Ginani u nga gi hevbulago ga makristo ma vidzidwego khu liphuvboni?

Mabandlani gwathu gu ni vathu va thumeyago Jehovha khu myaga nya yingi. Hi nga hevbula khu gutumba va gu nago khu Jehovha. Hi nga va wudzisa khu matimo nya hengeledzano ya Jehovha ni sigaradzo va tshanganidego naso ni edzi Jehovha a va phasidego khidzo gu si pala. Adzina hi nga rana moyo nya vandriyathu vovo gasi vata hi bhuleya khu matshango yawe avba nya wukhozeyi nya ndranga.

Wa gu ba uri mukristo nyo vidzwe khu liphuvboni, u nga bhuleya makristo nya maphya khu gukhodwa gwago. Jakobe ni Josefa va bhulede matshango yawe situgulwana sawe. (Ge 48:21, 22; 50:24, 25) Jehovha a embede mihungo nya dzindranga gasi gu hevbudza sanana sawe maningano ni mithumo yaye nya tshivba. (Dhet 4:9, 10; Ndz 78:4-7) Matshiguni yathu, vavelegi ni vambe libandlani va ngu hevbudza vaphya khu silo nyo samadzise va wonago Jehovha na si tadzisa ndrani nya hengeledzano yaye.

WONA VHIDHIYU SAYISANI GUPWANA AMBARI THUMO WATHU WA GU HIMBEDZEDWA, KHU GU LANDREYA MU HLAMULA SIWUDZISO SESI:

• Bheteli ya Austria yi phaside kharini vandriyathu va mayigoni nyo khaguri omu thumo wathu wu nga ba wu himbedzedwa?

• Vandriyathu va mayigoni momo va giride kharini gasi va simama na va tiyide gukhodwani?

• Khu ginani vahuweleyi nya vangi va Romênia va nga dzi hambanisa ni hengeledzano ya Jehovha, nigu va giride kharini gasi gu wuyela?

• Matshango yaya ma gu tiyisa kharini gukhodwa gwago?