LIDANGALIYA LI HONGOLAGO GA VAFILIPI

1 Eni Pawulo ni Thimoti, sithumi sa Kristo Jesu, ha gu loveya va nya guaga vatshavbo va pwananago ni Kristo Jesu, avo va gomogo Filipi ni madhota, ni vaphasedzeyi nya libandla, khethu:

2 Hi ngu mi suveya wuwadi nya wukhongolo ngudzu wa Nungungulu ni gurula gu tago khiyo ga Nungungulu, Papayi wathu ni ga Pfhumu yathu Jesu Kristo.

3 Tepo yatshavbo nyi mi dundrugago nya gu bonga Nungungulu. 4 Tepo yatshavbo nyi gombeyago khenu mwatshavbo nya gu gira isoso khu gutsaka. 5 Nyo gira isoso kholu gukhugeya litshigu nyo pheye kala muhuno mu ngu wu seketeya thumo nya gu tshumayele mahungu nya yadi mu ma pwidego. 6 Nyi ngu tiyisega gu kheni Nungungulu a na vbedzisa thumo nya wadi a wu phedego gwanu, nigu wu na simama kala litshigu Kristo Jesu a na tago. 7 Si lulamide gu nyi pimisa kharato maningano nanu kha nga olu mu gomogo monyoni gwangu ni olu hi dzi buzago hatshavbo khu wuwadi nya wukhongolo ngudzu wa Nungungulu nigu mu nyi phasedzede tepo nyi nga ba nyi khothedwe ni tepo nyi nga ba nyi dwaneya gu kheni mahungu nya yadi ma tiyiswa guya khu nayo.

8 Nungungulu a ngu dziti gu khuye nyi ngu suva ngudzu gu ta mi wona. Lihaladzo nyi gu nalo khenu la gu fana ni lihaladzo eli Kristo Jesu a gu nalo khenu. 9 Nigu nyo simama gu gombeya gu kheni lihaladzo lanu li dandra khu tshivba ni tshivba gumogo ni guti nya lisine ni gupwisisa nyo ete. 10 Nyo gombeleya gu kheni mu vega gupima avba nya silo nya lisima ngudzu gasi mu si manegi ni gisolo mu bwe mu si tshunganisi vambe kala li vboha litshigu la Kristo. 11 Nyo gombeleya gambe gu kheni mu tala khu mihandro nya gululame yi tago khiyo ga Jesu Kristo, yi ningago wudhumo ni wuzundzo Nungungulu.

12 Vandriyangu, nyo vbweta gu kheni mu dziti gu khenu satshavbo si nga nyi dugeleya si nyi phaside gu andrisa ngudzu mahungu nya yadi 13 nigu Masotshwa yatshavbo ya Pfhumu ni vathu vatshavbo va dzitide gu khavo nyi khothedwe khu kotani nya olu nyi landreyago Kristo. 14 Gukhothedwa gwangu gu tiyiside vandruye nya vangi va thumeyago Pfhumu, nigu avo va yeyedzide gutiya nya gukhongolo gasi gu tshumayela mahungu ya Nungungulu nya mba thava gilo.

15 Lisine gu vambe va tshumayelago maningano ni Kristo va gu gira isoso khu lidiwo ni gu palisana, ganiolu vambe va gu tshumayela na vari ni makungo nya yadi. 16 Ava va gu tshumayela maningano ni Kristo khu lihaladzo kholu va ngu dziti gu khavo nyi hathidwe gasi gu emeya mahungu nya yadi. 17 Ganiolu, vale va tshumayelago khu mapimo nya mapalisana ni lidiwo va mwalo makungo nya yadi, nigu avo vo vbweta gu nyi gireya sigaradzo nari gu nyi khothedwe. 18 Khu wevbini handro va wu manago khu gu gira isoso? Gani va gu tshumayela khu ndziya nya gu pfhadzedzeye, gani va gu tshumayela khu ndziya nya lisine, Kristo a ngu huweledwa, nigu eni nyi ngu tsaka khu isoso nigu nyi na simama gu tsaka. 19 Kholu nyi ngu dziti gu kheni isoso si na nyi reseya guvbulugiswa khu kotani nya milombelo yanu ni gu phaswa khu liphuvbo nya guage eli Jesu Kristo a li thumisago. 20 Isoso sa gu pwanana ni gu suva gwangu ni gu vireya nyi gu nago nyo kheni nyi mwalo gighelo nyo khale dzitshoni. Nyi ngu tiyisega gu kheni nyi na si kodza gu simama gu ganeya na nyi tshulegide gasi nyi si kodza gu dhumisa Kristo olu, kha nga nyi girago tepo yatshavbo khu gu thumisa womi wangu mwendro gufa gwangu.

21 Kholu gwangu nya gu simama gu vbanya, nyo vbanyeya Kristo, ganiolu nya gufa nyi na phasega. 22 Ganiolu, nyo simama gu vbanya givilini gegi, sa gu thula gu khiso nyi ngo no simama gu thuma. Ambari ulolo, kha nyi dziti gu kheni nyi na hatha ginani. 23 Kha nyi dziti gu kheni nyi na hatha ginani ga esi sasivili. Ganiolu, nyo dogoreya gu tshudwa ga givili gegi nyi ya khala ni Kristo, kholu isoso si ngu phasa ngudzu. 24 Ganiolu, si ngu lombega gu khiso nyi simama gu vbanya givilini gegi khu kotani yanu. 25 Ganiolu, kha nga nyi tiyisegago khu silo sesi, nyi ngu dziti gu kheni nyi na simama nanu mwatshavbo gasi mu simama gu vidzwa ni gu tsaka gukhodwani. 26 Tepo nyi na wuyago gambe gwanu, gutumba gwanu ga Kristo Jesu gu na engedzeya khu kotani yangu.

27 Egi basi nyi gi vbwetago gwanu khu gu kheni mu vbanya khu gu gimbidzisana ni mahungu nya yadi ya Kristo gasi ambari nya gu ta mi wona, ambari nya gu mbata, nyipwa silo nya sadi maningano nanu, nyi bwe nyiti gu kheni mu ngo simama gu tiya khu liphuvboni khu makungo mamowo, na mu gu thuma mwatshavbo khu monyo moyo gasi gu andrisa gukhodwa gwanu avba nya mahungu nya yadi. 28 Gima mu nga dzumeyi gu thusedzedwa khu valala vanu. Gutiya-hwambo gwanu gu ngu fakaza gu khugo avo va na fuviswa nigu enu mu na vbulugiswa. Mahungu yaya ma guta khiyo ga Nungungulu. 29 Kholu enu mu hakhide lithomo nasiri basi khu gu ba mu khodwe iyo ga Kristo, ganiolu khu gu ba mu tshaniseka khu kotani yaye. 30 Enu mwa gu emisana ni sigaradzo sasimweso mu nyi wonidego na nyi emisana naso, a gu esi mu dzitigo gu khenu nyi ngo emisana naso kala olu.

2 Girani satshavbo mu si kodzago gasi gu tiyisa vambe ga Kristo, gu thaveleya vambe khu lihaladzo, mu vbanyisana, mu manega ni lihaladzo ni pweya-wusiwana. 2 Mwa gu gira isoso, eni nyi na tsaka ngudzu. Vbanyani khu gu pwanana, mu haladzana khu gyanu, mu pwanana mithumoni yatshavbo mu bwe mu manega ni mapimo yamamowo. 3 Mu nga girini gilo khu gu vbweta gu dzi khusedza mwendro khu mapalisana, ganiolu dzi nogiseni, mu wona vambe na vari vakhongolo* guvbindra enu. 4 Mu nga vbwetini esi si tsakisago enu basi, ganiolu vbwetani ni esi si tsakisago vambe.

5 Manegani ni mapimo yamamowo nya nga aya Kristo Jesu a manegidego nawo. 6 Ambari olu a nga ba a fana ni Nungungulu, Jesu kha pimisa gu wandra wufumu wa Nungungulu khu gu vbweta gu dzi dinganisa naye. 7 Ganiolu, uye digide satshavbo a nga ba ari naso, a dzumeya gu khala gumbi a bwe a khala muthu nya nyama. 8 Guvbindra isoso, tepo a dzudego nga muthu, uye a di dzi nogisa a engisa kala a yafa khu gu songwa vbasimbotunu nya tshanisa. 9 Khu kotani nya isoso, Nungungulu mu khusedzide a mu ninga gikhalo nyo khugege, a mu ninga lina li gomogo vbatshani nya malina yatshavbo. 10 Nungungulu giride isoso gasi vathu vatshavbo va ninga wuzundzo lina la Jesu, avo va gomogo ndzadzini, mafuni ni avo va gomogo vbavbatshi nya mafu. 11 Nigu gasi malimi yatshavbo ma ganeya guagani gu khayo Jesu Kristo Pfhumu gasi gu dhumisa Nungungulu, Papayi.

12 Khu kharato sigodwa sangu, kha nga olu mu engisidego nasiri basi tepo nyi nga ba nyiri iyoyo nanu, ganiolu ni olu nyi gu mwalo iyoyo nanu, simamani gu thumeya guvbulugiswa gwanu khu githawo nya gikhongolo ni guthava. 13 Nungungulu khuye a mi ningago tshivba gasi mu kodza gu mu tsakisa khu guvbeleya. Uye a ngu mi ninga gudogoreya ni tshivba nya gu gire isoso. 14 Girani silo satshavbo nya mba ngurangura mwendro gu ganedzisana, 15 gasi mi khala sanana sa Nungungulu si gu mwalo gisolo mwendro nandru. Mwa gu simama na muri mwalo nandru mu na wenengedza nga dzikandriya dzi wenengedzago mafuni, ambari olu mu vbanyago vbakari nya vathu va girago silo nyo vivbe. 16 Phareleyani si tiya avba nya lito nya womi. Mwa gu gira isoso nyi na manega ni sighelo nyo tsake litshigoni la Kristo khu gu dziti gu kheni thumo wangu nya gu dzi garadze kha wa khala wa mahala. 17 Ambari nyo guhudwa nga ningelo nya vhinyu, eni nyo phasedzeya thumo nyo hathege mu girago ni thumo wanu nyo tumbege ga Nungungulu. Khu kharato, nyi ngu tsaka khenu mwatshavbo. 18 Nigu nyi ngu mi kutsa nenu gu tsaka ni eni.

19 Nyo vireya gu kheni Pfhumu Jesu a nyi dzumeleya gu khuye nyi mi rumeleyani Thimoti nya mba hweya, gasi nyi ta tiyiswa khesi a na wuyago a ta ganeya maningano ni enu. 20 Nyi mwalo mumbe nyo fane naye* a na mi khathaleyago gwadi. 21 Kholu ava vambe vatshavbo va gu dwaneya basi esi si tsakisago avo vamune nasiri esi si tsakisago Jesu Kristo. 22 Ganiolu, enu mu ngu dziti gu khenu Thimoti yeyedzide gudzigaradza gwaye. Uye thumide ni eni nga gyanana gi thumago ni papayi wagyo. Uye a gu thuma khu gu dzi garadza ni eni gasi gu huweleya mahungu nya yadi. 23 Khuye nyi vireyago gu mu rumeya gwanu nyo tugula egi gi na nyi dugeleyago. 24 Khu lisine, eni nyi ngu tiyisega gu kheni Pfhumu yi na nyi dzumeleya gu ta mi wona nya mba hweya.

25 Ganiolu, olu nyo vbweta gu mi rumeleya Epafrodhito a gu ndriyangu, githumi-khwathu ni lisotshwa-khwathu; a gu uye mu mu rumedego gasi gu ta nyi phasedzeya. 26 Uye a gu vbweta gu ta mi wona enu mwatshavbo nigu uye a ngu garadzega kholu mu pwidego mahungu nya gupwani a di gu dwala. 27 Khu lisine, uye dwade nya gu hadze gufa, ganiolu Nungungulu mu yeyedzide wuhindzi nigu a nyi yeyedzide wuhindzi neni gasi si si engedzeyi sigaradzo vbatshani nya esi nyi gu naso. 28 Nyi na mu rumeya khu guvbiredza ngudzu gasi tepo mu na mu wonago mu tsaka, khavbovbo aneni nyi si garadzegi ngudzu khu kotani yanu. 29 Khu kharato, mu hakheni khu mandza mavili nga ndriyathu Pfhumuni. Simamani gu ningani lisima vama nya nga uye. 30 Uye a di hadzi gufa khu kotani nya thumo wa Kristo nigu vegide womi waye mhangoni khu kotani yangu, kha nga olu enu mu gu mwalo eno gasi gu nyi phasedzeya.

3 Khu guhegisa, vandriyangu, simamani gu tsaka kha nga valandreyi va Pfhumu. Gwangu khandri gigaradzo gu mi loveyani gambe silo sasimweso, kholu iso sa gu gireya gu mi phasa.

2 Dzi woneyeni ga vale va vbanyago nga dzimbwa, dzi woneyeni ga vale va girago guvivba basi, dzi woneyeni ga vale va piyago gipandre nya givili.* 3 Kholu, ethu hi na ni wugwera nya lisine kholu ha gu thumeya Nungungulu khu gu gimbidziswa khu liphuvbo laye, ethu hi gu mba tumba dzitshivba dzathu mwendro makhalelo yathu, ganiolu hi tumba Kristo Jesu, 4 ambari olu eni nyi gu na ni sighelo nya gu dzi khusedze, guvbindra vatshavbo.

A gu ba a romo a pimisago gu khuye na ni sighelo nyo dzi tumbe, eni nyi ngu mu pala kholu: 5 nyi hanisidwe wugwera khu litshigu nya wu 8, nyi Muisrayeli wa lihundzu la Bhejami, nyi Muhebheru a velegidwego khu Vahebheru nigu tepo nyi nga ba nyiri Mufarisi nyi di gu landrisa gwadi nayo. 6 Khu kotani nya sighingi nyi nga ba nyiri naso, nyi tshaniside libandla, nyi di gu vbanya nya mba na gihoso khu gu landrisa gwadi nayo. 7 Ambari ulolo, silo nyi nga ba nyi si wona nari sa lisima gwangu, olu nyi si digide* khu kotani ya Kristo. 8 Khu lisine, satshavbo nya gu si wona na si si phasi gilo nya gu si fananisa ni guti nyo khugege ga Kristo Jesu, Pfhumu yangu. Nyi digide satshavbo nigu satshavbo nya gu si wona nga ndzilo khu kotani ya Kristo, 9 ni gu bwe nyi pwanana naye. Khandri nya gu dzi wona na nyi lulamide khu kotani nya olu nyi landrisago gwadi Nayo, ganiolu khu kotani nya olu nyi gu na ni gukhodwa avba ga Kristo. Gululama gogu ga guta khiyo ga Nungungulu nigu ga gu dzi seketeya avba nya gukhodwe. 10 Egi nyi gi vbwetago, khu guti Kristo ni tshivba nya gu wuswe gwaye ni gu hengeya naye gutshanisekani gwaye nigu nyi dzi emisede gufa nga edzi a fudego khidzo uye. 11 Nyo gira isoso na nyi gu vireya guwuswa nya gupheye khu ga vafudego.

12 Nyi si gu hakhi tshatshazelo wowu nigu nyi si gu khali muthu nyo vbeleye, ganiolu nyo gira satshavbo esi nyi si kodzago gasi gu mana silo esi Kristo Jesu a nyi hathedego iso. 13 Vandruye, kha nyi dzi woni na nyi gu hakhide gihiwa, ganiolu lisine, kheli: Nya gu divala esi nyi si tshidego hwane nyi nameya gasi gu mana esi si gomogo mbeli. 14 Nya gu gira satshavbo nyi si kodzago gasi gu mana gihiwa nya gu ranwe ndzadzini khu Nungungulu khu gu thumisa Kristo Jesu. 15 Khu kharato, hatshavbo hi vidzidwego gu vbwetega hi dzi emiseya gu gira sasimweso. A gu tshuka muthu nyo khaguri a pimisa khu ndziya nya gu hambane, Nungungulu a na mi yeyedza mapimiselo nya yadi. 16 Ni gwevbini gutshunguhedza hi gu giridego hongoleni hi simamani gu gimbiya ndziyani yoyo.

17 Vandruye, mwatshavo gu vbwetega mu nyi pimedzeya nigu simamani gu khedziseya vale va landreyago giyeyedzo hi mi ningidego. 18 Vangi va dzi girago valala nya simbo nya tshanisa wa Kristo. Nyi ganede ngudzu khavo, ganiolu olu nyo ganeya gambe khavo na nyi gu liya. 19 Mahegiso yawe khu gufuviswa nigu nungungulu wawe khu gudogoreya gwawe, avo va gu dzi khusedza khu silo nya dzitshoni va girago, avo va gu pimisa basi khu silo sa mafuni. 20 Ganiolu, wusumbudwa* wathu khwa ndzadzini, ha gu vireya khu maho nyo fuviye muvbulugisi a tago khu ndzadzini, Pfhumu Jesu Kristo. 21 Uye a na vbindrugedza givili gyathu nya gudzinogise gasi gi manega ni wudhumo gufana ni givili gyaye, uye a na thumisa tshivba yaye nya yikhongolo gasi gu gira isoso, a gu tsivba yayimweyo a yi thumisago gasi gu woneleya silo satshavbo.

4 Vandriyangu nyi mi golago ngudzu nyi suvago gu mi wona, enu mu gu tsaka gwangu nigu mwa gu fana ni korowa gwangu. Sigodwa sangu, nyi ngu mi kutsa gu simama na mu tumbegide Pfhumuni.

2 Nyi ngu kutsa Evhodhiya ni Sintiki gu kheni va lulamisa sigaradzo va gu naso kha nga olu va gu valandreyi va Pfhumu. 3 Nyi ngu gu lomba uwe, githumi khwathu, gu kheni u simama gu phasa vanyamayi vava va dzi garadzeyago gu thuma ni eni gasi gu huweleya mahungu nya yadi ni Klementi ni vatshavbo va thumago gumogo ni eni, ava malina yawe ma gomogo libhukuni nya womi.

4 Tepo yatshavbo tsakani ga Pfhumu. Nyi ngu ganeya gambe kheni: Tsakani! 5 Vathu vatshavbo gu vbwetega va wona gu khavo enu kha mwa banga mihungu. Pfhumu womo vbafuvbi. 6 Mu nga garadzegi khu gilo, wulangani nya isoso, tepo yatshavbo gombeyani ga Nungungulu mu mu lomba gu khenu a mi thangeya ga satshavbo mu girago, nigu mu bongeni tepo yatshavbo. 7 Mwa gu gira isoso, gurula ga Nungungulu, gu vbindrago gupwisisa gwatshavbo, gu na sayisa myonyo yanu ni mapimo yanu kha nga valandreyi va Kristo Jesu.

8 Khu gu hegisa vandruye, vegani gupima gwanu avba nya silo si gu lisine, silo si gu na ni lisima, silo si lulamidego, silo si agidego, silo si zundzegago, silo si ganedwago gwadi khiso, silo nya sadi ni silo si na tsakisago Nungungulu. 9 Landreyani gwadi esi mu hevbudego, esi mu si dzumedego, esi mu si pwidego ni esi mu si wonidego gwangu. Khu kharato, Nungungulu nya gurule a na ba ari ni enu.

10 Nyi ngu tsaka ngudzu nyi bwe nyi bonga Pfhumu khu gu ba enu mu yeyedzide gambe gugaradzega gwanu kheni. Ambari olu mu nga ba mu garadzega kheni tepo yatshavbo mu diri mwalo lithomo nya gu si yeyedze. 11 Khandri khatshi nyo ganeya silo sesi khu gu hamuga gilogyo. Nyi hevbude gu eneledwa ni ga gevbini giemo. 12 Eni nyi ngu kodza gu vbanya khu silo nya sidugwana nigu nyi ngu kodza gambe gu vbanya khu silo nya singi. Ga satshavbo siemo nyi hevbude gu khala na nyi khuride ni gu khala ni ndzala, nyi hevbude gu manega ni silo nya singi ni gu hamuga gilo. 13 Nyi ngu kodza* gu gira silo satshavbo khu kotani ya Nungungulu a nyi ningago tshivba.

14 Ambari ulolo, mu giride gwadi khu gu nyi phasedzeya musigaradzoni gwangu. 15 Khu lisine, enu Vafilipi mu ngu dziti gu khenu tepo nyi khugidego khu Makedhoniya, hwane nya gu ba mu pwide mahungu nya yadi khu tepo nyo pheye, libandla lanu khilo basi li nga nyi phasedzeya. 16 Tepo nyi nga ba nyiri Tesalonika, mu nyi rumelede silo nyi nga ba nyi si vbweta, nasiri gumogo ganiolu guvili. 17 Khandri nyo vbwetedzeya gu ningwa silo, ganiolu nyo vbweta gu kheni mu mana tshatshazelo wu manwago khu kotani nya wuhindzi. 18 Eni nyi na ni satshavbo nyi si vbwetago ni guvbindra. Nyi na ni satshavbo nyi si vbwetago hwane nya gu ba nyi hakhide esi mu nga nyi rumeleya khu gu thumisa Epafrodhito. Esi mu nyi rumedego sa gu fana ni muphaso nyo nungeye wu tsakisago Nungungulu. 19 Nungungulu wangu, a gu na ni dzithomba nya dzingi, a na mi ningani satshavbo mu si vbwetago khu gu thumisa Kristo Jesu. 20 Nungungulu wathu a gu Papayi, gu vbwetega a ningwa wudhumo kala gupindruga ni gupindruga. Amen.

21 Losedzeyani vatshavbo va nya guaga va Nungungulu, ava va lumbago Kristo Jesu. Vandruye va gu na ni eni va ngu mi losedzeya. 22 Vatshavbo va nya guaga ngudzu-ngudzu ava va gomogo ndrangani ga Sezari va ngu mi losedzeya.

23 Wuwadi nya wukhongolo ngudzu wa Pfhumu Jesu Kristo wu na manege ni enu tepo mu yeyedzago liphuvbo nya ladi.