LIDANGALIYA LI HONGOLAGO GA VATESALONIKA

1 Eni Pawulo, Silivhano ni Thimoti hi ngu loveya libandla la Tesalonika li pwananago ni Nungungulu, Papayi, ni Pfhumu Jesu Kristo, khethu:

Hi ngu mi suveya wuwadi nya wukhongolo ngudzu wa Nungungulu ni gurula.

2 Tepo yatshavbo hi ngu bonga Nungungulu tepo hi mi khumbugago mwatshavbo omu nya milombelo yathu, 3 kholu tepo yatshavbo hi ngu dundruga thumo wanu nya gukhodwe, thumo wanu mu wu girago khu lihaladzo ni gutimiseya gwanu khu kotani nya gutumbe mu gu nago ga Pfhumu yathu Jesu Kristo mahoni ga Nungungulu wathu, a gu Papayi. 4 Vandriyathu mu haladzwago khu Nungungulu, hi ngu dziti gu khethu uye mi hathide, 5 kholu mahungu nya yadi hi ma tshumayelago, ha gu ma tshumayela na hi gu phaswa khu liphuvbo nya guage. Ethu hi ngu tiyisega gu khethu esi hi tshumayelago lisine. Enu mu ngu dziti gu khenu hi khade vathu muni vbakari gwanu khu kotani yanu. 6 Nigu enu mu hi pimedzede mu bwe mu pimedzeya Pfhumu kholu mu dzumede lito na muri omu nya dzitshanisa nya dzingi, na muri ni gutsaka gu tago khiyo nya liphuvbo nya guage. 7 Khu kharato, enu mu khade giyeyedzo ga makhodwa yatshavbo ya Makedhoniya ni Akaya.

8 Khu lisine, khu kotani yanu, lito la Jehovha khandri li di pwidwa Makedhoniya ni Akaya basi, ganiolu gukhodwa gwanu ga Nungungulu gu li phalalegiside gwatshavbo avba nya gu kha si lombi gu hi ganeya gimbe gilo. 9 Kholu avo va ngu simama gu ganeya khedzi hi ganedego khidzo nanu khu tepo nyo pheye ni edzi mu vbindrugedzidego khidzo mu thumeya Nungungulu, mu diga sifananiso sanu gasi mu khala sithumi sa Nungungulu nya lisine a vbanyago, 10 nigu bwe mu vireya Gyanana gyaye gi tago khu ndzadzini, egi uye a gi wusidego khu ga vafudego, a gu Jesu, oyu a hi vbulugisago avba nya zanga yi na tago.

2 Vandriyathu, mu ngu dziti gwadi gu khenu gu mi endreya gwathu kha ga khala ga mahala. 2 Kholu ambari olu hi nga tshaniseka ni gu tshaniswa Filipi, kha nga mu dzitigo, hi manegide ni gutiya-hwambo khu gu phaswa khu Nungungulu wathu gasi hi ta mi embeya mahungu nya yadi ya Nungungulu na hi gu wugedwa ngudzu. 3 Wusingalagadzi hi mi ningidego kha wu dzi seketeyi avba nya silo nya malipha, nigu kha ha mi ninga wusingalagadzi wowo na hiri ni makungo nyo vivbe mwendro gasi gu mi kanganyisa. 4 Ganiolu, kha nga olu Nungungulu a hi hathidego gasi hi tshumayela mahungu nya yadi, kha hi tshumayeli mahungu nya yadi gasi gu tsakisa vathu, ganiolu ha gu gira isoso gasi gu tsakisa Nungungulu oyu a wonago esi si gomogo myonyoni gwathu.

5 Khu lisine, mu ngu dziti gu khenu gima kha ha mi kanganyisa khu malito nya gutshambiseye, nigu gima kha ha zama gu dzi gira vathu nya vadi gasi gu wuyedwa khu gilo nyo khaguri; Nungungulu i fakazi nya isoso! 6 Ne kha ha vbwetedzeya gu ningwa wuzundzo khu vathu, ne khenu, ne khu vambe vathu, ambari olu hi gu vapostoli va Kristo si nga ba si kodzega gu hi mi lemedzeya giemo khu gu mu hi sayisa. 7 Wulangani nya isoso, hi khade vathu nya vadi vbakari gwanu, nga edzi mamayi a mamisago a khathaleyago khidzo sanana saye. 8 Khu kharato, kha nga olu hi mi yeyedzidego wuwadi, hi di gu vbweta nasiri basi gu mi tshumayela mahungu nya yadi ya Nungungulu ganiolu ni gu ningeya womi wathu gasi gu mi phasa, kholu ethu hi ngu mi haladza ngudzu.

9 Khu lisine, vandriyathu, enu mu ngu dundruga sighingi sathu ni thumo wathu nya gudzigaradze. Ethu hi di gu thuma wutshigu ni mihani gasi hi si lemedziseyi giemo ne moyo wanu* tepo hi nga ba hi tshumayela mahungu nya yadi ya Nungungulu. 10 Enu vakhodwa mu dzifakazi nigu Nungungulu nuye i fakazi nya edzi hi vbanyidego khidzo nanu khu gutumbega, khu gululama nya mba na gisolo. 11 Mu ngu dziti gwadi gu khenu ethu hi mi ningide wusingalagadzi, hi mi thaveleya hi bwe hi gengedza moyo ni moyo wanu, nga edzi papayi a girago ga sanana saye, 12 gasi mu simama gu gimbiya khu ndziya yi tsakisago Nungungulu, oyu a mi ranago Mufumoni waye ni wudhumoni waye.

13 Khu lisine, khiso si hi girago anethu hi bonga Nungungulu tepo yatshavbo kholu tepo mu hakhidego mahungu ya Nungungulu mu ma pwidego gwathu, kha mwa ma hakha kha nga mahungu ma tago khiyo ga vathu, ganiolu mu ma hakhide kha nga edzi ma gu idzo, kha nga mahungu ma tago khiyo ga Nungungulu, a gu ayo ma mi phasago enu makhodwa. 14 Gasi enu vandruye, khalani vapimedzeyi nya mabandla ya Nungungulu ma gomogo Judheya, aya ma pwananago ni Kristo Jesu. Kholu mu tshanisidwe khu va na gyanu nga edzi anavo va tshaniswago khidzo khu Vajudha, 15 avo va nga bwe va songa Pfhumu Jesu ni vaprofeti va bwe va hi tshanisa. Nigu avo kha va tsakisi Nungungulu, ganiolu va gu wugeya esi si phasago vathu vatshavbo. 16 Kha nga olu va zamago gu hi himbedzeya gu ganeya ni vanyamayigo gasi va vbulugiswa, khu ndziya yeyi, tepo yatshavbo avo va gu simama gu engedzeya sighoho sawe. Ganiolu, khu gu hegisa, zanga ya Nungungulu yi va thegede.

17 Ganiolu, tepo hi nga hambaniswa nanu vandriyathu khu tepo nya yidugwana (khu givili nasiri khu monyo), hi diri ni gusuva nya gukhongolo nya gu hi mi wona khovbe ni khovbe, khu kharato hi di dzi garadza ngudzu gasi isoso si kodzega. 18 Khu gighelo gyogyo, hi di gu vbweta gu mi endreya. Ina, eni Pawulo nyi zamide gu mi endreya, nasiri gumogo, ganiolu guvili; ganiolu Sathane khuye a nga hi tshikeya ndziya. 19 Kholu tepo Pfhumu Jesu a na wuyago, khu mani a na khalago gutumba gwathu, gutsaka gwathu ni korowa nya gutsake gwathu mbeli gwaye? Ina khandrenu? 20 Enu khu lisine mu wudhumo wathu ni gutsaka gwathu.

3 Khu kharato, tepo hi nga wona gu khethu kha hi ngo vbwetari gu khala nya mbapwa mawugelo yanu, hi di si wona na siri tshukwana gu tshala Atena, 2 ganiolu hi mi rumeleya ndriyathu Thimoti, oyu a gu githumi gya Nungungulu, a tshumayelago mahungu nya yadi maningano ni Kristo gasi a ta mi tiyisa gukhodwani gwanu, 3 gasi ne ni moyo a si vbeyi tshivba khu kotani nya silingo sesi. Ganiolu, kha nga mu dzitigo, kha si kodzegi gu vhika dzitshanisa dzodzo. 4 Kholu tepo hi nga ba hiri nanu hi di gu oloveya gu mi embeya gu khethu hi na emisana ni dzitshanisa nigu khiso kamo si giregago kha nga mu dzitigo. 5 Olu nyi nga ba nyi si vbwetari gambe, nyi mu rumelede Thimoti gasi a tati edzi mu gomogo khidzo gukhodwani, kholu nyi di gu thava gu kheni adzina Mulingi mi lingide khu ndziya nyo khaguri khavbovbo thumo wathu wu khala wa mahala.

6 Ganiolu, Thimoti a ngari gu vboha eno, na guta khiyoyo, nigu a hi embede mahungu nya yadi maningano ni enu; a hi embede gambe mahungu nya yadi maningano ni gutumbega gwanu, ni lihaladzo lanu. A hi embede gambe gu khuye tepo yatshavbo mu ngu simama gu hi dundruga khu lihaladzo nigu mu ngu suva ngudzu gu hi wona kha nga ethu nethu hi suvago gu mi wona. 7 Khu kharato vandriyathu, hi ngu thaveledwa gugaradzegani* ni gutshanisekani gwathu gwatshavbo khu kotani yanu ni gutumbega gwanu. 8 Kholu tepo mu emago mu tiya Pfhumuni, ethu ha gu mana tshivba. 9 Khu lisine, hi ngu mu bonga ngudzu Nungungulu khu kotani yanu ni gutsaka gwatshavbo hi gu manago mbeli ga Nungungulu khu kotani yanu. 10 Hi ngu gombeya khu monyo watshavbo wutshigu ni mihani gasi hi ta mi wona hi bwe hi ta mi phasa ga esi mu si hamugago gasi gu gukhodwa gwanu gu tiya.

11 Ha gu gombeleya gu khethu Nungungulu, Papayi wathu, gumogo ni Pfhumu yathu Jesu va hi tuleya ndziya nya gute iyo gwanu. 12 Nigu gambe, ho gombeleya gu khethu Pfhumu yi engedzeya lihaladzo lanu, mu simama gu haladzana ngudzu ni gu haladza vathu vatshavbo kha nga ethu nethu hi mi haladzago, 13 gasi gu a tiyisa myonyo yanu, mu si manegi ni gihoso, mu aga mbeli ga Nungungulu, a gu Papayi, guwuyani ga Pfhumu yathu Jesu ni va nyo aga vaye vatshavbo.

4 Khu gu hegisa vandriyangu, kha nga olu mu hakhidego sileletelo si tago khiyo gwathu nya edzi mu yedego gu vbanya khidzo gasi gu tsakisa Nungungulu, ni olu khu lisine mu vbanyago khu ndziya yoyo, khu lina la Pfhumu Jesu, hi ngu lomba gu khethu mu simama gu gira silo soso. 2 Kholu mu ngu siti sileletelo hi mi ningidego si tago khiyo ga Pfhumu Jesu.

3 Kholu gugola ga Nungungulu khu gu enu mu khala na mu agide, mu gimbileya hwindzo ni wubhayi.* 4 Moyo ni moyo wanu gu vbwetega a kodza gu woneleya givili gyaye gasi a simama na agide a bwe a tsakedwa khu Nungungulu. 5 Mu nga landreyi vanyamayigo va si mu tigo Nungungulu, avo va landrago gudogoreya nya malawu nya mba kodwa. 6 Mwalo a yedego gu ndraga vbingano nya esi si fanedego, a kalaveya ndriyaye ga silo sesi kholu Jehovha a na tsayisa vatshavbo va girago silo sesi kha nga hi mi embedego gupheyani hi bwe hi mi gengedza khu tshivba. 7 Kholu Nungungulu kha hi raneya gu ta vbanya womi nya mba aga, ganiolu gu ta vbanya womi nya guage. 8 Oyu a gu mba theya kota khesi khandri a gu mba theya kota khu vathu, ganiolu kha theyi kota khu Nungungulu, a gu uye a mi ningago liphuvbo nya guage.

9 Ganiolu, maningano ni lihaladzo nya wundruye, kha si lombi gu kala hi mi loveya, kholu mu ngu hevbudzwa khu Nungungulu gu haladzanani khu gyanu. 10 Enu mu ngu gira isoso ga vandruye vatshavbo va gomogo Makedhoniya gwatshavbo. Ganiolu, vandriyathu, nyi ngu mi lomba gu kheni mu engedzeya gu gira isoso. 11 Dzi garadzeyeni gu vbanya khu gurula; mu nga dzi bedzedzeyi omu nya silo sa vane, ganiolu thumani khu mandza yanu kha nga edzi hi mi hevbudzidego khidzo, 12 gasi avo va si girigo gipandre nya libandla nya wukristo va mi wona gu khavo mu na ni mavbanyelo nya yadi nigu kha mu hamugi gilo.

13 Nigu vandriyathu, kha hi vbweti gu khethu mu siti gilo maningano ni ava va ladego gufani gasi mu si vbeyi tshivba nga vale va gu mwalo gutumba. 14 Ha gu ba hi khodwa gu khethu Jesu fude a bwe a wuswa, hi na khodwa gambe gu khethu Nungungulu a na wusa vale va fudego gasi va ya khala ni Jesu. 15 Esi hi vbwetago gu mi embeya olu lito la Jehovha: Ethu hi na simamago gu vbanya kala guwuyani ga Pfhumu, hi na gweya ndzadzini, ganiolu vale va fudego va na pheya khavo va wuswa, khavbovbo ethu hi na landreya avo. 16 Kholu uye mune Pfhumu, a na releya khu ndzadzini a ta rana khu lito nya ngilozi nya yikhongolo ni pundru wa Nungungulu, nigu avo va fudego va pwananago ni Kristo va na pheya khavo va wuswa. 17 Hwane nya isoso, ethu hi na ta manwago na hi ngo vbanya, hi na gweya navo mapfhini gasi hi ya manana ni Pfhumu ndrengelengeni. Khavbovbo, hi na khala ni Pfhumu kala gupindruga. 18 Khu kharato, simamani gu thaveleyana khu gyanu khu malito yaya.

5 Vandruye, maningano ni dzitepo ni dzinango kha si lombi kala nyi mi loveya gilogyo. 2 Kholu mu ngu dziti gwadi gu khenu litshigu la Jehovha li nata wutshigu nga mbafa. 3 Tepo vathu va na gu ba va ganeya gu khavo: “Ho vbanya gurulani, gu mwalo gilo nyo gi thave!”* khavbovbo, gu nata khavba ni avba gufuviswa gwawe, nga nyamayi a gu na ni mimba a lumwago, kha va na nga vbuluga. 4 Ganiolu, enu vandruye mu mwalo gidemani nga mbafa, nyo ka mu vbohedwa khu litshigu lolo na mu pfhade. 5 Kholu enu mwatshavbo mu sanana nya guwonegeye, sanana nya mihani. Ethu kha hi lumbi ne wutshigu, ne gidema.

6 Khu kharato, hi nga lali gu fana ni vambe, ganiolu hongoleni hi khalani na hi gengede hi thumisa gwadi mapimo yathu. 7 Kholu avo va lalago va gu lala vbawutshigutunu, nigu avo va levago va gu leva vbawutshigutunu. 8 Ganiolu, ethu hi lumbago mihani hongoleni hi thumisani gwadi mapimo yathu hi bwe hi ambala givhikelo nya khana nya gukhodwe ni lihaladzo, ni gu bwe hi ambala gihugo, gu gu gutumba nya guvbulugiswe. 9 Nungungulu kha hi hatha gasi gu ta hi tsayisa, ganiolu hi hathide gasi gu hi vbulugisa khu kotani nya esi si giridwego khu Pfhumu Jesu Kristo. 10 Uye fude khu kotani yathu gasi gu ambari ha gu ba hi wona mwendro ha gu ba hi lade,* hi vbanya gumogo naye. 11 Khu kharato, simamani gu tiyisana khu gyanu mu bwe mu vbahana khu gyanu kha nga edzi mu tago na mu gu gira khidzo.

12 Hi ngu mi lomba vandriyathu gu khethu mu ninga githawo vale va thumago khu gudzigaradza vbakari gwanu, avo va mi thangeyago Pfhumuni va bwe va mi ninga wusingalagadzi. 13 Va khathaleyeni gwadi khu lihaladzo khu kotani nya thumo va girago. Vbanyani khu gurula vbakari gwanu. 14 Nigu ho vbweta gu mi lomba vandruye gu khethu mu kawuka avo va wusago sigaradzo, mu thaveleya avo va vbedego tshivba, mu tiyisa avo va vbodego khu liphuvboni mu bwe mu laphiseya monyo vatshavbo. 15 Dzi woneyeni gasi gu si manegi ni moyo wanu a bweledzeyago guvivba khu guvivba, ganiolu dzi garadzeyeni gu gireyana silo nya sadi ga moyo ni moyo wanu ni ga vatshavbo.

16 Khalani na mu tsakide tepo yatshavbo. 17 Gombeyani tepo yatshavbo. 18 Bongani khu silo satshavbo. Ogu khugo gugola ga Nungungulu ga enu khu gu thumisa Kristo Jesu. 19 Mu nga himbedzeyi liphuvbo la Nungungulu gu thuma gwanu. 20 Mu nga yeyisi siprofeto. 21 Tiyisegani khu silo satshavbo, phareleyani ga esi nya sadi. 22 Gimbileyani hwindzo ni silo satshavbo nya guvivbe.

23 Nungungulu nya gurule a na mi agise khu guvbeleya. Vandriyangu, mavbanyelo yanu yatshavbo nya yadi, myonyo* yanu ni sivili sanu si na manege na siri mwalo gisolo nigu na si agide khu dzindziya dzatshavbo guwuyani ga Pfhumu yathu Jesu Kristo. 24 Oyu a mi ranago tumbegide nigu a na gira isoso.

25 Vandriyathu, simamani gu hi gombeleya.

26 Losani vandruye vatshavbo khu lihaladzo.*

27 Nyi ngu mi lomba, khu lina la Pfhumu, gasi lidangaliya leli li lerwi ga vandriyathu vatshavbo.

28 Hi ngu mi suveya wuwadi nya wukhongolo ngudzu wa Pfhumu yathu, Jesu Kristo.