LIDANGALIYA NYA WUVILI GA VAKORINTO

1 Eni Pawulo, mupostoli wa Kristo Jesu guya khu gugola ga Nungungulu ni ndriyathu Thimoti, nyi ngu loveya libandla la Nungungulu li gomogo Korinto gupata ni va nya guaga vatshavbo va gomogo Akaya, kheni:

2 Hi ngu mi suveyani wuwadi nya wukhongolo ngudzu ni gurula gu tago khiyo ga Nungungulu, Papayi ni ga Pfhumu Jesu Kristo.

3 A na dhumiswe Nungungulu, Papayi wa Pfhumu yathu Jesu Kristo, Papayi a tadego khu wuhindzi ni Nungungulu nya guthaveleye gwatshavbo, 4 oyu a hi thaveleyago silingoni sathu, gasi gu khu kotani nya guthaveleye hi ningwago khu Nungungulu hi si kodza nethu gu thaveleya vambe ni ga gevbini gilingo. 5 Kholu kha nga olu hi tshanisekago ngudzu khu kotani ya Kristo, hi na thaveledwa ngudzu gambe khu kotani ya Kristo. 6 Ha gu emisana ni silingo, ha gu emisana naso gasi mu mana guthaveledwa ni guvbulugiswa. Nigu ha gu ba hi thaveledwa, ha gu thaveledwa gasi gu enu mu thaveledwa, a gu ugo gu mi phasago gu timiseya sigaradzo sasimweso hi tshanganago naso. 7 Nigu gutumba gwathu maningano nanu gu tiyide kholu hi ngu dziti gu khethu kha nga olu mu hengelago ni ethu gutshanisekani mu na thaveledwa gambe.

8 Kholu vandriyathu, ho vbweta gu khethu muti gutshaniseka hi tshanganidego nago provhinsiya ya Asiya. Hi di tshaniswa ngudzu nyo vbindre ni tanga yathu, avba nyo bwe hi pimisa gu khethu hi nafa. 9 Khu lisine, hi di dzipwa nga khatshi hi di konedwe gufa. Isoso si giregide gasi hi si dzi tumbi ethu vamune, ganiolu hi tumba Nungungulu oyu a wusago vale va fudego. 10 Uye hi vbulugiside nigu a na hi vbulugisa avba nya mhango nya yikhongolo nya gufe, nigu hi ngu tumba gu khethu uye a na simama gu hi vbulugisa. 11 Hi phaseni khu gu mu hi gombeleya, khu kharato nya vangi va na bonga khu kotani yathu, khu kotani nya wuhindzi hi giredwego kha nga hlamulo nya milombelo nya vathu nya vangi.

12 Kholu hi ngu dzi khusedza khu kotani nya esi: hi na ni livhalo li agidego khu kotani nya olu hi vbanyidego khu ndziya nya guage nya mba pfhadzedzeya tigoni momu ngudzu-ngudzu vbakari gwanu. Ethu kha ha thumisa wugengeyi nya vathu, ganiolu hi di thangedwa khu wuwadi nya wukhongolo wa Nungungulu. 13 Kholu khu lisine, gimwalo hi mi lovedego mu na tandregago gu gi leri ni gu gi pwisisa, nigu nyi ngu tumba gu kheni mu na simama gu pwisisa gwadi silo sesi, 14 kha nga olu vambe gwanu va si pwisisidego gu khavo ethu hi gighelo nya gu enu mu dzi khusedza, nigu anethu hi na dzi khusedza khenu litshigoni la Pfhumu Jesu.

15 Khu kharato, khu kotani nya gutumbe gogu, nyi diri ni makungo nyo pheye khenu gu ta mi holeya gasi mu manega ni gighelo nya wuvili nya gutsake. 16 Nyi di gu vbweta gu vbindra nyi mi holeya na nyi gu hongola Makedhoniya, ni gu bwe nyi vbindra nyi wonana nanu na nyi gu wuya khu Makedhoniya gasi mu nyi vbwegedza khu pfhuka nyo khaguri na nyi gu hongola Judheya. 17 Ina tepo nyi nga ba nyi gira makungo yaya nyi di gu ganeya nyamuganeye? Mwendro ina nyo vbweta gu gira silo khu magirelo nya vathu, nyi ganeya kheni “ina, ina” nyi vbedza nyi ganeya kheni “ahihi, ahihi”? 18 Ganiolu, kha nga Nungungulu a tumbegidego malito yathu nayo ma tumbegide. Kha hi ganeyi khethu “ina” hi vbedza khethu “ahihi”. 19 Kholu Gyanana gya Nungungulu, Jesu Kristo, egi eni Silivhano ni Thimoti hi gi tivegisidego gwanu kha gi ganeyi khigyo “ina” gi vbedza khigyo “ahihi”, ganiolu “ina” gi wu ganeyago tepo yatshavbo wu na khala “ina”. 20 Kholu ambari nari singi kharini situmbiso esi Nungungulu a giridego, iso si na khala “ina” khu kotani yaye. Nigu ethu ho ganeya gambe khethu “Amen” ga Nungungulu khu kotani yaye, a gu iso si ningago wuzundzo Nungungulu khu kotani yathu. 21 Ganiolu, Nungungulu khuye a hi tiyisegisago gu khuye ethu ni enu ha gu lumba Kristo nigu khuye gambe a hi todzidego. 22 Uye vegide gifungo gyaye gwathu. Gifungo gyogyo liphuvbo nya guage li gomogo monyoni gwathu, a gu gitiyisegiso nya esi si na tago.

23 Nyi si guti Korinto khu kotani nya olu nyi mi pweyago, nigu nyi ngu vega Nungungulu kha nga fakazi nya isoso. 24 Khandri khatshi ha gu fumeya gukhodwa gwanu, ganiolu hi sithumi-kwanu gasi mu tsaka kholu gukhodwa gwanu gu tiyide.

2 Kholu nyi hungide gu kheni tepo nyi na mi endreyago gambe kha nyi na nga ta mi theya wusiwana.* 2 Nya gu mi theya wusiwana mwatshavbo, khu mani a na nyi tangadzisago narigu nyi mi thede wusiwana? 3 Nyi lovide esi nyi lovidego gasi nya gu vboha iyoyo, nyi si thedwi wusiwana khu kotani ya vale va nga ba va yede gu nyi tangadzisa kholu nyi ngu tiyisega gu kheni esi si nyi tangadzisago khiso si mi tangadzisago nenu. 4 Kholu nyi mi lovede na nyi gu garadzega ngudzu, na nyipwa wuvi monyoni, na nyi gu liya nasiri gasi gu mi theya wusiwana, ganiolu gasi muti lihaladzo nya likhongolo nyi gu nalo khenu.

5 A gu ba a romo oyu a mi thedego wusiwana, kha theya wusiwana eni, ganiolu thede wusiwana enu mwatshavbo. Kha nyi vbweti gu tshingisa ngudzu mahungu yaya. 6 Tsayiso mu ningidego muthu yoyo wu enede. 7 Ganiolu, olu gu vbwetega mu mu divaleya mu bwe mu mu thaveleya gasi a si khali wusiwana nyo bwe a vbeya tshivba. 8 Nyi ngu mi kutsa gu kheni mu mu yeyedza gu khenu mu nga gu mu haladza. 9 Khiso si nyi giridego nyi mi loveya, gasi gu wona gu kheni mu ngu engisa siloni satshavbo mwendro ne. 10 Mwa gu ba mu divaleya muthu nyo khaguri a mi hosedego, aneni nyi ngu mi divaleya. Khu lisine, esi nyi nga divaleya (abari gu nyi divalede gilogyo) nyi si giride gasi gu phasa enu mahoni ga Kristo, 11 gasi hi si padwi khu Sathane, kholu kha hi hangwi khu mano yaye.

12 Tepo nyi vbohidego Trowadhe gasi nyi ya va tshumayela mahungu nya yadi maningano ni Kristo, nyi di tulegedwa khu lidimba nyo engedzeye thumo wa Pfhumu, 13 ganiolu kha nya mana gurula monyoni kholu kha nya manana ni ndriyangu Tito. Khu kharato, nyi di tshadzisana ni vandriyathu va Trowadhe, nyi khuga nyi hongola Makedhoniya.

14 A na bongwe Nungungulu, oyu tepo yatshavbo a hi thangeyago gupalani na hiri gumogo ni Kristo, oyu gambe a hi thumisago gasi gu phalalegisa mahema nya gu nungeye nya guti gwaye malangani yatshavbo. 15 Kholu ga Nungungulu hi mahema nya gunungeye ya Kristo, vbakari ga vale va hongolago guvbulugiswatunu ni vale va hongolago gufuviswatunu. 16 Ga ava nya gu hegise, mahema nya lufo ma yisago gufani; ga ava nyo pheye, mahema nya womi ma yisago guvbanyani. Khu mani a ninganedwago khu silo sesi? 17 Ethu hi ngu ninganedwa kholu kha hiri varengisi nya mahungu ya Nungungulu, nga edzi nya vangi va gu idzo, ganiolu ethu ho ganeya lisine latshavbo kha nga vathu va ranidwego khu Nungungulu, ina mahoni ga Nungungulu na hi thuma gumogo ni Kristo.

3 Ina hi yede gu dzi tivegisa gambe gwanu? Ina hi yede gu mi rumeleya malangaliya ma ganeyago gwadi khethu nga vambe? Ina ethu ho vbweta gu khethu mu hi loveya malangaliya yoyo? Ahihi! 2 Enu mu lidangaliya lathu li lovidwego myonyoni gwathu, li tidwago li bwe li lerwi khu vathu vatshavbo. 3 Kholu si ngu wonega gu khiso enu mu lidangaliya la Kristo li lovidwego khethu kha nga sithumi, nasiri khu tinta ganiolu khu liphuvbo la Nungungulu a vbanyago. Ilo kha la lowa avba nya siwindri, ganiolu li lovidwe myonyoni gwathu.*

4 Ethu hi na ni gutumba gogo ga Nungungulu khu kotani ya Kristo. 5 Ethu khu habune kha hi ninganedwi gu gira gilo, ganiolu Nungungulu khuye a hi ningago makodzelo nyo gire ni wevbini thumo, 6 a gu uye a hi ningidego makodzelo nya gu hi khala sithumi nya pwanano nya wuphya, nasiri pwanano nya nayo nya gulowe, ganiolu nya liphuvbo; kholu nayo nya gu lowe wa gu yisa gufani, ganiolu liphuvbo la gu ninga womi.

7 Nayo wu yisago gufani, a gu nayo owu wu lovidwego avba nya siwindri wu dzude ni wudhumo nyo bwe sanana sa Israyeli si si kodzi gu khedza khovbe ya Mosi khu kotani nya wudhumo wu nga ba wu wonega khovbeni gwaye, a gu wudhumo wu nga hadzi fuviswa. 8 Abari gu nayo wu ningedwe ni wudhumo, ina liphuvbo kha li na nga ningedwa ni wudhumo nya wukhongolo ngudzu? 9 Nigu abari gu nayo wu yisago vathu gufani wu diri ni wudhumo, thumo wu phasago vathu gu khala vathu nyo lulame wu na ba wuri ni wudhumo nya wukhongolo ngudzu. 10 Khu lisine, khu kotani nya olu wu gomogo wudhumo wowu nya wukhongolo ngudzu ambari ni gile gale yoyo gi nga ba giri ni wudhumo gi luzide wudhumo wagyo. 11 Kholu abari gu gile gi nga hadzi fuviswa gi dhumisidwe, ahati gile gi na simamago ke? Igyo gi na dhumiswa ngudzu!

12 Kha nga olu hi gu na ni gutumba gogo, hi ngu ganeya na hi tiyide, 13 nigu kha hi giri esi Mosi a giridego, a nga ba a fenengedza khovbe yaye khu mwendra gasi sanana sa Israyeli si si woni wudhumo nya gile gi nga hadzi fuviswa. 14 Ganiolu, mihungo* yawe yi di bangide kholu kala muhuno mwendra wa wumowo wu ngo simama gu fenengedza tepo pwanano wa gale wu lerwigo, kha nga olu uwo si kodzegago basi gu wu dusa khu kotani ya Kristo. 15 Khu kharato, kala muhuno, tepo yatshavbo Mosi* a lerwigo, mwendra wa gu fenengedza myonyo yawe. 16 Ganiolu, tepo muthu nyo khaguri a bweleyago ga Jehovha, mwendra wa gu funungudwa. 17 Jehovha liphuvbo nigu ni hayini avba li gomogo liphuvbo la Jehovha avbovbo gomo gutshulega. 18 Hatshavbo ethu hi funungudego mwendra dzikhovbeni dzathu ha gu fana ni mabona ma yeyedzago wudhumo wa Jehovha, ethu ha gu vbindrugedzwa gasi hi fana ni Nungungulu hi bwe hi ya hi engedzeya gu yeyedza ngudzu wudhumo wa Nungungulu, kha nga edzi Jehovha, a gu liphuvbo,* a si girago khidzo.

4 Khu kharato, kha nga olu hi gu na ni thumo wowu khu kotani nya wuhindzi owu Nungungulu a hi giredego kha hi wu digi. 2 Wulangani nya isoso, ethu hi digide silo nya dzitshoni si girwago gusihalani nigu kha hi kanganyisi, ne kha hi vbindrugedzi lito la Nungungulu; ganiolu ha gu tivegisa lisine khu gu hi khala giyeyedzo nya gyadi ga livhalo la moyo ni moyo mahoni ga Nungungulu. 3 Abari gu khu lisine mahungu nya yadi hi tshumayelago ma fenengedzidwe, ma fenengedzidwe ga vale va gomogo ndziyani nya gufuviswe, 4 a gu vale nya mba khodwa, ava mapimo yawe ma segidwego khu nungungulu nya litigo leli gasi va si woni guwonegeya nya wudhumo nya mahungu nya yadi ma ganeyago khu Kristo a gu gifananiso gya Nungungulu. 5 Kholu khandri ha gu tshumayela maningano ni ethu, ganiolu ha gu tshumayela gu khethu Jesu Kristo Pfhumu, nigu maningano ni ethu ha gu huweleya gu khethu hi sithumi sanu khu kotani ya Jesu. 6 Kholu khu Nungungulu a nga khuye: “Khu mugidemani gu na manege guwonegeya,” nigu ugo gu ngu wenengedza myonyo yathu gasi gu yi wenengedza khu wudhumo nya guti ga Nungungulu gu wonegago khovbeni ya Kristo.

7 Ganiolu, ethu hi hakhide thomba yeyi khomu nya sombo nya libumba gasi si wonega guagani gu tshivba nya yikhongolo hi gu nayo ya guta khiyo ga Nungungulu nasiri khiyo gwathu. 8 Ethu hi ngu gamwa khu tshivba ni tshivba khu dzindziya dzatshavbo, ganiolu kha hi gamwi nyo bwe hi tandrega gu dzi khutha; hi ngu garadzega, ganiolu kha hi garadzegi nyo bwe hi hamuga lipindru; 9 hi ngu tshaniswa, ganiolu kha hi tsukudwi; hi ngu theswa, ganiolu kha hi fuviswi. 10 Ni hayini hi hongolago, hi ngu emisana ni gufa nga Jesu, gasi hi manega ni womi nya nga owu wa Jesu.* 11 Kholu ethu hi vbanyago hi ngu emisana ni gufa khu kotani ya Jesu gasi gu womi wa Jesu anuwo wu wonegiswa givilini gyathu gi fago. 12 Khu kharato, gufa go thuma gwathu, ganiolu ga enu go thuma guvbanya.

13 Kha nga olu hi gu na ni gukhodwa gu lovidwego maningano ni ugo gu pwani: “Nyi yeyedzide gukhodwa, khu kharato nyi ganede”; anethu ha gu yeyedza gukhodwa, khu kharato hi ngu ganeya, 14 hi ngu dziti gu khethu Wule a wusidego Jesu a na hi wusa nethu gu fana ni Jesu a bwe a hi yisa mbeli gwaye. 15 Satshavbo silo sesi so dugeleya khu kotani yanu gasi vathu nya vangi va kodza gu hakha wuwadi nya wukhongolo ngudzu wa Nungungulu. Nigu khu kotani nya isoso, vathu nya vangi va na bonga Nungungulu nigu isoso si na reseya wudhumo Nungungulu.

16 Khu kharato, ethu kha hi tsukuli. Ambari muthu wathu wa vbavbandze a gu hagala, khu lisine muthu wathu wa ndrani a gu wusedzwa tshigu ni tshigu. 17 Ambari olu gutshaniseka hi tshanganago nago gu gu ga gitepwana ni olu gu vbevbugidego, ugo gu ngu hi reseya wudhumo nya wukhongolo ngudzu, wudhumo wu na pindrugago. 18 Khu kharato, kha hi vegi gupima ga silo si wonegago, ganiolu ha gu vega gupima ga esi si gu mba wonega. Kholu silo si wonegago khya gitepwana, ganiolu esi si si wonegigo khya kala gupindruga.

5 Kholu hi ngu dziti gu khethu abari gu nyumba yathu ya mafuni, a gu litendra leli, gu vbwetega yi tshungunudwa, Nungungulu a na hi ninga nyumba nya gupindruge ndzadzini, nyumba yi nga mba girwa khu mandza nya vathu. 2 Kholu khu lisine, hi ngu keta omu nya nyumba yeyi, ho vbweta ngudzu gu ambala eyi yi hi lumbago, eyi ya ndzadzini, 3 gasi gu tepo hi na yi ambalago hi siti hi ta manwa na hiri wumbwiri. 4 Khu lisine, ethu hi gu romo omu nya litendra leli hi ngu keta khu gu tshaniseka kholu kha hi dzini gu li tshula ganiolu hi ngu dzina gu ambala eli limbe gasi gu egi gi fago gi tshikedzwa khu womi. 5 Oyu a hi dongisedego silo sesi khu Nungungulu, a gu uye a hi ningidego liphuvbo kha nga gitiyisegiso nya esi si tago.

6 Khu kharato, hi ngu tumba nigu hi ngu dziti gu khethu na hi nga gu vbanya givilini momu, hi womo hwindzo ni Pfhumu, 7 kholu ethu ha gu gimbiya khu gukhodwa nasiri khu gu wona. 8 Ganiolu, ethu hi tade khu gutumba, nigu gwathu tshukwana gu khala hwindzo ni givili ganiolu hi vbanya ni Pfhumu. 9 Gani hi ngu vbanya ni Pfhumu, gani hi womo hwindzo naye, makungo yathu gu mu tsakisa. 10 Kholu hatshavbo hi na ema mbeli nya tribhunali ya Kristo gasi gu moyo ni moyo wathu a hakha tshatshazelo guya khu silo a si giridego tepo a nga ba a romo omu nya givili, gani silo nya sadi gani silo nya guvivbe.

11 Kha nga olu hi dzitigo gukhethu sa gu thula ginani gu thava Pfhumu, ha gu simama gu kutsa vathu gu khodwa esi hi si ganeyago, ganiolu ethu hi ngu tidwa gwadi khu Nungungulu. Ambari ulolo, nyo vireya gu kheni hi tidwa gwadi khu livhalo lanu. 12 Khandri ha gu vbweta gu dzi zundza gambe gwanu, ganiolu ha gu mi kutsa gasi mu kodza gu dzi khusedza khethu, mu kodza gu hlamula vale va dzi khusedzago khu kotani nya edzi va khadego khidzo khu vbavbandze nasiri khedzi va gomogo khidzo khu monyoni. 13 Ha gu ba hi handrugide hi handrugide khu kotani ya Nungungulu, ha gu ba hiri ni mapimo hi na ni mapimo khu kotani yanu. 14 Lihaladzo la Kristo li ngu hi kutsa, kholu hi vbohede mahegiso yaya: muthu moyo basi a fede vatshavbo, khu lisine vatshavbo va di gu fude. 15 Uye fede vatshavbo gasi ava va vbanyago va si simami gu dzi vbanyeya vabune, ganiolu va vbanyeya wule a va fedego a bwe a wuswa.

16 Khu kharato, gukhugeya olu kha hiti muthu khu mawonelo nya nyama. Ambari abari gu hi di guti Kristo khu nyama, khu lisine kha hi ngo muti khu ndziya yoyo. 17 Khu kharato, abari gu muthu nyo khaguri a ngu pwanana ni Kristo, givangwa nya giphya, silo sa gale si vbindride; olu gu na ni silo nya siphya. 18 Ganiolu silo sesi satshavbo sa guta khiyo ga Nungungulu, a nga wusedza wupari wathu naye khu gu thumisa Kristo, 19 a bwe a hi ninga thumo nya gu phase vambe navo gu wusedza wupari waye navo. So thula gu khiso Nungungulu khu gu thumisa Kristo a di wusedza wupari waye ni litigo nya mba theya kota khu sighoho sawe nigu uye a hi ningide thumo nya gu huweleye mahungu yoyo ma ganeyago khu gurula.

20 Ethu hi vaemeyi va tshikedzago Kristo. Kha nga olu hi gu vatshikedzi va Kristo, ha gu kutsa vathu, khethu: “Wusedzani wupari wanu ni Nungungulu.” 21 Kristo gima a si gu ghohi, ganiolu Nungungulu a hi ningide uye kha nga muphaso nya sighoho sathu, gasi gu khu kotani yaye hi wonwa na hi lulamide mahoni ga Nungungulu.

6 Na mu gu thuma gumogo naye, hi ngu mi kutsani gu khethu mu si hakhi wuwadi nya wukhongolo ngudzu wa Nungungulu mu vbedza mu hagana khuwo. 2 Kholu uye wari khuye: “Na yi vbohide tepo yangu nya gu nyi gu kategisa, nyi gu engisede; nigu ga litshigu nya guvbulugise, nyi gu phaside.” Eyi khiyo tepo nya gu Nungungulu a hi kategisa. Nigu eyi khiyo tepo nya gu Nungungulu a hi vbulugisa.

3 Ethu kha hi tshunganisi muthu gasi thumo wathu wu si manegi ni gisolo, 4 ganiolu ga satshavbo ha gu dzi yeyedza kha nga sithumi sa Nungungulu. Ethu ha gu timiseya silingo nyo hambane-hambane, dzitshanisa, dzitepo nyo garadze ni sigaradzo. 5 Hi vetidwe, hi khothedwa, hi tshaniswa, hi thuma khu tshivba ni tshivba, dzimbe dzitepo hi tandrega ni gu lala ni wutshigu nigu dzimbe dzitepo hi si hodzi. 6 Ethu ha gu vbanya womi nya guage, mavbanyelo yathu ma gu gimbileyana ni guti, hi ngu laphisa monyo, hi ngu gira wuwadi, hi ngu dzumeleya liphuvbo nya guage li thangeya womi wathu nigu lihaladzo lathu khandri la gu pfhadzedzeya; 7 ha gu ganeya lisine, ha gu tumba tshivba ya Nungungulu, ha gu phara matshari nya gululame libogoni gwathu la nyamudye ni libogoni gwathu la nyambade, 8 ha gu dhumiswa hi bwe hi poyidwa, hi sodwa hi bwe hi zundzwa. Vathu va gu hi wona kha nga vakanganyisi, ganiolu ethu ha gu ganeya lisine. 9 Ha gu wonwa nga vathu nya mba tidwa, ganiolu Nungungulu a ngu hiti; ha gu wonwa nga vathu va gomogo vbafuvbi ni gufa, ganiolu ethu hi ngu vbanya; ha gu wonwa nga vathu va tsayiswago, ganiolu kha hi songwi. 10 Vathu va gu pimisa gu khavo kha ha tsaka, ganiolu tepo yatshavbo hi tsakide. Avo va gu pimisa gu khavo hi sisiwana, ganiolu hi ngu ninga silo nya singi nya sadi ga vathu nya vangi. Vo pimisa gambe gu khavo hi mwalo gilo, ganiolu ethu hi na ni satshavbo.

11 Hi mi embede satshavbo enu Vakorinto, nigu hi mi tulede myonyo yathu. 12 Kha ha mi bombeya lihaladzo lathu, ganiolu enu mo hi bombeya lihaladzo lanu. 13 Khu kharato, nyo ganeya nanu nga khatshi nyo ganeya ni sanana sangu, hi phareni kha nga edzi hi mi pharago khidzo, hi tuleyeni myonyo yanu.

14 Mu nga dzi hungeleyi kanga wawumowo ni vale va sirigo makhodwa. Kholu wuhengeyi muni wu gu na ni gululama ni gumbalulama? Mwendro gupwanana muni gu gumogo avba nya guwonegeya ni gidema? 15 Wuhengeli muni wu gomogo avba ga Kristo ni Bheliyali?* Mwendro gu pwanana muni gu gomogo avba ga oyu a khodwago ni wule a si khodwigo? 16 Mwendro gupwanana muni gu gomogo avba nya tempele ya Nungungulu ni sifananiso? Kholu ethu hi tempele ya Nungungulu a vbanyago kha nga Nungungulu a ganedego, khuye: “Nyi na vbanya vbakari gwawe nyi bwe nyi gimbiya navo, nigu nyi na khala Nungungulu wawe, nigu avo va na khala vathu vangu.” 17 “‘Khu kharato, dugani khu vbakari gwawe, dzi hambaniseni navo,’ a ngu ganeya Jehovha, ‘nigu digani gu phara silo nya mba handzega’”; “‘eni nyi na mi hakhani.’” 18 “‘Nigu gwanu, eni nyi na khala papayi, nigu enu mu na khala sanana sangu nya sikhwathana niso nya sagadzyana,’ a ngu ganeya Jehovha, oyu nya Tshivba Yatshavbo.”

7 Khu kharato vandruye, kha nga olu hi gu na ni situmbiso sesi, hongoleni hi dzi agisa ga satshavbo si nyenyezisago givili ni liphuvbo. Hi dzi agisa khu gu vbeleya, hi thava Nungungulu.

2 Hi hakheni myonyoni gwanu. Kha ha ghoheya muthu, kha ha bayisa muthu nigu kha ha kalaveya muthu. 3 Khandri nyo ganeya isoso gasi gu mi ninga nandru, kholu nyi mi embede gu kheni mu womo myonyoni gwathu gasi hi vbanya ni gufa gumogo. 4 Nya gu ganeya nanu na nyi tiyide. Nyi ngu dzi zundza ngudzu khu enu. Nyi thaveledwe ngudzu nyi bwe nyi tsaka ngudzu silingoni sathu satshavbo.

5 Khu lisine, tepo hi nga vboha Makedhoniya, kha ha hefemula, ganiolu hi di simama gu tshaniseka khu dzindziya nyo hambane-hambane; vathu va di gu hi wugeya, ni gu hi di gu garadzega khu kotani nya mabandla. 6 Ganiolu, Nungungulu, a thaveleyago ava va vbedego tshivba, hi thavelede khu guvboha ga Tito. 7 Ganiolu, khandri khu gu vboha gwaye basi, ganiolu khu gu thaveledwa ogu a gu manidego khu kotani yanu. Uye a hi embede gu khuye mu ngu suva gu nyi wona. A hi bhulede gambe khu gugaradzega gwanu nya gukhongolo ni gu nyi tshanisekeya gwanu. Isoso si nyi engedzede gu tsaka.

8 Gupheyani nyi di gu garadzega khu gu ba nyi mi zangariside avba nya lidangaliya langu. Nyi ngu wona gu kheni ilo li mi zangariside khu gitepwana. 9 Olu nyi ngu tsaka, ganiolu khandri nyo tsaka khu gu ba mu zangaride, ganiolu khu gu ba gu garadzega gwanu gu mi giride mu dzi laya, kholu mu garadzegide guya khu gugola ga Nungungulu. Khu kharato, kha mwa dzimeledwa khu gilo khu kotani yathu. 10 Kholu, gu garadzega guya khu gugola ga Nungungulu, ga gu velega gudzilaya gu yisago guvbulugiswani, ogu ne ni moyo a na solago khugo. Ganiolu, gu garadzega nya litigo ga gu velega gufa. 11 Wonani mihandro yi velegidwego khu kotani nya olu mu nga garadzega guya khu gugola ga Nungungulu: Mu dzi agiside, mu garadzega khu silo nya guvivbe mu nga gira, mu ninga githawo nya gikhongolo Nungungulu, mu dogoreya silo nya sadi, mu thumeya Nungungulu khu monyo watshavbo mu bwe mu lulamisa sighoho sanu. Mu yeyedzide khu dzindziya dzatshavbo gu khenu mu agide* avba nya silo sesi. 12 Ambari olu nyi nga mi loveya lidangaliya, khandri nyi di mi loveya khu kotani ya oyu a giridego gighoho mwendro oyu a ghohedwego. Ganiolu, nyi mi lovede gasi mu yeyedza mbeli ga Nungungulu gu khenu mu ngu engisa. 13 Isoso khiso si nga hi thaveleya.

Ganiolu, khu kotani nya guthaveledwe hi gu hakhidego, hi engedzede gu tsaka khu kotani nya gutsake ga Tito, kholu enu mwatshavbo mu mu tiyiside. 14 Kholu kha nya khala dzitshoni khu gu ba nyi ganede naye khu kotani yanu na nyi gu dzi khusedza. Satshavbo nyi mi embedego ni esi nyi dzi khusedzidego khiso ga Tito, lisine. 15 Ni gu gambe, a gu dundruga guengisa gwanu mwatshavbo, ni edzi mu mu hakhidego khidzo khu githawo nya gikhongolo, so gira gu a mi gola ngudzu. 16 Nyi ngu tsaka olu nyi mi tumbago siloni satshavbo.

8 Vandriyathu, olu ho vbweta gu khethu muti wuwadi nya wukhongolo ngudzu wa Nungungulu wu yeyedzidwego mabandla ya Makedhoniya. 2 Ambari olu va nga ba va tshangana ni gilingo nya gikhongolo, avo va ningede esi va nga ba vari naso na va tsakide ambari olu va nga ba vari sisiwana ngudzu. 3 Avo va ningede satshavbo va nga ba va si kodza ni guvbindra. Eni nyi fakazi nya isoso. 4 Khu gu dzina avo va hi lombide gungani-gungani gasi hi va dzumeleya gu seketeya thumo nyo phase va nyo aga. 5 Nigu avo va giride guvbindra esi hi nga ba hi si vireya kha nga olu va dzi ningedego gu pheya ga Pfhumu ni ga ethu khu guya khu gugola ga Nungungulu. 6 Khu kharato, hi lombide Tito gasi a vbedzisa thumo wowu vbakari gwanu kha nga olu a gu uye a wu phedego. 7 Khu kharato, kha nga olu enu mu ghanyidego ga satshavbo: gukhodwani, omu nya malito, avba nya guti, gudzigaradzani gwatshavbo ni omu nya lihaladzo hi gu nalo khenu, dwaneyani gambe gu manega ni wuhindzi.

8 Khandri khatshi nyo ganeya isoso gasi gu mi gurumedza, ganiolu nyo ganeya isoso gasi gu mi embeya khu gudzigaradza gu giridwego khu vambe ni gu linga lihaladzo lanu. 9 Kholu enu mu ngu wuti wuwadi nya wukhongolo ngudzu wa Pfhumu yathu Jesu Kristo. Ambari olu a nga ba a ghanyide, a di khala gisiwana khu kotani yanu gasi enu mu ghanya khu kotani nya wusiwana waye.

10 Khu kharato, nyi ngu mi ninga mawonelo yangu: Mwa gu gira thumo wowu si na phasa enu, kholu gu ngu vbindra mwaga na mu phede thumo wowu, nigu mu yeyedzide gudogoreya nya gu wu gire. 11 Khu kharato, vbedzisani esi mu si phedego gasi esi mu ningeyago guya khu makodzelo yanu si yeyedza gu khiso mu dzi emisede gu ninga. 12 Giningwa egi muthu a gi ningeyago na si khugeya monyoni khigyo gi hakhegago ngudzu ga Nungungulu, kholu Nungungulu o vireya gu khuye muthu a ningeya esi a si kodzago nasiri esi a si si kodzigo. 13 Kholu kha nyi vbweti gu vbevbugiseya vambe ganiolu enu nyi mi lemedziseya giemo. 14 Olu enu mu gu na ni silo nya singi mu nga si kodza gu phasedzeya vambe. Va gu tshuka navo va manega ni silo nya singi va na mi phasa gasi gu manega gufana. 15 Kha nga si lovidwego omu nya Milowo gu pwani: “Oyu a nga ba ari ni silo nya singi kha mana silo nya singi ngudzu, nigu oyu a nga ba ari ni silo nya sidugwana kha mana silo nya sidugwana ngudzu.”

16 A na bongwe Nungungulu kholu a thedego monyoni ga Tito gugaradzega ga gumogo hi gu nago khenu. 17 Uye dzumede gilombo gyathu nigu a ngu dogoreya ngudzu gu mi endreya. Uye a na mi endreya khu gu dzina gwaye. 18 Hi ngu mi rumeleya gumogo ni Tito mumbe ndriyathu a zundzwago mabandlani yatshavbo khu gu tshumayela mahungu nya yadi. 19 Nasiri isoso basi, uye hathidwe gambe khu mabandla gasi a gimbiya ni ethu, gasi a gimbiya a hi phasa gu sayisa siningwa sesi, a gu siningwa si reseyago wuzundzo Pfhumu si bwe si yeyedza gu dzi emiseya gwathu nyo phasedzeye vambe. 20 Khu kharato, ho gira isoso gasi hi si sodwi khu muthu khu miningelo yeyi hi yi sayisago. 21 Kholu ha gu ‘khathaleya satshavbo khu gu tumbega nasiri mahoni ga Jehovha basi, ganiolu ni mahoni nya vathu.’

22 Nigu hi ngu mi rumeleya gambe gumogo navo mumbe ndriyathu, oyu gudzigaradza gwaye gu wonegidego dzitepo nya dzingi ni omu nya silo nya singi. Ganiolu, olu gudzigaradza gwaye khenu gu engedzede khu kotani nya olu a mi tumbago ngudzu. 23 A gu tshuka muthu nyo khaguri a wudzisa gilogyo maningano ni Tito, mu embeyeni gu khenu uye a gu thuma gumogo ni eni gasi gu phasedzeya enu; nigu a gu tshuka muthu nyo khaguri a wudzisa gilogyo maningano ni vandriyathu vava, mu embeyeni gu khenu avo va di rumedwa khu mabandla* nigu avo va ngu dhumisa Kristo. 24 Khu kharato, va yeyedzeni lihaladzo lanu mu bwe mu yeyedza gambe mabandla gighelo gi hi girago hi dzi khusedza khenu.

9 Maningano ni thumo wu phasago va nya guaga kha si lombi gu kala nyi mi loveya, 2 kholu nyi ngu dziti gu kheni enu mu dzi emisede gu phasa vambe; nyi ngu dzi khusedza khenu ga Makristo ya Makedhoniya. Nyi va embede gu kheni enu vandriyathu va Akaya mu dzi emisede gu phasa ndrani nya mwaga rumba. Khu kotani nya gu dzi ningedze gwanu, nya vangi va ngu dzi ningedza navo. 3 Ganiolu, nyi ngu rumeya vandruye gasi gudzikhusedza gwathu khenu gu si khali ga mahala, ni gu bwe mu khala na mu dongide khu lisine kha nga nyi ganedego kheni mu na ba mu dongide. 4 Kholu nya guta ni vandriyathu va Makedhoniya hi ta mi mana na mu si gu dongi, hi na khala dzitshoni khu kotani nya esi hi nga ganeya nyo khethu hi ngu mi tumba. 5 Khu kharato, nyi si wone na siri sa lisima gu kutsa vandruye gasi va mi endreya gupheya va bwe va dongiseya giningwa gyanu mu gi tumbisidego, gasi gya gu ba gi vbelede gi wonega nga gilo mu nga gi ningeya khu monyo watshavbo nasiri khu gu gurumedzwa.

6 Ganiolu, oyu a yalago vbadugwana a na vbwera vbadugwana, oyu a yalago nya singi a na vbwera nya singi. 7 Moyo ni moyo a na ningeye na si khugeya monyoni, na si nguranguri mwendro na gu gurumedzwa, kholu Nungungulu a gu gola muthu a ningeyago khu gutsaka.

8 Nigu Nungungulu a ngu si kodza gu mi ninga nya singi khu kotani nya wuwadi waye nya wukhongolo ngudzu gasi tepo yatshavbo mu si hamugi gilo mu bwe tepo yatshavbo mu eneledwa mu kodza gu gira mithumo yatshavbo nya yadi. 9 (Kha nga si lovidwego gu pwani: “Uye a gu kabaniseya nya mba feleya; a ninga sisiwana. Gululama gwaye gu ngu simama kala gupindruga.” 10 Wule a ningago dzimbewu nya dzingi muyali ni gilo nyo hodze, a na mu ninga a bwe a engedzeya dzimbewu gasi gu yala a bwe a engedzeya guvbwera nya gululame gwanu.) 11 Nungungulu a ngu mi kategisa ngudzu gasi mu kodza gu gireya wuhindzi vambe khu dzindziya dzatshavbo. Isoso so gira gu Nungungulu a bongwa khu kotani yathu. 12 Gu phasa vambe khu ndziya yeyi khandri so gireya basi gu phasa vakhodwa-khwathu ga esi si va keneleyago, ganiolu so gireya gambe gu vathu va bonga Nungungulu khu kotani nya giphaso gegi. 13 Khu gu ningeya giphaso gegi, enu mwa gu yeyedza edzi mu khadego khidzo nigu avo va na zundza Nungungulu khu kotani nya olu mu vbanyago guya khu mahungu nya yadi aya mu tshumayelago maningano ni Kristo ni olu mu gireyago wuhindzi avo ni vambe vathu. 14 Nigu avo va gu mi gombeleya ga Nungungulu va bwe va mi haladza khu kotani nya wuwadi nya wukhongolo ngudzu owu Nungungulu a mi gireyago.

15 A na bongwe Nungungulu khu kotani nya giningwa gyaye hi si kodzigo ni gu gi tshamuseya.

10 Eni Pawulo, nyi ngu mi lomba khu gurula ni wuwadi wa Kristo, ambari olu vambe vbakari gwanu va gu khavo nyi mwalo tshivba nya gu ba nyiri ni enu, ganiolu nya gu ba nyiri hwindzo vari khavo nyi na ni tshivba. 2 Nyo lombeleya gu kheni tepo nyi na mi endreyago, nyi siti nyi ta gurumedzega gu kawuka ava va pimisago gu khavo ha gu thangedwa khu mawonelo nya vathu. 3 Kholu ambari olu hi gu vathu, kha hi dwani nyimbi guya khu mawonelo nya vathu.* 4 Kholu matshari hi dwanago khayo khandri ya nyama, ganiolu matshari ma ningwago tshivba khu Nungungulu gasi gu khungumula mabhiyo nya gutiye.* 5 Kholu ha gu khungumula mapimo ni satshavbo si segeyago vathu guti Nungungulu. Nigu ha gu gira sibotshwa mapimo yatshavbo gasi ma engisa Kristo.* 6 Tepo guengisa gwanu gu na vbeleyago hi na ba hi dongide gu tsayisa gwatshavbo gu mba engisa.

7 Enu mwa gu lamula silo guya khu khovbe. A gu ba a romo muthu a tiyisegago gu khuye ha gu lumba Kristo a na si yeyedze gambe avba nya esi: Kha nga olu uye a lumbago Kristo, anethu hi ngu lumba Kristo. 8 Ambari nya gu dzi khusedzanyana khu kotani nya wufumu owu Pfhumu a nyi ningidego gasi gu mi vbaha nasiri gu mi tshungunula na nyi si gupwi dzitshoni. 9 Ganiolu, kha nyi vbweti gu kheni mu pimisa gu khenu nyo zama gu mi thusedzeya khu malangaliya yangu. 10 Kholu avo vari khavo: “Malangaliya yaye ma na ni tshivba, ganiolu ha gu ba hiri naye eno mwalo tshivba nigu malito yaye kha ma phasi gilo.” 11 Vathu vovo va na dziti gu khavo esi hi ganeyago omu nya malangaliya na hiri mwalo iyoyo nanu khiso hi nga hadzi gira nari khatshi hi diri iyoyo nanu. 12 Kholu kha hi na nga tshuka hi dzi dinganisa mwendro gu dzi fananisa ni vale va dzi embeyago. Avo va gu dzi lamula khu guya khesi va si wonago na siri sadi, khu ndziya yoyo va yeyedza gu khavo va mwalo gupwisisa.

13 Ganiolu, ethu kha hi dzi khusedzi khu thumo hi nga mba ningwa gu gira, ganiolu ha gu dzi khusedza khu thumo owu wu tago khiyo ga Nungungulu, owu wu patago gu tshumayela. 14 Ethu kha ha gira esi Nungungulu a nga mba hi ruma gu gira tepo hi mi endredego, ganiolu hi khade va nya gu pheya hi nga mi tshumayela mahungu nya yadi maningano ni Kristo. 15 Ethu kha hi dzi khusedzi khu thumo hi nga mba ningwa mwendro khu thumo wa vambe, ganiolu ha gu vireya gu khethu tepo gukhodwa gwanu gu yago gu dandra thumo hi giridego anuwo wu dandra vbakari gwanu. Khu kharato, hi na si kodza gu gira nya singi, 16 gasi hi ya tshumayela mahungu nya yadi ga mayigo aya ma gomogo hwindzo nanu gasi hi si dzi khusedzi khu wulanga wu thumidwego khu vambe. 17 Ganiolu, uye a dzi khusedzago a na dzi khusedze ga* Jehovha. 18 Kholu oyu a hakhwago khandri wule a dzi embeyago, ganiolu khu wule Jehovha a mu zundzago.

11 Ambari olu nyi girago khatshi nyi gipumbu, nyo lomba gu kheni mu nyi timiseyani vbadugwana. Khu lisine, nyi ngu wona gu kheni enu mu ngu nyi timiseyani! 2 Eni nyi na ni wufu khu kotani yanu, wufu nya nga owu wa Nungungulu kholu nyi mi tumbiside mutshadho ga mwama moyo basi, gasi nyi mi ningeya ga Kristo kha nga nyamayi a agidego.* 3 Ganiolu, gu fana ni olu nyoga yi nga thumisa wugengeyi wayo yi senga Evha, nyi ngu thava gu kheni muthu nyo khaguri a kanganyisa mapimo yanu, mu khala vathu nya mba handzega ni gu mba tumbega ga Kristo. 4 Kholu khu lisine, a gu tshuka muthu nyo khaguri a ta, a ta hevbudza khu mumbe Jesu a hambanago ni oyu hi mu huweleyago, mwendro mwa gu hakha liphuvbo li hambanago ni eli va nga hakha, mwendro mahungu nya yadi ma hambanago ni aya va nga ma dzumeya, mu ngu si timiseya khu guvbevbuga. 5 Kholu kha nyi dzi woni na nyi gu vbindrwa khu vapostoli vovo vanu mu va wonago na vari vakhongolo. 6 Ambari nya gu ba nyi si kodzi gu ganeya gwadi, khu lisine nyi na ni guti. Hi ngu si yeyedza isoso guagani gwanu khu dzindziya dzatshavbo, ga satshavbo.

7 Mwendro ina nyi di ghoha khu gu ba nyi dzi nogiside, gasi mu feya gu khusedzwa? Mwendro khu gu ba nyi mi tshumayede mahungu nya yadi ya Nungungulu khu gu dzina nya mba mi livbisa gilo? 8 Nyi hakhide giphaso gya mambe mabandla gi girago nga khatshi nyi di ma beya gasi gu ta mi phasa. 9 Ganiolu, tepo nyi nga hamuga gilo, tepo nyi nga ba nyiri nanu, kha nya lemedziseya giemo muthu kholu vandriyathu va dzudego khu Makedhoniya va nyi ningide esi si nga ba si nyi keneleya. Ina, nyi dzi garadzede gu mba lemedziseya giemo ne ni moyo wanu, nigu nyi na simama gu gira isoso. 10 Kha nga olu nyi gu mulandreyi wa Kristo, gimwalo gi na nyi himbedzeyago gu dzi khusedza khu isoso Akaya gwatshavbo. 11 Khu ginani? Ina kha nyi mi haladzi? Nungungulu a ngu dziti gu khuye nyi ngu mi haladza.

12 Eni nyi na simama gu gira esi nyi girago gasi gu vale va vbwetedzeyago sighelo nyo yeyedze gu khavo va ngu fana ni ethu ni gu dzi khusedza khesi va girago va hamuga gighelo nyo gire isoso. 13 Kholu vathu vovo vapostoli nya malipha, vakanganyisi va dzi girago vapostoli va Kristo. 14 Nigu kha si hlamadzisi kholu ambari Sathane anuye a gu dzi gira ngilozi nya gu wonegeye. 15 Khu kharato, kha si hi hlamadzisi gu ba sithumi saye aniso si dzi gira sithumi nya gululame. Ganiolu khu gu hegisa avo va na hakha maningano ni mithumo yawe.

16 Nyi ngu mi embeya gambe gu kheni: Ne ni moyo wanu a nga ganeyi gu khuye nyi gipumbu. Ganiolu, mwa gu ba mu pimisa isoso, nyi hakheni kha nga gipumbu gasi nyi feya gu dzi khusedza neni vbadugwana. 17 Esi nyi ganeyago olu, kha nyi ganeyi na nyi gu landreya giyeyedzo gya Pfhumu, ganiolu nya gu si ganeya kha nga gipumbu na nyi gu dzi tumba nga muthu a dzi khusedzago. 18 Kha nga olu vathu nya vangi va dzi khusedzago khu silo nya nyama, aneni nyi na dzi khusedza. 19 Enu mu “tigo ngudzu,” timiseyani sipumbu. 20 Khu lisine, enu mu ngu timiseya ni wevbini a mi girago dzigumbi, ni wevbini a phangago dzithomba dzanu, ni wevbini a mi dzegeyago esi mu gu naso, ni wevbini a dzi khusedzago vbakari gwanu, ni wevbini a mi vetago khovbeni.

21 Dzitshoni gwathu gu ganeya isoso, kholu so gira nga khatshi ethu hi mwalo tshivba.

Ganiolu, abari gu vambe va ngu gira silo khu gu dzi khusedza, nyi ngu ganeya nga gipumbu gu kheni, aneni nyi ngu dzi khusedza. 22 Ina avo Vahebheru? Aneni nyi Muhebheru. Ina avo Vaisrayeli? Aneni nyi Muisrayeli. Ina avo situgulwana sa Abrahama? Aneni nyi gitugulwana gya Abrahama. 23 Ina avo sithumi sa Kristo? Nyi ngu ganeya nga gipumbu gu kheni eni kheni wakone nya khongolo: Nyi thumide ngudzu, nyi khothedwe dzitepo nya dzingi, nyi vetidwe gungani-gungani nigu dzitepo nya dzingi nyi emisanide ni gufa. 24 5 dzitepo nyi vetidwe 39* nya ugo khu Vajudha, 25 nyi kwamudwe guraru khu mapitso, nyi pfarwa gumogo khu siwindri, nyi dzamide ni ngalava guraru, nyi vbedzide wutshigu wumowo ni litshigu limwedo na nyi penga-pengiswa linene; 26 nyi endride dzitepo nya dzingi, nyi emisanide ni dzimhango mitsongoni, nyi thavide gu bedwa khu dzimbafa, nyi thavide va na gyathu, nyi thavide vanyamayigo, nyi tshanganide ni sigaradzo nya singi dhoropani, giwulani, phwani nigu nyi thavide gambe vandriyangu, 27 nyi thumide khu gudzigaradza, nyi bwe nyi thuma ngudzu, nyi vbedzide matshigu nya mangi na nyi si lali wutshigu, na nyipwa ndzala, na nyipwa lidora, gutala nya dzitepo nyi diri mwalo ni gilo nyo hodze, nyi di gupwa girame nigu nyi diri mwalo ni gilo nyo ambale.

28 Vbavbandze nya satshavbo soso, gyomo gi nga ba gi nyi garadza tshigu ni tshigu: nyi di gu garadzega khu mabandla yatshavbo. 29 Khu mani vbakari gwanu a vbedego tshivba, eni nyi si vbeyi tshivba? Khu mani a tshunganedego, eni nyi si gorogi?

30 Abari gu nyi yede gu dzi khusedza, nyi na dzi khusedza khu silo si yeyedzago gu mba na tshivba gwangu. 31 Nungungulu a gu Papayi wa Pfhumu Jesu, wule a yedego gu dhumiswa khu gupindruga ni gupindruga a ngu dziti gu khuye kha nyi liphi. 32 Ghovhernadhori oyu a nga ba a fumedwa khu pfhumu Areta tigoni ga Dhamasko, a di vega dzigwardha dhoropani gwatshavbo gasi dzi nyi mola, 33 ganiolu vandriyathu va di nyi tshisa khomu nya rava, khavba nya gihogo gi nga ba gi romo avba nya muru nya lidhoropa, nyi vbuluga mandzani gwawe.

12 Nyi na dzi khusedza. Khu kharato, nyi na ganeya maningano ni siwoniso esi Pfhumu yi nyi yeyedzidego ni mahungu a nyi ningidego, ambari olu gu gira isoso si si nyi phasigo gilo. 2 Nyi nguti muthu a gu mupizani wa Kristo, oyu ga 14 myaga yi vbindridego a gwedzisidwego ndzadzini nya wuraru. Gani a di gwedziswa omu nya givili nyo khale kharini, eni kha nyi siti, Nungungulu khuye a sitigo. 3 Muthu yoyo nyi ngu muti. Ganiolu, gu kheni a diri ni givili nyo khale kharini, kha nyi dziti; sa gu tidwa khu Nungungulu. 4 A di yiswa paradhesini, a bwe apwa malito ma si yeligo gu ganedwa nigu mwalo a dzumeledwago gu ma ganeya. 5 Nyi na dzi khusedza khu muthu yoyo, kha nyi na nga dzi khusedza khu silo sangu, ganiolu nyi na dzi khusedza khesi si nyi vbedzago tshivba. 6 Ambari nya gu dzi khusedza, kha nyi na nga khala gipumbu, kholu nyi na ba nyi ganeya lisine. Ganiolu, kha nyi na nga gira isoso gasi gu si manegi ni muthu a nyi ningago wuzundzu khu tshivba nya silo a si wonago avba gwangu mwendro khu silo a sipwago avba gwangu, 7 khu kotani basi nya olu nyi yeyedzwago siwoniso nyo hlamadzise.

Gasi gu nyi si dzi khusedzi ngudzu, nyi thedwe muba givilini, a gu ngilozi ya Sathane, gasi yi simama gu nyi veteleya gasi nyi si dzi khusedzi ngudzu. 8 Nyi lombide guraru ga Pfhumu gu kheni a nyi dusa muba wowo. 9 Ganiolu, uye a di nyi hakha, khuye: “Wuwadi wangu nya wukhongolo ngudzu wu enede gwago, kholu tshivba yangu ya gu engedzeya ngudzu tepo u vbeyago tshivba.” Khu kharato, nyi na dzi khusedza na nyi tsakide ngudzu kholu nyi vbeyago tshivba, gasi gu tshivba ya Kristo yi simama vbatshani gwangu nga litendra. 10 Khu kharato, nyi ngu tsaka nya gu vbeya tshivba, nya gu valetedwa, nya gu hamuga, nya gu tshaniswa ni tepo nyi tshanganago ni sigaradzo khu kotani ya Kristo. Kholu tepo nyi gu mwalo tshivba, khavbo nyi gu na ni tshivba.

11 Khu kotani yanu, nya gu ganeya nga khatshi nyi gipumbu. Ganiolu, nari khatshi mu di ganede gwadi kheni, na nyi si ganeyi khu ndziya yeyi. Ambari olu nyi gu siri gilo, kha nyiri dugwana nya gu dzi fananisa ni vapostoli vanu nya vakhongolo. 12 Khu lisine, nyi mi yeyedzide wufakazi nyo kheni nyi mupostoli khu gu nyi timiseya ngudzu, nyi gira siwoniso, silewugiso ni mithumo nya tshivba. 13 Ginani gi mi giridego mu khala vadugwana ga aya mambe mabandla? Adzina khu gu ba nya sa khala rwalo gwanu. Nyo lomba gu kheni mu nyi divaleya nandru wowo.

14 Nyi dzi emisede guta nya wuraru iyo gwanu. Ambari ulolo kha nyi vbweti gu ta mi ningani rwalo. Eni nyo vbweta enu basi, kha nyi vbweti dzithomba dzanu, kholu khandri sanana si yedego gu wungedzeya dzithomba gasi gu ninga vavelegi vaso, ganiolu vavelegi khavo va yedego gu wungedzeya dzithomba gasi gu ninga sanana sawe. 15 Nyi na ningeya silo sangu satshavbo ni womi wangu na nyi tsakide khu kotani yanu. Nya gu ba nyi mi gola ngudzu, ina enu mu yede gu nyi gola vbadugwana? 16 Gima kha nya mi khaleyani rwalo, ganiolu enu mwari khenu nyi di mi riyani khu “mano” nyi mi molani “khu naphwi.” 17 Ina nyi di mi londrola* khu gu thumisa moyo nya vale nyi mi rumeledego? 18 Nyi lombide Tito gu kheni a mi endreya uye gumogo ni moyo nya ndriyathu. Ina Tito gyomo a nga mi hodzeya?* Ina kha hi giri silo khu ndziya yayimweyo? Ina kha hi gimbiyi khu ndziya yayimweyo?

19 Adzina mo pimisa gu khenu ha gu dzi emeleya, ganiolu khandriso. Vbavbandze nya isoso, kha nga valandreyi va Kristo, ethu ha gu ganeya lisine mbeli ga Nungungulu. Vandriyathu nyo golege, satshavbo hi girago, ho gireya gu mi tiyisa. 20 Kholu nyi ngu thava gu kheni tepo hi na vbohago iyo gwanu, nyi ta mi mana khu ndziya nyi si dzinigo gu kheni nyi ta mi mana khiyo, mwendro anenu mu nyi wona khu ndziya mu si dzinigo gu khenu mu nyi wona khiyo. Mwendro nyi nga tshuka nyi ta mana mayunga, lidiwo, dzizanga, guganedzana, gusingedzana, milembo, gudzikhusedza ni pfilupfilu. 21 Mwendro tepo nyi na wuyago gambe iyoyo, si nga gira gu Nungungulu wangu a nyi theya dzitshoni mbeli gwanu, ni gu eni nyi liya khu kotani nya vathu nya vangi gale gakone va ghohidego, ganiolu va si dzi layi avba nya ndzilo va giridego, wubhayi* ni mavbanyelo yawe nya dzitshoni.*

13 Eyi tepo nya wuraru nyi tago nyi ta mi holeya. “Ni yavbini mahungu gu vbwetega ma manega ni dzifakazi dzimbili mwendro dziraru.” 2 Ambari olu nyi gu mwalo iyoyo nanu, hakhani esi nyi mi embeyago nga khatshi nyi womo iyoyo nanu khu tepo nya wuvili. Nigu nyi ngu gengedza ava va ghohidego gale ni vambe vatshavbo gu kheni kha nyi na nga ta va pweya tepo nyi na tago gambe iyoyo. 3 Nyo gira isoso nyi na yeyedza gu kheni Kristo a gu thumisa eni gasi gu ganeya nanu, nigu Kristo khandri muthu nya mba na tshivba, ganiolu uye a na yeyedza tshivba yaye nya yikhongolo. 4 Kholu ambari olu khu lisine uye a songidwego avba nya simbo kha nga olu a nga ba ari mwalo tshivba, olu uye a ngu vbanya khu kotani nya tshivba ya Nungungulu. Lisine gu anethu hi mwalo tshivba nga uye gale yoyo a nga ba ari mwalo tshivba, ganiolu hi na vbanya naye khu kotani nya tshivba ya Nungungulu eyi yi gomogo vbakari gwanu.

5 Simamani gu dzi kambeya gasi mu wona gu khenu mu ngari gukhodwani gani; simamani gu dzi khedzani gwadi gasi mu wona gu khenu mu vathu nyo khale kharini. Ina kha mu dziti gu khenu Jesu Kristo na ni enu? Vbavbandze nya gu ba mu si hakhegi ga Nungungulu. 6 Khu lisine, nyo vbweta gu kheni mu dziti gu khenu ethu hi ngu hakhwa khu Nungungulu.

7 Ho mi gombeleya ga Nungungulu gasi mu si giri silo nyo vivbe, nasiri gasi hi hakhwa khu Nungungulu, ganiolu gasi mu gira esi nya sadi ambari si wonegisago gu khatshi kha hi hakhegi. 8 Kholu gimwalo hi nga girago gasi gu wugeya lisine, ganiolu ho gira basi esi si longolokago ni lisine. 9 Khu lisine, ethu hi ngu tsaka tepo yatshavbo hi vbeyago tshivba ganiolu enu mu manega ni tshivba. Nigu hi ngu gombeya, hi lomba gu khethu mu vbindrugedza esi si vbwetegago. 10 Khiso si nyi girago nyi mi loveya silo sesi na nyiri mwalo iyoyo nanu gasi tepo nyi na tago nyi siti nyi ta mi garadzeya tepo nyi na gu ba nyi thumisa wufumu nyi ningidwego khu Pfhumu, owu wu thumeyago gu vbaha nasiri gu tshungunula.

11 Khu gu hegisa, vandriyathu, simamani gu tsaka, mu vbindrugedza esi si vbwetegago, mu thaveledwa, mu pimisa khu ndziya yayimweyo mu bwe mu vbanya khu gurula nigu Nungungulu nya lihaladzo ni gurula a na ba ari nanu. 12 Losanani khu lihaladzo.* 13 Vatshavbo va nya guaga va ngu mi losedzeya.

14 Hi ngu mi suveya wuwadi nya wukhongolo ngudzu wa Pfhumu Jesu Kristo ni lihaladzo la Nungungulu ni liphuvbo nya guage eli hatshavbo hi phasedzedwago khilo.