LIDANGALIYA LI HONGOLAGO GA VAROMA

1 Lidangaliya leli la guta khiyo ga Pawulo, githumi gya Kristo Jesu, a ranidwego gasi gu khala mupostoli a bwe a hathwa gasi gu tivegisa mahungu nya yadi ya Nungungulu. 2 Nungungulu tumbiside mahungu yaya nya yadi gale yoyo, omu nya Milowo nya guage khu gu thumisa vaprofeti vaye. 3 Mahungu yaya ma gu ganeya khu Gyanana gyaye, uye a nga ba ari gitugulwana gya Dhavhidhe. 4 Somo guagani gu khiso uye Gyanana gya Nungungulu, kholu Nungungulu thumiside tshivba nya liphuvbo laye nya guage gasi gu mu wusa khu ga va fudego; ina, Jesu Kristo, Pfhumu yathu. 5 Khu gu thumisa uye, Nungungulu hi yeyedzide wuwadi waye nya wukhongolo. Jesu nyi hathide gasi gu khala mupostoli nyi feya gu phasa vathu nya mayigo yatshavbo gasi va yeyedza gukhodwa ni gu engisa, va bwe va ningeya wuzundzo lina laye. 6 Enu mu vamowo nya ava va hathidwego* vbakari ga vanyamayigo gasi gu landreya Jesu Kristo. 7 Lidangaliya leli li di lovedwa enu mwatshavbo mu gomogo Roma, mu haladzwago khu Nungungulu, ava a va ranidego gasi gu khala va nyo aga:

Wuwadi nya wukhongolo ni gurula gutago khiyo ga Nungungulu, Papayi wathu, ni ga Pfhumu yathu Jesu Kristo gu na khale nanu.

8 Gupheya, khu gu thumisa Jesu Kristo nya gu bonga Nungungulu wangu khu kotani yanu, kholu tigoni gwatshavbo gu ngu ganedwa khu gukhodwa gwanu. 9 Nya gu thumeya Nungungulu khu monyo wangu watshavbo khu gu nyi huweleya mahungu nya yadi maningano ni Gyanana gyaye, nigu Nungungulu a ngu dziti gu khuye gima nyi si gu digi gu mi khumbugani omu nya milombelo yangu. 10 Nyo gombeleya gu kheni so kodzega, nigu Nungungulu a gu dzina, nyi mi endreya. 11 Nyi ngu dzina ngudzu gu mi wona gasi nyi mi ninga giningwa gitago khiyo ga Nungungulu mu feya gu tiyiswa gukhodwani 12 mwendro saye gasi hi ta tiyisana khu gyathu gukhodwani.

13 Vandriyathu, nyo vbweta gu kheni mu dziti gu khenu dzitepo nya dzingi nyi di dzinide gu mi endreya, ganiolu kha sa kodzega. Nyi di gu vbweta gu ta wona mihandro nya yadi nya gutshumayele gwathu iyoyo kha nga si giregago ga mambe mayigo. 14 Nyi na ni mangava ga vathu vatshavbo, ga Vagreki ni ga vathu nya mambe mayigo, ga va nya guti ni sipumbo. 15 Nyi lambede ngudzu gu mi tshumayela nenu mahungu nya yadi iyoyo Roma. 16 Kha nyi khali dzitshoni khu kotani nya mahungu nya yadi. Khu lisine eyi ndziya nya tshivba eyi Nungungulu a yi thumisago gasi gu vbulugisa ni wevbini a yeyedzago gukhodwa, gupheya khiyo ga Mujudha ni Mugreki nuye. 17 Nungungulu a ngu yeyedza gululama gwaye ga vale va gu na ni gukhodwa, nigu isoso si ngu tiyisa gukhodwa gwawe kha nga Milowo yi ganeyago gu khiyo: “Ganiolu, muthu nyo lulame a na vbanya khu kotani nya gukhodwe.”

18 Nungungulu yeyedzide zanga yaye gukhugeya khu ndzadzini ga satshavbo silo nyo vivbe si girwago khu vathu. Avo vo segeya vathu guti lisine, 19 kholu esi si yedego gu tidwa maningano ni Nungungulu si ngu wonega gwadi gwawe, kholu Nungungulu si tivegiside gwawe. 20 Makhalelo yaye hi si kodzigo gu ma wona, hi nga ma pwisisa ha gu hevbula khedzi litigo li giridwego khidzo, hi ngati edzi a khadego khidzo khu gu hevbula silo a giridego. Silo sesi sa gu yeyedza tshivba yaye nya gupindruge nigu sa gu yeyedza gu khiso uye khuye Nungungulu. Khu kharato, avo va mwalo gighelo nyo khavo kha va muti. 21 Ambari olu va mu tigo Nungungulu, avo kha va mu dhumisa nga Nungungulu wawe nigu kha va mu bonga, vbavbandze nya isoso, avo va di pimisa nga sipumbu nigu myonyo yawe yi di yeyedza gu mba pwisisa.* 22 Ambari olu vathu vovo va gu khavo va nguti, avo sipumbu. 23 Vbavbandze nya gu dhumise Nungungulu oyu a si figo, avo va gu dhumisa sifananiso nya vathu va fago, ni sifananiso nya sinyoni, ni sifananiso nya sirengo nya mawundru mana, ni sirengo nyo khwirire.

24 Khu kotani nya olu va nga ba va vbweta gu vbanya khu guya khu gudogoreya nya myonyo yawe, Nungungulu a di va dzumeleya gu gira silo nya ndzilo gasi va nyenyezisa sivili sawe. 25 Va digide gu landrisa lisine la Nungungulu va landrisa malipha. Nigu vo khozeya esi Nungungulu a si vangidego, vbavbandze nyo khozeye Muvangi waso oyu a yedego gu dhumiswa kala gupindruga. Amen. 26 Khiso si giridego gu Nungungulu a va diga va thegeya gudogoreyani nyo nyenyeze nya malawu. Vanyamayi va gomogo vbakari gwawe va digide gu hengeya malawu ni vama va gira silo si hambanago ni tumbunugo. 27 Vama navo va digide gu hengeya malawu ni vanyamayi, va dogoreyana khu gyawe khu tshivba ni tshivba; vama va hengeya malawu ni vama-kwawe, va gira silo nyo nyenyeze. Ganiolu, avo va na tsayiswa khu guvbeleya khu kotani nya sihonohono sawe.

28 Kha nga va nga ba va pimisa gu khavo khandri sa lisima guti Nungungulu, Uye va digide va simama gu pimisa silo nyo vivbe gasi va gira silo nya mba yela. 29 Vathu vovo va di tade khu mafumbo yatshavbo nya silo nya mba lulama, wuvivbi, wudogodogo ni gu gira silo nya mba sadi. Avo va di tade khu lidiwo, wughevenga, mayunga, gu lipha, wulala, milembo, 30 va diri vasingedzi, va di gu nyenya Nungungulu, va diri vavaleteyi, va nya matshandza, va nyo dzi khusedza, vakutsedzeyi nya mayunga, va nyo mba engisa vavelegi vawe, 31 va nyo mba pwisisa, va nyo mba gira esi va si tumbisago, va nyo mba na lihaladzo ni wuhindzi. 32 Avo va ngu dziti gwadi gu khavo Nungungulu ganede gu khuye vathu va girago silo nya nga isoso va yede gufa. Avo khandri vo gira basi silo soso, ganiolu va gu seketeya ni ava va girago.

2 Gani u muthu muni, u mwalo gighelo nyo lamule vambe khu gu ba va gira silo sasimweso u girago nuwe. Tepo u va lamulago, wo dzi rwega nandru wabune. 2 Ganiolu, ethu hi ngu dziti gu khethu tepo Nungungulu a lamulago vathu va girago silo soso, gulamula gwaye khwa lisine.

3 Wo pimisa gu khuwe wa gu lamula vambe khu silo sasimweso u girago nuwe u na vbuluga gu lamudwa khu Nungungulu? 4 Kha wu dziti gu khuwe uye o gu gireya wuwadi waye nya wukhongolo a bwe a gu laphiseya monyo? Kha wu si woni gu khuwe khu wuwadi waye Nungungulu o zama gu gu phasa gasi gu u vbindrugedza? 5 Ganiolu, wa gu dzi bangisa hungo, u bomba gu vbindrugedza, Nungungulu khu lisine a na gu tsayisa khu litshigu nya zanga yaye, tepo a na yeyedzago gulamula gwaye nyo lulame. 6 Uye a na bweledzeya mwendro gu tsayisa moyo ni moyo guya khu mithumo yaye: 7 Uye a na ninga womi nya gupindruge ga vale va simamago gu gira silo nya sadi; vathu vovo vo vbwetedzeya wudhumo, ni wuzundzo, ni womi wu pindrugago. 8 Ganiolu, Nungungulu a na yeyedza zanga yaye nya yikhongolo ga vale va golago gu dwanisa ni vale va si engisigo lisine. 9 Ni wevbini a girago silo nyo vivbe, gani Mujudha, gani Mugreki a na tshaniseka. 10 Ganiolu, ni wevbini a girago esi nya sadi a na mana wudhumo, ni wuzundzo, ni gurula gukhugeya ga Mujudha ni Mugreki nuye. 11 Kholu Nungungulu mwalo gihatheya.

12 Vatshavbo vale va ghohidego, va gu mwalo Nayo wa Mosi va nafa gambe nya mba na Nayo wa Mosi; ganiolu, vale va ghohidego na va gu fumedwa khu nayo, va na lamudwa khu nayo wowo. 13 Khandri vale va pwago nayo va lulamidego mahoni ga Nungungulu, ganiolu avo va lulamidego mahoni ga Nungungulu khu vale va landrisago esi si ganedwago khu nayo. 14 Tepo va nya mayigo, va gu mwalo nayo, va girago khu tumbunugo silo si lombwago khu nayo, avo va gu yeyedza gu khavo va na ni nayo ndrani gwawe. 15 Avo va gu yeyedza gu khavo esi nayo wu si hevbudzago si lovidwe myonyoni gwawe, nigu mavhalo yawe ma ngu dzumeleyana navo, mapimo yawe ma ngu va ninga nandru mwendro gu va emeya. 16 Esi khiso si na giregago litshigu eli Nungungulu khu gu thumisa Kristo Jesu a na lamulago silo esi vathu va sihidego, satshavbo sesi so gira gipandre nya mahungu nya yadi nyi ma tshumayelago.

17 Vambe vbakari gwanu va ngu dzi embeya gu khavo Vajudha nigu enu mu ngu tumba nayo mu bwe mu dzi khusedza khu kotani nya wupari wanu ni Nungungulu. 18 Enu mu ngu guti gugola ga Nungungulu nigu mu ngu dzumeya silo si lulamidego kholu mu hevbudzidwe khu Nayo. 19 Mwa gu dzi embeya gu khenu mu ngu si kodza gu hethedza sikhumu ni gu ninga wenengedzo ava va gomogo gidemani. 20 Mwa gu pimisa gu khenu mu nga si kodza gu kawuka sipumbo ni gu hevbudza sanana kholu mu na ni guti nya lisine li gomogo omu nya Nayo. 21 Ganiolu, uwe u hevbudzago vambe, khu ginani u gu mba dzi hevbudza wabune? Uwe u tshumayelago gu khuwe “U ngabi,” u nguba? 22 Wari khuwe “U nga giri wubhayi,” uwe u ngu gira wubhayi? Wari khuwe nyenya sifananiso, ganiolu uwe u nguba omu nya dzitempele? 23 U ngu dzi khusedza khu gu khuwe u ngu wuti nayo wa Nungungulu, ganiolu ina khu theyi dzitshoni Nungungulu khu gu ndraga Nayo? 24 “Lina la Nungungulu li ngu vadwa vbakari nya mayigo khu kotani yanu,” kha nga si lovidwego omu nya milowo.

25 Guhana wugwera* go phasa basi wa gu ba u landra nayo; wa gu mba engisa nayo so fana ni gu ba wa sa hana wugwera. 26 Ambari abari gu muthu kha hana wugwera, a gu gira esi Nayo wu lombago, Nungungulu a na mu wona nga khatshi hanide wugwera. 27 Enu mu hevbudzidwe maningano ni guhana wugwera ni esi si lovidwego omu nya Nayo, ganiolu kha mu si landrisi. Khu kharato, muthu a nga mba hana wugwera a gu landra Nayo a ngu mi lamula. 28 Mujudha nya lisine khandri wule a yeyedzago Wujudha waye khu vbavbandze, nigu wugwera nya lisine khandri wule wu wonegago givilini. 29 Mujudha nya lisine khu wule a gu Mujudha khu ndrani, nigu uye hanide wugwera monyoni khu gu thumisa liphuvbo nya guage nasiri khu gu landra nayo wu lovidwego. Muthu yoyo a gu zundzwa khu Nungungulu, nasiri khu vathu.

3 Khu gevbini giphaso nya gukhale Mujudha mwendro khu gevbini giphaso nya gu hane wuguwera?* 2 Satshavbo si na ni giphaso nya gikhongolo. Gupheya khu gu Nungungulu ningide Vajudha mahungu nya guage. 3 Ganiolu, ahati vambe gwawe va nga mba tumbega ke? Olu va gu mwalo gutumbega ina so thula gu khiso Nungungulu kha tumbega? 4 Ahihi, ambari olu vathu vatshavbo va liphago, Nungungulu kha liphi, kha nga Milowo yi ganeyago, khiyo: “U na wonwa na wu lulamide khu kotani nya esi u ganeyago u bwe u dugeleya litshigu u na lamudwago.” 5 Gu mba lulama gwathu ga gu yeyedza guagani gu khugo Nungungulu lulamide. Ina sa gu thula gu khiso Nungungulu a gu zangari si vivbide? (Nyo ganeya khu maganelelo ma pwisiswago khu vathu.) 6 Ahihi! Kholu nari khatshi Nungungulu kha lulama a di hadzi lamula kharini litigo?

7 Nigu gambe abari gu malipha yangu ma gu si yeyedza gwadi gu khiso Nungungulu na ni lisine ma bwe ma mu reseya wudhumo, vambe va di hadzi wudzisa, khavo: ‘Khu ginani nyi lamudwago nga gighohi?’ 8 Nigu khu ginani hi si ganeyigo gu khethu: “Hongoleni hi gira silo nya guvivbe gasi gu dugeleya silo nya sadi” kha nga edzi vambe va hi singedzago khidzo? Avo va ganeyago silo soso va na lamudwa guya khu gululama.

9 Ina so thula gu khiso ethu Vajudha hi na ni lisima ngudzu guvbindra vambe? Ahihi! Kholu hi yeyedzidwe gupwani Vajudha ambari ni Vagreki va gu fumedwa khu gighoho, 10 kha nga Milowo yi ganeyago gu khiyo: “Mwalo ni muthu moyo nyo lulame; 11 mwalo a gu na ni gupwisisa; mwalo a vbwetedzeyago Nungungulu. 12 Vatshavbo va dugide ndziyani nigu vatshavbo kha va ngo phasa gilo; mwalo ni moyo a girago silo nya sadi.” 13 Ngolo wawe lithowo li tudwego; va gu thumisa lidimi lawe gasi gu lipha.” “Esi si dugago khu kanani gwawe sa gu fana ni vhenene nya dzinyoga.” 14 “Kanani gwawe gu tade khu guvaleteya ni zanga.” 15 “Mingondro yawe ya gu tutumeya gu ya vbalaza novba.” 16 “Omu va vbindrago khumo va gu tshiya marumbi ni wusiwana, 17 kha va yiti ndziya nya gu gire khiyo gurula.” 18 “Avo va mwalo githawo khu Nungungulu.”*

19 Ethu hi ngu dziti gu khethu satshavbo esi Nayo wu ganeyago sa gu hongola ga vale ga gomogo vbavbatshi nya Nayo gasi gu degudza magana yatshavbo ni gu yeyedza gu khuwo litigo latshavbo li na ni nandru ga Nungungulu nigu li yede gu tsayiswa. 20 Mwalo a na wonwago na lulamide khu Nungungulu khu gu ba a gira esi Nayo wu lombago. Nayo wa gu hi gira hi pwisisa gwadi gu khethu hi sighohi.

21 Ganiolu, olu Nungungulu a hi yeyedzide gululama gwaye nya mba thumisa Nayo, kha nga si ganedwego khu Nayo wa Mosi ni Vaprofeti. 22 Vatshavbo va gu na ni gukhodwa va ngu vboheleya avba nya gululame ga Nungungulu va gu yeyedza gukhodwa avba ga Jesu Kristo. Kholu li mwalo litigo li gu la lisima ngudzu guvbindra limbe. 23 Vatshavbo va ghohide nigu kha va si kodzi gu yeyedza wudhumo wa Nungungulu. 24 Nungungulu va wonide na va lulamide khu kotani nya muphaso owu wu livbidwego khu Kristo Jesu. Egi giningwa nya mahala egi Nungungulu a va ningidego khu kotani nya wuwadi waye nya wukhongolo ngudzu. 25 Nungungulu ningede Jesu kha nga muphaso gasi gu vathu va wusedza wupari ni Nungungulu khu kotani nya gukhodwe avba nya novba wa Jesu. Nungungulu giride esi gasi gu yeyedza gululama gwaye. Uye kha yeyedza basi gululama gwaye khu gu divaleya sighoho si giridwego galeyoyo. 26 Ganiolu, hi yeyedzide gambe gululama gwaye khu gu rana ava va khodwago ga Jesu kristo gukhuye va lulamide.

27 Khu kharato, ina hi na ni gighelo nya gu dzi khusedze? Ahihi! Ina hi yede gu dzi khusedza khu gu ba hi engisa Nayo? Ahihi! Ganiolu khu gu ba hi landra nayo nya gukhodwe. 28 Kholu hi ngu dziti gu khethu muthu a gu ranwa pwani lulamide khu kotani nya gukhodwe nasiri khu gu zama gu gira esi Nayo wu rumago. 29 Mwendro ina Nungungulu o wa Nungungulu nya Vajudha basi? Ina khandri Nungungulu nya vathu nya mayigo yatshavbo gambe? Khu lisine uye Nungungulu nya vathu nya mayigo yatshavbo. 30 Kha nga olu Nungungulu a gu moyo basi, uye a na wona ava va hanidego wugwera gumogo ni ava va nga ne hana wugwera kha nga vathu nya gululame khu kotani nya gukhodwe gwawe. 31 Ina sa gu thula gukhiso ha gu songa Nayo khu kotani nya gukhodwe gwathu? Ahihi! Ganiolu ha gu wu seketeya.

4 Hi na khethu ginani khu kokwe wathu Abrahama? 2 Abari gu Abrahama wonidwe na lulamide khu kotani nya esi a nga gira, uye a diri ni gilo nyo dzi khusedze khigyo, ganiolu nasiri mahoni ga Nungungulu. 3 Milowo yari khiyo ginani? “Abrahama khodwe ga Jehovha, nigu uye wonidwe nari muthu nyo lulame.” 4 Muthu a gu thuma gasi gu dzi vbanyisa, tshatshazelo waye kha wu wonwi nga giningwa, ganiolu i fanelo yaye nyo livbwe khu thumo a wu giridego. 5 Ganiolu, nga dundrugeya mwama nyo khaguri na si thumi, ganiolu na gu khodwa ga Nungungulu, Nungungulu a gu uye a wonago oyu nya gu vivbedwe khu monyo na gu lulamide, muthu yoyo a nga wonwa nga muthu nyo lulame khu kotani nya gukhodwe gwaye. 6 Esi khiso Dhavhidhe a nga ganeya tepo a ganedego khu gutsaka gu manwago khu muthu oyu Nungungulu a mu wonago na lulamide, ambari o ba a sa gu thumeya, khuye: 7 “Va ngu tsaka vale mithumo yawe nya guvivbe yi divaledwego ni vale sighoho sawe si fenengedzidwego. 8 A ngu tsaka muthu wule Jehovha a na gu mba theya kota khu sighoho saye.”

9 Ina gutsaka gogu go manwa basi khava va hanidego wugwera* mwendro khu vale gambe va nga mba hana wugwera? Kholu hari khethu: “Khu gukhodwa, Abrahama wonidwe nari muthu nyo lulame.” 10 Gukhodwa gwaye gu wonidwe na gu lulamide ga giemo muni? Na hanide wugwera mwendro na si gu hani wugwera? Si giregide na si gu hani wugwera. 11 Khu hwane nya tepo, uye hakhide giyeyedzo gu gu wugwera, kha nga gifungo nyo khigyo a di gu wonwa nga muthu nyo lulame khu kotani nya gukhodwe a gu yeyedzidego na si gu hani wugwera. Isoso si giregide gasi a khala papayi nya vatshavbo vale va gu na ni gukhodwa ambari na va sa hana wugwera, gasi anavo va wonwa nga vathu nyo lulame. 12 Uye gambe khade papayi nya vathu va hanidego wugwera,* nasiri basi nya ava va hanidego wugwera, ganiolu nya vale gambe va landredego giyeyedzo nya gukhodwe gu nga ba guri ni papayi wathu Abrahama na si gu hani wugwera.

13 Kholu khandri khu kotani nya nayo Abrahama ni gitugulwana gyaye va ningidwego gitumbiso nya gu hodze thomba nya litigo, ganiolu si giregide isoso khu kotani nya gululame va gu yeyedzidego khu kotani nya gukhodwe. 14 Nari khatshi va di hadzi hodza thomba nya litigo khu kotani nya nayo, gukhodwa na guri mwalo lisima nigu gitumbiso egi a ningidwego Abrahama na gi siri gya gilo. 15 Gu ndraga nayo sa gu resa gutsayiswa, ganiolu avbo wu gu mwalo nayo gu mwalo gu ndraga nayo.

16 Khiso si girago hi mana situmbiso sa Nungungulu khu kotani nya gukhodwe, kholu gukhodwa giningwa hi ningidwego mahala khu Nungungulu. Satshavbo situgulwana sa Abrahama si nga si kodza gu mana gitumbiso, nasiri basi vale va engisago Nayo, ganiolu ni vale va gu na ni gukhodwa nya nga ogu ga Abrahama, a gu papayi wa ethu hatshavbo. 17 (Kha nga si lovidwego omu nya Milowo gu pwani: “Nyi gu hathide gasi gu khala papayi nya mayigo nya mangi.”) Abrahama yeyedzide gukhodwa gogu ga Nungungulu, oyu a girago gu ava va fudego va vbanya a bwe a ganeya khu silo si gu mwalo nga khatshi somo. 18 Abrahama kha nga ba a pimisa gu khuye a na manega ni sanana. Khu kotani nya gutumba a nga ba ari nago, uye a di gu khodwa gu khuye a di hadzi khala papayi nya mayigo nya mangi, khu guya khesi Nungungulu a ganedego, khuye: “Situgulwana sago si na ba siri singi.” 19 Ambari olu gukhodwa gwaye gu nga ba gu ngo tiyide, uye a di gu wona givili gyaye nga khatshi gi fude (kha nga olu a nga ba ari ni tanga nya 100 myaga), nigu a di gu dziti gambe gu khuye Sara a di gumbide ngudzu gasi gu velega sanana. 20 Ganiolu, khu kotani nya gitumbiso gya Nungungulu, uye gima kha kanakana, ambari gu mba khodwa. Wulangani nya isoso, gukhodwa gwaye gu mu ningide tshivba nigu uye dhumiside Nungungulu. 21 Uye a di gu tiyisega gu khuye Nungungulu na ni makodzelo nyo gire esi a mu tumbisidego. 22 Khu kotani nya gukhodwe, “Abrahama wonidwe nari muthu nyo lulame.”

23 Malito ma gu khayo “wonidwe nari” kha ma lowa khu kotani yaye basi, 24 ganiolu ma lovidwe khu kotani yathu nethu; anethu hi na wonwa nga vathu nyo lulame kholu hi khodwago ga Nungungulu oyu a wusidego Jesu, Pfhumu yathu, khu ga vafudego. 25 Uye a di ningedwa a songwa khu kotani nya sighoho sathu, nigu wusidwe gasi hi wonwa nga vathu nyo lulame.

5 Olu hi wonidwego nga vathu nyo lulame khu kotani nya gukhodwe gwathu, hongoleni hi dzi buzani khu gu gurula ga Nungungulu khu kotani ya Pfhumu yathu Jesu Kristo. 2 Gukhodwa hi gu nago avba ga Jesu Kristo gu ngu hi dzumeleya gu hidzimeya ga Nungungulu ni gu bwe hi dzi buza khu wuwadi waye nya wukhongolo; nigu hi ngu gu tsaka khu kotani nya olu hi gu na ni gutumba nyo hakhe wudhumo wu tago khiyo ga Nungungulu. 3 Khandri isoso basi, ganiolu hi ngu tsaka gambe tepo hi emisanago ni sigaradzo, kha nga olu hi dzitigo gu khethu sigaradzo hi emisanago naso si ngu velega gutimiseya. 4 Gutimiseya gwathu gu ngu hi gira hi tsakedwa khu Nungungulu, gutsakegwa gogo gu ngu hi ninga gutumba. 5 Nigu gutumba gwathu kha gu hi thesi dzitshoni, kholu lihaladzo la Nungungulu li guhudwe monyoni gwathu khu gu thumisa liphuvbo nya guage eli Nungungulu a hi ningidego.

6 Na hi ngari sighohi Kristo fede, khu tepo yi emisidwego, vathu vale va gu mba ninga githawo Nungungulu. 7 Si ngu kala gu muthu a feya muthu nya gululame, ambari ulolo muthu nyo khaguri a nga dzi emiseya gufa, a feya muthu nya wadi. 8 Ganiolu, Nungungulu yeyedzide gu khuye a ngu hi haladza kholu ambari olu hi nga ba hi ngari sighohi, Kristo a hi fede. 9 Olu hi wonidwego na hi lulamide khu kotani nya novba wa Jesu, hi nga engedzeya gu tiyisega gu khethu hi na vbulugiswa ga zanga ya Nungungulu. 10 Hi khade dzipari dzaye khu kotani nya gufe ga Gyanana gyaye, isoso sa gu hi gira hi tiyisega gu khethu olu hi gu dzipari dza Nungungulu hi na vbulugiswa khu kotani nya womi wa Jesu. 11 Esi Nungungulu a hi giredego, khu gu thumisa Pfhumu yathu Jesu Kristo si ngu hi gira hi tsaka kholu khu kotani yaye hi manide wupari hi gu nawo ni Nungungulu.

12 Gighoho gi bede mafuni khu kotani nya muthu moyo, nigu gighoho gi reside gufa. Khu kharato, gufa gu thaphede vathu vatshavbo mafuni kholu vatshavbo va ghohide . . .  13 Ganiolu ga gu ba guri mwalo Nayo, vathu kha va ningwi nandru nya gighoho. 14 Gufa gu fumide gu khugeya ga Adhamu kala ga Mosi, nigu ugo gu fumede vale va nga mba ghoha khu ndziya yayimweyo a ghohidego khidzo Adhamu. Adhamu a diri giyeyedzo gya wule a nga hadzi guta.

15 Ganiolu, giningwa gya Nungungulu kha gi fani ni gighoho gya Adhamu. Vathu nya vangi va fude khu kotani nya gighoho nya muthu moyo basi. Ganiolu, wuwadi nya wukhongolo ngudzu wa Nungungulu ni giningwa a hi ningidego mahala khu gu thumisa wuwadi wa muthu moyo, a gu Jesu Kristo, si khongolo ngudzu. Khu gu thumisa giningwa gegi, Nungungulu a ngu ninga makategwa vathu nya vangi. 16 Guhambana gu gu romo avba nya giningwa nya mahala hi ningidwego khu Nungungulu ni gighoho gi giridwego khu muthu moyo, khogu: Gulamudwa nya gighoho gimwegyo gu hi resede nandru, ganiolu giningwa gya Nungungulu gi dzudego khu kotani nya sighoho nya singi gi giride gu vathu va wonwa na va lulamide. 17 Gufa gu fumide kha nga pfhumu khu kotani nya gighoho nya muthu moyo, ganiolu hi ngu tiyisega ngudzu gu khethu vale va hakhidego wuwadi nya wukhongolo ngudzu wa Nungungulu ni giningwa gyaye nya mahala nya wuwadi va na vbanya gasi gu fuma nga dzipfhumu khu kotani nya muthu moyo, a gu Jesu Kristo.

18 Kha nga olu vathu nya mafumbo yatshavbo va manidego nandru khu kotani nya gighoho gimwegyo basi, khu ndziya nyo fane, gigiro gimwegyo basi nya wuwadi gi giride gu vathu nya mafumbo yatshavbo va wonwa na va lulamide gasi gu mana womi. 19 Kha nga olu gu mba engisa nya muthu moyo basi gu giridego gu vathu nya vangi va khala sighohi, khu ndziya nyo fane gu engisa nya muthu moyo gu na gira gu vathu nya vangi va wonwa na va lulamide. 20 Nayo wu vegidwe gasi gu yeyedza edzi vathu va ghohidego khidzo. Ganiolu, tepo gighoho gi nga engedzeya ngudzu, wuwadi nya wukhongolo ngudzu anuwo wu di engedzeya. 21 Khu kharato, kha nga olu gighoho gi fumidego kha nga pfhumu, gi resa gufa, khu ndziya nyo fane wuwadi nya wukhongolo ngudzu wa Nungungulu olu anuwo wu ngu fuma kha nga pfhumu, khu gu thumisa gululama, nigu uwo wu na resa womi nya gupindruge khu gu thumisa Jesu Kristo, Pfhumu yathu.

6 Hi na khethu ginani? Ina hi yede gu simama gu ghoha gasi wuwadi nya wukhongolo ngudzu wa Nungungulu wu engedzeya gwathu? 2 Ahihi! Womi wathu wu nga ba wu fumedwa khu gighoho wu fude, khu kharato hi nga si kodza kharini gu simama gu vbanya gighohoni? 3 Ina kha mu pwisisi gu khenu kha nga olu hi bhabhatisidwego ga Kristo Jesu hi bhabhatisidwe gambe avba nya gufe gwaye? 4 Ethu hi dzingidwe naye khu kotani nya olu hi bhabhatisidwego avba nya gufe gwaye. Nigu kha nga olu Jesu a wusidwego khu ga vafudego khu kotani nya tshivba nya wudhumo wa Papayi waye, anethu olu ha gu vbanya womi nya wuphya. 5 Ethu hi pwananisidwe gumogo naye khu gufa nya nga ogu gwaye, khu kharato ethu hi na pwananiswa gambe gumogo naye khu guwuswa a wusidwego khugo nuye. 6 Hi ngu dziti gu khethu mavbanyelo yathu ya gale* ma khokhothedwe gumogo naye avba nya simbo gasi gu dusa tshivba nya gighoho givilini gwathu hi feya gu tshulega hi si khali gambe dzigumbi nya gighoho. 7 Kholu muthu a fudego tshudwe avba nya gighoho gyaye.

8 Kha nga olu hi fudego ga Kristo, hi ngu khodwa gu khethu hi na vbanya gambe gumogo naye. 9 Hi ngu dziti gu khethu olu Kristo a wusidwego khu ga vafudego gima kha na ngafa gambe; gufa gu mwalo gambe tshivba avbo gwaye. 10 Uye fude gasi gu fuvisa gighoho khu guvbeleya, nigu womi a wu vbanyago olu a gu wu vbanyeya gasi gu gira gu gola ga Nungungulu. 11 Khu ndziya nyo fane, mu yede gu dzi wona na mu fude gighohoni, ganiolu mu dzi wona na mu vbanya gasi gu gira gugola ga Nungungulu kha nga valandreyi va Kristo Jesu.

12 Mu nga dzumeleyi gighoho gi woneleya edzi mu vbanyago khidzo, nigu mu nga landriseyi gudogoreya nya sivili sanu si fago. 13 Mu nga ningeyi sivili sanu ga gighoho kha nga matshari nyo gire esi nyo vivbe, ganiolu dzi ningeyeni ga Nungungulu kha nga vathu va wusidwego khu gufani. Ningeyani gambe sivili sanu ga Nungungulu kha nga matshari nyo gire silo nya sadi.* 14 Kha gu vbwetegi gu mu fumedwa khu gighoho kholu kha mu thangedwi khu nayo, ganiolu mwa gu thangedwa khu wuwadi nya wukhongolo ngudzu wa Nungungulu.

15 Ina isoso so thula gukhiso hi yede gu ghoha kholu hi gu na ni wuwadi nya wukhongolo ngudzu wa Nungungulu ni olu hi si fumedwigo khu nayo? Ahihi! 16 Ina kha mu dziti gu khenu mwa gu dzi ningeya ga muthu nyo khaguri gasi gu mu engisa kha nga sithumi saye mwa gu dzi gira dzigumbi dza muthu yoyo? Khu kharato, mu nga hatha gu khala dzigumbi nya gighoho gi yisago gufani mwendro dzigumbi nya guengise gu yisago omu nya gululame. 17 Hi ngu bonga Nungungulu kholu ambari olu mu nga ba muri dzigumbi nya gighoho gale yoyo, olu mu ngu engisa khu monyo wanu watshavbo sihevbudzo mu ningidwego. 18 Khu kotani nya gu mba vbeleya gwanu, nyo thumisa maganelelo ma pwisiswago khu vathu. 19 Mu di gu diga gudogoreya gwanu nya nyama gu mi girani dzigumbi nyo gire silo nya mba handzega ni silo nyo vivbe. Ganiolu, olu gu vbwetega mu manega ni gudogoreya gu na mi girago dzigumbi nyo gire esi nyo lulame, si agidego. 20 Kholu tepo mu nga ba muri dzigumbi nya gighoho, kha mwa nga ba mu gurumedzega gu gira silo nyo lulame.

21 Khu yevbini mihandro mu nga ba mu yi mana khu kotani nya mithumo yanu tepo yoyo? Mu di gu gira silo esi olu mu khalago dzitshoni khiso, nigu silo soso si di gu mi yisa gufani. 22 Ganiolu, olu mu tshudwego ga gighoho girani esi si agidego kha nga dzigumbi dza Nungungulu. Kha nga handro wakone, mu na mana womi nya gupindruge. 23 Kholu handro nya gighoho gufa, ganiolu giningwa hi ningwago khu Nungungulu womi nya gupindruge khiyo ga Kristo Jesu, Pfhumu yathu.

7 Olu nyo ganeya ni enu vandruye mu tigo nayo: Ina kha mu dziti gukhenu nayo wa gu fumeya muthu a gu ba a nga gu vbanya? 2 Khu giyeyedzo, nyamayi a tshadhidego hungidwe guya khu nayo ga mwama waye, mwama waye a gu ba a nga gu vbanya, ganiolu mwama waye a gufa uye tshulegide avba nya nayo wa mwama waye. 3 A gu tshadha ni mumbe mwama narigu mwama waye a nga gu vbanya, uye a gu gira wubhayi, ganiolu mwama waye a gufa uye tshulegide ga nayo waye, khavbovbo a gu tshadha ni mumbe mwama kha giri wubhayi.

4 Khu ndziya nya gu fane vandruyi, givili gya Kristo gi mi tshude avba nya nayo wa Mosi. Isoso si giregide gasi gu enu mu lumba mumbe muthu, oyu a wusidwego khu ga vafudego. Olu hi nga si kodza gu thumeya Nungungulu. 5 Tepo hi nga ba hi vbanya guya khu tumbunugo wathu nya gighoho, Nayo wu hi gengedzide maningano ni gudogoreya nya guvivbe gu gomogo sivilini gwathu. Isoso si di gu hi yisa basi gufani. 6 Ganiolu ethu olu hi tshudwe avba nya nayo nigu hi fude ga egi gi nga ba gi hi gira sibotshwa. Ethu olu ho thumeya Nungungulu khu ndziya nya yiphya, khu liphuvbo, nasiri khu ndziya ya gale a gu gu rumwa khu Nayo.

7 Ina ho ganeya gu khethu Nayo gighoho? Ahihi! Na nya sa pwisisa gu kheni ginani khu lisine gighoho nari khatshi kha nya nga phaswa khu Nayo. Khu giyeyedzo, eni na nya sa siti gu kheni si vivbide gu dogoreya silo sa vane nari khatshi Nayo kha wa nga ganeya gu khuwo: “U nga dogoreyi silo sa vane.” 8 Ganiolu, gighoho gi thumiside nayo wowu gasi gu nyi vangeya mafumbo yatshavbo nya gudogoreye nya guvivbe. Nya mba na Nayo, gighoho gi mwalo tshivba.* 9 Na wu si gu vbohi Nayo eni nyi di gu vbanya, ganiolu tepo wu nga vboha Nayo gighoho gi di wuga gi vbanya, eni nyifa. 10 Khavbovbo, Nayo wu nga ba wu yede gu nyi yisa guvbanyani wu di nyi yisa gufani. 11 Gighoho gi di thumisa Nayo wowu gasi gu nyi senga, gi nyi songa. 12 Nayo wu agide nigu sileletelo niso si agide, si lulamide nigu khyadi.

13 Ina so thula gu khiso gilo nya gyadi gi nyi vangede gufa? Ahihi! Gighoho khigyo gi vangidego gufa. Nayo khwadi, ganiolu wu si vegide guagani gu khuwo gighoho gi vangide gufa gwangu, khu kharato Nayo wu yeyedzide edzi gighoho gi vivbidego khidzo. 14 Hi ngu dziti gukhethu Nayo wu dzude khiyo ga Nungungulu khu gu thumisa liphuvbo laye, ganiolu gigaradzo kheni kholu nyi muthu nya nyama nyi rengisidwego nga gumbi nya gighoho. 15 Kha nyi si pwisisi esi nyi girago, wulangani nyo gire silo nya sadi nyo gira esi nyi si si vbwetigo gu gira. 16 Nyi ngu dzumeya gu kheni Nayo khwadi, ambari ulolo nyi ngo simama gu gira silo nyi si vbwetigo gu gira. 17 Khandreni nyi girago silo sesi, ganiolu nyo si gira khu kotani nya gighoho gi nyi fumeyago. 18 Nyi ngu dziti gu kheni gimwalo gilo nya gyadi omu nya givili gyangu gi gu na ni gighoho. Kholu ambari olu nyi gu na ni gudogoreya nya gu gire esi nya sadi kha nyi si kodzi gu si gira. 19 Kha nyi giri silo nya sadi nyi dzinago gu gira, wulangani nya isoso nyo gira silo nyo vivbe nyi si dzinigu gu si gira. 20 Khu kharato, nyo gira silo nyi si dzinigu gu si gira khandreni nyi si girago, ganiolu gighoho gi nyi fumeyago khigyo gi si girago.

21 Nyi wonide lisine leli gwangu: Tepo nyi vbwetago gu gira silo nya sadi nya gu gira esi nya guvivbe. 22 Khu lisine, eni nyi ngu wu gola ngudzu nayo wa Nungungulu. 23 Ganiolu nyi ngu wona givilini gyangu wumbe nayo wu dwanago ni nayo wu gomogo omu nya mapimo yangu nigu uwo wa gu nyi gira gibotshwa nya nayo nya gighoho wu gomogo givilini gwangu. 24 Libango langu likhongolo, khu mani a na nyi vbulugisago avba nya givili gegi gi nyi yisago gufani? 25 Nyi ngu bonga Nungungulu, kholu uye nyi vbulugiside khu gu thumisa Jesu Kristo, Pfhumu yathu. Khu kharato, mapimoni gwangu, nyi gumbi nya nayo wa Nungungulu, ganiolu givilini gwangu nyi gumbi nya nayo nya gighoho.

8 Khu kharato, vale va pwananago ni Kristo Jesu kha va ningwi nandru. 2 Olu nayo nya liphuvbo wu ningano womi wu gu tshude, uwe u gu mulandreyi wa Kristo Jesu; wu gu tshude avba nya nayo nya gighoho ni gufa. 3 Nayo wa Mosi kha wa si kodza gu mi tshula kholu mu gu vathu nya mba vbeleya. Nungungulu mi tshude khu gu mi rumeleya Gyanana gyaye nga muthu gasi gu ta dusa gighoho, khu kharato Nungungulu tsayiside gighoho gi nga ba giri ga vathu. 4 Khavbovbo, sileletelo nya gululame nya Nayo si tadzisegide gwathu, ethu hi engisago liphuvbo nasiri sivili sathu si gu na ni gighoho. 5 Ava va engisago nyama va gu pimisa khu silo nya nyama, ganiolu ava va engisago liphuvbo va gu pimisa khesi liphuvbo li va embeyago gasi va si landrisa. 6 Kholu tepo hi vegago ngudzu gupima avba nya silo nya gighoho, isoso sa gu hi yisa gufani. Ganiolu, tepo hi vegago ngudzu gupima avba nya silo sa liphuvboni, isoso sa gu hi yisa guvbanyani ni gurulani. 7 Kholu gu diga sivili sathu si gu na ni gighoho si woneleya mapimo yathu sa gu hi gira hi khala valala va Nungungulu. Khu kharato, sivili sathu si gu na ni gighoho kha si si kodzi gu engisa nayo wa Nungungulu. 8 Avo va vbanyago guya khu nyama kha va si kodzi gu tsakisa Nungungulu.

9 Ganiolu, enu vandruye kha mu landrisi gudogoreya nya sivili sanu si gu na ni gighoho. Abari gu liphuvbo la Nungungulu lomo gwanu, enu mwa gu vbanya khu guya khu liphuvbo. Uye a gu mwalo liphuvbo la Kristo, kha lumbi Kristo. 10 Ganiolu, enu mu pwananago ni Kristo liphuvbo la gu mi gira mi vbanya khu kotani nya gululame, ambari givili gyanu gya gu ba gi fude khu kotani nya gighoho. 11 Liphuvbo la Nungungulu li wuside Jesu khu ga vafudego; abari gu liphuvbo lolo li na ni enu, oyu a wusidego Kristo Jesu khu ga vafudego a na gira gu sivili sanu si vbanya khu gu thumisa liphuvbo laye li gu na ni enu.

12 Khu kharato vandruye, kha hi gurumedzegi gu engisa sivili sathu si gu na ni gighoho. 13 Mwa gu engisa gudogoreya nya sivili sanu, khu lisine mu nafa, ganiolu mwa gu dzumeleya liphuvbo li mi phasa gu songa mithumo nya nyama mu na vbanya. 14 Kholu vatshavbo vale va thangedwago khu liphuvbo la Nungungulu, sanana saye khu lisine. 15 Enu kha mwa hakha liphuvbo li mu girago dzigumbi mwendro li mi girago mi vbanya na mi gu thava, wulangani nya isoso mu hakhide liphuvbo li mi girago mu khala sanana sa Nungungulu. Khilo liphuvbo lolo li mi girago mi khusedza lito, khenu: “Abba,* Papayi!” 16 Liphuvbo la Nungungulu khilo li hi girago hi tiyisega* gu khethu hi sanana sa Nungungulu. 17 Abari gu hi sanana saye so thula gu khiso ethu hi va hodzi nya thomba ya Nungungulu, nigu hi vahodzi nya thomba gumogo ni Kristo. Ganiolu, gupheya hi yede gu tshaniseka naye, gasi hi ningwa wudhumo gumogo naye.

18 Gutshaniseka hi emisanago nago olu khandri ga gilo nyo gu fananisa ni wudhumo hi na wu hakhago. 19 Sivangwa satshavbo si virede khu maho nyo fuviye guwonegiswa nya sanana sa Nungungulu. 20 Kholu sivangwa khandri si di dzina gu vbanya womi nya mba na gutumba maningano ni wumindru, ganiolu Nungungulu a di si dzumeleya. Ambari ulolo, Nungungulu hi ningide gutumba. 21 Uye a di gu dziti gu khuye sivangwa si na tshudwa wugumbini nya sivili sawe si fago, si hengeya wudhumoni nya gutshulege nya sanana sa Nungungulu. 22 Kholu hi ngu dziti gu khethu kala olu sivangwa satshavbo si ngo simama gu keta ni gupwa guvbisa. 23 Ganiolu, olu ethu hi hakhide liphuvbo nya guage, a gu gipandre nyo pheye nya silo si ngo gutago. Ethu hi ngu keta na hi gu vireya khu maho nyo fuviye gu khala sanana sa Nungungulu khu guvbeleya. Teponi yoyo, ethu hi na tshudwa ga sivili sathu khu kotani nya dzegiso. 24 Tepo hi nga vbulugiswa, ethu hi manide gutumba, ganiolu gutumba gogu gu wonegago khandri gutumba nya lisine. Si nga kodzega kharini gu muthu a vireya gilo a gi wonago? 25 Ganiolu, tepo hi vireyago sile hi si si wonigo, ha gu simama gu si vireya khu maho nyo fuviye na hi gu timiseya.

26 Nigu liphuvbo li nga hi phasa tepo hi vbeyago tshivba. Dzimbe dzitepo hi ngu dziti gu khethu gu vbwetega hi gombeya, ganiolu hi si dziti gu khethu hi na gombeya khethu ginani. Tepo hi ketago hi hamuga gilo nyo ganeye, liphuvbo nya guage li na hi ganeleya. 27 Nungungulu o khedza monyoni gwathu a tugula esi liphuvbo li ganeyago, kholu ilo lo ganeleya va nyo aga khu guya khu gugola ga Nungungulu.

28 Hi ngu dziti gu khethu Nungungulu a ngu gira mithumo yaye yatshavbo yi gimbidzisana gasi gu phasedzeya vale va mu haladzago, vale a va ranidego khu guya khu gugola gwaye; 29 Uye gupheya va hathide a bwe a hunga na yi ngo romo tepo gu khuye va di yede gu fana ni Gyanana gyaye. Khu ndziya yeyi, Gyanana gyaye gi di hadzi khala matewula vbakari nya vandruye nya vangi. 30 Khavbovbo, uye a di rana ava a nga ba a va hathide a bwe a va wona nga vathu nyo lulame. Khu gu hegisa, uye a di dhumisa ava a va wonidego nga vathu nyo lulame.

31 Hi na khethu ginani khu silo sesi? Abari gu Nungungulu na ni ethu, khu mani a na hi wugeyago? 32 Uye kha feleya Gyanana gyaye, ganiolu gi ningede gi songwa khu kotani ya ethu hatshavbo. Ina Nungungulu a na tandrega gu hi gireya wuhindzi a hi ninga esi simbe satshavbo? 33 Khu mani a na singedzago vale va hathidwego khu Nungungulu? Nungungulu khuye a va wonidego nga vathu nyo lulame. 34 Khu mani a na va ningago nandru? Mwalo. Kristo Jesu a va fede, a bwe a wuswa khu ga vafudego. Olu womo nyamudye ga Nungungulu a hi lombeleya.

35 Ginani gi na hi hambanisago ni lihaladzo la Kristo? Ina sigaradzo, gugaradzega, gutshaniswa, ndzala, gu hamuga sombo, dzimhango, mayunga?* 36 Milowo yari khiyo: “Ethu ha gu emisana ni gufa dzitepo nya dzingi khu kotani yago; vathu va gu hi wona nga dzinvuta dzi hongolago gusongwatunu” 37 Ganiolu, ga satshavbo silo soso, ethu hi ngu pala khu tshivba ya wule a hi haladzidego. 38 Nyi ngu tiyisega gu kheni gani gufa, gani womi, gani dzingilozi, gani mifumo, gani silo si gomogo, gani silo si ngo gutago, gani dzitshivba, 39 gani gulapha, gani gueta, mwendro gimbe givangwa, gimwalo gi na si kodzago gu hi hambanisa ni lihaladzo eli Nungungulu a hi yeyedzidego khu gu thumisa Kristo Jesu, Pfhumu yathu.

9 Kha nga nyi gu mulandreyi wa Kristo nyo ganeya lisine, kha nyi liphi; livhalo langu li thangedwago khu liphuvbo nya guage li ngu fakaza 2 gu khilo nyi ngu garadzega ngudzu ni gupwa wuvi monyoni. 3 Nari khatshi si di gu kodzega nyi di hadzi dzi hambanisa ni Kristo kha nga muthu a vadwego, gasi gu phasa vandruye va gu valongo vangu nya mavelego, 4 gu gu Vaisrayeli. Avo va hathidwe gasi va khala sanana sa Nungungulu. Nungungulu va yeyedzide wudhumo waye a bwe a gira navo pwanano, a bwe a va ninga Nayo, situmbiso, ni wuzundzo nya gu va mu thumeya. 5 Avo situgulwana sa vakokwe vathu, a gu avbo Kristo a dugedego avbo kha nga muthu nya nyama. Nungungulu, oyu a gomogo vbatshani nya silo satshavbo, a na dhumiswe kala gupindruga. Amen.

6 Ganiolu, ina so thula gu khiso gitumbiso gya Nungungulu kha gya tadzisega? Kholu khandri satshavbo situgulwana sa Israyeli si gu “Vaisrayeli” khu lisine. 7 Khandri satshavbo si gu sanana nya lisine khu gu ba siri situgulwana sa Abrahama. Nungungulu a di embeya Abrahama, khuye: “Gitugulwana gyago gi nata khavbo ga Isaki.” 8 Isoso so yeyedza gu khiso khandri satshavbo sanana sa Abrahama si gu sanana sa Nungungulu khu lisine, ganiolu sile si velegidwego khu kotani nya gitumbiso gya Nungungulu khiso si wonwago nga gitugulwana nya lisine. 9 Kholu Nungungulu tumbiside, khuye: “Khu matshigu yaya mwaga wu tago, nyi na wuya. Nigu Sara a na ba ari ni gyanana nya gikhwathana.” 10 Khiso sasimweso si nga girega tepo Rabheka a nga velegeya mavbaha kokwe wathu Isaki. 11 Na va si gu velegwi, mwendro na va si gu giri silo nya sadi mwendro silo nyo vivbe, Nungungulu yeyedzide gu khuye makungo yaye ma di siyi khu mithumo, ganiolu khu gu hatha gwaye ni gu rana gwaye. 12 Nungungulu a di embeya Rabheka, khuye: “Oyu nya koma a na thumeya oyu nya nandra.” 13 Kha nga Milowo yi ganeyago, khiyo: “Nyi gode Jokobe, ganiolu nyi nyenya Esawu.”

14 Ina ho vbweta ganeya gu khethu Nungungulu kha lulama? Ahihi. 15 Kholu Nungungulu a gu embeya Mosi, khuye: “Nyi na yeyedza wuhindzi ga vatshavbo nyi na va hathago, nigu nyi na pweya wusiwana ni wevbini nyi dzinago gu mu pweya wusiwana.” 16 Kha siyi khu gugola nya muthu mwendro gudzigaradza gwaye, ganiolu khu wuhindzi wa Nungungulu. 17 Kholu Milowo yari khiyo ga Faro: “Eni nyi gu digide u simama gu vbanya khu kotani nya gighelo gegi: Gasi gu thumisa uwe gasi gu yeyedza tshivba yangu ni gu gira gu lina langu li tidwa tigoni gwatshavbo.” 18 Khu kharato, Nungungulu o gireya wuhindzi ni wevbini a dzinago gu mu gireya, ganiolu a bangisa hungo ni wevbini a dzinago gu mu bangisa hungo.

19 Vambe adzina va nga nyi wudzisa, khavo: “Abari kharato, khu ginani uye a ngo manago sihoso avba gwathu? Khu mani a na ganedzago gugola gwaye?” 20 Uwe muthu khuwe mani nyo kala u ganedzisana ni Nungungulu? Ina gilo gi giridwego khu libumba gi nga si kodza gu wudzisa muwumbi wagyo, khigyo: “Khu ginani u nyi giridego khu ndziya yeyi?” 21 Ina muwumbi mwalo fanelo nyo thumise libumba khedzi a dzinago khidzo gasi gu gira vhazo nyo yi thumiseye gu gira silo nyo hathege ni vhazo nyo yi thumiseye silo nya mba hathega? 22 Nungungulu nuye o gira sasimweso. Uye hungide gu yeyedza zanga yaye ni gu yeyedza tshivba yaye, ganiolu na gu timiseya ngudzu vale va mu zangarisago ni vale va yedwego gu fuviswa. 23 Uye giride isoso gasi gu yeyedza wudhumo waye nya wukhongolo ga vale va nga hadzi hakha wuhindzi* waye. Uye va dongisede gasi va ningwa wudhumo. 24 Ethu khethu vale a va ranidego nasiri basi vbakari nya Vajudha, ganiolu ni vbakari nya mambe mayigo. 25 So girega kha nga edzi a profetidego khidzo omu nya libhuku la Hoseya, khuye: “Vale va sirigo vathu vangu, nyi na va rana ‘vathu vangu;’ nigu nyamayi a nga ba a si haladzwi, nyi na mu rana ‘gigodwa.’ 26 Nigu vale va nga embedwa gu pwani: ‘Enu kha muri vathu vangu,’ khavo gambe va na ranwago gu pwani ‘sanana sa Nungungulu a vbanyago.’”

27 Isaya nuye a ngu huweleya maningano ni Israyeli, khuye: “Ambari olu tengo nya sanana sa Israyeli si gu singi ngudzu nga fungo wa phwani, sidugwana basi si na vbulugiswago. 28 Kholu Jehovha a na lamula litigo khu guvbiredza.” 29 Nigu kha nga Isaya a profetidego gu khuye: “Nari khatshi Jehovha nya dzinyimbi kha nga hi tshiyela gitugulwana, na hi gu khade nga Sodhoma hi bwe hi fana ni Ghomora.”

30 Ha gu vbweta khethu ginani khu satshavbo sesi? Ha gu vbweta gu khethu vanyamayigo va yeyedzide gukhodwa, nigu va wonidwe nga vathu nyo lulame, ambari olu va nga ba va si dzi garadzeyi gu khala vathu nyo lulame. 31 Ganiolu, Israyeli, ambari olu a nga ba a dzi garadzeya gu landrisa nayo nya gululame, kha si kodza gu vbanya khu guya khu nayo wowo. 32 Khu ginani? Kholu va zamide gu gira isoso khu mithumo, nasiri khu gu yeyedza gukhodwa. Avo va di tshunganeya va thega vbatshani nya “giwindri nya gitshunganiso.” 33 Sa gu fana niso Milowo yi ganeyago, khiyo: “Nyi ngu vega giwindri gi na tshunganisago vathu Siyoni ni giwindri gi na va thesago, ganiolu ni wevbini wule a na khodwago avbo gwagyo kha na nga thega dzitshoni.”

10 Vandruye, esi nyi si dogoreyago khu monyo wangu watshavbo ni esi nyi si gombeleyago ga Nungungulu khu gu kheni va na gyathu va vbulugiswa. 2 Eni nyi ngu fakaza gu kheni avo va ngu dzigaradzeya ngudzu gu thumeya Nungungulu, ganiolu avo vo gira isoso nya mba muti gwadi Nungungulu. 3 Kha nga olu va si sitigo esi Nungungulu a si wonago na si lulamide, avo va gu landreya milayo yawe. Kha nga handro wakone, avo kha va engisa milayo ya Nungungulu maningano ni esi nya gululame. 4 Kholu Kristo mahegiso nya Nayo, gasi ni wevbini a khodwago gwaye a mana gululama.

5 Mosi lovide maningano ni gululama maningano ni Nayo, khuye: “Uye a landrisago silo sesi a na vbanya khu kotani yaso.” 6 Ganiolu, Lito la Nungungulu la gu ba li ganeya khu gululama gutago khiyo nya gu yeyedze gukhodwa, lari khilo: “U nga ganeyi monyoni gwago khuwe: ‘Khu mani a na gweyago ndzadzini?’ iso si thulago gu ya tshisa Kristo, 7 mwendro ‘Khu mani a na releyago omu nya liphala nya likhongolo?’ iso si thulago gu ya wusa Kristo khu ga va fudego.” 8 Ganiolu, milowo yari khiyo ginani? “Lito lomo vbafuvbi gwago, kanani gwago ni monyoni gwago”; isoso so thula “lito” nya gukhodwe hi tshumayelago. 9 Kholu wa gu fakaza vathuni khu likana lago khuwe Jesu, Pfhumu, u bwe u khodwa monyoni gwago khuwe Nungungulu mu wuside khu ga va fudego, u na vbulugiswa. 10 Gasi muthu a mana gululama, gu vbwetega a khodwa monyoni gwaye; nigu gasi a vbulugiswa, gu vbwetega a fakaza khu likana laye vathuni.

11 Kholu milowo yari khiyo: “Wule a khodwago gwaye gima kha na nga thega dzitshoni.” 12 Gu mwalo gu hambana vbakari nya Mujudha ni Mugreki, kholu va na ni Pfhumu mweyo basi, eyi yi phasago vatshavbo va yi lombago. 13 Kholu “ni wevbini a ranago lina la Jehovha a na vbulugiswa.” 14 Ganiolu, va na mu rana kharini na va si khodwi gwaye? Nigu va na khodwa kharini gwaye narigu va si gupwi na gu ganedwa khuye? Nigu va napwa kharini na gu ganedwa khuye abari gu mwalo oyu nya gu va tshumayele? 15 Nigu gambe, va na tshumayela kharini va gu ba va sa rumwa? Kha nga si lovidwego gu pwani: “Yi mburide ngudzu migondro ya vale va tshumayelago mahungu nya yadi nya silo nya sadi!”

16 Ganiolu, khandri vatshavbo va hakhidego mahungu nya yadi. Muprofeti Isaya ganede, khuye: “Jehovha, khu mani a khodwego ga esi hi ganedego?” 17 Khu kharato, gukhodwa go landra mahungu aya muthu a ma pwago. Nigu mahungu ma gu pwidwa go ba guri ni oyu a ganeyago maningano ni Kristo. 18 Ganiolu, nyi ngu wudzisa maningano ni Israyeli, kheni: Ina avo va manide lithomo nya gupwe? Ina, va li manide. Khu lisine, Milowo yari khiyo: “Malito yawe ma pwade mafuni gwatshavbo, ni mahungu yawe ma vbohide kala mahegiso nya mafu”. 19 Nyi ngu wudzisa gambe, kheni: Ina Israyeli kha si pwisisa? Nyo pheye, Mosi wari khuye: “Nyi na mi wuseya lidiwo khu gu thumisa vathu nya limbe litigo; nyi na mi wuseya zanga nya yikhongolo khu gu thumisa litigo nya sipumbo.” 20 Isaya khu gu tiya wari, khuye: “Nyi manidwe khu vale va nga ba va si nyi vbwetedzeyi; nyi dzi tivegiside ga vale va nga ba va si wudziseyi kheni.” 21 Ganiolu, maningano ni Israyeli wari, khuye: “Litshigu latshavbo nyi vbwetedzede va nya mba engisa ni va nyo banga mihungo.”

11 Nyi ngu wudzisa, kheni: Ina Nungungulu a di tsukula vathu vaye? Ahihi! Kholu aneni nyi Muisrayeli, gitugulwana gya Abrahama, nyi wa lihundzu la Bhejami. 2 Nungungulu kha tsukula vathu vaye, ava a va hathidego gukhugeya gupheyani. Ina kha mu siti esi milowo yi ganeyago maningano ni Eliya, tepo a nga liya ga Nungungulu khu kotani ya Israyeli, khuye: 3 “Jehovha, va songide vaprofeti vago, va khungumulede dzialitari dzago, kheni nyonga nyi tshadego nigu olu vo zama gu nyi songa neni.” 4 Ganiolu, Nungungulu mu hlamude kharini? A di khuye: “Nyi ngari ni 7000 vama va nga ne khozeya Bhahali.” 5 Gu ngari kharato ni muhuno, gu na ni tsawa nya wudugwana nya ava va hathidwego khu kotani nya wuwadi nya wukhongolo ngudzu wa Nungungulu. 6 Khu kharato, abari khu kotani nya wuwadi nya wukhongolo ngudzu wa Nungungulu khandri khu kotani nya mithumo. Kholu nari khatshi khu kotani nya mithumo, wuwadi nya wukhongolo ngudzu wa Nungungulu wu di siri wuwadi gambe.

7 Hi na khethu ginani olu? Esi Vaisrayeli va nga ba va si vbweta khu monyo watshavbo si manidwe khu tsawa nya wudugwana nya ava va hathidwego. Ava vambe va dzi bangiside mihungo. 8 Kha nga edzi Milowo yi ganeyago khidzo, khiyo: “Nungungulu va digide va lala ligovbe nya likhongolo ngudzu, gasi maho yawe ma si woni nigu dzindzeve dzawe dzi sipwi kala muhuno.” 9 Dhavhidhe nuye a di khuye: “Dzifesta* dzawe dzi na khale milaphwi gasi va thega va feya gu tsayiswa. 10 Mahoni gwawe gu na khale gidema gasi va si woni, hwambo wawe wu na wegeye tepo yatshavbo.”

11 Nyi ngu wudzisa, kheni: Ina tepo Vajudha va nga tshunganeya, va di thega va si wugi gambe? Ahihi! Ganiolu, guthega gwawe gu giride vanyamayigo va vbulugiswa. Isoso si va giride va manega ni wufu. 12 Abari gu guthega gwawe gu resede dzithomba litigo, nigu guvbunguga gwawe gu resede dzithomba nya dzingi vanyamayigo, isoso so thula gu khiso makategwa ma na ba mari mangi ngudzu tepo avo va na engedzeyago.

13 Olu nyo ganeya nanu vanyamayigo. Olu nyi gu mupostoli nyi rumedwego ga vanyamayigo nyi ngu ninga ngudzu lisima thumo owu nyi gireyago Nungungulu. 14 Khu kharato, adzina saye vambe, va na gyathu, va napwa wufu khu kotani nya esi mu hakhidego nigu adzina isoso si na vbulugisa vambe vbakari gwawe. 15 Gutsukudwa gwawe gu phaside vambe tigoni gu wusedza wupari wawe ni Nungungulu. Khu kharato, Nungungulu a gu va hakha si na fana ni gu ba na va wuswa khu gufani. 16 Vbavbandze nya isoso, abari gu pawu yi ningedwago kha nga mihandro nyo pheye yi agide, wuguvbi wakone wu thumisidwego gasi gu gira pawu yoyo anuwo wu agide; abari gu khamba wu agide, matamo nayo ma agide.

17 Ganiolu, mambe matamo ma kokeledwe. Uwe u tshomegedwe avba ma nga ba ma romo matamo yoyo ambari olu u gu simbo nya olivha nya likhabi. Olu uwe u ngu hodziswa khu mikhamba nya simbo nya miolivha. 18 Ganiolu, u nga pimisi gu khuwe u na ni lisima ngudzu guvbindra aya mambe matamo. Wa gu pimisa gu khuwe u na ni lisima ngudzu dundruga gu khuwe kha wa rwala mikhamba, ganiolu mikhamba khiyo yi nga gu rwala. 19 U na khuwe: “Mambe matamo ma kokeledwe gasi eni nyi tshomegedwa.” 20 Ilolo lisine. Ayo ma kokeledwe kholu ma nga ba mari mwalo gukhodwa. Ganiolu, uwe u ngu simama wulangani gwago khu kotani nya olu u gu na ni gukhodwa, khu kharato u nga dzi khusedzi, yeyedza githawo. 21 Abari gu Nungungulu kha diga gu kokeleya matamo nya olivha wowo, wo pimisa gu khuwe uwe a na gu diga? 22 Uwe u na wona wuwadi wa Nungungulu ni gutsayisa gwaye. Nungungulu a gu tsayisa vale va nga thega khu kotani nya mba na gukhodwa, ganiolu Nungungulu a na simama gu gu gireya wuwadi wo nga nga simama omu nya wuwadi waye. Wo mba gira isoso, anuwe u na kokwa. 23 Ganiolu, Vajudha va gu pheya gu yeyedza gukhodwa va na tshomegedwa gambe avba nya simbo nya olivha, kholu Nungungulu a ngu si kodza gu va tshomegeya gambe. 24 U kokidwe avba nya simbo nya olivha nya likhabi u tshomegedwa omu nya simbo nya olivha wu gomogo thembweni. Kha si na nga garadza gu matamo yale ma nga kokeledwa avba nya simbo nya miolivha wu gomogo thembweni ma bweledzwa avba nya simbo wawe nya miolivha.

25 Khu kharato vandruye, nyo vbweta kheni mu pwisisa sihalo wowu nya guage gasi mu si pimisi gu khenu enu mu gengede. Vaisrayeli nyo khaguri va bangide mihungo, kala vanyamayigo, ava va hathidwego, va beya. 26 Khidzo Vaisrayeli vatshavbo va na vbulugiswago khidzo, kha nga edzi Milowo yi ganeyago khidzo, khiyo: “Muvbulugisi a na ta khu Siyoni a ta dusa wuvivbi watshavbo avba nya gitugulwana gya Jakobe. 27 Owu khuwo pwanano nyi na girago navo, nya gu va divaleye sighoho sawe.” 28 Khu lisine, avo valala nya mahungu nya yadi, nigu vo gira isoso gasi mu phasega, ganiolu avo va hathidwe khu Nungungulu, nigu uye a ngu va haladza khu kotani ya vakokwe vawe. 29 Nungungulu kha na nga dzi laya khu kotani nya siningwa a va ningidego, nigu kha na nga dzi laya khu gu ba a ranide ava a va ranidego. 30 Enu mu di si engisi Nungungulu, ganiolu olu mu ngu giredwa wuhindzi khu kotani nya olu Vajudha va nga ne engisa. 31 Nungungulu mi yeyedzide wuhindzi khu kotani nya olu Vajudha va nga ne mu engisa, ganiolu anavo va nga giredwa wuhindzi gu fana ni enu. 32 Kholu Nungungulu a va digide vatshavbo avba nya giemo gyogyo gasi a gireya wuhindzi vathu vatshavbo.

33 Nga wona edzi dzi gu dzingi khidzo dzithomba, guti ni wugengeyi wa Nungungulu. Gulamula ga Nungungulu ni dzindziya dzaye mwalo a kodzago gu si tshamuseya. 34 “Khu mani a matigo mapimo ya Jehovha nigu khu mani a mu ningago wusingalagadzi?” 35 Mwendro “khu mani a phedego khuye a mu ninga gilo gasi gu anuye a mu bweledzeya?” 36 Kholu satshavbo silo sa guta khiyo gwaye, nigu somo khu kotani yaye, nigu sa gu lumba uye. A na dhumiswe kala gupindruga. Amen.

12 Vandruye, kha nga olu Nungungulu a mi giredego wuhindzi waye, nyi ngu mi lomba gu kheni mu ningeya sivili sanu kha nga phaso wu vbanyago, wu agidego wu bwe wu hakhega ga Nungungulu, mu thumisa mapimo yanu tepo mu girago thumo nya guage. 2 Mu nga pimedzeyi mavbanyelo nya litigo leli, wulangani nya isoso dzumeyani gu khenu Nungungulu a vbindrugedza mapimiselo yanu gasi mu tiyisega gu khenu esi Nungungulu a si vbwetago khyadi, si ngu hakhega nigu si vbelede.

3 Khu kotani nya wuwadi nya wukhongolo ngudzu wa Nungungulu a nyi giredego, nyi ngu mi lomba mwatshavbo gu kheni mu nga dzi woni na muri ni lisima ngudzu, ganiolu dzi vegeni vbavbatshi guya khu gukhodwa ogu Nungungulu a ningidego moyo ni moyo wanu. 4 Ambari olu givili gi gu na ni sivbango nya singi, khandri satshavbo sivbango soso si girago thumo nyo fane. 5 Khu ndziya nyo fane, ambari olu hi gu vangi, ethu ha gu wumba givili gimwegyo gi pwananago ni Kristo. Moyo ni moyo wathu givbango gya mumbe. 6 Hatshavbo hi na ni siningwa nya gu hambane khu guya khu wuwadi owu Nungungulu a hi yeyedzidego. Khu kharato, abari gu hi na ni giningwa nya guprofete hongoleni hi profeta guya khu gukhodwa hi gu nago. 7 Oyu a gu na ni giningwa nya gu thumeye vambe, a na va thumeye. Oyu a gu na ni giningwa nya gu hevbudze, a na hevbudze; 8 mwendro oyu a gu na ni giningwa nyo tiyise vambe, a na va tiyise. Oyu a gu na ni giningwa nyo kabane silo saye ni vambe, a na kabane navo. Oyu a gu na ni giningwa nya gu thangeye, a na thangeye khu monyo waye watshavbo. Oyu a gu na ni giningwa nya gu gireye wuhindzi vambe, a na si gire na tsakide.

9 Lihaladzo lanu li na khale eli nya lisine.* Nyenyani silo nya guvbivbe, mu namareya ga esi nya sadi. 10 Golanani khu lihaladzo nya wundruye. Dzi garadzeyeni gupheya khenu mu ninga githawo vambe. 11 Thumani khu sighingi mu nga khali migara. Dzumeleyani liphuvbo nya guage li mi gira mu vbisega, thumeyani Jehovha khu monyo watshavbo. 12 Tsakani khu kotani nya gutumba mu gu nago; timiseyani tepo mu tshanganago ni sigaradzo; gima mu nga digi gu gombeya. 13 Kabanani esi mu gu naso ni vandruye* vale va gu mwalo gilo; tepo yatshavbo hakhani gwadi vapfhumba. 14 Lombani Nungungulu gu khenu a kategisa vale va mi tshanisago. Va lombeleyeni makategwa, mu nga va lombeleyi gimbe gilo. 15 Tsakani ni ava va tsakago, mu liya ni ava va liyago. 16 Wonani vambe nga edzi mu dzi wonago khidzo, mu nga dzi woni na muri ni lisima ngudzu, ganiolu dzinogiseni. Mu nga dzi woni na muri va nya guti guvbindra vambe.

17 Mu nga bweledzeyi guvivba khu guvivba. Dzi garadzeyeni gu gireya silo nya sadi vathu vatshavbo. 18 Girani satshavbo mu si kodzago gasi gu vbanya khu gurula ni vathu vatshavbo. 19 Vandruye nyo golege, mu nga dzi phodzeyi mwabune, si digeyeni mandzani ga Nungungulu, kholu gu lovidwe gu pwani: “‘Guphodza khwangu; nyi na mi phodzeya,’ a ngu ganeya Jehovha.” 20 Ganiolu, “nala wago a gupwa ndzala mu ninge gilo nya gu hodze; a gupwa lidora mu ninge gilogyo nyo seye. Wa gu gira isoso u na wungedzeya magala nya nilo hungoni gwaye.”* 21 U nga dzumeyi gu padwa khu wuvivbi, ganiolu pala wuvivbi khu wuwadi.

13 Gu vbwetega hi engisa dzipfhumu dzi hi fumeyago, kholu dzipfhumu dzatshavbo dzi dzumeledwe khu Nungungulu gu fuma. Dzipfhumu dzi hi fumeyago dzi vegidwe sikhaloni dzawe nya wufumu khu Nungungulu. 2 Ha gu mba engisa vathangeyi, ha gu dwanisana ni Nungungulu. Avo va si landrisilo malulamiselo yaya va na lamudwa.* 3 Avo va thavago dzipfhumu khu vale va girago silo nyo vivbe, nasiri ava va girago silo nya sadi. Mu mwalo gighelo nyo thave dzipfhumu. Idzo dzi na mi zundza mwa gu ba mu gira silo nya sadi. 4 Avo sithumi sa Nungungulu gasi gu mi phasani, ganiolu mwa gu gira silo nyo vivbe mu na ba muri ni gighelo nyo thave. Avo va ningidwe tshivba ni wufumu gasi gu tsayisa vale va girago silo nyo vivbe; avo sithumi sa Nungungulu gasi gu tsayisa ni wevbini a girago silo nyo vivbe.

5 Gu na ni sighelo nyo pwale nya gu mi dzi engisa, nasiri basi khu gu thava gu tsayiswa khidzo, ganiolu gasi mu simama ni livhalo li agidego. 6 Khigyo gi mi girago mu livba mikhupo, kholu Nungungulu a gu thumisa avo gasi tepo yatshavbo va thumeya vathu. 7 Ningani ni wevbini esi si mu yelago. Livbani mikhupo yatshavbo ga oyu a yedego gu livbwa mikhupo yoyo, ningani githawo oyu a yedego gu ningwa githawo mu bwe mu zundza oyu a yedego gu zundzwa.

8 Mu nga dhevhi muthu, ganiolu haladzanani khu gyanu; oyu a haladzago ndriyaye a gu gira esi si lombwago khu nayo. 9 Kholu milayo yi gu khiyo “u nga giri wubhayi, u nga songi, u ngabi, u nga dogoreyi sa vane,” yatshavbo milayo yeyi ni yimbe ya gu patwa yi khala nayo moyo wu gu khuwo: “Haladza muthu-kwanu nga edzi u dzi haladzago khidzo.” 10 Lihaladzo kha li gireyi guvivba vambe, khu kharato lihaladzo gutadzisega nya nayo.

11 Kholu mu ngu dziti gu khenu yi vbohide tepo nya gu mu wuga ligovbeni, guvbulugiswa gwathu gomo ngudzu vbafuvbi guvbindra tepo hi khadego makhodwa. 12 Wutshigu womo vbafuvbi ni gu vbeya, nya mba hweya gu nagya. Khu kharato, hongoleni hi digani mithumo nya gidema hi ambala matshari nya guwonegeye. 13 Hongoleni hi manegani ni mavbanyelo nya yadi gu fana ni vathu va girago silo nya sadi mihani. Kha hi yeli gu dzi bedzedzeya omu nya dzifesta nya pfilupfilu, gu leva, gu gira wubhayi, gu manega ni mavbanyelo nya dzitshoni, mayunga ni lidiwo. 14 Wulangani nya isoso, landreyani gwadi giyeyedzo gya Pfhumu yathu Jesu Kristo, nigu mu nga lugini makungo nya gu gire gighoho.*

14 Hakhani wule a nga mba tiya gukhodwani, ganiolu mu nga lamuli vale va gu na ni mawonelo nyo hambane ni yanu. 2 Vomo va gu na ni gukhodwa nyo tiye gu va dzumeleyago gu hodza ni gevbini va gi vbwetago, ganiolu avo va gu na ni gukhodwa nya mba tiya va gu hodza mitongwe basi. 3 Wule a hodzago ni gevbini a gi vbwetago a nga woneyi vbavbatshi wule a gu mba hodza satshavbo, nigu wule a gu mba hodza satshavbo kha yeli gu lamula wule a hodzago satshavbo, kholu Nungungulu hakhide muthu yoyo. 4 Khuwe mani uwe gasi gu lamula githumi gya mumbe muthu? Mune wakone khuye a na hungago gu khuye gi ngu gira silo nya sadi mwendro silo nyo vivbe. Khu gu phaswa khu Jehovha, gi na dugeleya.

5 Vambe va gu pimisa gu khavo gu na ni litshigu li gu na ni lisima guvbindra mambe; vambe va gu pimisa gu khavo matshigu yatshavbo ma ngu fana. Muthu ni muthu a na tiyisege gu khuye esi a si khodwago lisine. 6 Avo va wonago litshigu nyo khaguri na liri la lisima va na gire isoso gasi gu ninga wuzundzo Jehovha. Avo va hodzago mafumbo yatshavbo nya guhodza, va na hodze gasi gu ninga wuzundzo Jehovha, vo nga nga bonga Nungungulu khu guhodza gogo; nigu ava va si hodzigo mafumbo yatshavbo nya guhodza, anavo vo zundza Jehovha, va bwe va bonga Nungungulu khugo. 7 Mwalo ni moyo wathu a vbanyago gasi gu dzi ninga wuzundzo uye mune, nigu mwalo ni moyo wathu a fago gasi gu dzi ninga wuzundzo uye mune. 8 Kholu ha gu vbanya, ha gu vbanyeya Jehovha, nigu ha gufa, ha gu feya Jehovha. Khu kharato, gani hi ngu vbanya, gani hi ngufa ethu ho lumba Jehovha. 9 Khu gighelo gyogyo, Kristo fude a bwe a wuswa gasi a khala Pfhumu nya ava va fudego ni ava va vbanyago.

10 Ganiolu, khu ginani u lamulago ndriyago? Mwendro khu ginani u woneyago vbavbatshi ndriyago? Hatshavbo hi na ema mbeli ga Nungungulu nigu uye a na hi lamula.* 11 Kholu Milowo yari, khiyo: “‘Nyi ngu sambanya kheni mune,’ a ngu ganeya Jehovha, ‘vatshavbo va na khidzima mbeli gwangu, nigu vatshavbo va na dziti gu khavo eni nyi Nungungulu.’” 12 Muthu ni muthu a na dzi hlamuleya abune ga Nungungulu.

13 Khu kharato, mu nga lamulani khu gyanu, wulangani nya isoso dzi emiseyeni gu gima mu si giri gilo gi na songago gukhodwa ga vandriyanu mwendro gu va gira va thega.* 14 Nyi ngu khodwa khu guvbeleya ga Pfhumu Jesu gu kheni gimwalo hi hodzago gi nga mba aga. Ganiolu, a gu tshuka muthu a pimisa gu khuye kha gya aga, si vivbide gwaye gu gi hodza. 15 A gu tshuka ndriyago a khunguvanyega khu kotani nya guhodza u hodzago, khu yeyedzi lihaladzo. Kristo fude khu kotani ya muthu yoyo, khu kharato u nga songi gukhodwa gwaye khu kotani nya guhodza u hodzago. 16 Mu nga ningi ni wevbini gighelo nya gu a ganeya guvivba maningano ni silo nya sadi mu girago. 17 Muthu kha beyi Mufumoni ga Nungungulu khu kotani nya esi a hodzago mwendro esi a seyago. Ganiolu, o beya khu gu ba ari muthu nyo lulame, nyo rule ni gu tsaka a ningwago khu liphuvbo nya guage. 18 Ni wevbini a thumeyago Kristo khu ndziya yeyi a ngu hakhwa khu Nungungulu nigu a ngu tsakedwa khu vathu.

19 Khu kharato, hi yede gu gira satshavbo hi si kodzago gasi gu gira gurula ni gu tiyisana khu gyathu. 20 Digani gu tshungunula thumo wa Nungungulu khu kotani nya guhodza. Hi nga hodza yatshavbo mafumbo nya guhodza, ganiolu si vivbide gu hodza gilo hi dzitigo gu khethu gi na tshunganisa* ndriyathu. 21 Tshukwana gu mba hodza nyama mwendro gu seya vhinyu mwendro gu gira ni gevbini u dzitigo gu khuwe gi na tshunganisa* ndriyago. 22 Esi u si khodwago so tidwa basi khuwe ni Nungungulu. A ngu tsaka muthu wule a si dzi pwigo nandru khu gu gira silo a si wonago na si lulamide. 23 Ganiolu, uye a kanakanago khu silo nyo khaguri nyo hodze, a gu hodza na ni nandru. Kholu esi a girago, kha si giri na gu dzi seketeya avba nya gukhodwe, ni gevbini hi girago na hi si dzi seketeyi avba nya gukhodwe gighoho.

15 Ethu hi tiyidego gu vbwetega hi timiseya vale va gu mwalo tshivba. Hi nga dzi tsakisi ethu vamune basi. 2 Moyo ni moyo wathu gu vbwetega a dzi garadzeya gu tsakisa muthu-kwawe a bwe a mu gireya silo nya sadi gasi a mu tiyisa. 3 Ambari Kristo kha gira silo gasi gu dzi tsakisa uye mune. Milowo yari khiyo: “Givalo gya vale va gu valago gi thegede vbatshani gwangu.” 4 Satshavbo si lovidwego gale yoyo omu nya Milowo, si lovidwe gasi gu hi hevbudza. Nigu ethu hi na ni guvireya khu kotani nya gutimiseye gwathu ni gu tiyiswa hi ningwago khu Milowo. 5 Nungungulu a na mi ningeni gutimiseya a bwe a mi tiyisa, nigu nyo lombeleya gu kheni Nungungulu a mi ningani mapimiselo ya mamowo aya Kristo Jesu a nga ba ari nawo, 6 gasi gu mwatshavbo, khu lito limwedo, mu dhumisa Nungungulu, oyu a gu Papayi wa Pfhumu yathu Jesu Kristo.

7 Khu kharato, hakhanani khu gyanu kha nga Kristo a mi hakhidego, isoso sa gu ninga wudhumo Nungungulu. 8 Nyi ngu mi embeya gu kheni Kristo rumede Vajudha* gasi a yeyedza gutumbega ga Nungungulu ni gu bwe a yeyedza gu khuye situmbiso esi Nungungulu a giredego vakokwe vawe khya lisine. 9 Isoso gambe si giregide gasi vanyamayigo va dhumisa Nungungulu khu kotani nya wuhindzi waye. Kha nga Milowo yi ganeyago gu khiyo: “Khu kotani nya isoso, nyi na gu zundza vbakari ga vanyamayigo nyi bwe nyi embeleya dzindzimo dzi na dhumisago lina lago.” 10 Nungungulu gambe wari khuye: “Tsakani enu vanyamayigo gumogo ni vathu va Nungungulu.” 11 Nigu gambe: “Dhumisani Jehovha enu mayigo yatshavbo, nigu vathu vatshavbo va na mu dhumise.” 12 Isaya lovide nuye, khuye: “Gu na manega khamba wa Jese, gu na dugeleya moyo a na fumago mayigo, nigu mayigo ma na mu tumba.” 13 Nungungulu oyu a ningago guvireya a na mi tadzeni khu gutsaka ni gurula khu kotani nya olu mu mu tumbago, nigu gambe guvireya gwanu gu na tiyiswe ngudzu khu tshivba nya liphuvbo nya guage.

14 Vandruye, nyi ngu tumba gu kheni enu mu tade khu wuwadi nigu mu na ni guti ni makodzelo nyo hevbudzane khu gyanu. 15 Ganiolu, nyi tiyide nyi mi loveya maningano ni simbe silo mu yedego gu si dundruga. Nyi di gira isoso khu kotani nya wuwadi ni wuhindzi owu Nungungulu a nyi yeyedzidego. 16 Nyi githumi gya Kristo Jesu ga vanyamayigo. Nyi ngu thuma khu gudzigaradza thumoni nyo age nya gu huweleye mahungu nya yadi ya Nungungulu, gasi mayigo yoyo ma khala ningelo owu Nungungulu a wu tsakeyago; ningelo wu agisedwego uye khu liphuvbo nya guage.

17 Nyi ngu tsaka khu gu ba nyiri mupizane wa Kristo Jesu ni gu ba nyi gira thumo wa Nungungulu. 18 Kha nyi na nga ganeya maningano ni silo nyi giridego nyabune, ganiolu nyi na ganeya basi khesi Kristo a giridego ni gu ganeya khu gu thumisa eni gasi gu phasa vathu nya mambe mayigo gu mu engisa. 19 Avo va engiside khu kotani nya silewugiso nya tshivba ni sisamadziso si giridwego khu liphuvbo la Nungungulu. Khiso si nyi girago nyi tshumayela mahungu nya yadi ya Kristo malangani yatshavbo gukhugeya Jerusalema kala Iliriya. 20 Makungo yangu ma diri gu mba tshumayela mahungu nya yadi malangani va pwidego maningano ni Kristo kholu kha nyi vbweti gu vbaha avba mumbe a phedego gu vbaha; 21 kha nga si lovidwego omu nya Milowo gu pwani: “Ava va si embedwigo gilo maningano naye va na mu wona, nigu ava va nga si pwigo gilo maningano naye va na pwisisa.”

22 Khiso si giridego nyi si si kodzi gu mi endreya dzitepo nya dzingi. 23 Ganiolu, olu nyi vbedzide gu tshumayela sipandreni sesi, nigu khu myaga nya yingi nyi di gu suva guta mi holeya. 24 Nyi ngu tumba gu kheni nyi na mi wona tepo nyi na hongolago Espanya. Hwane nya gu ba nyi khade nanu khu tepo nyo khaguri nyi ngu tumba gu kheni mu na nyi vbwegedzanyana. 25 Olu nyo vbweta gu hongola Jerusalema nyi ya phasa va nya guaga. 26 Vandruye va Makedhoniya ni Akaya va giride mihengo khu monyo watshavbo gasi gu ya phasedzeya vathu* va Nungungulu, avo va gu sisiwana, va gomogo Jerusalema. 27 Avo va giride isoso khu monyo watshavbo kholu va di gu va dhevha, kholu vandruye va Jerusalema va kabanide silo sawe sa libhuvboni ni vandruye vovo. Khu kharato, avo va di gu dhevha gu kabana dzithomba dzawe ni vandruye va Jerusalema. 28 Khu kharato, hwane nya gu ba nyi vbedzide gu mi ninga mihengo* nyi na vbindra khiyoyo nyi mi holeya, na nyi gu hongola Espanya. 29 Nyi ngu dziti gu kheni tepo nyi na mi wuseyago nyi na mi reseya makategwa ma tago khiyo ga Kristo.

30 Vandruye, nyi ngu mi lombani, khu ga Pfhumu yathu Jesu Kristo ni lihaladzo li tago khiyo nya liphuvbo nya guage, gu kheni mu nyi pata milombeloni yanu tepo yatshavbo mu gombeyago ga Nungungulu nga eni nyi gombeyago; 31 gombeyani gasi nyi vbuluga ga ava va gu siri Makristo, va gomogo Judheya, gasi thumo wowu nyi gireyago vathu va Nungungulu va gomogo Jerusalema wu hakhega gwawe. 32 Khu kharato, Nungungulu a gu dzina nyi na ta nyi ta mi wuseya na nyi tsakide nigu mu na ta nyi tiyisani. 33 Nungungulu oyu a ningago gurula, a na khale nanu. Amen.

16 Nyi ngu mi bikeya ndriyathu Febe a thumeyago libandlani la Senkreya, 2 nya gu lomba gukheni mu mu hakha khu ndziya nya yadi kha nga vathu va agidego va Pfhumu. Mu ningeni ni gevbini a na gi vbwetago kholu emede vathu nya vangi, gupata ni eni.

3 Losedzeyani Prisila ni Akila, sithumi-khwathu ga Kristo Jesu. 4 Avo va vegide womi wawe mhangoni khu kotani yangu, eni ni mabandla yatshavbo ma gu siri ya Vajudha hi ngu va bonga. 5 Losedzeyani gambe libandla li tshanganago gaya gwawe. Losedzeyani gigodwa gyangu Epefeto, a gu moyo nya ava nyo pheye va nga khala valandreyi va Kristo, Aziya. 6 Losedzeya Mariya, oyu a mi thumedego ngudzu. 7 Losedzeyani Androniko ni Juniya, valongo vangu hi khothedwego gumogo, avo va ngu tidwa ngudzu khu vapostoli nigu avo va na ni tepo nya gulaphe guvbindra eni na va gu landreya Kristo.

8 Losedzeyani Apiliyato, pari yangu nya gu golege Pfhumuni. 9 Losedzeyani Uribano, githumi-khwathu ga Kristo ni pari yangu nya gu golege, Esitakiyu. 10 Losedzeyani Apelesi, a tumbegidego ga Kristo. Losedzeyani ndranga ya Aristobhulo. 11 Losedzeyani nongo wangu Herodhiyamo. Losedzeyani va ndrangani ga Narsizo, va gu valandreyi va Pfhumu. 12 Losedzeyani Tirifena ni Tirifoza, vanyamayi va thumeyago Pfhumu khu sighingi. Losedzeyani Perisidha, gigodwa gyathu, kholu uye a ngu thumeya Pfhumu khu sighingi. 13 Losedzeyani Rufo, oyu a hathidwego Pfhumuni ni mamayi waye, oyu aneni nyi mu wonago nga mamayi wangu. 14 Losedzeyani Asinkirito, ni Felegonte, ni Herimesi, ni Patorobha, ni Herime ni vandruye va gomogo navo. 15 Losedzeyani Filologo ni Juliya, Nerewu ni ndriyaye nya nyamayi, ni Olimpiya ni vathu vatshavbo va Nungungulu va gomogo gumogo navo. 16 Losanani khu lihaladzo.* Mabandla yatshavbo ya Kristo ma ngu mi losedzeya.

17 Vandruye, olu nyi ngu mi lomba, dzi woneyeni ga vale va wusago guhambana va bwe va tshunganisa gukhodwa ga vambe khu gu wugeya sihevbudzo esi enu mu si hevbudego, gimbileyani hwindzo navo. 18 Kholu vathu vovo khandri sithumi sa Pfhumu yathu Kristo, avo va gu thumeya sirumbo* sawe. Va gu senga vathu khu malito nya gutshambe ni gu va zundza gasi gu wuyedwa. 19 Ganiolu, vathu vatshavbo va ngu dziti gu khavo enu mu ngu engisa nigu eni nyi ngu tsaka ngudzu khu gupwa isoso. Nyo vbweta gukheni mu gengeya, mu gira silo nya sadi, ganiolu mu si dzi bedzedzeyi ga silo nya guvivbe. 20 Nya mba hweya, Nungungulu a gu uye a ningago gurula a na tshigira Sathane vbavbatshi nya migondro yanu. Pfhumu yathu Jesu a na mi gireye wuwadi nya wukhongolo.

21 Thimoti, nyi thumago gumogo naye a ngu mi losedzeya. Valongo vangu Lusiyu, Jasoni ni Sosipatro anavo va ngu mi losedzeya.

22 Eni Tersiyo nyi lovidego lidandaliya leli, nyi ngu mi losedzeya khu ga Pfhumu.

23 Gayo, nyi endredego ndrangani gwaye, a gu avbo libandla li tshanganago avbo, anuye a ngu mi losedzeya. Erasto, muphari nya gikhwama nya lidhoropa, anuye a ngu mi losedzeya. Kwaritu nuye a gu ndriyaye, a ngu mi losedzeya. 24 *——

25 Nungungulu a nga si kodza gu mi tiyisa khu kotani nya mahungu nya yadi nyi huweleyago ni olu nyi tshumayelago maningano ni Jesu Kristo. Mahungu yaya ma tivegisidwe khavba nya sihalo nya guage wu nga ba wu sihidwe khu myaga nya yingi. 26 Ganiolu, hi yeyedzidwe hi bwe hi tivegiswa uwo khu kotani nya Milowo nya vaprofeti. Nungungulu wathu nya gupindruge rumide gu khuye wu tidwa khu mayigo yatshavbo gasi va engisa khu kotani nya gukhodwe. 27 Nungungulu a gu uye enga a tigo, a na ningwe wudhumo kala gupindruga khu gu thumisa Jesu Kristo. Amen.