“Gu divaleya sighoho si giridwego galeyoyo”

Hi nga divaledwa sighoho sathu basi khu kotani nya dzegiso wa Jesu a livbidego khu novba waye. (Efes. 1:7) Ganiolu, Bhibhiliya yari khiyo: “Uye [Nungungulu] kha yeyedza basi gululama gwaye khu gu divaleya sighoho si giridwego galeyoyo,” iso si thulago gu khiso na wu si manegi dzegiso wa Jesu. (Rom. 3:25) Sa gu kodzega kharini gu Jehovha a divaleya sighoho na wu si manegi dzegiso a bwe a simama nari Nungungulu nya gululame?

Jehovha tumbiside “gitugulwana” gi nga hadzi gu vbulugisa ni wevbini a khodwago gwaye ni avba nya situmbiso saye. Tepo a nga gira gitumbiso gegi, si di gu gira gu khatshi dzegiso wu di gu livbidwe. (Gen. 3:15; 22:18) Nungungulu a di gu tiyisega gu khuye Gyanana gyaye gi di hadzi gu dzi ningeya khu tepo yakone kha nga dzegiso khu monyo wagyo watshavbo. (Gal. 4:4; Hebh. 10:7-10) Tepo Jesu a nga ba a romo mafuni, Jehovha a mu ningide tshivba nya gu divaleye sighoho na si ningeye womi waye kha nga dzegiso. Jesu a divalede sighoho sa vale va nga ba vari ni gukhodwa kholu a di gu dziti gu khuye dzegiso waye wu di hadzi gu divaleya sighoho sawe satshavbo. — Mat. 9:2-6.