LIDANGALIYA NYO PHEYE LI HONGOLAGO GA THIMOTI

1 Eni Pawulo, mupostoli wa Kristo Jesu khu gu ruma ga Nungungulu a gu muvbulugisi wathu ni gu ruma ga Kristo Jesu a gu gutumba gwathu, 2 nyi ngu gu loveya uwe Thimoti, u gu githumi-khwathu gukhodwani nyi gu wonago nga gyanana gyangu, kheni:

Nyi ngu gu suveya wuwadi nya wukhongolo ngudzu, wuhindzi ni gurula si tago khiyo ga Nungungulu Papayi, ni ga Kristo Jesu Pfhumu yathu.

3 Gu fana ni tepo nyi gu kutsidego gu khala Efeso, tepo nyi nga ba nyi vbweta gu hongola Makedhoniya, olu nyi ngu gu lomba gu laya vathu nyo khaguri va hevbudzago simbe sihevbudzo, 4 nigu mu nga engiseyi matimo nya malipha ni matimo ma ganeyago khu malina ya vakokwe. Silo soso kha si na nga mi yisa danga, wulangani nya isoso so gira vathu va ganeya silo nya mba siti vbabandze nya gu va ganeya khesi si tago khiyo ga Nungungulu si tiyisago gukhodwa. 5 Khu lisine, ethu hi hevbudzidwe gasi hi manega ni lihaladzo li reswago khu monyo wu agidego, khu livhalo nya ladi ni gukhodwa nya mba na wupfhadzedzeyi. 6 Vambe va digide sihevbudzo sesi, va pheya gu ganeya silo nya mba pwala. 7 Avo va gu vbweta gu khala vahevbudzi nya nayo, ganiolu kha va pwisisi esi va ganeyago ambari esi va bangeleyago gwaso khu tshivba ni tshivba.

8 Ethu hi ngu dziti gu khethu Nayo khwadi wa gu thumiswa khu ndziya nya yadi. 9 Hi ngu dziti gu khethu milayo kha ya giredwa va nyo lulama, ganiolu yi giredwe sindraga-milayo, va nya gu mba engisa, va nya gu vivbedwa khu monyo, sighohi, va nya gu mba tumbega, va nya gu valeteya, avo va songago papayi mwendro mamayi wawe, vale va songago vambe vathu, 10 vale va girago wubhayi,* vale va hengeyago malawu ni mwama mwendro nyamayi kwawe, vale va bago vathu, va nya malipha, vale va sambanyago malipha ni vatshavbo vale va girago silo si hambanago ni sihevbudzo si phasago, 11 iso si gimbileyanago ni mahungu nya yadi nya wudhumo wa Nungungulu nyo tsake, aya mu ningidwego ayo.

12 Nyi ngu yi bonga ngudzu Pfhumu yathu Kristo Jesu, eyi yi nyi ningidego tshivba kholu yi nyi tumbidego yi bwe yi nyi ninga thumo nyo tshumayele, 13 ambari olu gale nyi nga ba nyiri muvali, mutshanisi ni olu nyi nga ba nyiri mwalo githawo khu vathu. Ganiolu, nyi yeyedzidwe wuhindzi kholu nyi di gu gira silo soso khu wuhangi nigu nyi diri mwalo gukhodwa. 14 Pfhumu yathu yi nyi yeyedzide khu ndziya nyo samadzise wuwadi nya wukhongolo ngudzu nigu nyi hakhide gukhodwa ni lihaladzo si tago khiyo ga Kristo Jesu. 15 Mahungu yaya nyi ganeyago ma tumbegide nigu ma yede gu hakhwa khu monyo watshavbo: Kristo Jesu dzude mafuni gasi gu ta vbulugisa sighohi nigu eni kheni gighohi gyakone nya gikhongolo. 16 Nyi giredwe wuhindzi gasi gu khavbo gwangu, eni nyi gu gighohi nya gikhongolo, Kristo Jesu a yeyedza gulaphisa-monyo gwaye gwatshavbo a bwe a nyi gira nyi khala giyeyedzo ga vale va khodwago gwaye gasi va mana womi nya gupindruge.

17 Pfhumu nya kala gupindruga ni gupindruga, yi si figo, yi si wonegigo, Nungungulu wa moyo, a na ningwe wuzundzo ni wudhumo kala gupindruga ni gupindruga. Amen.

18 Mwanangu Thimoti, nyi ngu ninga gileletelo gegi gi pwananago ni esi si profetidwego gupheyani maningano ni uwe, malito yaya ma na gu phasa gu simama gu dwana litunga nya ladi, 19 u manega ni gukhodwa u bwe u manega ni livhalo nya ladi eli vambe va li bombidego, khu kotani nya isoso gukhodwa gwawe gu dzama nga ngalava yi dzamago. 20 Heminewu ni Alexandre va gu lumba tsawa wowo nigu eni nyi va ningede ga Sathane, gasi gu tsayiso va wu manago wu va hevbudza gu mba valeteya Nungungulu.

2 Gupheya nyi ngu lomba gu kheni silombo, gu gombeleya, milombelo ni gubonga si giredwa vathu vatshavbo 2 ni dzipfhumu gumogo ni vatshavbo vale va gomogo sikhaloni nyo khugege, gasi hi vbanya khu gurula ni gutumbega ngudzu ga Nungungulu hi bwe hi gira satshavbo khu monyo wathu watshavbo. 3 Isoso khyadi nigu si ngu tsakisa Muvbulugisi wathu, Nungungulu, 4 oyu a vbwetago gu khuye vathu vatshavbo va vbulugiswa va bwe vati lisine. 5 Kholu gu na ni Nungungulu moyo basi ni mutshanganisi moyo a tshanganisago Nungungulu ni vathu, a gu Kristo Jesu. Oyu khuye mwama 6 a dzi ningedego nga dzegiso gasi gu tshudzisa vatshavbo. Esi si na fakazwa khu tepo yakone. 7 Gasi gu fakaza mahungu yaya, eni nyi hathidwe gasi gu khala mutshumayeli ni mupostoli gasi gu hevbudza vanyamayigo maningano ni gukhodwa ni lisine (nya gu mi embeya lisine khandri nya gu mi lipheya).

8 Khu kharato, nyo dogoreya gu kheni malangani yatshavbo, vama va gu gombeya va khusedza mawogo va gombeya na vari ni myonyo yi agidego na va sa zangari nigu na va si ganedzisani. 9 Khu ndziya nyo fane, vanyamayi gu vbwetega va ambala sombo si yeyedzago githawo, va si vbindrisi pimo va bwe va manega ni gupima nya gwadi. Avo kha va yeli gu dzi mburiseya khu dzimodha nya malugelo nya mindzudzu, ne khu oru mwendro dziperola, ne khu sombo nyo dhure ngudzu, 10 ganiolu va yede gu dzi mburiseya khu ndziya yi yelago vanyamayi va khozeyago Nungungulu, si thulago gu khiso va yede gu dzi mburiseya khu mithumo nya yadi.

11 Nyamayi gu vbwetega a hevbula na degude, na gu dzi nogisa. 12 Kha nyi dzumeleyi gu kheni nyamayi a hevbudza mwendro gu thangeya mwama,* ganiolu uye gu vbwetega a simama na degude. 13 Kholu phede khu Adhamu a girwa, khu gulandreya a girwa Evha. 14 Nigu Adhamu khandruye a kanganyisidwego, ganiolu nyamayi khuye a kanganyisidwego a khala gindraga-milayo. 15 Ambari ulolo, nyamayi a na vbanyiswa khu gu velega sanana o nga nga* simama gukhodwani, ni lihaladzoni, ni guagani a bwe a manega ni mapimo nya yadi.

3 Ma gu ganeya lisine mahungu ma gu khayo: Mwama a gu dzi garadzeya gu khala lidhota* a gu dogoreya thumo nya wadi. 2 Lidhota gu vbwetega nari muthu a gu mwalo gisolo, a gu na ni nyamayi moyo basi, a girago silo khu guninganiseya, a kodzago gu dzi phara, a girago silo khu nayo, a golago gu hakha vapfhumba, a kodzago gu hevbudza. 3 Lidhota kha li yeli gu ba liri gidhakwa,* gu ba liri muthu a golago gu dwanisa, gu ba liri muthu a golago gu bangeleya avba nya mawonelo yaye, gu ba liri muthu nya mayunga ni muthu a golago dzitsapawu. 4 Li yede gu thangeya gwadi ndranga yalo, nigu sanana saye si yede gu mu ninga githawo nya gikhongolo, 5 (kholu o gara muthu a si si kodzi gu thangeya gwadi ndranga yaye, a na si kodza kharini gu sayisa libandla la Nungungulu?), 6 kha yeli gu ba ari muphya gukhodwani, kholu a nga dzi khusedza a lamudwa nga edzi a lamudwego khidzo Dhiyabhulosi. 7 Gu vbwetega nari muthu a gu na ni ndruma nya yadi ga vathu va vbavbandze gasi a si sodwi, a thegeya naphwini wa Dhiyabhulosi.

8 Khu gu fana, vaphasedzeyi nya libandla navo gu vbwetega nari vathu va gu na ni mapimo nyo vidzwe, va ganeyago lisine,* va si seyigo ngudzu vhinyu, va si dogoreyigo gu ghanya khu ndziya nyo kanganyise, 9 va yede gu phareleya avba nya sihalo nya guage nya gukhodwe na vari ni livhalo li agidego.

10 Nigu gambe ava va hathwago gasi gu khala vaphasedzeyi nya libandla gu vbwetega va pheya khu gu kambedwa gwadi gasi gu wonwa gu pwani va ngu dinganedwa gani. Go ba guri mwalo gilo gi sodwago gwawe, va nga thuma nga vaphasedzeyi nya libandla.

11 Khu gu fana, vanyamayi navo gu vbwetega na vari vathu va gu na ni mapimo ma vidzidwego, va gu mwalo milembo, va girago silo khu gu ninganiseya ni gu tumbega siloni satshavbo.

12 Muphasedzeyi nya libandla yede gu manega ni nyamayi moyo basi nigu yede gu thangeya sanana saye ni ndranga yaye khu ndziya nya yadi. 13 Kholu vama va thumago gwadi libandlani va na ni ndruma nya yadi nigu va ngu ganeya na va tshulegide maningano ni gukhodwa iyo ga Kristo Jesu.

14 Ambari olu nya mba hweya nyi na tago iyoyo nyi ta wonana nago, nyi ngu gu loveya silo sesi 15 gasi gu nya gu tshuka nyi hweya, uti edzi u yedego gu dzi phara khidzo ndrangani ga Nungungulu, a gu libandla la Nungungulu a vbanyago, pilari ni gisekelo nya lisine. 16 Khu lisine, sihalo maningano ni oyu a na tumbegago ga Nungungulu siloni satshavbo wukhongolo ngudzu, wari khuwo: ‘Uye wonegisidwe nga muthu nya nyama nigu wonidwe na lulamide nga muthu nya liphuvbo; a wonegide ga dzingilozi, gu tshumayedwe maningano naye ga vanyamayigo, litigo li khodwe gwaye, hakhidwe khu wudhumo ndzadzini.’

4 Liphuvbo la Nungungulu li ngu ganeya gu khilo teponi yi tago vambe va na diga gukhodwa va engisa maphuvbo nyo kanganyise ni sihevbudzo nya madhimoni, 2 va bwe va engisa vama va kanganyisago va ganeyago malipha, ava va gu na ni mavhalo ma tshoredego nga khatshi ma di vbiswa khu simbi nyo vbise. 3 Avo va gu himbedzeya vathu gu tshadha va bwe va laya vathu gu khavo va si hodzi esi Nungungulu a si giridego gasi gu si hodzwa ni gu bongwa khava va gu na ni gukhodwa ni ava va tigo lisine. 4 Kholu silo satshavbo si giridwego khu Nungungulu khyadi nigu gimwalo gi yedego gu bombwa gya gu ba gi hakhidwe khu gubonga. 5 Kholu gi agisidwe khu lito la Nungungulu ni nombelo.

6 Wa gu ningeya wusingaladzi wowu ga vandruye u na ba uri githumi gya Kristo Jesu, egi gi hodzisidwego khu malito nya gukhodwe ni sihevbudzo nya sadi esi u si landreyago khu gutumbega. 7 Ganiolu bomba matimo nya malipha, aya ma wugeyago Nungungulu, ma ganedwago khu vanyamayi va gumbidego. Wulangani nya isoso, dzi garadzeye gu ninga githawo Nungungulu. 8 Kholu gudzigaradza hi gu girago gasi gu tiyisa givili kha gu phasi malangani yatshavbo, ganiolu githawo hi gu nagyo khu Nungungulu gi ngu phasa malangani yatshavbo kha nga olu hi gu na ni gitumbiso nya womi olu ni womi ga tepo yi tago. 9 Mahungu yaya ma tumbegide nigu gu vbwetega ma dzumedwa khu guvbeleya. 10 Khiso si hi girago hi thuma khu tshivba ni tshivba hi bwe hi dzi garadza kholu ha gu tumba Nungungulu a vbanyago, a gu muvbulugisi nya vathu vatshavbo, ngudzu-ngudzu wa vale va tumbegidego.

11 Simama gu ningeya milayo yeyi u bwe u yi hevbudza. 12 Gu nga manegi ne muthu moyo a gu yeyisago khu gu ba uri muphya, wulangani nya isoso khala giyeyedzo ga va nya gu tumbege, guganeyani, mavbanyeloni, lihaladzoni, gukhodwani ni guagani. 13 Simama gu dzi garadzeya gu leri vathuni, gu tiyisa vambe ni gu hevbudza, kala nyita iyoyo. 14 U nga woneyi vbavbatshi giningwa u gu nagyo, egi u ningidwego khu gu thumisa wuprofeti tepo huwo nya madhota yi gu handzegidego mandza. 15 Dundrugeya khu silo sesi, u vega gupima gwago gwatshavbo gwaso, gasi gu gudandra* gwago khu liphuvboni gu wonwa khu vatshavbo. 16 Dzi garadzeye gu manega ni giyeyedzo nya gyadi u bwe u khala muhevbudzi nya wadi. Timiseya ga silo sesi, kholu khu gu gira isoso u na dzi vbulusiga u bwe u vbulugisa ava va gu engiseyago.

5 U nga vbenyeyi muthu nya khongolo, wulangani nya isoso mu ninge wusingalagadzi khu ndziya nya yadi nga papayi, madzaha ma ninge wusingalagadzi nga vandriyago, 2 vanyamayi nya vakhongolo va ninge wusingalagadzi nga vamamayi, sagadzyana si ninge wusingalagadzi nga vandriyago khu githawo gyatshavbo.

3 Ninga githawo u bwe u sayisa dzinoni edzi khu lisine dzi gu dzinoni.* 4 Ganiolu abari gu noni nyo khaguri yi na ni sanana mwendro vatugulu avo va yede gu yeyedza githawo ga Nungungulu khu gu pheya khavo va sayisa dzindranga dzawe, avo va yede gu ninga vavelegi vawe ni vakokwe vawe esi si va yelago kholu isoso si ngu tsakisa Nungungulu. 5 Noni yi gu noni khu lisine, yi gu mwalo muthu nya gu yi sayise, ya gu tumba Nungungulu yi bwe yi simama gu gombeya wutshigu ni mihani. 6 Ganiolu eyi yi vbanyeyago gu dzi tsakisa basi yi fude ambari na yi gu vbanya. 7 Khu kharato, simama gu va ninga milayo yeyi gasi va si manegi ni gisolo. 8 Oyu a si sayisigo valongo vaye ngudzu-ngudzu va ndrangani gwaye a gu bomba gukhodwa nigu vivbide ngudzu guvbindra wule a gu mwalo gukhodwa.

9 Noni yi yedego gu thedwa avba nya tsawa nya dzinoni khu yile yi gu na ni tanga nya 60 myaga mwendro guvbindra, yi nga ba yiri ni mwama moyo basi, 10 yi nga ba yi tidwa khu gu gira mithumo nya yadi, nya nga gu dandrisa gwadi sanana sayo, gu hakha vapfhumba, gu handza migondro ya va nya guaga, gu phasedzeya vale va tshanganidego ni sigaradzo ni gu dzi ningedzeya mithumoni yatshavbo nya yadi.

11 Ganiolu, u nga theyi avba nya tsawa nya dzinoni dzinoni dzi ngarigo sagadzyana, kholu tepo gudogoreya gwadzo nya malawu gu na dzi tsolopeteyago, idzo dzi na diga Kristo dzi hatha gu dzegwa. 12 Idzo dza gu dzi reseya nandru kholu dzi digidego esi dzi tumbisidego* gupheyani. 13 Nigu idzo dzi ngu oloveya gu khala nya mba thuma gilo, dzi legalega khu ndranga ni ndranga, dzi gimbidza milembo ni gu dzi bedzedzeya omu nya silo savane dzi bwe dzi ganeya khu silo dzi si yeligo gu ganeya khiso. 14 Khu kharato, nyo vbweta gu kheni dzinoni dzi ngarigo sagadzyana dzi dzegwa, dzi velega sanana dzi bwe dzi khathaleya vandrangani gwadzo. Dzi si ningi nala gighelo nyo hi sole khigyo. 15 Khu lisine dzimbe dzinoni dzi ndreyide gasi dzi landreya Sathane. 16 Abari gu nyamayi a gu mukhodwa na ni valongo va gu dzinoni a na va phase gasi gu libandla li si lemeledwi khu thumo wowo. Ilo li na phasa dzinoni dzi gu dzinoni khu lisine.*

17 Madhota ma thangeyago gwadi ma na ningwe ngudzu githawo ngudzu-ngudzu aya ma dzi garadzago gu ganeyani ni gu hevbudzani. 18 Kholu milowo yari khiyo: “U nga himbedzeyi mombe gu hodza ya gu ba yi vbula dzimbewu,” nigu gambe “githumi gi ngu yedwa khu gu hakha tshatshazelo wagyo.” 19 U nga hakhi mahungu ma ketsarigo mwama a dandridego khu tanga* go ba guri mwalo wufakazi nya vathu vavili mwendro vararu. 20 Kawuka na va gu wonwa khu vatshavbo ava va girago sighoho gasi si khala gigengedzo ga vambe.* 21 Nyi ngu gu embeya mbeli ga Nungungulu ni ga Kristo Jesu ni ga dzingilozi dzi hathidwego gu kheni landrisa sileletelo sesi nya mba gira gihatheya.

22 U nga vbiredzeyi gu handzega mandza muthu* nigu u nga hengeyi omu nya sighoho sa vambe, khala nu agide.

23 U nga seyi mati basi, ganiolu seya gambe vhinyu yidugwana khu kotani nya ndrani gwago ni olu u khaleyago gu dwala.

24 Sighoho nya vambe vathu si ngu tidwa khu vatshavbo nigu sa gu dzegeya gu va yisa gulamudwani, ganiolu sighoho nya vambe sa gu tidwa khu gu gimbiya nya tepo. 25 Khidzo saye ni mithumo nya yadi, iyo yi ngu tidwa khu vatshavbo. Ambari ya gu mba dzegeya gu wonwa, kha yi na nga simama na yi sihade.

6 Sithumi si na ninge githawo khu monyo watshavbo vamune vaso gasi vathu va si ganeyi guvivba khu lina la Nungungulu ni sihevbudzo saye. 2 Nigu gambe sithumi esi vamune vakone va gu Makristo si nga dheleyi vamune vaso kholu va gu va na ndruye ni ndruye. Ganiolu si yede gu va thumeya khu tshivba kholu avo va phasegago khu thumo nya wadi va wu girago Makristo nyo golege.

Simama gu hevbudza ni gu va ninga milayo yeyi nyi gu embedego. 3 A gu tshuka muthoyo a hevbudza malipha ni gu bwe a si dzumeleyani ni sihevbudzo si phasago, esi si tago khiyo ga Pfhumu yathu Jesu Kristo mwendro ni sihevbudzo si gimbidzisanago ni gu dzi ningedzeya ga Nungungulu, 4 muthu yoyo tade khu gudzikhusedza nigu kha pwisisi gilo. A gu bangaleya omu nya gudwanisane ni gu ganedzisana khu malito ni vambe. Silo sesi sa gu velega lidiwo, mayunga, gu ganeya guvivba khu vambe, gu singedza vambe silo nyo vivbe; 5 iso gambe so gira gu avo va gu na ni mapimo nyo vivbe ni ava va si li pwisisigo lisine va khaleya gu dwanisana khu silo nya mba siza. Va gu pimisa gu khavo gu dzi ningedzeya ga Nungungulu khiyo ndziya nya gu mane khiyo gilogyo. 6 Khu lisine, gu dzi ningedzeya ga Nungungulu ni gu tsaka khesi hi gu naso si ngu phasa ngudzu. 7 Kholu hi velegidwe nya mba gilo mafuni nigu hi nafa nya mba gilo.* 8 Khu kharato, ha gu ba hiri ni gilo nyo hodze* ni gilo nyo ambale* hi na tsaka khu silo soso.

9 Khu kharato, avo va vbwetago gu ghanya va gu thegeya gilingoni va bwe va thegeya omu nya naphwi ni omu nya gudogoreye khu tshivba silo esi si si phasigo gilo, esi si vangago sigaradzo, esi si bedzago vathu gufuviswani nyo vbeleye. 10 Gu gola dzitsapawu khamba nya silo satshavbo nyo vivbe nigu vambe khu gu ba va gola dzitsapawu va digide gukhodwa va dzi vangeya sigaradzo nya singi.

11 Ganiolu, uwe muthu wa Nungungulu ndreya ga silo soso. Dzi garadzeye gu vbwetedzeya gululama, gu dzi ningedzeya ga Nungungulu, gukhodwa, lihaladzo, gutimiseya ni gurula. 12 Dwana nyimbi nya yadi nya gukhodwe; phara si tiya avba nya womi nya mba vbeya owu u nga ranedwa uwo, owu u nga wu fakaza vbakari nya vathu nya vangi.

13 Mbeli ga Nungungulu, oyu a ningago womi silo satshavbo, ni mbeli ga Kristo Jesu, oyu a nga ganeya ni Pontiyo Pilato khu ndziya nya yadi na si thavi gilo, nyi ngu gu embeya, kheni: 14 Engisa nayo, u nga manegi ni noda mwendro gisolo kala Pfhumu yathu Jesu Kristo yi wuya, 15 kholu khu tepo yakone Pfhumu yi gu na ni tshivba, eyi yi tsakidego, eyi yi gu yonga yi na yeyedza tshivba yayo. Iyo Pfhumu nya dzipfhumu nigu Mufumeli nya vafumeli, 16 khuye enga a si figo; uye khade wulanga nyo ngangameye, a gu mwalo muthu a hidzimeyago ga wulanga wowo, nigu mwalo muthu a mu wonidego mwendro a kodzago gu mu wona. Uye a na ningwe wuzundzo ni tshivba nya gupindruge. Amen.

17 Laya ava va ghanyidego mafuni momu gasi va si dzi khusedzi nigu va si tumbi dzitsapawu ni silo va gu naso kholu si ngu vbeya, ganiolu va na tumbe Nungungulu oyu a hi ningago satshavbo si hi ningago gutsaka. 18 Va embeye gu khuwe va na gire silo nya sadi, va ghanya khu gu gira mithumo nya yadi, va manega ni wuhindzi, va dzi emiseya gu kabana ni vambe esi va gu naso, 19 va dzi hengeledzeya dzithomba dzi tago khiyo ga Nungungulu, a gu gisekelo gya mindru wa tshigu; va gu gira isoso, va na phareleya si tiya avba nya womi nya lisine.

20 Thimoti, vegedza gwadi esi u pharisidwego, gimbileya hwindzo ni mabhulo nya mba phasa gilo ma dwanisanago ni esi nyo age u bwe u gimbileya hwindzo ni “guti” nya malipha ogu gu vangago maganelelo ma dwanisanago ni lisine. 21 Vambe va digide gukhodwa khu kotani nya gu dzi khusedze khu guti gogo.

Nyi ngu mi suveya wuwadi nya wukhongolo ngudzu wa Nungungulu.