LIDANGALIYA NYA WUVILI LI HONGOLAGO GA THIMOTI

1 Eni Pawulo, mupostoli wa Kristo Jesu guya khu gugola ga Nungungulu ogu gu gimbidzisanago ni gitumbiso nya womi egi gi manwago khu kotani ya Kristo Jesu, 2 nyi ngu loveya Thimoti, gyanana nya gigodwa, kheni:

Nyi ngu gu suveya wuwadi nya wukhongolo ngudzu ni wuhindzi ni gurula si tago khiyo ga Nungungulu, Papayi ni ga Kristo Jesu Pfhumu yathu.

3 Nyi ngu bonga Nungungulu, oyu nyi mu gireyago thumo nya guage khu livhalo li agidego gu fana ni edzi vakokwe vangu va giridego khidzo, nigu gima kha nyi divali gu gu khumbuga milombeloni gwangu wutshigu ni mihani. 4 Tepo nyi dundrugago marongo yago, nyo suva gu gu wona gasi nyi tala khu gutsaka. 5 Nyi ngu dundruga gukhodwa nya mba na wupfhadzedzeyi u gu nago. Gukhodwa ogu a phedego khu vhovho wago Loyidhe a manega nago ni mamayi wago Ewunise, nigu nyi ngu tiyisega gu kheni khugo ga gumogo u gu nago.

6 Khu kharato, nyi ngu gu dundrugisa gu kheni u endzedzeya giningwa gi tago khiyo ga Nungungulu u gi hakhidego tepo nyi nga gu handzega mandza. 7 Kholu Nungungulu kha hi ninga liphuvbo nya hwanga, ganiolu hi ningide liphuvbo li hi girago hi manega ni tshivba ni lihaladzo ni mapimo nya yadi. 8 Khu kharato, u nga khali dzitshoni gu fakaza mahungu ma yelanago ni Pfhumu yathu nigu u nga khali dzitshoni kheni nyi gu gibotshwa khu kotani yaye, wulangani nya isoso tumba gu khuwe Nungungulu a na gu ninga tshivba nya gu timiseye gutshaniswa khu kotani nya mahungu nya yadi. 9 Uye hi vbulugiside a bwe a hi rana gasi hi ta khala vathu nya guage. Uye kha gira isoso khu kotani nya mithumo yathu, ganiolu giride isoso khu kotani nya makungo yaye ni wuwadi waye nya wukhongolo ngudzu. Uye hi yeyedzide wuwadi wowo nya wukhongolo ngudzu gale yoyo, khu gu thumisa Kristo Jesu, 10 ganiolu uwo olu wu wonegide ga vathu vatshavbo khu gu wonegiswa nya muvbulugisi wathu Kristo Jesu, oyu a fuvisidego gufa a bwe a thumisa mahungu nya yadi gasi a hi yeyedza ndziya nya gu hi mana womi ni givili gi si hinigo; 11 nigu eni nyi hathidwe gasi nyi khala mutshumayeli, mupostoli ni muhevbudzi nya mahungu yaya nya yadi.

12 Khiso si nyi girago neni nyi tshaniseka khu silo sesi, ganiolu kha nyi khali dzitshoni kholu nyi ngu muti wule nyi khodwago gwaye nigu nyi ngu tumba gu kheni uye a na si kodza gu vega esi nyi mu pharisidego kala ga matshigu ma tago. 13 Phareleya si tiya avba nya malito nya yadi u ma pwidego gwangu u bwe u manega ni gukhodwa ni lihaladzo si na gu girago u pwanana ni Kristo Jesu. 14 Sayisa thomba yeyi nya lisima ngudzu khu gu thumisa liphuvbo nya guage li gomogo vbakari gwathu.

15 U ngu dziti gu khuwe vatshavbo va vbanyago provhinsya ya Aziya va nyi digide, gupata ni Figelo ni Herimogeni. 16 Pfhumu* yi na yeyedze wuhindzi ndranga ya Onesiforo kholu uye nyi tangadziside dzitepo nya dzingi nigu kha khala dzitshoni khu gu ba nyi khothedwe. 17 Wulangani nya isoso, tepo a vbohidego Roma a di ta nyi vbwetedzeya kala a nyi mana. 18 Pfhumu Jehovha a na gu yeyedze wuhindzi ga litshigu a li vegisidego. Nigu u ngu yiti gwadi mithumo yatshavbo u giridego Efeso.

2 Khu kharato mwanangu, simama gu dzi tiyisa khu wuwadi nya wukhongolo ngudzu wutago khiyo ga Kristo Jesu. 2 Iso u sipwidego gwangu, si fakazidwego khu dzifakazi nya dzingi, si hevbudze ga vama nya gutumbege, ava navo va na kodzago gu hevbudza vambe. 3 Kha nga lisotshwa nya ladi la Kristo Jesu, khala na wu dongide gu timiseya gutshaniseka. 4 Mwalo a thumago nga lisotshwa ganiolu na gu dzi bedzedzeya omu nya dzinogosi gasi gu mana dzitsapawu, kholu a gu vbweta gu tsakisa wule a mu hathidego gasi gu khala lisotshwa. 5 Khidzo saye ni mapalisanatunu; oyu a gomogo omu nya mapalisana kha ningwi gihiwa* a gu ba a sa landrisa sileletelo nya mapalisana. 6 Mulimi a thumago khu gudzigaradza, khuye a yedego gu pheya khuye a hodza mihandro yakone. 7 Khaleya gu dundruga esi nyi gu embeyago; Pfhumu yi na gu ninga gupwisisa siloni satshavbo.

8 Dundruga gu khuwe Jesu Kristo wusidwe khu ga vafudego nigu a diri gitugulwana gya Dhavhidhe, kha nga ma ganeyago mahungu nya yadi nyi tshumayelago. 9 Khu kotani nya mahungu nya yadi, eni nyi ngu tshaniseka nigu nyi hungeledwe khu dzikorenti nga khatshi nyi gighevenga. Ganiolu lito la Nungungulu kha la hungeledwa. 10 Khu kharato, nyo simama gu timiseya siloni satshavbo khu kotani ya vale va hathidwego, gasi gu anavo va mana guvbulugiswa gu tago khiyo ga Kristo Jesu, gumogo ni wudhumo nya gupindruge. 11 Ma ngu tumbega mahungu ma gu khayo: Ha gu ba hi fude naye, khu lisine hi na vbanya naye; 12 ha gu simama gu timiseya, hi na fuma naye; ganiolu ha gu mu bomba, anuye a na hi bomba; 13 ha gu mba tumbega, uye a na simama na tumbegide, kholu uye kha si kodzi gu dzi bomba abune.

14 Simama gu va dundrugisa silo sesi, u bwe u va hevbudza* mbeli ga Nungungulu gasi va si ganedzisani khu kotani nya malito, a gu gilo gi si phasigo gilo, kholu isoso sa gu phalalegisa* vale va engiseyago. 15 Gira satshavbo u si kodzago gasi u hakhwa khu Nungungulu nga githumi gi gu mwalo dzitshoni, egi gi thumisago gwadi lito nya lisine. 16 Ganiolu, nyenya mabhulo ma wugeyago esi si agidego, kholu ayo ma na yisa vathu mavbanyeloni ma si tsakisigo Nungungulu, 17 nigu esi va ganeyago si na dandra nga gimange.* Heminewu ni Fileto vomo tsawani wowo. 18 Vama vava va digide lisine, va ganeya gu khavo guwuswa khu ga vafudego gu giregide, nigu va gu tshungunula gukhodwa ga vambe. 19 Ambari ulolo, gisekelo gi tiyidego gya Nungungulu gya gu simama na giri ni gifungo gegi: “Jehovha a ngu vati vale va mu lumbago,” nigu “Watshavbo wule a ranago lina la Jehovha a na dige gu mba lulama.”

20 Omu nya nyumba nya yikhongolo, gu mwalo basi sombo nya oru ni iso nya prata ganiolu gu na ni sombo nya madhera ni sombo nya libumba gambe. Simbe sa gu thumisedwa ga silo si gu na ni wuzundzo, ganiolu simbe sa gu thumisedwa ga silo si gu mwalo wuzundzo. 21 Khu kharato, oyu a gimbileyago hwindzo ni sombo si thumisedwago omu nya silo si gu mwalo wuzundzo, a na khala gyombo gi thumisedwago ga silo si ningago wuzundzo, gi agisidwego, gi gu na ni giphaso ga mune wagyo, gi dongisedwego gu gira mithumo yatshavbo nya yadi. 22 Khu kotani nya isoso, tutuma gudogoreya nya wuphya, ganiolu vbwetedzeya gululama, gukhodwa, lihaladzo, gurula, gumogo ni vale va ranago lina la Pfhumu khu monyo wu agidego.

23 Nigu nyenya mabhulo nya wupumbu ma si phasigo gilo, kholu u ngu dziti gu khuwe ayo ma gu vanga mayunga. 24 Githumi gya Pfhumu kha gi yeli gu dwana, ganiolu gi yede gu vbanya khu gurula ni vatshavbo, gi si kodza gu hevbudza, gi kodza gu dzi phara tepo gi giredwago wuvivbi, 25 gi bwe gi hevbudza khu wuwadi vale va si dzumeleyanigo ni esi gi ganeyago. Adzina Nungungulu a na gira gu va dzi laya* va bwe va manega ni guti nya lisine. 26 Khu kharato, avo va na tugula gu khavo va di thegede naphwini wa Dhiyabhulosi gasi gu gira gugola gwaye. Khavbovbo va na dzi garadzeya gu vbuluga naphwini wowo.

3 Ganiolu, dziti gu khuwe matshigoni nya guhegise, gu na manega dzitepo nyo garadze gu emisana nadzo. 2 Vathu va na dzi gola avo vamune basi, va na gola dzitsapawu, va na ba va ri vathu nya gudziembeye, va na dzi khusedza, vathu nya gu ganeye dzitshamba, va nya gu mba engisa vavelegi, va nya gu mba bonga, va nya gu mba tumbega, 3 va nya gu mba haladza vambe vathu, va nya gu mba gola gu gira gurula, va nya gu singedze vambe, va nya gu mba kodza gu dzi phara, va nya gihafane, va nya gu nyenya silo nya sadi, 4 va nya gu mba tumbega ga vambe, va nya gu banga mihungo, va nya gu dzi gugumugisa, va nya gu gola gu dzi tsakisa guvbindra gu tsakisa Nungungulu, 5 va na wonega gukhatshi va ngu khozeya Nungungulu ganiolu mavbanyelo yawe kha ma yeyedzi isoso. Gimbileya hwindzo ni vathu vovo. 6 Vbakari nya vathu vovo gu na duga vama va beya dzindrangani, va sengedzeya vanyamayi nya mba tiya, va gu sighohi va senga myonyo yawe, vanyamayi vovo dzigumbi nya gudogoreye nya myonyo yawe, 7 avo tepo yatshavbo va gu hevbula ganiolu gima kha va si kodzi gu vboheya guti nya lisine.

8 Gufana ni Janesi ni Jambiri va nga wugeya Mosi, ava navo va gu simama gu wugeya lisine. Mapimo nya vathu vava ma ghohekide khu guvbeleya, avo kha va tsakedwi khu Nungungulu kholu kha va vbanyi guya khu gukhodwa. 9 Ganiolu kha va vbohi hwindzo kholu wupumbu wawe wu na wonwa khu vatshavbo gufana ni vama vale vavavili. 10 Ganiolu uwe u landriside gwadi sihevbudzo sangu, u pimedzeya giyeyedzo nya mavbanyelo yangu, ni makungo yangu, ni gukhodwa gwangu, ni gulaphisa-monyo gwangu, ni lihaladzo langu, ni gutimiseya gwangu, 11 ni gutshaniswa gwangu ni dzitshanisa dzangu nya nga edzi nyi emisanidego nadzo Antiyokiya, Ikoniya ni Listra. Eni nyi timisede gutshaniswa gogu nigu Pfhumu yi nyi vbulugiside ga dzitshanisa dzatshavbo. 12 Khu lisine, vatshavbo vale va vbwetago gu thumeya Nungungulu womini wawe ni gu pwanana ni Kristo Jesu, anavo va na tshaniswa. 13 Ganiolu va nya gu vivbedwa khu myonyo ni vakanganyisi va na engedzeya wuvivbi wawe, va kanganyisa ni gu kanganyiswa.

14 Ganiolu uwe simama ga esi u nga hevbudzwa ni esi u tshamusedwego kala u si khodwa, kholu u ngu muti oyu a nga gu hevbudza iso 15 nigu gukhugeya na wu ngari gyanana u ngu yiti milowo nya guage, eyi yi gu khadzisago muthu nyo gengeye gasi u ta vbuluga khu gu ba u khodwe avba ga Kristo Jesu. 16 Milowo yatshavbo yi lovidwe na yi gu thangedwa khu liphuvbo la Nungungulu, nigu iyo yi ngu phasa gu hevbudza, gu kawuka, gu lulamisa silo ni gu laya khu gululama, 17 gasi gu githumi gya Nungungulu gi vbeleya ni gu bwe gi khala na gi dongide gu gira mithumo yatshavbo nya yadi.

4 Mbeli ga Nungungulu ni ga Kristo Jesu, oyu a na lamulago ava va vbanyago ni ava va fudego khu tepo nya gu wonegiswe gwaye nari Pfhumu nya Mufumo waye, nyi ngu gu embeya kheni: 2 Tshumayela lito; gira isoso khu givbiredza dziteponi nya dzadi ni dziteponi nyo garadze; laya, u kawuka, u kutsa khu gulaphisa-monyo gwatshavbo kha nga muhevbudzi nya wadi. 3 Kholu yi na vboha tepo eyi va na gu mba dzina gupwa gilo gi gimbileyanago ni sihevbudzo nya sadi, ganiolu va na dzi vbweteya vahevbudzi ava va na va nyagaledzeyago dzindzeve* gasi va tsakisa gudogoreya gwawe. 4 Va na diga gu engiseya lisine, va engiseya silo nya malipha. 5 Ganiolu, uwe thumisa gwadi mapimo yago siloni satshavbo, timiseya sigaradzoni, simama gu tshumayela mahungu nya yadi, wu gire gwadi thumo wa Nungungulu.

6 Eni nyo vbaladzwa nga ningelo nya vhinyu* nigu tepo nya gutshudziswe gwangu yi vbohide. 7 Nyi dwanide litunga nya ladi, nyi tutumide mapalisana kala nyi vboha mahegiso, nyi vbanyide khu gukhodwa. 8 Gukhugeya olu nyi vegedwe korowa nya gululame, eyi Pfhumu a gu mulamuli nyo lulame a na nyi ningago nga tshatshazelo ga litshigu a na tago, nigu kha na nga ninga eni basi, ganiolu a na ninga gambe vatshavbo va vireyago guwonegiswa gwaye.

9 Gira satshavbo u si kodzago gasi uta eno gwangu khu gu vbiredza. 10 Dhemasi a nyi digide khu kotani nya olu a golago litigo leli.* Uye hongode Tesalonika, Kresiseti hongode Galatiya nigu Tito hongode Dhalimasiya. 11 Nyi di tshala ni Luka basi. Delu ni Marko kholu uye a ngu nyi phasa ngudzu thumoni wowu. 12 Tikiko nyi mu rumede Efeso. 13 Tepo u na tago nyi teye ni libhadzi nyi nga li tshiya Trowadhe ni Karpo nigu nyi teye gambe ni mabhuku, ngudzu-ngudzu aya nya malowo.

14 Alexandre mupfhuli nya kobre a nyi girede guvivba nya gukhongolo ngudzu. Jehovha a na mu tsayisa guya khu mithumo yaye. 15 Anuwe dzi woneye naye kholu ganedzide ngudzu mahungu yathu.

16 Gudziemeleyani gwangu nyo pheye mbeli nya wufumu mwalo a nga ema ni eni, vatshavbo va di nyi diga. Nyo lombeleya gu kheni Nungungulu a va divaleya. 17 Ganiolu, Pfhumu yi di ema ni eni yi nyi tiyisa gasi khavbo gwangu thumo wu girwa khu tshivba ni tshivba nigu mayigo yatshavbo ma wupwa. Nigu eni nyi vbulugisidwe khu kanani nya ngala. 18 Pfhumu yi na nyi tshudzisa guvivbani gwatshavbo nigu yi na nyi vbulugisa gasi nyi beya Mufumoni waye wa ndzadzini. A na ningwe wudhumo kala gupindruga ni gupindruga. Amen.

19 Losedzeya Prisila ni Akila ni vandrangani ga Onesiforo.

20 Erasto tshade Korinto, ganiolu Trofimo nyi mu tshide Mileto khu gu ba a dwala. 21 Gira satshavbo u si kodzago gasi u vboha eno na gi si gu pheyi girame.

U ngu losedzedwa khu Ewubhulo, ni Pudhenti, ni Linu, ni Klawudhiya ni vandruye vatshavbo.

22 Nungungulu wathu a na gu kategise khu kotani nya liphuvbo nya ladi u yeyedzago. Nyi ngu mi suveya wuwadi nya wukhongolo ngudzu wa Nungungulu.