LIDANGALIYA NYA WUVILI GA VATESALONIKA

1 Eni Pawulo ni Silivhano ni Thimoti hi ngu loveya libandla la Tesalonika, eli li lumbago Nungungulu, Papayi wathu ni Pfhumu Jesu Kristo, khethu:

2 Hi ngu mi suveya wuwadi nya wukhongolo ngudzu wa Nungungulu ni gurula gu tago khiyo ga Nungungulu, Papayi, ni ga Pfhumu Jesu Kristo.

3 Vandriyathu, hi na ni fanelo nya gu bonge Nungungulu tepo yatshavo khu kotani yanu. Hi yede gu gira isoso kholu gukhodwa gwanu gu ngu dandra khu tshivba ni tshivba nigu lihaladzo mu yeyedzanago li ngu engedzeya. 4 Khu kharato, hi ngu dzi khusedza vbakari nya mabandla ya Nungungulu khu kotani nya gutimiseye gwanu ni gukhodwa mu gu yeyedzago dzitshanisani dzatshavbo ni sigaradzoni* satshavbo mu emisanago naso. 5 Isoso sa gu yeyedza gu khiso Nungungulu a ngu lamula khu gululama. Khu kharato, mu ngu yedwa khu gu beya Mufumoni wa Nungungulu, owu mu tshanisekago khu kotani yawo.

6 Kholu Nungungulu, a lulamidego, a na tsayisa ava va mi tshanisago. 7 Enu olu mu tshaniswago, mu na tshudziswa gumogo ni ethu guwonegiswani ga Pfhumu Jesu gukhugeya khu ndzadzini gumogo ni dzingilozi dzaye nya tshivba. 8 Khu tepo yoyo, nari khu niloni wu khondrago, uye a na tsayisa* vale va si mu tigo Nungungulu ni vale va si engisigo mahungu nya yadi maningano ni Pfhumu yathu Jesu. 9 Pfhumu yathu yi na lamula vathu vovo, gutsayiswa gwawe gu na ba guri gufuviswa nya gupindruge. Khu kharato, kha na nga va khedza gambe mwendro gu va phasa khu tshivba yaye nya yikhongolo. 10 Tepo Pfhumu yathu yi na tago gasi gu ta dhumiswa gumogo ni va nya guaga vayo, vatshavbo va khodwago gwayo va na yi hlamala nigu khu kotani nya olu mu khodwego silo hi mi embedego anenu mu na ba muri vbakari gwawe.

11 Khiso si girago gu hi mi gombeleya tepo yatshavbo, hi lomba gu khethu Nungungulu wathu a mi wona na mu yedwa khu gurana gwaye nigu khu tshivba yaye a gira silo satshavbo nya sadi a si tsakeyago ni gu bwe a tadzisa esi mu si giridego khu gukutswa khu gukhodwa gwanu, 12 gasi gu lina la Pfhumu yathu Jesu li dhumiswa gwanu nigu enu mu dhumiswa gwaye khu gupwanana ni wuwadi nya wukhongolo ngudzu wa Nungungulu wathu ni wa Pfhumu Jesu Kristo.

2 Vandriyathu, maningano ni guwuya ga Pfhumu yathu Jesu Kristo ni gu tshanganiswa gwathu naye nyi ngu mi lombani gu kheni 2 mu nga dzuwegi mapimo, ne mu nga thavi khu kotani nya malito ma wonegago gu khatshi ma guta khiyo ga Nungungulu, nya guye khu gu ganedwa mwendro nya gu lowe khu lidangaliya ma girago gu khatshi ma guta khiyo gwathu na ma gu ganeya gu khayo litshigu la Jehovha li vbohide.

3 Mu nga pengiswi khu muthu ne vbadugwana kholu litshigu leli kha li na nga vboha na va si gu manegi avo va wugeyago Nungungulu a bwe a tivegiswa wule a wugeyago nayo, a gu gyanana nya gufuviswe. 4 Uye a gu wugeya a bwe a dzi khusedza ga satshavbo si ranwago gu pwani vanungungulu mwendro silo nya gukhozeye gasi a khala avba nya tempele ya Nungungulu, a dzi yeyedza ga vathu vatshavbo gu khuye nungungulu. 5 Ina kha mu dundrugi gu khenu tepo nyi nga ba nyiri nanu nyi di gu mi embeya silo sesi?

6 Olu enu mu ngu giti egi gi himbedzeyago, ganiolu uye a na wonegiswa khu tepo yakone. 7 Khu lisine wuvivbi nya muthu yoyu a sihadego wu ngu thuma. Ganiolu, wuvivbi wowo wu na simama nari sihalo kala oyu a mu himbedzeyago a si manegi gambe. 8 Khu lisine a na tivegiswa wule a wugeyago nayo, oyu Pfhumu Jesu a na mu songago khu gu thumisa tshivba nya malito yaye a bwe a mu fuvisa guwuyani gwaye. 9 Tshivba ya Sathane khiyo yi na girisago gu muthu yoyo a thuma, nigu a na gira silewugiso nya singi ni siyeyedzo nya malipha ni mithumo nya gu samadzise, 10 a bwe a thumisa dzindziya dzatshavbo nya guvivbe, nya gukanganyise ga avo va hongolago gufuviswatunu. Avo va na fuviswa nga gu tsayiswa khu kotani nya olu va bombidego gu hakha ni gu gola lisine. Nari khatshi va di giride silo sesi avo va di hadzi vbulugiswa. 11 Khiso si giridego Nungungulu a va diga va kanganyiswa khu sihevbudzo nya malipha gasi va khodwa malipha, 12 gasi vatshavbo va lamudwa kholu va nga ne gu khodwa lisine, ganiolu va gola gu mba lulama.

13 Hi na ni fanelo nyo bonge Nungungulu tepo yatshavbo khu kotani yanu vandruye mu godwago khu Jehovha, kholu gukhugeya gupheyani Nungungulu mi hathide gasi mu vbulugiswa khu gu mi agisa khu liphuvbo laye ni gukhodwa gwanu avba nya lisine. 14 Khiso a nga mi raneya iso khu gu thumisa mahungu nya yadi hi mi embedego, gasi mu hakha wudhumo wa Pfhumu yathu Jesu Kristo. 15 Khu kharato, vandruye, emani mu tiya, mu phareleya avba nya silo mu hevbudzidwego gani khu magana mwendro khu lidangaliya li tago khiyo gwathu. 16 Nungungulu Papayi wathu a ngu hi haladza, nigu khu kotani nya wuwadi waye a ngu hi thaveleya ni gu bwe a hi ninga gutumba nya gupindruge. Ho gombeleya gu khethu uye gumogo ni Pfhumu yathu Jesu Kristo, 17 va thaveleya myonyo yanu ni gu mi tiyisa gasi tepo yatshavbo mu gira ni gu ganeya silo nya sadi.

3 Khu guhegisa vandruye, simamani gu hi gombeleya gasi mahungu ya Jehovha ma simama gu phalalega khu guvbiredza ma bwe ma hakhwa khu wuzundzo, nga edzi si giregago khidzo vbakari gwanu. 2 Ho lombeleya gu khethu Nungungulu a hi vbulugisa ga vathu nya guvivbedwe khu myonyo, kholu gukhodwa khandri ga vatshavbo. 3 Ganiolu, Pfhumu yi tumbegide, iyo yi na mi tiyisa yi bwe yi mi vhikeya ga oyu nya guvivbe. 4 Nigu maningano ni enu, hi ngu tiyisega ga Pfhumu gu khethu mu ngu landreya nigu mu na simama gu landreya sileletelo hi mi ningidego. 5 Pfhumu yi na mi phase gu haladza Nungungulu mu bwe mu timiseya khu kotani ya Kristo.

6 Vandruye, khu lina la Pfhumu yathu Jesu Kristo hi ngu mi embeyani gu khethu mu dzi hambanisa ni wevbini ndriyathu a gu mwalo mavbanyelo nya yadi, a si engisigo sileletelo hi mi ningidego. 7 Enu mu ngu dziti edzi mu yedego gu hi pimedzeya khidzo, kholu ethu kha ha vbanya vbakari gwanu na hiri ni mavbanyelo nyo vivbe, 8 ne kha ha hodza guhodza ga muthu mahala. Wulangani nya isoso, hi di gu thuma khu gudzigaradza wutshigu ni mihani gasi hi si lemedziseyi giemo ne ni moyo wanu. 9 Ethu hi diri ni fanelo nyo hakhe gilogyo, ganiolu kha ha vbweta gu thumisa fanelo yoyo. Hi di dzi garadza gasi hi mi ningani giyeyedzo nya gyadi nyo gi pimedzeye. 10 Khu lisine, tepo hi nga ba hiri nanu hi di gu oloveya gu mi ningani nayo wowu: “Oyu a si dzinigo gu thuma a nga hodzi.” 11 Hi pwide gu pwani vambe vbakari gwanu va na ni mavbanyelo nyo vivbe, kha va thumi gilo nigu va gu dzi bedzedzeya omu nya silo si si va lumbigo. 12 Vathu vovo, hi ngu va laya khu lina la Pfhumu Jesu Kristo gu khethu va na thume khu gurula, va hodza guhodza nya lithonga lawe.

13 Nigu enu vandruye, mu nga garali khu gu gira esi nya sadi. 14 Ganiolu, a gu tshuka moyo wanu a si engisi esi hi si ganeyago avba nya lidangaliya leli, dzi woneyeni naye,* mu diga gu dzi tshanganisa naye gasi apwa dzitshoni. 15 Mu nga mu woneni nga nala, ganiolu simamani gu mu ninga wusingalagadzi nga ndriyathu.

16 Pfhumu nya gurule yi na mi ningeni gurula tepo yatshavbo khu dzindziya dzatshavbo. Pfhumu yi na khale nanu.

17 Eni Pawulo, nyi ngu mi rumeya malosedzeya yangu nya gu lowe khu mandza yangu kamo. Egi khigyo giyeyedzo nyi gi thumisago ga madangaliya yangu yatshavbo; khayo malovelo yangu.

18 Wuwadi nya wukhongolo ngudzu wa Pfhumu yathu Jesu Kristo wu na khale ni enu mwatshavbo.