LIDANGALIYA NYO PHEYE LA PEDRO

1 Eni Pedro, mupostoli wa Jesu Kristo, nyi ngu loveya enu mu vbanyago khu gitepwana tigoni momu mu gomogo Pontu, Galatiya, Kapadhokiya, Aziya, Bhitiniya, a gu enu mu hathidwego 2 guya khesi Nungungulu, Papayi, a si hungidego gupheyani, mu agisidwego khu liphuvbo nya guage khu makungo nya gu mu engisa mu bwe mu agiswa khu novba wa Jesu Kristo, kheni:

Nyi ngu mi suveya gu kheni mu engedzeya gu manega ni wuwadi nya wukhongolo ngudzu wa Nungungulu ni gurula.

3 A na dhumiswe Nungungulu, Papayi wa Pfhumu yathu Jesu Kristo kholu guya khu wuhindzi waye nya wukhongolo, uye hi ningide guvelegwa nyaluphye, ogu gu hi ningago gutumba nya lisine khu kotani nya guwuswe ga Jesu Kristo khu ga vafudego. 4 Nungungulu mi ningide thomba si si kodzegigo gu yi tshungunula mwendro gu yi fuvisa. Uye a mi vegede iyo ndzadzini, 5 enu mu sayiswago khu tshivba ya Nungungulu khu kotani nya gukhodwe gasi mu mana guvbulugiswa gu na tivegiswago matshigoni nya guhegise. 6 Khu kotani nya isoso, enu mu ngu tsaka ngudzu ambari olu si na lombago gu mu garadzega khu tepo nyo khaguri khu kotani nya silingo nyo hambane-hambane 7 gasi gu gukhodwa gwanu gu lingidwego, ogu gu gu na ni lisima ngudzu guvbindra oru yi fuvago ambari olu yi nga vbiswa niloni, gu khala gighelo nya wuzundzo ni wudhumo guwonegiswani ga Jesu Kristo. 8 Ambari olu mu si gu mu wonigo, enu mu ngu mu haladza. Ambari olu mu si mu wonigo olu, mu ngu khodwa gwaye nigu mu na ni gutsaka nya gukhongolo ngudzu si si kodzegigo gu gu tshamuseya, 9 tepo mu zamago gu maneya makungo nya gukhodwe gwanu, a gu guvbulugiswa gwanu.*

10 Vaprofeti va profetidego maningano ni wuwadi nya wukhongolo ngudzu wa Nungungulu owu mu yeyedzidwego, va wudziside va bwe va gira wugevisisi nya wadi maningano ni guvbulugiswa gogu. 11 Gale yoyo Nungungulu thumiside tshivba yaye gasi gu va embeya gu khuye Kristo a na tshaniseka, khu hwane nya isoso a khusedzwa. Khiso si va giridego va zama gu tugula esi si na giregeyago Kristo ni tepo si na giregago khiyo. 12 Nungungulu giride vaprofeti vovo va tugula gu khavo avo kha va nga ba va dzi thumeya avo vamune, ganiolu va di gu thumeya enu. Avo va lovide manigano ni esi mu tshumayedwego nigu enu mu pwide silo soso khiyo ga vale va mi tshumayedego mahungu nya yadi na va gu phasedzedwa khu liphuvbo nya guage li rumedwego khu ndzadzini. Nigu khiso silo sesi dzingilozi dzi si vbwetago ngudzu gu si pwisisa.

13 Khu kharato, dongani mapimo yanu gasi mu thuma khu tshivba; mu nga pfhali khu gilo. Tumbani wuwadi nya wukhongolo ngudzu wa Nungungulu mu na yeyedzwago uwo guwonegiswani ga Jesu Kristo. 14 Kha nga sanana si engisago, digani gu fumwa khu gudogoreya mu nga ba muri nago gale na mu si guti gilo, 15 ganiolu gu fana ni oyu a agidego, oyu a mi ranidego, agani mavbanyeloni yatshavbo, 16 kholu gu lovidwe gu pwani: “Agani kholu eni nyi agide.”

17 Nigu mwa gu ba mu rana lina la Papayi, oyu a lamulago nya mba na gihatheya guya khu mithumo nya moyo ni moyo, yeyedzani githawo Nungungulu ga tepo yeyi mu ngo vbanyago tigoni momu. 18 Kholu mu ngu dziti gu khenu kha sa thumiswa silo si fuvago nya nga prata mwendro oru gasi mu tshudwa avba nya womi wanu nya mba phasa gilo owu mu hakhidego ga vakokwe vanu, 19 ganiolu mu tshudwe khu novba wu gu na ni lisima ngudzu, nya nga novba nya ginvutana gi gu mwalo gihoso, gi agidego; a gu novba wa Kristo. 20 Lisine gu Kristo tidwe na li si gu vangwi litigo, ganiolu wonegisidwe matshigoni nya guhegise khu kotani yanu. 21 Khu kotani yaye, enu mu ngu khodwa ga Nungungulu, a gu oyu a mu wusidego khu ga vafudego a bwe a mu ninga wudhumo gasi mu khodwa ni gu tumba Nungungulu.

22 Olu mu dzi agisidego khu gu engisa lisine, mu manega ni lihaladzo nya wundruye li gu mwalo gupfhadzedzeya, haladzanani ngudzu khu gyanu khu monyo watshavbo. 23 Kholu mu velegidwe nyaluphye nasiri khu mbewu yi fuvago, ganiolu khu mbewu yi si fuvigo khu gu thumiswa lito la Nungungulu a vbanyago, oyu a simamago kala gupindruga. 24 Kholu “vathu vatshavbo va gu fana ni mwasi nigu wudhumo wawe wa gu fana ni gifilori gya thembweni; mwasi wu ngu banga nigu gifilori gi ngu thega, 25 ganiolu malito ya Jehovha ma gu simama kala gupindruga.” “Malito” yoyo mahungu nya yadi mu tshumayedwego ayo.

2 Khu kharato, digani wuvivbi watshavbo, wukanganyisi, wupfhadzedzeyi, lidiwo ni wusingedzi watshavbo. 2 Khalani sanana si ngarigo gu velegwa, vbwetani leti nya lito la Nungungulu, a gu leti yi nga mba patedzedwa ni gilo gasi khu kotani yayo mu dandra mu feya gu vbulugiswa, 3 kha nga olu mu wonidego gu khenu Pfhumu yi na ni wuwadi.

4 Enu mu hidzimede gwaye, uye a gu giwindri gi vbanyago egi gi nyenyidwego khu vathu, ganiolu gi hathidwego gi bwe gi ningwa lisima khu Nungungulu. 5 Olu enu mu gu siwindri si vbanyago, mwa gu vbahwa nga nyumba ya liphuvboni gasi mu khala wuprista wu agidego, mu si kodza gu ningeya miphaso nya liphuvbo yi hakhegago ga Nungungulu khu gu thumisa Jesu Kristo. 6 Kholu gipandre nyo khaguri nya Milowo gyari khigyo: “Eni nyi ngu vega Siyoni giwindri gi hathidwego, a gu giwindri nya lisima nya gisekelo gya vbakhonatunu nigu ni wevbini a khodwago gwagyo gima kha na nga dzi laya.”

7 Khu kharato, uye na ni lisima ga enu mu gu makhodwa, ganiolu ga vale va si khodwigo, “giwindri gi nga nyenywa khu vavbahi khigyo gi khadego giwindri nya litshina gya vbakhonatunu;” 8 “giwindri gi tshunganisago gi girago vathu va thega.” Avo va gu tshunganeya kholu kha va engisi lito la Nungungulu. Khayo mahegiso va dongisedwego ayo. 9 Ganiolu, enu mu “vathu va hathidwego, mu dzipfhumu dzi gu vaprista, litigo li agidego, vathu va hathidwego khu Nungungulu gasi mu huweleya makhalelo nya yadi” ya wule a mi ranidego gidemani gasi muta guwonegeyani gwaye nyo samadzise. 10 Gale enu mu di siri vathu va Nungungulu, ganiolu olu mu vathu vaye; gale enu mu di si giredwi wuhindzi, ganiolu olu mu ngu giredwa wuhindzi.

11 Sigodwa sangu, nyi ngu mi kutsani kha nga olu mu gu valuveli ni olu mu vbanyago khu gitepwana mafuni momu gu kheni mu simama gu diga gudogoreya gwanu nya nyama, ogu gu dwanago nanu. 12 Vbanyani khu ndziya nya yadi vbakari nya vanyamayigo gasi va gu mi singedza gu khavo mu si ghohi va si kodza gu wona mithumo yanu nya yadi, khavbovbo va dhumisa Nungungulu litshigoni laye nya gulamule.

13 Khu kotani ya Pfhumu, dzi vegeni vbavbatshi ga vathu vatshavbo va mi fumeyago va emisidwego khu vathu, gani pfhumu, gani muthangeyi, 14 gani vafumeyi; dzi vegeni vbavbatshi ga vathu vovo nga khatshi va di rumedwa khuye gasi gu ta tsayisa avo va girago silo nyo vivbe ni gu zundza avo va girago silo nya sadi. 15 Kholu Nungungulu o vbweta gu khuye mu gira esi nya sadi gasi mu si kodza gu sega magana ya vale va ganeyago guvivba khenu khu gu mbati. 16 Vbanyani nga vathu nya gutshulege, nigu mu nga thumisi gutshulega gwanu gasi gu gira silo nyo vivbe, ganiolu gu thumiseni gasi mu khala sithumi sa Nungungulu. 17 Ningani githawo vathu vatshavbo, haladzani vandruye vatshavbo, thavani Nungungulu, ningani githawo pfhumu.

18 Sithumi si na engise vamune vaso khu githawo gyatshavbo. Kha si yeli gu engisa basi vale va gu vadi mwendro vale va dzi vbevbugisago, ganiolu si yede gu engisa gambe ni vale si garadzago gu va tsakisa. 19 Tepo muthu a timiseyago sigaradzo, a tshaniswa nya mba na nandru khu gu ba ari ni livhalo li agidego mahoni ga Nungungulu, isoso si ngu tsakisa Nungungulu. 20 Mwa gu ba mu vetwa khu gu ba nari mu di ghoha, giphaso muni mu na gi manago khu gu ba mu timiseya isoso? Ganiolu, mwa gu timiseya gutshaniseka khu gu ba mu giride silo nya sadi, isoso si ngu tsakisa Nungungulu.

21 Khu lisine, khiso esi mu ranedwego iso kholu ambari Kristo nuye tshanisidwe khu kotani yanu, a mi tshiyela giyeyedzo gasi mu feya gu landreya khu gutumbega* migondro yaye. 22 Uye kha ghoha nigu kha ga duga wukanganyisi khu kanani gwaye. 23 Tepo a nga ba a vadwa, kha bweledzeya khu gu vala. Tepo a nga ba a tshaniseka, kha nga ba a thusedzeya muthu, ganiolu a di gu si ningeya mandzani ga wule a lamulago khu gululama. 24 Uye rwade sighoho sathu givilini gyaye gi vbayegidwego avba nya simbo gasi hifa avba nya sighoho* hi bwe hi vbanya khu gululama. Nigu “enu mu hawulugisidwe khu silondra saye.” 25 Kholu mu di gu fana ni dzinvuta dzi dzimedego, ganiolu olu mu wide ga muhavisi ni muwoneleyi nya womi wanu.

3 Khu gu fana, enu vanyamayi, dzi vegeni vbavbatshi ga vama vanu gasi abari gu vama vanu kha va engisi lito va ndrindrwa khu mavbanyelo yanu, si si lombi gu va embeya gilo, 2 kholu va na ba va wonide mavbanyelo yanu nya yadi ni githawo gyanu nya gikhongolo. 3 Mu nga dzi mburiseyi khu vbavbandze basi, khu gu luga mindzudzu, ni gu ambala dzioru ni sombo nyo dhure, 4 ganiolu mburiseyani gambe muthu wanu, a gu edzi mu gu idzo khu monyoni, mu khala vathu nyo rule mu bwe mu dzi vbevbugisa a gu gudzimburisa gu si wonegigo ogu gu gu ga lisima ngudzu ga Nungungulu. 5 Kholu khidzo va nga ba va dzi mburiseya khidzo vanyamayi nya guage va gale va nga ba va tumba Nungungulu; va di gu dzi vega vbavbatshi ga vama vawe, 6 gu fana ni Sara a nga ba a engisa Abrahama, a mu rana gu khuye pfhumu. Enu mu na ba muri sanana saye mwa gu simama gu gira silo nya sadi ni gu bwe mu si dzumeyi gu padwa khu hwanga.

7 Anenu vama, pharani gwadi* vagadzi vanu mu va ninga githawo kholu avo va gu fana ni sombo nya wukheta, gasi gu milombelo yanu yi si segedwi kholu anavo va na mana womi ni enu.

8 Khu guhegisa, mwatshavbo gu vbwetega mu hengeya mapimo ya mamowo, mu dzi vega wulangani ga mumbe, mu manega ni lihaladzo nya wundruye, mu pweyana wusiwana mu bwe mu dzi nogisa. 9 Mu nga bweledzeyini guvivba khu guvivba mwendro guvala khu guvala. Ganiolu, bweledzeyani khu makategwa, kholu khiso mu nga ranedwa iso gasi mu ta mana makategwa.

10 Kholu “oyu a golago womi ni gu bwe a vbweta gu vbanya khu gutsaka yede gu woneleya lidimi laye gasi li si ganeyi wuvivbi ni gu bwe a woneleya likana laye gasi li si liphi. 11 Nigu gambe a na dige wuvivbi a gira silo nya sadi; a na vbwetedzeye gurula a bwe a vbanya khugo. 12 Kholu maho ya Jehovha ma gu khedziseya va nyo lulama nigu dzindzeve dzaye dza gu engisa milombelo yawe, ganiolu Jehovha a gu pfhurareya avo va girago silo nyo vivbe.”

13 Khu lisine, mwa gu ba mu dzi garadzeya gu gira silo nya sadi, khu mani a na mi gireyago wuvivbi? 14 Tsakani ambari mwa gu tshaniswa khu kotani nya gululame. Ganiolu, mi nga thavi esi va si thavago* nigu mu nga garadzegi. 15 Rungudzani Kristo myonyoni gwanu kholu uye Pfhumu yanu nigu khalani na mu dongide gu hlamula oyu a na vbwetago guti gighelo nya gutumba mu gu nago, ganiolu girani isoso khu gurula ni githawo nya gikhongolo.

16 Simamani ni livhalo nya ladi gasi gu tepo yatshavbo vathu va ganeyago guvivba khenu va khala dzitshoni khu kotani nya mavbanyelo yanu nya yadi nga valandreyi va Kristo. 17 Tshukwana gu tshaniseka khu kotani nyo gire silo nya sadi abari gu isoso gugola ga Nungungulu, guvbindra gu tshaniseka khu gu ba u gira silo nyo vivbe. 18 Ambari Kristo, muthu nyo lulame, fude gumogo basi a feya sighoho sa vathu nya mba lulama; giride isoso gasi a mi yisa ga Nungungulu. Songidwe nari muthu nya nyama, ganiolu a wuswa nari liphuvbo. 19 Nigu nari khu givili nya liphuvbo a di ya tshumayela dzingilozi dzi nga ba dzi khothedwe, 20 edzi dzi nga mba engisa teponi eyi Nungungulu a nga ba a vireya khu gulaphisa-monyo matshigoni ya Nowa na gu ngo vbahwa litaro, eli li nga vbulugisa 8 vathu* basi matini.

21 Gubhabhatiswa gu ngu gimbileyana ni silo sesi nigu anugo gu ngu mi vbulugisa (nasiri khu gu dusa ndzilo givilini, ganiolu khu gu gombeya ga Nungungulu gasi a mi ninga livhalo nya ladi), khu gu wuswa ga Jesu Kristo. 22 Uye womo nyamudye ga Nungungulu kholu hongode ndzadzini nigu ningidwe gu fumeya dzingilozi, wufumu ni dzitshivba.

4 Kha nga olu Kristo a tshanisekidego nyamani, anenu dzi dongiseyeni gasi mu manega ni mapimo ya mamowo a manegidego nawo Kristo, kholu muthu a tshanisekago nyamani digide sighoho, 2 gasi gu tepo yi mu tshaledego gu vbanya nyamani, a si giri gambe gudogoreya nya vathu, ganiolu a gira gugola ga Nungungulu. 3 Kholu tepo mu nga ba mu yi vbedza na mu gira gugola ga vanyamayigo yi enede; tepo mu nga ba mu vbanya mavbanyelo nya dzitshoni,* gu dogoreya nyo vivbe, wudhakwa,* dzifesta nya pfilupfilu, wadwani ni gunyenyezani nyo khozeye sifananiso. 4 Olu avo va ngu hlamala kholu mu si gimbiyigo navo mavbanyeloni yoyo nyo nyenyeze, khu kharato avo va gu ganeya guvivba khenu. 5 Ganiolu, vathu vava va na dzi hlamuleya mbeli ga oyu a dongidego gu lamula ava va vbanyago ni ava va fudego. 6 Khu lisine, khiso si giridego gu mahungu nya yadi nayo ma tshumayedwa ga vale va fudego, gasi gu ambari olu va lamudwago nyamani khu mawonelo nya vathu, va vbanya na va gu thangedwa khu liphuvbo la Nungungulu.

7 Ganiolu, mahegiso nya silo satshavbo momo vbafuvbi. Khu kharato, manegani ni mapimo nya yadi. Khalani na mu dongide, mu nga digi gu gombeya. 8 Ganiolu ga silo satshavbo, haladzanani ngudzu, kholu lihaladzo li ngu fenengedza sighoho nya singi. 9 Gireyanani wuhindzi nya mba ngurangura. 10 Olu moyo ni moyo a hakhidego giningwa, gi thumiseni gasi gu phasa vambe, kha nga sithumi nya sadi si hakhidego wuwani nya wukhongolo ngudzu wa Nungungulu,* uwo wu yeyedzwago khu dzindziya nyo hambane-hambene. 11 Muthu a gu vbweta gu ganeya, a na ganeye malito ya Nungungulu; uye a thumeyago vambe, a na thume na gu tumba tshivba eyi yitago khiyo ga Nungungulu, gasi gu Nungungulu a dhumiswa siloni satshavbo khu gu thumisa Jesu Kristo. Wudhumo ni tshivba khyaye kala gupindruga ni gupindruga. Amen.

12 Sigodwa sangu, mu nga hlamali khu kotani nya silingo nyo garadze mu emisanago naso, nga khatshi mwa gu dugeledwa khu silo nya mba olovelega. 13 Ganiolu, tsakani mwa gu hengeya gutshanisekani ga Kristo, gasi tepo nya guwonegiswe nya wudhumo waye mu feya gu tsaka mu bwe mu nengeya. 14 Tsakani mwa gu vadwa khu kotani nya lina la Kristo, kholu isoso sa gu yeyedza gu khiso mu na ni liphuvbo nya wudhumo, a gu liphuvbo la Nungungulu.

15 Ganiolu, gu nga manegi ni moyo wanu a tshanisekago khu gu ba ari gighevenga, mbafa, mugiri nya silo nyo vivbe mwendro a dzi bedzedzeyago omu nya silo savane. 16 Ganiolu, muthu a gu tshaniseka khu gu ba ari Mukristo, a nga khali dzitshoni, ganiolu a na simame gu dhumisa Nungungulu khu gu vbanya nga Mukristo. 17 Kholu eyi khiyo tepo yi vegisidwego gasi gu gulamula gu pheya khu nyumbani ga Nungungulu. Ha gu pheya khethu hi lamudwa, ma na ba mari yavbi mahegiso ya vale va si engisigo mahungu nya yadi ya Nungungulu? 18 “Nigu, sa gu ba si garadza gu muthu nyo lulame a vbulugiswa, ginani gi na giregago ga va nyo vivbedwa khu myonyo ni sighohi?” 19 Khu kharato, ava va tshanisekago khu kotani nya olu va girago gugola ga Nungungulu, va na simame gu vbanyeya Muvangi wawe a tumbegidego, na va gu gira silo nya sadi.

5 Khu kharato, olu eni neni nyi gu lidhota, nyi gu fakazi nya dzitshanisa edzi Kristo a emisanidego nadzo ni olu nyi girago gipandre nya wudhumo wu na wonegiswago, nyi ngu kutsa madhota ma gomogo vbakari gwanu, kheni: 2 Havisani tshambi wa Nungungulu mu ningidwego gasi gu wu khataleya, mu thuma kha nga madhota,* nasiri khu gu gurumedzwa, ganiolu khu gugola gwanu mbeli ga Nungungulu, nasiri khu gu vbweta gu hakha gilogyo, ganiolu khu gutsaka; 3 mu si dzi giri dzipfhumu vbatshani nya thomba ya Nungungulu, ganiolu mu khala giyeyedzo vbakari nya tshambi. 4 Nigu tepo muhavisi nya khongolo ngudzu a na wonegiswago, enu mu na hakha korowa nya wuzundzo yi gu mba hina.

5 Khu ndziya yayimweyo, enu madzaha, dzi nogiseni ga vathu va dandridego, ganiolu enu mwatshavbo dzi nogiseni mbeli ga moyo ni moyo wanu, kholu Nungungulu a ngu nyenya vathu nya gu dzi khusedze, ganiolu a ngu ninga wuwadi waye nya wukhongolo ngudzu ga vale va dzi nogisago.

6 Khu kharato, dzi nogiseni vbavbatshi nya tshivba nya libogo la Nungungulu gasi gu a kodza gu mi khusedza khu tepo yakona 7 nigu rinyani iyo gwaye gugaradzega gwanu gwatshavbo kholu uye a ngu mi khathaleya. 8 Mu nga pfhali khu gilo! Khalani na mu gengede! Nala wanu, Dhiyabhulosi, a ngu mi dzuwulugeya kha nga ngala yi ngurangurago na yi gu vbweta muthu nya gu mu hodze. 9 Ganiolu, mu wugeyeni, mu tiya gukhodwani na mu gu dziti gukhenu vandriyanu va mafuni gwatshavbo anavo va ngu emisana ni sigaradzo sasimweso. 10 Ganiolu, hwane nya gu ba mu tshanisekide vbadugwana, uye abune Nungungulu nya wuwadi nya wukhongolo ngudzu a nga mi ranani wudhumoni waye nya gupindruge, wu pwananago ni Kristo Jesu, a na mi hevbudza kala mu vidzwa. Uye a na mi tiyisa, a mi ninga tshivba, a mi vega avba nya sisekelo nya gu tiye. 11 Tshivba ya gu lumba uye, kala gupindruga. Amen.

12 Khu gu thumisa Silivhano,* nyi mu wonago nga ndruye a tumbegidego, nyi mi lovede malito yaya nya madugwana gasi gu mi tiyisa ni gu mu ningani wufakazi nya gu kheni owu khu lisine khuwo wu gu wuwadi nya wukhongolo wa Nungungulu. Tiyani avba gwawo. 13 Nyamayi* a gomogo Bhabhiloni, a hathidwego nga enu, a ngu mi losedzeya; gyanana gyangu Marko, anigyo gi ngu mi losedzeya. 14 Losanani khu bheju nya wundruye.*

Nyi ngu mi suveya gurula, mwatshavbo enu mu pwananago ni Kristo.