Haguleya wupari wago ni Jehovha

Dzifakazi dza Jehovha dzi na ni lithomo nyo hathege ngudzu. Kha nga makristo ma dzi hendzeledzidego ma Bhabhatiswa, hi yede gu simama gu haguleya wupari wathu ni Pfhumu yi khugegidego ngudzu mafuni ni ndzadzini, Jehovha. Uye khu gu dzina gwaye a hi rumede gyanana gyaye. (Joh 6:44) Uye gambe a ngu engiseya milombelo yathu. — Ndz 34:15.

Hi nga gira kharini gasi gu vhikeya wupari wathu ni Nungungulu? Nyo pheye, ku gu hi potsa silo nyo vivbe, guhambana nesi vaIsrayeli va nga gira. Kholu hwane nya gu gire gidzumeledzwano nya pwanano ni Jehovha, va di gira githombe nya gimombyana nya ouro va gi khozeya. (Eks 32:7, 8; 1Ko 10:7, 11, 14) Hi yede gu dzi wudzisa khethu: Ginani nyi nga girago nya gu tshuka nyi emisana ni gilingo? Mavbanyelo yangu ma ngu yeyedza gu khayo nyi ngu haguleya wupari wangu ni Jehovha? Ha gu gola Jehovha khu monyo wathu watshavbo, uye a na sayisa mihefemulo yathu. — Ndz 97:10.

YEYEDZA VHIDHIYU YI GU KHIYO: SAYISA WUPARI WAGO NI JEHOVHA (KOL 3:5), KHU HWANE MU HLAMULA SIWUDZISO SESI:

• Ginani wudogodogo?

• Khu ginani hi yedego gu potsa ligungo ni gu khozeya vanungungulu nya malipha?

• Wubhayi ni gu khozeya sifananiso so pwanana kharini?

• Khu ginani ava va gu ni malungelo hengeledzanoni va yedego gu tiyisega gu khavo va ngu khathaleya esi si vbwetwago khu pari yawe nya wugadzi?