Siwudziso si girwago khu valeri

2 Vatesalonika 3:14 a gu khumbuga malito ma gu khayo “dzi woneyeni naye” mwendro “mu vegeni gifungo.” Ina makungo yaya ma yedwe gu hungwa khu madhota mwendro khu vahuweleyi libandlani?

Mupostoli Pawulo a di loveya Makristo ya Tesalonika gu khuye: “Ganiolu, a gu tshuka moyo wanu a si engisi esi hi si ganeyago avba nya lidangaliya leli, dzi woneyeni naye, mu diga gu dzi tshanganisa naye gasi apwa dzitshoni.” (2 Tes. 3:14) Gale hi di gu ganeya gu khethu gileletelo gegi gi di gu ningwa basi madhota. Gale madhota ma di gu vega ganelo nya gigengedzo libandlani a gu tshuka a manega muthu nyo khaguri a simamago gu mba engisa wusingalagadzi nya Lito la Nungungulu. Khu gu landreya, vahuweleyi va di si vbungadzi ni muthu yoyo.

Ambari ulolo, gu di gu vbwetega gu tshukwadzisa silo nyo khaguri. Olu, ethu hi ngu pwisisa gu khethu wusingalagadzi wa Pawulo wu di gu thula makungo Makristo ma nga ba ma yede gu hunga maningano ni siemo nyo khaguri. Khu kharato, kha si vbwetegi gambe gu madhota ma vega ganelo nya gingengedzo. Khu ginani mapwisiselo nya libhuku la 2 Vatesalonika 3:14 ma nga vbindrugedza? Wona esi Pawulo a nga ba a vbweta gu ganeya tepo a nga ninga wusingalagadzi wowu.

Pawulo a di wona gu khuye vathu nyo khaguri libandlani va diri “ni mavbanyelo nyo vivbe.” Avo kha va nga ba va engisa wusingalagadzi nya Lito la Nungungulu. Ga liendro a giridego, uye a ningide wusingalagadzi wu gu khuwo: “Oyu a si dzinigo gu thuma a nga hodzi.” Ambari ulolo, vathu nyo khaguri va ngu bomba gu thuma gasi gu dzi sayisa ambari na va si kodza gu gira isoso. Avo gambe va di gu dzi bedzedzeya womini ga vambe. Makristo ma yede gu phara kharini vathu vovo va gu na ni mavbanyelo nyo vivbe? — 2 Tes. 3:6, 10-12.

Pawulo a di ganeya gu khuye: “Dzi woneyeni naye” mwendro “mu vegeni gifungo.” Khu Gigreki lito lolo li nga tshamuseya gu khilo hi yede guti gu khethu muthu yoyo a nga hi kutsedzeya gu gira silo nya mba sadi. Pawulo a di ninga wusingalagadzi wowu vatshavbo libandlani nasiri ga madhota basi. (2 Tes. 1:1; 3:6) Khu kharato, ni wevbini Mukristo a wonago gu khuye ndriyathu nyo khaguri kha engise wusingalagadzi wa Nungungulu, a nga hatha gu “dzi hambanisa” naye.

Ina isoso so thula gu khiso hi yede gu mu phara nga muthu a dusidwego libandlani? Ahihi. Pawulo a di engedza gu khuye: “Simamani gu mu ninga wusingalagadzi nga ndriyathu.” Khu kharato, Makristo ma di hadzi gu tshangana ni ndriyathu yoyo mitshanganoni ni thumoni nyo tshumayele, ganiolu ma hatha gu mba vbungadza ni ndriyathu yoyo. Khu ginani? Pawulo a di khuye, “gasi apwa dzitshoni.” Tepo hi emago gu vbungadza ni ndriyathu yoyo, uye a napwa dzitshoni khesi a girago a bwe a vbindrugedza. — 2 Tes. 3:14, 15.

Makristo muhuno ma nga thumisa kharini wusingalagadzi wowu? Gupheya, hi yede gu tiyisega gu khethu ndriyathu yoyo kamo a na ni mavbanyelo nyo vivbe kha nga edzi Pawulo a tshamusedego khidzo. Uye kha nga ba a ganeya khu vathu vale va gu na ni livhalo mwendro mawonelo nyo hambane ni ayo yathu. Nigu kha nga ba a ganeya khu vale va nga hi khunguvanyisa. Wulangani nya isoso, Pawulo a di gu ganeya khu vale va gu mba engisa wusingalagadzi wa Nungungulu khu nyagigwenye.

Muhuno, ha gu wona gu khethu ndriyathu nyo khaguri kha engise wusingalagadzi nya Lito la Nungungulu,a hi na hunga gu mba vbungadza naye. Kha nga olu a gu silo moyo ni moyo a yedego gu hunga, kha hi yeli gu bhula silo soso ni ava va gu siri va ndrangani gwathu. Nigu hi na simama gu tshangana ni muthu yoyo mitshanganoni ni thumoni nyo tshumayele. Tepo muthu yoyo a vbindrugedzago mavbanyelo yaye, ethu hi na pheledza gu vbungadza naye.