Sihalo hi Tsakago Khu gu Wuti

U di nga lembedwa silo?—a Bhibliya yi ngu ganeya khu sihalo nya guhathege wu ranwago pwani “sihalo nya guage,” NM. Uwo wu agide kholu wu tago khu ga Nungungulu. Wa gu ranwa pwani sihalo kholu vathu kha va nga ba va wuti. Ambari dzingilozi dzi di gu dzina guti simbe si yelanago nawo. U ngu dzina gu wuti sihalo wowo?—

Gale yoyo, Nungungulu giride mwama ni nyamayi nya gupheye. Va di gu ranwa pwani khu Adhamu ni Evha. Nungungulu a di va ningide ndranga nya gumbure yi nga ba yi ranwa pwani lithembwe la Edheni. Naripwani Adhamu ni Evha va di engiside Nungungulu, avo ni sanana sawe na va vbindrugedzide mafu yatshavbo ma khala paradhesi nya gu fane ni lithembwe la Edheni. Avo na va vbanyide Paradhesini kala gupindruga. Ganiolu, u ngu dundruga esi Adhamu ni Evha va nga gira?—

Adhamu ni Evha kha va engisa Nungungulu. Khu kotani nya isoso, muhuno ethu kha hi vbanyi paradhesini. Ganiolu Nungungulu a di khuye a na vbindrugedza mafu yatshavbo ma mbura, gasi vathu vatshavbo va vbanya kala gupindruga na va tsakide. Nungungulu a na gira kharini isoso? Gu vbindride tepo nya yingi vathu na va si dziti. Isoso si di sihade.

Tepo Jesu a nga ta mafuni, hevbudzide vathu silo nya singi si yelanago ni sihalo wowo. Uye a di khuye uwo wa gu yelana ni Mufumu wa Nungungulu. Jesu a di embeya vathu khuye va na gire milombelo gasi Mufumu wowo wute. Uwo wu na vbindrugedza mafu ma khala paradhesi nya gumbure.

U tsakide khu guti sihalo wowo?— Dundruga gu khuwe ava va engisago Jehovha khavo basi va na vbanyago Paradhesini. Bhibliya yi ngu ganeya khu vama ni vanyamayi nya vangi va nga engisa Jehovha. U ngu dzina gu vati?— Hongoleni hi wona vangani nya avo nedzi hi fanedego gu va pimedzeya khidzo.