GIHEVBULO 7

Ganeya mahungu nya lisine va na ma khodwago

Luka 1:3

ESI U YEDEGO GU GIRA: Thumisa mabhuku ni simbe sifefe nya mahungu nyo tumbege gasi gu phasa vaengiseyi vago gu vboheya mahegiso nya lisine.

Khedza omu nya mabhuku mwendro sifefe nya mahungu nyo tumbege. Seketeya mahungu yago omu nya Lito la Nungungulu, gira khu gu leri so kodzega. Wo tshuka u khumbuga mahungu nyo khaguri nya siyensiya, mahungu ma palusidwego, litshango nyo khaguri, mwendro giyeyedzo gi seketeyago mahungu yoyo, pheya khu gu khedza gu khuwe libhuku lolo li ngu tumbega nigu kha la vbindredwa gani.
Thumisa gwadi mabhuku. Tshamuseya milowo khu guyelana ni mongo wakona, khu guyelana ni mongo nya litshina nya Bhibhiliya, ni mabhuku nya ‘githumi nya gutumbe ni nya gugengeye.’ (Mat. 24:45) Thumisa mabhuku ni simbe sifefe nya mahungu nya litigo khu guya khedzi ma lovidwego khidzo gupheyani nigu u nga ganeyi silo nyo hambane ni esi si lovidwego khu mulovi.

U nga vbindrisi esi va nga ganeya, gupata ni mitengo yakona. Dzi woneye gasi gu omu va gu pwani “vathu nyo khaguri” huwe khuwe “gutala nya vathu”, “dzimbe dzitepo” huwe khuwe “tepo yatshavbo”, ni omu va gu pwani “adzina kha sa girega” huwe khuwe “kha sa girega.”
Va phase gu dundrugeya khu siyeyedzo. Hwane nyo leri lowo mwendro gu khumbuga malito nya libhuku nyo khaguri, gira siwudziso khu wugengeyi mwendro gu tshamuseya khu gu thumisa siyeyedzo si na phasago vaengiseyi gu vboheya mahegiso nyo khaguri vabune.