LIDANGALIYA LI HONGOLAGO GA VAEFESO

1 Eni Pawulo, mupostoli wa Kristo Jesu guya khu gugola ga Nungungulu, nyi ngu loveya va nya guaga va gu romo Efeso, va tumbegidego ni gu pwanana ni Kristo Jesu, kheni:

2 Nyi ngu mi suveya wuwadi nya wukhongolo ni gurula si tago khiyo ga Nungungulu, Papayi wathu, ni ga Pfhumu Jesu Kristo.

3 A na dhumiswe Nungungulu, Papayi wa Pfhumu yathu Jesu Kristo kholu, khu ndzadzini, uye a hi ningide makategwa yatshavbo khu gu thumisa liphuvbo laye kha nga hi gu vapizane va Kristo, 4 nigu a hi hathide na li si gu vangwi litigo gasi hi fana naye,* hi feya gu yeyedza lihaladzo hi bwe hi khala va nya guaga, nya mba na gihoso mbeli gwaye. 5 Uye a di si hungide gale gu khuye a na hi hatha gasi hi khala sanana saye khu ga Jesu Kristo guya khu gugola gwaye, 6 gasi wu dhumiswa wuwadi waye nya wukhongolo ngudzu a hi ningidego khu lihaladzo khu gu thumisa Gyanana gyaye. 7 Nigu khu gu thumisa igyo, ethu hi vbulugisidwe; hi divaledwe sighoho sathu khu kotani nya novba wagyo. Khu lisine wuwadi wa Nungungulu wukhongolo ngudzu.

8 Nungungulu a hi guhulede wuwadi waye nya wukhongolo ngudzu nigu a hi ningide guti gwatshavbo ni gupwisisa 9 khu gu hi tivegisa sihalo waye nya gugole gwaye. Sihalo wowo wa gu gimbileyana ni esi a nga ba a si vbweta, 10 a gu gu thumisa Kristo gasi gu hengeledza silo satshavbo ndzadzini ni mafuni. Tepo yi na vbeyago tepo a yi vegisidego, satshavbo si na hengeledzwa khu gu thumisa Kristo, 11 a gu wule hi pwananago naye ni oyu hi hodzago gumogo naye thomba. Isoso si hungidwe gale guya khu gugola ga wule a girago silo satshavbo guya khesi a si hungago guya khu gugola gwaye, 12 gasi gu ethu hi nga pheya khethu gu manega ni gutumba avba ga Kristo, hi zundza Nungungulu hi bwe hi mu dhumisa. 13 Ganiolu, enu nenu mu vegide gutumba avbo gwaye tepo mu ngapwa lisine, a gu mahungu nya yadi ma ganeyago khu guvbulugiswa gwanu. Hwane nya gu ba mu khodwe, Nungungulu khu gu thumisa uye a mi fungide khu liphuvbo nya guage a li tumbisidego. 14 Liphuvbo nya guage la gu fana ni gitumbiso gi yeyedzago gu khigyo hi na hakha esi Nungungulu a hi tumbisidego. Nungungulu giride esi gasi gu livba tengo nyo tshudzise vathu vaye, nigu esi si na mu reseya wuzundzo nya wukhongolo.

15 Khu gighelo gyogyo, eni neni gukhugeya nyi ngapwa na gu ganedwa khu gukhodwa gwanu avba ga Pfhumu Jesu ni lihaladzo mu li yeyedzago ga vatshavbo va nya guaga, 16 gima kha nyi digi gu bonga Nungungulu khu kotani yanu. Nyi ngu simama gu mi khumbuga milombeloni yangu, 17 gasi Nungungulu wa Pfhumu yathu Jesu Kristo, a gu Papayi nya wudhumo, a mi ningani liphuvbo nya wugengeyi ni gutuledwa gasi mu feya gu muti gwadi. 18 Nungungulu a ngu tula myonyo yanu gasi mu wona ni guti gutumba a mi ningago ni silo nya sadi si si fananiswigo ni simbe a tumbisidego va nya guaga 19 mu bwe muti tshivba yaye nya yikhongolo a yi yeyedzago ga ethu vakhodwa. Iyo ya gu yeyedzwa khu mithumo yi giridwego khu tshivba yaye nya yikhongolo ngudzu, 20 iyo a yi thumisidego tepo a nga wusa Kristo khu ga vafudego a ya khala khu nyamudye gwaye ndzadzini, 21 wulangani wu khugegidego ngudzu guvbindra ni wevbini mufumo, wufumu, tshivba, dzipfhumu ni ga levbini lina li ridwago, nasiri teponi yeyi* basi, ganiolu ni teponi yi tago. 22 Nigu Nungungulu vegide satshavbo vbavbatshi nya migondro ya Kristo a bwe a mu gira hungo vbatshani nya silo satshavbo si gimbileyanago ni libandla, 23 li gu givili gyaye; nigu uye a ngu li ninga satshavbo si vbwetegago.

2 Nigu Nungungulu a mi ningide womi ambari olu mu nga ba mu fude khu kotani nya sihoso sanu ni sighoho sanu, 2 esi mu nga ba mu gira gale khu gu landra mavbanyelo nya litigo* leli. Enu mu di gu fumedwa khu pfhumu yi fumeyago liphuvbo li sengedzeyago vathu, a gu liphuvbo lalimwedo li thumago ga vathu nya mba engisa. 3 Gale hatshavbo hi di gu vbanya guya khu gudogoreya nya givili gyathu nga avo, hi tadzisa gudogoreya nya givili ni gudogoreya nya mapimo yathu. Nigu khu tumbunugo ethu hi di gu yedwa khu zanga ya Nungungulu nga vambe. 4 Ganiolu, Nungungulu tade khu wuhindzi nigu khu kotani nya lihaladzo nya likhongolo a hi haladzidego khilo 5 a hi ningide womi gumogo ni Kristo. Ambari olu hi nga ba hi fude khu kotani nya sihoso sathu, enu mu vbulugisidwe khu kotani nya wuwadi nya wukhongolo ngudzu wa Nungungulu. 6 Nigu Nungungulu a hi wuside gumogo nanu a bwe a hi ninga malanga nyo khale ndzadzini kholu a hi pwananisidego ni Kristo Jesu, 7 gasi gu ga tepo yi tago,* uye a ta hi yeyedza wuwadi waye nya wukhongolo ngudzu khu gu hi gireya silo nya sadi ethu hi pwananago ni Kristo Jesu.

8 Khu kotani nya wuwadi nya wukhongolo ngudzu wa Nungungulu, enu mu vbulugisidwe khu kotani nya gukhodwe nigu isoso kha mwa si kodza khu mwabune; khu lisine, giningwa mu ningidwego khu Nungungulu. 9 Khandri handro nya mithumo yanu gasi gu si manegi ni moyo a na manago gighelo nya gu dzi khusedze. 10 Ethu hi mithumo nya mandza ya Nungungulu, nigu hi giridwe khu gu pwanana ni Kristo Jesu gasi hi gira mithumo nya yadi eyi Nungungulu a yi hungidego gale gasi hi gira.

11 Khu kharato, enu mu gu vanyamayigo khu mavelego, dundrugani gu khenu gale yoyo mu di gu ranwa gu pwani mu vathu nya mba hana wugwera khu vale va ranwago gu pwani vathu nyo hane wugwera, wugwera wowu wu girwago givilini khu mandza nya vathu. 12 Teponi yile enu kha mwa nga ba muti Kristo, mu di gu hambanisidwe ni litigo la Israyeli nigu kha mwa nga ba mu patega avba nya sidzumeledzwano nya gitumbiso; enu mu diri mwalo gutumba nigu kha mwa nga ba muti Nungungulu. 13 Ganiolu olu mu pwananago ni Kristo Jesu, enu mu nga ba muri hwindzo mu womo vbafuvbi khu kotani nya novba wa Kristo. 14 Kholu uye gurula gwathu, wule a giridego gu mitsawa mivili yi khala tsawa moyo a bwe a tshungunula muru wu nga ba wu romo vbakari, wu nga ba wu hambanisa mitsawa ya yivili. 15 Khu kotani nya muphaso nya givili gyaye, uye tshipiside milayo ni sileletelo si nga ba si romo omu nya Nayo wa Mosi gasi gu gira gu mitsawa ya mivili yi pwananago naye yi khala vathu nya vaphya* a bwe a gira gurula, 16 a bwe a tshanganisa khu guvbeleya mitsawa yeyi ya mivili ni Nungungulu yi khala givili gimwegyo khu gu thumisa simbo nya tshanisa* kholu uye songide wulala khu gu thumisa givili gyaye. 17 Nigu uye dzude a ta mi tshumayela mahungu nya yadi nya gurule enu mu nga ba muri hwindzo ni gu tshumayela gurula ga vale va nga ba vari vbafuvbi. 18 Kholu khu kotani yaye, ethu hatshavbo hi wumbago mitsawa ya mivili hi ngu gombeya ga Papayi a gomogo ndzadzini kha nga olu hatshavbo hi hakhidego liphuvbo lalimwedo.

19 Khu kharato, enu kha muri valombo nigu kha mu ngari valuveli, ganiolu mu na ni wusumbudwa wawumowo gu fana ni va nya guaga nigu mu sivbango nya ndranga ya Nungungulu, 20 nigu mu vbahidwe vbatshani nya gisekelo nya vapostoli ni vaprofeti nigu Kristo Jesu khuye giwindri nya gisekelo gya vbakhonatunu gyogyo. 21 Khu gu pwanana naye, nyumba yatshavbo ya gu khala tempele nya guage ya Jehovha, eyi sipandre satshavbo si tshanganisidwego gumogo si tiya. 22 Khu gu pwanana naye enu nenu mwa gu vbahwa gumogo gasi mu khala wulanga avbo li na khalago liphuvbo la Nungungulu.

3 Khu lisine eni Pawulo, nyi gu gibotshwa gya Kristo Jesu gasi gu phasega enu vanyamayigo . . . 2 Nyo pimisa gu kheni mu pwide gupwani nyi ningidwe thumo nya gu mi phase gasi mu phasega khu wuwadi nya wukhongolo ngudzu wa Nungungulu, 3 nigu Nungungulu a nyi tivegiside sihalo waye nyi mi lovedego maningano nawo khu guhumbisa. 4 Khu kharato tepo mu na lerigo mahungu yaya mu na si wona gu khenu nyi ngu pwisisa sihalo nya guage wa Kristo. 5 Ga mimela yi vbindridego, sihalo wowu kha wa tivegiswa ga sanana nya vathu nga edzi olu wu tivegisidwego khidzo khu liphuvbo nya guage ga vapostoli vaye va hathidwego ni vaprofeti. 6 Sihalo wakona khowu: Vale va sirigo Vajudha ganiolu va pwananago ni Kristo Jesu va na mana thomba eyi Kristo a yi manidego nigu va na khala givbango nya givili gimwegyo, va na hakha silo sasimweso Nungungulu a hi tumbisidego khu kotani nya mahungu nya yadi. 7 Nyi rumidwe gu mi phasa gu pwisisa sihalo wowu nya guage khu kotani nya giningwa nya mahala nya wuwadi nya wukhongolo ngudzu wa Nungungulu, owu a nga nyi ninga khu gu thumisa tshivba yaye.

8 Eni, nyi gu dugwana ngudzu ga va nya guaga vatshavbo, nyi ningidwe wuwadi wowu nya wukhongolo ngudzu wa Nungungulu gasi nyi tshumayela mahungu nya yadi ga vanyamayigo, ma ganeyago khu makategwa nya makhongolo ngudzu* ma tago khiyo ga Kristo, 9 ni gu gira gu vathu vatshavbo va wona edzi Nungungulu, a giridego silo satshavbo, a khathaleyago khidzo sihalo wowu waye wu nga ba wu sihade khu tepo nyo laphe. 10 Esi si di girega gasi gu olu wugengeyi wa Nungungulu, owu wu yeyedzwago khu dzindziya nyo hambane-hambane, wu tivegiswa ga mifumo ni wufumu si gomogo ndzadzini khu gu thumisa libandla. 11 Esi sa gu gimbileyana ni makungo nya gupindruge aya Nungungulu a dzi emisedego gu ma tadzisa khu gu thumisa Pfhumu yathu Kristo Jesu, 12 oyu khu kotani yaye hi ganeyago na hi tshulegide ni Nungungulu hi bwe hi mu hidzimeleya na hi tshulegide khu kotani nya gukhodwe gwathu avba ga Kristo. 13 Khu kharato, nyi ngu mi lombani gukheni mu si vbeyini tshivba khu kotani nya sigaradzo nyi emisanago naso khu kotani yanu kholu iso si na mi reseyani wuzundzo.

14 Khu kharato, nyi ngu khidzima mbeli ga Papayi, 15 oyu ndranga yatshavbo ya ndzadzini ni mafuni yi gomogo khu kotani yaye. 16 Nyo gombeleya gu kheni olu Nungungulu a gu khongolo ngudzu a thumise tshivba nya liphuvbo laye nya guage gasi gu tiyisa myonyo ni mapimo yanu. 17 Nigu nya gu gombeleya gambe gu kheni khu kotani nya gukhodwe gwanu, Kristo a khala myonyoni gwanu khu lihaladzo nigu nya gu dogoreya gambe gu kheni mu tiya gufana ni mikhamba nya simbo, mu tsitsa avba nya gisekelo, 18 gasi gu gumogo ni va nya guaga vatshavbo mu si kodza gu pwisisa gugula, gulapha,* gukhugega ni gueta nya silo nya liphuvbo, 19 ni gu bwe muti lihaladzo la Kristo, ilo li gu likhongolo ngudzu guvbindra guti, gasi mu feya gu mana satshavbo esi Nungungulu a ningago.

20 Nungungulu khu gu thumisa tshivba yaye eyi yi thumago gwathu, a ngu si kodza gu gira silo nya singi guvbindra satshavbo hi mu lombago mwendro hi si dundrugeyago. 21 Nigu vathu nya mimela yatshavbo va na mu ninge wudhumo kala gupindruga khu gu thumisa libandla ni Kristo Jesu. Amen.

4 Khu kharato, eni gibotshwa gya Pfhumu, nyi ngu lomba gu kheni mu vbanya khu ndziya yi yelanago ni egi mu nga ranedwa igyo, 2 khu gudzinogisa gwatshavbo, ni gurula, ni gulaphisa-monyo, na mu gu timiseyana khu gyanu khu lihaladzo. 3 Enu mu pwananisidwe khu liphuvbo nya guage, khu kharato dzi garadzeyeni gu pwanana ni gu vbanya khu gurula ni vambe. 4 Gu na ni givili gimwegyo ni liphuvbo limwedo kha nga olu gu gu na ni gutumba gumogo basi ogu mu ranedwego ugo; 5 gu na ni Pfhumu mweyo, gukhodwa gumogo ni bhabhatiso mowo; 6 nigu gu na ni Nungungulu moyo basi, a gu Papayi wa vatshavbo. Uye khongolo guvbindra vatshavbo, a gu thumeya vatshavbo nigu mithumo yaye nya tshivba yomo ga vatshavbo.

7 Moyo ni moyo wathu hakhide wuwadi nya wukhongolo ngudzu wu tago khiyo ga Nungungulu, nigu khu Kristo a hi ningidego giningwa gyogyo. 8 Milowo yari khiyo: “Tepo a gwedego ndzadzini a di dzega sibotshwa; uye ningide libandla vama va gu na ni makodzelo* nyo hambane-hambane.” 9 Khu kharato, ma gu thula ginani malito ma gu khayo “uye a gwede”? Ma gu thula gu khayo uye phede khu gu releya mafuni. 10 Oyu a reledego khuye wa moyo a gwedego vbatshani, ndzadzini gwatshavbo, gasi gu ya gira gu satshavbo si tadzisega.

11 Nigu hathide vambe gasi va khala vapostoli, vambe gasi va khala vaprofeti, vambe gasi va khala vatshumayeli, vambe gasi va khala vahavisi ni vahevbudzi, 12 gasi gu phasa va nya guaga gasi va gimbiya khu ndziya nya yadi, va thumeya libandla va feya gu tiyisa givili gya Kristo, 13 gasi vatshavbo va pwanana avba nya gukhodwe va bwe va giti gwadi Gyanana gya Nungungulu, va feya gu khala vathu va vidzidwego va manega ni makhalelo nyo fane ni aya ya Kristo. 14 Khu kharato, kha hi yeli gu khala sanana esi si legalegiswago khu sihevbudzo nya malipha nya vathu va sengago vambe, gu fana ni ngalava yi legalegiswago linene khu phuvbo ni mavimbi. 15 Ganiolu, hongoleni hi ganeya lisine, hongoleni hi dzumeleya lihaladzo li hi kutsa gu dandra siloni satshavbo hi kongoma Kristo, uye a gu hungo. 16 Khu kotani yaye, givili gyatshavbo gi ngu tshanganiswa nigu sivbango satshavbo nya givili si ngu thumisana gasi si gira esi si vbwetegago. Givbango ni givbango nya givili gya gu thuma gwadi, givili gyatshavbo gi na dandra na gi gu dzi vbaha khu lihaladzo.

17 Khu kharato, nyi ngu mi lombani khu lina la Pfhumu gu kheni mu nga simamini gu gimbiya nga edzi vanyamayigo va gimbiyago khidzo, va landrisa mapimo yawe nya mba phasa gilo. 18 Mapimo yawe momo gidemani nigu momo hwindzo ni womi wu lumbago Nungungulu kholu kha vati gilo khu kotani nya gu bange nya myonyo yawe. 19 Avo va luzide wuthu watshavbo va bwe va dzi bedzedzeya omu nya mavbanyelo nya dzitshoni,* va gira silo satshavbo nyo nyenyeze nya mba kodwa.

20 Ganiolu, enu mu hevbude nigu mu ngu dziti gu khenu Kristo mwalo mavbanyelo yoyo. 21 Khu lisine enu mu si pwide nigu mu hevbudzidwe khu Jesu guya khu lisine li gomogo gwaye. 22 Mu hevbudzidwe gu pwani mu yede gu tshula muthu wa gale oyu a gimbidzisanago ni mavbanyelo yanu ya gale, oyu a ghohwago khu gudogoreya gwaye nyo kanganyise. 23 Nigu simamani gu vbindrugedza mapimiselo yanu 24 mu bwe mu ambala muthu nya muphya, oyu a giridwego khu guya khu gugola ga Nungungulu khu gululama nya lisine ni gutumbega.

25 Khu kharato, kha nga olu mu digidego malipha, moyo ni moyo wanu a na ganeye lisine ga muthu-kwanu kholu hi sivbango si lumbago givili gimwegyo. 26 Mu nga zangari nyo bwe mu ghoha; mu nga pfodzisi lidambo na mu ngo zangaride. 27 Mu nga ningi wulanga Dhiyabhulosi. 28 Oyu a bago, a ngabi gambe; wulangani nya isoso, a na thume khu gudzigaradza a gira thumo nya wadi khu mandza yaye gasi a mana gilo nyo ninge vale va hamugago. 29 Gu nga dugi ni lito limwedo nyo nyenyeze* khu kanani gwanu, ganiolu gu na duge basi malito ma phasago guya khesi si vbwetegago gasi gu phasa ava va engiseyago. 30 Mu nga theyini wusiwana liphuvbo nya guage la Nungungulu, eli mu fungidwego khilo, gasi mu ta tshudziswa khu dzegiso la gu vboha litshigu nya guvbulugiswe.

31 Digani giviti gyatshavbo, ni zanga, ni likhulo, ni ligwaha, ni malito nya guvale ni wuvivbi watshavbo. 32 Ganiolu, gireyanani wuwadi, mu pweyana wusiwana, mu divaleyana khu monyo watshavbo kha nga Nungungulu a mi divaledego khu monyo watshavbo khu gu thumisa Kristo.

5 Kha nga olu mu gu sanana nya sigodwa, pimedzeyani Nungungulu. 2 Simamani gu yeyedza lihaladzo kha nga Kristo nuye a hi haladzidego a bwe a dzi ningeya khu kotani yathu nga ningelo ni muphaso nya gunungeye ga Nungungulu.

3 Wubhayi, gu mba handzega gwatshavbo ni wudogodogo ni gu khumbugwa si nga khumbugwi vbakari gwanu kholu isoso kha si faneyi ga vathu va agidego. 4 Khidzo saye ni mavbanyelo nya dzitshoni, mabhulo nya wupumbu, sithenga nya sihonohono, . . . silo sesi kha si faneyi . . . wulangani nya isoso bongani Nungungulu. 5 Enu mu ngu dziti nigu mu ngu pwisisa gwadi gu khenu ni wevbini a girago wubhayi, a gu na ni mavbanyelo nyo nyenyeze ni wudogodogo si thulago gu khozeya sifananiso kha na nga mana thomba nya Mufumo wa Kristo ni Nungungulu.

6 Mu nga dzumeleyini gu khenu ne ni moyo a mi kanganyisa khu malito nya mba phasa gilo, kholu khu kotani nya silo soso zanga ya Nungungulu yi na teya ava nya mba engisa. 7 Khu kharato, mu nga hengeyi ni vathu nya nga vovo. 8 Kholu gale yoyo mu diri gidema, ganiolu olu mu guwonegeya khu gu pwanana ni Pfhumu. Simamani gu gimbiya nga sanana nya guwonegeye, 9 kholu guwonegeya ga gu velega silo satshavbo nya sadi, gululama ni lisine. 10 Tepo yatshavbo dzi garadzeyeni guti esi si tsakisago Pfhumu. 11 Nigu gambe digani gu gira mithumo nya mba phasa gilo yi gimbidzisanago ni gidema, ganiolu yi yeyedzeni yi tidwa. 12 Kholu esi va girago gusihalani si ngu theyana dzitshoni ambari ni gu si ganeya. 13 Ganiolu satshavbo si tivegiswago, sa gu wonegiswa khu guwonegeya; kholu satshavbo si tivegiswago guwonegeya. 14 Khiso si girago gu ganedwa gu pwani: “Wuga uwe u ladego, wuga khu ga vafudego, nigu Kristo a na gu wenengedza.”

15 Khu kharato, dzi woneyeni gasi mu si gimbiyi nga sipumbu ganiolu nga vathu nya guti. 16 Thumisani gwadi tepo yanu khavba si kodzegago khavbo kholu matshigu ma vivbide. 17 Khu kharato, mu nga khalini sipumbu, ganiolu pwisisani esi Jehovha a si vbwetago. 18 Vbavbandze nya isoso, mu nga seyini vhinyu kala mu leva, kholu yi ngu gira gu muthu a manega ni mavbanyelo nyo vivbe,* ganiolu talani khu liphuvbo nya guage. 19 Tiyisanani* khu dzindzimo, mu dhumisa Nungungulu ni gu embeleya dzindzimo nya wukhozeyi. Mu embeleya khu myonyo yanu ga Jehovha. 20 Tepo yatshavbo bongani Nungungulu wathu a gu Papapyi khu kotani nya silo satshavbo khu lina la Pfhumu yathu Jesu Kristo.

21 Dzi vegeni vbavbatshi ga vambe khu kotani nya olu mu ningago githawo nya gikhongolo Kristo. 22 Enu vagadzi, dzi vegeni vbavbatshi ga vama vanu gu fana ni edzi mu girago khidzo Pfhumuni, 23 kholu mwama hungo wa mwangadzi waye kha nga Kristo nuye a gu hungo nya libandla ni muvbulugisi nya givili gegi. 24 Khu lisine, gu fana ni libandla li engisago Kristo, mwangadzi nuye yede gu engisa mwama waye siloni satshavbo. 25 Enu vama, simamani gu haladza vagadzi vanu gu fana ni Kristo nuye a haladzidego libandla a bwe a dzi ningeya khu kotani yalo, 26 gasi a li agisa a bwe a li handza khu lito la Nungungulu nga khatshi a gu li handza khu mati, 27 gasi gu libandla li wonega na li mburide mahoni gwaye, na liri mwalo noda ne mikonye mwendro silo nyo fane ni isoso, ganiolu na li agide na liri mwalo gisolo.

28 Khu ndziya nyo fane, vama navo gu vbwetega va haladza vagadzi vawe nga edzi va haladzago khidzo sivili sawe. Mwama a haladzago mwangadzi waye a ngu dzi haladza uye abune, 29 kholu mwalo muthu a nga nga nyenya givili gyaye, ganiolu a gu gi hodzisa a bwe a gi sayisa nga edzi Kristo a girago khidzo ga libandla, 30 kholu hi sivbango nya givili gyaye. 31 “Khu gighelo gyogyo, mwama a na tshiya papayi waye ni mamayi waye a ya patana ni mwangadzi waye, va vavili va khala nyama mweyo.” 32 Sihalo wowu nya guage wukhongolo. Nyo ganeya khu Kristo ni libandla. 33 Khu kharato, moyo ni moyo wanu a na haladze mwangadzi waye nga edzi a dzi haladzago khidzo uye mune, nigu nyamayi nuye gu vbwetega a ninga githawo nya gikhongolo mwama waye.

6 Enu sanana, engisani vavelegi vanu guya khu gugola ga Pfhumu,* kholu isoso si lulamide. 2 “Ninga githawo papayi wago ni mamayi wago.” Owu khuwo nayo nyo pheye wu gu ni gitumbiso gegi: 3 “Gasi gu silo si gu gimbileya gwadi u bwe u vbanya tepo nyo laphe mafuni.” 4 Enu vavelegi, mu nga goroseyi sanana sanu, ganiolu simamani gu si dandrisa ni gu si hevbudza guya khesi Jehovha a ganeyago.

5 Enu sithumi, engisani ava mu va thumeyago khu githawo nya gikhongolo ngudzu, khu monyo watshavbo, nga edzi mu engisago khidzo Kristo. 6 Mu nga girini isoso basi mwa gu ba mu wonwa, gasi gu tsakisa vathu, ganiolu thumani nga sithumi sa Kristo si girago gugola ga Nungungulu khu monyo watshavbo. 7 Thumani khu monyo watshavbo nga khatshi mwa gu thumeya Jehovha nasiri vathu, 8 kholu mu ngu dziti gu khenu Jehovha a na bweledzeya moyo ni moyo wuwadi watshavbo a na girago, gani githumi, gani muthu a tshulegidego. 9 Enu nenu mu thumedwago, simamani gu phara sithumi sanu khu ndziya yayimweyo, nya mba si thusedzeya, kholu mu ngu dziti gu khenu Pfhumu yanu a gu Pfhumu yaso niso yomo ndzadzini nigu yi mwalo gihatheya.

10 Khu gu hegisa, simamani gu tiyiswa Pfhumuni khu tshivba yaye nya yikhongolo. 11 Ambalani matshari yatshavbo mu ningwago khu Nungungulu gasi mu kodza gu tiya, mu dwana ni mano ya Dhiyabhulosi, 12 kholu hi womo litungani, ganiolu khandri litunga nya nyama ni novba; ha gu dwana ni madhimoni ma gomogo ndzadzini, ni mifumo ni dzipfhumu dzi fumago tigoni momu nya gidema. 13 Khu kharato, ambalani matshari yatshavbo mu ningwago khu Nungungulu gasi mu kodza gu tiya litshigu nya guwugedwe, ni gu hwane nya gu ba mu giride satshavbo mu simama na mu tiyide.

14 Khu kharato, simamani na mu tiyide, na mu ambade libhandri nya lisine li fasidwego gwadi giwununi gyanu; na mu ambade givhikelo nya khana nya gululame, 15 migondroni gwanu na mu ambade silato gasi mu donga gu tshumayela mahungu nya yadi nya gurule. 16 Nigu, pharani gitshangu nya gikhongolo nya gukhodwe gasi gu tshima matshari yatshavbo nya gu khondre matago khiyo ga Sathane. 17 Ambalani gambe gihugu nya guvbulugise, mu phara xipadha nya liphuvbo, a gu lito la Nungungulu. 18 Khu kharato, khalani na mu gengede, tepo yatshavbo mu gombeya, mu gombeleya va nyo aga vatshavbo. 19 Nyi gombeleyeni neni, gasi gu tepo nyi na tulago likana, nyi ningwa malito nyo ganeye na nyi tiyide tepo nyi tivegisago sihalo nya guage nya mahungu nya yadi. 20 Nungungulu khuye a nyi rumedego gasi gu ta tshumayela mahungu yaya nya yadi, khu kharato, nyi hungeledwe khu dzikorenti; nyi gombeleyeni ga Nungungulu gasi nyi kodza gu ganeya khu mahungu nya yadi nya mba thava gilo, kha nga si lombegago khidzo.

21 Ndriyathu nya gigodwa Tikiko, a gu githumi nyo tumbege Pfhumuni, a na ta mi embeya satshavbo maningano ni eni gumogo ni mawugelo yangu. 22 Khu kharato, nyi ngu mu rumeya gwanu gasi mu tati edzi hi gomogo khidzo ni gu bwe a tangadzisa myonyo yanu.

23 Vandriyangu, nyi ngu mi suveya gurula, ni lihaladzo ni gukhodwa si tago khiyo ga Nungungulu a gu Papayi, ni Pfhumu Jesu Kristo. 24 Vatshavbo va haladzago Pfhumu yathu Jesu Kristo khu lihaladzo nya mba vbeya, nyi ngu va suveya wuwadi nya wukhongolo ngudzu wa Nungungulu.