Va di tshumayela khu gutiya-hwambo

Gu diri ni mwama nyo khaguri a nga ba si kodzi gu gimbiya, a nga ba a khala vbamwanya nya tempele a lomba zomola tshigu ni tshigu. Ni siyambo nyo khaguri, a di wona Pedro ni Johane na va hongola tempeleni. A di va embeya khuye: ‘Nyo lomba zomola.’ Pedro khuye: ‘Gwadi nyi gu ninga gilo nya lisima ngudzu nyo vbindre dzitsapawu. Khu lina la Jesu, khuga u ema u bwe u gimbiya!’ Pedro a di mu phasa gu khuga a ema, khavbovbo mwama wule a di pheya gu gimbiya! Vathu va di tsaka ngudzu khu gilewugiso gegi nyo bwe vambe nya vangi va khodwa ga Jesu.

Ganiolu, vapristi ni Vasadhusi va di goroga ngudzu. Va di mola vapostoli va hongola navo omu nya nyumba gu nga ba gu lamudwa umo vathu, va ya khavo: ‘Khu mani a nga mi ningani tshivba nyo vbanyise mwama yoyu?’ Pedro khuye: ‘Khu Jesu Kristo, wule mu nga mu songa.’ Vathangeyi nya wukhongeli va di ganeya khu lito nyo khugege, khavo: ‘Nga digani gu ganeya khu Jesu!’ Ganiolu, vapostoli va di hlamula khavo: ‘Kha hi na ga diga. Gu vbwetega hi ganeya khuye.’

Tepo Pedro ni Johane va nga digwa va hongola, va di hongola ga ava vambe vapizane va ya va embedzeya esi si nga girega. Va di gombeya ga Jehovha vatshavbo, khavo: ‘Jehovha, ho lomba gu khethu u hi tiyisa hwambo gasi hi kodza gu simama gu gira thumo wago.’ Jehovha a di va ninga liphuvbo nya guage, khavbovbo va simama gu tshumayela ni gu vbanyisa vadwali. Gu di simama gu engedzeya vathu va nga ba va khodwa ga Jesu. Vasadhusi va di nyenya ngudzu vapostoli nyo bwe va va mola nigu va khotheya pasoni. Ganiolu, ni wutshigu wakona, Jehovha a di rumeya ngilozi yi ya tula malimba nya lipaso, yi embeya vapostoli khiyo: ‘Bweleyani tempeleni mu ya hevbudza.’

Ni dzimindru dzakona, madhota ni vathangeyi nya wukhongeyi va di embedwa gu pwani: ‘Lipaso li nga khotidwe. Ganiolu, vama vale mu nga ba mu va khothede va dugide! Vomo tempeleni olu va hevbudza vathu!’ Vapostoli va di modwa gambe va yiswa omu nya nyumba gu nga ba gu lamudwa umo vathu. Mupristi nya khongolo khuye: ‘Mu ngu dundrugani gu khenu nyi mi ningide nayo nya gu mu si ganeyi gambe khu Jesu?’ Pedro a di hlamula khuye: ‘Gu vbwetega hi engisa Nungungulu kha nga pfhumu guvbindra vathu.’

Vathangeyi nya wukhongeli va di goroga ngudzu nyo bwe va vbweta gu songa vapostoli. Ganiolu, Mufarisi nyo pwani khu Gamaliyeli, a di khuga a ema khuye: ‘Dzi woneyeni! Vama vava adzina vo phaswa khu Nungungulu. Mo vbweta gu dwana ni Nungungulu?’ Va di engisa wusingalagadzi waye. Va di va veta va bwe va va embeya gu khavo va di yede gu diga gu tshumayela, khavbovbo va va diga va hongola. Ganiolu, vapostoli va Jesu kha va diga gu tshumayela khu kotani nya isoso. Va di simama gu tshumayela mahungu nya yadi khu ndranga ni ndranga na va si thavi gilo.