gu dzi ningedzeya ga esi vapostoli va nga ba va hevbudza, va phasana, va hodza ni gu gombeya vatshavbo.

43 Tepo vapostoli va nga pheya gu gira silewugiso ni siwoniso nya singi, vathu va di pheya gu thava. 44 Vatshavbo va nga khodwa va di khala dangamwedo, va hengeya silo sawe satshavbo. 45 Va di gu rengisa silo sawe, va kabana dzitsapawu dzakone ni vambe guya khesi si nga ba si keneleya ga moyo ni moyo wawe. 46 Matshigu yatshavbo va di gu khala tempeleni, na vari ni makungo yamamowo. Va di gu hodzeyana mudzindrangani gwawe ni gu bwe va kabaneyana gilo nya gu hodze na va tsakide khu monyo watshavbo, 47 na va gu bonga Nungungulu ni gu tsakedwa khu vathu vatshavbo. Nigu tshigu ni tshigu Jehovha a di gu simama gu va tiseya vathu va nga ba va vbulugiswa.

3 Pedro ni Johane va di gu gweya va hongola tempeleni khu ora nya nombelo, omu nya dzi 15* ora. 2 Khu tepo yoyo, gu diri ni mwama a nga velegwa nari gilima a nga ba a rwadwe gasi gu yiswa vbamwanya nya tempele. Tshigu ni tshigu a di gu vegwa vbafuvbi ni mwanya nya tempele wu nga ba wu ranwa pwani Mwanya nya Gumbure, gasi a lomba zomola vale va nga ba va beya tempeleni. 3 Tepo a nga wona Pedro ni Johane na va gu beya tempeleni a di va lomba zomola. 4 Ganiolu, Pedro ni Johane va di mu khedza, Pedro a ganeya, khuye: “Nga hi khedza.” 5 Khavbovbo, mwama wule a di va khedza gwadi na gu vireya gu khuye va mu ninga gilogyo. 6 Ganiolu, Pedro a di mu embeya, khuye: “Nyi mwalo prata ne oru, ganiolu nyi na gu ninga esi nyi gu naso. Khu lina la Jesu Kristo wa Nazareta, khuga u gimbiya.” 7 Khavbovbo, a di mu phara khu libogo la nyamudye, a mu emisa, khu gitepwana gyogyo mawundru yaye ma di tiya. 8 Mwama wule a di ndraga a ema a pheya gu gimbiya, a beya navo tempeleni na gu gimbiya ni gu ndraga-ndraga a dhumisa Nungungulu. 9 Vathu vatshavbo va mu wonide na gu gimbiya ni gu dhumisa Nungungulu. 10 Avo va di tugula gu khavo khu mwama wule a nga ba a khala vbamwanya nya tempele, wu nga ba wu ranwa gu pwani Mwanya nya Gumbure, va hlamala ngudzu khesi si nga ba si mu dugelede.

11 Mwama wule na nga gu mode Pedro ni Johane, gitshungu gyatshavbo gi di hlamala ngudzu, gi tutuma gi va yela omu nya Koredhori* ya Solomoni. 12 Tepo Pedro a nga wona isoso, a di ganeya, khuye: “Vama va na Israyeli, khu ginani mu hlamalago ngudzu khu silo sesi nigu khu ginani mu hi khedzago kharato nga khatshi mwama yoyu hi di mu gira a gimbiya khu kotani nya olu hi khozeyago Nungungulu khu gutumbega mwendro khatshi hi di thumisa tshivba yathu? 13 Nungungulu wa Abrahama ni Isaki ni Jakobe, Nungungulu wa vakokwe vathu, ningide wudhumo githumi gyaye Jesu, oyu enu mu nga mu ningeyago mu bwe mu mu bomba mbeli ga Pilato ambari olu uye a nga ba a vbweta gu mu tshula. 14 Enu mu bombide mwama wule nya guage ni gululama, mu lomba gu khenu a tshudwa wule a nga ba ari gighevenga. 15 Khu kharato, enu mu songide Pfhumu yi Ningago guvbanya, ganiolu Nungungulu a mu wuside khu ga vafudego nigu ethu hi dzifakazi nya isoso. 16 Mwama yoyu mu mu wonago ni gu muti, vbanyisidwe khu lina la Jesu khu kotani nya olu hi khodwago avba nya lina la Jesu. Khu gukhodwa gogo, mwama yoyu vbanyisidwe khu guvbeleya, na mu mu wona mwatshavbo. 17 Ganiolu vandriyangu, nyi ngu dziti gu kheni mu giride isoso khu gu mba siti, gufana ni dzipfhumu dzanu. 18 Khu ndziya yoyo, Nungungulu tadziside satshavbo a ganedego gupheyani khu gu thumisa vaprofeti vatshavbo, khuye Kristo waye a di yede gu tshaniseka.

19 “Khu kharato, dzi layeni mu vbindrugedza, gasi gu sighoho sanu si futwa gasi Jehovha a mi ningani dzinangu nya gupepe, 20 gasi a mi rumeleya Kristo mu nga hathedwa a gu Jesu. 21 Ndzadzini gu yede gu mu segeya kala yi vboha tepo nya gu wusedze silo satshavbo esi Nungungulu a ganedego khu gu thumisa vaprofeti vaye nya guage va gale. 22 Khu lisine, Mosi a di khuye: ‘Jehovha Nungungulu wanu a na mi hatheya vbakari nya moyo nya vandriyanu muprofeti nya gu fane ni eni. Engisani satshavbo a na ganeyago. 23 Ni wevbini a na gu mba engisa muprofeti yoyu, a na fuviswa khu guvbeleya vbakari nya vathu.’ 24 Nigu vaprofeti vatshavbo, gukhugeya ga Samuweli kala mbeli, anavo va ganede khu matshigu yaya. 25 Enu mu sanana sa vaprofeti ni sanana nya pwanano owu Nungungulu a giridego ni vakokwe vanu, tepo a nga embeya Abrahama, khuye: ‘Nigu dzindranga dzatshavbo mafuni dzi na kategiswa khavba nya gitugulwana gyago.’ 26 Tepo Nungungulu a nga wusa Githumi gyaye, a di pheya khu gu gi rumeya gwanu gasi gi ta mi kategisa ni gu digisa moyo ni moyo wanu gu gira mithumo yaye nya guvivbe.”

4 Tepo Pedro ni Johane va nga ba va bhula ni vathu, va di hidzimeledwa khu vaprista ni vathangeyi nya vawoneleyi nya tempele ni Vasadhusi. 2 Avo va di gu gorogide kholu vapostoli vale va di gu hevbudza vathu ni gu tshumayela guagani maningano ni guwuswa ga Jesu khu ga vafudego. 3 Va di va mola va va khotheya kala limbe litshigu kholu li di gu pfode. 4 Ganiolu, vathu nya vangi va nga engiseya ganelo va di khodwa. Tengo nya vama va nga khodwa gu diri gipimo nya 5000.

5 Khu mindru gakone, dzipfhumu dzawe, madhota ni valovi va di tshangana Jerusalema 6 gumogo ni Anasi a nga ba ari muprista nya khongolo, ni Khayifasi, ni Johane, Alexandre ni vatshavbo va nga ba vari valongo va muprista nya khongolo. 7 Va di emisa Pedro ni Johane vbakari gwawe, va va wudzisa, khavo: “Silo sesi mwa gu si gira khu tshivba ya mani mwendro khu lina la mani?” 8 Ganiolu, Pedro na tade khu liphuvbo nya guage, a di va hakha, khuye:

“Enu dzipfhumu nya vathu ni enu madhota, 9 abari gu muhuno ha gu wudzisedwa khu kotani nya wuwadi wu nga giredwa mwama wule nya gilima ni gu ba mu vbweta guti gu khenu khu mani a nga mu hawulugisa, 10 dzitini enu gumogo ni vathu vatshavbo va Israyeli, khenu: Mwama yoyu mu mu wonago na hawulugide, a di hawulugiswa khu lina la Jesu Kristo wa Nazareta, oyu enu mu nga mu songa vbasimbotunu, ganiolu Nungungulu a mu wusidego khu ga vafudego. 11 Jesu yoyu, khuye ‘giwindri gi nga nyenywa khu enu vavbahi, gi khadego giwindri nya litshina gya vbakhonatunu.’* 12 Vbavbandze nya isoso, gu mwalo guvbulugiswa khu mumbe muthu kholu gu mwalo limbe lina li nga ridwa mumbe muthu mafuni hi nga si kodzago gu vbulugiswa khilo.”

13 Tepo va nga wona gu khavo Pedro ni Johane va di tiyide hwambo nigu va diri vathu nya mba hevbula ngudzu, va di hlamala. Khavbovbo, va di tugula gu khavo va di gu gimbiya-gimbiya ni Jesu. 14 Tepo va nga wona mwama wule a nga hawulugiswa, na romo vbakari gwawe, va di hamuga ni lito. 15 Va di va ruma gu khavo va duga khu Tribhunali.* Tepo va nga duga, va di tshala va wudzisana khu gyawe, 16 khavo: “Hi na va rini vama vava? Kholu va giride gilewugiso gi nga wonwa khu vavbanyi vatshavbo va Jerusalema nigu gu mwalo gu khethu hi na gi bomba. 17 Gasi gu silo sesi si si phalalegi si tidwa khu vathu vatshavbo, hongoleni hi va thusedzeya, hi va himbidzeya gu ganeya khu lina leli ga vambe vathu.”

18 Khu kharato, va di va rana va va himbedzeya gu ganeya ni gu hevbudza khu lina la Jesu. 19 Ganiolu, Pedro ni Johane va di va hakha, khavo: “Lamulani enu vamune: Ina si lulamide mahoni ga Nungungulu gu mi engisani, wulangani nya gu engise Nungungulu? 20 Ganiolu, ethu kha hi yeli gu diga gu ganeya khu silo hi nga si wona ni gu sipwa.” 21 Hwane nya gu ba va va thusedzede gambe, va di va diga, kholu kha va mana gighelo nya gu va tsayise khigyo kholu avo va di gu dhumisa Nungungulu khu kotani nya esi si nga girega. 22 Mwama wule a nga hawulugiswa khu gilewugiso gegi, a di gu vbindra 40 myaga.

23 Hwane nya gu ba va tshudwe, va di ya tshangana ni vambe vapizane va va embeya satshavbo esi vaprista nya vakhongolo ni madhota va nga ganeya. 24 Tepo va ngapwa isoso, va di khusedza lito khu gumogo, va embeya Nungungulu, khavo:

“Pfhumu nya Yikhongolo, khuwe u giridego ndzadzi, mafu, linene ni satshavbo si gomogo gwaso. 25 Khuwe khu liphuvbo nya guage u thumisidego kokwe wathu Dhavhidhe, githumi gyago, gu ganeya, khuye: ‘Khu ginani mayigo ma kudzugidego ni gu bwe vathu va dundrugeya khu silo nya mba phasa gilo? 26 Dzipfhumu nya mafu dzi dongide nigu vafumeli navo va patanide gasi gu wugeya Jehovha ni oyu a todzidwego waye.’* 27 Khu lisine, Herodhi ni Pontiyo Pilato va di tshanganide dhoropani momu gumogo ni vanyamayigo ni Vaisrayeli, gasi gu wugeya githumi gyago nyo age, egi u gi todzidego, a gu Jesu. 28 Va tshanganide gasi gu gira esi u nga si profeta. Silo sesi si dugelede khu kotani nya tshivba yago ni gugola gwago. 29 Jehovha, wona edzi va hi thaviseyago khidzo, u tiyisa sithumi sago, gasi si simama gu ganeya khu lina lago nya mba thava gilo; 30 na wu khusedza libogo lago gasi gu hawulugisa; u gira silewugiso ni mithumo nyo hlamadzise khu lina la githumi gyago nya guage, Jesu.”

31 Hwane nya gu ba va vbedzide gu gira nombelo, avbo va nga ba va tshanganide avbo gu di ndrendremeya. Vatshavbo va di tala khu liphuvbo nya guage, va pheya gu huweleya lito la Nungungulu na va tiyide.

32 Vathu vatshavbo va nga ba va khodwe, va di vbanya khu gupwanana. Mwalo a nga ba a ganeya gu khuye esi a gu naso khyaye, ganiolu va di gu kabana satshavbo va nga ba vari naso. 33 Vapostoli va di gu simama gu ningeya wufakazi khu tshivba ni tshivba maningano ni guwuswa ga Pfhumu Jesu nigu vatshavbo va di gu kategiswa ngudzu khu Nungungulu. 34 Khu lisine, mwalo gwawe a nga ba a hamuga gilo kholu vatshavbo va nga ba vari ni mathembwe ni dzinyumba va di gu rengisa, va dzega dzitsapawu dzakone 35 va ya ningeya vapostoli, khavbovbo va kabaniseya muthu ni muthu guya khesi si nga ba si mu keneleya. 36 Josefa oyu vapostoli va nga ba va mu rana gu khavo khu Bharinabha, (sa gu vbindrugedzwa si thulago: “Gyanana nya guthaveleye”), a nga ba ari Mulevhi, givelegwa gya Kipre, 37 a diri ni gipeto; a di gi rengisa, a dzega dzitsapawu dzakone, a ya ningeya vapostoli.

5 Mwama moyo nyo pwani khu Ananiya ni mwangadzi waye Safira, va di rengisa gipeto gyawe. 2 A di vbungula dzimbe dzitsapawu a tshala nadzo, na si tidwa khu mwangadzi wakone, a dzega edzi dzimbe a dzi ningeya ga vapostoli. 3 Ganiolu, Pedro a di mu wudzisa, khuye: “Ananiya, khu ginani u nga dzumeleya Sathane a gu senga gasi u lipheya liphuvbo nya guage, u siha dzimbe dzitsapawu nya gipeto? 4 Gipeto gi diri gyago, khandridzo? Hwane nya gu ba u gi rengiside dzitsapawu dzakone kha dza nga ba dziri dzago? Khu ginani u giridego silo nya guvivbe nya nga esi? Khandri u di lipheya vathu, ganiolu u di lipheya Nungungulu.” 5 Tepo Ananiya a ngapwa isoso, a di thega afa. Vatshavbo va ngati esi si nga girega va di thava ngudzu. 6 Khavbovbo, ma di khuga madzaha ma mu fumbeya khu mwendra, ma duga naye ma ya mu dzinga.

7 Hwane nya dziora dziraru, a di beya nuye mwangadzi wakone, na si siti esi si nga girega. 8 Pedro a di mu wudzisa, khuye: “Nga nyi embeya, khuwo tengo wowu mu nga rengisa khuwo gipeto?” Uye a di khuye: “Ina, khuwo.” 9 Khavbovbo, Pedro a di mu wudzisa, khuye: “Khu ginani mu nga hunga gu kanganyisa liphuvbo la Jehovha? Vale va nga dzinga mwama wago vomo vbamwanyatunu, va na gu rwala nuwe va duga nago.” 10 Safira a di dzegeya gu thega mbeli ga Pedro, afa. Tepo madzaha yale ma nga beya, ma di ta mu mana na fude, ma dzegeya gu mu dzega ma duga naye, ma ya mu dzinga bambe ga mwama waye. 11 Libandla latshavbo ni vatshavbo va ngapwa isoso va di thava ngudzu.

12 Vapostoli va di gu simama gu gira siwoniso ni silewugiso nya singi vbakari nya vathu nigu vatshavbo va di gu tshangana avba nya Koredhori* ya Solomoni. 13 Khu lisine, mwalo a nga ba a tiya gu dzi pata navo, ganiolu gitshungu gi di gu ganeya gwadi khavo. 14 Vbavbandze nya isoso, tengo nya vama ni vanyamayi va nga ba va khodwa ga Pfhumu wu di guya wu engedzeya ngudzu. 15 Vathu va di gu duga ni vadwali va ya va ladzisa dziruwani vbatshani nya sikamana ni madahu gasi a gu vbindra Pedro vambe vakone va kuhwa khu mwedzi waye. 16 Va di guta vathu nya vangi khu madhoropani ya vbafuvbi ni Jerusalema, va resa vadwali ni ava va nga ba va mbakidwe khu maphuvbo nya guvivbe. Vatshavbo va di gu hawulugiswa.

17 Ganiolu, muprista nya khongolo ngudzu ni vatshavbo a nga ba ari navo va nga ba va lumba tsawa nya Vasadhusi, va di tala khu lidiwo. 18 Khavbovbo, va di mola vapostoli va va khotheya pasoni. 19 Ganiolu, ni wutshigu, ngilozi ya Jehovha yi di tula malimba nya lipaso, yi va dusa vbavbandze, khiyo: 20 “Indrani tempeleni, mu ya simama gu hevbudza vathu maningano ni womi nyo pindruge.” 21 Hwane nya gupwe silo sesi, va di beya tempeleni na gu hongola gugyani, va ya pheya gu hevbudza.

Tepo muprista nya khongolo ngudzu ni ava a nga ba ari navo va nga vboha, va di tshanganisa ava va nga ba va wumba Tribhunali nya Yikhongolo nya Gijudha ni madhota yatshavbo ya na Israyeli, va rumisa gu khavo gu ya dzegwa vapostoli va nga ba va khothedwe. 22 Ganiolu, tepo dzigwardha nya tempele dzi nga vboha pasoni, kha dza ya mana muthu. Dzi di wuya dzi ta khidzo: 23 “Hi di ya mana lipaso na li khothidwe gwadi, dzigwardha na dzi emide vbamwanya, ganiolu tepo hi nga tula gu diri mwalo muthu.” 24 Tepo muthangeyi nya vawoneleyi nya tempele ni vaprista nya vakhongolo va ngapwa isoso, va di dzuwega mapimo kholu va di si giti egi gi nga hadzi landreya. 25 Khavbovbo, gu di vboha muthu nyo khaguri a ta khuye: “Vama mu nga ba mu va khothede pasoni, vomo tempeleni olu va hevbudza vathu.” 26 Muthangeyi nya vawoneleyi nya tempele ni dzigwardha dzaye, va di ya va dzega, ganiolu kha va va dwanisa kholu va di gu thava gu pfarwa khu siwindri khu vathu.

27 Tepo va nga wuya navo, va di ta va emisa mbeli nya Tribhunali nya Yikhongolo nya Gijudha. Khavbovbo, muprista nya khongolo ngudzu, a di va gira siwudziso, 28 khuye: “Gasi kha ha mi himbedzeya gu hevbudza khu lina leli? Gasi khu ginani mu tadzidego Jerusalema khu sihevbudzo sanu? Khu ginani mu vbwetago gu hi rwega nandru nya novba wa mwama yoyu?” 29 Pedro ni vambe vapostoli, va di hlamula, khavo: “Hi yede gu engisa Nungungulu kha nga mufumeli, guvbindra vathu. 30 Nungungulu wa vakokwe vathu wuside Jesu khu ga vafudego, uye enu mu nga mu songa mu mu khokhotheya* vbasimbotunu. 31 Nungungulu mu khusedzide nyamudye gwaye kha nga Pfhumu yi ningago guvbanya ni Muvbulugisi, gasi gu Israyeli a dzi laya ni gu divaledwa sighoho saye. 32 Ethu hi dzifakazi nya silo sesi nigu liphuvbo nya guage eli Nungugulu a ningago vale va mu engisago kha nga pfhumu anilo i fakazi.”

33 Tepo va ngapwa isoso, va di goroga va vbweta gu va songa. 34 Ganiolu, Mufarisi moyo nyo pwani khu Ghamaliyeli, a nga ba ari muhevbudzi nya nayo, a nga ba a ningwa ngudzu githawo khu vathu, a di khuga a ema, a ruma gu khuye vapostoli vale va duswa vbavbandze khu gitepwana. 35 Khavbovbo, khuye: “Vama va Israyeli, dziwoneyeni khesi mu vbwetago gu gira vama vava. 36 Khu giyeyedzo, matshigwana hwane, gu dugelede Teyodhasi a nga ba a dzi embeya gu khuye muthu nya lisima nigu gipimo nya 400 vama va dzi patide naye, ganiolu uye a di songwa nigu vatshavbo va nga ba va mu landreya va di phalalega, gu si tshali muthu. 37 Hwane gwaye, khu matshigoni nya giloveya, gu di dugeleya Judha wa Galileya. Anuye a di landredwa khu vathu nya vangi, mwama yoyo nuye a difa nigu vatshavbo va nga ba va mu landreya va di phalalega. 38 Khu kharato, nyi ngu mi embeya gu kheni: Mu nga dzi bedzedzeyi ni vama vava, va digeni. Abari gu esi va girago khya vathu kha si na nga pfoledwa khu lidambo. 39 Ganiolu, abari gu khya Nungungulu, kha mu na nga va digisa. Dzi woneyeni kholu mu nga tshuka nari mo dwana ni Nungungulu.” 40 Avo va di engisa wusingalagadzi waye, va ranisa vapostoli, va va kwamula, va va himbedzeya gu ganeya khu lina la Jesu va bwe va va diga va hongola.

41 Vapostoli va di duga khu Tribhunali na va tsakide, khu kotani nya olu Nungungulu a nga dzumeleya gu khuye avo va tshaniseka khu kotani nya olu va nga ganeya khu lina la Jesu. 42 Nigu tshigu ni tshigu, va di gu simama gu hevbudza ni gu tshumayela mahungu nya yadi maningano ni Kristo Jesu khu ndranga ni ndranga ni tempeleni.

6 Matshigoni yale, tepo tengo nya vathu va nga ba va khala vapizane wu nga ba wu engedzeya, Vajudha va nga va ganeya Gigreki va di pheya gu sola-sola Vajudha va nga ba va ganeya Gihebheru, kholu dzinoni nya Vajudha dzi nga ba dzi ganeya Gigreki dzi di gu divadwa tepo va nga ba va kabaniseya guhodza tshigu ni tshigu. 2 Khu kharato, ava nya 12 va di tshanganisa vapizane vatshavbo va va embeya, khavo: “Kha si khali gu hi diga thumo nyo hevbudze lito la Nungungulu gasi gu ya kabaniseya guhodza. 3 Khu kharato vandriyathu, hathani vbakari gwanu 7 vama va gu ni giyeyedzo nya gyadi, va tadego khu liphuvbo ni wugengeyi gasi hi va ninga thumo wowu nya lisima; 4 ganiolu, ethu hi na simama ni milombelo ni gu hevbudza lito la Nungungulu.” 5 Esi va nga ganeya si di tsakisa gitshungu gyatshavbo. Va di hatha Sitefane mwama nya gu tale khu gukhodwa ni liphuvbo nya guage, ni Filipi, Prokoro, Nikanori, Timoni, Parmenasi ni Nikolawu wa Antiyokiya, a nga vbindrugedza a khala Mujudha. 6 Va di va yisa ga vapostoli, hwane nya gu ba va gombede, va di va handzega mandza.

7 Khu kharato, lito la Nungungulu li di gu simama gu phalalega nigu tengo nya vapizane wu di gu engedzeya ngudzu Jerusalema; vaprista nya vangi va di dzumeya gukhodwa.*

8 Sitefane oyu a nga ba a tsakedwa ni gu ningwa tshivba khu Nungungulu a di gu gira siwoniso nya sikhongolo ni silewugiso vbakari nya vathu. 9 Ganiolu, vama nyo khaguri va nga ba vata khu Sinagogani yi nga ba yi ranwa gu pwani Sinagoga ya va nya Gutshulega gumogo ni vathu va nga ba vata khu Sirene ni Alexandriya ni vambe va nga ba vata khu Silisiya ni Aziya va dita gasi gu ta ganedzisana ni Sitefane. 10 Ganiolu, avo kha va dugeleya kholu uye a di gu ganeya khu wugengeyi nigu a diri ni liphuvbo nya guage. 11 Khu kharato, va di kutsedzeya vama nyo khaguri gusihalani gasi va ganeya gu khavo: “Hi mu pwide na gu ganeya guvivba khu Mosi ni Nungungulu.” 12 Avo va di kutsedzeya vathu ni madhota ni valovi, va mu mola khu kanu va hongola naye Tribhunali.* 13 Va di hongola ni dzifakazi nya malipha, dzi ya khidzo: “Mwama yoyu o khaleya gu ganeya guvivba khu wulanga wowu nya guage ni nayo wa Mosi. 14 Khu giyeyedzo, hi mu pwide na gu ganeya gu khuye Jesu wa Nazareta, a na tshungunula wulanga wowu a bwe a vbindrugeza siolovedzo hi nga hevbudzwa khu Mosi.”

15 Tepo vatshavbo va nga ba va khade Tribhulani va nga mu khedza, va di wona gu khavo khovbe yaye yi di gu gira nga khatshi khovbe nya ngilozi.

7 Ganiolu, muprista nya khongolo ngudzu a di mu wudzisa, khuye: “Ina lisine ilolo?” 2 Sitefane a di hlamula, khuye: “Vandruye ni vapapayi, nyi engiseni. Nungungulu nya wudhumo dzi wonegiside ga papayi wathu Abrahama, tepo a nga ba a romo Mesopotamiya, na nga si hongoli a ya khala Harani, 3 a mu embeya, khuye: ‘Khuga khu tigoni gwago, u diga valongo vago, u hongola u ya khala tigoni nyi na gu yeyedzago.’ 4 Abrahama a di khuga khu tigoni ga Vakalidhiya, a ya khala Harani. Hwane nya gu fedwe khu papayi waye iyoyo, Nungungulu a di mu ruma gu khuye a fuluga a ta tigoni momu mu vbanyago umo muhuno. 5 Ganiolu, Nungungulu kha mu ninga ne thomba mweyo ya tigoni mule, ne gipandryana nya litigo lile, ambari ulolo mu tumbiside gu khuye uye a na mu ninga litigo lile uye ni sanana saye, ambari olu khu tepo yile a nga ba ari mwalo naso. 6 Vbavbandze nya isoso, Nungungulu a di embeya Abrahama gu khuye sanana saye si na khala valuveli* omu nya litigo la vane, vathu vakona va na si gira dzigumbi, va si tshanisa khu 400 myaga. 7 Nungungulu a di khuye: ‘Nyi na lamula litigo lolo li na mi girago dzigumbi, nigu hwane nya isoso mu na duga tigoni mule mu ta nyi khozeya tigoni momu.’

8 “Nungungulu a di gira pwanano nya wugwera* ni Abrahama. Abrahama a di velega Isaki, a mu hanisa wugwera khu litshigu nya wu 8; Isaki a velega* Jakobe; Jakobe a khala papayi nya 12 mihungo nya dzindranga . 9 Vandriye va Josefa va di mu gireya lidiwo, va mu rengisa ga Vaegipto, ganiolu Nungungulu a diri naye, 10 a mu vbulugisa sigaradzoni saye satshavbo, a bwe a mu ninga wugengeyi ni gu bwe a tsakedwa khu Faro, pfhumu ya Egipto. Faro a di mu vega gasi gu thangeya Egipto ni ndranga yaye yatshavbo. 11 Gu di manega ndzala egipto gwatshavbo ni Khanani, gutshaniseka gu diri gukhongolo nyo bwe vakokwe vathu va hamuga ni gilo nyo hodze. 12 Ganiolu, Jakobe a dipwa gupwani gu na ni gilo nyo hodze Egipto, a rumeya vakokwe vathu iyoyo khu tepo nyo pheye. 13 Tepo va nga hongola nya wuvili, Josefa a di dzi tivegisa ga vandriyaye, khavbovbo Faro ati valongo va Josefa. 14 Khu kharato, Josefa a di ruma gu khuye va ya dzega papayi waye Jakobe ni valongo vaye vatshavbo; vatshavbo va diri 75 vathu. 15 Jakobe a di releya Egipto, iyoyo khiyo a nga ya feya iyo, nigu vakokwe vathu navo va fede iyoyo. 16 Avo va di rwadwa va yiswa tigoni ga Sikemi, va ya dzingwa omu nya lithowo eli Abrahama a nga renga ga sanana sa Hemori khu dzitsapawu nya prata.

17 Tepo yi nga ba yi hidzimeya tepo nya gu tadzise gitumbiso egi Nungungulu a nga gireya Abrahama, Vaisrayeli va di gu velegeyana, va tala tigoni ga Egipto. 18 Egipto gu di manega yimbe pfhumu, ganiolu pfhumu yoyo yi di siti gilo khu Josefa. 19 Pfhumu yeyi yi di thumisa wugengeyi yi wugeya va na gyathu yi bwe yi gurumedza vavelegi vathu gu diga sanana sawe gasi gu sifa. 20 Khu tepo yile, a di velegwa Mosi, uye a di mburide ngudzu.* A di khala ni vavelegi vaye khu migima miraru. 21 Ganiolu, tepo vavelegi vaye va nga gurumedzwa gu mu diga, gyanana gya Faro nya gyagadzyana gi di mu rola gi ya mu dandrisa nga gyanana gyaye. 22 Mosi a di hevbudzwa wugengeyi watshavbo wa Egipto. Malito ni mithumo yaye si diri ni tshivba.

23 Tepo a nga tshanganisa 40 myaga, a di hunga gu ya wuseya vandriyaye, Vaisrayeli. 24 Tepo a nga wona Muisrayeli moyo na gu tshaniswa khu Muegipito, a di mu emeya, a mu phodzeya khu gu songa Muegipito wule. 25 Uye a di gu pimisa gu khuye vandriyaye va na pwisisa gu khavo Nungungulu a di gu thumisa uye gasi gu va vbulugisa, ganiolu avo kha va pwisisa isoso. 26 Khu mindru gakona, a di hidzimeleya Vaisrayeli vavili va nga ba va dwana, a ya zama gu va avbula, khuye: ‘Ama sa, enu mu va na ndriye ni ndriye, khu ginani mu tshanisanago?’ 27 Ganiolu, Muisrayeli a nga ba a tshanisa Muisrayeli-kwawe, a di rindrividza Mosi, khuye: ‘Khu mani a nga gu vega kha nga muthangeyi ni mulamuli vbakari gwathu? 28 Wo vbweta gu nyi songa nga vbanova u nga songa Muegipito?’ 29 Tepo Mosi a ngapwa isoso, a di tutuma a ya vbanya nga muluveli tigoni ga Midhiyani, iyo a nga ya velega sanana sivili nya sikhwathana.

30 “Na gu vbindride 40 myaga, Mosi a di tumbulugedwa khu ngilozi khomu nya gipopwana gi nga ba gi khondra nari giwulani gya Gigomoni gya Sinayi. 31 Tepo Mosi a nga wona isoso, a di hlamala, tepo a nga hidzimeya khu vbafuvbi gasi gu ya si wona gwadi a dipwa lito la Jehovha na li gu khilo: 32 ‘Eni kheni Nungungulu wa vakokwe vago, Nungungulu wa Abrahama, wa Isaki ni Jakobe.’ Mosi a di pheya gu ndrendremeya, a si tiyi ni gu khedza gambe. 33 Jehovha a di mu embeya, khuye: ‘Tshula dzisandalya, kholu avbo u emidego wulanga nyo age. 34 Khu lisine nyi wonide gutshaniseka nya vathu vangu va gomogo Egipto, nyi pwide dzihuwa dzawe; nyi dzude gasi gu ta va tshudzisa, khu kharato olu nyi na gu rumeya Egipto.’ 35 Mosi yoyu avo va nga mu bomba, khavo: ‘Khu mani a nga gu vega kha nga muthangeyi ni mulamuli?’ khuye oyu Nungungulu a nga mu rumeya kha nga muthangeyi ni mutshudzisi khu gu thumisa ngilozi yi nga mu tumbulugeya khavba nya gipopo. 36 Khuye mwama yoyu a nga va dusa khu Egipto na gu gira siwoniso ni silewugiso Egipto, Yiphwani nya Gufuviye ni giwulani khu 40 myaga.

37 “Khuye Mosi yoyu a nga embeya sanana sa na Israyeli, khuye: ‘Nungungulu wanu a na mi hatheya vbakari nya moyo nya vandriyanu muprofeti nya gu fane ni eni.’ 38 Khuye a nga ba ari ni va na Israyeli giwulani, uye a diri gumogo ni ngilozi yi nga ganeya naye Gigomoni gya Sinayi gumogo ni vakokwe vathu; uye hakhide malito nyo vbanye ya Nungungulu gasi gu hi embeya. 39 Vakokwe vathu kha va mu engisa, va di mu bomba va bweleya Egipto khu monyoni. 40 Va di embeya Aroni, khavo: ‘Hi gireye vanungungulu va na hi thangeyago, kholu kha hi giti egi gi nga dugeleya Mosi yoyu a nga hi dusago khu Egipto.’ 41 Khu kharato, matshigoni yale va di gira githombe nya gimombyana, va gi gireya miphaso, va tsaka khu mithumo nya mandza yawe. 42 Khu kharato, Nungungulu a di va diga va khozeya silo si gomogo ndzadzini, kha nga edzi si lovidwego khidzo omu nya libhuku la vaprofeti, pwani: ‘Ndranga ya Israyeli, miningelo ni miphaso mu nga gira giwulani khu 40 myaga mu di gireya eni? 43 Enu mu di rwala litendra la Moloki ni nyeledzi ya nungungulu Rafani, a gu sifananiso mu nga si gira gasi gu si khozeya. Khu kharato, nyi na mi vbagedzisa nyi mi yisa hwindzo guvbindra Bhabhiloni.’

44 “Vakokwe vathu va diri ni litendra nya wufakazi giwulani, li nga ba li yeyedza gu khilo Nungungulu a diri navo, guya khedzi a rumidego khidzo Wule a nga ganeya ni Mosi, a nga khuye li di yede gu girwa guya khedzi a nga li wona khidzo. 45 Vakokwe vathu va li hakhide kheyi ga vavelegi vawe, vata nalo gumogo ni Josuwa ga litigo eli vathu vakona Nungungulu a nga va tutumisa mahoni ga vakokwe vathu; ilo li simamide avba kala matshigoni ya Dhavhidhe. 46 Dhavhidhe a di tsakedwa khu Nungungulu, a lomba gu khuye Nungungulu a mu ninga lithomo nyo gireye nyumba Nungungulu wa Jakobe. 47 Ganiolu, khu Solomoni a nga mu vbaheya nyumba. 48 Ganiolu, Oyu nyo Khugege Ngudzu kha vbanyi omu nya dzinyumba nyo vbahwe khu mandza nya vathu, kha nga a ganedego Muprofeti, khuye: 49 ‘“Ndzadzini gikhalo gyangu nya wufumu nigu mafu gigandredzelo nya migondro yangu. Nyumba muni mu na nyi vbaheyago?”, a ngu ganeya Jehovha. “Khu hayini gu na khalago wulanga wangu nya gu hefemule? 50 Ina khandri eni nyi giridego silo satshavbo sesi?”’

51 “Vathu nyo bange mihungo, nya myonyo nya mba engisa ni dzindzeve nya mbapwa,* tepo yatshavbo mo bomba liphuvbo nya guage, nga edzi va giridego khidzo vakokwe vanu. 52 Khu wevbini muprofeti wa gale a nga mba tshaniswa khu vakokwe vanu? Avo va songide vale va nga tivisa guta ga oyu nya gu lulame, oyu enu mu nga mu rengisa mu bwe mu mu songa, 53 enu mu hakhidego nayo mu ningidwego khu dzingilozi mu bwe mu si wu sayisi.”

54 Tepo va ngapwa isoso, va di goroga ngudzu va vbweta gu mu bayisa. 55 Sitefane na tade khu liphuvbo nya guage a di khedza ndzadzini, a wona wudhumo wa Nungungulu a bwe a wona gambe Jesu na emide khu nyamudye ga Nungungulu, 56 khuye: “Nya gu wona ndzadzini na gu tulegide ni Gyanana nya muthu na gi emide khu nyamudye ga Nungungulu.” 57 Tepo va ngapwa isoso, va di gira ligwaha nya likhongolo ngudzu, va tshika dzindzeve khu mandza, va mu yela khu gumogo. 58 Hwane nya gu ba va dugide naye khu dhoropani, va di pheya gu mu pfara khu siwindri. Dzifakazi dzile nya malipha dzi di vega sombo sawe migondroni ga lidzaha limwedo nyo pwani khu Sawule. 59 Tepo va nga ba va mu pfara khu siwindri, Sitefane a di lomba, khuye: “Pfhumu Jesu, hakha womi wangu.” 60 Khu hwane nya isoso, a di khidzima a ganeya khu lito nyo khugege, khuye: “Jehovha, u nga va ningi nandru khu gighoho gegi.” Khu hwane nya isoso, a difa.

8 Sawule a di gu seketeya gusongwa ga Sitefane.

Khu litshigu lile libandla li nga ba li romo Jerusalema li di pheya gu tshaniswa ngudzu; vatshavbo va di tutumeya Judheya ni Samariya gu tshala vapostoli basi. 2 Ganiolu, vathu va nga ba vari ni githawo khu Nungungulu va di dzega girumbi gya Sitefane va ya gi dzinga va bwe va gira gililo nya gikhongolo khuye. 3 Ganiolu, Sawule a di pheya gu tshanisa libandla. A di gu dhumeya ndranga ni ndranga, a mola vama ni vanyamayi a va khotheya pasoni.

4 Ganiolu, vale va nga phalalega va di gu simama gu tshumayela mahungu nya yadi nya lito la Nungungulu. 5 Filipi a di releya dhoropani* ga Samariya, a ya va tshumayela maningano ni Kristo. 6 Gitshungu gi di gu engiseya gwadi esi Filipi a nga ba a ganeya; gi di gu engiseya ni gu wona siwoniso a nga ba a gira. 7 Nya vangi va diri ni maphuvbo nya gu vivbe nigu ayo ma di gu womba huwa ma duga gwawe. Vbavbandze nya isoso, vathu nya vangi va nga ba va khwanyade* sivbango ni silima va di gu hawulugiswa. 8 Gu di manega gutsaka nya gukhongolo dhoropani mule.

9 Dhoropani mule gu diri ni mwama moyo nyo pwani khu Simoni, oyu gale gakone a nga ba a gira silo nya wuloyi.* Vathu vatshavbo va Samariya va di gu hlamala khuye kholu a di gu dzi embeya gu khuye khongolo. 10 Vatshavbo va di gu mu ninga githawo, gukhugeya ga oyu nya dugwana kala ga oyu nya khongolo nigu va di gu khavo: “Mwama yoyu na ni tshivba nya yikhongolo ya Nungungulu.” 11 Vathu va di gu mu ninga githawo kholu a di va hlamadziside khu tepo nyo laphe khu silo saye nya wuloyi. 12 Ambari ulolo, tepo Filipi a nga va tshumayela maningano ni mahungu nya yadi nya Mufumo wa Nungungulu ni lina la Jesu Kristo, va di khodwa; vama ni vanyamayi va bhabhatiswa. 13 Simoni nuye a di khodwa. Hwane nyo bhabhatiswe a di simama ni Filipi nigu a di gu hlamala ngudzu tepo a nga ba a wona siwoniso ni mithumo nya tshivba.

14 Tepo vapostoli va nga ba va romo Jerusalema va ngapwa gupwani Samariya va dzumede lito la Nungungulu, va di rumeya Pedro ni Johane. 15 Avo va di releya va ya gombeya gasi gu Vasamariya va hakha liphuvbo nya guage. 16 Kholu liphuvbo nya guage li di si gu tshigeyi ni moyo wawe, va di gu bhabhatisidwe basi khu lina la Pfhumu Jesu. 17 Khavbovbo, avo va di va handzega mandza, va pheya gu hakha liphuvbo nya guage.

18 Tepo Simoni a nga wona gu khuye vapostoli va di gu ningeya liphuvbo nya guage vathu khu gu va handzega mandza, a di va tumbisa gu va ninga dzitsapawu, 19 khuye: “Nyi ningeni neni tshivba yoyo, gasi ni wevbini nyi mu handzegago neni mandza a hakha liphuvbo nya guage.” 20 Ganiolu, Pedro a di mu embeya, khuye: “Prata yago yi na fuviswe nago kholu u pimiside gu renga khu dzitsapawu giningwa gi tago khiyo ga Nungungulu. 21 Uwe kha wu yeli gu patega thumoni wowu, kholu monyo wago kha wa lulama mahoni ga Nungungulu. 22 Khu kharato, dzi laye u vbindrugedza mavbanyelo yago nya guvivbe u bwe u lomba gu khuwe sa gu kodzega Jehovha a gu divaleya ga mapimo yago nya guvivbe, 23 kholu nyi ngu wona gu kheni u vhenene nya gu vave* nigu u gumbi nya silo nya mba sadi.” 24 Simoni a di va hakha, khuye: “Nyi gombeleyeni ga Jehovha gasi nyi si dugeledwi khesi mu nga ganeya.”

25 Khu kharato, hwane nya gu ba va tshumayede khu guvbeleya ni gu huweleya lito la Jehovha va di bweleya Jerusalema na va gu huweleya mahungu nya yadi omu nya dzialidheya nya dzingi dza Vasamariya.

26 Ngilozi ya Jehovha yi di embeya Filipi, khiyo: “Dzi dongiseye u hongola sul,* ga ruwa yi releyago khu Jerusalema kala Gaza.” (Eyi i ruwa ya giwulani.) 27 Filipi a di dzi dongiseya a khuga a hongola. A di manana ni thenwa nya Muetiyopi, a nga ba ari muphasedzeyi wa Kandasi, pfhumu nya nyamayi ya Etiyopiya. Thenwa yoyu khuye a nga ba a thangeya thomba yaye yatshavbo. Uye a di hongode Jerusalema gasi gu ya khozeya. 28 Tepo a nga ba a wuya, a di khade omu nya kareta yaye, na gu leri khu lito nyo khugege malito ya muprofeti Isaya. 29 Liphuvbo li di embeya Filipi, khilo: “Hidzimeleya kareta yoyo.” 30 Filipi a di tutuma a hongola bambe nya kareta, khavbovbo apwa thenwa wule na gu leri malito ya muprofeti Isaya khu lito nyo khugege, a mu wudzisa, khuye: “Ina u ngu si pwisisa esi u lerigo?” 31 Muetiyopi wule a di mu hlamula, khuye: “Nyi na si pwisisa kharini nya mba mana wangu nya gu nyi tshamuseye?” Khavbovbo, a di lomba gu khuye Filipi a lita a khala naye. 32 Gipandre nya Milowo a nga ba a leri khu lito nyo khugege khegi gi gu khigyo: “Kha nga nvuta, anuye a di yiswa gusongwatunu; kha nga ginvutana gi degulago tepo gi pidwago mawoya, uye nuye kha tuli likana. 33 Tepo va nga ba va mu valeteya, kha va mu lamula khu ndziya nyo lulame. Olu a na fago, khu mani a na tshamuseyago vambe matimo nya gitugulwana gyaye?”

34 Thenwa wule a di embeya Filipi, khuye: “Nga nyi embeya, muprofeti yoyu o ganeya khu mani? O dzi thula uye mune mwendro a gu thula mumbe muthu?” 35 Filipi a di pheya gu ganeya gukhugeya khu gipandre gile nya milowo, a mu tshamuseya mahungu nya yadi maningano ni Jesu. 36 Tepo va nga ba va gimbiya, va di vboha wulanga wu nga ba wuri ni mati. Thenwa wule, khuye: “Mati aya! Ginani gi nyi himbedzeyago gu bhabhatiswa?” 37 *—— 38 Khavbovbo, a di emisa kareta, Filipi ni mwama wule va tshiga va beya matini, Filipi a bhabhatisa thenwa wule. 39 Tepo va nga duga khu matini, liphuvbo la Jehovha li di dzegeya gu dzega Filipi. Thenwa wule kha mu wona gambe Filipi, ganiolu a di simama ni ndziya yaye na tsakide. 40 Filipi a di ya manega Azoto. Tepo a nga ba a vbindra khu gipandreni mule a di simama gu tshumayela mahungu nya yadi madhoropani yatshavbo kala a vboha Sezareya.

9 Sawule na ngo tade khu zanga nya yikhongolo nyo vbwete gu songa vapizane va Pfhumu, a di hongola ga muprista nya khongolo ngudzu, 2 a ya lomba malangaliya ma nga ba ma mu dzumeleya gu hongola dzisinagogani dza Dhamasko gasi a ya mola vama ni vanyamayi va nga ba va lumba Ndziya ya Pfhumu, a bweleya navo Jerusalema na va hungeledwe.

3 Na ngari ndziyani, nari vbafuvbi ni gu vboha Dhamasko, khu githugedza a di fenengedzwa khu gulasa gu nga ba guta khu ndzadzini, 4 a thega vbavbatshi, apwa lito na li gu khilo: “Sawule, Sawule, khu ginani u nyi tshanisago?” 5 Sawule a di wudzisa, khuye: “Khuwe mani Pfhumu?” Uye a di hlamula, khuye: “Kheni Jesu, oyu u mu tshanisago. 6 Ganiolu, khuga u ema u beya dhoropani, iyoyo va na ya gu embeya esi u yedego gu gira.” 7 Vama a nga ba a endra navo va di hlamala, va hamuga ni gilo nyo ganeye. Khu lisine, avo va pwide lito ganiolu kha va wona muthu. 8 Sawule a di khuga a ema, ganiolu ambari olu a nga ba a tude maho kha nga ba a wona gilo. Khu kharato, va di mu phara khu libogo va hongola naye Dhamasko. 9 Khade matshigu mararu nya mba wona, nya mba hodza, nya mba seya gilo.

10 Dhamasko, gu diri ni mupizane moyo nyo pwani khu Ananiya. Pfhumu yi di mu rana khomu nya giwoniso, khiyo: “Ananiya!” Uye a di hlamula, khuye: “Nyi womo avba, Pfhumu.” 11 Pfhumu yi di mu embeya, khiyo: “Dzi dongiseye u hongola ruwani yi ranwago gu pwani Nyo Lulame, u hongola gaya ga Judha u ya vbweta mwama moyo nyo pwani khu Sawule wa Tarsu. Uye o gombeya olu nyi ganeyago. 12 Khomu nya giwoniso, a di wona mwama moyo nyo pwani khu Ananiya na gu beya, a mu handzega mandza gasi a pheledza gu wona.” 13 Ganiolu, Ananiya a di hakha, khuye: “Pfhumu, eni nyi pwide vathu nya vangi na va gu ganeya khu mwama yoyu, na va gu ganeya khu guvivba gwatshavbo a giredego vapizane vago* Jerusalema. 14 Uye dzumeledwe khu vaprista nya vakhongolo gasi gu ta mola* vatshavbo vale va ganeyago khu lina lago.” 15 Ganiolu, Pfhumu yi di mu embeya, khiyo: “Gimbiya kholu mwama yoyu nyi mu hathide gasi a huweleya lina langu ga vanyamayigo, ga dzipfhumu ni ga sanana sa Israyeli, 16 kholu nyi na mu yeyedza gwadi dzatshavbo dzitshanisa a na dzi manago khu kotani nya lina langu.”

17 Khu kharato, Ananiya a di hongola, a ya beya nyumbani a mu handzega mandza, khuye: “Sawule, ndriyangu, Pfhumu Jesu oyu a nga gu tumbulugeya ruwani u nga ba uta khiyo, nyi rumede gasi u ta tulega maho u bwe u tala khu liphuvbo nya guage.” 18 Gu di dzegeya gu thega silo nyo khatshi magwaru khu mahoni gwaye, a pheya gu wona. Khavbovbo, a di khuga a bhabhatiswa. 19 Uye a di hodza a wusedza tshivba.

Uye khade matshigu nyo khaguri Dhamasko ni vapizane. 20 A di dzegeya gu pheya gu tshumayela omu nya dzisinagoga gu khuye Jesu Gyanana gya Nungungulu. 21 Vatshavbo va nga mupwa va di hlamala, va ganeya khavo: “Ina mwama yoyu khandruye a nga ba a tshanisa ngudzu vale va nga ba va ganeya khu lina leli Jerusalema? Gasi khandri a di teya gu ta va mola gasi gu ya va ningeya ga vaprista nya vakhongolo?” 22 Ganiolu, Sawule a di guya a tiya, a hlamadzisa Vajudha va nga ba va vbanya Dhamasko khu gu va yeyedza gwadi gu khuye Jesu khuye Kristo.

23 Na gu vbindride matshigu nya mangi, Vajudha va di hunga mano nyo mu songe. 24 Ganiolu, Sawule a di ma tugula mano yoyo. Avo va di gu ghadha malimba nya lidhoropa wutshigu ni mihani gasi va kodza gu mu songa. 25 Khu kharato, vapizane vaye va di mu dzega ni vbawutshigutunu va mu dusa vbavbandze khomu nya rava, khu vbagihogotunu gi nga ba gi romo avba nya muru.

26 Tepo a nga vboha Jerusalema, uye a di zama gu dzi pata ni vapizane, ganiolu vatshavbo va di gu mu thava kholu kha va nga ba va khodwa gu khavo a diri mupizane. 27 Khu kharato, Bharinabha a di ta mu phasa, a mu dzega a mu yisa ga vapostoli. A di va tshamuseya edzi Sawule a wonidego khidzo Pfhumu ruwani, esi Pfhumu yi nga ganeya naye ni edzi Sawule a tshumayedego khidzo khu gutiya hwambo dhoropani ga Dhamasko khu lina la Jesu. 28 Hwane nya isoso, Sawule a di khala navo, a gimbiya-gimbiya* Jerusalema na tshulegide na gu ganeya khu gutiya khu lina la Pfhumu. 29 Uye a di gu bhula ni gu ganedzisana ni Vajudha va nga ba va ganeya Gigreki, ganiolu avo va di gu zama gu mu songa. 30 Tepo vandruye va nga tugula isoso, va di releya naye Sezareya va ya mu rumeya Tarsu.

31 Khu kharato, mabandla yatshavbo ma nga ba ma romo Judheya, Galileya ni Samariya ma di gu vbanya khu gurula nigu ma di gu tiyiswa; kha nga olu ma nga ba ma ninga githawo Jehovha ni gu kategiswa khu liphuvbo nya guage ayo ma di gu engedzeya.

32 Kha nga olu Pedro a nga ba a gimbiya-gimbiya malangani yatshavbo, a di releya gasi gu ya wuseya vapizane* va nga ba va vbanya Lidha. 33 Iyoyo a di ya mana mwama moyo nyo pwani khu Eneya, oyu a nga ba a lade vbadahutunu a si kodzi ni gu gira gilo khu 8 myaga kholu a di gu khwanyade sivbango.* 34 Pedro a di mu embeya, khuye: “Eneya, Jesu Kristo a ngu gu hawulugisa; khuga u ema, u peta lidahu lago.” Uye a di dzegeya gu khuga a ema. 35 Tepo vatshavbo va nga ba va vbanya Lidha ni panini ga Saromi va nga mu wona, va di vbindrugedza va khodwa ga Pfhumu.

36 Dhoropani ga Jope, gu diri ni nyamayi moyo nya mupizane nyo pwani khuye Tabhita, la gu vbindrugedzedwa li tshamuseyago gu pwani Dhorkasi.* A di gu gira silo nya singi nya sadi nigu a di gu phasedzeya sisiwana. 37 Khu matshigu yoyo, uye a di dwala, afa; khavbovbo, va mu dzega va ya mu vega omu nya nyumba ya vbatshani. 38 Lidha gu diri vbafuvbi ni Jope, tepo vapizane va ngati gu khavo Pedro womo Lidha, va di rumeya vama vavili ni mwangu wu gu khuwo: “Ho lomba uta eno khu guvbiredza.” 39 Khu kharato, Pedro a di dzi dongiseya a hongola navo. Tepo a nga vboha, va di mu dzega va hongola naye nyumbani ya vbatshani, dzinoni dzatshavbo dzi di mu randreya. Va di gu liya na va gu yeyedza dzingandzu nya dzingi ni simbe sombo esi Dhorkasi a nga sona na ngo vbanya. 40 Pedro a di ruma gu khuye vatshavbo va duga, a khidzima a gombeya. A vbedza a khedza girumbi, a ganeya, khuye: “Tabhita, wuga!” Uye a di tula maho, tepo a nga wona Pedro a di wuga a khala. 41 Pedro a di mu phara khu libogo, a mu phasa gu khuga a ema; a rana vapizane* ni dzinoni a ta mu ningeya gwawe na gu vbanya. 42 Isoso si di tidwa khu vathu vatshavbo va dhoropani ga Jope nigu vathu nya vangi va di khodwa ga Pfhumu. 43 Pedro khade matshigu nya mangi Jope ni mwama moyo nyo pwani khu Simoni a nga ba ari meseri nya madowo.*

10 Sezareya gu diri ni mwama moyo nyo pwani khu Korineliyo a nga ba ari muthangeyi nya tsawa nya masotshwa* wu nga ba wu ranwa pwani libutho la Italiya.* 2 Uye a di gu khozeya Nungungulu nigu a diri ni githawo khu Nungungulu uye ni ndranga yaye yatshavbo; uye a di gu phasa ngudzu sisiwana nigu a di gu gombeya ga Nungungulu tepo yatshavbo. 3 Omu nya dzi 15 ora,* a di wona ngilozi ya Nungungulu khomu nya giwoniso na yi gu mu hidzimeleya, yi mu rana, khiyo: “Korineliyo!” 4 Korineliyo a di khedza ngilozi na gu thava, a yi wudzisa, khuye: “Ginani, Pfhumu?” Iyo yi di hlamula, khiyo: “Milombelo yago, ni giphaso u ningago sisiwana si gwede ga Nungungulu nigu uye si vegide mapimoni. 5 Khu kharato, olu kamo, rumeya vama va hongola Jope, va ya dzega mwama nyo pwani khu Simoni a tidwago pwani khu Pedro. 6 Mwama yoyo endrede gaya ga Simoni, meseri nya madowo* a vbahidego ndranga yaye bambe nya yiphwa.” 7 Tepo ngilozi yi nga ba yi ganeya naye yi nga hongola, a di rana sithumi saye sivili ni lisotshwa limwedo li nga ba liri ni githawo khu Nungungulu li nga ba liri moyo nya vaphasedzeyi vaye. 8 A di va tshamuseya satshavbo a bwe a va rumeya gu hongola Jope.

9 Khu mindru gakone, na vari ndziyani vbafuvbi ni gu vboha dhoropani, Pedro a di lita vbatshani nya nyumba* gasi gu ya gombeya omu nya dzi 12 ora.* 10 Ganiolu, a dipwa ndzala nya yikhongolo a vbweta gilo nyo hodze. Tepo va nga ba va dongiseya gilo nyo hodze, a di manega ni giwoniso. 11 A di wona ndzadzini na gu tulegide, ni gilo nyo fane ni mwendra nya wukhongolo nya linyu, na gi hungeledwe omu nya 4 dzitshoka, na gi gu releya mafuni. 12 Wu diri ni mafumbo yatshavbo nya sirengo nya mawundru mana, sirengo nyo khwirire ni sinyoni. 13 A dipwa lito na li gu mu embeya, khilo: “Pedro, khuga u songa u hodza!” 14 Ganiolu, Pedro a di hlamula, khuye: “Ahihi Pfhumu, kholu gima nyi si gu hodzi gilo gi himbedzedwago mwendro gi nga mba handzega guya khu nayo.” 15 Ganiolu, lito li di engedza gambe, khilo: “U nga rani silo si agisidwego khu Nungungulu gu khuwe kha sa handzega.” 16 Isoso si di girega gambe khu tepo nya wuraru; mwendra wu di dzegeya gu bweleya ndzadzini.

17 Pedro na ngo hlamala, na gu dzi wudzisa gu khuye giwoniso a nga gi wona gyo thula ginani, vama vale va nga rumedwa khu Korineliyo va di gu wudzisa gu khavo khu hayini gaya ga Simoni; va ya ema vbamwanyatunu. 18 Va di rana moyo wa ndrangani mule va ta mu wudzisa gu khavo Simoni a tidwago gu pwani khu Pedro endrede ndrangani mule gani. 19 Pedro na ngo dundrugeya khu giwoniso a nga gi wona, liphuvbo nya guage li di mu embeya, khilo: “Gu ni vama vararu va gu vbwetago. 20 Khuga u ema, u tshiga u hongola navo. U nga kanakani kholu kheni nyi nga va rumeya.” 21 Khu kharato, Pedro a di tshiga a yela vama vale a ya khuye: “Kheni oyu mu nyi vbwetago. Ginani gi mi tisago avba?” 22 Va di mu embeya, khavo: “Korineliyo muthangeyi nya masotshwa, mwama nyo lulame a ningago githawo Nungungulu, oyu vathu vatshavbo va Judha va ganeyago gwadi khuye ningidwe sileletelo khu Nungungulu khu gu thumisa ngilozi gasi gu ta gu rana u hongola gaya gwaye gasi a yapwa esi u gu naso gasi gu mu embeya.” 23 Pedro a di va hakha a beya navo nyumbani.

Khu mindru gakone, a di hongola navo gumogo ni vandruye nyo khaguri va tigoni ga Jope. 24 Na gu vbindride litshigu limwedo va di vboha Sezareya, Korineliyo a di va virede nigu a di gu tshanganiside valongo vaye ni dzipari dzaye nya dzikhongolo. 25 Tepo Pedro a nga beya, Korineliyo a di mu khinga a ya mu khidzimeya. 26 Ganiolu, Pedro a di mu khusedza, khuye: “Khuga u ema, aneni nyi muthu nga uwe.” 27 Pedro a di beya nyumbani na gu bhula ni Korineliyo a ya mana vathu nya vangi na va gu tshanganide. 28 Pedro a di va embeya, khuye: “Mu ngu dziti gwadi gu khenu kha si dzumedziswi gu Mujudha a dzi pata ni muthu nya limbe litigo, ganiolu Nungungulu nyi yeyedzide gu khuye kha nyi yeli gu rana muthu gu kheni kha handzega. 29 Khu kharato, tepo u nga nyi rana kha nya bomba guta. Olu nyi embeye igyo u nga nyi raneya igyo.”

30 Korineliyo a di hakha, khuye: “Vbanyatulu nguluni,* omu nya dzi 15 ora,* tepo nyi nga ba nyi gombeya nyumbani gwangu nyi di tumbulugedwa khu mwama moyo a nga ba a ambade sombo nyo khendzige, 31 a nyi embeya, khuye: ‘Korineliyo, nombelo wago wu pwidwe nigu giphaso u ningago sisiwana gi dundrugidwe khu Nungungulu. 32 Khu kharato, rumeya muthu a hongola Jope a ya rana Simoni, a tidwago gu pwani khu Pedro. Mwama yoyu endrede gaya ga Simoni, meseri nya madowo* a khalago bambe nya yiphwa.’ 33 Nyi di dzegeya gu gu ranisa nigu u giride gwadi kholu u ngata. Olu hatshavbo hi womo mbeli ga Nungungulu gasi gu engiseya satshavbo esi Jehovha a gu rumidego gu ta ganeya.”

34 Pedro a di ganeya, khuye: “Olu nyi ngu dziti gwadi gu kheni Nungungulu mwalo gihatheya, 35 ganiolu ga mafumbo yatshavbo uye a ngu hakha wule a mu ningago githawo a bwe a gira esi nya sadi. 36 Uye a di rumeya lito laye ga sanana sa na Israyeli na gu va embeya mahungu nya yadi nya gurule khu gu thumisa Jesu Kristo, a gu Pfhumu ya vatshavbo. 37 Mu ngu siti gwadi esi si nga ba si ganedwa Judheya gwatshavbo, gukhugeya khu Galileya, hwane nya gu ba Johane a tshumayede maningano ni gubhabhatiswa: 38 Nyo ganeya khu Jesu wa Nazareta, oyu a todzidwego khu Nungugulu khu gu thumisa liphuvbo nya guage ni gu mu ninga tshivba. Uye gimbide malangani yatshavbo na gu gira silo nya sadi ni gu hawulugisa vatshavbo va nga ba va tshaniswa khu Sathane kholu Nungungulu a diri naye. 39 Ethu hi dzifakazi nya silo satshavbo esi a nga gira tigoni ga Vajudha ni Jerusalema, ganiolu avo va di mu songa khu gu mu khokhotheya* vbasimbotunu. 40 Nungungulu mu wuside khu litshigu nya wuraru a bwe a mu dzumeleya gu khuye a wonwa, 41 nasiri khu vathu vatshavbo, ganiolu khu dzifakazi dzi hathidwego khu Nungungulu, agu ethu hi nga hodza ni gu seya naye hwane nya gu ba a wusidwe khu ga vafudego. 42 Uye hi rumide gambe gu tshumayela ga vathu vatshavbo hi bwe hi ningeya wufakazi nyo vbeleye nyo khethu uye khuye a hathidwego khu Nungungulu gasi gu khala mulamuli nya ava va vbanyago ni ava va fudego. 43 Vaprofeti va ningide wufakazi maningano khuye, khavo: Vatshavbo va khodwago gwaye va na divaledwa sighoho sawe khu gu thumisa lina laye.”

44 Pedro na ngo ganeya silo sesi, liphuvbo nya guage li di tshiga ga vatshavbo va nga ba va engiseya. 45 Nigu va nya gu khodwa va nga ba va hanide wugwera,* va nga ba va dzude ni Pedro va di hlamala kholu giningwa* nya liphuvbo nya guage gi di gu tshigeya ni vanyamayigo. 46 Avo va di vapwa na va gu ganeya malimi nyo hambane-hambane, na va gu dhumisa Nungungulu. Khu kharato, Pedro a di khuye: 47 “Vathu vava va hakhide liphuvbo nya guage nga ethu, ina womo a na va bombeyago mati gasi va bhabhatiswa?” 48 Khavbovbo, a di ruma gu khuye va bhabhatiswa khu lina la Jesu Kristo. Avo va di lomba gu khavo Pedro a khala vbale khu matshigu nyo khaguri.

11 Vapostoli ni vandruye va nga ba va romo Judheya, va dipwa gu pwani gu na ni vanyamayigo va dzumedego navo lito la Nungungulu. 2 Tepo Pedro a nga vboha Jerusalema, avo va nga ba va seketeya gu hana wugwera* va di pheya gu mu sola-sola, 3 khavo: “U bede nyumbani nya vathu nya mba hana wugwera u bwe u hodza navo.” 4 Khu kharato, Pedro a di va tshamuseya gwadi esi si nga dugeleya, khuye:

5 “Nyi di romo dhoropani ga Jope na nyi gu gombeya, khavbovbo khomu nya giwoniso nyi di wona gilo nyo khatshi mwendra nya wukhongolo nya linyu, na wu gu tshiga khu ndzadzini, na wu hungeledwe omu nya 4 dzitshoka, na wu gu nyi hidzimeleya. 6 Tepo nyi nga khedza gwadi ndrani gwawo, nyi di wona mafumbo yatshavbo nya sirengo nya mawundru mana, sirengo nya likhabi, sirengo nyo khwirire ni sinyoni. 7 Khavbovbo, nyipwa lito na li gu nyi embeya gu khilo: ‘Pedro, khuga u songa u hodza!’ 8 Ganiolu, eni nyi di kheni: ‘Ahihi Pfhumu, kholu kanani gwangu gima gu si gu beyi gilo gi himbedzedwago mwendro gi nga mba handzega, guya khu nayo.’ 9 Lito lile li di engedza, khilo: ‘U nga rani silo si agisidwego khu Nungungulu khuwe kha sa handzega.’ 10 Isoso si di girega khu tepo nya wuraru; satshavbo si bweleya ndzadzini. 11 Nigu gambe khu tepo yile, vama vararu va nga ba va rumedwe khu Sezareya gasi gu nyi vbwetedzeya, va di vboha ndrangani nyi nga ba nyi romo. 12 Khavbovbo, liphuvbo nya guage li di nyi ruma gu hongola nya mba kanakana. Nyi di hongola ni vama vava nya 6, hi ya beya ndrangani ga mwama wule.

13 “A di hi embeya khuye a di tumbulugedwa khu ngilozi gaya gwaye yi mu embeya, khiyo: ‘Rumeya vama dhoropani ga Jope va ya dzega Simoni a tidwago pwani khu Pedro. 14 A na ta gu embeya mahungu ma na gu vbanyisago gumogo ni ndranga yago yatshavbo.’ 15 Tepo nyi nga pheya gu ganeya, liphuvbo nya guage li di va tshigeya kha nga edzi li nga hi tshigeya khidzo gupheyani. 16 Khavbovbo, nyi di dundruga malito ya Pfhumu a nga khuye: ‘Johane bhabhatiside khu mati, ganiolu enu mu na bhabhatiswa khu liphuvbo nya guage.’ 17 Khu kharato, abari gu Nungungulu a va ningide giningwa* a nga hi ninga ethu hi khodwago ga Pfhumu yathu Jesu Kristo, kheni mani eni gasi gu himbedzeya Nungungulu?”

18 Tepo va ngapwa isoso, kha va ganeya gambe gilo, ganiolu va di dhumisa Nungungulu, khavo: “Nungungulu ningide vanyamayigo gudzilaya gu ningago womi.”

19 Ava va nga phalalegiswa khu tshanisa yi nga dugeleya khu kotani ya Sitefane va di hongola Fenisiya, Kipre ni Antiyokiya, ganiolu va di gu tshumayela lito la Nungungulu ga Vajudha basi. 20 Vbakari gwawe gu diri ni vama nyo khaguri va nga ba vata khu Kipre ni Sirene. Avo va di hongola Antiyokiya, va ya pheya gu ganeya ni vathu va nga ba va ganeya Gigreki, va va tshumayela mahungu nya yadi ya Pfhumu Jesu. 21 Jehovha a diri navo nigu nya vangi va di gu vbindrugedza va khodwa ga Pfhumu.

22 Mahungu ma ganeyago khavo ma di vboha libandlani la Jerusalema, khavbovbo va rumeya Bharinabha gu hongola Antiyokiya. 23 Tepo a nga vboha iyoyo, a wona wuwadi wa Nungungulu a di tsaka a kutsa vatshavbo gu simama gu engisa Pfhumu khu monyo watshavbo, 24 kholu a diri muthu nya wadi a nga ba a tade khu liphuvbo nya guage. Vathu nya vangi va di khodwa ga Pfhumu. 25 Khavbovbo, a di hongola Tarsu a ya vbwetedzeya Sawule. 26 Tepo a nga mu mana, a di mu dzega a hongola naye Antiyokiya. Khu kharato, va di vbedza mwaga rumba na va gu tshangana ni libandla ni gu hevbudza vathu nya vangi. Khiyo Antiyokiya vapizane va nga pheya gu ranwa gu pwani Makristo guya khu gugola ga Nungungulu.

27 Matshigoni yale, vaprofeti nyo khaguri va di khuga khu Jerusalema va releya Antiyokiya. 28 Moyo wawe nyo pwani khu Agabho, a di khuga a profeta khu gu thumisa liphuvbo nya guage gu khuye yi na manega ndzala nya yikhongolo mafuni gwatshavbo. Khu lisine, yi manegide matshigoni ya Klawudhiyo. 29 Khu kharato, moyo ni moyo nya vapizane a di hunga gu rumeya giphaso ga vandriyathu va Judheya guya khu makodzelo yaye. 30 Avo va di rumeya giphaso gyogyo ga madhota khu gu thumisa Bharinabha ni Sawule.

12 Khu tepo yile, Pfhumu Herodhi a di pheya gu tshanisa vathu nyo khaguri va nga ba va lumba libandla. 2 A di ruma gu khuye gu songwa Jakobe, ndriye wa Johane, khu xipadha. 3 Tepo a nga wona gu khuye isoso si ngu tsakisa Vajudha, a di mola nuye Pedro. (Isoso si dugelede matshigoni nya Dzipawu nya mba thedwa Livhirina.*) 4 Uye a di mu khotheya pasoni, a mu ningeya gasi a ghadwa khu 4 mitsawa nya masotshwa yi nga ba yi dzegisana; tsawa ni tsawa wu di gu wumbwa khu 4 masotshwa. Uye a diri ni makungo nyo mu lamule mbeli nya gitshungu hwane nya Phasika. 5 Khu kharato, Pedro a di khothedwa pasoni ganiolu vandruye va di gu gombeya ngudzu ga Nungungulu khuye.

6 Herodhi a di gu vbweta gu dusa Pedro khu mindru gakone, ga wutshigu wowo Pedro a di lade vbakari nya masotshwa mavili na hungeledwe khu dzikorenti dzimbili; gu diri ni dzighwardha dzimbili khu vbamwanyatunu dzi nga ba dzi ghadha lipaso. 7 Ganiolu, khu githugedza gu di tumbuluga ngilozi ya Jehovha nigu guwonegeya nya gukhongolo gu di wenengedza lipaso. Iyo yi di kuha libambo la Pedro, yi mu wusa, khiyo: “Khuga khu guvbiredza!” Dzikorenti dzi di tshulega khu mawogoni yaye. 8 Ngilozi yi di mu embeya, khiyo: “Dzi dongiseye, u ambala dzisandaliya dzago.” Pedro a di gira isoso. Yi vbedza, khiyo: “Ambala ngandzu yago u nyi landra.” 9 Khavbovbo, uye a di duga a landra ngilozi ganiolu kha nga ba a dziti gu khuye sile si nga ba si girwa khu ngilozi si di gu girega khu lisine. Uye a di gu pimisa gu khuye gu diri giwoniso. 10 Va di vbindra khavba nya ghwardha nyo pheye, va vbindra khavba nya eyi nya wuvili va vboha avba nya lidimba nya simbi li nga ba li khedzide dhoropani, ilo li di tulega labune. Khavbovbo va duga, va gimbiya khu ruwa nyo khaguri, khu githugedza ngilozi yi mwalalega. 11 Tepo Pedro a nga tugula esi si nga ba si dugeleya, a di khuye: “Olu nyi ngu dziti nya mba kanakana gu kheni Jehovha rumede ngilozi yaye yi ta nyi tshudzisa mandzani ga Herodhi ni ga satshavbo esi Vajudha va nga ba va vireya gu khavo si girega.”

12 Hwane nyo tugule isoso, a di hongola gaya ga Mariya, mamayi wa Johane, a tidwago gu pwani khu Marko, avbo gu nga ba gu tshanganide vapizane nya vangyana va gombeya. 13 Tepo a nga khokhotha lidimba la vbamwanya, gu dita githumi nya nyamayi nyo pwani khu Rodhe gi ta mu hakha. 14 Tepo a nga tugula gu khuye lito la Pedro a di tsaka ngudzu nyo bwe a si tuli lidimba, ganiolu a di tutuma a hongola nyumbani a ya va embeya gu khuye Pedro womo vbamwanya. 15 Avo va di khavo: “Wo handruga!” Ganiolu, uye a di simama gu ganeya gu khuye lisine. Avo va ganeya, khavo: “Ngilozi yaye.” 16 Ganiolu, Pedro a di simama gu khokhotha. Tepo va nga tula lidimba, va mu wona, va di hlamala ngudzu. 17 Pedro a di khusedza mandza a va degudza, a va tshamuseya edzi Jehovha a nga mu dusa khidzo khu pasoni, a va embeya khuye: “Gimbiyani mu ya embeya silo sesi Jakobe ni vandruye.” Khavbovbo, uye a di duga a hongola wumbe wulanga.

18 Tepo gu ngagya gu di manega pfiIupfiIu vbakari nya masotshwa, na va gu vbweta guti gu khavo ginani gi nga dugeleya Pedro. 19 Tepo Herodhi a nga mu vbwetedzeya a si mu mani, a di thethisa dzighwardha, a ruma gu khuye dzi dzegwa dzi ya tsayiswa. Khavbovbo, a di khuga khu Judheya a releya Sezareya, a ya khala iyoyo tepo nyo khaguri.

20 Uye a di vegede giviti vathu va Tiro ni Sidhoni. Vathu va malangani yaya va di gu renga guhodza ga litigo a nga ba a fuma Herodhi; khu kharato, va di pwana va ya ganeya ni Bhalasito, a nga ba ari muthangeyi nya ndranga ya Herodhi gasi va ya lomba gurula. 21 Khu litshigu nyo khaguri, Herodhi a di ambala sombo saye nya wufumu a khala tribhunali a pheya gu ganeya ni vathu. 22 Khu kharato, vathu va nga ba va tshanganide va di kwanguluga, khavo: “Lito la nungungulu, khandri lito nya muthu!” 23 Khu gitepwana gile, ngilozi ya Jehovha yi di mu veta kholu kha ninga wudhumo Nungungulu. Uye a di hodzwa khu siwungu afa.

24 Ganiolu, lito la Jehovha li di gu andra li phalalega.

25 Tepo Bharinabha ni Sawule va nga vbedza thumo wawe nyo phasedzeye vathu Jerusalema, va di bweleya va ya dzega Johane a nga ba a tidwa gu pwani khu Marko.

13 Omu nya libandla la Antiyokiya gu diri ni vaprofeti ni vahevbudzi nya nayo: Bharinabha, Simoni a nga ba a ranwa gu pwani khu Nigeri, Lusiyu wa Sirene, Manaheme a nga hevbula gumogo xikola ni Herodhi, adhiministradhori nya dhistrito, ni Sawule. 2 Tepo va nga ba va thumeya Jehovha ni gu pfhunga, liphuvbo nya guage li di khilo: “Nyi hatheyeni Bharinabha ni Sawule gasi va gira thumo nyi nga va raneya uwo.” 3 Khu kharato, hwane nya gu pfhunge ni gu gombeya va di va handzega mandza va va diga va hongola.

4 Khavbovbo, vama vava va nga rumedwa khu liphuvbo nya guage va di hongola Selewusiya, khiyoyo va di ya beya ngalava va hongola Kipre. 5 Tepo va nga vboha Salamina, va di pheya gu tshumayela mahungu ya Nungungulu omu nya dzisinagoga dza Vajudha, Johane a diri navo kha nga muphasedzeyi wawe.

6 Hwane nya gu dzuwulugeye gidwani gyatshavbo kala Pafosi, va di mana Mujudha moyo nyo pwani khu Bharijesu, a nga ba ari ndroyi nigu a diri muprofeti nya malipha. 7 Uye a diri ni ghovhernadhori nyo pwani khu Serijiyo Pawulo a nga ba ari mwama nya guti. Uye a di rana Bharinabha ni Sawule kholu a di gu vbweta ngudzu gupwa lito la Nungungulu. 8 Ganiolu, Elimasi oyu a nga ba ari ndroyi (a gu edzi li vbindrugedzedwago khidzo lina laye) a di pheya gu va wugeya, a zama gu ndreyisa ghovhernadhori gukhodwani. 9 Ganiolu, Sawule a ranwago gambe gu pwani khu Pawulo a di tala khu liphuvbo nya guage, a mu khedza gwadi, 10 khuye: “Mwama wewe nyo tale khu wukanganyisi watshavbo ni wuvivbi, gyanana gya Dhiyabhulosi, nala nya silo satshavbo nyo lulame, u na hegisa lini gu tshomboroseya dzindziya nyo lulame dza Jehovha? 11 Jehovha a na gu tsayisa nigu u na khala gikhumu u si woni guwonegeya nya lidambo khu tepo nyo khaguri.” Khu githugedza a di wona hunguva nya yikhongolo ni gidema nya gikhongolo, a di pheya gu gimbiya khu gu phuphutheya na gu zama gu vbweta muthu nyo mu phare khu libogo a mu gimbidzisa. 12 Khavbovbo, tepo ghovhernadhori a nga wona esi si nga girega, a di khodwa kholu a di hlamadziswa khu sihevbudzo sa Jehovha.

13 Pawulo ni dzipari dzaye va di khuga khu ngalava khu Pafosi va vboha Periga, Panfiliya. Ganiolu, Johane a di va diga a bweleya Jerusalema. 14 Avo va di simama ni liendro lawe. Va di khuga khu Periga va vboha Antiyokiya, Pisidhiya. Va ya beya omu nya sinagoga khu litshigu nya Sabhadho va khala. 15 Hwane nya gu ba va vbedzide gu leri Nayo ni mabhuku ya vaprofeti, vathangeyi nya sinagoga va di va embeya, khavo: “Vandruye, mwa gu ba muri ni malito nyo tiyise vathu ganeyani.” 16 Khavbovbo, Pawulo a di khuga a khusedza libogo, khuye:

“Vaisrayeli ni mwatshavbo enu mu ningago githawo Nungungulu, engiseyani, 17 Nungungulu nya vathu vava, Nungungulu wa Israyeli hathide vakokwe vathu; tepo va nga ba vari valuveli* Egipto Nungungulu va phaside, uye thumiside tshivba yaye gasi gu va dusa khu Egipto. 18 Uye a va timisede giwulani khu gipimo nya 40 myaga. 19 Uye fuviside 7 mayigo ya Khanani, a va ninga litigo lawe kha nga thomba. 20 Satshavbo soso si giregide ndrani nya 450 myaga.

Khu hwane nya isoso, a di va ninga valamuli kala ga muprofeti Samuweli. 21 Ganiolu, avo va di lomba pfhumu, Nungungulu a di va ninga Sawule gyanana gya Khisi wa lihundzo la Bhejami; uye a di va fumeya khu 40 myaga. 22 Hwane nya gu ba a mu duside vbagikhalotunu nya wufumu, a di va ninga Dhavhidhe kha nga pfhumu. Uye ganede esi maningano naye: ‘Nyi manide Dhavhidhe gyanana gya Jese mwama a tsakisago monyo wangu, uye a na gira gugola gwangu.’ 23 Guya khu gitumbiso gyaye, Nungungulu resede muvbulugisi Israyeli a gu Jesu, a dugeyago khavba nya gitugulwana gya Dhavhidhe. 24 Na nga si vbohi, Johane tshumayede ga vathu vatshavbo va Israyeli maningano ni gubhabhatiswa kha nga giyeyedzo nya gu dzi laye gasi gu divaledwa sighoho. 25 Tepo Johane a nga ba ari vbafuvbi ni gu vbedza thumo waye, a di khuye: ‘Mo pimisa gu khenu kheni mani? Khandreni wule mu mu dundrugeyago. Khu lisine, hwane gwangu a nguta wule nya gu kha nyi yeli ni gu mu tshula dzisandaliya.’

26 “Vandruye, sanana sa Abrahama ni mwatshavbo enu mu ningago githawo Nungungulu, malito yaya nya guvbanyise ma rumeledwe ethu. 27 Kholu vavbanyi va Jerusalema ni dzipfhumu dzawe kha va pwisisa gu khavo Jesu a diri muvbulugisi kholu va mu lamude va tadzisa malito ya vaprofeti ma lerwigo dzisabhadho dzatshavbo khu lito nyo khugege. 28 Ambari olu va nga mba mana gighelo nyo mu songe, va di gurumedza Pilato gu khavo a na songwe. 29 Hwane nya gu ba va giride satshavbo si nga lowa maningano naye, va di mu dusa khavbo nya simbo va mu theya thowoni. 30 Ganiolu, Nungungulu mu wuside khu gufani. 31 Khu matshigu nya mangi a di dzi wonegisa ga ava a nga gweya navo khu Galileya kala Jerusalema. Avovo khavo va khadego dzifakazi dzaye vbakari nya vathu.

32 “Khu kharato, ethu ha gu mi tivisa mahungu nya yadi maningano ni gitumbiso gi nga girwa vakokwe vathu. 33 Nungungulu tadziside gitumbiso gegi gwathu, sanana sawe, khu gu wusa Jesu; kha nga si lovidwego ga ndzimo nya wuvili yi gu khiyo: ‘Uwe u gyanana gyangu; muhuno nyi khade papayi wago.’ 34 Maningano ni gu ba Nungungulu a mu wuside khu ga vafudego gasi a si hini gambe, Uye a di khuye: ‘Nyi na mi yeyedzani lihaladzo nya lisine li tumbisidwego Dhavhidhe, situmbiso soso khya lisine.’ 35 Khu kharato, gu ngu ganedwa gambe ga yimbe ndzimo pwani: ‘Khu na nga diga githumi gyago nyo tumbege gi hina.’* 36 Dhavhidhe thumede Nungungulu dziteponi dzaye. Uye fude a dzingwa ni vakokwe vaye a hina. 37 Ganiolu, wule a wusidwego khu Nungungulu kha hina.

38 “Khu kharato vandruye, dzitini gu khenu mwa gu tivegiswa gu divaledwa nya sighoho khu kotani ga mwama yoyu 39 nigu khu kotani gwaye watshavbo wule a khodwago a ngu handzwa nandru ga satshavbo silo a nga hadzi ningwa nandru gwaso guya khu Nayo wa Mosi. 40 Khu kharato, dzi woneyeni gasi gu esi si ganedwego khu vaprofeti si si mi thegeyi, si gu khiso: 41 ‘Enu vapoyili, hlamalani mu mwalalega! Kholu matshigoni yanu nya gu gira thumo owu gima mu na gu mba khodwa gwawo ambari mwa gu tshamusedwa gwadi.’”

42 Tepo Pawulo ni Bharinabha va nga ba va duga khu sinagogani, vathu va di lomba gu khavo va ganeya gambe khu silo sesi khu Sabhadho yi landreyago. 43 Tepo wu nga vbeya tshangano sinagogani, Vajudha nya vangi ni vathu va nga ba vbindrugedza va khala Vajudha* va khozeya Nungungulu va di landra Pawulo ni Bharinabha. Tepo va nga ba va ganeya navo, va di va kutsa gu simama na va tumbegide gasi va haladzwa khu Nungungulu.

44 Khu Sabhadho yi nga landreya, vathu nya vangi va dhoropani va di tshangana gasi gupwa mahungu ya Jehovha. 45 Tepo Vajudha va nga wona vathu vale nya vangi, va di tala khu lidiwo va ganedza khu ndziya nyo poyile esi Pawulo a nga ba a ganeya. 46 Khu kharato, khu gutiya-hwambo, Pawulo ni Bharinabha va di va embeya, khavo: “Mu di yede gu pheya khenu mu embedwa mahungu ya Nungungulu. Kha nga olu mu ma bombago mu bwe mu dzi wona na mu si yedwi khu gu mana guvbanya nya gupindruge, hi na bweleya ga vanyamayigo. 47 Kholu Jehovha hi rumide khuye: ‘Eni nyi gu vegide kha nga wenengedzo ga vanyamayigo gasi u yisa guvbanyiswa kala mahegiso nya mafu.’”

48 Tepo vanyamayigo va ngapwa esi va di tsaka va pheya gu dhumisa mahungu ya Jehovha nigu vatshavbo va nga ba va dzi emisede gu hakha womi nya gupindruge va di khodwa. 49 Nigu mahungu ya Jehovha ma di gu tshumayedwa gipandreni gwatshavbo. 50 Ganiolu, Vajudha va di kutsedzeya vanyamayi nya guthavisege va nga ba va khozeya Nungungulu ni vama va nga ba va ningwa ngudzu lisima dhoropani, va wugeya Pawulo ni Bharinabha va va tutumisa dhoropani gwawe. 51 Khu kharato, Pawulo ni Bharinabha va di phuphutha kudzudzwani migondroni gasi si khala wufakazi gwawe, va hongola Ikoniya. 52 Vapizane va di simama na va tsakide ngudzu va bwe va tala khu liphuvbo nya guage.

14 Tepo Pawulo ni Bharinabha va nga vhoha Ikoniya, va di beya sinagogani nya Vajudha va ya ganeya khu ndziya nya gu Vajudha nya vangi ni Vagreki nya vangi va vbindrugedza va khodwa. 2 Ganiolu, Vajudha va nga mba khodwa va di kutsedzeya vanyamayigo gu wugeya vandruye. 3 Pawulo ni Bharinabha va vbedzide tepo nyo laphe iyoyo nigu Jehovha a di gu va ninga tshivba gasi gu ganeya na va tiyide; uye thumiside avo gasi gu gira siwoniso ni silewugiso, gasi gu yeyedza gu khavo mahungu va nga ba va tshumayela, ma nga ba ma ganeya khu wuhindzi waye, ma diri lisine. 4 Ganiolu, vathu nya vangi dhoropani va di gu kabanegide, vambe va di gu ema ni Vajudha vambe va di gu ema ni vapostoli. 5 Ganiolu, vanyamayigo gumogo ni Vajudha ni vathangeyi vawe, va di hunga gu va tshanisa ni gu va pfara khu siwindri. 6 Tepo vapostoli va nga embedwa isoso, va di tutuma va hongola Likawoniya, madhoropani ya Listra ni Dherbhe ni ga mayigwana ya vbafuvbyana mule. 7 Iyoyo va di ya simama gu tshumayela mahungu nya yadi.

8 Listra gu diri ni mwama moyo a nga ba a haside mawundru. Uye a diri gilima gukhugeya a velegwa, gima a di si gu gimbiyi, uye a di gu khade. 9 Uye a di gu engiseya Pawulo na gu ganeya; Pawulo a di mu khedza gwadi a wona gu khuye a diri ni gukhodwa gasi gu a hawuluga. 10 Pawulo a di khusedza lito a ganeya, khuye: “Khuga u ema.” Mwama wule a di ndraga, a ema a pheya gu gimbiya. 11 Tepo gitshungu gi nga wona esi Pawulo a nga gira, gi di khusedza lito khu lidimi la Likawoniya, khigyo: “Vanungungulu va hi tshigede kha nga vathu!” 12 Avo va di rana Bharinabha khavo khu Zewusi, va rana Pawulo khavo khu Herimesi kholu khuye a nga ba a ganeya. 13 Muprista wa Zewusi, oyu tempele yaye yi nga ba yi romo vbamwanyatunu nya lidhoropa, a di dzega dzimombe ni dzikorowa nya sifilori, a hongola naso omu nya myanya gasi gu ya gira miphaso ni gitshungu.

14 Tepo vapostoli Barinabha ni Pawulo va ngati isoso, va di pferula dzingandzu dzawe, va tutuma va hongola vbakari nya gitshungu va ya khusedza lito, khavo: 15 “Khu ginani mu girago isoso? Anethu hi vathu nga enu, ha gu mi tshumayela mahungu yaya nya yadi gasi gu mu diga silo sesi nya mba phasa mu ta khozeya Nungungulu a vbanyago, a nga gira ndzadzi ni mafu ni linene ni satshavbo si gomogo gwaso. 16 Ga mimela yi vbindridego, uye dzumelede gu khuye vathu va gira esi va nga ba va si vbweta. 17 Ambari ulolo, uye giride silo nya sadi gasi gu mi yeyedza gu khuye khade kharini, khu gu mi ninga ndzadzi a bwe a mi gira mu fuma ngudzu, a mi ninga guhodza nya gungi, a mi ninga gutsaka nya gukhongolo.” 18 Ambari olu va nga ganeya isoso, kha sa va vbevbugeya gu digisa gitsungu gu va gireya miphaso.

19 Ganiolu, gu dita Vajudha va Antiyokiya ni Ikoniya, va ta kutsedzeya gitshungu gu va wugeya; va pfara Pawulo khu siwindri, va mu ndrindra va mu dusa vbavbandze nya lidhoropa na va gu pimisa gu khavo fude. 20 Ganiolu, tepo vapizane va nga mu randreya, a di khuga a beya dhoropani. Khu litshigu li nga landreya, a di khuga ni Bharinabha va hongola Dherbhe. 21 Hwane nya gu ba va tshumayede mahungu nya yadi dhoropani mule ni gu gira vapizane nya vangi, va di bweleya Listra, Ikoniya ni Antiyokiya. 22 Iyoyo va di ya tiyisa vapizane, va va kutsa gu simama gukhodwani va bwe va va embeya, khavo: “Gu vbwetega hi emisana ni sigaradzo nya singi gasi gu beya mufumoni wa Nungungulu.” 23 Ga libandla ni libandla va di ya hatha vandruye nyo khaguri gasi gu khala madhota, va gombeya ni gu pfhunga, va bwe va va ningeya mandzani ga Jehovha, a gu uye va nga ba va khodwa gwaye.

24 Khavbovbo, va di tsemakanya khu Pisidhiya va beya Panfiliya. 25 Hwane nya gu ba va tshumayede mahungu ya Nungungulu tigoni ga Periga, va di releya va hongola Ataliya. 26 Khiyoyo, va di khileya ngalava va hongola Antiyokiya, a gu iyo va nga lomba gu khavo Nungungulu a kategisa thumo va nga gira.

27 Tepo va nga vboha, va di tshanganisa libandla va va embeya silo nya singi esi Nungungulu a nga gira khu gu thumisa avo ni edzi a nga tuleya khidzo lidimba vanyamayigo gasi gu va khodwa. 28 Avo va di khala tepo nyo laphe ni vapizane.

15 Vama nyo khaguri va di releya khu Judheya, va ta hevbudza vandruye, khavo: “Mwa gu mba hana wugwera* khu guya khu nayo wa Mosi kha mu na nga vbulugiswa.” 2 Ganiolu, hwane nya gu ba Pawulo ni Bharinabha va ganedzisanide ni vama vale khu gu ba vari ni mawonelo nyo hambane navo, vatshavbo va di pwana gu rumeya Pawulo ni Bharinabha gumogo ni vambe va hongola Jerusalema gasi gu ya lulamisa mahungu yaya ni vapostoli ni madhota.

3 Khu kharato, hwane nya gu ba libandla li va vbwegedzide kala wulanga nyo khaguri, vama vava va di simama ni ndziya yawe, va vbindra khu Fenisiya ni Samariya, na va gu tshamuseya vandruye edzi vanyamayigo va nga vbindrugedza khidzo va khodwa nigu vandruye va di gu tsaka tepo va nga ba vapwa isoso. 4 Tepo va nga vboha Jerusalema, va di hakhwa gwadi khu libandla, khu vapostoli ni madhota; va va embeya silo nya singi Nungungulu a nga gira khu gu thumisa avo. 5 Ganiolu, vambe nya tsawa nya Vafarisi va nga ba va vbindrugedzide va khodwa, va di khuga va ganeya, khavo: “Gu vbwetega va haniswa wugwera va bwe va landrisa Nayo wa Mosi.”

6 Khavbovbo, madhota ni vapostoli va di tshangana gasi gu bhula khu mahungu yaya. 7 Hwane nyo manege ni guganedzisana nya gukhongolo khu tepo nyo laphe, Pedro a di khuga a ema, khuye: “Vandruye, mu ngu dziti gwadi gu khenu gukhugeya matshigoni nyo pheye, Nungungulu nyi hathide vbakari gwanu gasi gu embeya vanyamayigo mahungu nya yadi gasi va khodwa. 8 Nigu Nungungulu a tigo myonyo yeyedzide gu khuye a ngu va dzumeya* khu gu va ninga liphuvbo nya guage kha nga edzi a hi ningidego khidzo nethu. 9 Uye kha vega guhambana vbakari gwathu ni avo, ganiolu agiside myonyo yawe khu gukhodwa. 10 Khu kharato, khu ginani enu mu lingago Nungungulu khu gu handzega magatani ga vapizane kanga owu ambari ethu ni vakokwe vathu hi nga mba si kodza gu wu rwala? 11 Ganiolu, ethu hi ngu khodwa gu khethu hi ngu vbulugiswa khu wuwadi wa Pfhumu Jesu gufana ni avo.”

12 Khavbovbo, vatshavbo va di degula va engiseya Bharinabha ni Pawulo na va gu tshamuseya siwoniso ni silewugiso nya singi esi Nungungulu a giredego vanyamayigo khu gu thumisa avo. 13 Hwane nya gu ba va vbedzide gu ganeya, Jakobe a di hakha, khuye: “Vandruye, nyi engiseni. 14 Simiyoni hi embede gu khuye olu Nungungulu a dzumede vanyamayigo gasi gu hatha vbakari gwawe vathu va nga hadzi ranwa khu lina laye. 15 Malito yaya ma ngu pwana ni esi vaprofeti va lovidego, khavo: 16 ‘Hwane nya silo sesi, nyi na wuya nyi ta wusedza nyumba ya Dhavhidhe yi thegidego; nyi na vbahedza marumbi yayo, nyi yi wusedza 17 gasi ava va nga tshala va vbwetedzeya Jehovha khu monyo watshavbo gumogo ni vanyamayigo vatshavbo va ranwago khu lina laye, a ngu ganeya Jehovha, oyu a girago silo sesi 18 si tidwago gukhugeya gale.’ 19 Khu kharato, makungo yangu gu mba lemedziseya giemo vanyamayigo va vbindrugedzago va khodwa ga Nungungulu, 20 ganiolu gu va loveya gasi va dzi hambanisa ni silo si nga nyenyeziswa khu sifananiso, wubhayi,* sirengo si ngafa khu gu dzwinywa ni novba. 21 Gukhugeya gale, mabhuku ya Mosi ma na ni milayo yeyi yi tshumayedwago madhoropani gwatshavbo kholu yi ngu lerwi khu lito nyo khugege dzisinagogani dzisabhadho dzatshavbo.”

22 Khavbovbo, vapostoli ni madhota gumogo ni libandla latshavbo va di hunga gu hatha vama vbakari gwawe va va rumeya Antiyokiya na vari ni Pawulo ni Bharinabha. Va di rumeya Judha a nga ba a ranwa gu pwani khu Bharisabha gumogo ni Silasi, va nga ba vari vama va nga ba va thangeya vbakari nya vandruye. 23 Va di lova lidangaliya leli, va va rumeleya khu gu thumisa avo, khavo:

“Vandriyanu, vapostoli ni madhota va ngu mi rumeleya malosedzeya enu vandruye mu gu va mambe mayigo mu gomogo Antiyokiya ni Siriya ni Silisiya. 24 Hi pwide gu pwani gu dugide vambe vbakari gwanu va mi gireya sigaradzo khiso va nga ganeya, va zama gu mi ndreyisa ndziyani, ganiolu ethu kha ha va ruma gilo. 25 Khu kharato, hi hungide gu hatha vama nyo khaguri hi mi rumeleya gumogo ni sigodwa sathu Bharinabha ni Pawulo, 26 vama va ningedego womi wawe khu kotani nya lina la Pfhumu yathu Jesu Kristo. 27 Khu kharato, hi mi rumelede Judha ni Silasi gasi va ta mi tshamuseyani silo sesi khu likana. 28 Liphuvbo nya guage ni ethu hi wonide gu khethu tshukwana hi si mi rwegini silo nya gu lemeye vbavbandze nya silo sesi si vbwetegago: 29 Simamani gu dzi hambanisa ni silo si phasedwego sifananiso, novba, sirengo nya gufe khu gu dzwinywa ni wubhayi. Mwa gu landrisa milayo yeyi, mu na vbanya gwadi. Hakhani malosedzeya yathu!”

30 Hwane nya gu ba va khugide khu vbale, va di releya Antiyokiya, va ya tshanganisa tsawa watshavbo va va ninga lidangaliya. 31 Hwane nya gu ba va li leride, va di tsaka khu gu ba va tiyisidwe. 32 Kha nga olu Judha ni Silasi anavo va nga ba vari vaprofeti va di tiyisa vandruye khu dziganelo nya dzingi. 33 Hwane nya gu ba va khade tepo nyo khaguri eyi, va di tshadzisana ni vandruye, va bweleya khu gurula ga ava va nga va rumeya. 34 *—— 35 Ganiolu, Pawulo ni Bharinabha va di khala Antiyokiya gumogo ni vambe vathu, va hevbudza ni gu tshumayela mahungu nya yadi ya Jehovha.

36 Hwane nya matshigu nyo khaguri, Pawulo a di embeya Bharinabha, khuye: “Hongole hi bweleya hi ya wuseya vandruye madhoropani gwatshavbo hi nga tshumayela mahungu ya Jehovha hi ya va wona gu khethu vomo kharini.” 37 Bharinabha a di gu vbweta gu khuye va hongola ni Johane, oyu a nga ba a ranwa gu pwani khu Marko. 38 Ganiolu, Pawulo kha nga ba a dzina gu khuye va hongola ni Johane kholu a di gu va digide Panfiliya nigu a diri mwalo navo tepo va nga gira thumo wowu. 39 Khu kharato, va di manega ni gu ganedzisana nya gukhongolo avba nya gu va hegisa khu gu hambana. Bharinabha a di dzega Marko va beya ngalava va hongola Kipre. 40 Hwane nya gu ba vandruye va gombede ga Jehovha gasi a yeyedza wuwadi waye ga Pawulo, Pawulo a di hatha Silasi va hongola. 41 Va di vbindra khu Siriya ni Silisiya na va gu tiyisa mabandla.

16 Pawulo a di vboha Dherbhe, a ya vbindra a hongola Listra. Iyoyo gu diri ni mupizane moyo nyo pwani khu Thimoti, gyanana gya nyamayi moyo nya Mujudha a nga ba a khodwe, ganiolu papayi waye a diri Mugreki. 2 Vandruye va Listra ni Ikoniya va di gu ganeya gwadi khuye. 3 Pawulo a di gu vbweta gu khuye Thimoti a hongola naye, khu kharato, a di mu hanisa wugwera* khu kotani nya Vajudha va mule, kholu va di gu dziti gu khavo papayi waye a diri Mugreki. 4 Tepo va nga ba va vbindra khu madhoropani, va di gu embeya vandruye esi si hungidwego khu vapostoli ni madhota va nga ba vari Jerusalema, gasi va si landrisa. 5 Khu kharato, mabandla ma di gu simama gu tiyiswa gukhodwani nigu ma di gu engedzeya tshigu ni tshigu.

6 Va di vbindra khu Firijiya ni Galatiya kholu liphuvbo nya guage li di gu va himbedzede gu tshumayela mahungu ya Nungungulu provhinsiya ya Aziya. 7 Nigu tepo va nga releya Misiya, va di zama gu beya Bhitiniya, ganiolu Jesu a di va himbedzeya khu gu thumisa liphuvbo a nga hakha khiyo ga Papayi waye. 8 Khu kharato, va di vbindra khu Misiya va releya Trowadhe. 9 Ni wutshigu, khomu nya giwoniso, Pawulo a di wona mwama moyo wa Makedhoniya na emide. Mwama wule a di lomba Pawulo, khuye: “Delu Makedhoniya u ta hi phasa.” 10 Hwane nya gu ba Pawulo a wonide giwoniso, hi di zama gu hongola Makedhoniya, na hi gu tumba gu khethu Nungungulu a di hi rana gasi hi ya va tshumayela mahungu nya yadi.

11 Khu kharato, hi di khileya ngalava khu Trowadhe hi hongola Samotarasiya. Ganiolu, khu litshigu li nga landreya, hi di hongola Neyapoli. 12 Khiyoyo hi di hongola dhoropani ga Filipi, a gu lidhoropa nya likhongolo la Makedhoniya li nga ba li fumwa khu Varoma. Hi di khala dhoropani momo matshigu nyo khaguri. 13 Khu litshigu nya Sabhadho, hi di duga khu dhoropani hi hongola bambe nya tsongo, na hi gu pimisa gu khethu gu diri ni wulanga nyo gire avbo milombelo. Hi di ya khala, hi pheya gu ganeya ni vanyamayi va nga ba va tshanganide vbale. 14 Vbale, gu diri ni nyamayi moyo wa dhoropani ga Tiyatira nyo pwani khu Lidhiya, a nga ba a rengisa sombo nyo dhure* nigu a diri mukhozeyi wa Nungungulu. Uye a di gu engiseya. Jehovha a di tula monyo wa nyamayi wule gasi a vega gupima avba nya esi Pawulo a nga ba a ganeya. 15 Hwane nya gu ba uye ni vandrangani gwaye vatshavbo va bhabhatisidwe, a di lomba, khuye: “Mwa gu ba mu nyi wona na nyi gu tumbegide ga Jehovha, deluni mu ta khala gaya gwangu.” A di hi gurumedza gu hongola naye.

16 Litshigu limwedo na hi gu hongola wulanga nyo gombeye, hi di tedwa khu nyamahegyane moyo a nga ba ari githumi; a nga ba ari ni lidhimoni nya wutumbe. Uye a di gu ghanyisa ngudzu vatholi vaye, kholu a di gu kodza guti silo nya wumindru. 17 Nyamahegyane yoyu a di gu landriseya ethu ni Pawulo, na gu ganeya khu lito nyo khugege, khuye: “Vama vava sithumi sa Nungungulu a Khugegidego Ngudzu nigu va gu mi tivisa ndziya nya guvbulugise.” 18 Uye a di gira isoso khu matshigu nya mangi. Khavbovbo, Pawulo a di garala khiso, a thendregedza a embeya liphuvbo lile, khuye: “Nyi ngu gu ruma khu lina la Jesu Kristo gu kheni: Duga gwaye.” Liphuvbo lile li di dzegeya gu duga.

19 Tepo vatholi va nyamahegyane wule va nga wona gu khavo nogosi yi vbede, va di mola Pawulo ni Silasi va va ndrindra-ndrindra kala merkadhu, va ya va ningeya ga dzipfhumu. 20 Va di va yisa ga dzipfhumu nya lidhoropa, va ya khavo: “Vama vava va gu wusa pfilupfilu dhoropani. Avo Vajudha 21 nigu va gu huweleya siolovedzo esi ethu hi si yeligo gu si hakha mwendro gu si landrisa kha nga olu hi gu Varoma.” 22 Gitshungu gyatshavbo gi di va wugeya. Dzipfhumu nya lidhoropa dzi di va tshula sombo,* dzi rumisa gu khidzo va kwamudwa khu mapitso. 23 Hwane nya gu va vete ngudzu, dzi di va khotheya pasoni, dzi ruma ghwardha nya lipaso gu va ghadha gwadi. 24 Tepo a nga embedwa isoso, a di va dzega a ya va khotheya wulanga wu nga ba wu romo khu ndrani nya lipaso, a va hunga mawundru avba nya gighodho.

25 Ganiolu, ni vbakari nya wutshigu, Pawulo ni Silasi va di gu gombeya ni gu dhumisa Nungungulu khu dzindzimo. Va di gu pwidwa khu sibotshwa. 26 Khu githugedza, gu di manega girevareva nya gikhongolo gi nga kutsunga lipaso, malimba yatshavbo nya lipaso ma tulega, dzikorenti dza vatshavbo dzi tshulega. 27 Tepo ghwardha yi nga wuga, yi wona gu khiyo malimba nya lipaso ma tulegide, yi di dzega xipadha yi vbweta gu dzi songa na yi gu pimisa gu khiyo sibotshwa si tutumide. 28 Ganiolu, Pawulo a di khusedza lito, khuye: “U nga dzi songi, hatshavbo hi womo avba!” 29 Khavbovbo, ghwardha yile yi di lomba gu khiyo yi resedwa kandriya, yi beya khu gu tutuma na yi gu ndrendremeya, yi ya khidzima mbeli ga Pawulo ni Silasi. 30 Yi di duga navo vbavbandze, yi ya va wudzisa, khiyo: “Ginani nyi yedego gu gira gasi nyi vbulugiswa?” 31 Va di hlamula, khavo: “Khodwa ga pfhumu Jesu, uwe ni ndranga yago mu na vbulugiswa.” 32 Va di mu embeya mahungu ya Jehovha uye ni ndranga yaye yatshavbo. 33 Ni wutshigu wowo, a di va dzega a ya va handza silondra. Khavbovbo, uye ni ndranga yaye yatshavbo, va di bhabhatiswa nya mba hweya. 34 A di va dzega a hongola navo gaya gwaye a ya va dongiseleya gilo nyo hodze. Uye ni vandrangani gwaye va di tsaka ngudzu khu gu ba va khodwe ga Nungungulu.

35 Tepo gu ngagya, dzipfhumu nya lidhoropa dzi di rumeya dzighwardha gasi gu ya embeya ghwardha yile nya lipaso, khavo: “Tuleya vama vovo.” 36 Ghwardha yile nya lipaso yi di embeya Pawulo, khiyo: “Dzipfhumu nya lidhoropa dzi nyi rumide gu khidzo nyi mi tuleya mwavavili. Dugani olu kamo mu hongola khu gurula.” 37 Ganiolu, Pawulo a di va embeya, khuye: “Avo va hi vetide na hi wonwa khu vathu, nya mba hi lamula. Va hi khotheya pasoni nari gu hi Varoma. Olu vo hi tuleya gusihalani? Isoso kha si pwali! Va nate avo va ta hi dusa.” 38 Dzighwardha dzile dzi di ya embeya malito yaya ga dzipfhumu nya lidhoropa. Tepo dzipfhumu nya lidhoropa dzi ngapwa gu pwani vama vale va diri Varoma, dzi di thava ngudzu. 39 Khu kharato, dzipfhumu dzile dzi di hongola dzi ya va lomba divalelo. Khavbovbo, dzi di duga navo vbavbandze, dzi ya va lomba gu khidzo va duga khu dhoropani mule. 40 Tepo Pawulo ni Silasi va nga duga khu pasoni, va di hongola gaya ga Lidhiya. Tepo va nga wona vandruye, va di va tiyisa, khu hwane nya isoso va di khuga va hongola.

17 Va di vbindra khu Anfipoli ni Apoloniya, va vboha Tesalonika, gu nga ba guri ni sinagoga nya Vajudha. 2 Kha nga giolovedzo gyaye, Pawulo a di beya sinagogani a ya bhula navo khu Milowo. Uye giride isoso khu dzisabhadho dziraru. 3 A di gu tshamuseya ni gu va yeyedza guya khesi si lovidwego gu khuye si di gu vbwetega gu Kristo a tshaniseka a bwe a wuswa khu ga vafudego, a di gu va embeya, khuye: “Jesu yoyu nyi ganeyago khuye gwanu khuye Kristo.” 4 Khu kotani nya isoso, vambe vbakari gwawe va di khodwa va dzi pata ni Pawulo ni Silasi nigu Vagreki nya vangi va nga ba va khozeya Nungungulu va di gira sasimweso, gumogo ni vanyamayi nya vangyana nyo thavisege.

5 Ganiolu, Vajudha va dipwa lidiwo, khu kharato, va di tshanganisa vama nyo khaguri va nga ba va vivbedwe khu monyo, va nga ba va legalega merkadhu, va wumba tsawa, va wusa pfilupfilu dhoropani. Va ya dhumeya ndranga ya Jasoni na va gu vbweta Pawulo ni Silasi gasi gu va dusa vbavbandze va ta va nigeya ga gitshungu. 6 Kha nga olu va nga ya va hamuga, va di ndrindra-ndrindra Jasoni, va hongola naye ga dzipfhumu nya lidhoropa, na va ganeya khu lito nyo khugege, khavo: “Vama vale va wusago pfilupfilu mafuni gwatshavbo, va vbohide ni omu gwathu 7 nigu Jasoni va hakhide gaya gwaye. Vama vava vatshavbo kha va landrisi milayo ya Sezari kholu vari khavo yomo yimbe pfhumu a gu Jesu.” 8 Tepo gitshungu ni dzipfhumu nya lidhoropa va ngapwa isoso, va di dzuwega mapimo; 9 va di livbisa multa Jasoni ni ava a nga ba ari navo, va va diga va hongola.

10 Tepo li nga pfola, vandruyi va di rumeya Pawulo ni Silasi va hongola Bhereya. Tepo va nga vboha iyoyo, va di beya sinagogani nya Vajudha. 11 Vathu va Bhereya va di gu dzi emisede gu hevbula guvbindra vathu va Tesalonika, kholu avo va di hakha khu monyo wawe watshavbo mahungu ya Nungungulu nigu va di gu gevisisa gwadi Milowo tshigu ni tshigu gasi gu wona gu khavo satshavbo esi va nga sipwa lisine gani. 12 Khu kharato, vathu nya vangi va di khodwa, gupata ni vanyamayi nya vangyana nyo thavisege nya Vagreki ni vama nyo khaguri. 13 Ganiolu, tepo Vajudha va Tesalonika va ngati gu khavo Pawulo a di gu tshumayela mahungu nya yadi Bhereya, va di hongola iyoyo gasi gu ya kutsedzeya gitshungu gu wusa pfilupfilu. 14 Khavbovbo, vandruye va di embeya Pawulo gu khavo a hongola siwoni khu guvbiredza, ganiolu Silasi ni Thimoti va di tshala. 15 Avo va nga ba va vbwegedza Pawulo, va di hongola naye kala Atena, khavbovbo va di wuya ni mwangu nya gu te embeye Silasi ni Thimoti, gasi va ya manana ni Pawulo khu guvbiredza.

16 Tepo Pawulo a nga ba a va vireya dhoropani ga Atena, a di goroga ngudzu khu gu wona gu khuye lidhoropa lile li di tade khu sifananiso. 17 Khavbovbo, a di pheya gu bhula ni Vajudha sinagogani ni vambe vathu va nga ba va khozeya Nungungulu nigu tshigu ni tshigu a di gu bhula ni vathu a nga ba a va mana merkadhu. 18 Ganiolu, vafilosofo nyo khaguri va Epikuru ni va Estoyiku va di pheya gu ganedzisana naye, vambe va di gu khavo: “Ginani a ganeyago nya libwabwa yoyu?” Vambe khavo: “Khatshi mutshumayeli nya vanungungulu nya mambe mayigo.” Avo va di gu ganeya isoso kholu a di gu tshumayela mahungu nya yadi maningano ni Jesu ni guwuswa ga ava vafudego. 19 Khavbovbo, va di mu dzega va hongola naye Areyopagu* va ya khavo: “Nga hi tshamuseya sihevbudzo sesi nya siphya, 20 kholu wo ganeya khu silo hi gu mba siti kholu ho vbweta guti gukhethu so thula ginani.” 21 Vathu vatshavbo va Atena ni vathu nya mambe mayigo va nga ba va vbanya iyoyo va di gu thumisa tepo va nga ba va si thumi gilo gasi gu ganeya ni gu engiseya mahungu nya maphya. 22 Khavbovbo, Pawulo a di khuga a ema vbakari nya Areyopagu a ganeya, khuye:

“Vathu va Atena, nyi ngu si wona gu kheni enu mu ngu ninga ngudzu githawo vanungungulu gu vbindra vambe vathu. 23 Khu giyeyedzo, tepo nyi nga ba nyi gimbiya nyi khedza gwadi vanungungulu mu va khozeyago, nyi wonide alitari yi nga ba yi lovidwe gu pwani: ‘Ga Nungungulu hi gu mba muti.’ Nungungulu yoyu mu gu mba muti khuye nyi mi hevbudzago khuye muhuno. 24 Nungungulu a nga gira mafu ni satshavbo si gomogo mafuni, Pfhumu ya ndzadzini ni mafuni, uye kha vbanyi omu nya dzitempele dzi giridwego khu mandza nya vathu, 25 ne kha si lombi gu a thumedwa khu mandza nya vathu nga khatshi somo si mu keneleyago kholu khuye a ningago womi vatshavbo, liphuvbo va hefemulago ni silo satshavbo. 26 Khu gu thumisa muthu moyo basi, tumbulugiside mafumbo yatshavbo nya vathu, gasi va vbanya mafuni gwatshavbo, a vegisa dzinango a bwe a vega mivbingano nya guvbahe umo vathu, 27 gasi va vbwetedzeya Nungungulu ambari khu gu mu phuphuteya va mu mana ambari olu a gu mwalo hwindzo ga moyo ni moyo wathu. 28 Khu kotani yaye hi na ni womi nigu hi ngu gimbiya, hi ngu vbanya, kha nga si ganedwego khu vambe nya valovi vanu, khavo: ‘Kholu anethu hi sanana* saye.’

29 “Khu kharato, kha nga olu hi gu sanana sa Nungungulu, kha hi yeli gu pimisa gu khethu Nungungulu a ngu fana ni oru ni prata mwendro giwindri. Kha hi yeli gambe gu pimisa gu khethu a ngu fana ni gilo gi vatidwego khu wugengeyi nya muthu. 30 Lisine gu Nungungulu kha theya kota khu dzitepo dzodzo va nga ba va siti gilo, ganiolu olu a ngu embeya vatshavbo, malangani yatshavbo gu khuye va yede gu dzi laya. 31 Kholu, uye vegiside litshigu a na lamulago mafu yatshavbo khu gululama, khu gu thumisa oyu a mu hathidego; uye ningide vathu vatshavbo gitiyisegiso nya isoso khu gu mu wusa khu ga vafudego.”

32 Tepo va nga mupwa na gu ganeya khu guwuswa ga ava vafudego, vambe va di mu hega, vambe va ganeya, khavo: “Hi na ta gu engiseya limbe litshigu na wu ganeya khu mahungu yaya.” 33 Khavbovbo, Pawulo a di khuga a hongola, 34 ganiolu vambe va di dzi pata naye va khodwa. Vbakari gwawe a di gu romo Dhiyonizyo a nga ba ari mulamuli wa tribhunali ya Areyopagu ni nyamayi moyo nyo pwani khu Dhamarisa ni vambe.

18 Hwane nya isoso, Pawulo a di khuga khu Atena a hongola Korinto. 2 Iyoyo a di ya manana ni Mujudha moyo nyo pwani khu Akila, givelegwa gya Pontu, a nga ba a ngari guta khu Italiya ni mwangadzi waye Prisila, kholu Klawudhiyo a di rumide gu khuye Majudha yatshavbo ma duga khu Roma. Khu kharato, Pawulo a di ya patana navo. 3 Kha nga olu va nga ba va gira thumo nyo fane, uye a di ya khala ndrangani gwawe a thuma navo kholu vatshavbo va diri vagiri nya matendra. 4 Dzisabhadho dzatshavbo a di gu vega ganelo sinagogani nigu a di gu gira gu Vajudha ni Vagreki va khodwa.

5 Tepo Silasi ni Thimoti va nga vboha, na va guta khu Makedhoniya, Pawulo a di thumisa tshivba yaye yatshavbo gasi gu tshumayela mahungu ya Nungungulu a ningeya wufakazi Vajudha gasi gu va yeyedza gu khuye Jesu khuye Kristo. 6 Kha nga olu va nga ba va simama gu mu wugeya ni gu mu vala, Pawulo a di phuphutha sombo saye, khuye: “Novba wanu wu na mi thegeye enu vamune, eni nyi agide, gukhugeya olu nyi na hongola ga vanyamayigo.” 7 Khavbovbo, uye a di khuga khu vbale a ya beya ndrangani ga mwama moyo nyo pwani khu Tisiyu Justo a nga ba ari mukhozeyi wa Nungungulu; gaya gwaye gu diri khu bambe nya sinagoga. 8 Ganiolu, Krispo muthangeyi nya sinagoga gumogo ni ndranga yaye yatshavbo va di khodwa ga Pfhumu nigu vathu va Korinto va ngapwa mahungu ya Nungungulu va di khodwa va bhabhatiswa. 9 Ni vbawutshigutunu, Pfhumu yi di embeya Pawulo khomu nya giwoniso khiyo: “U nga thavi, simama gu ganeya u nga deguli, 10 kholu nyi nago, mwalo a na gu wugeyago gasi gu gu gireya guvivba; vathu nya vangi dhoropani momu va ngu nyi lumba.” 11 Uye a di khala iyoyo mwaga ni 6 migima na gu va hevbudza mahungu ya Nungungulu.

12 Tepo Ghaliyo a nga ba ari ghovhernadhori wa Akaya, Vajudha va di pwanana va wugeya Pawulo, va mu dzega va mu yisa tribhunali, 13 va ya khavo: “Mwama yoyu o kutsedzeya gitshungu gu khozeya Nungungulu khu ndziya yi hambanago ni nayo.” 14 Ganiolu, tepo Pawulo a nga ba a vbweta gu ganeya, Ghaliyo a di embeya Vajudha, khuye: “Nari khatshi isoso si diri silo nyo vivbe mwendro nandru nya wughevenga na nyi gu mi engiseya. 15 Ganiolu, abari guganedzisana khu kotani nya malito, khu kotani nya malina ni kotani nya nayo wanu, si woneni enu vamune. Kha nyi vbweti gu khala mulamuli nya silo soso.” 16 Khavbovbo, a di va tutumisa khu tribhunali. 17 Khu kharato, avo va di mola Sostene a nga ba ari muthangeyi nya sinagoga, va mu veta mbeli nya tribhunali. Ganiolu, Ghaliyo kha nga vbweta gu dzi bedza omu nya silo soso.

18 Hwane nya gu ba Pawulo a khade matshigu nyo khaguri vbale, a di tshadzisana ni vandruye a khileya ngalava a hongola Siriya nari ni Prisila ni Akila. Tepo va nga vboha Senkreya, Pawulo a di piya ndzudzu kholu a di gu giride gifungo. 19 Khu kharato, tepo va nga vboha Efeso, Pawulo a di va tshiya avbovbo uye a beya sinagogani a pheya gu bhula ni Vajudha. 20 Ambari olu va nga ba va mu lomba gu khavo a simama navo khu tepo nyo khaguri, uye kha dzumeya. 21 Ganiolu, a di tshadzisana navo a va embeya, khuye: “Jehovha a gu nyi dzumeleya nyi na wuya gambe.” Khavbovbo, a di beya ngalava khu Efeso 22 a hongola Sezareya. A di gweya* a ya losana ni libandla khu gu landreya a releya Antiyokiya.

23 Hwane nya gu ba a khade iyoyo tepo nyo khaguri, a di khuga a vbindra khu madhoropani yatshavbo ya Galatiya ni Firijiya na gu tiyisa vapizane vatshavbo.

24 Mwama moyo nya Mujudha nyo pwani khu Apolo, givelegwa gya Alexandriya, a di vboha Efeso. Uye a diri mwama a nga ba ari ni ningo nyo ganeye gwadi, nigu a di gu yiti gwadi Milowo. 25 Mwama yoyu a di hevbudzidwe ndziya ya Jehovha nigu a di gu vbisa khu liphuvboni; a di gu ganeya ni gu hevbudza gwadi maningano ni Jesu, ganiolu a di guti gubhabhatisa ga Johane basi. 26 Uye a di pheya gu ganeya khu gutiya-hwambo sinagogani. Tepo a nga pwidwa khu Prisila ni Akila, va di mu rana khu phuvbo va ta mu tshamuseya gwadi ndziya ya Nungungulu. 27 Nigu kha nga olu a nga ba a vbweta gu hongola Akaya, vandruye va di loveya vapizane va Akaya va va lomba gu khavo va mu hakha gwadi. Tepo a nga vboha iyoyo, phaside ngudzu ava va nga ba va vbindrugedzide va khodwa khu kotani nya wuwadi wa Nungungulu; 28 kholu a di gu ganedza Vajudha guagani na tiyide gukhuye esi va nga ba va ganeya kha sa nga ba siri lisine a bwe a va yeyedza khu gu thumisa Milowo gukhuye Jesu khuye Kristo.

19 Tepo Apolo a nga ba ari Korinto, Pawulo a di vbindra khu malangani ma nga ba ma manegeya hwindzo ni linene a releya Efeso. Iyoyo a di ya manana ni vapizane, 2 a va wudzisa, khuye: “Ina mu hakhide liphuvbo nya guage tepo mu nga khodwa?” Avo va di hlamula, khavo: “Gima hi si gupwi na gu ganedwa khu liphuvbo nya guage.” 3 Khavbovbo, a di va wudzisa, khuye: “Bhabhatiso muni mu nga bhabhatiswa khuwo?” Avo va di mu hlamula, khavo: “Bhabhatiso wa Johane.” 4 Pawulo a di va hakha, khuye: “Gubhabhatisa ga Johane gu diri giyeyedzo nya gudzilaye. Uye a di gu embeya vathu gu khuye va di yede gu khodwa ga oyu a nga hadzi guta hwane gwaye, a gu Jesu.” 5 Tepo va ngapwa isoso, va di bhabhatiswa khu lina la Pfhumu Jesu. 6 Tepo Pawulo a nga va handzega mandza, liphuvbo nya guage li di va tshigeya, va pheya gu ganeya gu malimi nyo hambane-hambane ni gu profeta. 7 Iyoyo gu diri ni tanga nya 12 vama.

8 Ndrani nya migima miraru, Pawulo a di gu beya sinagogani, a ganeya khu gu tiya ni gu vega dziganelo ni gu zama gu gira vathu va khodwa avba nya Mufumo wa Nungungulu. 9 Ganiolu, kha nga olu vambe va nga ba va dzi bangisa mihungo, va bomba gu khodwa va bwe va ganeya guvivba maningano ni Ndziya* na va gu pwidwa khu vathu, Pawulo a di va diga, a dzega vapizane a duga navo. Tshigu ni tshigu a di gu vega dziganelo salani nya Xikola ya Tiramu. 10 Pawulo vbedzide myaga mivili na gu gira isoso, kala Vajudha ni Vagreki vatshavbo va nga ba va vbanya pronvhisiya ya Aziya vapwa mahungu ya Pfhumu.

11 Nungungulu a di gu gira silewugiso nya sikhongolo khu gu thumisa Pawulo 12 avba nya gu ambari ga gu dzegwa dzilesu ni sombo si nga ba si kuhwa khuye, va si yisa ga vadwali, avo va di gu hawuluga nigu madhimoni ma di gu duga gwawe. 13 Ganiolu, Vajudha nyo khaguri va nga ba va legalega na va gu tutumisa madhimoni, anavo va di gu zama gu tutumisa madhimoni khu gu thumisa lina la Pfhumu Jesu, khavo: “Hi ngu mi ruma khu lina la Jesu, oyu Pawulo a tshumayelago maningano naye gu khethu: Dugani!” 14 Moyo nya muprista nya khongolo nyo pwani khu Sevha, a nga ba ari Mujuda, a diri ni 7 sanana si nga ba si gira niso isoso. 15 Ganiolu, lidhimoni lile li di va hakha, khilo: “Jesu nyi ngu muti nigu anuye Pawulo nyi ngu muti. Enu ke, khenu vamani?” 16 Khavbovbo, mwama wule a nga ba ari ni lidhimoni, a di va ndrageya, a va saseya khu moyo ni moyo, a va pala. Vama vale va di duga khu nyumbani mule khu gututuma na va bayisedwe, na vari wumbwiri. 17 Isoso si di tidwa khu Vajudha ni Vagreki vatshavbo va nga ba va vbanya Efeso. Vatshavbo va di tala khu hwanga nigu lina la Pfhumu Jesu li di simama gu dhumiswa. 18 Nya vangi va nga ba va khodwe, va di guta va ta dawuleya guagani sighoho sawe satshavbo. 19 Nya vangi va nga ba va gira silo nya wuloyi* va di resa mabhuku yawe va ta ma vbisa na va gu wonwa khu vatshavbo. Mabhuku yatshavbo ma nga vbiswa ma di gu ningana tengo nya 50 mil singerengere nya prata. 20 Khu kharato, mahungu ya Jehovha ma di gu andra, ma tiya khu tshivba.

21 Hwane nya satshavbo sesi, Pawulo a di hunga gu khuye hwane nyo vbindre khu Makedhoniya ni Akaya a na hongola Jerusalema. A di khuye: “Hwane nyo hongole Jerusalema, nyi na hongola gambe Roma.” 22 Khavovbo, a di rumeya Makedhoniya vaphasedzeyi vaye vavili, a gu Thimoti ni Erasto, ganiolu uye a di simama provhinsiya ya Aziya khu tepo nyo khaguri.

23 Khu tepo yoyo, gu di manega pfilupfilu nya yikhongolo khu kotani nya Ndziya.* 24 Mwama moyo nyo pwani khu Dhemetriyo a nga bari mupfhuli nya prata, a di gu gira sitempelyana sa Aritemiza* khu gu thumisa prata nigu a di gu ghanyisa vathu nya vangi a nga ba a thuma nayo. 25 A di va tshanganisa gumogo ni vambe vameseri va nga ba va gira thumo wawumowo, a va embeya khuye: “Vama-khwathu, mu ngu dzitini gwadi gu khenu satshavbo hi gu naso ha gu si mana kotani nya thumo wowu. 26 Mu ngu si wona ni gu sipwa esi mwama yoyu nyo pwani khu Pawulo a gimbiyago a gira Aziya gwatshavbo, nasiri Efeso basi. Uye o gimbiya a hevbudza gu khuye vanungungulu nyo girwe khu mandza nya vathu, khandri vanungungulu nya lisine nigu a ngu ndreyisa vathu nya vangi va landreya mawonelo yaye. 27 Esi si na gira mhango nya yikhongolo kholu khandri nogosi yathu basi yi na thegago, ganiolu tempele ya nungungulu nya khongolo Aritemiza, kha yi na nga ningwa lisima nigu provhinsiya yatshavbo ya Aziya ni mafuni gwatshavbo kha va na nga mu khozeya gambe ni gu mu ninga wudhumo.” 28 Tepo vama vale va ngapwa isoso, va di goroga ngudzu, va khusedza lito, khavo: “Aritemiza nungungulu wa Vaefeso, khongolo!”

29 Khavbovbo, pfilupfilu yi di phalalega dhoropani gwatshavbo. Vatshavbo va di beya nyumbani nya mihagano na va gu ndrindra-ndrindra Ghayo ni Arisitariko va Makedhoniya, avo va nga ba va gimbiya-gimbiya ni Pawulo. 30 Pawulo a di gu vbweta gu beya a dzi wonegisa vbakari nya vathu, ganiolu vapizane kha va mu dzumeleya. 31 Vathangeyi nyo khaguri nya dzifesta ni mihagano va nga ba vari dzipari dza Pawulo, va di mu rumeleya mwango na va gu khavo a nga dzi bedzi mhangoni khu gu beya nyumbani nya mihagano. 32 Pfilupfilu yi diri yikhongolo vbakari nya vathu. Muthu ni muthu a di gu ganeya dzaye nigu nya vangi kha va nga ba va giti egi va nga tshanganisedwa igyo. 33 Khu kharato, vambe va di embeya Alexandre gu khavo a na ganeye. Vajudha va di mu rindrividza a hongola mbeli, ganiolu Alexandre a di khusedza libogo kholu a di gu vbweta gu dzi emeya vbakari nya gitshungu. 34 Ganiolu, Tepo va nga tugula gu khavo a diri Mujudha, vatshavbo va di gulumeya khu lito limwedo, khu gipimo nya dziora dzimbili, khavo: “Aritemiza nungungulu wa Vaefeso khongolo!”

35 Hwane nya gu ba adhiministradhori nya lidhoropa a kodzide gu degudza gitshungu, a di khuye: “Vathu va Efeso, vatshavbo va ngu dziti gu khavo lidhoropa la Efeso khilo li khathaleyago tempele ya nungungulu nya khongolo Aritemiza ni gifananiso gi nga thega khu ndzadzini. 36 Kha nga olu a gu mwalo muthu a kodzago gu ganedza silo sesi, simamani na mu rude, mu si giri silo khu makolo. 37 Enu mu reside avba vama vava nya gu ne khandri dzimbafa nya tempele, ne kha va vali nungungulu wathu. 38 Khu kharato, abari gu Dhemetriyo ni ava a thumago navo vo vbweta gu ketsari muthu nyo khaguri, gu nani matshigu aya tribhunali yi tshanganago khayo nigu gu na ni vaghovhernadhori gambe; va na hongole va ya theya dziketso dzawe khu matshigu yoyo. 39 Ganiolu, mwa gu ba muri ni simbe nya gu vbindre avbovbo, si yede gu lamudwa tshanganoni nya wukhongolo wu emisidwego guya khu nayo, 40 kholu ethu hi ngu landra gu ningwa nandru nyo pwani hi wuside pfilupfilu khu kotani nya esi si dugeledego muhuno; hi na bwe hi hamuga ni gilo nyo dzi emeleye khigyo.” 41 Hwane nya gu ba a ganede isoso, a di phalalegisa vathu.

20 Tepo pfilupfilu yi nga vbeya, Pawulo a di ranisa vapizane, hwane nya gu ba a va tiyiside, a di tshadzisana navo a hongola Makedhoniya. 2 A di vbindra khu malangani yatshavbo a tiyisa ngudzu vapizane, khu hwane nya isoso a di vboha Gresiya. 3 Uye a di khala iyoyo migima miraru. Tepo a nga ba ari vbafuvbi ni gu khileya ngalava a hongola Siriya, Vajudha va di hunga makungo nya gu mu songe, khu kharato a di hunga gu wuya khu ndziya ya Makedhoniya. 4 A diri ni Sopatrosi, gyanana gya Pirusi wa Bhereya, ni Arisitariko ni Sekundo va Tesalonika, Ghayo wa Dherbhe, Thimoti ni Tikiko ni Trofimo va nga ba vari va pronvhisiya ya Aziya. 5 Vama vava va di thanga va ya hi vireya Trowadhe. 6 Hwane nya gu ba ma vbindride matshigu nya Dzipawu nya mba thedwa Livhirina* hi di vboha dhoropani ga Filipi nigu hwane nya 5 matshigu hi di ya manana Trowade, iyo hi nga khala 7 matshigu.

7 Khu litshigu nyo pheye nya semana, tepo hi nga ba hi tshanganide na hi gu hodza, Pawulo a di pheya gu ganeya ni avo va nga ba va romo vbale kha nga olu khu mindru gakone a nga hadzi hongola; uye a di ganeya navo khu tepo nyo laphe kala ni vbakari nya wutshigu. 8 Gu diri ni dzikandriya nya dzingi salani ya vbatshani omu hi nga ba hi tshanganide. 9 Tepo Pawulo a nga ba a ganeya, gikhwathana gimwegyo nyo pwani khu Ewutiko, gi nga ba gi khade khu vbajanelatunu gi di wongomedwa khu ligovbe. Igyo gi di padwa khu ligovbe, gi thega khavba nya andari nya wuraru, va ta gi mana na gi fude. 10 Pawulo a di tshiga a ya noga a gi wugareya, khuye: “Mu nga garadzegi kholu gi ngu vbanya.” 11 Pawulo a di bweleya gambe nyumbani a ya piya pawu a hodza. Uye a di simama gu bhula khu tepo nyo laphe kala gugya, hwane nya isoso a di hongola. 12 Khavbovbo, va di dzega gikhwathana gile va hongola nagyo na gi gu vbanya, isoso si di va thaveleya ngudzu.

13 Ethu hi di thanga khu navhiyu hi hongola Asosi, iyo Pawulo a nga ganeya gu khuye hi ya mu vireya avbo kholu uye a di dzi emisede gu hongola iyoyo khu mawundru. 14 Tepo Pawulo a nga ta hi mana Asosi, a di khileya nuye navhiyu hi hongola dhoropani ga Mitileni. 15 Khu mindru gakone, hi di khuga khiyoyo hi vboha vbafuvbi ni Kiyosi. Khu litshigu li nga landreya, hi di emanyana Samosi; khu litshigu nya wuraru hi vboha Mileto. 16 Pawulo kha nga ba a dzina gu ema Efeso khu gu thava gu hweya ngudzu pronvhisiya ya Aziya kholu a diri ni givbiredza nyo vbohe Jerusalema khu litshigu nya Festa nya Pentekosta so kodzega.

17 Khu kharato, tepo a nga ba a romo Mileto a di ranisa madhota nya libandla la Efeso. 18 Tepo madhota yoyo ma nga vboha, a di ma embeya, khuye: “Enu mu ngu mati gwadi mavbanyelo nyi vbanyidego khayo vbakari gwanu gukhugeya litshigu nyo pheye nyi gandridego pronvhisiya ya Aziya. 19 Nyi thumede Pfhumu khu gu dzinogisa gwatshavbo ni marongo na nyi gu tshaniseka khu kotani nya makungo aya Vajudha va nga ba vari nawo khu eni, 20 ganiolu kha nya diga gu mi embeya esi si nga hadzi mi phasa nigu gambe kha nya diga gu mi hevbudza guagani ni gu mi hevbudza khu ndranga ni ndranga. 21 Nyi hevbudzide Vajudha ni Vagreki khu ndziya nyo vbeleye gu kheni va di yede gu dzi laya va wuya ga Nungungulu ni gu bwe va khodwa avba ga Pfhumu yathu Jesu. 22 Olu nyo hongola Jerusalema khu gu kutswa khu liphuvbo, ambari olu nyi si gitigo egi gi na guya nyi dugeleya iyoyo. 23 Egi nyi gitigo khu gu madhoropani gwatshavbo nyi vbindrago khumo, liphuvbo nya guage la gu nyi tivisa gungani-gungani gu khilo nyi viredwe khu mapaso ni dzitshanisa. 24 Ganiolu, kha nyi woni womi wangu na wuri ni lisima ngudzu gwangu, igyo gi gu na ni lisima ngudzu gwangu gu tutuma kala mahegiso ni thumo nyi hakhidego khu ga Pfhumu Jesu a gu gu ningeya wufakazi nyo vbeleye nya mahungu nya yadi maningano ni wuwadi wa Nungungulu.

25 “Olu nyi ngu dziti gu kheni mwalo ni moyo gwanu nyi mu tshumayedego maningano ni Mufumo a na nyi wonago gambe. 26 Khu kharato, muhuno mu dzifakazi nyo khenu eni nyi mwalo nandru nya novba nya muthu, 27 kholu nyi mi tiviside gugola* gwatshavbo gwa Nungungulu. 28 Dzi woneyeni enu vamune mu bwe mu sayisa gwadi tshambi owu liphuvbo nya guage li mi hathidego gasi gu wu thangeya; mu havisa gwadi libandla la Nungungulu eli a li rengidego khu novba wa Gyanana gyaye. 29 Nyi ngu dziti gu kheni hwane nya gu ba nyi hongode, vbakari gwanu gu na beya masolwa* ma lambidego ma na tshanisago tshambi; 30 ambari vbakari gwanu gu na dugeleya vathu va na hevbudzago malipha, va dzi ndrindreya vapizane.

31 “Khu kharato, khalani na mu gengede mu bwe mu dundrugani gu khenu ndrani nya myaga miraru nyi di gu gengedza moyo ni moyo wanu na nyi gu liya wutshigu ni mihani. 32 Olu nyi ngu mi ningeya mandzani ga Nungungulu ni ga lito laye li ganeyago khu wuwadi waye nya wukhongolo a gu ilo li na mi tiyisago ni gu mi ninga thomba vbakari nya vatshavbo ava Nungungulu a nga va hatha gasi va khala va nyo aga. 33 Kha nya dogoreya prata, ne oru ne gyombo nya muthu. 34 Enu mu ngu dziti gu khenu nyi thumide khu mandza yangu gasi gu mana silo nya gu dzi vbanyise khiso eni gumogo ni vabangaladzi vangu. 35 Nyi mi yeyedzide khu mithumo yangu gu kheni gu vbwetega mu thumani khu gu dzi garadza gasi gu phasa vale va hamugago, nigu dundrugani malito ya Pfhumu Jesu a nga khuye: ‘A ngu tsaka oyu a ningago guvbindra oyu a hakhago.’”

36 Hwane nyo ganeye silo sesi, a di khidzima ni vatshavbo a gombeya. 37 Vatshavbo va di pheya gu liya ngudzu, va abrasari Pawulo va mu bhejari. 38 Avo va di gu garadzega ngudzu kholu a nga va embeya gu khuye kha va na nga mu wona gambe. Khu vbale va di mu vbwegedza gasi a ya beya omu nya navhiyu.

21 Tepo hi nga hambana navo hi di beya ngalava hi hongola Kosi, khu litshigu li nga landreya hi di hongola Rodhesi, khiyoyo hi ya hongola Patara. 2 Tepo hi nga mana navhiyu yi nga ba yi hongola Fenisiya, hi di beya hi hongola. 3 Tepo hi nga wona gidwane gya Kipre, hi di gi diga khu nyambade gwathu, hi simama gu hongola Siriya, hi vbindra khu Tiro kholu navhiyu yi di yede gu tshisa sombo iyoyo. 4 Hi di vbwetedzeya vapizane hi va mana hi bwe hi khala iyoyo khu 7 matshigu. Ganiolu, liphuvbo nya guage li di ruma vapizane gasi va embeya Pawulo gungani-gungani gu khavo a nga gandri Jerusalema. 5 Tepo matshigu ma nga vbeya, hi di simama ni liendro, vapizane vatshavbo gupata ni vanyamayi ni sanana va di hi vbwegedza kala vbavbandze nya lidhoropa. Hi di ya khidzima funguni hi gombeya 6 hi bwe hi tshadzisana, khavbovbo ethu hi di beya omu nya navhiyu avo va bweleya gaya.

7 Hi di khuga khu Tiro kala Pitolemayidha, iyoyo hi di ya losana ni vandruye, hi khala navo litshigu limwedo. 8 Khu mindru gakona hi di hongola Sezareya, hi di ya beya ndrangani ga Filipi mutshumayeli, hi khala naye; Filipi a diri moyo nya vale nya 7 va nga hathwa Jerusalema. 9 Mwama yoyu a diri ni 4 sanana nya sagadzyana si nga ba si profeta ni gu iso si di si gu tshadhi. 10 Hwane nya gu ba hi khade iyoyo khu matshigu nya mangi, gu dita muprofeti moyo nyo pwani khu Agabo, a nga ba a ta khu Judheya. 11 Uye a di hi teya a ta dzega keka wa Pawulo a dzi hungeleya khuwo mawundru ni mawogo, a ganeya, khuye: “Liphuvbo nya guage lari khilo: ‘Mune keka wowu a na hungeledwa kharati khu Vajudha Jerusalema nigu avo va na mu ningeya mandzani ga vanyamayigo.’” 12 Tepo hi ngapwa isoso, ethu ni vambe va nga ba va romo iyoyo hi di khongoteya Pawulo gukhethu a nga hongoli Jerusalema. 13 Pawulo a di va hakha, khuye: “Ginani mu girago? Khu ginani mu liyago, mu zama gu nyi vbedza tshivba? Ganiolu, dzitini gukhenu nyi dzi emisede nasiri gu ya hungwa basi, ganiolu ambari ni gufa Jerusalema khu kotani nya lina la Pfhumu Jesu.” 14 Kha nga olu hi nga tandrega gu mu himbedzeya, kha ha mu gurumedza gambe,* hi di ganeya gu khethu: “Gu na girege gugola ga Jehovha.”

15 Hwane nya matshigu yale, hi di dzi dongiseya hi hongola Jerusalema. 16 Vapizane nyo khaguri va Sezareya va di hi yisa gaya ga Manasoni wa Kipre, moyo nya vapizane nyo pheye, a gu iyo hi nga ya khala iyo. 17 Tepo hi nga vboha Jerusalema, vandruye va di hi hakha khu gutsaka. 18 Khu mindru gakone, Pawulo a di hi dzega hi hongola hi ya manana ni Jakobe nigu madhota yatshavbo ma di gu romo iyoyo. 19 Uye a di va losa, a va tshamuseya gwadi esi Nungungulu a nga gireya vanyamayigo khu gu thumisa thumo waye nya gutshumayele.

20 Tepo va ngapwa isoso, va di pheya gu dhumisa Nungungulu, ganiolu va embeya Pawulo, khavo: “Wandruye, u ngu dziti gwadi gu khuwe gu na ni dzimiliyoni nya Vajudha va nga vbindrugedza va khodwa nigu vatshavbo va na ni sighingi khu nayo. 21 Ganiolu, avo va pwide gupwani wa gu hevbudza Vajudha vatshavbo va gomogo vbakari ga vanyamayigo gu diga gu landra nayo wa Mosi khu gu va embeya gu khuwe kha va yeli gu hanisa wugwera* sanana sawe ni gu landrisa siolovedzo sathu. 22 Hi na rini olu? Kholu khu lisine avo va na dziti gu khavo u womo omu. 23 Khu kharato, gira esi hi na gu embeyago: Hi na ni 4 vama, va gu na ni gisambanyo va yedego gu gi tadzisa. 24 Gimbiya ni vama vava, mu ya dzi agisa guya khu nayo, u bwe u va livbeya dzitsapawu nya gu pidwe ndzudzu. Khu kharato, vatshavbo va na dziti gukhavo esi si ganedwago maningano ni uwe khandri lisine, ganiolu avo va na wona gukhavo uwe u ngu landra lisine nigu u ngu engisa Nayo wa Mosi. 25 Gasi ga vale va khodwago va gu siri Vajudha hi va rumede malangaliya na hi gu va tivisa esi hi si hungidego, nyo khethu va yede gu dzi hambanisa ni silo si nga phasedwa sifananiso, novba, sirengo si ngafa khu gu dzwinywa ni wubhayi.”*

26 Khu kharato, khu mindru gakone, Pawulo a di dzega vama vale va ya dzi agisa guya khu nayo. Hwane nya isoso, a di beya tempeleni a ya tivisa gukhuye lini ma na vbeyago matshigu nya gudziagise ni gu ya khuye lini moyo ni moyo a na girago ningelo waye.

27 Tepo ma nga ba mari vbafuvbi ni gu vbeya 7 matshigu yale nya gudziagise, Vajudha nyo khaguri va Aziya va di wona Pawulo tempeleni, khavbovbo va kutsedzeya gitshungu gu mu mola, 28 va khusedza lito, khavo: “Vama va Israyeli, hi phaseni! Mwama yoyu, khuye a hevbudzago vathu vatshavbo, malangani yatshavbo silo si wugeyago va na gyathu, si wugeyago nayo wathu ni wulanga wowu nigu reside Vagreki tempeleni, a nyenyezisa wulanga wowu nya guage.” 29 Avo va di ganeya isoso kholu va di mu wonide dhoropani nari ni Trofimo, givelegwa gya Efeso, va pimisa gu khavo a di hongode naye tempeleni. 30 Dhoropani gwatshavbo gu di wuga pfilupfilu, guta vathu khu gu tutuma va ta mola Pawulo va mu ndrindra va mu dusa khu tempeleni, ma bwe ma dzegeya gu segwa madimba. 31 Tepo va nga ba va zama gu mu songa, muthangeyi nya masotshwa* a di embedwa gupwani dhoropani ga Jerusalema gu na ni pfilupfilu; 32 uye a di dzegeya gu tshanganisa masotshwa ni vathangeyi nya masotshwa, va releya khu gututuma va yela gitshungu. Tepo vathu va nga wona muthangeyi nya masotshwa ni masotshwa, va di ema gu veta Pawulo.

33 Khavbovbo, muthangeyi nya masotshwa a di mu hidzimeleya, a mu mola a ruma gu khuye a hungeledwa khu dzikorenti dzimbili, a mu wudzisa gu khuye khuye mani nigu ginani a nga ghoha. 34 Ganiolu, vbakari nya gitshungu, vambe va di gu ganeya esi, vambe va di gu ganeya simbe. Kha nga olu a nga ba a si kodzi gupwa gilo khu kotani nya pfilupfilu, a di rumisa gukhuye va mu dzega va hongola naye kwarteli. 35 Tepo va nga vboha avba nya dziskadha si lombide gu khiso masotshwa ma mu khusa khu kotani nya olu gitshungu gi nga ba gi mu lambede, 36 kholu va di gu landrwa khu vathu nya vangi va nga ba va gulumeya, khavo: “A na songwe!”

37 Tepo Pawulo a nga ba ari vbafuvbi ni gu bedzwa kwarteli, a di wudzisa muthangeyi, khuye: “Ina nyi ngu dzumedziswa gu ganeya gilogyo?” Muthangeyi a di mu hakha, khuye: “Gasi u ngu kodza gu ganeya Gigreki? 38 Gasi khandruwe Muegipto wule matshigu hwane a nga wusa pfilupfilu, a dzega 4000 sighevenga a hongola naso giwulani?” 39 Pawulo a di mu hakha, khuye: “Khu lisine eni nyi Mujudha wa Tarisu, a gu lidhoropa nya likhongolo la Silisiya. Nyo lomba gukheni u nyi dzumeleya gu ganeya ni gitshungu.” 40 Tepo Pawulo a nga dzumeledwa gu ganeya, a di ema avba nya dziskadha, a khusedza libogo, gitshungu gi di degula, khavbovbo a pheya gu ganeya navo khu Gihebheru, khuye:

22 “Vandriyangu ni vapapayi, gupwani esi nyi na ganeyago gasi gu dzi vhikeya.” 2 Tepo va ngapwa gu khavo a di gu ganeya navo khu Gihebheru, va di degula havo kape. Kavbovbo, Pawulo a va embeya, khuye: 3 “Eni nyi Mujudha, givelegwa gya Tarisu, tigoni ga Silisiya. Ganiolu, nyi hevbudzidwe dhoropani momu khu Ghamaliyeli. Nyi hevbudzidwe gu landrisa gwadi Nayo wa Mosi nigu nyi ngu thumeya Nungungulu khu sighingi kha nga enu. 4 Eni nyi di gu tshanisa ni gu songa ava va nga ba va landreya Ndziya* yeyi. Nyi di gu mola vama ni vanyamayi nyi va hungeleya nyi va theya pasoni. 5 Muprista nya khongolo ngudzu ni madhota yatshavbo va ngu fakaza silo sesi. Avo gambe va nyi ningide malangaliya gasi nyi ya mola vandruye va Dhamasko ni gu eni nyi diri ndziyani nya gu hongole iyoyo gasi nyi ya va mola nyi va hungeleya, nyi wuya navo Jerusalema gasi va ta tsayiswa.

6 “Ganiolu, na nyiri ndziyani ni vbakari nya mihani, na nyiri vbafuvbi ni gu vboha Dhamasko, khu githugedza nyi di fenengedzwa khu gulasa gu nga ba guta khu ndzadzini. 7 Nyi di thega vbavbatshi, nyipwa lito na li gu khilo: ‘Sawule, Sawule, khu ginani u nyi tshanisago?’ 8 Nyi di wudzisa, kheni: ‘Khuwe mani Pfhumu?’ A di nyi hlamula, khuye: ‘Kheni Jesu wa Nazareta, oyu u mu tshanisago.’ 9 Vama va nga ba vari ni eni va gu wonide gulasa, ganiolu kha va lipwa lito la oyu a nga ba a ganeya ni eni. 10 Khavbovbo, nyi di wudzisa, kheni: ‘Ginani nyi yedego gu gira, Pfhumu?’ Pfhumu yi di nyi hlamula, khiyo: ‘Khuga u hongola Dhamasko. Iyoyo u na ya embedwa satshavbo u yedego gu gira.’ 11 Ganiolu, kha nga olu nyi nga ba nyi si kodzi gu wona gilo khu kotani nya gulase gule, nyi di vboha Dhamasko na nyi pharidwe khu libogo khava nyi nga ba nyi endra navo.

12 “Khu kharato, mwama moyo nyo pwani khu Ananiya, oyu a nga ba a ninga githawo Nungungulu guya khu Nayo, oyu Vajudha vatshavbo va mule va nga ba va ganeya gwadi khuye, 13 a dita nyi vbweta. Tepo a nga vboha, a di hidzimeya vbafuvbi gwangu, a ta nyi embeya, khuye: ‘Sawule ndriyangu, tulega maho!’ Khu gitepwana gile, nyi di tulega maho, nyi mu wona. 14 A di nyi embeya, khuye: ‘Nungungulu wa vakokwe vathu a gu hathide gasi uti gugola gwaye, u wona oyu nya gululame u bwe upwa lito li dugago khu kanani gwaye, 15 kholu u na khala fakazi yaye vbakari nya vathu vatshavbo nya esi u si wonidego ni gu sipwa. 16 U nga gu vireya gambe ginani? Khuga u bhabhatiswa, u handza sighoho sago khu gu rana lina laye.’

17 “Ganiolu, tepo nyi nga wuya Jerusalema, na nyiri tempeleni na nyi gu gombeya, nyi di manega ni giwoniso. 18 Nyi di wona Pfhumu na yi gu nyi embeya, khiyo: ‘Duga khu Jerusalema khu guvbiredza kholu kha va na nga hakha wufakazi u na va ningago maningano ni eni.’ 19 Ganiolu, eni nyi di mu hakha, kheni: ‘Pfhumu, avo va ngu dziti gwadi gu khavo nyi di gu gimbiya khu sinagoga ni sinagoga nyi mola ni gu veta ava va nga ba va khodwa gwago 20 ni gu tepo wu nga ba wu vbalaga novba wa fakazi yago Sitefane, eni nyi di romo iyoyo, nyi si seketeya nyi bwe nyi woneleya sombo sa ava va nga ba va mu songa.’ 21 Ambari ulolo, uye a di nyi embeya, khuye: ‘Gimbiya, kholu nyi na gu rumeya ga mayigo ya hwindzo.’”

22 Avo va di mu engiseya kala a ganeya malito yaya. Khu hwane nya isoso, va di khusedza lito va ganeya, khavo: “A na songwe mwama yoyu kholu kha yedwi khu gu vbanya!” 23 Kha nga olu va nga ba va gulumeya ni gu dzudzugeya sombo sawe ni gu pfuledzeya mafu vbatshani, 24 komandante nya masotshwa a di ruma gu khuye va dzega Pawulo va beya naye kwariteli, a bwe a ruma gu khuye a thethisedwa na gu vetwa gasi ati gwadi gu khuye khu ginani vathu va nga ba va gulumeya kharetele kotani yaye. 25 Hwane nya gu ba va mu hungelede gasi a kwamudwa, Pawulo a di wudzisa muthangeyi nya masotshwa a nga ba a romo vbale, khuye: “Ina mu ngu dzumeledwa khu nayo gu kwamula Muroma nya mba pheya khu gu mu lamula?” 26 Tepo muthangeyi nya masotshwa a ngapwa isoso, a di ya embeya komandante, khuye: “Ginani u vbwetago gu gira? Phe mwama yoyu Muroma.” 27 Khavbovbo, komandante a di hidzimeleya Pawulo a mu wudzisa, khuye: “Nga nyi embeya, ina uwe u Muroma?” Uye a di hakha, khuye: “Ina.” 28 Komandante a di mu embeya, khuye: “Eni nyi rengide fanelo yeyi nyo khale Muroma khu dzitsapawu nya dzingi.” Pawulo a di mu hakha, khuye: “Ganiolu, eni nyi Muroma nya mavelego.”

29 Khu kharato, vama vale va nga ba va vbweta gu mu thethiseya ni gu mu kwamula, va di dzegeya gu mu diga, nigu tepo komandante a nga tugula gu khuye a di hungelede Muroma, a di thava.

30 Khu mindru gakone, kha nga olu a nga ba a vbweta guti gu khuye khu ginani Vajudha va nga ba va singedza Pawulo, uye a di mu tshula, a rumisa gu khuye vaprista nya vakhongolo ni Tribhunali* yatshavbo va tshangana. Khavbovbo, a di dusa Pawulo a ta mu emisa vbakari gwawe.

23 Pawulo a di khedza gwadi ava va nga ba va romo Tribhunali,* khuye: “Vandriyangu, Nungungulu a ngu dziti gu khuye kala muhuno gimwalo nyi giridego gi nyi garadzago livhalo.” 2 Khu kharato, muprista nya khongolo ngudzu, Ananiya, a di ruma ava va nga ba va romo vbafuvbi gu veta likana la Pawulo. 3 Pawulo a di mu embeya, khuye: “Nungungulu a na gu veta, mupfhadzedzeyi wewe.* Wo khala gasi gu nyi lamula guya khu Nayo, nari gu uwe u ngu ndraga Nayo khu gu ruma gu khuwe va nyi veta!” 4 Avo va nga ba vari vbale, va di khavo: “Wa gu tiya u vala muprista nya khongolo ngudzu wa Nungungulu?” 5 Pawulo a di hlamula, khuye: “Vandriyangu, eni kha nya nga ba nyi dziti gu kheni uye muprista nya khongolo ngudzu, kholu gu lovidwe, pwani: ‘U nga ganeyi guvivba khu pfhumu yanu.’”

6 Kha nga olu Pawulo a nga ba a dziti gu khuye vambe vbakari gwawe va diri Vasadhusi, vambe va diri Vafarisi, a di khusedza lito, khuye: “Vandriyangu, eni nyi Mufarisi, gyanana nya Vafarisi. Nya gu lamudwa khu kotani nya gukhodwe avba nya guwuswe ga ava vafudego.” 7 Tepo a nga ganeya isoso, gu di manega guganedzisana vbakari ga Vafarisi ni Vasadhusi, khavbovbo va kabanega khu mitsawa. 8 Kholu Vasadhusi vari khavo gu mwalo guwuswa ga vale vafudego, gu mwalo dzingilozi, ambari sivangwa nya liphuvbo. Ganiolu Vafarisi va ngu khodwa gu khavo satshavbo soso somo. 9 Khu kharato, gu di manega ligwaha nya likhongolo. Valovi nyo khaguri va nga ba va lumba tsawa nya Vafarisi va di khuga, va ganedza khu tshivba, khavo: “Kha hi woni gihoso ga mwama yoyu. Abari gu ganede ni givangwa nya liphuvbo mwendro ngilozi . . .” 10 Guganedzisana gu di engedzeya khu tshivba. Khavbovbo, komandante khu gu thava gu khuye Pawulo a nga tshuka a songwa* khavo, a di ruma masotshwa ma releya, ma ya mu wandra ma hongola naye kwariteli.

11 Ganiolu, ga wutshigu wule, Pfhumu yi di dzi wonegisa gwaye, khiyo: “Tiya-hwambo! Kholu, kha nga olu u nga ningeyago wufakazi nyo vbeleye maningano ni eni Jerusalema, u na ya ningeya gambe wufakazi Roma.”

12 Tepo gu ngagya, Vajudha va di hunga gikhungo, va sambanya gu khavo kha va na nga hodza gilo mwendro gu seya gilo na va nga si songi Pawulo. 13 Vama va nga sambanya ni gu hunga gikungo gegi, va di gu vbindra 40 nya avo. 14 Vama vava va di hongola ga vaprista nya vakhongolo ni madhota, va ya khavo: “Hi sambayide gu khethu kha hi na nga hodza gilo mwendro gu seya gilo na hi si gu songi Pawulo. 15 Khu kharato, enu gumogo ni Tribhunali, embeyani komandante nya masotshwa gu khenu a mi reseya Pawulo, gasi mu ta gira khatshi mwa gu vbweta gu ta pwisisa gwadi mahungu yaye. Ganiolu, na nga si vbohi, ethu hi na ba hi dongide gasi gu mu songa.”

16 Ganiolu, gyanana gya ndriye nya nyamayi wa Pawulo gi di tugula mano yoyo, khavbovbo gi beya kwariteli gi ya embedzeya satshavbo Pawulo. 17 Pawulo a di rana muthangeyi moyo nya masotswa, a mu embeya khuye: “Dzega lidzaha leli u li yisa ga komandante kholu li ni silo li vbwetago gu mu embeya.” 18 Uye a di li dzega, a li yisa ga komandante, aya khuye: “Pawulo a di nyi rana, a ya nyi lomba gu khuye nyi gu reseya lidzaha leli kholu li na ni silo li vbwetago gu gu embeya.” 19 Komandante a di mola lidzaha lile khu libogo, a hongola nalo khu pfhuvbo, a ya li wudzisa, khuye: “Ginani u vbwetago gu nyi embeya?” 20 Li di mu hakha, khilo: “Vajudha va hungide gikungo nya gu ta gu lombe gasi u releya ni Pawulo mindru Tribhunali nga khatshi va gu vbweta gu yati simbe manigano ni mahungu yaye. 21 Ganiolu, u nga dzumeyi, kholu gu ni guvbindra 40 vama va mu hungedego gikungo. Va sambanyide gu mba hodza gilo ni gu mba seya gilo, kala va mu songa. Avo va dongide, va gu vireya basi gu khavo u dzumeya gilombo gyawe.” 22 Khavbovbo, komandante nya masotshwa a di diga lidzaha lile li hongola, na phede gu khu li embeya, khuye: “U nga embeyi muthu gu khuwe u dzude u ta nyi embeya mahungu yaya.”

23 Khu kharato, a di ranisa vathangeyi vavili nya masotshwa, a ta va embeya, khuye: “Nyi dongiseleye 200 masotshwa, 70 vakhileyi nya dzikavhalo ni 200 va nya matshari gasi va hongola Sezareya omu nya dzi 21 ora.* 24 Dongiseyani gambe dzikavhalu, mu khiledza Pawulo, gasi a ya vboha ga ghovhernadhori Felisi na vhikelegide.” 25 A di bwe a lova lidangaliya li nga ba li khilo:

26 “Eni Klawudhiyo Lisiya, nyi ngu gu losa uwe ghovhernadhori nyo thavisege Felisi: Sewe! 27 Mwama yoyu a di modwa khu Vajudha ni gu vbadugwana a nga hadzi songwa khavo. Ganiolu, eni ni masotshwa yangu hi di tutuma hi ya mu vbulugisa, kholu nyi tide gu kheni uye Muroma. 28 Khu kharato, na nyi gu vbweta guti gighelo gi nga gira va mu mola, nyi di mu dzega nyi mu yisa Tribhunali gwawe. 29 Nyi di ya tugula khu kheni va gu mu niga nandru khu kotani nya silo si gimbileyanago ni Nayo wawe. Ganiolu, kha nya wona gwaye nandru nya gu yele gu songwa mwendro gu khothedwa. 30 Ganiolu, kha nga olu nyi embedwego gikungo va hungidego khu mwama yoyu, nyi ngu mu rumeya iyo gwago, uwe ghovhernadhori nyo thavisege, nigu nyi ngu tivisa ava ma mu singedzago gasi va ta gu embeya iso va mu singedzago khiso.”

31 Khu kharato, masotshwa ma di gira esi ma nga rumwa. Ma di dzega Pawulo ma hongola naye Antipatridha ni wutshigu. 32 Khu mindru gakone, masotshwa ma di diga Pawulo a hongola ni vakhileyi nya dzikavhalo, ayo ma bweleya kwariteli. 33 Vakhileyi nya dzikavhalo va di beya Sezareya, va ya ningeya lidangaliya ga ghovhernadhori va bwe va tshiya Pawulo mandzani gwaye. 34 Khavbovbo, ghovhernadhori a di dzega lidangaliya lile, a wudzisa gu khuye Pawulo khwa provhinsiya ya hayi. A embedwa gu pwani khwa provhinsiya ya Silisiya. 35 Ghovhernadhori a di embeya Pawulo, khuye: “Nyi na engiseya mahungu yago yatshavbo tepo va na vbohago ava va gu singedzago.” Khavbovbo, a di ruma gu khuye Pawulo a khothedwa omu nya nyumba nya wufumu ya Herodhi.

24 Hwane nya 5 matshigu, muprista nya khongolo ngudzu nyo pwani khu Ananiya, a di releya ni madhota nyo khaguri gumogo ni adhivhogadhu nyo pwani khu Teritulo. Avo va di ya ketsari Pawulo ga ghovhernadhori. 2 Tepo a nga ranwa, Teritulo a di pheya gu khetsari Pawulo, khuye:

“Hi ngu dzi buza khu gurula nya gukhongolo khu kotani yago ghovhernadhori nyo thavisege nigu khu kotani nya wugengeyi wago, u ngu lulamisa silo nya singi tigoni momu. 3 Tepo yatshavbo ni malangani yatshavbo hi ngu gu bonga ngudzu khu silo sesi, uwe ghovhernadhori nyo Thavisege, Felisi. 4 Ganiolu, gasi gu mba gu dzegeya tepo nya yingi, nyi ngu lomba gu kheni u hi engiseya khu gitepwana. 5 Hi tugude gu khethu mwama yoyu khuye a kutsedzeyago vathu gu wusa pfilupfilu vbakari nya Vajudha mafuni gwatshavbo nigu uye moyo nya vathangeyi nya tsawa nya Vanazarenu. 6 Uye gambe zamide gu nyenyezisa tempele, khu kharato hi di mu mola. 7 *—— 8 Tepo u na mu thethiseyago, u na tugula satshavbo sesi hi ganeyago.”

9 Vajudha navo va di seketeya malito yoyo khavo khiso kamo a ganeyago. 10 Tepo ghovhernadhori a nga ningedza mahungu Pawulo, uye a di hakha, khuye:

“Kha nga olu nyi dzitigu gu kheni u na ni myaga nyo laphe nuri mulamuli tigoni momu, nyi na ganeya na nyi tiyide, nya mba thava gilo, gasi gu dzi emeya. 11 Kha nga u si wonago, kha gu vbindri 12 matshigu na nyi gwede Jerusalema gasi gu ya khozeya. 12 Avo va si gu nyi mani na nyi gu ganedzisana ni muthu tempeleni, mwendro gu wusa pfilupfilu omu nya dzisinagoga mwendro wumbe wulanga dhoropani 13 nigu va mwalo wufakazi nya esi va nyi singedzago. 14 Ambari ulolo, nyi ngu dzumeya gu kheni eni nya gu khozeya Nungungulu wa vakokwe vathu, khu ndziya eyi vama vava va yi ranago gu khavo wukhongeyi nya tsawa nya Vanazarenu ni gu nyi ngu khodwa satshavbo si lovidwego omu nya Nayo ni omu nya mabhuku ya Vaprofeti. 15 Nyi na ni gutumba gambe ga Nungungulu, a gu ugo ga gumogo va gu nago navo, nyo kheni gomo guwuswa ga ava va fudego: va nya gululama ni ava nya mba lulama. 16 Khu kotani nya isoso, nya gu dzi garadzeya gu manega ni livhalo li agidego mbeli ga Nungungulu ni ga vathu. 17 Hwane nya myaga nya yingi, nyi dzude Jerusalema nyi resa dzitsapawu gasi gu ta phasa vathu va tigoni gwangu ni gu gira miphaso. 18 Tepo nyi nga ba nyi gimbidzisa mahungu yaya, va dzude va ta nyi mana tempeleni na nyi dzi agiside guya khu Nayo. Nyi diri mwalo ni gitshungu nigu kha nya nga ba nyi wusa pfilupfilu. Ganiolu, iyoyo gu diri ni Vajudha nyo khaguri va provhinsiya ya Aziya, 19 avo va di yede na va romo avba gasi va ganeya nandru wangu mbeli gwago, nya gu ba nyiri nawo. 20 Mwendro saye vama vava va na ganeye nandru va wu manidego gwangu tepo nyi nga ba nyi romo Tribhunali.* 21 Mwendro nya gu ningwa nandru khu kotani nya malito yale nyi nga ganeya tepo nyi nga ba nyiri vbakari gwavo, kheni: “Khu kotani nya guwuswe ga ava va fudego, muhuno nyi ranidwe gasi gu ta lamudwa vbakari gwanu!’

22 Kha nga olu Felisi a nga ba a mati gwadi mahungu ma ganeyago khu Ndziya, a di thindrekisa, khuye: “Tepo a na vbohago komandante Lisiya, nyi na ta ma wona gwadi mahungu yaya.” 23 Khavbovbo, a di ruma muthangeyi nya masotshwa gu khuye a mu khotheya, a mu ninga gutshulega nyo khaguri ni gu bwe a dzumeleya gu khuye va na gyaye va mu sayisa.

24 Hwane nya matshigu nyo khaguri, Felisi adita ni mwangadzi waye Druzila, a nga bari Mujudha. A di ruma gu khuye va ya dzega Pawulo, a ta mu engiseya na gu ganeya khu gukhodwa gwaye ga Kristo Jesu. 25 Ganiolu, tepo Pawulo a nga ganeya khu gululama, gudziphara ni gulamudwa gu na tago, Felisi a di thava, a mu embeya, khuye: “Indra ba u hongola, nya gu gu vbweta gambe nyi na gu rana.” 26 Felisi a di gu pimisa gu khuye a na ningwa dzitsapawu khu Pawulo, khu kharato a di gu khaleya gu mu ranisa gasi a ta bhula naye. 27 Hwane nya myaga mivili, Felisi a di tshikedzwa khu Porisiyo Festo. Kha nga olu a nga ba a vbweta gu tsakedwa khu Vajudha, uye a di diga Pawulo pasoni.

25 Hwane nya matshigu mararu Festo na vbohide Judheya a khala ghovhernadhori, a di khuga khu Sezareya a gweya Jerusalema. 2 Vaprista nya vakhongolo ni vama va nga ba va ningwa lisima khu Vajudha va di mu bikeya mahungu ya Pawulo. Va di lomba khu tshivba ni tshivba ga Festo 3 gasi a rumeya Pawulo Jerusalema, ganiolu avo va di gu hungide gikungo nya gu songe Pawulo ndziyani. 4 Ganiolu, Festo a di va embeya gu khuye Pawulo yede gu simama na khothedwe Sezareya ni gu uye a na bweleya iyoyo nya mba hweya. 5 Festo a di va embeya, khuye: “Va na releye gumogo ni eni vambe nya vathangeyi vanu gasi va ya ganeya nandru waye abari gu giride gighoho nyo khaguri.”

6 Festo a di khala navo gipimo nya 8 mwendro 10 matshigu, khavbovbo a releya Sezareya. Khu mindru gakone, a di ya khala tribhunali a rumisa gu khuye va mu reseya Pawulo. 7 Tepo Pawulo a nga beya, a di randredwa khu Vajudha va nga ba vata khu Jerusalema, va mu singedza silo nya singi nyo thise, ganiolu avo va diri mwalo wufakazi nya silo soso.

8 Ganiolu, gasi gu dzi vhikeya, Pawulo a di khuye: “Eni kha nya ghoheya Nayo nya Vajudha, kha nya ghoheya tempele, ne kha nya ghoheya Sezari.” 9 Khavbovbo, Festo na gu vbweta gu tsakisa Vajudha a di embeya Pawulo, khuye: “U ngu dzina gu hongola Jerusalema gasi u ya lamudwa iyoyo na nyi romo?” 10 Khavbovbo, Pawulo a di khuye: “Eni nyi womo mbeli nya Tribhunali ya Sezari omu nyi yedego gu lamudwa umo. Kha nga u dzitigo gwadi, eni kha nya ghoheya Vajudha. 11 Abari gu eni nyi gighohi nigu nyi giride gilo gi yelago gu nyi songwa, kha nyi bombi gufa, ganiolu abari gu esi vama vava va nyi singedzago si mwalo hungo, mwalo a gu na ni fanelo nya gu nyi ningeye gwawe khu gu feya gu va tsakisa. Nyo lomba gu yisa mahungu yangu ga Sezari!” 12 Khu kharato, hwane nya gu ba a bhude ni tsawa nya madhota, Festo a di khuye: “U lombide gu hongola ga Sezari, khiyo u na hongolago.”

13 Hwane nya matshigu nyo khaguri, pfhumu Agiripa ni Bherenise va di hongola Sezareya gasi va ya losa Festo. 14 Kha nga olu va nga vbedza matshigu nya mangyana na vari eyi, Festo a di bikeya mahungu ya Pawulo ga Pfhumu, khuye:

“Avba gu na ni mwama moyo a nga tshidwa khu Felisi na khotedwe pasoni, 15 tepo nyi nga ba nyiri Jerusalema, vaprista nya vakhongolo ni Vajudha va di ta mu ketsari gwangu, va lomba gu khavo a na tsayiswe. 16 Ganiolu, eni nyi di va hakha kheni nayo wa Roma kha wu hi dzumeleyi gu ningeya muthu na nga si wonani khovbe ni khovbe ni avo va mu ketsarigo gasi a mana lithomo nya gu dzi emeye. 17 Khu kharato, khu mindru gakone, tepo va nga vboha kha nya si gireya mihuni, nyi di khala tribhunali nyi ranisa mwama yoyo. 18 Tepo ava va nga ba va mu ketsari va nga khuga va ema va ganeya, kha va mu singedza silo nya guvivbe nyi nga ba nyi si vireya. 19 Avo va di gu hambaneyana basi khu kotani nya wukhongeyi wawe ni kotani ya mwama moyo nyo pwani khu Jesu, a fudego, ganiolu Pawulo a nga ba a simama gu ganeya gukhuye a nga gu vbanya. 20 Khu gu mba dziti gu kheni nyi na lamudzisa kharini mahungu yaya, nyi di mu wudzisa gu kheni a ngu dzina gu hongola Jerusalema gasi a ya lamuledwa iyoyo gani. 21 Ganiolu, tepo Pawulo a nga lomba gu simama na khothedwe a vireya esi si nga hadzi hungwa khu Augusto nyi di ruma gu kheni a simama na khothedwe kala nyi mu rumeya ga Sezari.”

22 Khavbovbo, Agripa a di embeya Festo, khuye: “Nyi di gu tsakeya gu mupwa mwama yoyo.” Uye a di mu hakha, khuye: “Mindru avba gugyago u na mupwa.” 23 Khu kharato, khu mindru gakone, Agripa ni Berenise va di beya salani nya mitshangano, na va panide ngudzu na va gu ghwira, gumogo ni vakomandati nya masotshwa ni vama va nga ba va ningwa ngudzu lisima dhoropani. Festo a di ranisa Pawulo. 24 Festo a di khuye: “Pfhumu Agripa ni mwatshavbo enu mu gomogo avba, mu ngu mu wonani mwama yoyu, khuye oyu Vajudha vatshavbo va nga mu ketsari gukhugeya Jerusalema kala eno na va gu gulumeya gukhavo yede gu songwa. 25 Ganiolu, eni kha nya wona gwaye nandru wu nga ba wu yela gu a songwa. Khu kharato, tepo mwama yoyu a nga lomba gu hongola ga Augusto nyo pheye, eni nyi di hunga gu mu rumeya iyo gwaye. 26 Ganiolu, kha nya mana gilo nyo gu loveye maningano naye, pfhumu, khu kharato nyi mu reside gwanu, ngudzu-ngudzu gwago uwe pfhumu Agripa, gasi gu hwane nya gu a thethisedwa nyi mana gilo nya gu love, 27 kholu nya gu wona gu kheni kha nyi yeli gu rumeya gibotshwa nya mba ganeya gukheni khu wevbini nandru wagyo.”

26 Agripa a di embeya Pawulo, khuye: “U ngu dzumedziswa gu dzi emeya.” Pawulo a di khusedza libogo a ganeya, khuye:

2 “Nyi tsakide Pfhumu Agiripa, olu muhuno nyi emidego mbeli gwago gasi nyi dzi emeleya ga satshavbo esi Vajudha va nyi singedzidego, 3 ngudzu-ngudzu olu u tigo gwadi siolovedzo sa Vajudha ni esi va gu mba pwana gwaso. Khu kharato, nyo lomba gu kheni u nyi engiseya khu gu laphisa monyo.

4 “Vajudha vatshavbo va ngu mati mavbanyelo yangu gukhugeya na nyi ngari lidzaha, va nguti edzi nyi vbanyidego khidzo tigoni gwathu ni Jerusalema. 5 Vajudha va nyi tigo gukhugeya gale va ngu dziti gu khavo nyi vbanyide kha nga Mufarisi; va ngu dziti gambe gu khavo nyi di gu landrisa gwadi nayo nyo garadze ngudzu nya wukhongeyi wathu, va gu dzina va na fakaze. 6 Olu nya gu lamudwa khu kotani nya gitumbiso egi Nungungulu a tumbisidego vakokwe vathu. 7 Gitumbiso gegi khigyo gyagimwegyo egi mahundzu yathu nya 12 ma gi vireyago gu gi wona na gi gu tadzisega. Khu kotani nya gitumbiso gyogyo, avo va gu thumeya Nungungulu wutshigu ni mihani khu tshivba yawe yatshavbo. Khigyo gitumbiso gegi gi girago Vajudha va nyi ketsari, Pfhumu Agripa.

8 “Khu ginani mu si khodwigo gu khenu Nungungulu a ngu si kodza gu wusa ava va fudego? 9 Eni nyi di gu pimisa gukheni nyi di yede gu gira satshavbo nyi si kodzago gasi gu fuvisa lina la Jesu wa Nazareta. 10 Khiso kamo nyi nga gira Jerusalema, nyi khothede vapizane* nya vangi kholu nyi di gu dzumeledwe khu vaprista nya vakhongolo gu gira isoso nigu tepo va nga ba va vbweta gu songwa nyi di gu seketeya mawonelo yoyo. 11 Nyi va tshaniside dzisinagogani dzatshavbo na nyi gu zama gu kheni nyi na va digisa gukhodwa gwawe. Nigu kha nga olu nyi nga ba nyiri ni giviti nya gikhongolo khavo nyi di bwe nyi ya tshanisa ni vambe va nga ba va romo omu nya mambe madhoropa ya vbavbandze.

12 “Na nyiri ndziyani nya gu hongole Dhamasko gasi gu ya gira isoso khu gu ba nyi dzumeledwe khu vaprista nya vakhongolo, 13 u ngu dziti Pfhumu, ni vbakari nya mihani nyi di wona gulasa nyo gendze nyo vbindre ni lidambo na guta khu ndzadzini gu ta nyi fenengedza gumogo ni ava nyi nga ba nyiri navo. 14 Hatshavbo hi di thega vbavbatshi, khavbovbo nyipwa lito na li gu nyi embeya khu Gihebheru, khilo: ‘Sawule, Sawule, khu ginani u nyi tshanisago? Wo dzi bayiseya wabune khu gu zama gu dwana ni eni.’* 15 Khavbovbo, nyi di mu wudzisa, kheni: ‘Khuwe mani, Pfhumu?’ Pfhumu yi di nyi hakha, khiyo: ‘Kheni Jesu oyu u mu tshanisago. 16 Khuga u ema, kholu nyi gu hathide gasi gu khala githumi gyangu ni fakazi nya silo u si wonidego ni esi nyi na gu yeyedzago maningano ni eni. 17 Nyi na gu vbulugisa mandzani ga Vajudha ni ga mayigo nyi na gu rumeyago gwawo 18 gasi u ya va tula maho, u va dusa gidemani, u va yisa guwonegeyani; u va dusa mandzani ga Sathane, u va yisa ga Nungungulu gasi va divaledwa sighoho va bwe va hakha thomba eyi Nungungulu a ningidego ava a va hathidego kholu va khodwago avba gwangu.’

19 “Khu kharato, Pfhumu Agiripa, kha nya gi kanyisa giwoniso gya ndzadzini. 20 Ganiolu, gupheya nyi di ya tshumayela vathu va Dhamasko, khavbovbo nyi ya tshumayela va Jerusalema, nyi ya tshumayela Judheya gwatshavbo nyi bwe nyi ya tshumayela vanyamayigo, nyi va embeya gu kheni va yede gu vbindrugedza va wuya ga Nungungulu khu gu va gira mithumo yi yeyedzago gu khiyo va dzi layide. 21 Khiso si nga gira Vajudha va nyi mola tempeleni va zama gu nyi songa. 22 Ganiolu, kha nga olu Nungungulu a nyi phasago nyi ngo simama gu tshumayela kala muhuno, vadugwana ni vakhongolo, nigu kha nyi ganeyi simbe nyo hambane ni esi vaprofeti ni Mosi va ganedego gu khavo si na girega: 23 nyo khiso Kristo a na tshaniseka nigu a na khala oyu nyo pheye nya gu wuswe khu ga vafudego. A na tshumayela guwonegeya ga Vajudha ni vanyamayigo.”

24 Pawulo na ngo ganeya, Festo a di ganeya khu lito nyo khugege, khuye: “U ngu handruga Pawulo, gu hevbula ngudzu gu ngu gu handrugisa!” 25 Ganiolu, Pawulo a di hakha, khuye: “Khandri nyo handruga Pfhumu Festo, ganiolu esi nyi ganeyago lisine nigu si ngu pwala. 26 Nyi ngu dzipwa na nyi tshulegide gu ganeya ni pfhumu kholu uye a ngu mati gwadi mahungu yaya. Nyi ngu tiyisega gu kheni gimwalo ni gimwegyo nya silo sesi gi nga mu vbindra kholu gimwalo nya iso gi nga girwa gusihalani. 27 Pfhumu Agripa u ngu khodwa ga vaprofeti? Nyi ngu dziti gu kheni u ngu khodwa.” 28 Ganiolu, Agripa a di hakha Pawulo, khuye: “Vbadugwana u nga hadzi nyi vbindrugedza nyi khala Mukristo.” 29 Khavbovbo, Pawulo a di hakha, khuye: “Nya gu lomba ga Nungungulu gu kheni gu hweya ni gu mba hweya uwe Pfhumu Agripa ni vatshavbo muhuno va nyi pwago va khala nga eni, ganiolu na va sa hungeledwa dzikorenti dzedzi.”

30 Khavbovbo, pfhumu yi di khuga yi ema, ghovhernadhori, Bherenise ni vambe va nga ba va khade va di khuga navo va ema. 31 Tepo va nga ba va duga, va di pheya gu bhula, khavo: “Mwama yoyu kha ghoha gilo gi yelago gu a songwa mwendro gu khothedwa.” 32 Khavbovbo, Agiripa a di embeya Festo, khuye: “Nari khatshi mwama yoyu kha lomba gu hongola ga Sezari na tshudwe.”

27 Kha nga olu gu nga ba gu hungidwe gu pwani hi na hongola Italiya, Pawulo ni simbe sibotshwa va di ningedwa ga muthangeyi nya masotshwa nyo pwani khu Juliyo, a nga ba ari wa tsawa wa Augusto. 2 Hi di khileya navhiyu nyo gute khu Adharamata yi nga ba yiri vbafuvbi ni gu khuga yi hongola malangani nya guhambane-hambane ya Aziya. Khavbovbo hi di pheya lipfhumba lathu, hi diri ni Arisitariko wa Makedhoniya ga Tesalonika. 3 Khu mindru gakone hi di vboha Sidhoni. Juliyo a di sayisa gwadi Pawulo, a mu dzumeleya gu khuye a wusedwa khu dzipari dzaye ni gu hakha giphaso gyawe.

4 Hi di khuga khu Sidhoni hi ya dugeya vbafuvbi ni gidwani gya Kipre kholu hi di gu gundra phuvbo.* 5 Khu kharato, hi di vbindra khu mayigoni ga Silisiya ni Panfiliya, hi ya ema dhoropani ga Mira tigoni ga Lisiya. 6 Iyoyo muthangeyi nya masotshwa a di ya mana navhiyu yi nga ba yita khu Alexandriya yi hongola Italiya, a hi khiledza umomo. 7 Hwane nya gu ba hi gimbide khu vbadugwana-vbadugwana khu matshigu nya mangi, hi di hegisa khu gu vboha Kinudhu. Kha nga olu hi nga ba hi zama gu gundra phuvbo hi di dzemba hi gimbileya khu bambe nya gidwani gya Kreta vbafuvbi ni Salimona. 8 Hi di simama gu gimbiya vbafuvbi ni fungu, khu gu hegisa hi vboha wulanga wu ranwago pwani Masiwo-Yadi, vbafuvbi ni lidhoropa la Laseya.

9 Gu di vbindride tepo nyo laphe nigu si diri ni mhango gu gimbiya khu ngalava kholu ambari litshigu nyo pfhunge* li di vbindride, khu kharato Pawulo a di va gengedza, khuye: 10 “Vama-khwathu, nyi ngu wona gu kheni liendro leli li na resa mhango nya yikhongolo nigu hi na luza silo nya singi nasiri esi si gomogo omu nya navhiyu mwendro navhiyu yakone basi, ganiolu ambari ni womi wathu.” 11 Ganiolu, muthangeyi nya masotshwa wulangani nyo engise esi Pawulo a nga ganeya a di engisa marinyero ni mune navhiyu. 12 Kha nga olu wulanga wule nyo emise navhiyu wu nga ba wu si ningani gu khala khu nango nya girame, nya vangi va di gu seketeya gu khavo tshukwana gu hongodwa va zama gu vboha Fenisi dhoropani ga Kreta, gu khadego phuvbo ga noridheste* ni sudhuweste* gasi hi ya sihala iyo girame.

13 Tepo phuvbo ya sul* yi nga pheya gu furugedza vbadugwana va di pimisa gu khavo va di si kodzide. Khavbovbo, va di kula fero va simama gu gimbiya khu bambe ga Kreta vbafuvbi ni fungu. 14 Ganiolu, khadukhadu yi di veta phuvbo nya yikhongolo yi nga ba yita khu gidwani yi ranwago pwani phuvbotshane nya ronga.* 15 Iyo yi di ta pengisa navhiyu, khavbovbo hi yi diga khu gu yi pala gu yi gimbidzisa, yi ndrindrwa khu phuvbo. 16 Hi di vbindra khu gidwani nya gidugwana gi ranwago pwani Kawudha, ganiolu kha ha si kodza gu woneleya gingalavana gi nga ba gi ndrindwa khu navhiyu. 17 Hwane nya gu ba va gi ndrindride khu dzingodzi va di gi bedza omu nya navhiyu, va di hunga navhiyu khu vbavbatshi. Khu kharato, khu gu thava gu khavo navhiyu yi tshegema Sirti,* avo va di tshula matanga, va diga navhiyu yi ndrindrwa khu phuvbo. 18 Kha nga olu phuvbo yi nga ba yi hi veta khu tshivba ni tshivba, khu mindru gakone hi di pheya gu duseleya sombo hi rinya matini. 19 Khu litshigu nya wuraru, va di dzudzuga matini satshavbo si nga ba si lumba navhiyu.

20 Hi vbedzide matshigu nya mangi nya mba wona lidambo mwendro dzinyeledzi ni gu hi di gu vetwa khu gingulo nya gikhongolo nyo bwe hi si tumbi gu khethu hi na vbanya. 21 Hwane nya gu ba ma vbindride matshigu nya mangi na va sa hodza gilo, Pawulo a di khuga a ema vbakari gwawe a ganeya, khuye: “Vama-khwathu, gu diri tshukwana nari khatshi mu di nyi engiside hi khala Kreta kholu na ha sa luza silo satshavbo sesi nigu na ha sa tshaniseka khu ndziya yeyi. 22 Ambari ulolo, tiyani hwambo kholu mwalo ni moyo wanu a na fago, navhiyu khiyo basi yi na pandregeyago. 23 Ni wutshigu nyi tedwe khu ngilozi ya Nungungulu wangu oyu nyi mu thumeyago, 24 yi ta khiyo: ‘U nga thavi Pawulo. U yede gu wonana ni Sezari, Nungungulu a na gu vbulugisa gumogo ni avo u gu navo omu nya navhiyu.’ 25 Khu kharato vama-khwathu, tiyani hwambo kholu nyi ngu khodwa gu kheni Nungungulu a na tadzisa esi a nyi embedego. 26 Ganiolu, gu vbwetega hi ya tshegema gidwani nyo khaguri.”

27 Hwane nya 14 matshigu, na hi ngo penga-pengiswa yiphwani ya Adriya, ni vbakari nya wutshigu, vamarinyero va di pheya gu tugula gu khavo navhiyu yi di gu hidzimeya funguni. 28 Va di pima gu eta nya mati, va mana gipimo nya 36 dzimetro;* na hi gimbidenyana, avo va di pima gambe va mana gipimo nya 27 dzimetro*. 29 Kha nga olu va nga ba va thava gu khavo navhiyu yi na tshegema siwindrini, va di tshisa 4 dzifero khu gisalotunu, va vireya gugya. 30 Ganiolu, vamarinyero va di zama gu thava khomu nya navhiyu, va tshisa gingalavana matini va gira khatshi vo vbweta gu ya tshisa dzifero dza thonvutunu nya navhiyu. 31 Pawulo a di embeya muthangeyi nya masotshwa ni masotshwa, khuye: “Mwa gu diga vamarinyero va thava, kha mu na nga vbuluga.” 32 Khu kharato, masotshwa ma di piya dzingodzi dzi nga ba dzi hungide gingalavana va gi diga gi thega.

33 Na gu hongola gugyani, Pawulo a di kutsa vatshavbo gu hodza gilogyo, a di va embeya, khuye: “Gu ngu vbindra 14 matshigu na mu gu vireya nya mba hodza gilo. 34 Khu kharato, nyi ngu mi kutsa gu kheni mu hodza gasi mi mana tshivba kholu mwalo gwanu a na luzago ni ndzudzu moyo.” 35 Hwane nyo ganeye isoso, Pawulo a di dzega pawu a bonga Nungungulu na gu wonwa khu vatshavbo a yi piya a pheya gu hodza. 36 Khavbovbo, vatshavbo va di tiya hwambo va pheya navo gu hodza. 37 Ethu hatshavbo hi nga ba hi romo omu nya navhiyu hi diri 276 vathu. 38 Hwane nya gu ba va hodzide va khura, va di dzudzuga trigu matini gasi gu navhiyu yi vbevbuga.

39 Tepo gu ngagya kha va nga liti litigo lile, ganiolu va di wona fungu va zama gu ya tshegemisa avbo navhiyu. 40 Khu kharato, va di piya dzingodzi dzi nga ba dzi hungide dzifero va dzi diga dzi thega matini khu tepo yayimweyo va tshula dzilemi; khavbovbo, va ghwimba litanga la thonvutunu va hongola funguni. 41 Ganiolu, navhiyu yi di veta mafu khu tshivba, yi tshegema. Thonvu nya navhiyu yi di kweya, gisalo gi pheya gu pandregeya. 42 Khu kharato, masotshwa ma di hunga gu songa sibotshwa gasi si si hambeyi si tutuma. 43 Ganiolu, muthangeyi nya masotshwa a di gu vbweta gu vbulugisa Pawulo, khu kharato kha va dzumedzisa gu gira isoso. Uye a di ruma gu khuye vatshavbo va nga ba va kodza gu hambeya va pheya khavo va ndraga va beya matini, va hambeya va hongola funguni, 44 ava vambe va tshala hwane. Vambe va di duga khu gu thumisa madhera, vambe va duga khu gu thumisa sipandre nya navhiyu. Khu kharato, vatshavbo va di vboha funguni.

28 Hwane nya gu ba hi vbulugide, hi diti gu khethu gidwani gile gi di gu ranwa gu pwani Malita. 2 Vavbanyi va mule va di hi gireya wuwadi nya wukhongolo. Kha nga olu gu nga ba guwa ndzadzi ni gu gira girame, va di khondrisa nilo va hi rana hatshavbo hi ya wora. 3 Pawulo a di roledzeya dzikhuni a dzi rinya niloni, khavbovbo gu di duga nyoga nya vhenene ngudzu khu gupwa guvbisa yi ta mu dandrameya mandzani. 4 Tepo vavbanyi va mule va nga wona nyoga yile nya vhenene na yi dandramede mandzani gwaye, va di pheya gu bhula khu gyawe khavo: “Khu lisine, mwama yoyu gighevenga, ambari olu a nga vbuluga matini Muphodzi* kha dzini gu mu diga a vbanya.” 5 Ganiolu, Pawulo a di mitegedza, nyoga yi thega niloni nya mba mu gira gilo. 6 Avo va di gu vireya gu mu wona na gu simba mwendro gu thega vbavbatshi a dzegeya gufa. Hwane nya gu ba va virede tepo nyo laphe va wona gu khavo gimwalo gi nga ba gi dugeleya va di vbindrugedza mawonelo va pheya gu ganeya khavo uye nungungulu.

7 Vbafuvbyana mule gu diri ni sipeto* si nga ba si lumba mwama moyo nyo pwani khu Pubhiliyo, a nga ba ari mufumeyi gidwani mule. Uye a di hi hakha gwadi hi khala ndrangani gwaye matshigu mararu. 8 Papayi wa Pubhiliyo a di gu lade kholu a diri ni feveri ni gu a di gupwa ndrani, khu kharato Pawulo a di ya mu wona. Uye a di gombeya, a mu handzega mandza, a mu hawulugisa. 9 Khavbovbo, vambe vadwali va gidwani mule va dita ga Pawulo va ta hawulugiswa khuye. 10 Vbavbandze nya isoso, avo va di yeyedza githawo gyawe khu gu hi ninga silo nya singi. Tepo hi nga ba hi vbweta gu khileya navhiyu hi hongola, avo va di hi ninga satshavbo hi nga ba hi si vbweta.

11 Hwane nya migima miraru, hi di khuga khu navhiyu ya Alexandriya iyo yi nga ba yi khade gidwani nangoni nya girame. Navhiyu yoyo yi diri ni gifananiso nya “Sanana sa Zewusi” khu thonvutunu gakone. 12 Hi di vboha Sirakuza, hi ya vbedza matshigu mararu iyoyo. 13 Khiyoyo hi di simama ni lipfhumba kala Rejiyo. Gu di furugedza siga,* khu kharato hi di vboha Puteyoli khu litshigu nya wuvili. 14 Iyoyo hi di ya mana vandruye va nga hi gurumedza gu khala navo khu 7 matshigu, khavbovbo hi di hongola Roma. 15 Tepo vandruye va ngapwa gupwani hi ngu hongola iyoyo, va di hi khinga merkadhu ga Apiyo va bwe va hi khinga wulanga wu nga ba wu ranwa gu pwani Dzinyumba Dziraru. Tepo Pawulo a nga va wona, a di bonga Nungungulu a tiya hwambo. 16 Tepo hi nga vboha Roma, Pawulo a di dzumedziswa gu khala enga a ghadwa khu lisotshwa limwedo.

17 Hwane nya matshigu mararu, uye a di ranisa vama va nga ba va ningwa lisima khu Vajudha, tepo va nga tshangana a di va embeya, khuye: “Vandruye, nyi modwe Jerusalema nyi vbedza nyi yiswa ga Varoma ambari olu nyi nga mba ghoha gilo gi dwanisanago ni vathu mwendro ni siolovedzo sa vakokwe vathu. 18 Hwane nya ba va nyi thethisede va di vbweta gu nyi tshula kholu kha va mana nandru nya yedwe gu songwa. 19 Ganiolu, kha nga olu Vajudha va nga ba va bomba nyi di gurumedzega gu lomba gasi nyi ya lamudwa khu Sezari, nasiri khu gu ya vbweta gu ketsari va na gyathu. 20 Khiso si nyi giridego nyi vbweta gu mi wona ni gu ganeya nanu, kholu nyi hungeledwe dzikorenti dzedzi khu kotani nya gutumba ogu Vaisrayeli va gu nago.” 21 Avo va di hakha, khavo: “Ethu kha ha hakha malangaliya ya Judheya ma ganeyago khuwe nigu mwalo ni moyo wa Judheya a nga hi reseya mahungu yoyo mwendro a nga ta ganeya guvivba khuwe. 22 Ganiolu, hi si wonide na siri tshukwana gu tapwa khuwe iso u si pimisago kholu khu lisine esi hi sitigo khu tsawa wowu khiso si ganedwago malangani yatshavbo.”

23 Khu kharato, avo va di hunga litshigu gasi va ta bhula naye gambe. Tepo li nga vboha litshigu lolo, avo va di hongola avbo Pawulo a nga ba a romo na vari khu tsawa nya wukhongolo. Gukhugeya dzimindrudzile kala wutshigu, Pawulo a di va ninga wufakazi nyo vbeleye na gu va tshamuseya maningano ni Mufumo wa Nungungulu, uye a di gu zama gu va gira va khodwa ga Jesu khu gu thumisa nayo wa Mosi ni mabhuku ya Vaprofeti. 24 Vambe va di gu khodwa esi Pawulo a nga ba a ganeya, ganiolu vambe va di si khodwi. 25 Khu kharato, kha nga olu va nga ba va si pwani, va di pheya gu phalalegeya. Khavbovbo Pawulo a di va embeya, khuye:

“Liphuvbo nya guage li ganede ga vakokwe vanu khu gu thumisa muprofeti Isaya, khilo: 26 ‘Gimbiya ga vathu vava, u ya va embeya, khuwe: “Enu mu napwa, ganiolu kha mu na nga pwisisa gilo; mu na khedza, ganiolu kha mu na nga wona. 27 Kholu myonyo ya vathu vava yi tshorede; va tshikide dzindzeve,* va sega maho, gasi va si woni khu maho, ne va sipwi khu dzindzeve, ne va si pwisisi khu myonyo gasi va vbindrugedza, nyi va hawulugisa.”’ 28 Khu kharato, dzitini gu khenu guvbulugiswa gogu ga Nungungulu gu rumedwe ga vanyamayigo nigu avo va na gu hakha.” 29 *——

30 Pawulo a di simama khu myaga mivili omu nya nyumba yile a nga lugari nigu a di gu hakha khu mandza mavili vatshavbo va nga ba va hongola va ya mu wona, 31 a va tshumayela maningano ni Mufumo wa Nungungulu, a va hevbudza maningano ni Pfhumu Jesu Kristo khu gutiya gwatshavbo nya mba himbedzedwa khu muthu.