Lidangaliya la Huwo nya Guthangeye
Gu vbwetega mu khala “vahevbudzi.” (Hebh. 5:12) Nga dundrugeya khu Jehovha — Muhevbudzi nya wadi ngudzu guvbindra vatshavbo tigoni — a gu hi rana gasi guta hevbudza vambe maningano naye! Ni yevbini ndziya hi hevbudzago khiyo lisine maningano ni Jehovha, gani ndrangani, libandlani, mwendro thumoni nya gutshumayele — lithomo nya lisima ngudzu nigu i thumo nya wukhongolo. Hi nga dugeleya kharini thumoni wowo?
Hlamulo wo manega ga malito aya mupostoli Pawulo a lovedego Thimoti: “Simamisa gu hevbulela vakhodwa . . . , u va tiyisela ni gu va hevbudza.” A di bwe khuye: “Khu kharato, u na mana guvbanyiswa uwe ni vale va gu yingisago.” (1 Thim. 4:13, 16) Mahungu u tshumayelago, ma rwade womi nya vathu. Khu kharato, gwadi gu dzi garadzeya gu tshukwadzisa malerelo ni mahevbudzelo yago. Bruxura yeyi yi giredwe gu gu phasa gu gira isoso. Wona makhalelo nyo khaguri nya bruxura yeyi.
Pajina ni pajina yi na ni lowo wu khumbugidwego wu gu na ni litshina nya nayo nya Bhibhiliya li yelanago ni gihevbulo gyogyo, mwendro giyeyedzo nya magirelo nya esi si vbwetegago avba nya gihevbulo gyogyo
Jehovha khuye “Muhevbudzi nya Khongolo.” (Isa. 30:20) Kha nga olu bruxura yeyi yi na lodzago makodzelo yago nyo leri ni gu hevbudza, u nga divali gu khuwe Jehovha khuye Gifefe nya mahungu yathu nigu khuye a ranago vathu vata hengeledzanoni gwaye. (Joh. 6:44) Khu kharato, tepo yatshavbo gombeya u lomba liphuvbo nya guage. Thumisa Lito la Nungungulu tepo yatshavbo. Phasa vathu gu wona Jehovha, nasiri uwe. Dzi garadzeye gu phasa vaengiseyi vago gu haladza Jehovha khu monyo watshavbo.
U ranedwe guta hevbudza mahungu nya lisima ngudzu guvbindra yatshavbo aya vathu va tshukidego va mapwa. Kha hi kanakani gu khethu wa gu tumba ‘tshivba hi ningwago khu Nungungulu’, u na dugeleya thumoni gwago. — 1 Ped. 4:11.
Vahevbudzi-kwanu,
Huwo nya Guthangeye nya Dzifakazi dza Jehovha