LIDANGALIYA LI HONGOLAGO GA VAGALATIYA

1 Eni mupostoli Pawulo, nasiri khu gu ba nyi emisidwe kha nga mupostoli khu vathu, ganiolu khu Jesu Kristo ni Nungungulu, Papayi, oyu a wusidego Jesu khu ga vafudego 2 ni vatshavbo vandruye va gu na ni eni, nyi ngu loveya mabandla ya Galatiya, kheni:

3 Nyi ngu mi suveya wuwadi nya wukhongolo ngudzu wa Nungungulu, Papayi wathu, ni wa Pfhumu Jesu Kristo. 4 Uye dzi ningede khu kotani nya sighoho sathu gasi gu hi tshudzisa ga litigo leli nyo vivbe guya khu gugola ga Nungungulu wathu, a gu Papayi. 5 Uye a na dhumiswe khu gupindruga kala gupindruga. Amen.

6 Nyi ngu samadziswa ngudzu khu gu wona gu kheni kha mwa hweya gu dzi hambanisa ni wule a mi ranidego khu wuwadi nya wukhongolo ngudzu wa Kristo, mu landreya mambe mahungu nya yadi. 7 Khandri khatshi mo wa romo mambe mahungu nya yadi, ganiolu vomo vambe vbakari gwanu va tsolopeteyago nigu avo vo vbweta gu tshomborosa mahungu nya yadi maningano ni Kristo. 8 Khu kharato, mwa gu tshumayedwa mahungu nya yadi ma hambanago ni mahungu nya yadi hi mi tshumayedego mwendro mu tshumayedwego khu ngilozi ya ndzadzini, muthu yoyo a mi tshumayelago a na vadwe. 9 Kha nga nyi ganedego, nyi ngu ganeya gambe gu kheni: Ni wevbini a huweleyago mahungu nya yadi ma hambanago ni yale mu ma hakhidego, a na vadwe.

10 Kha nyi zami gu tsakedwa khu vathu, ganiolu nyo zama gu tsakedwa khu Nungungulu; ina, kha nyi zami gu tsakisa vathu. Nari khatshi nyi di ngo dwaneya gu tsakisa vathu na nyi siri githumi gya Kristo. 11 Vandriyangu, nyo vbweta gu kheni mu dziti gu khenu mahungu nya yadi hi mi tshumayedego kha ma dugeyi ga vathu, 12 kholu kha nya hakha mahungu yoyo khiyo ga muthu nigu ne kha nya hevbudzwa khu muthu, ganiolu nyi di tivegiswa khu Jesu Kristo.

13 Mu ma pwide mavbanyelo yangu ya gale, na nyi ngo landrisa sihevbudzo nya Vajudha. Mu dzitide gu khenu eni nyi di gu tshanisa ngudzu libandla la Nungungulu na nyi gu zama gu li fuvisa. 14 Eni nyi di gu pala vathu nya vangi va nga ba vari ni tanga yangu khu guti sihevbudzo nya Vajudha tigoni gwangu, kha nga olu nyi nga ba nyi landrisa gwadi siolovedzo sa vapapayi vangu. 15 Ganiolu Nungungulu, a gu uye a nga nyi dusa khu ndrani ga mamayi wangu a bwe a nyi rana khu gu thumisa wuwadi waye nya wukhongolo, tepo a wonidego na siri sadi 16 gu wonegisa Gyanana gyaye khu gu thumisa eni gasi nyi huweleya mahungu nya yadi maningano ni uye ga vanyamayigo, kha nya dzegeya gu hongola nyi ya lomba wusingalagadzi ga muthu, 17 ne kha nya hongola Jerusalema gasi nyi ya wonana ni vale va phedego khavo gu khala vapostoli, ganiolu nyi di hongola Arabhiya, khu hwane nya tepo nyi wuya Dhamasko.

18 Khu kharato, hwane nya myaga miraru nyi di gweya Jerusalema gasi gu ya wuseya Khefasi; nyi khade iyoyo 15 matshigu. 19 Ganiolu, kha nya wona ne moyo nya vambe vapostoli, nyi di wona basi Jakobe, ndriye wa Pfhumu. 20 Maningano ni esi nyi mi loveyago, nyi ngu mi tiyisa khu Nungungulu gu kheni khandri nya gu mi lipheya.

21 Hwane nya isoso, nyi di hongola mayigoni ya Siriya ni Silisiya. 22 Ganiolu mabandla ya Judheya ma nga ba ma pwanana ni Kristo kha ma nga ba ma nyiti khovbe ni khovbe. 23 Avo basi va di gupwa gu pwani mwama moyo gale yoyo a nga ba a hi tshanisa olu a gu huweleya mahungu nya yadi maningano ni gukhodwa a nga ba a vbweta gu gu fuvisa. 24 Khu kharato, avo va di pheya gu dhumisa Nungungulu khu kotani yangu.

2 Khavbovbo, na gu vbindride 14 myaga, nyi di bweleya Jerusalema na nyiri ni Bharinabha ni Tito. 2 Nyi di hongola iyoyo khu kotani nya giwoniso nyi nga ningwago. Nyi di ya embeya vandruye mahungu nya yadi nyi tshumayelago vanyamayigo. Iyoyo nyi di ya tshangana basi ni vandruye va ningwago ngudzu githawo gasi nyi tiyisega gu kheni thumo nyi nga wu gira ni owu nyi wu girago khandri wa mahala. 3 Ganiolu ambari Tito, oyu a nga ba ari ni eni, kha gurumedzwa guhana wugwera,* ambari olu a nga ba ari Mugreki. 4 Mahungu yaya ma dugelede khu kotani nya vandruye nya malipha, ava va bedego libandlani khu gu sihala gasi va ya holeleya gutshulega hi gu manago khu kotani nya olu hi pwananago ni Kristo Jesu, gasi va hi gira dzigumbi; 5 ganiolu kha ha va ninga wulanga ne vbadugwana gasi mu simama na muri ni lisine nya mahungu nya yadi.

6 Ganiolu vale va nga ba va wonega na vari ni lisima kha nya nga ba nyi khathala khu giemo gyawe kholu Nungungulu kha lamuli muthu guya khu khovbe — vama vovo nya gu thavisege ngudzu, gimwalo nya giphya va nyi hevbudzidego. 7 Ganiolu tepo va nga wona gu khavo nyi ningidwe thumo nya gu ya tshumayele mahungu nya yadi ga ava va nga mba hana wugwera gufana ni Pedro a ningidwego thumo nya gu ya tshumayele ava va hanidego wugwera — 8 kholu wule a ningidego Pedro tshivba nyo khale mupostoli ga vale va hanidego wugwera nyi ningide neni tshivba gasi gu khala mupostoli ga vanyamayigo — 9 tepo va nga wona wuwadi nya wukhongolo nyi nga ba nyi ningidwe, Jakobe, Khefasi* ni Johane, ava va nga ba va wonwa na vari matshina, va di hi thanuludzeya limandza, eni ni Bharinabha kha nga giyeyedzo nya gu khigyo hi womo gumogo thumoni wowu, gasi gu ethu hi hongola ga vanyamayigo avo va hongola ga vale va hanidego wugwera.* 10 Avo basi va di hi lomba gu khavo hi dundruga sisiwana nigu isoso khiso nyi dzi garadzeyago gu gira khu monyo watshavbo.

11 Ganiolu tepo Khefasi* a nga vboha Antiyokiya, nyi di mu kawuka khovbe ni khovbe kholu si di gu wonega guagani gu esi a nga ba a gira khandriso. 12 Kholu na gu si vbohi vama nyo khaguri va nga rumedwa khu Jakobe, uye a di gu hodza ni vanyamayigo, ganiolu tepo va nga vboha uye a di diga gu hodza navo, a dzi hambanisa ni vathu vovo khu gu thava ava va hanidego wugwera. 13 Vambe Vajudha navo va di dzi pata avba nya wupfhadzedzeyi wowo avba nyo bwe Bharinabha nuye a dzi pata avba nya wupfhadzedzeyi wawe. 14 Ganiolu tepo nyi nga wona gu kheni kha va gimbiyi khu lisine nya mahungu nya yadi, nyi di embeya Khefasi mbeli nya vathu vatshavbo, kheni: “Abari gu uwe, ambari olu u gu Mujudha wa gu vbanya nga vanyamayigo nasiri nga Mujudha wo si kodza kharini gu gurumedza vanyamayigo gu vbanya khu sihena nya Vajudha?”

15 Ethu hi gu Vajudha nya mavelego, hi sirigo sighohi nya vanyamayigo, 16 hi ngu pwisisa gu khethu muthu a gu wonwa na lulamide nasiri khu kotani nya mithumo yi lombwago khu nayo ganiolu khu kotani basi nya gu khodwe iyo ga Jesu Kristo. Khu kharato hongoleni hi khodwani iyo ga Kristo Jesu gasi gu hi wonwa na hi lulamide khu kotani nya gukhodwe iyo ga Kristo nasiri iyo nya mithumo yi lombwago khu nayo, kholu mwalo a na ranwago gu pwani lulamide khu kotani nya mithumo yi lombwago khu nayo. 17 Ganiolu, abari gu anethu ha gu wonwa na hiri sighohi, na hi gu vbwetedzeya gu khala vathu nyo lulame khiyo ga Kristo, ina sa gu thula gu khiso Kristo a gu hi kutsedzeya gu ghoha? Ne vbadugwana! 18 Nya gu vbahedza esi nyi nga nga si tshungunula sa gu yeyedza gu khiso nyi gindraga-milayo. 19 Nyi fude khu kotani nya nayo gasi nyi vbanyeya Nungungulu. 20 Olu nyi khokhothedwe avba nya simbo ni Kristo, uye a vbanyago khandreni gambe, ganiolu khu Kristo a vbanyago khu gupwanana ni eni. Khu lisine, womi nyi wu vbanyago olu nyamani nya gu wu vbanya khu gukhodwa iyo ga Gyanana gya Nungungulu, igyo gi nyi haladzidego gi bwe gi dzi ningeya khu kotani yangu. 21 Wuwadi nya wukhongolo ngudzu wa Nungungulu kha nyi wu bombi, kholu abari gu gululama ga guta khiyo nya nayo khu lisine gufa ga Kristo kha gu phasi gilo.

3 Ama enu Vagalatiya, mu dzi girago sipumbu! Khu mani a mi sengidego? Kholu eni nyi mi tshamusede gwadi gu kheni Jesu Kristo khokhothedwe vbasimbotunu. 2 Gyomo nyi vbwetago gu mi wudzisa: Ina mu hakhide liphuvbo nya guage khu kotani nya olu mu landrisago esi nayo wu ganeyago mwendro khu kotani nya olu mu gu na ni gukhodwa avba nya esi mu si pwidego? 3 Gasi mu sipumbu nya sikhongolo kharati? Gupheyani mu di gu gimbiya khu ndziya nya liphuvbo, ganiolu olu mwa gu dzi diga mu sengwa khu gudogoreya nya sivili sanu si gu na ni gighoho. 4 Dzitshanisa dzatshavbo mu nga tshangana nadzo, ina dzi khade dza mahala? Nyi ngu tiyisega gu kheni kha dza khala dza mahala. 5 Khu kharato, ina wule a mi ningago liphuvbo a bwe a gira mithumo nya tshivba vbakari gwanu a gu gira isoso khu gu ba mu landrisa esi si lombwago khu nayo mwendro khu kotani nya gukhodwe mu gu yeyedzidego avba nya esi mu nga sipwa? 6 Si ngu fana ni esi si dugeledego Abrahama, “khodwe ga Jehovha nigu khu kotani nya isoso a di wonwa nari muthu nyo lulame.”

7 Khu lisine mu ngu dziti gu khenu ava va gu na ni gukhodwa khavo va ranwago sanana sa Abrahama. 8 Gipandre nyo khaguri nya milowo gi ganede gale yoyo gu khigyo Nungungulu a di hadzi wona vanyamayigo nga vathu nyo lulame khu kotani nya gukhodwe. Thangide a embeya Abrahama mahungu nya yadi, khuye: “Mayigo yatshavbo ma na kategiswa khavbo gwago.” 9 Khu kharato, avo va gu na ni gukhodwa va gu kategiswa gumogo ni Abrahama, a nga ba ari ni gukhodwa.

10 Vatshavbo vale va tumbago esi nayo wu ganeyago va vadwe, kholu gu lovidwe gu pwani: “Va na vadwe vale va gu mba landreya tepo yatshavbo esi si lovidwego omu nya libhuku nya Nayo. 11 Nigu somo guagani gu khiso mwalo a na wonwago na lulamide mahoni ga Nungungulu khu kotani nya nayo, kholu “muthu nyo lulame a na vbanya khu kotani nya gukhodwe.” 12 Nayo kha wu dzi seketeyi avba nya gukhodwe, wulangani nya isoso “ni wevbini a girago silo sesi a na vbanya khiso.” 13 Kristo a hi rengide khu gu hi tshudzisa avba nya givalo nya Nayo khu gu khala givalo wulangani gwathu, kholu gu lovidwe gu pwani: “Vadwe watshavbo wule a vbayegwago avba nya simbo.” 14 Isoso si dugelede gasi gu makategwa ya Abrahama ma vboha ga vanyamayigo khu gu thumisa Kristo Jesu, gasi hi hakha liphuvbo hi tumbisidwego khu kotani nya gukhodwe gwathu.

15 Vandruye, nyo ganeya nanu khu gu thumisa sipimaniso nya silo sa tshigu ni tshigu: Pwanano wa gu hungwa wu bwe wu tiyiswa, ambari wa gu tiyiswa khu muthu moyo basi, mwalo a wu tshipisago mwendro gu engedzeya gimbe gilo. 16 Situmbiso si giridwe ga Abrahama ni ga gitugulwana gyaye. Milowo kha yi ganeyi gu khiyo: “Ni ga situgulwana sago,” nga khatshi singi. Wulangani nya isoso, yari khiyo: “Ni ga gitugulwana gyago.” Iyo yo ganeya khu gitugulwana gimwegyo, a gu Kristo. 17 Nyi ngu ganeya gambe gu kheni: Gupheya Nungungulu giride pwanano, nigu hwane nya 430 myaga khavbo a nga ninga Nayo. Ambari ulolo, nayo wowu kha wu tshipisi pwanano ni gitumbiso a giridego. 18 Abari gu Nungungulu a gu ninga thomba khu kotani nya nayo, so thula gu khiso kha yi ningeyi gambe khu gu thumisa gitumbiso; ganiolu khu wuwadi Nungungulu ningide Abrahama thomba khu gu thumisa gitumbiso.

19 Khu ginani wu vegidwego Nayo? Uwo wu vegidwe gasi gu wonegisa gwadi sighoho kala gi vboha gitugulwana, a gu uye a giridwego gitumbiso. Igyo gi ningedwe khu dzingilozi khu gu thumisa libogo nya mutshanganisi. 20 Pwanano wu hungwago khu muthu moyo kha wu vbweti mutshanganisi, ganiolu Nungungulu khuye basi a giridego gitumbiso gegi. 21 Ina isoso so thula gu khiso Nayo wa gu wugeya situmbiso sa Nungungulu? Ahihi! Kholu nari khatshi gu di ningedwe nayo wu si kodzago gu vbanyisa, gululama na gu dzude khu kotani nya nayo. 22 Ganiolu, lito la Nungungulu li ningede satshavbo gasi si fumedwa khu gighoho, gasi vale va gu na ni gukhodwa va mana silo nya sadi si tumbisidwego vale va gu na ni gukhodwa avba ga Jesu Kristo.

23 Na gu si vbohi gukhodwa, ethu hi di gu fumedwa khu nayo, na hi gu vireya gukhodwa gu nga hadzi wonegiswa. 24 Khu kharato, Nayo wu khade muhevbudzi wathu a nga hi yisa ga Kristo, gasi hi wonwa nga vathu nyo lulame khu kotani nya gukhodwe. 25 Ganiolu, olu gu vbohidego gukhodwa kha hi ngo vbweta gambe muhevbudzi.

26 Khu lisine, enu mwatshavbo mu sanana sa Nungungulu khu kotani nya gukhodwe gwanu avbo ga Kristo Jesu. 27 Kholu enu mwatshavbo mu bhabhatisidwego ga Kristo mu ambade Kristo. 28 Gu mwalo gambe Mujudha, Mugreki, gumbi, muthu a tshulegidego, ne mwama, ne nyamayi; kholu enu mwatshavbo mu moyo khu gu pwanana ni Kristo Jesu. 29 Nigu mwa gu ba mu lumba Kristo, khu lisine mu gitugulwana gya Abrahama, vahodzi nya thomba guya khu gitumbiso.

4 Abari gu gihodza thomba gyanana, kha gi hambani ni gumbi ambari olu gi gu pfhumu nya satshavbo, 2 kholu gu na ni vathu va gi khathaleyago ni gu khathaleya nyumba yagyo kala ga litshigu li emisidwego khu papayi wagyo. 3 Khu ndziya nyo fane, tepo hi nga ba hiri sanana, anethu hi di gu girwa dzigumbi khu milayo nya litigo. 4 Ganiolu, na yi vbohide tepo yi vegisidwego, Nungungulu a di rumeya Gyanana gyaye, egi gi velegidwego khu nyamayi a nga ba ari vbavbatshi nya nayo, 5 gasi gu tshudzisa avo va gomogo vbavbatshi nya nayo khu gu va renga, gasi hi khala sanana sa Nungungulu.

8 Tepo mu nga ba mu si muti Nungungulu, mu diri dzigumbi nya vanungungulu nya malipha. 9 Ganiolu, olu mu tigo Nungungulu mwendro olu mu tidwago khu Nungungulu, khu ginani mu bweleleyago hwane ga milayo nya litigo yi si phasigo gilo mu bwe mu vbweta gambe gu dzi gira dzigumbi nya iyo? 10 Enu mwa gu dzi garadzeya gu vegisa matshigu, migima, dzinango ni myaga. 11 Mu ngu nyi theya hwanga, kholu so wonegisa gu khatshi gudzigaradza gwatshavbo nyi gu giridego khenu khwa mahala.

12 Vandruye, nyi ngu mi lomba gu kheni mu fana ni eni kholu aneni nyi di gu fana nanu. Enu kha mwa nyi ghoheya gilo. 13 Ganiolu, mu ngu dziti gu khenu nyi manide lithomo nyo pheye nyo mi tshumayele mahungu nya yadi khu kotani nya olu nyi nga ba nyi dwala. 14 Ambari olu mawugelo yangu ma nga ba mari gilingo gwanu, enu kha mwa nyi tshepeta nigu ne kha mwa nyi nyenya,* ganiolu mu nyi hakhide nga ngilozi ya Nungungulu, nga Kristo Jesu. 15 Gomo hayi gutsaka gule mu nga ba muri nago? Kholu eni nyi ngu tiyisega gu kheni nari khatshi si di kodzegide, enu na mu duside maho yanu mu nyi ninga. 16 Ina olu nyi nala wanu kholu nyi mi embeyago lisine? 17 Avo va zamide gu mi gira mu ema navo, ganiolu nasiri khu makungo nya yadi. Avo va gu vbweta gu mi hambanisa ni eni gasi mu dzigaradzeya gu va landreya. 18 Khu lisine, gwadi gu tepo yatshavbo muthu a mi ndrindredzeya ga esi nya sadi, nasiri basi tepo nyi gomogo vbakari gwanu. 19 Vanavangu, nyi ngo simama gupwa guvbisa khenu nga nyamayi a lumwago, nigu guvbisa gogu nyi gupwago kha gu na nga ema kala Kristo a wumbwa avbo gwanu. 20 Olu kamo nyi di gu suva gu manega iyoyo nanu, nyi ganeya nanu khu ndziya nyo hambane, kholu nyi ngu garadzega ngudzu khenu.

21 Enu mu vbwetago gu thangedwa khu nayo, nga nyi embeyani: Ina kha mupwi esi Nayo wu ganeyago? 22 Khu giyeyedzo, gu lovidwe gu pwani Abrahama manegide ni sanana sivili. Gimwegyo velegide ni nyamayi a nga ba ari githumi nigu gimbe velegide ni nyamayi a nga ba a tshulegide. 23 Ganiolu, gyanana gi velegidwego khu nyamayi wule nya githumi gi velegidwe khu ndziya nyo olovelege, ganiolu gyanana gi velegidwego khu nyamayi wule nyo tshulege gi velegidwe guya khu gitumbiso gya Nungungulu. 24 Silo sesi si na ni wumbe tshamuselo, kholu vanyamayi vava va gu emeya mipwanano mivili; moyo wa gigomoni gya Sinayi gi velegago sanana si khalago dzigumbi, a gu Agari. 25 Agari a gu emeya Sinayi, a gu gigomo gimwegyo gya Arabhiya gi emeyago Jerusalema wa muhuno, kholu uye womo wugumbini ni sanana saye. 26 Ganiolu Jerusalema wa ndzadzini tshulegide nigu uye mamayi wathu.

27 Kholu gu lovidwe gu pwani: “Tsaka uwe nyamayi nya gyumba,* uwe u si velegigo; ghiya khu gutsaka uwe nyamayi u si pwigo guvbisa nya gulumwe; kholu sanana sa nyamayi a hudwego singi ngudzu guvbindra sa wule a gu na ni mwama.” 28 Enu vandruye, mu sanana nya gitumbiso gu fana ni Isaki. 29 Ganiolu, gu fana ni tepo yile oyu a velegidwego khu ndziya nyo olovelege a nga pheya gu tshanisa wule a velegidwego khu tshivba nya liphuvbo nya guage, sasimweso si ngu girega muhuno. 30 Ganiolu, ginani esi milowo yi ganeyago? “Tutumisa githumi ni gyanana gyaye, kholu gyanana gya githumi kha gi na nga khala gihodza thomba gumogo ni gyanana gya nyamayi a tshulegidego.” 31 Khu kharato vandruye, kha hiri sanana sa nyamayi nya gumbi, ganiolu hi sanana sa nyamayi a tshulegidego.

5 Kristo a hi tshude gasi hi tshulega avba nya nayo. Khu kharato, simamani na mu tiyide nigu mu nga dzi digi mu bweleleya hwane mu ya khala gambe dzigumbi.

2 Eni Pawulo, nyi ngu mi embeya gu kheni mwa guhana wugwera,* Kristo mwalo giphaso avbo gwanu. 3 Nyi ngu ganeya gambe gu kheni ni wevbini mwama a hanago wugwera a ngu gurumedzega gu landrisa Nayo watshavbo. 4 Enu mu dwaneyago gu wonwa nga vathu nyo lulame khu gu thumisa nayo, mu hambanisidwe ni Kristo nigu mwa gu dzi hambanisa mwabune ni wuwadi waye nya wukhongolo ngudzu. 5 Ganiolu, ethu khu kotani nya liphuvbo la Nungungulu hi ngu vireya khu maho nyo fuviye gululama gu reswago khu gukhodwa. 6 Kholu ga mupizane wa Kristo Jesu, guhana wugwera* mwendro gu mba hana wugwera khandri sa gilo; egi gi gu ni lisima gwaye gukhodwa gu yeyedzwago khu lihaladzo.

7 Enu mu di gu gimbiya* gwadi ndziyani nya lisine. Khu mani a nga mi himbedzeya gu simama gu landrisa lisine? 8 Uye a mi hevbudzidego gu gira silo khu ndziya yoyo ina khandri wule a mi ranidego? 9 Livhirina* nya yidugwana yi ngu gugumugisa wuguvbi watshavbo. 10 Nyi ngu tumba gu kheni enu mu pwananago ni Pfhumu mu na dzumeleyana ni eni, ganiolu wule a mi wuseyago sigaradzo, ambari a gu ba ari muthu muni, a na manega ni gulamudwa gu mu yelago. 11 Vandruye, nari khatshi nyi di ngo tshumayela maningano ni guhana wugwera avo na va sa nyi tshanisa, nigu sihevbudzo nyi huweleyago maningano ni gufa ga Jesu avba nya simbo na si si gorosi vathu. 12 Eni nyi di gu vbweta gu kheni vama va zamago gu mi gireya sigaradzo va dzi thena avo vamune.*

13 Vandruye, enu mu ranidwe gasi mu ta mana gutshulega. Khu kharato, mu nga thumisi gutshulega gogo kha nga ndziya nya gu mu landrisa gudogoreya nya nyama; wulangani nya isoso, khu lihaladzo thumeyanani khu gyanu. 14 Kholu Nayo watshavbo wa gu tadzisega avba nya nayo mowo basi wu gu khuwo: “Haladza muthu-kwanu nga edzi u dzi haladzago khidzo.” 15 Ganiolu, enu mwa gu simama gu hodzana ni gu bayisana khu gyanu, dzi woneyeni gasi mu si fuvisani.

16 Ganiolu, eni nyi ngu ganeya gu kheni simamani gu gimbiya khu liphuvbo, khu kharato enu kha mu na nga landrisa gudogoreya nya nyama ne vbadugwana. 17 Kholu nyama khu kotani nya gudogoreye gwayo, yi ngu dwanisana ni liphuvbo, nigu liphuvbo nilo li ngu dwanisana ni nyama; iso sa gu dwanisana. Khigyo gighelo gyogyo gi mi girago mi tandrega gu gira esi mu si vbwetago gu gira. 18 Nigu mwa gu ba mu gimbidziswa khu liphuvbo, kha mu fumedwi khu nayo.

19 Mithumo nya nyama yomo guagani, a gu eyi: wubhayi,* gu mba handzega, mavbanyelo nya dzitshoni,* 20 gu khozeya sifananiso, wuloyi,* gumbapwanana, mayunga, wufu, gu vbiredzeya gu zangari, gudwanisana, guhambana, gu landreya sihevbudzo nya vathu, 21 lidiwo, gu leva, dzifesta nya pfilupfilu ni simbe nyo fane ni esi. Nyi ngu mi gengedza maningano ni silo sesi nga edzi nyi mi gengedzidego khidzo, kheni: Ava va girago silo sesi kha va na nga beya Mufumoni wa Nungungulu.

22 Ganiolu mihandro nya liphuvbo kheyi: lihaladzo, gutsaka, gurula, gulaphisa-monyo, wuwadi, ndruda, gukhodwa, 23 gudzivbevbugisa ni gudziphara. Wu mwalo nayo wu wugeyago silo sesi. 24 Nigu vale va lumbago Kristo Jesu va khokhothede givili ni gudogoreya gwagyo avba nya simbo.

25 Ha gu ba hi vbanya khu liphuvbo, hongoleni hi simamani gu gimbiya gambe khu liphuvbo. 26 Hi nga zami gu dzi vbweteya wuzundzo wu si hi faneyigo, hi palisana khu gyathu ni gu gireyana lidiwo.

6 Vandruye, o tshuka muthu nyo khaguri a ndreya ndziyani nya mba si tugula gu khuye a ngu ndreya, enu mu thangedwago khu liphuvbo zamani gu kawuka muthu yoyo khu wuwadi. Ganiolu, moyo ni moyo wanu anuye a na dzi woneye gasi a si lingwi. 2 Rwaleyanani sigaradzo sanu. Mwa gu gira isoso, mu na ba mu landrisa nayo wa Kristo. 3 Kholu muthu nyo khaguri a gu pimisa gu khuye gilogyo narigu khandri gilo a gu dzi kanganyisa abune. 4 Ganiolu, muthu ni muthu a na khedzise gwadi mithumo yaye, khavbovbo a na mana gighelo nya gu tsake khuye mune kamo nasiri khu gu dzi fananisa ni vambe. 5 Kholu muthu ni muthu a na rwala abune rwalo waye.

6 Nigu ni wevbini wule a hevbudzwago lito la Nungungulu a na kabane silo satshavbo nya sadi a gu naso ni oyu a mu hevbudzago.

7 Mu nga dzi sengi: Nungungulu khandri wa gu hagana khuye; esi muthu a yalago khiso a na vbwerago. 8 Kholu uye a yalago khu nyama, a na vbwera gufuviswa; ganiolu uye a yalago khu liphuvbo a na vbwera womi nya gupindruge. 9 Khu kharato, hi nga garali khu gu gira silo nya sadi kholu hi na vbwera khu tepo yakona, ha gu mba vbeya tshivba.* 10 Khu kharato, tepo na yi ngo dzumeya, hongoleni hi gireya silo nya sadi vatshavbo, ngudzu-ngudzu vandriyathu gukhodwani.

11 Nyi mi lovede lidangaliya leli khu mandza yangu; wonani khu dziletra dzi gu dzikhongolo.

12 Vale va vbwetago gu zundzwa khu vathu khavo va mi gurumedzago guhana wugwera.* Avo vo thava gu gira isoso khu gu thava gutshaniswa khu kotani ya Kristo.* 13 Kholu ambari vale va dzumeyago gu hana wugwera kha va landrisi nayo. Ganiolu, avo va gu vbweta gu khavo enu mu hana wugwera gasi avo va mana gudzikhusedza khu kotani nya givili gyanu. 14 Nyo lombeleya gu kheni eni gima nyi si dzi khusedzi nasiri basi khu kotani ya Pfhumu yathu Jesu Kristo, a gu uye a fudego avba nya simbo nya tshanisa. Gwangu, litigo li fude khu kotani yaye nigu ga litigo eni nyi fude khu kotani yaye. 15 Kholu egi nya lisima khandri wugwera, ne khandri gu mba hana wugwera; ganiolu egi nya lisima khu gu Nungungulu a gira muthu a khala nya muphya. 16 Gu na manege gurula ni wuhindzi ga vatshavbo va vbanyago khu nayo wowu, ina, ga Israyeli wa Nungungulu.

17 Gukhugeya olu kha nyi vbweti gu kheni ne ni moyo a nyi gireya sigaradzo kholu givilini gwangu nyi na ni sivanga khu gu ba nyiri githumi gya Kristo.

18 Vandruye, wuwadi nya wukhongolo wa Pfhumu yathu Jesu Kristo wu na manege ni liphuvbo mu li yeyedzago. Amen.