LIDANGALIYA NYO PHEYE LA JOHANE

1 Nyi ngu mi loveya maningano ni lito nya womi, a gu oyu a nga ba a romo gukhugeya gupheyani, uye hi nga mupwa, hi mu wona khu maho yathu hi bwe hi mu kuha khu mandza yathu. 2 (Khu lisine, hi yeyedzidwe womi; hi wu wonide nigu hi ngu fakaza ni gu mi embeya maningano ni womi nya gupindruge wu nga ba wuri ni Papayi, owu hi nga yeyedzwa.) 3 Hi ngu mi tivisa nenu esi hi nga si wona ni gu sipwa, gasi anenu mu hengeya ni ethu. Nigu ethu ha gu hengeya ni Papayi gumogo ni Gyanana gyaye Jesu Kristo. 4 Ha gu mi loveya silo sesi gasi hi tsaka ngudzu.

5 Aya mahungu hi ma pwidego gwaye, nigu hi ngu mi tivisani ayo, khethu: Nungungulu wenengedzo, gwaye gu mwalo gidema. 6 Ha gu khethu: “Hi ngu hengeya naye,” ganiolu hi simama gu gimbiya gidemani, ha gu lipha nigu kha hi vbanyi guya khu lisine. 7 Ganiolu, ha gu gimbiya guwonegeyani kha nga uye a gomogo guwonegeyani, hi ngu hengeya gumogo ethu hatshavbo, nigu novba wa Gyanana gyaye Jesu wu ngu hi agisa ga sighoho satshavbo.

8 Ha gu khethu: “Hi mwalo gighoho,” ha gu dzi kanganyisa habune, nigu lisine li mwalo gwathu. 9 Ha gu dawuleya sighoho sathu, uye a na hi divaleya a bwe a hi agisa omu nya wuvivbi watshavbo kholu uye tumbegide nigu lulamide. 10 Ha gu khethu: “Kha ha ghoha,” ha gu mu gira muliphi, nigu kha hi khodwi ga malito yaye.

2 Vanavangu, nya gu mi loveyani esi gasi mu si giri gighoho. Ganiolu, a gu tshuka muthu a gira gighoho, hi na ni muphasedzeyi* nyo lulame a gomogo ni Papayi, muphasedzeyi yoyo khu Jesu Kristo. 2 Uye muphaso wu ningedwego gasi hi divaledwa sighoho sathu, nasiri sighoho sathu basi, ganiolu sighoho nya litigo latshavbo. 3 Hi na yeyedza gu khethu hi ngu muti ha gu simama gu landrisa milayo yaye. 4 Uye a gu khuye: “Eni nyi ngu muti,” ambari ulolo na si engisi milayo yaye muliphi, nigu lisine li mwalo gwaye. 5 Ganiolu, oyu a engisago malito ya Kristo, si na yeyedza gu khiso a ngu haladza Nungungulu khu lisine. Khu kotani nya isoso, hi ngu dziti gu khethu hi ngu gimbiya naye. 6 Uye a gu khuye a ngu gimbiya ni Jesu, gu vbwetega a vbanya kha nga edzi Jesu a vbanyidego khidzo.

7 Sigodwa sangu, nayo wowu nyi mi loveyago khandri wuphya, nayo wa gale mu gu nawo gukhugeya gupheyani. Nayo wowu wa gale mahungu mu ma pwidego. 8 Ganiolu, nyi ngu mi loveyani nayo nya wuphya owu wu gu na ni lisima iyo ga Jesu Kristo ni iyo gwanu, kholu gidema gi ngu vbindra nigu guwonegeya nya lisine gu ngu wenengedza.

9 Oyu a gu khuye womo guwonegeyani, ganiolu na gu nyenya ndriyaye, a nga romo gidemani. 10 Uye a golago ndriyaye a gu simama guwonegeyani, nigu gimwalo gi na mu tshunganisago. 11 Ganiolu, oyu a nyenyago ndriyaye womo gidemani nigu o gimbiya gidemani, nigu kha dziti khuye o hongola hayi kholu gidema gi mu tshikide maho.

12 Nya gu mi loveyani vanavangu, kholu sighoho sanu si divaledwe khu kotani nya lina laye. 13 Nyi ngu mi loveyani enu vapapayi, kholu mu ngu muti wule a gomogo gukhugeya gupheyani. Nyi ngu mi loveyani enu vaphya, kholu mu pade Sathane.* Nyi ngu mi loveyani enu vanavangu, kholu mu ngu muti Papayi. 14 Nyi ngu mi loveyani vapapayi, kholu mu ngu muti wule a gomogo gukhugeya gupheyani. Nyi ngu mi loveyani enu vaphya, kholu mu na ni tshivba nigu mahungu ya Nungungulu ma ngu simama gwanu, nigu enu mu pade Sathane.

15 Mu nga goli litigo, ne esi si gomogo tigoni. Uye a golago litigo, lihaladzo la Papayi li mwalo gwaye; 16 kholu satshavbo si gomogo tigoni, gudogoreya nya nyama, gudogoreya nya maho ni gu dzi gugumugisa khu kotani nya esi muthu a gu naso kha siti khiyo ga Papayi, ganiolu sa guta khu tigoni momu. 17 Nigu litigo li ngu vbindra gumogo ni gudogoreya gwalo, ganiolu wule a girago gugola ga Nungungulu a na simama kala gupindruga.

18 Vanavangu, eyi khiyo ora nyo hegise. Kha nga mu si pwidego gu pwani gu nata nala wa Kristo, olu gu dugelede valala nya vangi va Kristo, khu kotani nya isoso hi ngu dziti gu khethu eyi khiyo ora nyo hegise. 19 Avo va dugide vbakari gwathu, ganiolu kha va nga ba va lumba tsawa wathu, kholu nari khatshi va di gu lumba tsawa wathu na va simamide gumogo ni ethu. Ganiolu, va di duga gasi va yeyedza gu khavo khandri vatshavbo va nga ba va lumba tsawa wathu. 20 Enu mu todzidwe khoyu a agidego, nigu mwatshavbo mu na ni guti. 21 Khandri nya gu mi loveyani khu gu kheni kha mu liti lisine, ganiolu kholu mu litigo ni olu ma gu mwalo malipha ma dugeyago omu nya lisine.

22 Gasi khu mani muliphi? Khu wule a ganeyago gu khuye Jesu khandruye Kristo. Nala wa Kristo khu wule a bombago Papayi ni Gyanana. 23 Ni wevbini wule a bombago Gyanana, mwalo wupari ni Papayi. Ganiolu, wule a dzumeyago Gyanana, na ni wupari ni Papayi. 24 Khu kharato, esi mu si pwidego gukhugeya gupheyani, gu vbwetega si simama nanu. So gara esi mu si pwidego gukhugeya gupheyani si simama nanu, mu na simama gu gimbiya gumogo ni Gyanana mu bwe mu simama gu gimbiya gumogo ni Papayi. 25 Khu kharato, egi khiyo gitumbiso a hi tumbisidego: womi nya gupindruge.

26 Nya gu mi loveya silo sesi khu kotani nya vale va zamago gu mi pengisa. 27 Nigu gutodzwa mu gu hakhidego khiyo gwaye gu na simame ni enu, nigu kha gu vbwetegi muthu gasi a mi hevbudza. Gutodzwa gutago khiyo gwaye, gwa gu mi hevbudza silo satshavbo nigu khwa lisine, khandri gwa malipha. Kha nga olu gu mi hevbudzidego, simamani gu gimbiya naye. 28 Khu kharato, vanavangu, simamani gu gimbiya naye gasi tepo a na wonegiswago, hi kodza gu ganeya na hi tiyide, hi si mu digi, ne hi si khali dzitshoni tepo a na wuyago. 29 Mwa gu ba mu dziti gu khenu uye lulamide, mu ngu dziti gambe gu khenu ni wevbini a girago gululama, gyanana gya Nungungulu.

3 Wonani lihaladzo a hi haladzidego khilo Papayi, nyo bwe hi ranwa pwani hi sanana sa Nungungulu! Hi sanana saye kamo. Khigyo gi girago gu litigo li si hiti, kholu ilo kha la muti. 2 Sigodwa sangu, olu hi sanana sa Nungungulu, ganiolu hi si gu embedwi iso hi na gu ba hiri iso. Hi ngu dziti gu khethu tepo a na wonegiswago hi na fana naye kholu hi na mu wona edzi a khadego khidzo. 3 Vatshavbo va gu ni gutumba gogu avba gwaye, va ngu dzi agisa kha nga uye nuye a agidego.

4 Watshavbo wule a girago gighoho a gu ndraga nayo nigu gighoho gu ndraga nayo. 5 Enu nenu mu ngu dziti gu khenu uye wonegisidwe gasi gu dusa sighoho sathu nigu uye mwalo gighoho. 6 Watshavbo a gimbiyago naye kha ghohi; wule a girago gighoho kha mu wona nigu kha muti. 7 Vanavangu, mu nga dzumeyi gu pengiswa khu muthu; oyu a girago gululama lulamide kha nga uye nuye a lulamidego. 8 Oyu a ghohago a gu dugeya ga Dhiyabhulosi, kholu Dhiyabhulosi gighohi gukhugeya gale. Khu kharato, Gyanana gya Nungungulu gi wonegisidwe gasi gu ta tshungunula mithumo ya Dhiyabhulosi.

9 Ni wevbini a gu gyanana gya Nungungulu kha ghohi, kholu na ni tshivba ya Nungungulu. Khu kharato, uye kha si kodzi gu ghoha kholu velegidwe khu Nungungulu. 10 Hi ngu vati vale va gu sanana sa Nungungulu ni vale va gu sanana sa Dhiyabhulosi, kholu: Wule a gu mba gira gululama a bwe a si haladzi ndriyaye, khandri gyanana gya Nungungulu. 11 Kholu gukhugeya gupheyani mu embedwe gu pwani gu vbwetega hi haladzana khu gyathu, 12 hi si fani ni Kayimi a nga dugeya ga Sathane, a songa ndriyaye. Khu ginani a nga mu songa? Kholu mithumo yaye yi di gu vivbide, ganiolu ya ndriyaye yi di gu lulamide.

13 Vandriyathu, mu nga hlamali kholu litigo li mi nyenyago. 14 Hi di gu gira nga khatshi hi fude, ganiolu olu hi ngu vbanya kholu hi ngu haladza vandriyathu. Uye a gu mba haladza vambe, a ngo fude. 15 Ni wevbini a nyenyago ndriyaye, gighevenga nigu mu ngu dziti gu khenu gimwalo gighevenga gi na manago womi nya gupindruge. 16 Khu kotani nya olu a ningedego womi waye kotani yathu, hi tide gu khethu ginani lihaladzo. Khu kharato, gu vbwetega hi ningeya womi wathu khu kotani nya vandriyathu. 17 Ganiolu, abari gu muthu na ni dzithomba nya litigo leli, ganiolu a wona ndriyaye na gu tshaniseka ambari ulolo a si mu gireyi wuhindzi, lihaladzo la Nungungulu la gu simama kharini gwaye kharato? 18 Vanavangu, lihaladzo lathu hi nga li yeyedzi basi khu malito ni likana, ganiolu gu vbwetega hi li yeyedza khu mithumo ni lisine.

19 Khu kotani nya isoso, hi na dziti gu khethu ha gu dugeya lisineni, nigu hi na tangadzisa myonyo yathu mbeli gwaye 20 tepo yatshavbo myonyo yathu yi na hi ningago nandru, kholu Nungungulu khongolo gu vbindra myonyo yathu nigu a nguti satshavbo. 21 Sigodwa sangu, myonyo yathu ya gu mba hi ninga nandru, hi ngu ganeya ni Nungungulu na hi tiyide, 22 hi bwe hi ningwa satshavbo esi hi lombago, kholu hi ngu engisa milayo yaye nigu hi ngu gira esi si mu tsakisago. 23 Khu lisine, nayo a hi ningago khowu: Gu vbwetega hi khodwa avba nya lina la Gyanana gyaye Jesu Kristo hi bwe hi haladzana nga edzi a hi rumidego khidzo. 24 Nigu, wule a engisago milayo yaye, a na simama gu gimbiya naye nigu uye a na simama gu gimbiya ni muthu yoyo. Nigu khu kotani nya liphuvbo a hi ningidego, hi ngu dziti gu khethu a ngu simama gu gimbiya ni ethu.

4 Sigodwa sangu, mu nga khodwi malito yatshavbo va gu pwani ma guta khiyo ga Nungungulu, ganiolu pheyani khu gu ma gevisisa gwadi gasi mi tiyisega gu khenu ma guta khiyo ga Nungungulu gani, kholu gu na ni vaprofeti nya vangi nya malipha mafuni.

2 Malito ma tago khiyo ga Nungungulu mu na mati kharati: Yatshavbo malito ma ganeyago gu khayo Jesu Kristo dzude mafuni nari muthu, ma guta khiyo ga Nungungulu. 3 Ganiolu, yatshavbo malito ma si dzumeyigo gu khayo Jesu dzude mafuni, kha mati khiyo ga Nungungulu. Malito yoyo ma guta khiyo ga valala va Kristo. Mu pwide gu pwani ma na ba ma romo, ayo momo kamo mafuni.

4 Vanavangu, enu mu sanana sa Nungungulu nigu mu pade vaprofeti nya malipha, kholu oyu a emago ni enu khongolo guvbindra oyu a emago ni litigo. 5 Avo va guta khu tigoni, khiso si girago gu tepo va ganeyago silo nya litigo, litigo li va engisa. 6 Ethu ha gu dugeya ga Nungungulu. Oyu a tigo Nungungulu a ngu hi engiseya, ganiolu oyu a si mu tigo, kha hi engiseyi. Khiso si girago hi kodza gu hambanisa malito nya lisine, aya ma tago khiyo ga Nungungulu, ni malito nya malipha.

7 Sigodwa sangu, hongoleni hi simamani gu haladzana kholu lihaladzo la guta khiyo ga Nungungulu, nigu ni wevbini a haladzago velegidwe khu Nungungulu nigu a ngu muti Nungungulu. 8 Oyu a si haladzigo, kha muti Nungungulu kholu Nungungulu lihaladzo. 9 Nungungulu yeyedzide gu khuye a ngu hi haladza, khu gu rumeya Gyanana gyaye gi velegidwego gyonga gita mafuni gasi hi ta mana womi nya mba vbeya khavbo gwagyo. 10 Lihaladzo kheli: Khandri khatshi khethu hi nga haladza Nungungulu, ganiolu khuye a nga hi haladza a bwe a rumeya Gyanana gyaye gasi gi ta khala muphaso hi feya gu divaledwa sighoho sathu.

11 Sigodwa sangu, olu Nungungulu a hi haladzidego kharati, anethu gu vbwetega hi haladzana. 12 Mwalo a tshukidego a wona Nungungulu. Ha gu simama gu haladzana, Nungungulu a na simama gwathu nigu a na hi yeyedza lihaladzo khu ndziya nyo vbeleye. 13 Hi ngu dziti gu khethu hi ngu gimbiya ni Nungungulu, nigu uye a ngu gimbiya ni ethu kholu a hi ningide liphuvbo laye. 14 Nigu gambe hi si wonide nigu hi ngu ningeya wufakazi nyo khethu Papayi rumede Gyanana gyaye gasi gu ta khala muvbulugisi nya litigo. 15 Oyu a dzumeyago gu khuye Jesu Gyanana gya Nungungulu, Nungungulu a na gimbiya naye, nigu uye a na gimbiya ni Nungungulu. 16 Nigu hi ngu liti lihaladzo eli Nungungulu a gu nalo khethu, nigu hi ngu khodwa avba nya lihaladzo lolo.

Nungungulu lihaladzo, oyu a gu na ni lihaladzo a ngu gimbiya ni Nungungulu, nigu Nungungulu a ngu gimbiya naye. 17 Khu kharato, hi yeyedzidwe lihaladzo khu ndziya nyo vbeleye gasi hi ganeya na hi tiyide ga litshigu nya gulamule, kholu idzo a gu idzo uye, khidzo hi gu idzo nethu tigoni momu. 18 Lihaladzo kha li thavi gilo, ganiolu lihaladzo nyo vbeleye li ngu tutumisa hwanga, kholu hwanga wu ngu hi himbedzeya gu gira silo nya singi. Khu lisine, uye a gu na ni hwanga mwalo lihaladzo nyo vbeleye. 19 Ethu hi ngu haladza kholu khuye a phedego khuye a hi haladza.

20 Uye a gu khuye: “Eni nyi ngu mu haladza Nungungulu,” ganiolu na gu nyenya ndriyaye, muliphi. Kholu oyu a si haladzigo ndriyaye, a mu wonago, kha si kodzi gu haladza Nungungulu oyu a si mu wonigo. 21 Nigu a hi ningide nayo wowu wu gu khuwo: Oyu a haladzago Nungungulu gu vbwetega a haladza ndriyaye gambe.

5 Oyu a khodwago gu khuye Jesu khuye Kristo, gyanana gya Nungungulu, nigu oyu a haladzago Nungungulu a ngu haladza sanana sa Nungungulu. 2 Ha gu haladza Nungungulu ni gu sayisa milayo yaye, khavbo hi dzitigo gukhethu hi ngu haladza sanana saye. 3 Gu haladza Nungungulu sa gu thula gu engisa milayo yaye, nigu milayo yaye kha yi garadzi. 4 Kholu vatshavbo va gu sanana sa Nungungulu va ngu pala litigo. Khu gukhodwa gwathu hi pade litigo.

5 Khu mani a nga si kodzago gu pala litigo? Ina khandri wule a khodwago gu khuye Jesu Gyanana gya Nungungulu? 6 Jesu Kristo dzude khu mati ni novba, khata khu mati basi, ganiolu dzude khu mati ni novba. Nigu liphuvbo li ngu ningeya wufakazi, kholu liphuvbo lisine. 7 Gu na ni dzifakazi dziraru: 8 liphuvbo nya guage, mati ni novba nigu dzadziraru dzi ngu pwanana.

9 Ha gu hakha wufakazi nya vathu, hongoleni hi dziti gukhethu wufakazi wa Nungungulu wu na ni lisima ngudzu guvbindra owu nya vathu. Kholu wufakazi wa Nungungulu, khowu: wufakazi a ningedego maningano ni Gyanana gyaye. 10 Oyu a khodwago ga Gyanana gya Nungungulu, dzumede wufakazi a ningidwego khu Nungungulu. Oyu a si khodwigo ga Nungungulu, a gu mu gira muliphi kholu kha khodwi avba nya wufakazi owu Nungungulu a wu ningedego maningano ni Gyanana gyaye. 11 Wufakazi, khowu: Nungungulu a hi ningide womi nya gupindruge khu gu thumisa Gyanana gyaye. 12 Oyu a hakhago Gyanana gya Nungungulu, a na mana womi nya gupindruge, ganiolu oyu a si gi hakhigo kha na nga wu mana.

13 Nyi mi lovede silo sesi enu mu khodwago ga Gyanana gya Nungungulu, gasi mu dzitini gu khenu mu na ni womi nya gupindruge. 14 Hi ngu tumba gu khethu ni gevbini hi lombago gi gimbileyanago ni gugola ga Nungungulu, uye a ngu hipwa. 15 Olu hi dzitigo gu khethu a ngupwa esi hi mu lombago, hi ngu dziti gambe gu khethu a na hi ninga esi hi mu lombago, kholu ha gu lomba uye.

16 Muthu a gu wona ndriyaye na gu gira gighoho gi si mu yisigo gufani, a na mu lombeleya nigu Nungungulu a na mu ninga womi. Khu lisine, a ngu ninga womi ava gighoho gyawe gi si va yisigo gufani. Gu na ni gighoho gi yisago gufani, khu kharato nyi ngu embeya muthu yoyo gu kheni a nga lombeleyi oyu a girago gighoho gyogyo. 17 Silo satshavbo nya mba lulama gighoho, ganiolu gu na ni gighoho gi si yisigo gufani.

18 Hi ngu dziti gu khethu ni wevbini a velegidwego khu Nungungulu kha giri gighoho, ganiolu Gyanana* gya Nungungulu gi ngu mu vhikeya nigu Sathane kha na nga mu kuha. 19 Hi ngu dziti gu khethu ha gu lumba Nungungulu, ganiolu litigo latshavbo lomo vbavbatshi nya tshivba ya Sathane. 20 Hi ngu dziti gambe gu khethu Gyanana gya Nungungulu gi dzude nigu gi hi ningide gupwisisa gasi guti oyu a gu wa Lisine nigu ethu hi ngu gimbiya ni oyu a gu wa lisine, khu kotani ya Gyanana gyaye, Jesu Kristo. Oyu khuye Nungungulu nya lisine ni womi nya gupindruge. 21 Vanavangu, dzi woneyeni ni sifananiso.