LIDANGALIYA LI HONGOLAGO GA VAHEBHERU

1 Gale yoyo, Nungungulu ganede ni vakokwe vathu khu gu thumisa vaprofeti dzitepo nya dzingi, khu dzindziya nyo hambane-hambane. 2 Olu ga matshigu yaya nyo hegise uye ganede ni ethu khu gu thumisa Gyanana, egi a gi vegidego kha nga gihodza thomba nya silo satshavbo, a gu egi gambe a gi thumisidego gasi gu gira litigo leli.* 3 Igyo giyeyedzo nya wudhumo wa Nungungulu nigu giwonegiso nya edzi Nungungulu a gu idzo, nigu gya gu gira gu silo satshavbo si manega khu gu thumisa lito laye nya tshivba. Nigu hwane nya gu ba gi agiside sighoho sathu, gi di khala khu nyamudye ga Nungungulu a khugegidego ngudzu ndzadzini. 4 Khu kharato, igyo gi di khala khongolo ngudzu guvbindra dzingilozi, kha nga olu gi ningidwego lina nya ladi ngudzu guvbindra dzingilozi.

5 Khu giyeyedzo, khu yevbini ngilozi eyi Nungungulu a tshukidego a yi embeya, khuye: “Uwe u gyanana gyangu; muhuno eni nyi khade papayi wago”! Nigu bwe khuye: “Eni nyi na khala papayi wayo, nigu iyo yi na khala gyanana gyangu”! 6 Ganiolu, tepo Nungungulu a nga tisa gambe Matewula yaye mafuni, a di khuye: “Dzingilozi dzatshavbo dza Nungungulu dzi na mu khidzimeye.”

7 Nigu a di ganeya maningano ni dzingilozi, khuye: “Uye a gu gira gu dzingilozi dzaye dzi manega ni tshivba nya yikhongolo a bwe a gira gu sithumi saye si khala lilavbelavbe nya nilo.” 8 Ganiolu, maningano ni Gyanana, uye a di khuye: “Nungungulu gikhalo gyago nya wufumu khu gupindruga ni gupindruga, nigu ndronga nya wufumu wago i ndronga nya gululame. 9 Uwe u gode gululama, u nyenya esi nyo vivbe. Khigyo gighelo gyogyo gi giridego gu Nungungulu, a gu Nungungulu wago, a gu todza khu mafura nya gutsake guvbindra dzimbe dzipfhumu.” 10 Nigu: “Uwe Pfhumu, gupheyani u giride gisekelo nya mafu, nigu ndzadzini i thumo nya mandza yago. 11 Iso si na fuva, ganiolu uwe u na simama; iso si na hagala nga sombo, 12 nigu u na si fumba nga sombo u bwe u si vbindrugedza. Ganiolu, uwe kha wu vbindrugedzi, nigu myaga yago kha yi hegisi.

13 Khu yevbini ngilozi a nga tshuka a yi embeya, khuye: “Khala khu nyamudye gwangu kala nyi vega valala vago vbavbatshi nya migondro yago”? 14 Ina idzo dzatshavbo khandri dzingilozi dzi girago thumo nya guage, dzi rumedwego gasi gu thumeya ava va na manago guvbanyiswa?

2 Khu kharato, hi yede gu theya ngudzu kota khesi hi si pwidego gasi gima hi si ndreyi ndziyani. 2 Kholu abari gu esi si ganedwego khu dzingilozi lisine nigu abari gu gindraga-milayo ni oyu a si engisigo va tsayisidwe khu guya khu gululama, 3 hi na vbuluga kharini ha gu haganiseya guvbulugiswa gogu nya gukhongolo? Kholu ugo gu phede gu huweledwa khu gu thumiswa Pfhumu yathu nigu gu fakazidwe khu vale va nga gupwa. 4 Nigu Nungungulu nuye fakazide khu gu a gira siwoniso, silewugiso ni mithumo nya yingi nya tshivba a bwe a ningeya liphuvbo laye nya guage khu guya khu gugola gwaye.

5 Nungungulu kha ninga dzingilozi litigo eli a hi tumbisago, eli hi ganeyago khilo. 6 Ganiolu ga wumbe wulanga fakazi mweyo yi di khiyo: “Ginani muthu gasi gu mu dundruga, mwendro ginani gyanana nya muthu gasi gu gi khathaleya? 7 U mu giride a khala nya dugwana ga dzingilozi; u mu ningide wudhumo ni wuzundzo ni gu bwe u mu ninga tshivba nya gu fumeye mithumo nya mandza yago. 8 U vegide silo satshavbo vbavbatshi nya migondro yaye.” Khu gu ba a vegide silo satshavbo vbavbatshi nya migondro yaye, Nungungulu a mu ningide tshivba nya gu fumeye silo satshavbo, ambari ulolo hi si gu woni gu khethu Jesu a ngu fumeya silo satshavbo. 9 Ganiolu Jesu oyu a nga ba ari vbavbatshinyana nya dzingilozi, olu ningidwe wudhumo ni wuzundzo khu gu ba a fude gasi gu khu kotani nya wuwadi nya wukhongolo ngudzu wa Nungungulu a feya vathu vatshavbo.

10 Silo satshavbo si giridwe gasi gu ninga wudhumo Nungungulu nigu si giridwe khu kotani yaye. Si ngu yela gu uye a gira gu Pfhumu yi ningago guvbanya yi vbeleya khu gu ba yi tshanisekide, Nungungulu va vbulugiside khu gu thumisa Pfhumu yeyi yi ningago guvbanya. 11 Kholu oyu a agisago* ni vale va agiswago vatshavbo va gu dugeya ga papayi moyo. Khu kotani nya isoso, Jesu khapwi dzitshoni khu gu va rana gu khuye vandriyaye, 12 kha nga a ganeyago, khuye: “Nyi na huweleya lina lago ga vatshavbo vandriyangu nyi bwe nyi gu dhumisa khu dzindzimo vbakari nya libandla.” 13 A bwe khuye: “Nyi na mu tumba.” A engedza gambe khuye: “Kheni oyu ni sanana esi Jehovha a nyi ningidego.”

14 Khu kharato, kha nga olu “sanana” si gu vathu nya novba ni nyama, anuye a diri muthu a nga ba ari ni novba ni nyama gasi gu khu kotani nya gufe gwaye a fuvisa wule a gu na ni makodzelo nyo vange gufa, a gu Dhiyabhulosi, 15 a bwe a tshudzisa gambe vale nya gu khu kotani nya gu thave gufa va di vbindrugedza va khala dzigumbi nya guthave gogo. 16 Kholu uye khandri a gu phasedzeya dzingilozi, ganiolu a gu phasedzeya gitugulwana gya Abrahama. 17 Khu kotani nya isoso, si vbwetegide gu a fana ni vandriyaye khu dzatshavbo dzindziya gasi a khala muprista nya khongolo ngudzu a gu na ni wuhindzi a bwe a tumbega avba nya silo si yelanago ni Nungungulu gasi a ningeya muphaso nyo tshudzise sighoho nya vathu. 18 Kha nga olu uye a tshanisekidego tepo a nga lingwa, a ngu si kodza gu phasa ava va lingwago.

3 Khu kharato vandriyangu nyo hathege, enu mu ranidwego gu hongola ndzadzini, dundrugeyani khu giyeyedzo gya Jesu, oyu hi mu wonago nga mupostoli ni muprista nya khongolo. 2 Uye tumbegide ga Wule a mu hathidego, kha nga Mosi nuye a tumbegidego nyumbani gwatshavbo ga Nungungulu. 3 Kholu Jesu a ngu yedwa khu wuzundzo nya wukhongolo ngudzu guvbindra wa Mosi kha nga olu oyu a vbahago nyumba a gu na ni wuzundzo ngudzu guvbindra nyumba yakone. 4 Kha nga hi dzitigo, nyumba ni nyumba yi vbahidwe khu muthu nyo khaguri, ganiolu oyu a giridego silo satshavbo khu Nungungulu. 5 Mosi a diri githumi nyo tumbege nyumbani gwatshavbo ga Nungungulu, iso si khadego wufakazi nya silo si nga hadzi ganedwa khu gu gimbiya nya tepo. 6 Ganiolu, Kristo tumbegide nga Gyanana nyumbani ya Nungungulu. Ethu hi nyumba ya Nungungulu ho nga nga phareleya si tiya kala mahegiso avba nya gutshulege gwathu gu ganeya ni avba nya gutumbe hi dzi khusedzago khugo.

7 Khu kharato, kha nga liphuvbo nya guage li ganeyago gu khilo: “Muhuno mwa gu engisa lito laye, 8 mu nga bangisi mihungo yanu gu fana ni tepo eyi vakokwe vanu va nga nyi zangarisa, gu fana ni litshigu eli va nga nyi linga giwulani, 9 avbo vakokwe vanu va nga nyi linga va bwe va nyi wugeya ambari va wonidego mithumo yangu khu 40 myaga. 10 Khiso si nyi giridego nyi zangareya gitugulwana gegi nyi ganeya, kheni: ‘Avo kha va nyi engisa myonyoni gwawe, nigu kha vati dzindziya dzangu.’ 11 Khu kharato, nyi sambanyide omu nya zanga yangu gu kheni: ‘Kha va na nga beya guhefemulani gwangu.’”

12 Dzi woneyeni vandruye, gasi ne ni moyo wanu a si haguleyi monyo nya guvivbe wu gu mwalo gukhodwa khu gu a dzi hambanisa ni Nungungulu a vbanyago. 13 Ganiolu, simamani gu tiyisana khu gyanu na yi ngo romo tepo yi ranwago gu pwani “Muhuno,” gasi ne ni moyo wanu a si bangiswi hungo khu tshivba nya gusengedzeye nya gighoho. 14 Kholu hi na mana esi Kristo a nga si mana ha gu simama gu phareleya si tiya kala mahegiso avba nya gutumba hi gu nago gukhugeya gupheyani. 15 Kha nga si ganedwago gu pwani: “Muhuno mwa gu engisa lito laye, mu nga bangisi myonyo yanu kha nga tepo eyi vakokwe vanu va nga nyi zangarisa.”

16 Khu vamani va pwidego malito yaya va vbedza va zangarisa ngudzu Nungungulu? Ina khandri vatshavbo vale va dugidego khu Egipto na va thangedwa khu Mosi? 17 Nigu khu vamani ava va zangarisidego Nungungulu ndrani nya 40 myaga? Ina khandri vale va nga ghoha, avo sirumbi sawe si thegidego giwulani? 18 Khu vamani ava a sambanyidego gu khuye kha va na nga beya guhefemulani gwaye? Ina khandri vale va nga mba mu engisa? 19 Khu kharato, hi ngu si wona gu khethu avo kha va si kodza gu beya kholu va diri mwalo gukhodwa.

4 Kha nga olu hi ngarigo ni gitumbiso nyo beye guhefemulani gwaye, dzi woneyeni gasi ne ni moyo wanu a si luzekedwi khu lithomo leli. 2 Kholu anethu hi tshumayedwe mahungu nya yadi nga avo, ganiolu mahungu va nga mapwa kha ma va phasa kholu kha va pwanana gukhodwani ni vale va nga ma engisa. 3 Ganiolu, ethu hi yeyedzidego gukhodwa hi ngu beya guhefemulani gwaye kha nga a ganedego, khuye: “Khu kharato, nyi sambanyide omu nya zanga yangu gu kheni: ‘Kha va na nga beya guhefemulani gwangu,’” ambari olu uye a hefemudego hwane nya gu ba a vbedzide thumo waye nya gu vange litigo. 4 Kholu ga gipandre nyo khaguri nya milowo nya guage, ganede esi maningano ni litshigu nya wu 7: “Nigu khu litshigu nya wu 7 Nungungulu hefemude ga mithumo yaye yatshavbo,” 5 a bwe khuye: “Kha va na nga beya guhefemulani gwangu.”

6 Khu kharato, kha nga olu gu ngo keneleyago vathu nyo khaguri gu beya ni olu vale va nga pheya khavo gu tshumayedwa mahungu nya yadi va nga mba beya khu kotani nya gu mba engisa, 7 uye hathide limbe litshigu khu gu khuye “Muhuno” kha nga si lovidwego gale omu nya ndzimo ya Dhavhidhe gu pwani: “Muhuno, mwa gu engisa lito laye, mu nga bangisi myonyo yanu.” 8 Kholu nari khatshi Josuwa a di va vbohiside wulangani nya guhefemule, Nungungulu na sa ganeya khu limbe litshigu khu gu gimbiya nya tepo. 9 Khu kharato, vathu va Nungungulu va ngo tshaledwe khu Sabhadho gasi va hefemula. 10 Kholu oyu a bedego guhefemulani ga Nungungulu a hefemude gambe avba nya mithumo yaye, kha nga Nungungulu nuye a hefemudego avba nya mithumo yaye.

11 Khu kharato, girani satshavbo mu si kodzago gasi mu beya guhefemulani momu gasi ne ni moyo a si pheyi gu landreya ndziya nya gu mba engisa nga avo. 12 Kholu lito la Nungungulu li ngu vbanya nigu li na ni tshivba, nigu ilo li vbiride ngudzu guvbindra ni yevbini xipadha yi lodzidwego eno ni eno, nigu ilo li ngu beya nyo bwe li hambanisa hefemulo* ni liphuvbo* ni gu bwe li beya ni ndrani nya sirambo, nigu li ngu si kodza gu tugula mapimo ni guwegeleya nya monyo. 13 Gimwalo givangwa gi sihadego mahoni gwaye, ganiolu silo satshavbo somo tendrelani nigu si ngu wonwa khu wule hi na ya dzi hlamuleyago avbo gwaye.

14 Kha nga olu hi gu na ni muprista nya khongolo ngudzu a bedego ndzadzini, a gu Jesu Gyanana gya Nungungulu, hongoleni hi simamani gu ganeya khu gukhodwa hi gu nago avbo gwaye. 15 Kholu muprista nya khongolo ngudzu hi gu naye kha tandregi gu pwisisa gu mba vbeleya gwathu, ganiolu uye lingidwe khu dzindziya dzatshavbo nga ethu, ganiolu kha ghoha. 16 Khu kharato, na hi si kanakani, hongoleni hi hidzimeyani avba nya gikhalo nya wufumu gya Nungungulu, oyu a ningago wuwadi nya wukhongolo ngudzu hi bwe hi gombeya gwaye na hi tshulegide gasi a hi gireya wuhindzi hi bwe hi mana wuwadi waye nya wukhongolo ngudzu wu na hi phasago khu tepo yakone.

5 Kholu ni wevbini muprista a hathidwego vbakari nya vathu, hathidwe gasi gu va thumeya avba nya silo si gimbidzisanago ni gugola ga Nungungulu gasi a ningeya siningwa ni miphaso nya sighoho. 2 Uye a ngu kodza gu pweya wusiwana avo va gu mwalo guti ni avo va ghohago kha nga olu nuye a emisanago ni sigaradzo saye. 3 Khu kotani nya isoso, yede gu ningeya miningelo khu kotani nya sighoho saye kha nga edzi a girago khidzo ga vathu.

4 Mwalo a dzi hathago gasi gu khala muprista nya khongolo, ganiolu khu Nungungulu basi a mu hathago gu fana ni edzi a giridego khidzo ga Aroni. 5 Khu gu fana, Kristo kha dzi dhumisa abune khu gu dzi gira muprista nya khongolo, ganiolu a di dhumiswa khu Wule a nga mu embeya, khuye: “Uwe u gyanana gyangu; muhuno nyi khade papayi wago.” 6 Kha nga Milowo yi gu khiyo: “Uwe u muprista kala gupindruga gu fana ni Melikizedheki.”

7 Tepo Kristo a nga ba ari omu mafuni, lombide khu monyo watshavbo na gu liya ga wule a nga ba a si kodza gu mu vbulugisa gufani nigu uye pwidwe khu kotani nya olu a thavago Nungungulu. 8 Ambari olu a nga ba ari gyanana gyaye,* uye hevbulede gu engisa khu gutshaniseka a gu vbanyidego. 9 Hwane nya gu ba Nungungulu a mu khadziside muthu nyo vbeleye, ningidwe thumo nyo ninge guvbanya nya gupindruge ga vatshavbo va mu engisago; 10 kholu Nungungulu khuye a nga mu hatha gasi gu khala muprista nya khongolo gu fana ni Melikizedheki.

11 Hi na silo nya singi nyo mu embeyeni maningano naye, ganiolu si ngu garadza gu mi tshamuseyani kholu enu mu ngu hweya gu pwisisa. 12 Ambari olu si nga ba si lomba gu ba na muri vahevbudzi, mu ngu gu vbweta gu hevbudzwa silo nyo pheye esi mu nga si hevbula omu nya lito la Nungungulu, mwa gu vbweta leti nasiri guhodza nyo tiye. 13 Kholu watshavbo oyu a simamago gu vbanya khu leti kha liti lito nyo lulame kholu gyanana. 14 Ganiolu, guhodza nya gutiye ga gu lumba vathu nyo vidzwe, ava tepo yatshavbo va thumisago makodzelo yawe nyo pimise gasi gu hambanisa silo nya sadi ni silo nya mba sadi.

6 Olu hi digidego sihevbudzo nyo pheye maningano ni Kristo, hongoleni hi vidzwani, hi si tsitsini gambe gisekelo, a gu gu dzilaya avba nya mithumo nya gufe, hi khodwa iyo ga Nungungulu, 2 sihevbudzo maningano ni gubhabhatiswa, gu handzega mandza, gu wuswa ga ava va fudego ni gulamudwa nya gupindruge. 3 Isoso hi na gira, Nungungulu a gu hi dzumeleya.

4 Maningano ni vale va hakhidego guwonegeya, va hakhidego giningwa gi tago khu ndzadzini, ni liphuvbo nya guage, 5 ava va hakhidego lito nya ladi la Nungungulu ni makategwa ma gimbileyanago ni esi si tago, 6 ambari ulolo va bweleleya hwane, kha si kodzegi gu va phasa, kholu avo va gu khokhotheya gambe Gyanana gya Nungungulu ni gu bwe va gi tshonegisa vathuni. 7 Kholu Nungungulu a ngu kategisa mafu tepo yatshavbo yi wago ndzadzi, khavbovbo gu buga dzimbewu dzi phasago vale va dzi limago. 8 Ganiolu, mafu ma gu tshuka ma bugisa maheho ni miba, kha ma phasi gilo nigu momo vbafuvbi ni gu vadwa, ma hegisa khu gu vbiswa.

9 Sigodwa sangu, ambari olu hi ganeyago khu ndziya yeyi, hi ngu tiyisega gu khethu enu mu tshukwana ngudzu guvbindra vale va nga bweleleya hwane nigu mu ngu gira silo si na girago gu Nungungulu a mi vbulugisa. 10 Nungungulu lulamide, khu kharato gima kha na nga divala thumo wanu ni lihaladzo mu li yeyedzidego khu kotani nya lina laye, khu gu thumeya va nyo aga ni olu mu ngo simamago gu va thumeya. 11 Ha gu lombeleya gu khethu moyo ni moyo wanu a yeyedza sighingi sasimweso a yeyedzidego gupheyani, gasi gu gutumba gwanu gu tiya kala mahegiso, 12 gasi gu mu si khali migara, ganiolu mu pimedzeya vale va na hakhago esi si tumbisidwego khu kotani nya gukhodwe ni gulaphisa monyo va gu nago.

13 Kholu tepo Nungungulu a nga gira gitumbiso ga Abrahama, kha nga olu si nga ba si si kodzegi gu sambanya khu mumbe muthu nya khongolo gu vbindra uye, a di sambanya khuye abune, 14 khuye: “Khu lisine nyi na gu kategisa, nigu nyi na engedzeya situgulwana sago.” 15 Khu kharato, hwane nya gu ba Abrahama a laphiside monyo, a di hakha gitumbiso gegi. 16 Vathu va gu sambanya, va gu sambanya khu lina nya muthu nya khongolo guvbindra avo. Gisambanyo gyogyo, gya gu gira gu gu si manegi gu ganedzisana kholu gya gu yeyedza gu khigyo esi va ganedego lisine. 17 Tepo Nungungulu a hungidego gu yeyedza ga ava va na hodzago thomba nya gitumbiso gu khuye makungo yaye kha ma na nga vbindrugedza, a di si tiyisegisa khu gu sambanya. 18 Silo sesi sasivili Nungungulu a giridego* gima kha si na nga vbindrugedza nigu Nungungulu gima kha liphi. Silo sesi si ngu hi tiyisa ethu hi thaveledego ga Nungungulu, gasi hi phareleya si tiya avba nya gitumbiso hi ningidwego. 19 Hi na ni gutumba gogu, ugo gu fanago ni girikiso* nya womi wathu. Ugo gu tiyide nigu gu ngu tumbega. Ugo ga gu hi bedza ndrani, khu hwane nya kortina, 20 omu Jesu a nga beya khu kotani yathu, a hi tuleya ni gu hi dongiseya ndziya, ni gu bwe a khala muprista nya khongolo ngudzu gu fana ni Melikizedheki, kala gupindruga.

7 Kholu Melikizedheki a nga ba ari pfhumu ya Salema a bwe a thuma gambe kha nga muprista wa Nungungulu a khugegidego a di manana ni Abrahama a nga ba a wuya khiyo nyo songe dzipfhumu, a mu kategisa, 2 nigu Abrahama a di mu ninga gipandre nya wu 10 nya satshavbo a nga ba a si manide. Lina laye la gu vbindrugedzedwa, gupheya la gu tshamuseya “Pfhumu nya Gululame,” nigu uye pfhumu ya Salema gambe, si thulago gu khiso “Pfhumu nya Gurule.” 3 Uye a diri mwalo papayi ambari mamayi nigu kha ga nga ba gu tidwa gilo maningano ni vakokwe vaye. Kha si tidwi gu pwani velegidwe lini mwendro litshigu a fudego, ganiolu uye giridwe na gu fana ni Gyanana gya Nungungulu nigu simamide ni wuprista waye kala gupindruga.

4 Nga wonani wukhongolo wa mwama yoyu, oyu Abrahama kokwe wathu a mu ningidego gipandre nya wu 10 nya silo nya sadi a si phangidego. 5 Lisine gu guya khu nayo, vale va nga ba vari sanana sa Levhi va nga ba va hakhide wuprista va di ningidwe nayo nyo hengiseye vathu gipandre nya wu 10 nya silo sawe satshavbo, vathu vovo gu diri vandriyawe ambari olu va nga ba vari situgulwana sa Abrahama. 6 Ganiolu, mwama yoyu kha nga ba a dugeya ga na Levhi, ambari ulolo ningidwe khu Abrahama gipandre nya wu 10 nya silo a nga ba a si manide a bwe a kategisa oyu Nungungulu a nga ba a mu tumbiside. 7 Vathu vatshavbo va ngu dzumeya gu khavo oyu a kategisago, khongolo guvbindra oyu a kategiswago. 8 Valevhi va hakhide gipandre nya wu 10 nigu avo va diri vathu va fago, ganiolu mumbe mwama a hakhidego gipandre nya wu 10, milowo yi ngu fakaza gu khiyo uye a ngu vbanya. 9 Nigu gu nga ganedwa gu pwani khu kotani ga Abrahama ambari Levhi oyu a nga ba a hakha gipandre nya wu 10, anuye ningede gipandre nya wu 10. 10 Kholu a di si gu velegwi nga gitugulwana gya kokwe waye Abrahama tepo Abrahama a mananidego ni Melikizedheki.

11 Khu kharato, abari gu si di gu kodzega gu vbeleya khu gu thumisa wuprista wa Valevhi (kholu wuprista wu diri gilo nya lisima ngudzu ga nayo owu wu ningidwego vathu), khu ginani si nga ba si vbwetega gu gu manega mumbe muprista nyo fane ni Melikizedheki, a si fanigo ni Aroni? 12 Kholu tepo wu vbindrugedzwago wuprista, Nayo nuwo gu vbwetega wu vbindrugedzwa. 13 Kholu mwama gu ganedwago silo sesi maningano naye a guta khavbo nya limbe lihundzu nya gu gima mwalo ni moyo nya lihundzu lolo a thumidego vbaalitaritunu. 14 Kholu somo guagani gu khiso Pfhumu yathu yi diri gitugulwana gya Judha, ganiolu Mosi kha ganeya gu khuye wuprista wu di hadzi guta khavbo nya lihundzu lolo.

15 Nigu isoso si ngu wonega gwadi tepo a nga dugeleya mumbe muprista a fanago ni Melikizedheki, 16 oyu a khadego muprista nasiri khu kotani nya ndranga a dugeyago ga iyo khu guya khu nayo, ganiolu khu tshivba yi ningago womi wu si fuvigo. 17 Kholu gu lovidwe omu nya Milowo gu pwani: “Uwe u muprista kala gupindruga gu fana ni Melikizedheki.”

18 Khu kharato, nayo wa gale wa gu tshipiswa kholu wu mwalo tshivba nigu kha wu phasi gilo. 19 Kholu Nayo gimwalo wu gi giridego gi vbeleya, ganiolu gutumba nya gwadi ogu Nungungulu a hi ningidego gu giride gu isoso si kodzega, nigu khu kotani nya ugo ethu hi ngu hidzimeya ga Nungungulu. 20 Nigu muprista yoyu kha dugeleya na gu nga si girwi gisambanyo. 21 (Lisine gu khethu vomo vama va nga khala vaprista nya mba gira gisambanyo, ganiolu uye khade muprista khu kotani nya gisambanyo gi giridwego maningano naye, gi giridwego khu wule a nga khuye: “Jehovha sambanyide nigu kha na nga bweleleya hwane, ‘Uwe u muprista kala gupindruga’”), 22 Jesu khade gitiyisegiso nya pwanano nya wadi. 23 Nigu si di gu lomba gu vaprista nya vangi va tshikedzana kholu va di gufa, gufa gu di gu gira gu si si kodzegi gu avo va simama thumoni gwawe. 24 Ganiolu, kha nga olu Jesu a simamago gu vbanya kala gupindruga, wuprista waye kha wu na nga tshikedzwa. 25 Nigu uye na ni makodzelo nyo vbulugise khu guvbeleya vale va hidzimeyago ga Nungungulu khuye, kholu uye a gu simama gu vbanya khu gupindruga ni gupindruga gasi gu va lombeleya ga Nungungulu.

26 Kholu si ngu vbwetega gu hi manega ni muprista nya khongolo nyo khale kharato: nyo tumbege, nya mba na nandru, a agidego, a hambanisidwego ni sighohi a bwe a khusega guvbindra ndzadzini. 27 Uye kha fani ni vaprista vale vambe nya vakhongolo, kha si vbwetegi gu a ningeya miphaso tshigu ni tshigu; gupheya a ningeya muphaso nya gu handze sighoho saye, a vbedza a ningeya muphaso nyo handze sighoho nya vathu. Kholu uye giride isoso gumogo si vbeleya, tepo a dzi ningedego uye mune. 28 Nayo wa gu hatha sighohi gasi si khala vaprista nya vakhongolo, ganiolu lito nya gisambanyo egi gi giridwego na wu si gu manegi Nayo li hathide gyanana, egi gi giridwego gi vbeleya kala gupindruga.

8 Esi hi vbwetago gu ganeya khesi: Hi na ni muprista nya khongolo a fanago ni uye, nigu khade khu nyamudye nya gikhalo nya wufumu gya Nungungulu ndzadzini. 2 Uye a gu thuma wulangani nyo age ni omu nya tabernakeli nya lisine eyi Jehovha a yi emisidego, nasiri vathu. 3 Kholu vaprista vatshavbo nya vakhongolo va hathidwe gasi gu ningeya siningwa ni miphaso. Khu kharato, si di gu lombega gu muprista yoyu nuye nya khongolo a ningeya gilogyo. 4 Nari khatshi a di romo omu mafuni, na siri muprista kha nga olu gu na ni vathu va ningeyago siningwa guya khu Nayo. 5 Vathu vava va gu gira thumo nya guage owu wu gu giyeyedzo ni mutsa nya silo sa ndzadzini. Sa gu fana ni tepo eyi Mosi a nga ba ari vbafuvbi ni gu vbaha tabhernakeli, avba Nungungulu a nga mu embeya, khuye: “Vega gwadi gupima gasi gu gira satshavbo guya khu giyeyedzo nyi gu yeyedzidego gigomoni.” 6 Ganiolu, Jesu ningidwe thumo nya lisima ngudzu kholu a gu thuma gambe nga mutshanganisi nya pwanano nya wadi ngudzu guvbindra wa gale, owu wu emisidwego guya khu situmbiso nya sadi ngudzu.

7 Nari khatshi pwanano wule nyo pheye wu di vbelede owu nya wuvili na wa sa vbwetega. 8 Kholu Nungungulu a ngu wona sihoso ga vathu tepo a gu khuye: “‘Ma ngu vboha matshigu,’ a ngu ganeya Jehovha, ‘aya nyi na girago pwanano nya wuphya ni ndranga ya Israyeli ni eyi ya Judha. 9 Kha wu na nga fana ni owu nyi nga gira ni vakokwe vawe litshigu nyi nga va phara khu libogo gasi gu va dusa khu tigoni ga Egipto kholu avo kha va simama omu nya pwanano wangu, khu kharato nyi di diga gu theya kota khavo,’ a ngu ganeya Jehovha.

10 “‘Kholu owu khuwo pwanano nyi na girago ni ndranga ya Israyeli hwane nya matshigu yoyo,’ a ngu ganeya Jehovha. ‘Nyi na theya milayo yangu mapimoni gwawe nigu nyi na yi lova myonyoni gwawe, nigu eni nyi na khala Nungungulu wawe, avo va khala vathu vangu.

11 “‘Nigu mwalo muthu vbakari gwawe a na hevbudzago vhizinyu waye mwendro ndriyaye, khuye: “Gu vbwetega uti Jehovha!” kholu vatshavbo va na nyiti, gukhugeya ga oyu nya dugwana kala ga oyu nya khongolo. 12 Nyi na va pweya wusiwana avba nya mithumo yawe nya mba lulama, nigu kha nyi na nga dundruga gambe sighoho sawe.’”

13 Khu gu ba a ganeya khu “pwanano nya wuphya,” a gu gira gu owu nyo pheye wu vbindredwa. Nigu egi gi vbindredwago khya gale, nigu gyomo vbafuvbi ni gu fuva.

9 Pwanano wa gale wu diri ni sileletelo maningano ni edzi va nga ba va yede gu gira khidzo thumo nya guhathege ni wulanga nyo age mafuni gasi gu khozeya. 2 Tabhernakeli yi diri ni sipandre sivili. Omu nya gipandre nyo pheye khumo gu nga ba gu romo gilo gi nga ba gi handzegwa dzikandriya, meza ni dzipawu nya miningelo; gipandre gyogyo gi di gu ranwa gu pwani Wulanga nya Guage. 3 Ganiolu, hwane nya kortina nya wuvili gu diri ni wumbe wulanga nya tabhernakeli wu nga ba wu ranwa gu pwani wulanga nya Guage Ngudzu. 4 Omu nya wulanga wowo gu diri ni gyombo nya oru va nga ba va vbiseya umo libani, gu diri gambe ni arka nya pwanano yi nga ba yi namegedzedwe oru malanga yatshavbo. Umo nya ngasa gu diri ni jaru nya oru, ni mana, ni ndronga yile ya Aroni yi nga thunga sifilori, ni siwindri nya pwanano. 5 Nigu khu vbatshani nya arka gu diri ni dzikerubhimi* dzi nga ba dzi fenengedza tapa nya arka. Ganiolu, olu khandriyo tepo nya gu hi ganeya khu silo sesi gimwegyo khu gimwegyo.

6 Kha nga olu silo sesi si nga ba si giridwe khu ndziya yeyi, vaprista tepo yatshavbo va di gu beya omu nya wulanga nyo pheye nya tabhernakeli gasi gu ya gira mithumo nya guage. 7 Ganiolu, ga wulanga nya wuvili nya tabherinakeli gu di gu bedwa basi khu muprista nya khongolo gumogo khu mwaga. Uye a di gu beya ni novba gasi gu ya gira muphaso nya sighoho saye gumogo ni sighoho esi vathu va nga ba va gira khu wuhangi.* 8 Liphuvbo nya guage li si yeyedzide guagani gu khilo mwalo oyu a yeyedzidwego ndziya yi nga ba yi hongola wulangani nya guage na yi ngo romo tabherinakeli nyo pheye. 9 Tabhernakeli yeyi giyeyedzo nya matshigu ya muhuno. Khu guya khu malulamiselo yaya, gu ngu ningedwa miningelo ni miphaso. Ganiolu, silo sesi kha si si kodzi gu gira livhalo nya muthu a girago thumo nya gu hathege li vbeleya. 10 Sa gu gimbileyana basi ni silo nyo hodze ni silo nyo seye ni gu handzwa guya khu nayo.* Gu diri silo si nga ba si yelana ni givili nigu si vegidwe kala ga tepo yi vegisidwego gasi gu lulamisa silo.

11 Ganiolu tepo Kristo a dzudego kha nga muprista nya khongolo ngudzu nya silo nya sadi si dugeledego, uye bede omu nya tabhernakeli nya yikhongolo yi vbeledego eyi yi nga mba girwa khu mandza nya vathu, yi gu mwalo mafuni. 12 Uye kha beya wulangani nya guage ni novba nya dziphongo ni dzimombe, ganiolu bede ni novba waye, gumogo si vbeleya. Khu kharato, uye hi resede guvbanyiswa nya gupindruge.* 13 Kholu abari gu novba nya dziphongo ni owu nya dzimombe ni nguma nya ginvutana nya ngadzi, si nga mitegedzedwa ga vale va nga mba handzega, sa gu va agisa guya khu nyama, 14 novba wa Kristo wu na ni lisima ngudzu guvbindra owu nya sirengo sesi; khu gu thumisa liphuvbo nya guage wu ningedwe ga Nungungulu nya mba na gihoso, uwo wu na hi agisa avba nya mithumo nya gufe nya livhalo lathu gasi hi si kodza gu gireya mithumo nya guage Nungungulu a vbanyago.

15 Khu kotani nya isoso, Kristo mutshanganisi nya gidzumeledzwano nya giphya gasi gu ava va ranidwego va hakha gitumbiso nyo vbanye kala gupindruga. Esi so girega khu kotani nya gufe gwaye, ogu gu vbulugisidego vathu mugighohoni va giridego na gu ngo thuma pwanano nyo pheye. 16 Kholu avbo wu gomogo pwanano gu vbwetega gufa muthu a wu giridego, 17 kholu pwanano wa gu tiyiswa khu gufa; uwo kha wu thumi abari gu a ngo vbanya muthu a wu giridego. 18 Khu kharato, pwanano wa gale kha wa thuma na wu si gu vbalagi novba. 19 Kholu tepo Mosi a embedego satshavbo sileletelo nya Nayo ga vathu a di dzega novba nya dzinvuta, ni novba nya dziphongo, ni mati, ni mawoya nyo fuviye ni hisopo, a mitegedzeya libhuku ni vathu vatshavbo, 20 na gu khuye: “Owu novba nya pwanano Nungungulu a mi rumidego gu wu sayisa.” 21 A di mitegedzeya gambe tabhernakeli khu novba ni satshavbo si nga ba si thumiswa gasi gu gira thumo nya guage. 22 Ina, guya khu nayo, silo nya singi so agiswa khu novba, wa gu mba vbaladzwa novba wu mwalo divalelo.

23 Khu kharato, gu vbwetega gu silo nya gu fanekiseye nya silo sa ndzadzini si agiswa khu dzindziya dzedzi, ganiolu silo sa ndzadzini sa gu vbweta miphaso nya yadi ngudzu. 24 Kholu Kristo kha beya wulangani nya guage wu giridwego khu mandza nya vathu, a gu gifananiso nya esi nya lisine, ganiolu uye bede ndzadzini gabune gasi a ya hi emeya mbeli ga Nungungulu. 25 Kristo kha gira isoso nari ni makungo nyo dzi ningeye dzitepo nya dzingi kha nga muprista nya khongolo ngudzu a nga ba a beya mwaga ni mwaga wulangani nya guage ni novba wu nga ba wu siri waye. 26 Kholu nari khatshi si diri kharato, na tshanisekide dzitepo nya dzingi gukhugeya guvangwani nya mafu, ganiolu olu guhegisani nya litigo* uye dzi wonegiside gumogo si vbeleya gasi gu fuvisa gighoho khu muphaso waye. 27 Nigu kha nga olu muthu a fago gumogo basi, ganiolu hwane nya isoso a lamudwa, 28 Kristo nuye ningedwe gumogo gasi a handza sighoho nya vathu nya vangi. Nigu tepo a na wonegago nya wuvili, kha na nga wonegeya gasi gu handza sighoho, nigu a na wonwa khu vale va vireyago khu maho nyo fuviye guvbulugiswa.

10 Nayo mutsa nya silo nya sadi si ngo gu tago, ganiolu kha wu si kodzi gu si yeyedza khu guvbeleya. Kha wu na nga tshuka wu gira gu ava va thumeyago Nungungulu khu gu gira miphaso nyo fane ni eyi yi ningedwago mwaga ni mwaga va khala vathu nyo vbeleye. 2 Nari khatshi miphaso yi ngu va gira va khala vathu nyo vbeleye, na si si lombi gu va gira gambe miphaso, kholu avo va girago thumo nya guage va gu agiswa, kha va na nga dzi wona na vari ni nandru khu kotani nya sighoho sawe. 3 Ganiolu, guhambana ni isoso, miphaso va yi ningeyago mwaga ni mwaga yo va dundrugisa gu khiyo avo sighohi, 4 kholu novba nya dzimombe ni owu nya dziphongo kha wu si kodzi gu handza sighoho.

5 Khu kharato, tepo a nga beya tigoni, a di khuye: “‘Kha wa vbweta miphaso ni miningelo, ganiolu u nyi dongisede givili. 6 Kha wa hakha miningelo nya guvbiswe ambari miningelo nya gighoho.’ 7 Khavbovbo, nyi di kheni: ‘Kheni oyu! Nyi dzude gasi gu ta gira gugola gwago uwe Nungungulu (omu nya libhuku gu lovidwe maningano ni eni).’” 8 Phede khu gu ganeya, khuye: “Kha wa vbweta ambari gu hakha miphaso, miningelo, miningelo nya guvbiswe ambari miningelo nya gighoho,” a gu miningelo yi ningedwago guya khu Nayo. 9 Khu gu landreya, khuye: “Kheni oyu gasi gu gira gugola gwago.” Uye a gu fuvisa esi nyo pheye gasi a emisa esi nya wuvili. 10 Khu “gugola” gogu, hi agisidwe khu Jesu Kristo khu gu ba a ningede givili gyaye gumogo basi si vbeleya.

11 Nigu gambe, muprista moyo ni moyo tshigu ni tshigu a gu ema wulangani gwaye gasi a gira thumo nya guage ni gu ningeya miphaso yayimweyo dzitepo nya dzingi, eyi gima yi si si kodzigo gu dusa sighoho khu guvbeleya. 12 Ganiolu, Kristo a di ningeya gumogo basi muphaso mowo nya sighoho a bwe a khala nyamudye ga Nungungulu. 13 Gukhugeya avbovbo, a virede kala valala vaye va vegwa vbavbatshi nya migondro yaye. 14 Kholu khu kotani nya muphaso mowo basi owu a ningedego giride gu va nyo aga va vbeleya kala gupindruga. 15 Vbavbandze nya isoso, anilo liphuvbo nya guage li ngu hi ninga wufakazi khu gu khilo: 16 “‘Owu khuwo pwanano nyi na girago navo hwane nya matshigu yoyo,’ a ngu ganeya Jehovha. ‘Nyi na theya milayo yangu myonyoni gwawe, nigu nyi na yi lova mapimoni gwawe.’” 17 A engedza gambe, khuye: “Nigu kha nyi na nga dundruga gambe sighoho sawe ni mithumo yawe yi wugeyago nayo.” 18 O gara Nungungulu a divaleya sighoho, kha gu ngo vbwetega gambe ningelo nya gighoho.

19 Khu kharato vandruye, hi ngu tiya gu beya wulangani nyo age khu gu thumisa novba wa Jesu. 20 Givili gyaye gyo fana ni kortina. Tepo kortina yi tudwego khu gufa gwaye khu ndziya nyo fananise, uye hi tulede ndziya nya yiphya eyi yi yisago womini. 21 Nigu kha nga olu hi gu na ni muprista nya khongolo a woneleyago nyumba ya Nungungulu, 22 hongoleni hi hidzimeyani ga Nungungulu khu monyo watshavbo ni gukhodwa nyo vbeleye, nigu myonyo yathu na yi handzidwe yi aga avba nya livhalo nya guvivbe, ni givili gyathu na gi handzidwe khu mati nya guage.* 23 Hongoleni hi phareleyani si tiya avba nya gutumbe hi gu nago, hi ganeya khugo na hi si kanakani kholu oyu a hi tumbisidego a ngu tumbega. 24 Hongoleni hi khathaleyana khu gyathu gasi hi kutsana lihaladzoni hi bwe hi gira mithumo nya yadi. 25 Hi nga digini gu tshangana kha nga esi vambe va oloveyago gu gira, ganiolu hongoleni hi tiyisana ngudzu-ngudzu olu hi wonago gu khethu litshigu li ngu vboha.

26 Kholu ha gu ghoha khunyagigwenye na hi gu wuti gwadi nayo, wu mwalo gambe muphaso wu na ningedwago khu kotani nya sighoho sathu, 27 ganiolu, hi na wuyedwa basi khu gu lamudwa nyo thise ni zanga nya yikhongolo iyo yi na fuvisago vawugeyi. 28 Ni wevbini muthu a nga mba engisa nayo wa Mosi, a na songwa nya mba pwedwa wusiwana khu gu thumisa wufakazi nya vathu vavili mwendro vararu. 29 Mo si wona kharini? Muthu a gandridego Gyanana gya Nungungulu, a woneya vbavbatshi novba nya pwanano owu a handzidwego khuwo a bwe a vala ni gu tshepeta liphuvbo nya wuwadi nya wukhongolo wa Nungungulu, ina kha yeli gu tsayiswa ngudzu? 30 Hi ngu muti wule a ganedego, khuye: “Guphodza khwangu; nyi na mi phodzeya.” Nigu: “Jehovha a na lamula vathu vaye.” 31 Si ngu thisa ngudzu gu thegeya mandzani ga Nungungulu a vbanyango.

32 Mu nga divalini gu khenu hwane nya gu ba mu wonide guwonegeya, enu mu timisede silo nya singi ambari olu mu nga ba mu tshaniseka. 33 Dzimbe dzitepo mu di gu valetedwa mu bwe mu tshaniswa vathuni; dzimbe dzitepo mu diri bambe ga vale va nga ba va emisana ni silo nya nga isoso. 34 Kholu mu pwede wusiwana ava va nga ba va khothedwe mu bwe mu dzumeya gu phangwa silo sanu na mu tsakide, na mu gu dziti gu khenu mu na ni gilo nya lisima ngudzu, nya gupindruge.

35 Khu kharato, mu nga digini gu ganeya na mu tiyide kholu mu na mana tshatshazelo nya wukhongolo. 36 Kholu mu yede gu timiseya, gasi gu hwane nya gu ba mu giride gugola ga Nungungulu, mu hakha esi a mi tumbisidego. 37 Gu tshade “tepwana basi,” nigu “oyu a tago a na vboha nigu kha na nga hweya.” 38 “Ganiolu, githumi gyangu nyo lulame gi na vbanya khu kotani nya gukhodwe,” nigu “gya gu bweleleya hwane kha nyi na nga tsakiswa khigyo.” 39 Ethu kha hiri vathu nyo bweleleye hwane hi hongola gufuviswani, ganiolu hi vathu va gu na ni gukhodwa gasi gu vhikeya womi wathu.

11 Gukhodwa, gutumba nyo tiye nyo khethu esi hi si vireyago si na tadzisega, nigu gutiyisega nyo khethu esi hi si si wonigo somo khu lisine. 2 Khu gukhodwa, vathu va gale* va hakhide wufakazi.*

3 Khu gukhodwa, hi ngu tiyisega gu khethu silo si gomogo ndzadzini ni omu mafuni si giridwe khu lito la Nungungulu, avbo nya gu Nungungulu a thumisa silo hi si si wonigo gasi gu gira esi hi si wonago.

4 Khu gukhodwa, Abheli ningede muphaso nya lisima ngudzu ga Nungungulu guvbindra Kayimi. Khu kotani nya gukhodwa gogo, gu ganedwe gu pwani lulamide kholu Nungungulu hakhide miningelo yaye. Ambari olu Abheli a ngafa, uye a ngo simama gu ganeya khu gukhodwa gwaye.

5 Khu gukhodwa, Enoki fulusidwe gasi a si woni lufo, nigu kha manwa ne wulanga mowo kholu Nungungulu khuye a mu fulusidego. Na si gu fuluswi, hakhide wufakazi nyo khuwo uye tsakiside Nungungulu. 6 Khu kharato, nya mba na gukhodwa kha si kodzegi gu tsakisa Nungungulu kholu uye a hidzimeyago ga Nungungulu yede gu khodwa gu khuye uye womo nigu uye a ngu tshatshazeya ava va mu vbwetedzeyago khu lisine.

7 Khu gukhodwa, Nowa tepo a nga embedwa silo si nga hadzi girega, ambari olu a nga ba a si si woni a engiside* Nungungulu, khu kharato a vbaha litaru gasi a vbulugisa ndranga yaye. A lamude litigo khu kotani nya gukhodwe gwaye, khu kharato a ranwa gu pwani muthu nya gululame khu kotani nya gukhodwe gwaye.

8 Khu gukhodwa, tepo Abrahama a nga ranwa, engiside khu gu a hongola ga wulanga a nga hadzi ningwa gasi gu khala thomba yaye. Uye hongode ambari olu a nga ba a si dziti gu khuye o hongola hayi. 9 Khu gukhodwa, uye vbanyide nga muluveli* tigoni nya gitumbiso nga khatshi a gu vbanya omu nya limbe litigo, a di vbanya omu nya matendra ni Isaki ni Jakobe va nga hakha navo gitumbiso gya gimweyo. 10 A di gu vireya lidhoropa li nga ba liri ni gisekelo nyo tiye, eli Nungungulu a nga li pima a bwe a li vbaha.

11 Khu gukhodwa, Sara nuye khuride mimba ambari olu a nga ba a vbindredwe khu tanga nyo velege kha nga olu a nga ba a tumba wule a mu giredego gitumbiso. 12 Khu kotani nya isoso, khu ga muthu moyo oyu si nga ba si fana ni gu khatshi fude, gu velegidwe sanana nya singi nyo fane ni dzinyeledzi dza ndzadzini, esi a gu mwalo muthu a kodzago gu si kotari gu fana ni fungo wa phwani.

13 Vatshavbo vovo va fude na vari ni gukhodwa ambari olu va nga ne hakha silo va tumbisidwego, ganiolu va si wonide khu hwindzo va bwe va si hakha khu gutsaka va bwe va ganeya vathuni gu khavo va diri valuveli ni vavbanyi nya gitepwana tigoni mule. 14 Avo va ganeyago kharato va gu yeyedza gu khavo va ngu vbweta khu monyo wawe watshavbo wulanga wawe. 15 Ganiolu, nari khatshi va di gu khaleya gu dundruga omu va tago khumo na va manide ndziya nyo bweleye. 16 Ganiolu, vathu vovo va gu vbwetedzeya wulanga nya wadi ngudzu, a gu wulanga wu lumbago ndzadzini. Khu kharato, Nungungulu kha khali dzitshoni khavo tepo a ranwago gu pwani Nungungulu wawe, kholu va dongiselede lidhoropa.

17 Khu gukhodwa, tepo Abrahama a nga lingwa, gu di gu keneleya vbadugwana basi gasi gu ningeya Isaki. Mwama a nga hakha situmbiso na tsakide a di zama gu ningeya gyanana gyaye gyagimwegyo, 18 ambari olu a nga ba a embedwe gu pwani: “Gitugulwana gyago gi nata khiyo ga Isaki.” 19 Ganiolu, uye a di gu dziti gu khuye Nungungulu a na ni makodzelo nyo wuse Isaki khu ga vafudego, nigu uye mu hakhide khu gufani khu ndziya nyo fananise.

20 Khu gukhodwa, Isaki nuye kategiside Jakobe ni Esawu maningano ni silo si nga hadzi guta.

21 Khu gukhodwa, Jakobe tepo a nga ba ari vbafuvbi ni gufa a di kategisa sanana sa Josefa gimwegyo khu gimwegyo a bwe a gombeya ga Nungungulu na khighede avbo nya ndronga yaye.

22 Khu gukhodwa, tepo Josefa a nga ba ari vbafuvbi ni gufa a di ganeya khu guduga ga Vaisrayeli khu tigoni ga Egipto a bwe a va ambeya gu khuye va nga tshiyi sirambo saye.

23 Khu gukhodwa, hwane nya gu ba Mosi a velegidwe a di sihwa migima miraru khu vavelegi vaye kholu va di gu wona gu khavo gyanana gyawe gi mburide, nigu kha va thava nayo wa pfhumu. 24 Khu gukhodwa, tepo Mosi a nga dandra a di bomba gu ranwa gu pwani gyanana gya nyamahegyane wa Faro. 25 A di hatha gu tshaniswa gumogo ni vathu va Nungungulu, wulangani nyo dzi buze khu gighoho khu gitepwana. 26 Kholu a di gu si wona nari thomba nya yikhongolo gu vadwa khu kotani ya Kristo guvbindra thomba ya Egipto. A di gu vireya khu maho nyo fuviye tshatshazelo waye. 27 Khu gukhodwa, uye a di duga khu Egipto ganiolu na si thavi zanga ya pfhumu kholu a di gu simama na tiyide nga khatshi a gu wona Oyu a si wonegigo. 28 Khu gukhodwa, a di gira Phasika a bwe a mitegedzeya novba avba nya malimba gasi gu ngilozi ya Nungungulu yi si songi sanana sawe nya matewula.

29 Khu gukhodwa, Vaisrayeli va di tshatuga yiphwani nyo fuviye nga khatshi vo gimbiya omu nya mafu nyo bange, ganiolu tepo Vaegipto va nga zama navo gu tshatuga va di langaladzwa khu mati.

30 Khu gukhodwa, mimuru ya Jeriko yi di thega hwane nya gu ba Vaisrayeli va yi dzulugede khu 7 matshigu. 31 Khu gukhodwa, Rahabhi, nyamayi nya liphuphulo, khafa gumogo ni avo va nga mba engisa kholu a di hakha vasoli khu gurula.

32 Nyi na kheni ginani gambe? Kholu nyi na vbeledwa khu tepo nyo ganeya gambe khu Gidheyoni, Bharaki, Samisoni, Jafeti, Dhavhidhe, Samuweli ni vambe vaprofeti. 33 Khu gukhodwa, va pade mifumo, va ema ni esi nyo lulame, va mana situmbiso si tago khiyo ga Nungungulu, va sega magana nya dzingala, 34 va tshima tshivba nya nilo, va vbuluga gu songwa khu xipadha, va manega ni tshivba ambari olu va nga ba va vbede tshivba, va manega ni tshivba nyimbitunu va bwe va pala masotshwa nya valala. 35 Vanyamayi va hakhide valongo vawe ava va nga wuswa khu gufani, ganiolu vambe vathu va tshanisekide kholu va nga bomba gu tshudziswa gasi va mana guwuswa nya gwadi khu gufani. 36 Khu lisine, vambe va lingidwe khu gu va poyiledwa nigu vetwa. Va giridwe silo nyo vbindre isoso, va hungeledwe khu dzikorenti va bwe va khothedwa. 37 Va pfaridwe khu siwindri, va lingwa, va sararwi khu vbakari, va songwa khu dzispadha, va gimbiya-gimbiya na va ambade madowo nya dzinvuta ni madowo nya dziphongo; va di gu hamuga, va tshangana ni sigaradzo va bwe va tshaniswa. 38 Litigo kha la nga ba li yedwa khu gu manega ni vathu nya nga vovo. Va di gu gimbiya-gimbiya siwulani ni sigomoni, va khala omu nya dziphago ni omu nya mavbala.

39 Ganiolu, ambari olu vatshavbo vava gu nga ganedwa silo nya sadi maningano ni gukhodwa gwawe, avo kha va hakha esi va nga ba va tumbisidwe, 40 kholu Nungungulu a di hi dongiselede gilo nya gyadi ngudzu, gasi gu avo va si vbeleyi ethu na hiri mwalo.

12 Khu kharato, kha nga olu hi randredwego khu lipfhi nya likhongolo nya dzifakazi, hongoleni hi dzudzugani satshavbo si hi lemeyago ni gighoho gi hi tshunganisago khu guvbevbuga, hi tutuma khu gu timiseya mapalisana hi gomogo ga ayo, 2 na hi gu khedza Pfhumu yi ningago Guvbanya ni oyu a girago gu gukhodwa gwathu gu vbeleya, a gu Jesu. Khu kotani nya gutsaka a yeyedzidwego, uye timisede gufa avba nya simbo nya tshanisa a si theyi kota khu dzitshoni a bwe a khala khu nyamudye nya gikhalo gya Nungungulu. 3 Dundrugeyani gwadi khu wule a timisedego malito nya mangi nya guvale ma nga ba mata khiyo ga sighohi, iso si nga ba si dzi lamula khu gu gira isoso, gasi mi si garali mwendro gu tsukula.

4 Avba nya gudwane gwanu ni gighoho gegi, kha mwa dwana nyo bwe novba wanu wu vbaladzwa. 5 Nigu avo va divade gigengedzo mu embedwego nga sanana, gi gu khigyo: “Mwanangu, u nga kanyisi gulaya ga Jehovha nigu u nga vbeyi tshivba tepo u kawukwago khuye; 6 kholu Jehovha a gu kawuka wule a mu haladzago, khu lisine uye a gu tsayisa ni wevbini a mu wonago nga gyanana gyaye.

7 Kha nga gipandre nya gukawukwe gwanu, gu vbwetaga mu timiseya. Nungungulu a gu mi phara nga sanana. Khu gevbini gyanana gi gu mba kawukwa khu papayi wagyo? 8 Ganiolu, abari gu khandri mwatshavbo mu hakhago gukawukwa gogu isoso so thula gu khiso kha muri sanana saye nya lisine, ganiolu mu sanana sa mumbe. 9 Nigu vavelegi vathu nya nyama va hi kawukide nigu ethu hi va ningide githawo. Ahati Papayi nya womi wathu wa liphuvboni ke, ina kha hi yeli gu mu ninga ngudzu githawo gasi hi vbanya? 10 Kholu vavelegi vathu nya nyama va hi kawukide khu gitepwana guya khesi va nga ba va si wona na siri sadi, ganiolu Nungungulu a gu hi kawuka gasi hi phasega, gasi hi hengeya omu nya guage gwaye. 11 Khu lisine, tepo hi kawukwago kha si hi tsakisi, si ngu vbisa. Ganiolu ha gu dzumeya gu kawukwa, khu gu gimbiya nya tepo, ugo gu na velega gwathu mihandro nya gurule ni gululama.

12 Khu kharato, tiyisani mandza ma garadego ni dzikhingimidzi dzi vbedego tshivba, 13 nigu simamani gu lulamisa dzindziya nya mingondro yanu gasi gu oyu a hasidego a si engedzeyi, wulangani nya isoso a hawuluga. 14 Dzi garadzeyeni gu vbanya khu gurula ni vatshavbo mu bwe mu aga, kholu oyu a si agigo kha na nga wona Pfhumu. 15 Dzi woneyeni gasi gu si manegi ni moyo wanu a na gu mba mana wuwadi nya wukhongolo ngudzu wa Nungungulu, gasi wu si bugi ne khamba moyo nya vheneno wu wusa sigaradzo nigu nya vangi va thaphedwa khuwo. 16 Nigu dzi woneyeni gasi gu si manegi vbakari gwanu ne ni moyo a girago wubhayi, ambari wule a si ningigo lisima silo nya guage gu fana ni Esawu a ningedego wukoma waye khu gu feya parato mweyo nya guhodza. 17 Kholu enu mu ngu dziti gu khenu khu hwane nya tepo, tepo a nga vbweta gu ningwa makategwa uye a di bombedwa, kholu ambari olu a nga gurumedza ngudzu na gu liya khu gu vbweta gu khuye silo si vbindrugedza, kha mana gilo.

18 Enu kha mwa hidzimeleya gilo si kodzegago gu gi phara, gilo gi nga khondra, ambari lipfhi nyo sivbale, gidema nya gikhongolo, gingulu, 19 gudzuma nya pundru ni lito li ganedego. Tepo vathu va nga lipwa, va di lomba gu khavo va si embedwi gambe gimbe gilo. 20 Kholu kha va nga ba va si kodza gu tiyela nayo wu gu khuwo: “Ambari girengo gya gu kuha gigomo, gu vbwetega gi pfarwa khu siwindri.” 21 Nigu esi va nga si wona si di gu thisa ngudzu nyo bwe Mosi, khuye: “Nyo ndrendremeya khu gu thava.” 22 Ganiolu, enu mu hidzimelede lidhoropa la Siyoni ni lidhoropa la Nungungulu a vbanyango, Jerusalema wa ndzadzini, ni dzimiliyoni nya dzingilozi 23 tshanganoni gwawe nya wukhongolo ni tshanganoni nya matewula ma lovidwego ndzadzini ni ga Nungungulu a gu mulamuli nya vatshavbo ni ga vathu nyo lulame ava va vbanyago khu ndziya yi gimbidzisanago ni tshivba nya guage, a gu avo va giridwego va vbeleya 24 ni ga Jesu a gu mutshanganisi nya pwanano nya wuphya, ni ga novba wu mitegedzidwego wu ganeyago gwadi guvbindra novba wa Abheli.

25 Dzi woneyeni gasi mu si digi gu engisa wule a ganeyago. Kholu vale va bombidego gu engisa gigengedzo gya Nungungulu mafuni kha va vbuluga. Ethu nethu kha hi na nga vbuluga ha gu mba engisa wule a ganeyago gukhugeya khu ndzadzini! 26 Khu tepo yile, lito laye li di kutsunga mafu, ganiolu olu uye tumbiside gu khuye: “Nyi na kutsunga gambe nasiri mafu basi ganiolu ndzadzini gambe.” 27 Lito “gambe” la gu yeyedza gu duswa nya silo si nga kutsungwago, silo si giridwego gasi gu simama esi si na gu mba kutsungwa. 28 Kha nga olu hi hakhidego Mufumo, owu si si kodzegigo gu tsekatsekiswa, hongoleni hi simamani gu hakha wuwadi nya wukhongolo ngudzu, a gu khu kotani yawo hi si kodzago gu gireya Nungungulu thumo nya guage khu ndziya yi hakhegago ni githawo khu Nungungulu. 29 Kholu Nungungulu wathu nilo wu tshungunulago.

13 Simamani gu haladzana kha nga vandruye. 2 Mu nga divalini gu hakha gwadi vapfhumba, kholu khu kotani nya isoso, vambe nya mba dziti va hakhide dzingilozi. 3 Dundrugani vale va khothedwego nga khatshi mu khotedwe gumogo navo ni vale va tshaniswago, kholu enu mu na ni givili nyo fane ni egi gyawe.* 4 Mutshadho wu na ningwe githawo khu vatshavbo nigu oyu a tshadhidego gu vbwetega a tumbega ga oyu a tshadhidego naye kholu Nungungulu a na lamula vale va girago wubhayi,* gani va tshadhide gani kha va tshadha. 5 Guvbanyani gwanu mu nga dzi digi mu fumwa khu gugola dzitsapawu ganiolu enedziswani khesi mu gu naso, kholu uye a di khuye: “Gima kha nyi na ga gu diga.” 6 Gasi hi tala khu gutiya-hwambo hi ganeya, khethu: “Jehovha khuye a nyi phasago, kha nyi na nga thava. Muthu a nga nyi gira ginani?”

7 Dundrugani ava va mi thangeyago, ava va mi tivisago lito la Nungungulu; khedzani handro nya mavbanyelo yawe, mu pimedzeya gukhodwa gwawe.

8 Jesu Kristo khuye wa moyo vbanova, muhuno ni kala gupindruga.

9 Mu nga pengiswi khu sihevbudzo nya guhambane-hambane nya mba pwisisega, kholu tshukwana gu monyo wu tiyiswa khu wuwadi nya wukhongolo ngudzu wa Nungungulu guvbindra khu guhodza, kholu ava va ningago ngudzu lisima guhodza, gimwalo giphaso va gi manago avba nya ugo.

10 Ethu hi na ni alitari avbo avo va girago thumo nya guage tabharnakelini va gu mwalo fanelo nya gu hodzeye avbo. 11 Kholu sivili nya sirengo sile esi muprista nya khongolo a dusago novba waso a beya nawo wulangani nya guage gasi gu ya gira miningelo khu kotani nya sighoho, sa gu vbiswa vbavbandze nya lizumbo. 12 Khu kharato, Jesu nuye tshanisidwe vbavbandze nya lidhoropa* gasi gu agisa vathu khu novba waye. 13 Hongoleni hi mu khinga vbavbandze nya lizumbo na hi gu poyidwa nga uye nuye a nga poyidwa, 14 kholu hi mwalo avba lidhoropa li na simamago, ganiolu ethu ha gu vbwetedzeya ngudzu lile li tago. 15 Khu gu thumisa Jesu, hongoleni, tepo yatshavbo, hi dhumisa Nungungulu, uwowo khuwo phaso wathu hi mu gireyago nigu handro nya magana yathu aya ma huweleyago guagani khu lina laye. 16 Nigu mu nga divali gu gira esi nya sadi ni gu kabana esi mu gu naso ni vambe kholu Nungungulu a ngu tsakiswa khu miphaso yoyo.

17 Engisani ava va mi thangeyago mu bwe mu va ninga githawo kholu khavo va mi woneleyago nigu avo va na hlamula khu kotani yanu, gasi va gira thumo wowo na va tsakide, na va si keti kholu va gu gira na va gu keta kha si na nga mi gimbileya gwadi.

18 Simamani gu hi gombeleya kholu hi ngu tiyisega gu khethu hi na ni livhalo nya ladi* nga olu hi dzi garadzeyago gu tumbega siloni satshavbo. 19 Ganiolu, nyi ngu mi lombani ngudzu-ngudzu gu kheni mu nyi gombeleya gasi nyi wuya gwanu khu guvbiredza.

20 Nungungulu nya gurule, oyu a thumisidego novba nya pwanano nya kala gupindruga, gasi gu wusa khu ga vafudego muhavisi nya khongolo nya dzinvuta, Pfhumu yathu Jesu, 21 a na mi ningeni satshavbo silo nya sadi gasi gu gira gugola gwaye mu bwe mu gira gwathu, khu gu thumisa Jesu Kristo, sile si mu tsakisago, a na ningwe wudhumo kala gupindruga ni gupindruga. Amen.

22 Vandruye, nyi ngu mi lomba gu kheni mu engiseya khu gutimiseya malito yaya nya gu tiyise, kholu kha nya mi loveya lidangaliya nyo laphe. 23 Nya gu vbweta gu kheni mu dziti gu khenu ndriyathu Thimoti dusidwe khu pasoni. A gu vbiredza guta, nyi nata naye tepo nyi tago nyi ta mi wona.

24 Losedzeyani vatshavbo va thangeyago vbakari gwanu ni vatshavbo va nya guaga. Vandriyathu va Italiya va ngu mi losedzeya.

25 Nyi ngu mi suveyani wuwadi nya wukhongolo ngudzu wa Nungungulu.