LIDANGALIYA NYA WUVILI LA PEDRO

1 Eni Simoni Pedro, nyi gu githumi ni mupostoli wa Jesu Kristo, nyi ngu loveya vale va manidego gukhodwa gu gu na ni lisima nya nga ogu gwathu khu kotani nya gululame ga Nungungulu wathu ni Muvbulugisi wathu Jesu Kristo, kheni:

2 Nyi ngu mi suveyani wuwadi nya wukhongolo ngudzu wa Nungungulu ni gurula, khu kotani nya olu mu tigo gwadi Nungungulu ni Jesu, Pfhumu yathu. 3 Khu kotani nya tshivba nya yikhongolo ya Nungungulu, ethu hi hakhide mahala satshavbo hi si vbwetago gasi hi vbanya womi wu dzi seketeyago avba nya gukhozeye Nungungulu. Hi hakhide silo soso kholu hi ngu muti gwadi Nungungulu. Uye a hi ranide kholu uye Nungungulu a gu na ni wudhumo nya wukhongolo ni wuwadi. 4 Khu kotani nya wudhumo ni wuwadi waye, Nungungulu a hi ningide situmbiso nya sadi ngudzu si gu na ni lisima gasi gu khu kotani gwaso mu hengeya wudhumoni wa Nungungulu nga sivangwa nya liphuvbo na mu vbulugide avbo nya guhine nya litigo, gu vangwago khu gudogoreya nya guvivbe.

5 Khu gighelo gyogyo, dzi garadzeni khu dzindziya dzatshavbo gasi mu engedzeya wuwadi avba nya gukhodwe gwanu; avba nya wuwadi wanu mu engedzeya guti; 6 avba nya guti gwanu mu engedzeya gudziphara; avba nya gudziphare gwanu mu engedzeya gutimiseya; avba nya gutimiseye gwanu mu engedzeya gudziningedzeya ga Nungungulu; 7 avba nya gudziningedzeye gwanu ga Nungungulu mu engedzeya lihaladzo nya wundruye; avba nya lihaladzo lanu nya wundruye mu engedzeya lihaladzo khu vathu vatshavbo. 8 Kholu mwa gu ba muri ni silo sesi si bwe si tala ni gu vbalageya avbo gwanu kha mu na nga vbola nigu kha mu na nga diga gu ninga mihandro maningano ni guti nya lisine ga Pfhumu yathu, Jesu Kristo.

9 Kholu oyu a gu mwalo silo sesi gikhumu, uye a gu dzi sega maho gasi a si woni guwonegeya nigu divade gu dzi agisa avba nya sighoho saye sa gale. 10 Khu kharato vandruye, simamani gu engedzeya gutiya guranwani ni guhathwani gwanu, kholu mwa gu simama gu gira silo sesi gima kha mu na nga ndreya gukhodwani. 11 Khu kharato, mu na dzumeledwa gu beya khu wudhumo Mufumoni nya gupindruge wa Pfhumu yathu ni Muvbulugisi wathu, Jesu Kristo.

12 Khu gighelo gegi, tepo yatshavbo nya gu vbweta gu mi dundrugisa khu silo sesi ambari olu mu si tigo ni olu mu tiyidego lisineni li gomogo gwanu. 13 Nigu na nyi nga romo omu nya tabhernakeli* yeyi, nya gu si wona nari sadi gu mi gengedzani khu gu thumisa sidundrugiso, 14 kholu nyi ngu dziti gukheni nya mba hweya tabhernakeli yangu yi na duswa, kha nga nyi embedwego gwadi khu Pfhumu yathu Jesu Kristo. 15 Nyi na gira satshavbo nyi si kodzago gasi gu hwane nya gu ba nyi fude, mu kodza gu dungruga silo sesi mwabune.

16 Kha ha mi tivisani tshivba ni guwuya ga Pfhumu yathu Jesu Kristo khu gu ba hi landreya matimo nya malipha ma lugidwego gwadi, wulangani nya isoso, hi mi tiviside khu gu ba hi wonide khu maho yathu wukhongolo waye. 17 Uye hakhide wuzundzo ni wudhumo wu tago khiyo ga Nungungulu, Papayi. Isoso si giregide tepo gifefe nya wudhumo nya wukhongolo, a gu Nungungulu, a ganedego malito yaya ma gu khayo: “Egi Gyanana gyangu nyi gi haladzago, gi nyi tsakisago ngudzu.” 18 Ethu hi pwide malito yaya na ma guta khu ndzadzini tepo hi nga ba hiri naye gigomoni nya guage.

19 Khiso si hi girago hi engedzeya gu tiyisega gu khethu satshavbo esi Nungungulu a ganedego si na tadzisega. Vegani gupima ga satshavbo sesi. Malito yaya ma na khale myonyoni gwanu nga guwonegeya nya kandriya gu wenengedzago gidemani (kala gugya yi bwe yi khuga thandra nya masase).* 20 Nigu gu diga satshavbo, dzitini gu khenu wu mwalo wuprofeti nya Milowo wu tago khiyo nya vathu, 21 kholu wuprofeti khandri wu di manega khu gugola nya vathu, ganiolu vathu va di ganeya esi si tago khiyo ga Nungungulu na va gu thangedwa khu liphuvbo nya guage.

2 Gu fana ni olu gu nga ba guri ni vaprofeti nya malipha vbakari nya vathu, gu na manega vahevbudzi nya malipha vbakari gwanu. Avo va na hevbudza sihevbudzo nya malipha gusihalani, iso si na tshungunulago gukhodwa gwanu, nigu va na bomba ambari ni oyu a nga va renga, nigu isoso si na va gira va fuviswa nya mba hweya. 2 Nya vangi va na landreya mavbanyelo yawe nya dzitshoni,* nigu khu kotani yawe vathu va na ganeya guvivba maningano ni ndziya ya Nungungulu. 3 Nigu khu kotani nya wudogodogo, avo va na mi londrola khu malito nya gukanganyise, ganiolu gulamudwa gwawe, gu tivisidwego gale yoyo, kha gu na nga hweya nigu gufuviswa gwawe khu lisine gu nata.

4 Khu lisine, Nungungulu kha diga gu tsayisa dzingilozi dzi nga ghoha, ganiolu dzi rinyide omu nya Tartaru,* a dzi hungeleya khu dzikorenti omu nya* gidema nya gikhongolo na dzi gu vireya gu lamudwa. 5 Uye gambe kha diga gu tsayisa litigo la gale, ganiolu a di vbulugisa Nowa, mutshumayeli nyo lulame, gumogo ni 7 vathu tepo a residego ndrambi ga vathu va si thavigo Nungungulu. 6 Uye a di lamula madhoropa ya Sodhoma ni Ghomora, a ma tsagamisa ma khala nguma, ma khala giyeyedzo nya esi si na giregeyago vale va si thavigo Nungungulu. 7 Ganiolu, a di vbulugisa muthu nyo lulame Loti, oyu a nga ba a garadzega ngudzu khu kotani nya mavbanyelo nya dzitshoni* nya sindraga-milayo, 8 (kholu tepo mwama yoyu nyo lulame a nga ba a vbanya vbakari gwawe, litshigu ni litshigu muhefemulo* waye nyo lulame wu di gu tshaniseka khu gu wona ni gupwa mithumo yawe nya gu ndrage nayo.) 9 Khu kharato, Jehovha a ngu kodza gu vbulugisa silingoni ava va mu thavago, ganiolu a vegisa vathu nya mba lulama gasi va fuviswa khu litshigu nya gulamudwe, 10 ngudzu-ngudzu ava va hengeyago malawu ni vambe gasi gu va nyenyezisa ni vale va kanyisago wufumu.

Kha nga olu va dzi girisago ni gu banga mihungo, kha va thavi gu ganeya guvivba khu vale va ningwago wuzundzo khu Nungungulu, 11 narigu dzingilozi, ambari olu dzi gu na ni tshivba nya yikhongolo, kha dzi va rwegi nandru khu malito nya guvale kholu dzi ngu ninga githawo Jehovha. 12 Ganiolu vathu vava, va gu fana ni sirengo si si pimisigo gasi gu gira gilo, si velegwago gasi gu modwa si songwa. Va gu ganeya guvivba khu silo va si sitigo. Avo va na fuviswa khu kotani nya mavbanyelo yawe nyo vivbe. 13 Va ngu tshaniseka kha nga tshatshazelo nya mithumo yawe nyo vivbe.

Si ngu va tangadzisa gu vbanyeya gu dzi tsakisa nyo vbindrise ambari mihani. Avo va gu fana ni noda yi tsundzisago libandla kholu va gu mi senga khu malipha aya va mi hevbudzago na va gu hodza nanu. 14 Maho yawe ma tade khu wubhayi nigu kha va si kodzi gu ema gu ghoha, nigu avo va gu sengedzeya ava va nga mba tiya. Myonyo yawe yi hevbudzidwe wudogodogo. Avo sanana si vadwego. 15 Va digide ndziya nyo lulame, va penga. Va landrede ndziya ya Bhalahama gyanana gya Bheyori, uye a nga gola gu livbwa khu gu ba a gira wuvivbi, 16 ganiolu kawukidwe khu gu mba landrisa esi si lulamidego. Uye pwide buru na yi gu ganeya nga khatshi muthu, na yi gu mu himbedzeya gu gira silo nyo vivbe a nga ba a vbweta gu gira.

17 Vathu vava milambo nya mba na mati nigu mapfhi ma pengiswago khu phuvbo nya yikhongolo, nigu avo va viredwe khu gidema nya gikhongolo ngudzu. 18 Avo vo ganeya silo si wonegago na si gu samadzisa, ganiolu si si phasigo gilo. Khu gu thumisa gudogoreya nya givili ni mavbanyelo nya dzitshoni,* avo va gu senga vathu va ngarigo gu duga khu vbakari nya vathu va gu na ni mavbanyelo nyo vivbe. 19 Ambari olu va tumbisago vathu gutshulega, avo vamune dzigumbi nya silo nya guhine nigu ni wevbini a padwago khu muthoyo a gu khala gumbi yaye.* 20 Khu lisine, abari gu avo hwane nya gu ba va vbulugide avbo nya wuvivbi nya litigo khu kotani nya guti nya lisine ga Pfhumu ni Muvbulugisi, Jesu Kristo, va gu tshuka va bweleya gambe va ya dzi pata omu nya silo sasimweso va bwe va padwa khiso, mahegiso yawe ma vivbide ngudzu guvbindra gupheyani. 21 Si di hadzi phasa ngudzu nari khatshi kha vati ndziya nyo lulame guvbindra guti milayo nyo lulame va vbedza va yi diga. 22 Gwawe so girega esi livingu nya lisine li ganeyago, khilo: “Yimbwa yi bwelelede magoso yayo, nigu khumba* yi handzidwego yi bwelede yi ya puluwundra gambe maragani.”

3 Sigodwa sangu, eli lidangaliya nya wuvili nyi mi loveyago, nigu gu fana ni eli nyo pheye, nyi ngu mi dundrugisani gu kheni mu pimisa khu ndziya nya yadi, 2 gasi mu dundruga esi si ganedwego gupheyani khu vaprofeti nyo age ni gileletelo gya Pfhumu, a gu Muvbulugisi mu ningidwego khu gu thumiswa vapostoli vanu. 3 Gupheya, dzitini gu khenu matshigoni nyo hegise gu na dugeleya vathu va golago gu poyila vambe. Avo va na mi poyileya, va landrisa gudogoreya gwawe. 4 Avo va na khavo: “Gomo hayi guwuya gakona gwaye gu tumbisidwego? Gukhugeya vakokwe vathu vafa, silo satshavbo si nga gu simama nga edzi si nga ba si romo khidzo gukhugeya guvangwani nya mafu.”

5 Kholu avo va gu bomba khu nyagigwenye lisine leli li gu khilo: Gukhugeya gale gu diri ni ndzadzi nigu khu gu thumiswa lito la Nungungulu, mafu ma di hambaniswa ni mati, ayo ma randredwa khu mati; 6 silo sesi si fuviside vathu va teponi yile. Isoso si giregide tepo mati ma nga fenegedza mafu yatshavbo. 7 Ganiolu, khu lito lalimwedo, ndzadzi ni mafu si gomogo muhuno, si viredwe khu nilo. Iso sa gu vegwa kala litshigu nya gu lamudwe ni gu fuviswa nya vathu va si ningigo githawo Nungungulu.

8 Ganiolu sigodwa sangu, mu nga divaledwi gu khenu ga Jehovha, litshigu limwedo la gu fana ni 1000 myaga nigu 1000 myaga ya gu fana ni litshigu limwedo. 9 Jehovha kha nonoki gu tadzisa gitumbiso gyaye, nga edzi vambe va pimisago khidzo, ganiolu a gu laphisa monyo khu kotani yanu kholu kha vbweti gu khuye ne ni moyo a fuviswa, ganiolu a gu vbweta gu khuye vatshavbo va dzi laya.* 10 Litshigu la Jehovha li nata nga mbafa. Khu litshigu lolo, ndzadzini gu na mwalalega na gu dzuma ngudzu. Silo sa ndzadzini si na nyega khu kotani nya guvbise nya gukhongolo, nigu mafu ni silo si gomogo mafuni si navbya.

11 Kha nga olu silo sesi satshavbo si na nyegiswago, dundrugeyani gwadi khedzi mu yedego gu khala khidzo. Mu yede gu khala vathu nya mavbanyelo nyo age, mu gira silo si na yeyedzago gu khiso mu ngu tumbega ga Nungungulu; 12 mu khala na mu gengede na mu gu vireya gu vboha nya litshigu la Jehovha, eli ndzadzini gu na tshungunudwago khu nilo, si bwe silo si gomogo ndzadzini si nyega khu guvbisa nya gukhongolo. 13 Ganiolu, guya khesi a hi tumbisidego, ha gu vireya ndzadzi nya yiphya ni mafu nya maphya, omu gu na ba guri ni gululama.

14 Khu kharato sigodwa sangu, kha nga olu mu vireyago silo sesi, girani satshavbo mu si kodzago gasi gu khu guhegisa uye a ta mi mana na muri mwalo noda ne gibawa, ganiolu na muri ni gurula. 15 Ni gu gambe, wonani gulaphisa monyo ga Pfhumu yathu kha nga guvbulugiswa, kha nga edzi ndriyathu nya gigodwa, Pawulo, a mi lovedego khidzo, guya khu wugengeyi a ningidwego. 16 Uye ganede khu silo sesi nga edzi a giridego khidzo omu nya malangaliya yaye yatshavbo. Ganiolu, simbe si gomogo omu nya malangaliya yoyo si ngu garadza gu si pwisisa, nigu vale va gu mbati gilo ni avo va nga mba tiya avba nya esi va si khodwago, va gu si tshomborosa kha nga edzi va girago gambe khidzo khu yimbe Milowo, va dzi reseya vabune gufuviswa gwawe.

17 Ganiolu, enu sigodwa sangu, kha nga olu mu tigo silo sesi gukhugeya gale, dzi woneyeni gasi mu si pengiswi khu sihoso sa vale va ndragago nayo, mu bwe mu si digi esi mu tiyidego gwaso. 18 Ganiolu, enu simamani gu dandra khu wuwadi nya wukhongolo ngudzu wa Nungungulu ni guti ga Pfhumu yathu a gu Muvbulugisi wathu Jesu Kristo. Uye a na ningwe wudhumo olu ni gupindruga kala gupindruga. Amen.