LIDANGALIYA LI HONGOLAGO GA TITO

1 Eni Pawulo, githumi gya Nungungulu ni mupostoli wa Jesu Kristo guya khu gukhodwa ga vale va hathidwego khu Nungungulu ni guti nya lisine gu yelanago ni gu thumeya Nungungulu khu gutumbega, 2 gu seketedwago avba nya gutumba nya womi nya gupindruge owu Nungungulu a si liphigo a hi tumbisidego gale yoyo. 3 Ganiolu khu tepo yakone uye tivegiside lito laye khu gu thumisa thumo nyo tshumayele, owu nyi ningidwego guya khu gileletelo gya Muvbulugisi wathu, Nungungulu. 4 Nyi ngu gu loveya uwe Tito, nyi gu wonago nga gyanana gyangu nya gu gi velege khu kotani nya gukhodwe ga gumogo hi gu nago, kheni:

Nyi ngu mi suveya wuwadi nya wukhongolo ngudzu ni gurula gu tago khiyo ga Nungungulu Papayi, ni Kristo Jesu Muvbulugisi wathu.

5 Nyi gu tshide Kreta gasi u lulamisa silo si nga ba si yede gu lulamiswa ni gu bwe u hatha vathu gasi gu khala madhota dhoropani ni dhoropani guya khedzi nyi gu leletedego khidzo, kheni: 6 Lidhota gu vbwetega nari mwama a gu mwalo gisolo, a gu na ni nyamayi moyo, a gu na ni sanana si khodwago, si gu mwalo mavbanyelo nya guvivbe mwendro gu mba engisa. 7 Kha nga olu li hathidwego khu Nungungulu gasi gu thangeya libandla, lidhota gu vbwetega na liri mwalo gisolo, na li si bangi hungo, na li si vbiredzeyi gu goroga, na li si seyi guvbindra pimo, na liri mwalo maghilivindri ni wudambani. 8 Ganiolu, gu vbwetega nari muthu a hakhago gwadi vapfhumba, a golago wuwadi, a pimisago gwadi,* a lulamidego, a tumbegidego, a kodzago gu dzi phara. 9 A phareleyago gwadi avba nya lito nyo tumbege la Nungungulu tepo a hevbudzago, a kodzago gu tiyisa vambe khu gu thumisa sihevbudzo si pwalago a bwe a kawuka vale va ganedzago sihevbudzo soso.

10 Kholu gu na ni sindragamilayo nya singi, vathu va ganeleyago silo nya mba pwala ni vakanganyisi, ngudzu-ngudzu avo va bangeleyago avbo nya wugwera. 11 Gu vbwetega va segwa magana kholu vama vava va gu tshungunula dzindranga khu gu hevbudza silo nya mba pwala, va feya gu wuyedwa. 12 Moyo wawe, a gu muprofeti wawe a di khuye: “Vathu va Kreta va ngu lipha ngudzu, sirengo nyo garadze nya likhabi, makhondrobwa ni gu migara.”

13 Isoso a ganedego lisine. Khu kharato, simama gu va kawuka khu tshivba gasi va tiya gukhodwani, 14 va si engisi dzikaringani nya Vajudha ni sileletelo nya vathu va ndreyago lisineni. 15 Silo satshavbo si agide ga vale va agidego. Ganiolu ga vale nya mba handzega, va gu mwalo gukhodwa, gimwalo gi agidego, kholu mapimo yawe ni mavhalo yawe si nyenyezide. 16 Avo va gu ganeya guagani gu khavo va ngu muti Nungungulu, ganiolu va mu bomba khu mithumo yawe kholu va nyenyezide, kha va engisi, nigu kha va yedwi khu gu gira ni wevbini thumo nya wadi.

2 Uwe simama gu ganeya esi si gimbileyanago ni sihevbudzo nya sadi. 2 Vama va dandridego khu tanga gu vbwetega nari vathu va kodzago gu dzi pimeya ga satshavbo va girago, va vidzidwego, va pimisago gwadi,* va tiyidego gukhodwani, va gu na ni lihaladzo ni gu timiseya. 3 Khu ndziya nyo fane, vanyamayi va dandridego gu vbwetega na vari ni mavbanyelo nya yadi, na vari mwalo milembo, na va si seyi vhinyu guvbindra pimo, na vari vahevbudzi nya silo nya sadi 4 gasi va kodza gu hevbudza vanyamayi va ngarigo vaphya gu haladza vama vawe ni gu haladza sanana sawe. 5 Va va hevbudza gambe gu manega ni mapimo, mavbanyelo ma agidego, gu sayisa dzindranga dzawe khu sighingi, gu manega ni wuwadi, gu dzi nogisa ga vama vawe gasi gu si vadwi lito la Nungungulu.

6 Khu ndziya nyo fane, simama gu kutsa madzaha gu manega ni mapimo nya yadi, 7 u khala giyeyedzo nya gyadi ga satshavbo. Hevbudza esi si agidego khu gukhathala, 8 u thumisa malito ma phasago, ma na gu mba sodwa, gasi vawugeyi va khala dzitshoni, va hamuga ndziya nyo ganeye guvivba khethu. 9 Sithumi si na dzi vege vbavbatshi ga vamune vaso siloni satshavbo, si zama gu va tsakisa khu gu mba va hakha khu ndziya nyo vivbe, 10 si si va beyi, ganiolu si yeyedza gutumbega ga satshavbo, gasi sihevbudzo sa Muvbulugisi wathu, a gu Nungungulu, si zundzwa ga satshavbo.

11 Kholu wuwadi nya wukhongolo ngudzu wa Nungungulu wu yeyedzidwe gasi guvbulugisa vathu nya mafumbo yatshavbo. 12 Uwo wa gu hi hevbudza gu nyenya mavbanyelo ma gu mba gimbileyana ni gugola ga Nungungulu, hi vbanya khu ndziya yi yeyedzago gu khiyo hi na ni mapimo, gululama, hi bwe hi khozeya Nungungulu khu gutumbega tigoni* momu, 13 na hi ngo vireya gutumba nya gutsakise ni guwonegiswa nya gungangameye ga Nungungulu nya khongolo ni Muvbulugisi wathu, Jesu Kristo, 14 oyu a dzi ningedego khu kotani yathu gasi gu hi tshudzisa ga silo satshavbo si si gimbileyanigo ni nayo ni gu hi agisa gasi hi khala vathu vaye va hathegidego, hi feya gu gira mithumo nya yadi khu monyo watshavbo.

15 Simama gu ganeya khu silo sesi, ni gu tiyisa, ni gu kawuka guya khedzi u leletedwego khidzo. U nga dzumeleyi ni moyo a gu yeyisa.

3 Simama gu va dundrugisa gasi va engisa ni gu dzi nogisa ga vathangeyi ni dzipfhumu, va dzi emiseya gu gira silo satshavbo nya sadi. 2 Va dundrugise gambe gu mba ganeya guvivba khu muthu, va si khali va nya mayunga ganiolu va rula va bwe va gireya wuwadi vathu vatshavbo. 3 Kholu gale anethu hi di siti gilo, hi di si engisi, hi di gu pengisidwe, hi diri sibotshwa nya gudogoreye nyo hambane-hambane, hi di gu vbanya khu guvivba ni lidiwo, hi di gu nyenyezide nigu hi di gu nyenyana khu gyathu.

4 Ganiolu, tepo Muvbulugisi wathu Nungungulu a nga yeyedza wuwadi waye ni lihaladzo laye ga vathu, 5 uye a di hi vbulugisa khu gu hi handza a hi ninga womi ni gu hi wusedza khu liphuvbo nya guage (nasiri khu gu ba hi giride silo nya gululame, ganiolu khu kotani nya wuhindzi waye). 6 Uye hi girede wuhindzi, a hi guhuleya liphuvbo lolo khu gu thumisa Jesu Kristo, Muvbulugisi wathu, 7 gasi gu hwane nya gu ba hi wonidwe na hi lulamide khu kotani nya wuwadi waye nya wukhongolo ngudzu, hi dzi buza khu womi nya gupindruge hi tumbisidwego.

8 Malito yaya ma tumbegide nigu nyo vbweta gu kheni u simama gu tshingisa silo sesi gasi gu vale va khodwego ga Nungungulu va simama gu gira silo nya sadi. Silo sesi khyadi ngudzu ni gu si ngu phasa vathu.

9 Ganiolu, u nga dzi bedzedzeyi ne vbadugwana omu nya mayunga nya wupumbu, omu nya matimo ma ganeyago khu malina ya vakokwe, midwanisano maningano ni Nayo kholu silo sesi kha si phasi gilo nigu si mwalo lisima. 10 Ganiolu, muthu a vegago guhambana vbakari nya vathu, hwane nya gu ba u mu kawukide nyo pheye, u mu kawuka nya wuvili u nga dzi pwananisi naye. 11 Dziti gu khuwe uye ndreyide ndziyani, nigu a gu ghoha a bwe a dzi lamula abune.

12 Tepo nyi na gu rumeyago Artema mwendro Tikiko, gira satshavbo u na si kodzago gasi u ta nyi wuseya Nikopoli, kholu nyi na ya khala iyoyo khu nango nya girame. 13 Ninga Zena, oyu a wu tigo gwadi Nayo, satshavbo a si vbwetago gasi a gira gwadi liendro laye ni Apolo nuye gasi gu a si hamugi gilo. 14 Nigu vandriyathu gu vbwetega va hevbuleya gu gira silo nya sadi gasi gu va kodza gu phasa ga gu tshuka gu dugeleya gilo khavba ni avba; va ninga mihandro.

15 Vatshavbo nyi gu navo eno va ngu mi losedzeya. Losedzeya ava va hi haladzago gukhodwani.

Wuwadi nya wukhongolo ngudzu wa Nungungulu wu na khale ni enu mwatshavbo.