LIDANGALIYA NYO PHEYE LI LOVEDWEGO VAKORINTO

1 Kheni Pawulo, nyi nga ranwa gasi gu khala mupostoli wa Kristo Jesu khu gugola ga Nungungulu, nyi womo gumogo ni ndriyathu Sositene. 2 Nya gu loveya libandla la Nungungulu li gomogo Korinto, ga enu mu agisidwego gasi gu khala valandreyi va Kristo Jesu, enu mu ranidwego gasi gu khala va nyo aga, gumogo ni vatshavbo va gomogo malangani yatshavbo va ranago lina la Pfhumu yathu Jesu Kristo ni gu bwe va khodwa gwalo, uye Pfhumu yawe nigu Pfhumu yathu nethu.

3 Ha gu mi suveya gu khethu Nungungulu a gu Papayi wathu, gumogo ni Pfhumu Jesu Kristo a mi gireya wuwadi nya wukhongolo ngudzu va bwe va mi ninga gurula.

4 Tepo yatshavbo nya gu bonga Nungungulu wangu khu kotani nya wuwadi a mi gireyago kholu mu gu valandreyi va Kristo Jesu. 5 Enu mu kategisidwe ngudzu khu kotani nya olu mu pwananago naye nigu uye a mi ningide makodzelo nya gu tshumayele lito la Nungungulu a bwe a mi ninga guti nya gukhongolo. 6 Kholu mahungu ma ganeyago khu Kristo ma tiyisidwe gwanu. 7 Gasi mu si hamugi ne ni giningwa gimwegyo gi tago khiyo ga Nungungulu na mu nga gu vireya khu maho nyo fuviye guwonegiswa ga Pfhumu yathu Jesu Kristo. 8 Uye a na mi tiyisa kala mahegiso gasi gu khu litshigu la Pfhumu yathu Jesu Kristo ne moyo wanu a si singedzwi gu pwani giride silo nya guvivbe. 9 Nungungulu a mi ranidego gasi gu thumisana ni Gyanana gyaye, a gu Pfhumu yathu Jesu Kristo, a ngu tumbega.

10 Vandruye, khu lina la Pfhumu yathu Jesu Kristo, nyi ngu mi lombani gu kheni mu ganeya khu gupwanana. Gu nga manegi guhambana vbakari gwanu, ganiolu mu yede gu pwanana khu guvbeleya mapimoni. 11 Vandruye, nyi embedwe khu vana Kolowe gupwani mwa gu ganedzisana. 12 Iso nyi si thulago khesi nya gu vambe khavo: “Eni nyi wa Pawulo,” vambe, khavo: “Eni nyi wa Apolo,” vambe va gu ganeya, khavo: “Eni nyi wa Khefasi,”* vambe gambe khavo: “Eni nyi wa Kristo.” 13 Ina sa gu thula gu khiso Kristo kabanegide khu sipandre? Ina Pawulo khokhothedwe vbasimbotunu khu kotani yanu? Ina enu mu di bhabhatiswa khu lina la Pawulo? 14 Nya gu bonga Nungungulu khu gu ba nya sa bhabhatisa ne ni moyo gwanu, vbavbandze basi ga Krispo ni Gayo. 15 Khu kharato, mwalo a na ganeyago gu khuye a bhabhatisidwe khu lina langu. 16 Nyi bhabhatiside gambe vana Sitefane, ganiolu kha nyi dundrugi gu ba nyi bhabhatiside vambe. 17 Kristo kha nyi rumeya gasi gu ta bhabhatisa, ganiolu nyi rumede gasi gu ta huweleya mahungu nya yadi, nasiri khu maganelelo nya wugengeyi, gasi gu mba gira gu simbo nya tshanisa wa Kristo wu si phasi gilo.

18 Mahungu ma ganeyago khu simbo nya tshanisa ma gu wonwa nari wupumbu khu vale va hongolago gufuviswatunu, ganiolu ethu hi na vbulugiswago ha gu ma wona na mari tshivba ya Nungungulu. 19 Kholu gu lovidwe gupwani: “Nyi na fuvisa wugengeyi wa va nya gugengeya nyi bwe nyi bomba guti ga va nya guti.” 20 Vomo hayi va nya gu gengeya? Vomo hayi valovi? Vomo hayi vale va golago gu ganedzisana khu silo nya mafu* yaya? Nungungulu giride gu wugengeyi nya mafu yaya wu khala wupumbu. 21 Khu kotani nya wugengeyi waye, Nungungulu kha diga litigo li muti khu gu thumisa wugengeyi walo, vbavbandze nya isoso Nungungulu tsakede gu vbulugisa vale va khodwago avba nya mahungu aya vambe va ma wonago nari wupumbu.

22 Vajudha va gu lomba silewugiso, ganiolu Vagreki va gu vbwetedzeya wugengeyi. 23 Ganiolu ethu ha gu tshumayela gu khethu Kristo songidwe vbasimbotunu. Ga Vajudha mahungu yaya givalo, ga vanyamayigo ma gu wonega nari wupumbu. 24 Ganiolu ga vale va ranidwego khu Nungungulu, gani Vajudha mwendro Vagreki, gwavo Kristo tshivba ya Nungungulu nigu wugengeyi wa Nungungulu. 25 Kholu silo sa Nungungulu si wonwago nari wupumbu si na ni wugengeyi ngudzu guvbindra wugengeyi nya vathu. Nigu silo sa Nungungulu si wonwago na siri mwalo tshivba si na ni tshivba ngudzu guvbindra tshivba nya vathu.

26 Vandruye, mu wonide gu khenu vathu muni ava Nungungulu a va ranidego. Khu mawonelo nya vathu nya vangi va mwalo wugengeyi, nya vangi va mwalo tshivba nigu nya vangi kha va dugeyi omu nya dzindranga nya lisima. 27 Nungungulu hathide silo si wonwago khu vathu nari wupumbu gasi gu tshonegisa va nya gu gengeya nigu Nungungulu hathide silo si wonwago khu vathu na siri mwalo tshivba gasi gu tshonegisa silo nya tshivba. 28 Nigu Nungungulu hathide silo si wonwago khu vathu na si si sizi gilo ni silo si wonedwago vbavbatshi khu vathu, silo si wonwago na si si phasi gilo gasi gu tshisa vbavbatshi silo si wonwago nari sa lisima, 29 gasi gu ne ni moyo a si dzi khusedzi mahoni ga Nungungulu. 30 Ganiolu khu kotani yaye enu mu ngu pwanana ni Kristo Jesu, oyu a hi resedego wugengeyi wu tago khiyo ga Nungungulu. Khu kotani ya Kristo, Nungungulu hi giride va nyo lulama ni va nya guaga nigu a hi tshude khu gu thumisa dzegiso. 31 Kha nga Milowo yi ganeyago gu khiyo: “Oyu a dzi khusedzago a na dzi khusedze khu Jehovha.”

2 Khu kharato vandriyangu, tepo nyi nga ta mi bhuleya khu sihalo nya guage kha nya thumisa malito nyo samadzise mwendro maganelelo nya wugengeyi. 2 Tepo nyi nga ba nyiri nanu, kha nya ganeya nanu khu gimbe gilo, ganiolu nyi di ganeya khu Jesu Kristo basi ni gu khokhothedwa gwaye avba nya simbo. 3 Tepo nyi ngata gwanu nyi di vbede tshivba nigu nyi di gu ndrendremeya khu hwanga. 4 Kha nya mi tshumayela khu malito nya wugengeyi, wulangani nya isoso malito yangu ma di gu yeyedza tshivba nya liphuvbo la Nungungulu, 5 gasi gu enu mu khodwa avba nya tshivba ya Nungungulu nasiri avba nya wugengeyi nya vathu.

6 Ganiolu, ethu ho ganeya maningano ni wugengeyi ga vale va vidzidwego, khandri wugengeyi nya litigo leli mwendro nya dzipfhumu dzalo dzi na fuviswago. 7 Ethu ha gu ganeya khu wugengeyi wa Nungungulu avba nya sihalo nya guage, a gu wugengeyi wu sihadego; Nungungulu a wu hungide gukhugeya gale ni gale gasi wu khala wuzundzo gwathu. 8 Yimwalo pfhumu nya mafu* yaya yi ngati wugengeyi wowu. Nari khatshi va di gu wu tide, avo va na va songa* Pfhumu yathu nya yikhongolo, Jesu. 9 Ganiolu, so fana ni esi yi ganedego Milowo, khiyo: “Mwalo a si wonidego, nigu mwalo a si pwidego, nigu mwalo muthu a nga dundrugeya esi Nungungulu a dongisedego vale va mu haladzago.” 10 Ganiolu, Nungungulu tivegiside silo sesi gwathu khu gu thumisa liphuvbo laye. Liphuvbo li ngu gevisisa silo satshavbo ambari silo si etidego ngudzu sa Nungungulu.

11 Khu mani a tigo esi si gomogo mapimoni nya mumbe muthu? Uye a guti basi esi si gomogo monyoni gwaye. Khu ndziya nyo fane, mwalo a si kodzago guti mapimo ya Nungungulu, vbavbandze nyo thumise liphuvbo laye. 12 Ethu kha ha hakha liphuvbo nya litigo, ganiolu hi hakhide liphuvbo li tago khiyo ga Nungungulu gasi hi kodza gu pwisisa silo esi Nungungulu a hi hevbudzago khu wuwadi. 13 Hi ngu ganeya gambe khu silo sesi, ganiolu kha hi thumisi malito hi hevbudzidwego khu wugengeyi nya vathu, ganiolu ha gu thumisa malito hi hevbudzidwego khu liphuvbo gasi gu tshamuseya silo nya liphuvbo khu malito ma tago khiyo ga Nungungulu.*

14 Ganiolu, muthu a gimbidziswago khu mapimiselo nya vathu kha dzumeyi silo si tago khiyo nya liphuvbo la Nungungulu; uye a gu pimisa gu khuye silo soso wupumbu. Uye kha kodzi gu si pwisisa kholu gu vbwetega gu muthu a si gevisisa na gu phaswa khu liphuvbo la Nungungulu. 15 Ganiolu, muthu a gimbidziswago khu liphuvbo a ngu pwisisa satshavbo, ganiolu kha pwisiswi khu muthu. 16 Kholu Milowo yari, khiyo: “Khu mani a si kodzago guti mapimo ya Jehovha gasi a kodza gu mu hevbudza?” Ganiolu, ethu hi na ni mapimo ya Kristo.

3 Vandruye, kha nya ganeya nanu nga khatshi nya gu ganeya ni vathu va thangedwago khu liphuvbo nya guage, ganiolu nyi ganede nanu nga khatshi vathu va thangedwago khu mapimo nya vathu, ava va gu sanana ga Kristo. 2 Sihevbudzo nyi nga mi ningani sa gu fana ni leti nasiri ni guhodza nya gu tiye. Enu mu di si gu dongi gasi gu hodza guhodza nya gutiyele nigu mu si gu dongi. 3 Enu mu ngari ni mapimiselo nya vathu. Kha nga olu gu gu na ni lidiwo ni midwanisano vbakari gwanu sa gu yeyedza gu khiso enu mwa gu vbanya nga vathu nya litigo leli. 4 Kholu muthu a gu khuye: “Eni nyi wa Pawulo,” mumbe khuye: “Eni nyi wa Apolo,” ina khandri mwa gu gira silo nya nga edzi vathu nya litigo leli va girago khidzo?

5 Gasi khu mani Apolo? nigu gasi khu mani Pawulo? Avo vatshumayeli va mi phasidego gu khala makhodwa. Ethu hi giride basi esi Pfhumu a hi rumidego gu gira. 6 Eni nyi yade, Apolo a thedzeya mati ganiolu khu Nungungulu a dandrisidego. 7 Khu kharato, oyu a yalago ni oyu a thedzeyago mati kha vari va lisima, oyu a gu na ni lisima khu Nungungulu, a gu uye a dandrisago. 8 Oyu a yalago ni oyu a thedzeyago mati va gu thuma ni makungo nyo fane, ganiolu moyo ni moyo wawe a na hakha tshatshazelo khu kotani nya thumo waye. 9 Ethu hi sithumi si thumago gumogo ni Nungungulu. Enu mwa gu fana ni lithembwe eli Nungungulu a limago mu bwe mu fana ni nyumba eyi Nungungulu a vbahago.

10 Khu gu thumisa giningwa egi Nungungulu a nyi ningidego, nyi giride maphelo kha nga meseri nya wadi, ganiolu mumbe a gu vbaha vbatshani nya maphelo* yoyo. Khu kharato, moyo ni moyo a na vege gupima ga edzi a vbahago khidzo vbatshani nya maphelo yoyo. 11 Nungungulu vegide Jesu Kristo kha nga maphelo* gasi gu si manegi mumbe muthu a na girago mambe maphelo. 12 O gara muthu nyo khaguri a vbaha vbatshani nya maphelo yoyo khu gu thumisa oru, prata, siwindri nya lisima, madhera, mwasi mwendro dzitshava, 13 khu mahegiso thumo nya moyo ni moyo wu na wonega edzi wu gu idzo, kholu litshigu wu na lingedzedwago, thumo ni thumo wu na yeyedza edzi wu gu idzo; wu na yeyedzwa khu nilo kholu nilo wu na lingedzeya gutiya nya thumo ni thumo. 14 Egi muthu a gi vbahidego vbatshani nya maphelo, gya gu simama a na tshatshazedwa. 15 Wo gara thumo wa muthoyo wuvbya, uye a na luza, ganiolu uye a na vbulugiswa, si na fana ni gu ba a vbindride khu vbakari nya nilo.

16 Ina kha mu dziti gu khenu enu mu tempele ya Nungungulu, liphuvbo la Nungungulu la gu vbanya vbakari gwanu? 17 A gu tshuka muthu nyo khaguri a tshungunula tempele ya Nungungulu, Nungungulu a na mu tshungunula nuye. Tempele ya Nungungulu yi agide nigu enu mu tempele yoyo.

18 Mu nga dzi sengi, ni wevbini a pimisago gukhuye a na ni wugengeyi tigoni momu gu vbwetega a khala gipumbu khavbo a na khalago muthu nya wugengeyi. 19 Kholu wugengeyi nya litigo leli wupumbu mahoni ga Nungungulu, kha nga Milowo yi ganeyago, khiyo: “Uye a gu mola va nya wugengeyi omu nya mano yawe.” 20 Nigu “Jehovha a ngu dziti gukhuye mihingigedzo ya va nya wugengeyi kha yi phasi gilo.” 21 Khu kharato, mwalo ni moyo a yedego gu dzi khusedza khu kotani nya esi vathu va girago kholu satshavbo sa gu lumba enu, 22 Gani khu Pawulo, gani khu Apolo, gani khu Khefasi, gani litigo, gani womi, gani gufa, gani silo si gomogo, gani silo si nga gutago, satshavbo si ngu mi lumba; 23 ganiolu enu mwa gu lumba Kristo nigu Kristo a gu lumba Nungungulu.

4 Vathu gu vbwetega va hi wona nga sithumi sa Kristo ni vawoneleyi nya misihalo nya guage ya Nungungulu. 2 Esi si viredwago avba nya vawoneleyi, khu gu va tumbega. 3 Eni nyi mwalo mahungu nya gu lamudwa khenu mwendro khu tribhunali nya vathu. Khu lisine ambari eni kha nyi dzi lamuli nyabune. 4 Kha nyi dzipwi na nyiri ni nandru nya gilo, ganiolu isoso kha si thuli gu khiso nyi muthu nya gululame, Jehovha khuye a nyi lamulago. 5 Mu nga lamulini gilo na yi ngasi vbohi tepo yakona. Tepo Pfhumu yi na vbohago yi na ta dusa ni esi si gomogo gidemani yi si yisa guwonegeyani, yi na ta tivegisa esi si gomogo monyoni nya muthu ni muthu. Khavbovbo, moyo ni moyo a na hakha tshatshazelo wu mu yelago, wu tago khiyo ga Nungungulu.

6 Vandruye, nyi ganede silo sesi na nyi gu thula eni ni Apolo gasi mu pwisisa gwadi. Khu gu landra giyeyedzo gyathu, mu yede gu hevbula nayo wu gu khuwo: “Mu nga vbindrisi avba nya esi si lovidwego.” Mwa gu landrisa nayo wowu kha mu na nga khala vathu nya gu dzi khusedze nigu kha mu na nga nyenya mumbe mu gola mumbe. 7 Gasi khu mani a gu girago u hambana ni vambe? Ginani u gu nagyo u nga mba ningwa? Abari gu esi u gu naso u hakhide khiyo ga Nungungulu khu ginani u dzi embeyago nga khatshi khandri u di ningwa?

8 Ina mu na ni satshavbo mu si vbwetago? Ina mwa gu pimisa gu khenu mu ghanyide? Ina mu di pheya gu fuma mwenga nya mba na ethu? Hi di hadzi tsaka nari khatshi mu phede gu fuma nga dzipfhumu gasi gu anethu hi fuma nanu. 9 So wonegisa nga khatshi Nungungulu vegide ethu vapostoli hi khala va nyo hegisa nga khatshi vathu va hongolago va ya songwa na va gu wonwa khu litigo,* dzingilozi ni vathu. 10 Ethu ha gu wonwa nga sipumbo khu kotani ya Kristo, ganiolu enu mwa gu pimisa gukhenu mu vathu nya gu gengeye khu ga Kristo. Ethu hi mwalo tshivba, ganiolu enu mu tiyide; enu mu ngu ningwa wuzundzo, ganiolu ethu kha hi ningwi. 11 Kala olu hi na ni ndzala, lidora, hi mwalo sombo nya gu ambale, hi ngu vetwa nigu hi mwalo wulanga nyo khale. 12 Ha gu thuma khu gudzigaradza khu mandza yathu. Tepo hi vadwago ethu ha gu kategisa; tepo hi tshaniswago ha gu timiseya khu gulaphisa monyo; 13 tepo hi singedzwago ethu ha gu hakha khu gurula; kala olu ethu ha gu wonwa nga ndzilo nya litigo nigu ha gu wonwa nga litala nya silo satshavbo.

14 Kha nyi mi loveyi silo sesi gasi gu mi tshonegisa, ganiolu kha nga mu gu sanana sangu nya sigodwa nya gu vbweta gu mi hevbudzani. 15 Kholu ambari na muri ni 10 mil vahevbudzi nya nga Kristo, mu mwalo vapapayi nya vangi kholu nyi khade papayi wanu khu ga Kristo Jesu, khu gu mi reseyani mahungu nya yadi. 16 Khu kharato, nyi ngu mi lombani gu kheni mu nyi pimedzeya. 17 Khiso si nyi girago nyi mi rumeleya Thimoti, uye gyanana gyangu nya gigodwa nigu a ngu tumbega Pfhumuni. Uye a na mi dundrugisani dzindziya nyi dzi thumisago gasi gu gira esi Kristo Jesu a si vbwetago. Uye a na mi dundrugisani esi nyi hevbudzago malangani yatshavbo omu nya mabandla yatshavbo.

18 Vambe gwanu va tade khu gudzikhusedza nga khatshi kha nyi na nga ya mi wuseya. 19 Ganiolu, nya mba hweya nyi na ta mi wuseya, Jehovha a gu dzina. Kha nyi teyi gu tati esi sa ava va dzi khusedzago, ganiolu nya gu teya gu tati tshivba va gu nayo. 20 Mufumo wa Nungungulu khandri wa gu yeyedzwa khesi hi ganeyago, ganiolu khu tshivba ya Nungungulu. 21 Ginani mu hathago? Mwa gu vbweta gukheni nyi mi teya ni lipitso mwendro nyi mi teya ni lihaladzo ni gurula?

5 Nyi pwide gu pwani gu na ni wubhayi vbakari gwanu, nigu wubhayi nya guthise ngudzu wu si tidwigo ambari khu vanyamayigo. Nyi embedwe gu pwani gu na ni mwama a khalago ni mwangadzi wa papayi waye. 2 Mwa gu dzi khusedza khu silo sesi? Mu di yede gu garadzega, gasi gu mwama yoyo a girago isoso a duswa khu vbakari gwanu. 3 Ambari olu nyi gu mwalo iyoyo khu givili, mapimo yangu momo yoyo. Mwama yoyo a girago silo soso nyi mu lamude kha nga khatshi nyi womo iyoyo gumogo nanu. 4 Tepo mu tshanganago khu lina la Pfhumu yathu Jesu, dzitini gu khenu mapimo yangu momo iyoyo nigu tshivba ya Pfhumu yathu Jesu niyo yi na ni enu. 5 Ningeyani mwama yoyo ga Sathane gasi gu fuvisa liphuvbwana leli nya gighoho, gasi edzi libandla li wonago khidzo gighoho si si vbindrugedzi litshigoni la Pfhumu.

6 Esi mu dzi khusedzago khiso khandri sadi. Kha mu dziti gu khenu livhirina* yidugwana yi ngu gugumugisa wuguvbi watshavbo? 7 Dzudzugani livhirina ya gale, gasi mu khala wuguvbi nya wuphya nya mba na livhirina kha nga edzi khu lisine mu gu idzo. Kholu khu lisine Kristo a gu ginvutana gyathu nya Phasika songidwe kha nga muphaso. 8 Khu kharato, hi nga girini festa yeyi khu livhirina ya gale, ambari khu livhirina nya gighoho ni wuvivbi, ganiolu hongoleni hi girani khu dzipawu nya mba livhirina, a gu dzipawu nya gutumbege ni lisine.

9 Avba nya lidangaliya langu nyi mi lovede gasi mu diga gu gira wupari ni vathu va girago wubhayi.* 10 Khandri nyari kheni mu nga pwanani ni vathu nya litigo leli va girago wubhayi, va gu na ni wudogodogo, va gu vaphangi* mwendro va khozeyago sifananiso, kholu nari khatshi kharato na si gu lomba gu mu duga khu tigoni. 11 Ganiolu, olu nya gu mi loveya gasi mu diga gu dzi tshanganisa ni wevbini a ranwago ndriyathu ganiolu na gu gira wubhayi, nari ni wudogodogo, na gu khozeya sifananiso, na gu valeteya, na gu seya wadwa guvbindra pimo mwendro nari muphangi, ne mu nga hodzi ni muthu nya nga yoyo. 12 Khandri fanelo yangu gu lamula vathu va vbavbandze nya libandla. Khandrenu mu yedego gu lamula ava va gu romo ndrani, 13 Nungungulu a lamula ava va gomogo vbavbandze? “Muthu nya guvivbe mu yede gu mu dusa vbakari gwanu.”

6 Wa gu dwanisana ni ndriyago, khu ginani u tutumeyago gu hongola tribhunali u ya ketsari ga vathu nya mba lulama? Khu ginani u gu mba hongola ga vale va hathidwego khu Nungungulu libandlani? 2 Khu lisine, u ngu dziti gu khuwe ava va hathidwego khu Nungungulu va na lamula litigo. Abari gu mu na lamula litigo, khu ginani si mi garadzeyago gu lamula sigaradzo nya sidugwana ngudzu? 3 Kha mu dziti gu khenu hi na lamula dzingilozi? Khu kharato, khu ginani mu gu mba lamula sigaradzo nya sidugwana nya guvbanye? 4 Mwa gu ba muri ni sigaradzo guvbanyani gwanu, khu ginani mu si yisago ga valamuli, avo va gu mba gira gipandre nya libandla? 5 Nyo ganeya isoso gasi gu mi theya dzitshoni. Ina vbakari gwanu gu mwalo muthu a gu na ni wugengeyi gasi gu lamula vandriyaye? 6 Wulangani nya isoso, muthu a gu yisa ndriyaye tribhulani a ya mu ketsari ga vathu nya mba khodwa.

7 Mu na wuyedwa khu ginani khu gu ketsarana tribhunali? Khu ginani mu gu mba dzumeya gu ghohedwa? Khu ginani mu gu mba dzumeya gu kalavedwa? 8 Ganiolu, enu mwa gu ghoheya mu bwe mu kanganyisa vandriyanu.

9 Kha mu dziti gu khenu ava va girago silo nya guvivbe kha va na nga hodza thomba nya Mufumo wa Nungungulu? Mu nga dzi kanganyisi. Vathu va girago wubhayi,* avo va khozeyago sifananiso, oyu a gu mba tumbega ga mwama waye mwendro mwangadzi waye,* vama va dzi girago vanyamayi, ni vama va hengeyago malawu ni vama-kwawe, 10 dzimbafa, va nya wudogodogo, sidhakwa,* va nya gu valeteya ni vaphangi kha va na nga hodza thomba nya Mufumo wa Nungungulu. 11 Esi khiso vambe gwanu va nga ba va gira, ganiolu olu mu handzidwe mu aga. Mu khade va nya guaga, mu wonwa na mu lulamide khu lina la Pfhumu Jesu Kristo ni liphuvbo la Nungungulu wathu.

12 Nyi ngu dzumedziswa gu gira silo satshavbo, ganiolu khandri satshavbo si phasago. Nyi ngu dzumedziswa gu gira silo satshavbo, ganiolu kha nyi na nga dzumeya gu rumwa khiso. 13 Guhodza gu giredwe gu hongola girumbuni, nigu girumbu gi giredwe gu hakha guhodza, ganiolu Nungungulu a na si fuvisa satshavbo. Givili kha gya giredwa gu gira wubhayi,* ganiolu gi giredwe gu gira thumo wa Pfhumu, nigu Pfhumu yi na gi ninga esi gi si vbwetago. 14 Ganiolu, Nungungulu a wuside Pfhumu nigu a na hi wusa nethu khu gufani khu gu thumisa tshivba yaye.

15 Kha mu dziti gu khenu sivili sanu sa gu lumba Kristo? Ina si ngu khala gu mu dzega silo si lumbago Kristo mu si ningeya ga maphuphulu? Ne vbadugwana! 16 Kha mu dziti gu khenu ni wevbini a dzi patago ni liphuphulo a gu dzi gira nyama mweyo nalo? Kholu Nungungulu a di khuye “va vavili va na khala nyama mweyo.” 17 Ganiolu, ni wevbini a dzi patago ni Pfhumu a gu pwanana naye khu liphuvbo.* 18 Thavani wubhayi!* Ni gevbini gimbe gighoho egi muthu a gi girago kha gi nyenyezisi givili gyaye, ganiolu oyu a girago wubhayi a gu nyenyezisa givili gyaye. 19 Kha mu dziti gu khenu givili gyangu tempele nya liphuvbo nya guage li gomogo ndrani gwanu mu ningidwego khu Nungungulu? Enu kha mu dzi lumbi enu vamune. 20 Kholu Nungungulu a mi rengide khu tengo nya wukhongolo. Khu kharato, thumisani sivili sanu gasi gu dhumisa Nungungulu.

7 Olu nyo vbweta gu ganeya khu mahungu yale mu nga nyi loveyani. Tshukwana gu mwama a si tshadhi* ni gu bwe a si hengeyi malawu.* 2 Ganiolu, kha nga olu gu tadego ngudzu wubhayi* tshukwana gu mwama ni mwama a manega ni mwangadzi waye, nigu nyamayi ni nyamayi a manega ni mwama waye. 3 Mwama gu vbwetega a tadzisa gudogoreya nya malawu ga mwangadzi waye, nigu nyamayi nuye gu vbwetega a gira sasimweso ga mwama waye. 4 Nyamayi khandruye a fumeyago givili gyaye, ganiolu gyo fumedwa khu mwama waye. Khu ndziya nyo fane, mwama khandruye a fumeyago givili gyaye, ganiolu gyo fumedwa khu mwangadzi waye. 5 Mu nga gireyani ligungo, vbavbandze nya gu ba mu pwananide gu mba hengeya malawu khu matshigu nyo khaguri gasi mi feya gu thumisa tepo yoyo gasi gu gombeya. Ganiolu, hwane nya matshigu yoyo gu vbwetega mu tshangana gambe gasi Sathane a si lingi gu mba dzi phara gwanu. 6 Nya gu mi embeya satshavbo sesi gasi muti esi si dzumeledwago, ganiolu khandri nya gu mi ninga nayo. 7 Nyi di gu dogoreya gu kheni vathu vatshavbo va si tshadhi gu fana ni eni, ganiolu muthu ni muthu na ni giningwa gwaye a ningidwego khu Nungungulu; hatshavbo ho thumeya Nungungulu khu dzindziya nyo hambane-hambane.

8 Olu nyo embeya vale va si gu tshadhigo ni vale va gu dzinoni kheni: Tshukwana gu va simama kharato nga eni. 9 Ganiolu, va gu ba va si kodzi gu dzi phara va na tshadhe, kholu tshukwana gu tshadha guvbindra guvbya khu gudogoreya.

10 Vale va tshadhidego nyi ngu va ninga sileletelo sesi: Nyamayi gu vbwetega a si hambani ni mwama waye. Gileletelo gegi gya guta khiyo ga Pfhumu. 11 Ganiolu, a gu hambana naye, a na simame kamo kharato nya mba tshadha mwendro a na wuyeleyani ni mwama waye, nigu mwama kha yeli gu diga mwangadzi waye.

12 Ganiolu, ga vambe nyi ngu va embeya kheni, (esi kheni nyi ganeyago, nasiri Pfhumu): Ndruye nyo khaguri a gu ba ari ni nyamayi, ganiolu nyamayi yoyo na siri mukhodwa, uye kha yeli gu mu diga. 13 Nigu anuye nyamayi a gu ba ari ni mwama a sirigo mukhodwa nigu uye na dzi emisede gu vbanya naye, uye kha yeli gu diga mwama waye. 14 Kholu mutshadho wa mwama a sirigo mukhodwa wo wonwa na wu agide khu kotani ya mwangadzi waye, nigu mutshadho wa nyamayi a sirigo mukhodwa wo wonwa na wu agide khu kotani nya mwama waye, nasiri khu kotani nya isoso sanana na sa sa aga, ganiolu olu si agide. 15 Ganiolu, oyu a sirigo mukhodwa a gu hunga gu khuga a na khuge. Ndruye nya mwama mwendro nya nyamayi kha gurumedzegi gu simama naye sa gu girega isoso. Nungungulu mi ranide gasi gu ta vbanya gurulani. 16 Uwe nyamayi, u na dziti kharini gu khuwe u na vbulugisa mwama wago? Mwendro uwe mwama, u na dziti kharini gu khuwe u na vbulugisa mwangadzi wago?

17 Ambari ulolo, moyo ni moyo a na simame gu vbanya giemoni egi a nga ba ari ga igyo tepo a ranidwego khu Jehovha Nungungulu. Nya gu ninga gileletelo gegi ga yatshavbo mabandla. 18 Uye a ranidwego na hanide wugwera,* kha yeli gu vbindrugedza gu hana wugwera waye. Nigu oyu a ranidwego na sa hana wugwera* kha yeli gu hana wugwera. 19 Guhana wugwera khandri gilo, gu mba hana wugwera gambe khandri gilo, egi gi gu na ni lisima gu engisa milayo ya Nungungulu. 20 Moyo ni moyo gu vbwetega a simama edzi a nga ba ari idzo tepo a ranidwego. 21 Abari gu tepo u ranidwego u diri gumbi u nga garadzegi khu isoso, ganiolu wa gu mana lithomo nyo tshulege wugumbini li londrole. 22 Ni wevbini a nga ba ari gumbi tepo Pfhumu yi mu ranidego, khade githumi nya gutshulege gya Pfhumu. Nigu ni wevbini a ranidwego khu Pfhumu nari muthu nyo tshulege, khade githumi gya Kristo. 23 Enu mu rengidwe khu tengo, mu nga dzi girini dzigumbi nya vathu. 24 Vandruye, simamani edzi mu nga ba muri idzo tepo mu ranidwego khu Nungungulu.

25 Ganiolu ga vale va nga mba tshadha, nyi mwalo gileletelo gi tago khiyo ga Pfhumu, ganiolu nyi na va ninga mawonelo yangu eni, kha nga muthu a tumbegidego a yeyedzidwego wuhindzi khu Pfhumu. 26 Dziteponi dzedzi nyo garadze tshukwana gu muthu a simama edzi a gu idzo. 27 Wa gu ba uri ni nyamayi, u nga zami gu dzi tshula gwaye. Wa gu ba uri mwalo naye, u nga mu vbwetedzeyi. 28 Ganiolu, wa gu tshadha khandri wa gu ghoha, nigu a gu tshuka muthu a si gu tshadhigo a tshadha, khandri o ghoha. Ganiolu, avo va tshadhago va na manega ni sigaradzo guvbanyani gwawe, eni nyo zama gu mi phasa gu vbuluga sigaradzo soso.

29 Vandruye, nyi ngu mi embeyani gambe gu kheni tepo yi hi tshaledego yidugwana, khu kharato gukhugeya olu, uye a gu na ni nyamayi a na vbanye nga khatshi mwalo naye. 30 Avo va liyago gu vbwetega va gira khatshi kha va liyi, avo va tsakago gu vbwetega va gira khatshi kha va tsaki, avo va rengago gu vbwetega va gira khatshi va mwalo gilo. 31 Nigu avo va thumisago silo va ningwago khu litigo leli, gu vbwetega va gira nga khatshi kha va si thumisi ngudzu, kholu giemo nya litigo leli gi ngu vbindrugedza. 32 Nyo vbweta gu kheni mu vbanya nya mba garadzega. Mwama a nga mba tshadha a gu dzi garadza basi khu silo sa Pfhumu ni edzi a na tsakisago khidzo Pfhumu. 33 Ganiolu, mwama a tshadhidego a gu dzi garadza ngudzu khu silo nya litigo ni edzi a na tsakisago khidzo mwangadzi waye. 34 Khu kharato, uye kabanegide. Khu ndziya nyo fane, nyamayi a nga mba tshadha mwendro oyu nya gu gima a si gu tshadhi, a gu dzi garadza khu silo sa Pfhumu gasi a aga givilini ni mapimoni, ganiolu nyamayi a tshadhidego a gu dzi garadza khu silo nya litigo ni edzi a na tsakisago khidzo mwama waye. 35 Nya gu mi embeyani esi gasi gu mi phasa nasiri gasi gu mi hungeleya. Nyo vbweta gu kheni mu gira esi nya sadi gasi mu kodza gu thumeya Pfhumu nya mba pfhadzisedwa khu gilo.

36 Ganiolu, oyu a vidzidwego givilini ni mapimoni khavbovbo a pimisa gu khuye gu khala nya mba tshadha si ngu mu gira a manega ni mavbanyelo nyo vivbe, a na gire esi a si vbwetago, khandri o ghoha. A na tshadhe! 37 Ganiolu, oyu a hungidego monyoni gwaye gu khuye kha vbweti gu tshadha a bwe a wona gu khuye a na si kodza gu dzi phara, a bwe a hunga monyoni gwaye gu mba tshadha, a na gira gwadi. 38 Khu kharato, ni wevbini a tshadhago a ngu gira gwadi, ganiolu oyu a si tshadhigo a ngu gira gwadi ngudzu.

39 Nyamayi hungeledwe ga mwama waye, mwama waye na ngo vbanya. Ganiolu, mwama waye a gufa, uye tshulegide gu tshadha ni wevbini a mu vbwetago, o nga nga tshadha Pfhumuni. 40 Khu mawonelo yangu uye a na tsaka ngudzu a gu simama edzi a gu idzo. Nigu nyi ngu tiyisega gu kheni aneni nyi na ni liphuvbo la Nungungulu.

8 Olu nyi na mi loveyani maningano ni guhodza gu phasedwego sifananiso. Hatshavbo hi ngu mati mahungu yaya, ganiolu guti gonga ga gu hi gira hi dzi khusedza, ganiolu lihaladzo la gu tiyisa vambe. 2 Oyu a pimisago gu khuye a nguti mihlamulo yatshavbo kha pwisisi mahungu kha nga edzi a nga ba a yede gu ma pwisisa khidzo. 3 Ganiolu, muthu nyo khaguri a gu ba a haladza Nungungulu, a ngu tidwa khu Nungungulu.

4 Maningano ni gu hodza guhodza gu phasedwego sifananiso, ethu hi ngu dziti gu khethu gifananiso khandri Nungungulu nigu hi ngu dziti gu khethu gu na ni Nungungulu moyo basi. 5 Ambari olu gu gu na ni avo va ranwago gu pwani vanungungulu ndzadzini ni mafuni ni olu gu gu na ni “vanungungulu” nya vangi ni “dzipfhumu” nya dzingi, 6 gwathu gu na ni Nungungulu moyo basi, a gu Papayi, oyu silo satshavbo si tago khiyo gwaye nigu ethu ha gu vbanyeya uye. Nigu gwathu gu na ni Pfhumu mweyo basi, a gu Jesu Kristo, oyu silo satshavbo si dzudego khu gu thumiswa uye, nigu khu kotani yaye ethu hi na ni womi.

7 Ganiolu, khandri vatshavbo va si pwisisago isoso. Vambe gale va di gu khozeya sifananiso, khu kharato tepo va hodzago guhodza gu phasedwego avba nya gifananiso avo va gu dzi wona nari va gu khozeya gifananiso gyogyo. Khavbovbo livhalo lawe li va garadza kholu ilo kha la tiya. 8 Ganiolu, guhodza kha gu na nga hi hidzimisa ga Nungungulu, gimwalo hi na gi luzago ha gu mba hodza nigu ambari ha gu hodza gimwalo hi na gi manago. 9 Ambari ulolo, dzi woneyeni gasi gu fanelo yanu nya gu hathe yi si khali gitshunganiso ga vale va nga mba tiya. 10 Ambari wa gu ba u dziti gu khuwe sifananiso kha si phasi gilo, muthu a gu na ni livhalo nya mba tiya a gu tshuka a gu wona na wu gu hodza tempeleni nya gifananiso, isoso si nga mu kutsa nuye gu hodza guhodza gu phasedwego sifananiso. 11 Ambari wa gu ba u dziti gu khuwe gumwalo gigaradzo gu hodza guhodza gogo, uwe wa gu songa gukhodwa ga wule a gu na ni livhalo nya mba tiya; dundruga gu khuwe uye i ndriyago, anuye a fedwego khu Kristo. 12 Wa gu ghoheya ndriyathu khu ndziya yeyi, u songa livhalo laye nya mba tiya wa gu ghoheya gambe Kristo. 13 Khu kotani nya isoso, kha nyi na nga hodza gambe nyama abari gu guhodza nyi hodzago gu ngu songa gukhodwa ga ndriyangu. Kha nyi vbweti gu gira ni gevbini gi na songago gukhodwa ga ndriyangu.

9 Ina kha nyiri muthu nyi tshulegidego? Ina kha nyiri mupostoli? Ina kha nya wona Jesu Pfhumu yathu? Ina enu kha muri mihandro nya thumo wangu ga Pfhumu? 2 Ambari vambe va gu ba va si nyi woni nga mupostoli, enu khu lisine mu ngu nyi wona nga mupostoli. Enu mu gifungo gi fakazago gu khigyo eni nyi mupostoli wa Pfhumu.

3 Ga avo va nyi kanakaneyago nyi na dzi vhikeya, kheni: 4 Ina hi mwalo fanelo nya gu hodze ni gu seya esi vambe va hi ningago? 5 Ina hi mwalo fanelo nyo tshadhe ni gu bangaladzwa khu nyamayi a khodwago, kha nga edzi va girago khidzo vambe vapostoli, vadriye va Pfhumu ni Khefasi?* 6 Ina eni ni Bharinabha khethu basi hi yedego gu thuma gasi gu dzi vbanyisa? 7 Khu levbini lisotshwa li thumisago dzitsapawu dzalo la gu ba liri nyimbitunu? Khu mani a yalago simbo nya dziuvha a vbedza a si hodzi mihandro yakone? Khu wevbini muhavisi a si seyigo leti nya tshambi waye?

8 Kha nyi ganeyi silo sesi guya khu mawonelo nya vathu. Nayo nuwo wu ngu ganeya silo sesi. 9 Kholu gu lovidwe omu nya Nayo wa Mosi gu pwani: “U nga himbedzeyi mombe gu hodza ya gu ba yi vbula dzimbewu.” Ina Nungungulu a gu khathala khu dzimombe basi? 10 Ina uye kha ganeya isoso khu kotani yathu? Khu lisine, esi si lovidwe gasi gu phasa ethu. Oyu a limago ni oyu a vbulago dzimbewu va yede gu gira isoso na va gu vireya gu hakhiswa gipandre gyawe.

11 Ha gu ba hi yade mahungu ya Nungungulu vbakari gwanu, ina si vivbide gwathu gu hakha giphaso gyanu? 12 Abari gu vambe vathu va na ni fanelo nyo vireye isoso khiyo gwanu, ina ethu hi mwalo fanelo yoyo guvbindra avo? Ganiolu, ethu kha ha landra khu fanelo yathu, wulangani nya isoso, ha gu timiseya sigaradzo satshavbo gasi hi si tandregisi ni moyo gu khodwa avba nya mahungu nya yadi maningano ni Kristo. 13 Enu mu ngu dziti gu khenu avo va thumeyago tempeleni va gu hodza esi vathu va si resago tempeleni, nigu ava va thumeyago vbaalitaritunu va ngu ningwa gipandre nya esi si ningedwago vbaalitaritunu. 14 Khu ndziya nyo fane, Pfhumu yi layide gu khiyo vale va tshumayelago mahungu nya yadi va vbanya khu kotani nya mahungu nya yadi.

15 Ganiolu, eni kha nya hengula ni mweyo nya dzifanelo dzedzi. Nigu khandri nya gu mi loveya silo sesi khu gu ba nyi vbweta gilogyo iyo gwanu. Gwangu tshukwana gufa guvbindra . . . Mwalo a na nyi duseyago gighelo nya gutsake. 16 Nyi mwalo gighelo nyo dzikhusedze khu gu ba nyi mi tshumayela mahungu nya yadi, kholu i fanelo yangu gu gira isoso. Libango gwangu nya gu mba tshumayela mahungu nya yadi! 17 Nyo gira isoso khu gu dzina gwangu, nyi na tshatshazedwa. Ganiolu, ambari nyo si gira na nyi si dzini, eni nyi ningidwe thumo nya lisima. 18 Khu kharato, khu wevbini tshatshazelo wangu? Khu gu tshumayela mahungu nya yadi khu gu dzina, nya mba livbwa gilo, gasi nyi si thumisi khu ndziya nyo vivbe lithomo nyi gu nalo, a gu gu tshumayela mahungu nya yadi.

19 Ambari olu nyi sirigo githumi nya muthu nyi dzi giride githumi nya vathu vatshavbo gasi nyi feya gu mana vathu nya vangi. 20 Ga Vajudha nyi di dzi gira Mujudha, gasi nyi feya gu mana Vajudha. Nyi vbanyide khu nayo gasi nyi feya gu mana ava va gomogo vbavbatshi nya nayo. Ambari olu nyi si fumedwigo khu nayo, nyi giride isoso gasi nyi mana ava va fumedwago khu nayo. 21 Nyi dzi giride muthu a si landrisigo nayo, gasi gu mana vale va si landrisigo nayo. Nyi giride isoso ambari olu nyi landreyago nayo wa Nungungulu ni olu nyi fumedwago khu nayo wa Kristo. 22 Nyi dzi giride muthu nya mba tiya khu liphuvboni gasi gu mana ava va nga mba tiya khu liphuvboni. Nyi dzi giride satshavbo gasi gu mana vathu nya mafumbo yatshavbo, nyi zama gu vbulugisa vambe vakone khavba si kodzegago khavbo. 23 Ganiolu, nyo gira satshavbo soso gasi nyi kodza gu tshumayela mahungu nya yadi ga vambe.

24 Kha mu dziti gu khenu ava va girago mapalisana nya gututume va gu tutuma vatshavbo, ganiolu moyo basi a hakhago gihiwa? Khu kharato, anenu tutumani gasi mu hakha gihiwa. 25 Vatshavbo va girago mapalisana va ngu dzi phara siloni satshavbo. Avo vo gira isoso gasi va hakha korowa yi fuvago, ganiolu ethu hi na hakha korowa yi si fuvigo. 26 Khu kharato, eni kha nyi tutumi nyamututume; nya gu rinya sibhakeya sangu khu ndziya nya gu si si veti phuvbo. 27 Nya gu tsayisa givili gyangu, nyi gi gira gumbi, gasi nyi si digwi khu Nungungulu ambari hwane nya gu ba nyi tshumayede vambe.

10 Vandruye, nyo vbweta gu kheni mu dziti gu khenu vakokwe vathu vatshavbo va diri vbavbatshi nya lipfhi nigu vatshavbo va tshatugide yiphwa 2 nigu vatshavbo va bhabhatisidwe khu gu ba va landreya Mosi, tepo va nga ba vari vbavbatshi nya lipfhi ni tepo va nga tshatuga yiphwa. 3 Vatshavbo va hodzide guhodza gagumogo nya liphuvbo, 4 ni gu vatshavbo va sede mati ya mamowo nya liphuvbo ma nga ba ma duga khavba nya giwindri gi nga ba gi vegidwe khu Nungungulu, gi nga ba gi va landreya, nigu giwindri gyogyo gi di gu emeya* Kristo. 5 Ganiolu nya vangi gwawe kha va tsakisa Nungungulu, khu kharato uye a va songide giwulani.

6 Isoso si va dugelede gasi si khala gihevbudzo gwathu, gasi hi si dogoreyi silo si na hi bedzago mhangoni, nga avo va si dogoredego. 7 Kha hi yeli gu khozeya sifananiso, nga vambe gwawe va khozedego, kha nga si lovidwego omu nya Milowo, pwani: “Vathu va di khala vbavbatshi gasi gu hodza ni gu seya, va bwe va khuga gasi gu dzi tsakisa.” 8 Kha hi yeli gu gira wubhayi,* nga vambe gwawe va giridego, khu kharato gufa 23 000 nya avo khu litshigu limwedo. 9 Kha hi yeli gu linga Jehovha, kha nga esi va giridego vambe gwawe, khu kharato va songwa khu dzinyoga. 10 Kha hi yeli gu ngurangura kha nga vambe gwawe va nga ngurangura, khu kharato va songwa khu ngilozi yi fuvisago. 11 Silo soso si va dugelede gasi si khala gihevbudzo gwathu, nigu si lovidwe gasi si khala gigengedzo ga ethu hi vbanyago matshigoni* nya guhegise.

12 Khu kharato, oyu a pimisago gu khuye tiyide, a na dzi woneye gasi a si thegi. 13 Silingo satshavbo mu emisanago naso, vomo va emisanago naso navo. Ganiolu Nungungulu tumbegide. Kha na nga dzumeleya gu khuye mu tshangana ni silingo mu na tandregago gu si timiseya. Mwa gu lingwa, Nungungulu a na mi ninga makodzelo nyo timiseye gilingo gyogyo.

14 Khu kharato, sigodwa sangu, mu nga khozeyini* sifananiso. 15 Enu mu vathu mu pimisago gwadi, khu kharato, si woneni enu vamune gu khenu esi nyi ganeyago lisine gani. 16 Tepo hi seyago kopo nya gikategiso eyi hi yi gombeleyago, ina khandri ho hengeya novbani wa Kristo? Tepo hi hodzago pawu hi piyago, ina khandri ho hengeya givilini gya Kristo? 17 Kha nga olu gu gu na ni pawu mweyo, ambari olu hi gu vangi, ho hengeya givili gimwegyo, kha nga olu hatshavbo hi hengeyago pawu mweyo.

18 Khedzani esi vathu va Israyeli va girago: Tepo va hodzago muphaso wu ningedwago vbaalitaritunu, ina khandri sa gu fana ni gu ba va hodza gumogo ni Nungungulu? 19 Ina nyo vbweta ganeya gu kheni gifananiso ni esi gi phasedwego avba gwagyo si na ni lisima? 20 Ahihi! Nyo vbweta ganeya gu kheni vanyamayigo vo gireya miphaso madhimoni nasiri ga Nungungulu, ni gu eni kha nyi vbweti gu kheni mu hengeya ni madhimoni. 21 Kha si kodzegi gu enu mu seya kopo ya Jehovha mu bwe mu seya kopo nya madhimoni. Kha si kodzegi gu enu mu hodza “vbamezatunu ya Jehovha” mu bwe mu hodza vbamezatunu nya madhimoni. 22 Mwendro ‘ethu ha gu zama gu zangarisa Jehovha’? Ina hi na ni tshivba gu vbindra uye?

23 Satshavbo si ngu dzumedziswa, ganiolu khandri satshavbo si phasago. Satshavbo si ngu dzumedziswa ganiolu khandri satshavbo si vbahago.* 24 Muthu ni muthu a nga dwaneyi gu gira esi si na phasago uye basi, ganiolu a na dzi garadzeye gu gira esi si na phasago vambe.

25 Hodzani dzinyama dzatshavbo dzi rengiswago merkadho, na mu si dzi wudziseyi silo khu kotani nya livhalo lanu, 26 kholu Milowo yari khiyo: “Mafu ni satshavbo si gomogo gwawo, sa gu lumba Jehovha.” 27 Wa gu ranwa khu muthu a gu siri mukhodwa gasi gu ya hodza naye, khavbovbo u hunga gu hongola, hodza ni gevbini a na gu ningago. U nga dzi giri siwudziso khu kotani nya livhalo lago. 28 A gu tshuka muthu nyo khaguri a gu embeya, khuye: “Nyama yeyi yi ningedwe kha nga muphaso ga sifananiso” khu yeli gu hodza, khu kotani yaye, gasi u si khunguvanyisi livhalo nya muthu. 29 Kha nyi thuli livhalo lanu ganiolu nyo thula livhalo nya mumbe muthu, kholu kha nyi vbweti gu thumisa gutshulega gwangu, ganiolu nyi lamudwa khu livhalo nya mumbe muthu khu kotani nya gutshulega gogo. 30 Khu kharato, ambari nya gu ba nyi bonga Nungungulu khu guhodza nigu na nyiri ni fanelo nya gu hodze, nyi na gireya ginani isoso abari gu vomo va na nyi solago?

31 Khu kharato, gani mwa gu hodza, gani mwa gu seya mwendro gu gira ni gevbini, girani satshavbo gasi gu ninga wudhumo Nungungulu. 32 Mu nga giri vambe va tshunganeya, gani Vajudha, gani Vagreki, mwendro vale va lumbago libandla la Nungungulu. 33 Khiso nyi zamago gu gira; nyo zama gu tsakisa vathu vatshavbo ga satshavbo nyi girago. Kha nyi dwaneyi basi esi si na phasago eni, ganiolu nyo dwaneya esi si na phasago nya vangi gasi avo va vbulugiswa.

11 Pimedzeyani giyeyedzo gyangu, nga eni neni nyi pimedzeyago giyeyedzo gya Kristo.

2 Nyi ngu mi zundzani kholu tepo yatshavbo mu ngu nyi dundruga nigu enu mu ngu landreya gwadi esi nyi mi leletedego. 3 Nyo vbweta gu kheni mu dziti gu khenu Kristo khuye hungo nya vama vatshavbo, nigu mwama hungo wa nyamayi, nigu Nungungulu hungo wa Kristo. 4 Ni wevbini mwama a gombeyago mwendro gu profeta na ambade gilo hungoni a gu tshonegisa oyu a gu hungo waye. 5 Ganiolu, ni wevbini nyamayi a gombeyago mwendro gu profeta na sa ambala gilo hungoni a gu tshonegisa oyu a gu hungo waye, kholu sa gu fana ni gu ba nyamayi yoyo a gayidwe ndzudzu. 6 Kholu nyamayi a gu mba ambala gilo hungoni gu vbwetega a gaya ndzudzu, ganiolu a gu khala dzitshoni khu gu gaywa mwendro gu vbaludwa a na ambale gilogyo hungoni.

7 Ganiolu, mwama kha yeli gu ambala gilo hungoni kha nga olu a gu gifananiso ni wudhumo wa Nungungulu, ganiolu nyamayi wudhumo wa mwama. 8 Khandri mwama a dusidwego ga nyamayi, ganiolu nyamayi khuye a dusidwego ga mwama. 9 Nigu gambe mwama kha girwa khu kotani nya nyamayi, ganiolu nyamayi khuye a nga girwa khu kotani nya mwama. 10 Khu khotani nya isoso nigu khu kotani nya dzingilozi, nyamayi yede gu manega ni giyeyedzo hungoni gi yeyedzago gu khigyo a ngu dzi nogisa ga oyu a gu hungo waye.

11 Vbavbandze nya isoso, vbakari nya valandreyi va Pfhumu, kha si kodzegi gu manega nyamayi na guri mwalo mwama, nigu kha si kodzegi gu manega mwama na guri mwalo nyamayi. 12 Kha nga olu nyamayi a tago khiyo ga mwama, mwama nuye velegidwe khu nyamayi; ganiolu silo satshavbo sa guta khiyo ga Nungungulu. 13 Nga lamulani enu vamune: Ina si ngu yela gu nyamayi a gombeya ga Nungungulu nari vbakari nya vambe vathu ganiolu na sa ambala gilo hungoni? 14 Tumbunugo wu ngu mu hevbudzani gu khuwo dzitshoni gu mwama a manega ni ndzudzu nyo laphe, 15 ganiolu si ngu mbura gu nyamayi a manega ni ndzudzu nyo laphe. Nyamayi ningidwe ndzudzu gasi a fenengedza hungo waye. 16 Go ba guri ni oyu a vbwetago gu ganedza mahungu yaya, khu gu vbweta gu landreya gimbe giolovedzo, hi mwalo gimbe giolovedzo nigu libandla la Nungungulu nilo li mwalo nagyo.

17 Kha nyi mi zundzini tepo nyi mi ningago sileletelo sesi kholu mitshangano yanu kha yi mi phasi, ganiolu ya gu mi tshungunula. 18 Nyo pheye, nya gupwa gu pwani tepo mu tshanganago libandlani, go manega guhambana vbakari gwanu. Khu ndziya nyo khaguri, isoso nyi ngu si khodwa. 19 Khu lisine, gu na manega sitsawatsawana vbakari gwanu, ganiolu isoso si na yeyedza gu khiso khu mani a tsakedwago khu Nungungulu.

20 Tepo mu tshanganago gasi gu hodza Gilalelo gya Pfhumu, kha mu giri khu ndziya nya yadi. 21 Ya gu vboha tepo nya Gilalelo gya Pfhumu, moyo ni moyo a gu pheya khu gu hodza guhodza gwaye, gu manega gu vambe vapwa ndzala, vambe na va levide. 22 Ina enu mu mwalo magaya nya gu hodzeye ni gu seya iyo? Mwendro ina mwa gu li woneya vbavbatshi libandla la Nungungulu ni gu bwe mu tshonegisa vale va gu mwalo gilo? Ginani nyi na mi embeyago? Mo vbweta khenu nyi mi zundza? Avbo nya isoso, kha nyi na nga mi zundzani.

23 Esi nyi mi hevbudzidego khiso neni nyi si hevbudego ga Pfhumu. Ga wutshigu owu Pfhumu Jesu a nga ningedwa, a di dzega pawu, 24 hwane nya gu ba a bongide ga Nungungulu, a di yi piya, khuye: “Pawu yeyi yo emeya givili gyangu gi na ningedwago khu kotani yanu. Simamani gu gira esi gasi gu nyi dundruga.” 25 Hwane nya gu ba va hodzide a di dzega kopo a gira sasimweso, khuye: “Kopo yeyi yo emeya pwanano nya wuphya wu tiyiswago khu novba wangu. Simamani gu gira esi, nigu nyi dundrugeni tepo yatshavbo mu seyago kopo yeyi.” 26 Tepo yatshavbo mu na hodzago pawu yeyi ni gu seya kopo yeyi mu na ba na muri mwa gu huweleya gufa ga Pfhumu, kala yi wuya.

27 Khu kharato, oyu a hodzago pawu ni gu seya kopo ya Pfhumu nari mwalo fanelo a na ningwa nandru nya gu ghoheye givili ni novba wa Pfhumu. 28 Muthu ni muthu a na pheye khu gu dzi kambeya gwadi gasi gu wona gu khuye a ngu faneya gani; hwane nya isoso khavbo a na hodzago pawu ni gu seya kopo nya vhinyu. 29 Ni wevbini a hodzago ni gu seya na si pwisisi esi givili gi emeyago iso, a gu dzi lamula. 30 Khiso si nga gira nya vangi gwanu va vbeya tshivba ni gu dwala, nigu nya vangi va ngufa.* 31 Ganiolu, nari khatshi hi di phede khu gu dzi kambeya gwadi na ha sa lamudwa. 32 Ganiolu, tepo hi lamudwago sa gu thula gu khiso Jehovha a gu hi laya gasi hi si tsayiswi gumogo ni litigo. 33 Khu kharato vandruye, tepo mu tshanganago gasi gu hodza Gilalelo gya Pfhumu, vireyanani. 34 Go ba guri ni oyu a pwago ndzala a na hodze gaya gwaye, gasi tepo mu tshanganago mu si lamudwi. Ganiolu, esi si tshadego nyi na ta si lulamisa tepo nyi na vbohago iyoyo.

12 Vandruye, nyo vbweta gu kheni mu pwisisa maningano ni siningwa nya liphuvbo nya guage. 2 Mu ngu dziti gu khenu na mu si gu khali makhodwa mu di gu woneledwa ni gu kanganyiswa khu sifananiso si si ganeyigo, nigu mu di gu si landra ni hayini. 3 Khu kharato, nyo vbweta gu kheni mu dziti gu khenu mwalo ni moyo a thangedwago khu liphuvbo la Nungungulu a ganeyago gu khuye: “Jesu vadwe!” nigu mwalo a gu khuye: “Jesu Pfhumu!” na si thangedwi khu liphuvbo nya guage.

4 Gu na ni siningwa nya gu hambane-hambane, ganiolu gu na ni liphuvbo limwedo basi. 5 Mathumelo ma hambanide, ganiolu ha gu thumeya Pfhumu yayimweyo. 6 Gu na ni mithumo nya guhambane-hambane, ganiolu khu Nungungulu wa moyo a ningago moyo ni moyo tshivba nya gu yi gire. 7 Ganiolu, giphaso hi ningwago khu liphuvbo nya guage gi ngu wonega ga vatshavbo nigu Nungungulu hi ningide ilo gasi gu phasa vatshavbo. 8 Liphuvbo li ngu ninga muthu nyo khaguri makodzelo nyo ganeye khu wugengeyi, nigu liphuvbo la limwedo li ngu ninga mumbe muthu makodzelo nyo ganeye khu guti. 9 Liphuvbo la limwedo li ngu ninga muthu nyo khaguri gukhodwa, li bwe li ninga mumbe makodzelo nya gu hawulugise. 10 Ilo gambe li ngu ninga ga mumbe makodzelo nyo gire silewugiso, ga mumbe makodzelo nya guprofete, ga mumbe makodzelo nyo pwisise mahungu ma tago khiyo ga Nungungulu, ga mumbe makodzelo nyo ganeye malimi nyo hambane-hambane, ga mumbe makodzelo nyo tshamuseye* esi si ganedwego khu malimi nya guhambane-hambane. 11 Satshavbo sesi so girwa khu liphuvbo la limwedo. Muthu ni muthu a gu ningwa makodzelo khu guya khu gugola nya liphuvbo la Nungungulu.

12 Givili nya muthu gi na ni sivbango nya singi, ganiolu givili gimwegyo basi, nigu sivbango satshavbo sa gu lumba givili gyogyo gya gimwegyo, khidzo gambe kharato ni Kristo. 13 Hatshavbo hi bhabhatisidwe khu liphuvbo la limwedo gasi gu wumba givili gimwegyo. Gani hi Vajudha, gani hi Vagreki, gani hi dzigumbi, gani hi vathu va tshulegidego hatshavbo hi hakhide liphuvbo la limwedo.

14 Khu lisine, givili khandri gyo wumbwa khu givbango gimwegyo basi, ganiolu gyo wumbwa khu sivbango nya singi. 15 Ambari nari khatshi ngondro wo ganeya gu khuwo: “Kha nga olu nyi sirigo libogo, kha nyiri givbango nya givili,” uwo na wu si digi gu khala givbango nya givili. 16 Ambari nari khatshi ndzeve yo ganeya gu khiyo: “Kha nga olu nyi sirigo liso, kha nyiri givbango nya givili,” iyo na yi si digi gu khala givbango nya givili. 17 Nari khatshi givili gyatshavbo gi diri liso, muthu a di hadzi gupwa kharini? Nari khatshi givili gyatshavbo gi diri ndzeve, muthu a di hadzi gupwa kharini gunungeya? 18 Ganiolu, Nungungulu vegide vbagivilitunu sivbango satshavbo kha nga edzi a nga ba a si vbweta khidzo.

19 Nari khatshi sivbango satshavbo si di gu fana, na giri hayini givili? 20 Khu kharato, gu na ni sivbango nya singi, ganiolu gu na ni givili gimwegyo basi. 21 Liso kha li si kodzi gu embeya libogo, khilo: “Kha nyi gu vbweti,” nigu hungo kha wu si kodzi gu embeya migondro, khuwo: “Kha nyi mi vbweti.” 22 Khu lisine, ambari sivbango sile nya givili si wonegago na siri mwalo tshivba si ngu vbwetega. 23 Nigu hi ngu theya kota khu sivbango sile nya givili hi pimisago gu khethu si mwalo lisima. Ganiolu, sivbango nya givili gyathu hi si vbwetigo gu khethu si wonwa khu vathu, hi ngu si khatheleya gwadi. 24 Ganiolu, sivbango si mburidego nya givili gyathu kha si vbweti gu khathaledwa khu ndziya yoyo. Nungungulu giride givili khu ndziya yeyi gasi sivbango si wonwago na siri mwalo lisima si khathaledwa gwadi. 25 Uye giride isoso gasi gu si manegi guhambana avba nya givili ni gu bwe sivbango nya givili si khathaleyana khu gyaso. 26 Gya gu tshuka givbango gimwegyo nya givili gi tshaniseka, satshavbo sivbango sa gu tshaniseka gumogo nagyo. Gya gu tshuka givbango nya givili gi ningwa wuzundzo, satshavbo sivbango sa gu tsaka gumogo nagyo.

27 Enu mu givili gya Kristo, nigu moyo ni moyo wanu givbango nya givili gyogyo. 28 Nungungulu vegide moyo ni moyo wulangani gwaye libandlani: Nyo pheye vapostoli, nya wuvili vaprofeti, nya wuraru vahevbudzi, gu landreya avo va girago silewugiso, avo va gu na ni makodzelo nyo hawulugise vambe, avo va phasedzeyago vambe, avo va thangeyago ni vale va gu na ni giningwa nya gu ganeye malimi nyo hambane-hambane. 29 Ina vatshavbo vapostoli? Ina vatshavbo vaprofeti? Ina vatshavbo vahevbudzi? Ina vatshavbo va ngu gira silewugiso? 30 Ina vatshavbo va na ni makodzelo nyo hawulugise vambe? Ina vatshavbo va na ni giningwa nyo ganeye malimi nyo hambane-hambane mwendro nya gu tshamuseye* esi si ganedwego khu malimi yoyo? 31 Khu kharato, girani satshavbo mu si kodzago gasi mu hakha siningwa nya sikhongolo. Ganiolu, olu nyi na mi yeyedzani ndziya nya yadi ga dzatshavbo.

13 Nyo ganeya malimi nya vathu mwendro nya dzingilozi ganiolu na nyiri mwalo lihaladzo nyi na fana ni ligwaha nya pundru mwendro ngoma yi wombwago. 2 Ambari nya gu ba nyiri ni giningwa nya gu profete ni gu pwisisa misihalo yatshavbo ya Nungungulu ni guti gwatshavbo ni gu ba nyiri ni gukhodwa gwatshavbo avbo nya gu nyi kula sigomo, ganiolu nya gu ba nyiri mwalo lihaladzo kha nyiri wa gilo. 3 Ambari nya gu ningeya silo sangu satshavbo gasi si hodzwa khu vambe ni gu dzi khusedza khu gu ba nyi ningeya givili gyangu, ganiolu na nyiri mwalo lihaladzo kha nyi phasi gilo.

4 Lihaladzo li na ni gulaphisa-monyo ni wuwadi. Lihaladzo li mwalo wufu, li mwalo matshandza, kha li dzi khusedzi. 5 Lihaladzo kha li giri silo nya dzitshoni, kha li vbwetedzeyi esi si phasago ilo basi. Lihaladzo kha li vbiredzeyi gu goroga nigu ilo kha li vegedzeyi giviti. 6 Lihaladzo kha li tsakiswi khu silo nyo mba lulama, ganiou la gu tsaka khu silo nya lisine. 7 Lihaladzo li ngu rwala silo satshavbo, li ngu khodwa silo satshavbo, li ngu vireya silo satshavbo nigu li ngu timiseya silo satshavbo.

8 Lihaladzo gima kha li vbeyi. Giningwa nya guprofete ni giningwa nya gu ganeye mambe malimi si na vbeya. Giningwa nya gu hathege nya guti gi na fuva. 9 Ethu hi mwalo guti nya guvbeleye nigu kha hi profeti khu gu vbeleya. 10 Ganiolu sa gu vboha esi nya gu vbeleye, esi nya mba vbeleya si na fuva. 11 Na nyi ngari gyanana nyi di gu ganeya nga gyanana, nyi pimisa nga gyanana; ganiolu olu nyi dandridego nyi digide mavbanyelo nya wanana. 12 Olu kha hi woni gwadi, ho gira khatshi ho dzi bona avba nya libona nya simbi, ganiolu yi na vboha tepo hi na wonago gwadi.* Olu guti gwangu kha gwa vbeleya, ganiolu yi na vboha tepo gu na vbeleyago gu fana ni edzi Nungungulu a nyitigo khidzo. 13 Ganiolu olu gu tshade silo sesi sa siraru: gukhodwa, gutumba ni lihaladzo; ganiolu ga esi sa siraru nya gikhongolo lihaladzo.

14 Dzi garadzeyeni gu haguleya lihaladzo, ganiolu girani satshavbo mu si kodzago gasi mu hakha siningwa nya liphuvbo nya guage, ngudzu-ngudzu giningwa nya gu profete. 2 Oyu a gu na ni giningwa nya gu ganeye malimi nya mangi, kha ganeyi ni vathu, ganiolu a gu ganeya ni Nungungulu. Mwalo a pwisisago esi a ganeyago kholu a gu ganeya misihalo ya Nungungulu khu gu thumisa tshivba nya liphuvbo. 3 Ganiolu, oyu a profetago a gu vbaha, a tiyisa a bwe a thaveleya vambe khu malito yaye. 4 Oyu a ganeyago malimi nya mangi a gu dzi tiyisa abune, ganiolu oyu a profetago a gu tiyisa libandla. 5 Gu pheya, nyi di gu tsakeya gu kheni mwatshavbo mu manega ni giningwa nya gu ganeye malimi nya gu hambane-hambane. Ganiolu gwangu tshukwana mu profeta. Oyu a profetago khongolo guvbindra wule a gu na ni giningwa nyo ganeye malimi nyo hambane-hambane, vbavbandze nya gu ba oyu a ganeyago malimi nya mangi a tshamuseya* esi a ganeyago gasi gu tiyisa libandla. 6 Vandruye, si di hadzi mi phasa kharini nya guta na nyi gu ganeya malimi nyo hambane-hambane ganiolu mu gu mba ma pwisisa. Iso si nga hadzi mi phasa khu gu nyi mi reseya gutuledwa ga Nungungulu mwendro guti, mwendro wuprofeti, mwendro sihevbudzo.

7 Khiso sasimweso si giregago ni silo si wombwago si gira ndzimo, nya nga flawuta mwendro gitendre. Abari gu madzumelo yakone ma ngu fana, u na dziti kharini gu khuwe ginani gi wombwago khu flawuta nigu ginani gi wombwago khu gitendre. 8 Pundru wa gu mba wombwa wu pwala gwadi, khu mani a na dzi dongiseyago gu hongola nyimbitunu? 9 Khu ndziya nyo fane, mo mba thumisa malito si vbevbugago gu ma pwisisa, vathu va na siti kharini esi mu ganeyago? Si na fana ni gu ba mu ganeya ni phuvbo.* 10 Tigoni gu na ni malimi nya mangi, ganiolu yatshavbo ma na ni mitshamuselo. 11 Nya gu ba nyi si pwisisi tshamuselo nya esi si ganedwago nyi na fana ni muluveli ga wule a ganeyago, nigu muthu yoyo a na fana ni muluveli gwangu. 12 Khiso sasimweso ni enu, kha nga olu mu dogoreyago ngudzu gu manega ni siningwa nya liphuvbo nya guage, vbwetedzeyani siningwa si na tiyisago libandla.

13 Khu kharato, oyu a ganeyago malimi nya mangi gu vbwetega a gombeya gasi a si kodza gu tshamuseya esi a ganeyago.* 14 Nya gu ba nyi gombeya khu malimi nyo hambane-hambane, giningwa gyangu nya liphuvbo khigyo gi gombeyago ganiolu mapimo yangu gimwalo ma girago. 15 Khu kharato, ginani nyi yedego gu gira? Nyi na gombeya khu giningwa nya liphuvbo, ganiolu nyi na gombeya gambe khu mapimo yangu. Nyi na embeleya dzindzimo khu giningwa nya liphuvbo, ganiolu nyi na embeleya gambe dzindzimo khu gu thumisa mapimo yangu. 16 Wa gu dhumisa Nungungulu khu giningwa nya liphuvbo, muthu a na ganeya kharini gu khuye “Amen,” avba nya milombelo yanu nya gu bonge, na a si siti esi u ganeyago? 17 Si nga gira mu bonga Nungungulu khu ndziya nya yadi, ganiolu mumbe kha na nga phasega. 18 Nyi ngu bonga Nungungulu khu gu ba nyiri ni giningwa nyo ganeye malimi nya mangi guvbindra enu mwatshavbo. 19 Ganiolu, libandlani nyi ngu wona nari tshukwana gu ganeya 5 malito nyi ma pwisisago gasi gu hevbudza vambe guvbindra gu ganeya 10 000 malito khu lidimi li gu mba tidwa.

20 Vandruye, mu nga pimisi nga sanana. Khalani sanana ga esi nya guvivbe, ganiolu mu khala vathu va dandridego mapimoni. 21 Gu lovidwe omu nya Nayo gu pwani: “Nyi na ganeya ni vathu vava khu malimi ya valuveli ni malito ya valuveli, ambari ulolo avo va na bomba gu nyi engisa, a ngu ganeya Jehovha.” 22 Giningwa nya gu ganeye malimi nya guhambane-hambane giyeyedzo ga vale va si khodwigo nasiri ga vale va khodwago, ganiolu gu profeta khwa vale va khodwago nasiri vale va si khodwigo. 23 Libandla latshavbo la gu tshangana gumogo nigu vatshavbo va ganeya khu malimi nya guhambane-hambane, va gu beya vathu nya giemo gya vbavbatshi mwendro va si khodwigo va na khavo mu handrugide. 24 Ganiolu, vatshavbo va gu ba va profeta, khavbovbo gu beya muthu nya giemo gya vbavbatshi mwendro a si khodwigo, esi a na sipwago si na mu kawuka si bwe si mu phasa gu dzi gevisisa abune. 25 Misihalo yi gomogo myonyoni gwaye yi na wonegiswa, gasi a khidzima a khozeya Nungungulu a ganeya, khuye: “Khu lisine, Nungungulu womo vbakari gwanu.”

26 Khu kharato vandruye, ginani mu yedego gu gira? Tepo mu tshanganago, mumbe a na embeleya dzindzimo, mumbe a na hevbudza nigu mumbe a na ganeya gutuledwa gu tago khiyo ga Nungungulu; mumbe a na ganeya malimi nyo hambane-hambane nigu mumbe a na tshamuseya* esi si ganedwago. Girani satshavbo sesi gasi mu tiyisana khu gyanu. 27 Va gu manega avo nya gu ganeye malimi nyo hambane-hambane va nga vbindri vavili mwendro vararu nigu gu vbwetega a manega mumbe muthu gasi gu tshamuseya* esi si ganedwago. 28 Ganiolu, a gu ba ari mwalo muthu nya gu tshamuseye esi si ganedwago, muthu yoyo gu vbwetega a degula libandlani, a ganeya ni Nungungulu basi. 29 Gu na ganeye vaprofeti vavili mwendro vararu, nigu vambe gu vbwetega va dzi garadzeya gu pwisisa tshamuselo wakone. 30 A gu tshuka muthu nyo khaguri na khade mitshanganoni a hakha gutuledwa gu tago khiyo ga Nungungulu, wule a nga ba a ganeya gu vbwetega a degula. 31 Mwatshavbo mu nga profeta, ganiolu moyo khu moyo, gasi mwatshavbo mu hevbula mu bwe mu tiyiswa. 32 Vaprofeti gu vbwetega va woneleya edzi va thumisago khidzo giningwa nya liphuvbo. 33 Kholu Nungungulu khandri Nungungulu nya pfilupfilu, ganiolu Nungungulu nya gurula.

Kha nga mabandlani yatshavbo ya va nya guaga, 34 vanyamayi gu vbwetega va degula libandlani, avo kha va dzumeledwi gu ganeya. Ganiolu, avo gu vbwetega va engisa, kha nga edzi Nayo wu rumago khidzo. 35 Va gu vbweta gu hevbula gilogyo, va na wudzise vama vawe gaya kholu dzitshoni gu nyamayi a ganeya vbakari nya libandla.

36 Ina mahungu ya Nungungulu ma dzude khiyo gwanu? Ina khenu basi mu nga ma hakha?

37 Oyu a pimisago gu khuye muprofeti mwendro na ni giningwa nya liphuvbo nya guage gu vbwetega a dziti gu khuye esi nyi mi loveyago sileletelo si tago khiyo ga Pfhumu. 38 Ganiolu, uye a gu mba dzumeya silo sesi anuye kha na dzumedwa. 39 Khu kharato vandruye, dzi garadzeyeni gu profeta, ganiolu mu nga himbedzeyi gu ganeya khu mambe malimi. 40 Ganiolu girani satshavbo khu ndziya nya yadi guya khu nayo.

15 Vandruye, nyo vbweta gu mi dundrugisa khu mahungu nya yadi nyi mi embedego. Enu mu ma hakhide mu bwe mu ma tumba. 2 Khu kotani nya mahungu yaya nya yadi nyi mi embedego enu mu ngu vbulugiswa. Ganiolu, mwa gu mba ma phareleya, gukhodwa gwanu khandri ga gilo.

3 Vbakari nya silo nyo pheye nyi nga mi hevbudzani gu diri ni esi aneni nyi nga hevbula, a gu esi: Guya khu Milowo, Kristo fude khu kotani nya sighoho sathu. 4 Nigu guya khu Milowo, uye dzingidwe a bwe a wuswa khu litshigu nya wuraru. 5 Dzi wonegiside ga Khefasi.* Khu hwane nya isoso, a dzi wonegisa ga 12 vapostoli. 6 Khu hwane nya isoso, dzi wonegiside gambe khu gumogo ga vandruye va vbindrago 500, nigu nya vangi vakone va ngari ni ethu kala olu, ambari olu vambe va fudego. 7 Khu hwane nya isoso, dzi wonegiside ga Jakobe. Khu gulandreya, a di dzi wonegisa va vapostoli vatshavbo. 8 Khu gu hegisa dzi wonegiside gwangu neni, nyi gu khatshi nyi gyanana gi velegidwego na gi si gu enedzi matshigu.

9 Kholu eni kheni nyi gu dugwana ngudzu ga vapostoli, nigu kha nyi yedwi gu ranwa nga mupostoli kholu nyi tshaniside libandla la Nungungulu. 10 Nyi womo edzi nyi gu idzo muhuno khu kotani nya wuwadi nya wukhongolo ngudzu wa Nungungulu, nigu wuwadi waye nya wukhongolo ngudzu kha wa khala wa mahala kholu nyi thumide khu gudzigaradza guvbindra vatshavbo. Ganiolu, kha nya thuma khu tshivba yangu, nyi giride isoso khu kotani nya wuwadi nya wukhongolo ngudzu wa Nungungulu. 11 Gani mu di hevbudzwa kheni, gani mu di hevbudzwa khu vambe, aya khayo mahungu hi ma tshumayelago, nigu esi khiso mu si khodwego.

12 Mahungu hi ma hevbudzago khayo nyo khethu Kristo wusidwe khu gufani. Khu ginani vambe gwanu va gu khavo gu mwalo guwuswa ga avo va fudego? 13 Go ba guri mwalo guwuswa ga avo va fudego, anuye Kristo kha wuswa khu ga vafudego. 14 Ganiolu, abari gu Kristo kha wuswa khu ga vafudego, gutshumayela gwathu khandri ga gilo nigu gukhodwa gwanu nugo khandri ga gilo. 15 Vbavbandze nya isoso, hi na ba hiri dzifakazi nya malipha dza Nungungulu. Hi na ba hiri ho swayela malipha khu Nungungulu khu gu khethu uye wuside Kristo khu gufani, narigu kha mu wusa, abari gu ava va fudego kha va na nga wuswa. 16 Kholu abari gu avo va fudego kha va na nga wuswa khu gufani, Kristo nuye kha wuswa khu gufani. 17 Nigu abari gu Kristo kha wuswa khu gufani, gukhodwa gwanu khandri ga gilo, mu ngo simama sighohoni sanu. 18 Nigu gambe avo va fudego na vari valandreyi va Kristo, va fuvide. 19 Abari gu gutumba hi gu nago iyo ga Kristo khuwo womi wowu basi, hi tshanisekide guvbindra vatshavbo.

20 Ganiolu, ethu hi ngu dziti gu khethu Kristo wusidwe khu gufani. Vbakari ga avo va fudego, uye khuye nyo pheye gu wuswa khu gufani. 21 Kha nga olu gufa gu dzudego khu kotani nya muthu moyo, guwuswa ga avo va fudego anugo gu dzude khu kotani nya muthu moyo. 22 Kha nga olu vatshavbo va fago khu kotani ya Adhamu, vatshavbo va na vbanya khu kotani ya Kristo. 23 Muthu ni muthu a na wuswa khu tepo yaye. Kristo khuye a nga pheya khuye a wuswa. Khavbovbo, tepo Kristo a na wuyago, gu na ta wuswa avo va mu lumbago. 24 Khu gu landreya, ma na vboha mahegiso. Hwane nya isoso, uye a na ningeya Mufumo ga Nungungulu waye, ni Papayi waye, hwane nya gu ba a fuviside mifumo yatshavbo ni dzitshivba dzatshavbo. 25 Uye a na fuma kha nga Pfhumu kala Nungungulu a vega valala vatshavbo vbavbatshi nya migondro yaye. 26 Khavbovbo, nala nya guhegise, gu gu gufa, a na fuviswa. 27 Milowo yari khiyo: “Nungungulu vegide satshavbo vbavbatshi nya migondro yaye.” Ganiolu, Nungungulu a gu khuye vegide silo satshavbo mandzani gwaye, kha si thuli gu khiso Nungungulu a gu uye a mu ningidego satshavbo anuye womo mandzani gwaye. 28 Ganiolu, hwane nya gu ba Nungungulu a vegide satshavbo mandzani gwaye, khavbovbo Gyanana nigyo gi na yeyedza gu khigyo gyomo vbavbatshi nya wufumu wa Nungungulu, a gu uye a vegidego satshavbo mandzani gwaye. Khavbovbo, Nungungulu a na khala silo satshavbo ga vatshavbo.

29 Ganiolu, ahati vale va hakhidego gubhabhatiswa gu yisago gufani? Abari gu avo va fudego kha va na nga wuswa, khu ginani avo va hakhidego bhabhatiso wowo? 30 Khu ginani hi emisanago ni dzimhango tepo yatshavbo? 31 Tshigu ni tshigu hi ngu emisana ni lufo. Vandruye, isoso lisine nga gutsaka nyi gupwago khu kotani nya wupari wanu ni Kristo Jesu, Pfhumu yathu. 32 Olu nyi dwanidego ni sirengo nya likhabi Efeso, nga vambe vathu va dwanidego naso, nyi wuyedwe khu ginani? Abari gu avo va fudego kha va na nga wuswa khu gufani “hongoleni hi hodza hi bwe hi seya kholu mindru hi nafa.” 33 Mu nga dzi sengi. Dzipari nyo vivbe dzi ngu vivbisa mavbanyelo nya yadi. 34 Gu vbwetega mu wuyisa mapimo yanu, mu gira silo nyo lulame. Mu nga giri gighoho. Vambe vbakari gwanu kha va muti Nungungulu. Nyo ganeya isoso gasi gu mi theya dzitshoni.

35 Ganiolu, mumbe a na wudzisa, khuye: “Avo va fudego va na wuga kharini? Givili muni va na gu ba vari nagyo?” 36 Isoso siwudziso nya mba pwala. Wa gu yala mbewu, iyo kha yi bugi nya mba pheya khu gufa. 37 Nigu tepo u yalago, khandri wa gu yala gilo gi bugidego, ganiolu wa gu yala mbewu; gani mbewu nya trigu mwendro mbewu nya gimbe gilo. 38 Nungungulu a gu ninga simbo ni simbo givili a gi vbwetago gu khuye wu manega nagyo. A gu ninga mbewu ni mbewu givili gyaye. 39 Nigu silo satshavbo si giridwego khu nyama aniso kha si fani; vathu, sirengo, sinyoni, dzindzandzi si giridwe khu nyama, ganiolu iso si ngu hambana. 40 Somo gambe sivili sa ndzadzini ni sivili sa mafuni. Wudhumo nya sivili sa ndzadzini wu ngu hambana ni wudhumo nya sivili sa mafuni. 41 Wudhumo nya lidambo wu ngu hambana ni wudhumo nya ngima ni wudhumo nya dzinyeledzi. Khu lisine, wudhumo nya nyeledzi ni nyeledzi wu ngu hambana ni wudhumo nya dzimbe dzinyeledzi.

42 Khiso sasimweso ni guwuswa khu ga vafudego. Egi gi yadwago gya gu hina, egi gi wuswago kha gi na nga hina. 43 Gyo yadwa nya mba na wuzundzo, gi wuswa na giri ni wuzundzo. Igyo gya gu yadwa na giri mwalo tshivba, gi wuswa na giri ni tshivba. 44 Gya gu yadwa givili nya nyama, gi wuswa givili nya liphuvbo. Abari gu gu na ni givili nya nyama, gu na ni givili nya liphuvbo gambe. 45 Kha nga Milowo, yi ganeyago gu khiyo: “Adhamu nyo pheye a di khala muthu a vbanyago.” Adhamu nya guhegise a di khala liphuvbo li ningago womi. 46 Ganiolu, khandri muthu nya givili nya liphuvbo a nga pheya khuye ata. Oyu a nga pheya khuye a ta muthu nya givili nya nyama, khavbovbo gu landreya muthu nya givili nya liphuvbo. 47 Muthu nyo pheye, dzude khu mafuni nigu giridwe khu kudzudzwane nya mafu. Oyu nya wuvili, dzude khu ndzadzini. 48 Ava va giridwego khu kudzudzwane nya mafu va gu fana ni muthu nyo pheye a giridwego khu kudzudzwane nya mafu. Nigu vale va gu va ndzadzini va gu fana ni oyu wa ndzadzini. 49 Kha nga olu hi giridwego khu kudzudzwane nya mafu, anethu hi na fana hi wule a tago khu ndzadzini.

50 Vandruye, nyi ngu mi embeyani, kheni: Givili gi giridwego khu nyama ni novba kha gi si kodzi gu beya Mufumoni wa Nungungulu. Nigu givili gi hinago, kha gi si kodzi gu hakha womi wu gu mba hina. 51 Olu nyi na mi embeya sihalo nya guage: Khandri hatshavbo hi na fago, ganiolu hatshavbo hi na vbindrugedzwa. 52 Isoso si na girega khu gitepwana, nga gukhwavbiya nya maho, tepo wu na wombago pundru nyo hegise. Pundru wu na wombwa, avo va fudego va wuswa gasi gu gima va sifi gambe, nigu ethu hi na vbindrugedzwa. 53 Givili gegi gi hinago gi na vbindrugedzwa khegi gi gu mba hina, nigu givili gegi gi fago gi na vbindrugedzwa khegi gima gi na gu mbafa. 54 Ganiolu, tepo egi gi hinago gi vbindrugedzwago gi si hini nigu egi gi fago gi vbindrugedzwago gi sifi gambe, khavbovbo gu na tadzisega esi Milowo yi ganedego, khiyo: “Gufa gu fuvisidwe* kala gupindruga.” 55 Uwe gufa, gomo hayi gu pala gwago? Uwe gufa, yomo hayi tshivba yago nya gu songe? 56 Gighoho khiyo tshivba nya gu songe, nigu gighoho gya gu mana tshivba khu kotani nya Nayo. 57 Ganiolu, ethu hi ngu bonga Nungungulu khu kotani nya olu a hi ningago gupala khu gu thumisa Pfhumu yathu Jesu Kristo.

58 Khu kharato, vandriyangu nya sigodwa, tiyani mu si tsekatseki. Tepo yatshavbo pharegani khu thumo wa Pfhumu. Dundrugani gu khenu thumo wanu nya gu dzi garadze Pfhumuni khandri wa mahala.

16 Olu maningano ni miningelo nya gu phasedzeye va nya guaga, landreyani sileletelo nyi ningidego mabandla ya Galatiya. 2 Khu litshigu nya gupheye nya semana ni semana, muthu ni muthu gu vbwetega a dusa gilo nyo khaguri a vega khu phuvbo, khu guya khu makodzelo yaye. Mwa gu gira isoso, kha si na nga lomba gu mu ta gira mihengo tepo nyi na vbohago. 3 Tepo nyi na vbohago, nyi na rumeya vama mu va hathidego omu nya malangaliya yanu gasi va rumeya miningelo yanu Jerusalema. 4 Ganiolu, sa gu lomba gu nyi hongola neni nyi na hongola navo.

5 Nyi na mi endreyani hwane nya gu ba nyi vbindride khu Makedhoniya, kholu nyi na vbindra khu Makedhoniya; 6 nigu sa gu kodzega nyi na ta khala nanu khu tepo nyo khaguri, adzina nangu yatshavbo nya girame, khavbovbo mu na nyi vbwegedzanyana omu nyi hongolago umo. 7 Kha nyi vbweti gu mi wona na nyi gu vbindra basi, ganiolu nyo vireya gu ta khala nanu, Jehovha a gu si dzumeleya. 8 Ganiolu nyi na simama Efeso kala yi pheya festa nya Pentekosta, 9 kholu nyi tulegedwe khu lithomo nya likhongolo nya gu engedzeye thumo wangu, ganiolu gu na ni vathu nya vangi va hi wugeyago.

10 Tepo Thimoti a na vbohago iyoyo, mu hakheni gwadi gasi a si garadzegi khu gilo tepo a na gu ba ari ni enu iyoyo. Uye a gu gira thumo wa Jehovha kha nga eni. 11 Mu nga digi ni moyo a mu kanyisa, mu vbwegedzeni khu gurula gasi a ta manana ni eni. Eni gumogo ni vambe vandruye hi mu virede.

12 Ganiolu, nyi lombide ndriyathu Apolo gu kheni ata iyoyo gwanu ni vambe vandruye. Uye a diri mwalo makungo nya gute iyoyo, ganiolu tepo si na gu kodzegago a nata.

13 Khalani na mu gengede, simamani na mu tiyide gukhodwani, tiyani hwambo mu bwe mu manega ni tshivba. 14 Girani satshavbo khu lihaladzo.

15 Vandruye, mu ngu dziti gukhenu vana Sitefane khavo va phedego khavo gukhodwa Akaya nigu avo va dzi ningedzide gasi gu thumeya va nya guaga. 16 Nyi ngu mi lomba gu kheni mu thumisana gwadi ni vathu nya nga vovo gumogo ni vatshavbo va thumago gumogo navo khu gudzigaradza. 17 Nyi ngu tsaka ngudzu olu Sitefane ni Fortunato ni Akayiko va gomogo eno ni eni, kholu avo va tshikedzide wulanga wanu. 18 Kholu avo va nyi tiyiside ngudzu nigu va mi tiyiside nenu, khu kharato yeyedzani gubonga gwanu khu vathu vovo.

19 Mabandla ya Aziya ma ngu mi losedzeyani. Akila ni Prisila gumogo ni libandla li tshanganago gaya gwawe va ngu mi losedzeya Pfhumuni. 20 Vatshavbo vandruye va gomogo eno va ngu mi losedzeya. Losanani khu lihaladzo.*

21 Eni Pawulo nyi ngu mi rumeleya malosedzeya nya gu lowe khu mandza yangu.

22 Oyu a si haladzigo Pfhumu a na vadwe. Delu Pfhumu yathu! 23 Nyi ngu mi suveyani wuwadi nya wukhongolo ngudzu wa Pfhumu yathu Jesu. 24 Nyi ngu mi rumeyani lihaladzo langu enu mwatshavbo mu pwananago ni Kristo Jesu.