GIHEVBULO 8

Khu ginani hi ambalago gwadi ha gu hongola mitshanganoni yathu?

Papayi ni gyanana nya gikhwatana va ambalago sombo gasi gu hongola tshanganotunu nya libandla — Islandya

Mamayi ni gyanana nya gyadzyana va dzi dongiseyago gu hongola tshanganotunu — Mexiko

Dzifakazi dza Jehovha dza Gine-Bhisawu dzi ambadego gwadi — Gine-Bhisawu

Vathu nya ndranga mweyo va Dzifilipina va hongolago tshanganotunu — Dzifilipina

U ngu wona gu khuwe Dzifakazi dza Jehovha dzi gomogo omu nya dzifotu nya bruxura yeyi dza gu ambala gwadi dza gu hongola mitshanganoni yadzo? Khu ginani hi khathaleyago ngudzu maambalelo ni gudzimburisa gwathu?

Gasi gu yeyedza githawo khu Nungungulu wathu. Lisine gu Nungungulu kha khedzi basi edzi hi wonegago khidzo khu vbavbandze. (1 Samuweli 16:7) Ambari ulolo, ha gu tshangana gasi gu mu khozeya, myonyo yathu ya gu suva gu yeyedza githawo khu Nungungulu ni vakhozeli vakhwathu. Naripwani ha gu ranwa gasi gu ya ema mbeli ga mulamuli tribhunali, khu lisine na hi gu khathaleya ngudzu edzi hi vbwetago gu ya wonega khidzo mahoni gwaye khu kotani nya giemo gyaye. Khu ndziya yamweyo, edzi hi wonegago khidzo ha gu ba hi romo mitshanganoni sa gu yeyedza githawo gyathu khu “mulamuli nya litigo latshavbo,” Jehovha Nungungulu, ni wulanga wowu hi mu khozeyago avbo. — Genesi 18:25.

Gasi gu yeyedza milayo hi vbanyago khiyo. Bhibhiliya ya gu kutsa maKristo gu ambala “khu githawo ni gu dzi phara.” (1 Thimoti 2:9, 10) Gu ambala “khu githawo” sa gu thula gu mba ambala myendra yeyi yi girago vambe va vega gupima gwawe ga ethu, yi wusago mapimo nya gu dogoreye gu hengeya malawu, mwendro yi wonegeyago. Gu diga isoso, “gu dzi phara” ga gu hi phasa gu hatha myendra nya gumbure, ganiolu yi si ndrindrigo ngudzu maho ya vambe mwendro yi si va khunguvanyisigo. Ambari ulolo, matshina yaya nya milayo ma ngu dzumeya gu muthu ni muthu a dzi hatheya. Na hi si ganeyi gilo, edzi hi dzi mburisago khidzo si ngu kodza gu mburisa “sihevbudzo hi hakhidego khu ga Nungungulu, Muvbanyisi wathu” si bwe si mu zundza. (Tito 2:10; 1 Pedro 2:12) Khu gu ambala gwadi tepo hi hongolago mitshanganoni, ha gu phasa vambe gu wu wona gwadi wukhozeli wa Jehovha.

U nga dzumeyi gu khuwe guambala gwago gu gu himbedzeya gu manega Salawuni nya Mufumo. Hi ngu kodza gu ambala myendra yi dzumelegago, nya guage ni gukhedzega ambari na yi siri myendra nya gudhure mwendro nya gusamadzise ngudzu.

Khu ginani si gu sa lisima gu khathaleya maambalelo yathu ha gu ya khozeya Nungungulu?
Khu yavbi matshina nya milayo ma thangeyago maambalelo ni gudzimburisa gwathu?