LIDANGALIYA LI HONGOLAGO GA VAKOLOSI

1 Eni Pawulo, mupostoli wa Kristo Jesu, guya khu gugola ga Nungungulu, ni ndriyathu Thimoti, 2 nyi ngu loveya va nya guaga ni vandriyathu nyo tumbege va pwananago ni Kristo tigoni ga Kolosi, gu kheni:

Nyi ngu mi suveyani wuwadi nya wukhongolo ngudzu wa Nungungulu ni gurula gu tago khiyo ga Nungungulu, Papayi wathu.

3 Tepo yatshavbo hi ngu bonga Nungungulu, a gu Papayi wa Pfhumu yathu Jesu Kristo tepo hi gombeyago khenu. 4 Kholu hi pwide maningano ni gukhodwa mu gu nago avba ga Kristo Jesu ni lihaladzo mu gu nalo khu vatshavbo va nya guaga, 5 khu kotani nya gutumba mu vegedwego ndzadzini. Enu mu pwide na gu ganedwa khu gutumba gogu tepo mu nga embedwa lisine, a gu mahungu nya yadi. 6 Mahungu yaya nya yadi mu embedwego, ma gu velega mihandro nigu ma ngu engedzeya mafuni gwatshavbo. Sasimweso si ngu girega gwanu gukhugeya litshigu mu ngati lisine nya wuwadi nya wukhongolo ngudzu wa Nungungulu. 7 Isoso khiso mu si hevbudego ga githumi-khwathu Epafrasi, oyu a gu mutshumayeli nyo tumbege wa Kristo a tshikedzago wulanga wathu vbakari gwanu. 8 Uye a hi embede gambe gu khuye liphuvbo nya guage li ngu mi phasa gu yeyedza lihaladzo.

9 Khigyo gambe gighelo gyogyo gi giridego gu gukhugeya litshigu hi ngapwa isoso hi simama gu gombeya khu kotani yanu, hi lomba gu khethu mu tala khu guti nya lisine nya gugole ga Nungungulu ni wugengeyi watshavbo ni gupwisisa hi ningwago khu liphuvbo la Nungungulu, 10 gasi mu gimbiya khu ndziya yi tsakisago Jehovha, mu kodza gu mu tsakisa mithumoni yanu yatshavbo tepo mu simamago gu ninga mihandro nya mithumo yatshavbo nya yadi ni gu engedzeya guti nya lisine la Nungungulu. 11 Hi ngu lombeleya gambe gu khethu mu tiyiswa khu tshivba yatshavbo guya khu tshivba yaye nya yikhongolo gasi mu kodza gu timiseya khu gulaphisa-monyo ni gutsaka 12 mu bwe mu bonga Nungungulu, Papayi, kholu a mi dongisede gasi mu hakha thomba. Thomba yoyo yo lumba va nya guaga va gomogo guwonegeyani.

13 Uye hi vbulugiside ga tshivba nya gidema a hi yisa mufumoni wa Gyanana gyaye nyo golege. 14 Kholu khu kotani nya Gyanana gyaye ethu hi manide gutshudziswa, nigu khu kotani nya dzegiso hi ngu divaledwa sighoho sathu. 15 Uye khuye gifananiso gya Nungungulu a si wonegigo, matewula nya sivangwa satshavbo. 16 Silo satshavbo sa ndzadzini ni mafuni si vangidwe khu gu thumiswa uye: silo si wonegago, silo si si wonegigo, dzipfhumu, vale va gu na ni wufumu, mifumo ni dzitshivba. Silo satshavbo si giridwe khu gu thumiswa uye nigu si giredwe uye. 17 Phede khuye a vangwa na si si gu vangwi silo satshavbo, nigu silo satshavbo si vangidwe khu gu thumiswa uye. 18 Uye khuye hungo nya givili, givili gyogyo a gu libandla. Uye khuye maphelo nigu matewula, a gu uye nyo pheye gu wuswa khu ga vafudego, gasi a khala uye nyo pheye siloni satshavbo. 19 Nungungulu tsakisidwe khu gu gira satshavbo si vbeleya avbo gwaye. 20 Nigu khu gu thumisa novba wa Kristo wu vbalagidego avba nya simbo nya tshanisa, Nungungulu a gu gira satshavbo silo, ndzadzini ni mafuni, si pwanana naye.

21 Khu lisine, enu mu nga ba muri hwindzo ni Nungungulu, mu nga ba muri valala vaye kholu mu nga ba mu vega gupima avba nya mithumo nyo vivbe, 22 uye a mi giride mu pwanana naye khu gu thumisa givili nya nyama gya wule a fudego gasi a mi emisa mbeli gwaye, na mu agide, na muri mwalo gisolo ambari nandru nya gilo, 23 mwa nga nga simama ni gukhodwa na mu tiyide, mu si ndreyiswi avba nya gutumbe gwanu nya mahungu nya yadi mu ma pwidego, aya ma tshumayedwego ga sivangwa satshavbo mafuni.* Eni Pawulo nyi khade mutshumayeli nya mahungu yaya nya yadi.

24 Eni nyi ngu tsaka ambari olu nyi tshanisekago khu kotani yanu. Gutshaniseka gogu nyi emisanago nago kha nga givbango nya givili gya Kristo gu yede gu simama. Ugo gu na phasa givili gya Kristo, a gu libandla. 25 Eni nya gu thumeya vathu va Nungungulu kholu Nungungulu a nyi emiside gasi gu gira thumo wowu, nigu uwo wo gireya gu phasa enu. Khu kharato, nyo tshumayela lito la Nungungulu ga vatshavbo nyi si kodzago, 26 ina, nya gu tshumayela sihalo nya guage. Sihalo wowu kha wa nga ba wu tidwa khu litigo ni vathu va vbanyidego gale, ganiolu olu sihalo wowu wu ngu tivegiswa ga va nya guaga vaye. 27 Nungungulu tsakisidwe khu gu tivegisa ga va nya guaga sihalo waye, sihalo wowu nya gu samadzise thomba vbakari ga vanyamayigo. Sihalo wowu nya guage khu gu Kristo a pwanana ni enu, a gu gutumba nyo beye wudhumoni gwaye. 28 Nigu ha gu tshumayela maningano naye na hi gu gengedza vatshavbo, na hi gu va hevbudza khu gu thumisa wugengeyi watshavbo gasi hi bikeya vathu vatshavbo ga Nungungulu nga vathu va vbeledego va pwananago ni Kristo. 29 Khigyo gighelo gyogyo gi girago gu nyi thuma khu gu dzi garadza khu gu thumisa tshivba nyi ningwago khuye.

2 Nya gu vbweta gu kheni mu dziti gu khenu nyi ngu dwana nyimbi nya yikhongolo ngudzu khu kotani yanu ni ya ava va gomogo Lawodhikeya ni vatshavbo vale va nga si nyi wonigo. 2 Nyo vbweta gu kheni myonyo yawe yi thaveledwa nigu nyo vbweta gambe gu kheni va pwanana lihaladzoni va bwe va mana dzithomba dzatshavbo dzi manwago khu gu ba va tiyisega avba nya esi va si pwisisago, gasi va mana guti nya lisine nya sihalo nya guage, a gu Kristo, 3 oyu dzithomba dzatshavbo nya wugengeyi ni guti dzi sihidwego gwaye. 4 Nyo ganeya isoso gasi gu si manegi ni muthu a mi kanganyisago khu malito nyo sengedzeye. 5 Ambari olu nyi gu mwalo nanu khu givili, nyi nanu khu liphuvbo. Nyi ngu tsaka tepo nyi wonago mithumo yanu nya yadi ni gu wona gu tiya nya gukhodwe gwanu avbo ga Kristo.

6 Khu kharato, kha nga olu mu dzumedego Kristo Jesu, Pfhumu, simamani gu pwanana naye, 7 mu tsitsa gwadi mikhamba, mu vbahwa gwaye mu bwe mu tiya gukhodwani kha nga mu hevbudzidwego; mu bonga ngudzu Nungungulu.

8 Dzi woneyeni gasi ne ni moyo a si mi giri dzigumbi khu gu thumisa dzifilozofiya ni sihevbudzo nya malipha, iso si seketedwago avba nya sihena nya vathu ni avba nya silo si gomogo mafuni nasiri avba ga Kristo. 9 Kholu yatshavbo makhalelo ya Nungungulu momo avbo ga Kristo. 10 Enu mu manide silo satshavbo khu kotani yaye, a gu uye a gu hungo nya mufumo watshavbo ni tshivba yatshavbo. 11 Khu kotani nya wupari mu gu nawo naye, enu mu hanisidwe wugwera. Wugwera wu nga mba girwa khu vathu, ganiolu wu giridwego khu gu enu mu tshula givili nya nyama khu gu thumisa wugwera wu lumbago Kristo. 12 Enu mu dzingidwe gumogo naye avba nya gubhabhatiswe gwaye, nigu khu kotani nya olu mu gu na ni wupari naye ni kotani nya gukhodwe gwanu avba nya silo esi Nungungulu a si giridego khu tshivba yaye, enu mu wusidwe gumogo naye. Khu lisine, Nungungulu mu wuside khu ga vafudego.

13 Nigu ambari olu mu nga ba mu fude khu kotani nya sighoho sanu ni kotani nya olu mu nga ba mwa sa hana wugwera givilini, Nungungulu mi ningide womi naye. Uye a hi divalede khu wuhindzi sihoso sathu satshavbo 14 a bwe a futa lidangaliya li nga ba li lovidwe, li nga ba liri ni milayo, li nga ba li hi wugeya. Nigu uye li duside khu gu a li khokhotheya avba nya simbo nya tshanisa.* 15 Khu gu thumisa simbo nya tshanisa, uye pade mifumo ni dzitshivba a bwe a si gira dzigumbi ni gu si tshonegisa vathuni gasi gu yeyedza gu khuye a si pade.

16 Khu kharato, mu nga digi muthu a mi lamula khu kotani nya esi mu hodzago ni esi mu seyago mwendro khu gu ba mu gira dzifesta dzi girwago mwaga ni mwaga, dzifesta nya gu wonege nya ngima mwendro nya Sabhadho. 17 Silo sesi mutsa nya esi si na tago, ganiolu iso sa gu tadzisega ga Kristo. 18 Mu nga dzumeleyini muthu a yeyedzago gudzinogisa nyo pfhadzedzeye, a khozeyago dzingilozi, a bangeleyago avba nya esi a si wonidego ni gu dzi khusedza khu sihevbudzo nya malipha, a mi segeya gu mana tshatshazelo. 19 Muthu yoyo kha phareleyi si tiya ga oyu a gu hungo, a gu wule givili gyaye gi sayiswago khuye gi bwe gi tshanganiswa gumogo khu matshanganoni nya sivbango, gi dandra khu tshivba ya Nungungulu.

20 Mwa gu ba mu fude gumogo ni Kristo avba nya mawonelo nya litigo, khu ginani mu simamago gu vbanya nga khatshi mwendro mo gira gipandre nya litigo mu bwe mu engisa milayo yeyi nya litigo: 21 “U nga phari, u nga lingi, u nga kuhi.” 22 Milayo yeyi yi konedwe gu fuviswa nigu iyo sileletelo ni sihevbudzo nya vathu. 23 Ambari olu milayo yoyo yi wonegago gu khatshi wugengeyi, iyo sihena nya wukhongeyi si hathidwego khu vathu nigu ya gu yeyedza gudzinogisa nyo pfhadzedzeye. Iyo ya gu tshanisa givili, ganiolu kha yi si kodzi gu dwana ni gudogoreya nya nyama.

3 Mwa gu ba mu wusidwe gumogo ni Kristo, simamani gu vbweta silo sa vbatshani, iyo Kristo a khadego khu nyamudye ga Nungungulu. 2 Vegani mapimo yanu avba nya silo sa vbatshani, nasiri avba nya silo sa mafuni. 3 Enu mu fude, nigu womi wanu wu sihidwe gumogo ni Kristo khu gu pwanana ni Nungungulu. 4 Tepo Kristo, a gu womi wathu, a na wonegiswago, anenu mu na wonegiswa naye khu wudhumu.

5 Khu kharato, songani gudogoreya nya sivbango nya givili gyanu, a gu wubhayi,* gu mba handzega, gudogoreya nyo nyenyeze,* gudogoreya nyo gire silo nyo vivbe, wudogodogo, a gu idzo saye ni gu khozeya sifananiso. 6 Nungungulu a na goroga khu kotani nya vathu va girago silo soso. 7 Gale anenu mu di gu vbanya kharato. 8 Ganiolu olu mu yede gu diga satshavbo sesi: Dzizanga, likhulu, wuvivbi, malito nya gu vale ni dzitshamba. 9 Mu nga lipheyani. Tshulani muthu wa gale ni mithumo yaye. 10 Ambalani muthu-muphya, oyu a wusedzwago khu guti nya lisine guya khu gifananiso gya Oyu a mu giridego. 11 Gwaye gu mwalo Mugreki, ne Mujudha, ne muthu a hanidego wugwera,* ne muthu a nga mba hana wugwera, ne muluveli,* ne muthu a tago khu khabini,* ne gumbi mwendro muthu a tshulegidego; ganiolu Kristo silo satshavbo nigu womo avba nya vathu vatshavbo.

12 Olu mu hathidwego khu Nungungulu, mu agidego ni gu godwa, ambalani pweya-wusiwana, wuwadi, gudzinogisa, gurula ni gulaphisa-monyo. 13 Simamani gu laphiseyana monyo mu bwe mu divaleyana khu monyo watshavbo, ambari muthu a gu ba ari ni gighelo nya gu sole mumbe, gu fana ni Jehovha a mi divaledego khu monyo watshavbo; anenu girani sasimweso. 14 Nigu gu vbindra satshavbo sesi, ambalani lihaladzo, kholu ilo la gu gira gu vathu vatshavbo va pwanana khu gu vbeleya.

15 Ni gu gambe, dzumeyani gu khenu gurula ga Kristo gu fuma myonyoni gwanu, kholu enu mu ranedwe gurula gogo, gasi mu ta khala givili gimwegyo. Yeyedzani gu khenu mu vathu nya gu bonge. 16 Lito la Kristo li na khale nanu khu guvbeleya li bwe li mi gengedza. Simamani gu hevbudza ni gu tiyisana khu dzindzimo, khu gu dhumisa Nungungulu, khu dzindzimo dza liphuvboni dzi embwago khu gubonga, mu embeleya khu myonyo yanu* ga Jehovha. 17 Ni gevbini mu girago, khu malito mwendro khu mithumo, girani khu lina la Pfhumu Jesu, na mu gu bonga Nungungulu, a gu Papayi, khu gu thumisa uye.

18 Vagadzi, dzi nogiseni ga vama vanu, kha nga si fanedego Pfhumuni. 19 Enu vama, simamani gu haladza vagadzi vanu, mu nga va zangareyi. 20 Enu sanana, engisani vavelegi vanu siloni satshavbo, kholu isoso si ngu tsakisa Pfhumu. 21 Enu vavelegi, mu nga goroseyi sanana sanu, gasi si si vbeyi tshivba. 22 Enu sithumi, engisani siloni satshavbo vale mu va thumeyago. Mu nga girini basi isoso mwa gu ba mu wonwa, khu gu feya gu tsakisa vathu, ganiolu si gireni khu monyo watshavbo, khu gu thava Jehovha. 23 Ni gevbini mu girago, gi gireni khu monyo watshavbo nga khatshi mo gireya Jehovha, nasiri vathu, 24 kholu mu ngu dziti gu khenu khu Jehovha a na mi ningago thomba gasi yi khala tshatshazelo wanu. Thumeyani Pfhumu yanu, a gu Kristo. 25 Khu lisine, uye a girago wuvivbi, a na tshatshazedwa guya khu wuvivbi a giridego, nigu Nungungulu mwalo gihatheya.

4 Enu vamune sithumi, pharani gwadi sithumi sanu khu gululama, na mu dundruga gu khenu anenu mu na ni Mune wanu ndzadzini.

2 Gombeyani tepo yatshavbo mu bwe mu khala na mu gengede ni gu bonga, 3 mu bwe mu hi gombeleya gasi gu Nungungulu a hi tuleya lidimba hi kodza gu tshumayela khu sihalo nya guage wu ganeyago khu Kristo, a gu uwo nyi khothedwego khu kotani yawo, 4 ni gu bwe nyi kodza gu tshumayela gwadi edzi nyi yedego khidzo.

5 Vbanyani khu guti vbakari nya vale va sirigo makhodwa; mu thumisa gwadi tepo yanu khavba si kodzegago khavbo.* 6 Tepo yatshavbo ganeyani malito ma tsakisago, nya gu lungwe khu munyu, gasi mu kodza guti edzi mu na hlamulago khidzo muthu ni muthu.

7 Ndriyangu nya gu golege Tikiko, a gu githumi gi tumbegidego hi thumago gumogo Pfhumuni, a na mi ninga mahungu yatshavbo ma ganeyago kheni. 8 Nyi ngu mu rumeya gwanu gasi mu ta ti mawugelo yathu ni gu bwe a ta thaveleya myonyo yanu. 9 Uye a nata ni Onesimo, ndriyangu nya gu golege, a tumbegidego, a gu moyo wanu. Avo va nata mi embeya satshavbo si giregago eno.

10 Mu ngu losedzedwa khu Arisitariko nyi khothedwego naye. Mu ngu losedzedwa gambe khu Marko primu wa Bharinabha (maningano ni Marko, enu mu hakhide sileletelo gasi gu mu mu hakha a gu ta mi wuseya). 11 Jesu a ranwago pwani khu Justo, a gu moyo nya ava va hanidego wugwera,* anuye a ngu mi losedzeya. Ava khavo basi nyi thumago navo gumogo Mufumoni wa Nungungulu, ni gu gwangu va khade gifefe nya gu thaveleye nya gukhongolo.* 12 Epafrasi, a gu moyo wanu, a gu githumi gya Kristo Jesu, anuye a ngu mi losedzeya. Uye tepo yatshavbo a ngu mi gombeleya khu tshivba ni tshivba, gasi mu tiya kha nga vathu va vidzidwego avba nya gugole gwatshavbo ga Nungungulu. 13 Nyi ngu fakaza gu kheni uye a ngu dzi garadza ngudzu khu kotani yanu ni kotani ya vandruye va Lawodhikeya ni ava va Hiyerapoli.

14 Luka dhogodheya nyo golege, a ngu mi losedzeya. Dhemasi nuye a ngu mi losedzeya. 15 Losedzeyani vandriyathu va Lawodhikeya ni ndriyathu Ninfa ni libandla li tshanganago ndrangani gwaye. 16 Hwane nya gu ba mu leride lidangaliya leli, li rumeyeni ga libandla la Lawodhikeya gasi anavo va ya li leri, mu bwe mu lomba nenu lidangaliya nyi nga va rumeleya gasi mu leri nenu. 17 Embeyani Arikipo, khenu: “Dzi garadzeye gu gira gwadi thumo u ningidwego Pfhumuni.”

18 Eni Pawulo, nyi ngu mi loveya malosedzeya yaya khu mandza yangu. Simamani gu dundruga dzikorenti dzi nyi hungeledego. Nyi ngu mi suveya wuwadi nya wukhongolo ngudzu wa Nungungulu.