Khu ginani Nungungulu a gu na ni hengeledzano nya sithumi saye mafuni?

1. Khu ginani Nungungulu a nga hengeledza vaIsrayeli va gale kha nga vathu vaye?

Nungungulu hengeledzide situgulwana sa Abrahama kha nga litigo a bwe a si ninga milayo. Litigo lolo li ranide khuye “Israyeli” a bwe a li ninga wukhongeli nya lisine ni lito laye. (Ndzimo 147:19, 20) Khu kharato, vathu va mayigoni gwatshavbo na va hakhide makategwa khu kotani ya Israyeli. — Hevbula Genesi 22:18.

Nungungulu hathide vaIsrayeli gasi gu khala dzifakazi dzaye. Matimo yawe ya gale ma gu yeyedza edzi vathu va phasegago khidzo khu gu engisa milayo ya Nungungulu. (Dhewuteronome 4:6) Khu kharato, vambe vathu na va tide Nungungulu nya lisine khu gu khedziseya ni gu hevbula khu vaIsrayeli. — Hevbula Isaya 43:10, 12.

2. Khu ginani Nungungulu a hengeledzidego maKristo nya lisine?

Khu gugimbiya nya tepo, Israyeli luzide mathomo ya Nungungulu. Khu kharato, Jehovha a di tshikedza litigo lolo khu libandla nya wuKristo. (Matewu 21:43; 23:37, 38) Muhuno, wulangani wa vaIsrayeli, maKristo nya lisine ma gu thuma kha nga dzifakazi dza Jehovha. — Hevbula Mithumo 15:14, 17.

Jesu hengeledzide valandreli vaye gasi va tshumayela ni gu gira vapizane mayigoni yatshavbo. (Matewu 10:7, 11; 24:14; 28:19, 20) Thumo wowu wu ngu vboha mahegiso matshigu yaya, guvbeyani nya makhalelo yaya nya silo. Eyi khiyo tepo nya gupheye omu nya matimo Jehovha na tshanganisa dzimiliyoni nya vathu va mayigoni yatshavbo wukhozelini nya lisine. (Gutuledwa 7:9, 10) Makristo nya lisine ma tshanganisidwe gasi gu tiyisana ni gu phasana. Mafuni gwatshavbo, ayo ma gu thumisa longoloko wamowo nya gu hevbule Bhibhiliya mitshanganoni yawe. — Hevbula Vahebheru 10:24, 25.

3. Gasi yi phede kharini hengeledzano nya Dzifakazi dza Jehovha matshiguni yathu?

Omu nya myaga nya 1870, tsawa nya wudugwana nya sihevbuli nya Bhibhiliya wu phede gu tugula nya luphya lisine nya Bhibhiliya li nga ba li dzimede gale. Uwo wu di gu dziti gu khuwo Jesu a di tshanganiside libandla nya wuKristo gasi gu tshumayela, khu kharato wu phede thumo nya gu tshumayele Mufumo mafuni gwatshavbo. Khu 1931 avo va dzi thude lina nya gu pwani Dzifakazi dza Jehovha. — Hevbula Mithumo 1:8; 2:1, 4; 5:42.

4. Thumo nya gutshumayele wa Dzifakazi dza Jehovha wa gu thangedwa kharini?

Khu lizana nya myaga nya gupheye, mabandla nya wuKristo mayigoni nya mangi ma di gu phasega kholu ma nga ba mari ni huwo nya guthangeye, yi nga ba yi wona Jesu kha nga Hungo nya libandla. (Mithumo 16:4, 5) Muhuno nugo, Dzifakazi dza Jehovha mafuni gwatshavbo dzi ngu phasega kholu dzi gu na ni Huwo nya Guthangeye yi wumbwago khu madhota ma vidzidwego. Iyo ya gu woneleya dzixikiritori dza Dzifakazi dza Jehovha dzi gomogo mayigoni, dzi vbindrugedzeyago, dzi ghandla ni gu rumeya dzilivru dzi hevbudzago Bhibhiliya khu malimi ma vbindrago 600. Khu kharato, Huwo nya Guthangeye yi ngu kodza gu rumeya mahungu ma seketedwago omu nya Bhibhiliya gasi gu tiyisa ni gu thangeya mabandla ma vbindrago 100 000 mafuni gwatshavbo. Mabandlani yatshavbo, gu na ni vama va vidzidwego va thumago kha nga madhota, mwendro vawoneleyi. Vama vovo va gu sayisa tshambi wa Nungungulu khu lihaladzo. — Hevbula 1 Pedro 5:2, 3.

Dzifakazi dza Jehovha dzi hengeledzidwe gasi gu tshumayela mahungu nya yadi ni gu gira vapizane. Gu fanana ni vapostoli, ethu ha gu tshumayela dzindragani. (Mithumo 20:20) Ethu gambe ha gu dzi ningedzeya gu hevbudza Bhibhiliya vathu nya myonyo nya yadi va golago lisine. Ganiolu Dzifakazi dza Jehovha khandri hengeledzano basi. Ethu hi ndranga yi gu na ni Babe nya lihaladzo. Hi vandruye nya vama ni vanyamayi hi khathaleyanago. (2 Vatesalonika 1:3) Olu vathu va Jehovha va tshanganisidwego gasi gu tsakisa Nungungulu ni gu phasa vambe, avo va gu wumba ndranga nya gu tsake ngudzu gu vbindra dzatshavbo dzindranga mafuni. — Hevbula Ndzimo 33:12; Mithumo 20:35.